namaste, main hoon Amarkant.

Prelude of "rote huye aate hain sab" is played.

saathiyon, hamaare Aaj Ke Fankaar hain mashoor sangeetkaar joDi
Kalyanji Anandji ke Kalyanji bhai.

Song: rote huye aate hain sab (Muqaddar Ka Sikander)

saathiyon, san 1974 mein Kalyanji Vividh Bharati ke 'studios' mein
aaye the aur fauji bhaaiyon ke liye Jaimala prastut kiya tha.

Kalyanji speaks: Vividh Bharati ke maadhyam pichhle kitne saalon se
aap hamare gaane sun rahe honge. Ab tak hum logon ne 100 ke upar
filmon mein sangeet de chuke hain. Main in geeton ko teen bhaagon
mein baant-ta hoon, homeopathic, allopathic aur ayurvedic. Ab aap
samajh rahe honge ki yeh koi doctor Jaimal prastut kar raha hai kya.
Main aapko bata hoon in teen categories ke baare mein. Homoeopathic
mein we gaane aate hain jinhe banate samay humein yeh pata naheen
rehta ki gaana kaisa banega, yaa to bahut achchha banega ya phir
bahut hi bekaar banega. Allopathic category mein we gaane aate hain
jo pehle pehle to sunne mein bahut achchhe lagte hain par samay ke
saath saath unki madhurta kam hone lagti hai jis tarah se allopathic
dawaaiyon ka baad mein reaction aur side effects hota hai. Aur
teesra category hai ayurvedic ka, ismein we gaane aate hain jo pehle
sunne mein utna achchha naheen bhi lag sakta hai, par dheere dheere
unki mithaas badhti chali jaati hai.

Song: vaada karle saajna (Haath Ki Safaai)

ab aage is kaaryakram mein Kalyanji ke baare mein hamein bataayenge
unhi ke chhoTe bhai aur sangeet srijan mein unke joDidaar Anandji
bhai.

Anandji speaks: Kalyanji bhai mujhse 4.5 saal baDe hain. woh mujhse
kaafi 'tall', 'handsome' aur gore the. baat sanjeedaa karte the,
bahut achchha bolte the. ham Kutch ke rehnewaale hain. is jagah ko
duniya 'earthquake' ke baad se zyaada jaane lagi hai. yeh taajjub ki
baat hai ki yeh India ka ek 'part' hai, yahaan Mohenjodaro ki
khudaai huyi hai, Shri Krishna yahaan aaye the, phir bhi zyaada log
iske baare mein kuchh Khaas naheen jaante. yahaan ka 'climatic
conditions' kuchh aise ho gaye ki log baahar nikal gaye, par Kutch
ke log Kutch ko naheen bhoole hain. hamaara jo gaaon tha woh tha
Mundra taalukaa mein, Kundroli gaaon mein rehte the. TV aane ke baad
badlaav aa gaya hai, 'light' aa gayi hai, warnaa hamaare samay woh
panchhion ki chahak thi, chaandni raaten theen, lok-sangeet tha.

Song: main to bhool chali baabul ka des (Saraswati Chandra)

jab hamne Anandji se poochha ki Bambai aane ke baad unke parivaar ne
kaun si jeevika apnaaee, to unhone kahaa:

Anandji speaks: anaaj ki dukaane thi, Gujarat ke Jaini logo.n kaa
asia maanna tha, mere pitaaji bhi vyapaari the, to Kutch ke logo.n
ne yeh faislaa kiya ki aise kisi cheez ka vyaapaar kiya jaaye jiski
hamesha zaroorat bani rahegi, to wohi kaam sabne kar lee, is anaaj
ke 'business' mein aa gaye Kutch ke log.

Song: chakku chhuriyan tez karaa lo (Zanjeer)

kya Kalyanji bhai bhi dukaan mein baiTha karte the?

Anandji speaks: woh kam baiThte the, main bhi kam hi baiThta tha.
1958-59 tak, 1960 tak ham logo.n ne pitaaji ko akelaa chhoD diya
dukaan mein. pitaaji ne kahaa kiagar karnaa hai to 'seriously'
karnaa hai warnaa dukaan band kar dete hain. ham log teen bhaai
hain, teesra bhai, unkaa kuchh 'high funda' tha, unhone 'industry'
lagaa liya.

Clip: diljalo.n ka dil jalaa ke kya milegaa dilrubaa (Zanjeer)

yaani ki aap dono bhaaiyon ka sangeet se kuchh lenaa denaa naheen
tha?

Anandji speaks: katai naheen, sangeet ka gharaana hi naheen tha.
haan, mere naana Rangoon mein rehte the. 70 saal pehle woh anaaj ke
vyaapaari bankar wahaan chale gaye the. woh sangeet seekhte the, lok
sangeet mein bhi shauk tha, to woh jab gaaon waapas aate the to
kuchh gaana bajaana hotaa tha. Gujarat, Rajasthan, is jagahon par
kya hai ki shaam ke waqt 'ladies' jamaa hokar gaana bajaana karte
hain, ham bachpan se sunte aaye hain.

Song: main hoon Jodhpur ki Jugni (Paap Aur Punya)

Kalyanji bhai filmon mein pehle aaye Kalyanji Veerji Shah ke naam
se, aap kab aaye?

Anandji speaks: yeh baat hai 1944 ki. us waqt bahut 'studios' naheen
huya karte the. main 'school' se 'shooting' dekhne jaata tha, Devika
Rani vagerah ke. hamaare chachaji 'encourage' karte the, unke taraf
se chhooT thi, isliye aana jaana shuru huya. 'teacher' ko manaa lete
the ki woh 'roll no' mein 'present' lagaa den. baad mein main 'class
monitor' ban gaya, paDhne mein pehle se hi masha-allah, samjhe na?
(laughs). main film mein 'hero' banna chahta tha. maine apne aap ko
aaine mein dekhaa, meri 'height' naheen baDh rahi thi, 'swimming'
seekha, 'cycle' chalaaee, goliyaan khaaee (laughs), lekin kuchh
faayda naheen huya. isliye 'editing', 'camera' tak hi reh gaya.

iskaa matlab filmon mein aap Kalyanji bhai se pehle hi aa gaye the?

Anandji speaks: 'entry' ho gaya tha, ghar mein bigDa huya laDka tha.

Song: aayi jhoom ke basant (Upkaar)

film Nagin mein Kalyanji ne been ki dhwani nikaalee thi, kaun sa
vaadya tha?

Anandji speaks: aajkal 'synthesizer' par aap bahut saare saazon ki
awaazen nikaal sakte hain. Dilip Dholakia us waqt sangeetkaar
Chitragupt ke 'assistant' huya karte the. unhone inko bataaya ki
Naag Panchami naam se ek film bani hai jisme ek saamp ka gaana hai
jo kaafi 'hit' ho gaya hai. aur us gaane ki wajah se woh film bhi
kaafi 'hit' ho gayi hai. phir Kalyanji bhai ne patthar tarang naam
se saaz banaaee jisme se been jaisi aawaaz nikalti thi. 'harmonium'
aur iske 'combination' se Nagin ke saare gaane bane.

Song: oonchi oonchi duniya ki deewaaren (Nagin)

to dosto.n, yeh tha sangeetkaar Kalyanji par kendrit Aaj Ke Fankaar
kaaryakram. Kalyanji bhai se juDee baaten aur bhi hain lekin aaj ke
liye samay hota hai poora. unse juDee kuchh aur baaten kisi aur
kaaryakram mein zaroor ham aapko sunaaenge. to ab deejiye Amarkant
ko ijaazat, namaskaar!

Song: na na karte pyar tumhi se (Jab Jab Phool Khile)

THE END