fauji bhaaiyon ko Shreya Ghoshal ka pyar bhara namaskaar. sabse
pehle bahut saara pyar mere fauji bhaaiyon ko.mujhe bahut khushi ho
rahi hai ki is 'show' mein bolne ka mauka mila. bachpan se
jis 'show' mein baDe baDe fankaaron ko sunti aa rahi hoon,
usi 'show' mein aaj mujhe bhi mauka mila hai bolne ka. bahut saari
baaten karni hai, meri baaten bhi sangeet ki hi baaten hain. kuchh
aise gaane main aapko sunwaayungi jo yaa to mere liye aham hai yaa
phir mujhe pasand hai. pehla gaana meri pehli film Devdas. is film
ka jo pehla 'record' kiya gaana hai woh sunwaati hoon,
(sings) "bairi piya baDaa bedardi"

Song: bairi piya baDaa bedardi (Devdas)

pataa naheen aap ko yeh gaana kaisa lagaa par mere liye yeh gaana
bahut 'sentimental' hai. isi film ke liye mujhe pehla Filmfare Award
mila tha. isliye bhi kyunki main ek 'Bengali family' ko 'belong'
karti hoon aur mera pehla hi film ek 'Bengali novel' par 'based'
tha, Sarat Chandra ki yeh 'novel' thi Devdas. aisi hi ek
aur 'Bengali period film' thi Parineeta. is film mein ek bahut
hi 'playful' gaana tha jo ek 'duet' tha Sonu Nigam ke saath, "piu
bole piya bole". is gaane ki 'recording' se juDee baat bataata hoon
aapko. 'this song was more of a song in the making', ki film
ka 'hero' 'heroine' ke saath milkar gaana banaata hai. isliye mujhe
samajh naheen aa raha tha ki kaise is gaane ko 'express' karoon.
Shantanu Moitra, jo 'music director' the, phir Vidhu Vinod Chopra-ji
aur Pradeep Sarkar-ji, in sab ne kaha ki 'just enjoy the song',
khelo is gaane ko. 'music' bhi zyaada 'loud' naheen tha, maine
bahut 'enjoy' kiya is gaane ko gaate huye, yehi geet sunwaati hoon
aap ko.

Song: piu bole piya bole (Parineeta)

yeh film to pichhle saal mere liye 'important' rahi, logon ne pasand
bhi kiya. ek aur film aur uske gaane jo bahut zyaada pasand keeye
gaye, chhoTe shaheron ke chaai ke dukaano mein aur 'multiplex' mein
bhi 'equally hit' rahe, jisse yeh saabit hota hai ki sangeet
kisi 'boundaries' ko naheen maanti, 'I feel so humbled and blessed'
ki bhagwaan ne mujhe aisi aawaaz dee hai, aap fauji bhaaiyon ko mera
naam pataa hai, 'I am blessed'. main jis film ki baat kar rahi hoon
woh hai Zeher. ab jo geet main sunwaane jaa rahi hoon woh isi film
ka hai. yeh gaana itna pyara hai ki jab Noorjehan-ji gaaya karti
theen, woh 'nostalgia', bahut hi pyara gaana hai. Saeed Quadri ne
likha itna pyara hai aur Anu Malik-ji ne itnaa achchha 'music' diya
hai aur 'arrangement' kiya hai, Mahesh Bhatt, Mohit Suri, sabne
bahut achchha gaana banaaya hai, (sings) "agar tum mil jaao zamana
chhoD denge hum".

Song: agar tum mil jaao zamana chhoD denge hum (Zeher)

jee yeh gaana tha film Zeher ka. ab tak maine 3 gaane sunwaaye aur
teeno mere gaaye huye the. apne gaane sunwaake aapko maine 'bore'
kar diya hoga. ab ek aisa gaano jo mujhe pasand hai, jise
ek 'legendary singer' ne gaaya hai, jo aaj bhi jawaan hai. jee haan,
Kishore Kumar, unka naam lete hi 'so many songs come to mind', ek
gaana chunna mushkil hai. unka gaaya film Aap Ki Kasam film ka ek
gaana sunwaana chaahoongi jo mujhe aur mere 'daddy' ko bahut pasand
hai, "zindegi ke safar mein guzar jaate hain jo mukaam woh phir
naheen aate". iska 'lyrics' itna achchha hai ki har kisi pe laagoo
hota hai. aap fauji bhaai jo hamaare liye itna kuchh karte ho, hum
aap ke sadaa aabhaari rahenge, 'we miss you'. yeh gaana aap ke
liye 'dedicate' karti hoon.

Song: zindegi ke safar mein guzar jaate hain (Aap Ki Kasam)

mujhe itna maaloom hai ki aap se baaten karne ka aur apni pasand ke
gaane sunaane ka aisa mauka phir naheen milega, isliye kuchh aur
geet sunaa deti hoon. Devdas ke baad jo agli 'hit film' meri aayi
thi, woh thi Jism. M M Kreem sir ka 'music' tha, yeh gaana Bipasha
Basu par 'picturise' kiya gaya tha, 'so definitely' yeh khoobsurat
gaana hi hogaa, (sings) "jaadoo hai nasha hai..."

Song: jaadoo hai nashaa hai madhoshiyaan (Jism)

is gaane ke baad ek aisa gaana sunwaana chaahti hoon jo mera 'duet'
hai Arnab Chakraborty ke saath. iske 'music director' the Ram
Sampat. yeh 'action film' Khakee ka gaana hai, yeh bhi mere
liye 'important' tha kyunki maine har tarah ke 'genre' ke filmon
mein gaane gaaye hain, par 'action' filmon mein bahut kam gaaya hai.
isliye main chaahti hoon ki aap is film ka gaana sune, yeh gaana
Aishwarya Rai aur Akshay Kumar par picturise kiya gaya hai.

Song: vaada rahaa pyar se pyar ka (Khakee)

itne saare gaane maine aapko sunaaye, ek aur sunwaakar 'sign-off'
karna chaahti hoon. ab tak main aapko sirf 'romantic' gaane hi
sunwaati aayi hoon. ab ek aisageet jo aap se juDee huyi hai. LoC
Kargil, yeh ek hi 'patriotic' film hai jismein maine gaaya hai. is
gaane ke jo shabd hain, usey aap aur aapke gharwaale 'feel' karte
honge. aap jab 'border' par rehte hain to yahaan aap ke ghar mein
koi na koi aap ko 'miss' karte honge, hum bhi aapko 'miss' karte
hain. yahaan par main aapko LoC Kargil film ka gaana sunaana chaahti
hoon.

Song: pyar bhara geet koi dekho piya tumko gaana hi hogaa (LoC
Kargil)

aur ab aapko 'bye' kehne ka waqt aa gaya. 'we really love you so
much and we miss you'. aap sab khush rahen, swasth rahen. aap
ko 'thanks' kehne ke liye hamaare paas shabd naheen hai, aapke liye
duaa karti hoon aur ek saath milke kehti hoon... Jai Hind!

THE END