fauji bhaaiyon ko aur Jaimala ke shrotaaon ko mera
namaskaar. kisi bhi shubhkaarya ki shuruwaat eeshwar
ki aaradhana se hoti hai. main bhi is kaaryakram ki
shuruwaat Santoshi maata ki aarti se karti hoon.

Song: main to aarti utaaroon re Santoshi maata ki (Jai
Santoshi Maa)

aap roz bahut se gaane sunte hain aur unmein se kai
gaane pasand bhi karte honge. kuchh geet man mein reh
jaate hain, koi geet jo madhur sangeet se sajaa ho,
sureelee aawaazon ne gaaye hon, aur Khoobsoorti se
filmaaya gaya ho. aisa hi ek geet maine chuna hai jo
har prakaar se paripoorna hai. film Jahan Ara ka geet,
Madan Mohan ke sangeet nirdeshan mein aur isey gaaya
hai do aawaazon ne jo aaj duniya kekone kone mein
goonj rahe hain. aap pehchaan gaye na yeh dono kaun
hain?

Song: jab jab tumhe bhulaaya (Jahan Ara)

sangeet ki duniya ke teen mahaan gaayak Rafi sahab,
Mukesh bhaiya aur Kishoreda. inme se koi bhi ab hamare
beech mein naheen hain, par unke gaane hamesha hamaare
saath rahenge. yeh teeno na keval achchhe gaayak the
balki bahut achchhe insaan bhi the. laakh koshish
karne se bhi aise gaayak dobaara naheen aayenge. mera
yeh saubhaagya hai ki mujhe in teeno ke saath gaane ka
mauka mila. Kishoreda ke saath mera pehla gaana tha
sangeetkaar Shankar Jaikishen ke liye. main bahut Dar
gayi thi ki itne oonche kalaakaar hain Kishoreda.
lekin unhone kaha ki 'kyun Dar rahi hai, main
seekhaayunga na tumhe'. ab mera ek geet Kishoreda ke
saath suniye jo bahut lokpriya huya tha.

Song: chhatri na khol ud jaayegi (Do Jhooth)

film Ganga Maiya Tohe Piyari Chadhaibo meri pehli
Bhojpuri film thi jisme maine Lata didi ke saath ek
gaana gaaya tha. is gaane ki 'recording' ke din didi
ke galey mein kuchh 'problem' ho gayi aur woh
'recording' par na jaa sakeen. us gaane ko meri 'solo'
awaaz mein hi 'record' kar liya gaya aur baad mein
didi ke saath phir se 'record' kiya gaya. par 'radio'
mein mera 'solo version' hi bajtaa raha aur log
samajhte rahe ki film mein bhi maine akele hi gaaya
hai. baad mein yeh galati sudhaar dee gayi. yeh kissa
to aapne suna, ab Rafi saahab ka gaaya ek geet
sunwaati hoon. Rafi saahab ke gaane to aap roz hi
sunte honge. unke anginat madhur geeton mein se ek
geet maine chuna hai, aasha hai aapko pasand aayegi.

Song: is rang badalti duniya mein (Rajkumar)

Mukesh bhaiya ko hum apne baDe bhaai maante the. jaisa
dil waisi hi aawaaz. pyar aur dard unke aawaaz mein
prakaT hote the. jaisa insaan ka man aur swabhaav hota
hai, waisa hi bhaav us insaan ke aawaaz mein bhi hoti
hai.

Song: kahin door jab din Dhal jaaye (Anand)

Asha didi aisi gaayika hain jo har tarah ke geet gaane
mein maahir hain. unki aawaaz mein ek Khaasiyat aur
taDap hai ki sunnewaala har Gham bhoolkar jhoom uThta
hai. yeh geet sunkar aap ko waisa hi lagega.

Song: jawaan-e-jaaneman haseen dilruba (Namak Halaal)

bachpan se hi main Lata didi ke saath 'recording' par
jaaya karti thi. us daur mein film ke alaawaa 'record'
ke liye alag se dobaara gaana paDta tha. Kathputli
film ke ek gaane ki 'recording' dopahar 2 baje tak
chal rahi thi. bahur garmi thi, bajaanewaale bhi garmi
se taDap rahe the aur gaana baar baar 'retake' ho raha
tha. Lata didi 20-25 baar gaane ke baad behosh hokar
gir paDeen, phir woh Theek ho gayeen. is haadse se
itnaa zaroor achchha huya ki us 'recording studio'
mein 'Air Conditioner' lagwaa diya gaya. Lata didi ke
baare mein koi kya keh sakta hai? duniya jaanti hai ki
aisi aawaaz ek baar hi janam le sakti hai. aisi aawaaz
jise sunkar man ko sukoon aur shaanti milti hai.

Song: satyam shivam sundaram (Satyam Shivam Sundaram)

gaye 35 saalon se main filmon mein gaa rahi hoon aur
takreeban sabhi sangeetkaaron ke saath har tarah ke
gaane gaa chuki hoon, jaise bhajan, aarti, lok
sangeet, nritya geet, aur lagbhag sabhi Bhaaratiya
bhaashaaon mein gaaee hoon. Khushi ki baat yeh hai ki
aap log mere geeton ko pasand karte hain aur yeh
dekhkar mera hauslaa baDhta hai. ab suniye sangeetkaar
Raam Laxman ke sangeet nirdeshan ka ek gaana.

Song: sultana sultana mera naam hai sultana (Tarana)

aajkal har insaan ke man mein yeh sawaal hota hai ki
'kal kya hoga, hamara bhavishya kya hai?' lekin main
kahoongi ki is baare mein chintaa karna zaroori
naheen. is duniya mein jeene ke liye film Gumnaam ka
yeh gaan sun len aur Miss Kitty ki baat maan len.

Song: is duniya mein jeena ho to sunlo meri baat
(Gumnaam)

fauji bhaaiyon, aap desh ki rakshaa karte huye apne
jaan ki baazi tak lagaa dete hain, aap hain to hum
surakshit hain. main bhagwaan se yahi praarthana karti
hoon ki aapko lambi umra de, meri duaaen aap ke saath
hain. waqt ke kamee ke kaaran Jaimala samaapt karni
paD rahi hai. phir kabhi mauka milaa to zaroor haazir
ho jaayungi, Jai Hind!

THE END

__________________________________________________
Do You Yahoo!?
Tired of spam? Yahoo! Mail has the best spam protection around
http://mail.yahoo.com