fauji bhaaiyon ko Manhar Udhas ka pyar bhara namaskaar. aaj main
behad Khush hoon ki aapse milne ka sunehra maukaa milaa hai. aaj
main aapko kuchh aisi baaten bataayungaa jinse aap waakeef naheen
hain par juDe huye zaroor hain. maine apna 'career' 24 saal pehle
shuru kiya tha aur jis gaane se shuru kiya tha woh tha D D kashyap
ki film Vishwas mein. geetkaar the Gulshan Bawra, sangeetkaar
Kalyanji Anandji aur isey maine Suman kalyanpur ke saath milkar
gaaya tha. ek jhalak pesh hai...

Song: aap se humko bichhDe huye ek zamaana beet gaya (Vishvas)

fauji bhaaiyon, ab main aata hoon us baat par jo aap se juDee huyi
hai. muhe 'school' mein aur phir 'engineering college' mein NCC aur
ACC mein kaafi dilchaspi thi. aalam yun tha ki dono mein 'C'
certificate mein paas huya, NCC mein to CQMS tak pahunchaa. main ek
fauji afsar banna chaahta tha, dil mein ek junoon sawaar ho gaya
tha. mere is junoon ko dekhkar mere gharwaale pareshaan ho gaye aur
mujhe ijaazat naheen dee. chaliye ab ek geet aur sun lete hain.

Song: hum tumhe chaahte hain aise (Qurbani)

mujhe ek fauji afsar bankar desh ki sevaa karne ka mauka naheen
mila, is baat ka afsos mujhe zaroor hai, lekin ek gaayak bankar
sunnewaalon ke dilon mein ek Khaas jagah banaaya hai. apni awaaz se
apnaa naam roshan karnaa, yeh bhi garv ki baat hai. meri yeh
Khushnaseebi hai ki swargeeya Sachin Dev Burman ke saath mujhe kaam
karne ka mauka milaa. geetkaar Majrooh Sultanpuri ka likhaaa yeh
geet jise maine Lata Mangeshkar-ji ke saath film Abhimaan mein gaaya
tha, aap bhi suniye...

Song: looTe koi man ka nagar (Abhimaan)

1980 mein mashoor 'producer-director' Subhash Ghai ne ek nayee film
ek naye 'hero' Jackie Shroff ke saath banaaee. film thi Hero. ismein
mujhse Laxmikant Pyarelal ne behad Khoobsoorat gaane gawaaye. uske
baad to Laxmikant Pyarelal ne kai filmon mein mujhse amar geet
gawaaye. suniye Anand Bakshi ka likhaa film Hero ka ek geet jise
maine Anuradha Paudwal ke saath milkar gaaya tha.

Song: tu meraa jaanoo hai (Hero)

iske baad Anand Bakshi, Laxmikant Pyerelal, Subhash Ghai aur Jackie
Shroff ke saath meraa ek aTooT rishtaa ban gaya. Hero se lekar
Khalnaayak tak humne ek saath kaam kiya.ab film Khalnaayak ka ek
geet pesh hai jise Alka Yagnik ke saath maine gaaya hai.

Song: der se aana jaldi jaana (Khalnaayak)

jab bhi kabhi muDkar main peechhe dekhtaa hoon to aisi cheezen nazar
aati hain jinse yaadon ka silsilaa barkaraar hai aur main fakr
mehsoos kartaa hoon. sangeetkaar Rajesh Roshan mere achchhe dost
hain jinhone mujhse kai arthpoorna geet gawaaye hain. film Gunaah
mein mahaan saahityakaar Kavi Neeraj-ji kaa likhaa ek amar geet
maine gaaya hai jise maine apne yaadon ke khazaane mein bahut
sambhaalkar rakhaa hai.

Song: ek musaafir hoon main (Gunaah)

mujhe yeh kehte huye khushi ho rahi hai ki meri aawaaz keval filmi
geeton tak seemeet naheen rahi. Hindi aur Gujarati ghazal aur Sai
Baba ke bhajan maine Khoob gaaye hain. ab main aapko Sheikh Adam
Abuwala la likhaa nazm sunaata hoon, shaayad aapke dilon ko bhi yeh
chhoo jaaye!

Song: ab rone se kya faayda kyun sehra mein barsaat karen (Non-film
Ghazal)

sangeetkaar Bappi Lahiri 'western' aur 'pop music' mein maahir maane
jaate hain lekin jab woh Hindustani rang ka koi gaana banaate hain
to woh bhi dil ko chhoo jaata hai. woh bhi mere achchhe dost hain
aur unke lye bhi maine geet gaayen hain. suniye film Mera Dharam ka
ek geet jise maine Asha Bhosle-ji ke saath gaaya hai.

Song: DhoonDti hai tujhe meri tanhaaiyaan (Mera Dharam)

naye daur ke sangeetkaaron mein Nadeem Shravan ek aisaa naam hai
jisne sangeetkaaron mein ek halchal paidaa kar diya hai. unke
banaaye gaane to Theek-Thaak hote hi hain, film bhi 'hit' ho jaati
hai. dehiye na kitnaa sundar geet unhone mujhse film Sadak mein
gawaaya tha.

Manhar Udhas sings "hum tere bin kahin reh naheen paate"

Song: hum tere bin kahin reh naheen paate (Sadak)

THE END