VISHESH JAIMALA – ANURADHA PAUDWAL

Recorded in 1987

Fauji bhaiyon, aap sabko mera sangeetmay namaskaar. Aaj aapse milte
huye mujhe kitna aanand aa raha hai, yeh Shivji ka aasirwaad naheen
to bhala aur kya hai. Aaj main aapko mere pasand ke kuchh gaane
sunwane jaa rahi hoon. Arunji, jo kabhi mahaan sangeetkaar Sachin Deb
Burman ke assistant huya karte the, ek baar aisa huya ki film
Abhimaan mein background music ke taur par ek shlok rakhna tha. To
Burman dada ne Arunji se kahaa ki aap to Maharashtrian hain, mujhe
pataa hai aapke gharon mein bahut achchhe achchhe shlok gaaye jaate
hain, ab aapko hi iska intezaam karna hoga. Arunji ghar aakar meri
awaaz mein ek shlok cassette par record kiya aur agle din Burman dada
ko sunaaya. Unko meri awaaz mein wo shlok sunkar itna achchha lagaa
ki unhone usi roop mein woh shlok film mein daalne ke liye tayyaar ho
gaye, aur is tarah se film jagat ke darwaaze mere liye khul gaye.

Shlok: Omkaaram bindu sanyuktam (Abhimaan)

Iske keval teen din baad Jaidevji ne mujhe bulaaya aur mujhe ek poora
gaana gaane ka mauka diya. Woh mera pehla geet aur woh bhi mahaan
gayak Mukeshji ke saath. Mukeshji jitne bade gaayak the usse bhi
mahaan insaan bhi the. Unhone mera hausla badhaaya aur unke saath
mera pehla gaana record huya. Ab main aapko Jaidevji ke sangeet
nirdeshan mein film Dooriyan ka ek geet sunata hoon.

Song: Zindegi mere ghar aana (Dooriyan)

Aur phir uske baad to zindegi ke naye naye dwaar khulte chale gaye
aur nit naye gaane milte gaye. Un dinon Bappi Lahiri ubharte huye
sangeetkaaron mein se the. Unka yeh aatmavishwaas itna zyaada tha ki
mujh jaise naye singer ko Rafi sahab ke saath gaane ka mauka diya.
Rafi sahab bhi bahut satpurush insaan the, unhone mera hausla
badhaaya. Main bahut hi khushnaseeb hoon jo mujhe aise mahaan
kalaakaaron ke saath kaam karne ka mauka mila.

Song: Maathe ki bindiya bole kaahe ko goria bole (Do Premi)

Ab main aapko us film ka gaana sunana chaahti hoon jiske baad log
mujhe jaanne lage. Wo film thee Hero jiske sangeetkaar the Laxmikant
Pyarelal.

Song: Tu mera janoo hai (Hero)

Main apni safalta ka shrey apne sasurji ko deti hoon jinke protsaahan
se grihasthee sambhaalte huye bhi gaane gaati chali gayee. Unki yeh
behad ichchha thee ki main Ashaji ke saath gaayun. Arunji ne unko
samjhaaya ki mike ke saamne khade hokar gaana koi mazaak naheen hai.
Kismat ka khel dekhiye ki unke nidhan ke baad mujhe Ashaji ke saath
gaane ka mauka mila. Main yeh tay naheen kar paa rahi thee ki kya
main unke saath gaa sakti hoon, to meri sasuma ne kahaa ki unki aatma
ko shaanti milegi agar main Ashaji ke saath gaayun. Aaj mujhe ek se
ek achchhe geet gaane ka mauka milta hai.

Song: Bhooli bisri ek kahaani (Nagina)

Ab main aapko ek aise sangeetkaar ke bare mein bataayungi jinki
badaulat aaj ke kai singers sunaaee dete hain. Aap theek samjhe –
Usha Khanna, jo actor aur singer dono ko dhyaan mein rakhte huye
gaane banaati hain. Ab main aapko unke sangeet nirdeshan mein mera
pehla geet sunaati hoon film Saajan Bina Suhaagan.

Song: Madhuban khushboo deta hai (Saajan Bina Suhaagan)

Kisi bhi ubharte huye singer ke liye Kalyanji Anandji bhai ke
nirdeshan mein gaana saubhaagya ki baat hoti hai. Unke banaaye gaane
naye singers ki awaaz mein bhi hit ho jaati hain.

Song: Rang birange nazaare humko pukaare saare (Atithee)

Fauji bhaiyon hamar jo yash hai, woh aapki badaulat hi hai. Agar hum
such-shaanti se reh rahe hain to uske peechhe aapka sabse badaa
yogdaan hai. Hum aapki is meherbaani ko kabhi naheen bhulaa sakte.

Song: Dil beqaraar tha dil beqaraar hai (Teri Meherbaaniyan)

Haan to fauji bhaiyon, programme ka samay to khatm ho raha hai, phir
kabhi mauka mila to apni pasand ke kuch aur geet aapko sunaayungi.
Aap ko meri bahut bahut shubhkaamnaayen. Jai Hind!!!

THE END