Sangeetkaar Madan Mohan ki Rachnaaon Mein Shastriya Sangeet
Part 5 (Concluding Part)

Presented by: Dr Alka Dev Marulkar
----------------------------------

ab tak shaastriya sangeet mein Madan Mohan-ji ne jo kaam kiyaa hai,
hum unpar roshni Daal rahe the. jaisa ki hum jaante hain ki woh
Punjabi the, to phir bhalaa woh Punjabi lok sangeet se kaise bach
paate? film Chiraag ka yeh geet to zaraa suniye aur dekhiye ki kaise
Tappa ka prayog ismein huya hai. aisa geet gaane ke liye gale ki
poori tayyaari bahut zaroori hai.

Clip: bhor hote kaaga pukaare kaahe raam, kaun pardesi aayega mere
dhaam (Chiraag)

Rajasthan ke lok sangeet ka asar bhi un par kai baar huyaa hai.
wahaan ka mashoor maanD khamaaj ke nikaT hai. dono mein antar yeh
hai ki maanD mein komal nishaad ka prayog zyaada hotaa hai. Madan
Mohan-ji ki kalapanasheelata zara sochiye ki Punjab ke prishTha-
bhoomi par tayyaar film Heer Ranjha ke ek geet mein unhone
Rajasthani maanD ka istemaal kiyaa hai aur iskaa aabhaas bhi naheen
hotaa ki maanD hai, yahi to unki Khaasiyat hai. to sunte hain Lataji
ki aawaaz mein Heer Ranjha film ka yeh geet. aapko yeh bhi bataa den
ki maanD loksangeet se nikli huyi ek dhun hai jiskaa Thumri, daadra
mein prayog hotaa hai.

Song: do dil TooTe do dil haare (Heer Ranjha)

ab hum baat karenge ek aise geet ki jiskaa aadhaar hai raag mishraa
gaara. ismein sitaar ka prayog bahut achchhe tareeke se huya hai.
aur kyun na ho jab Madan Mohan ke vaadya vrind mein Ustad Rais Khan,
Ustad Vilayat Khan aur Ustad Haleem Jafar Khan jaise diggaj sitaar
vaadak shaamil hon. yeh to sone pe suhaaga hi huyi na! mishra gaara
mein pancham ko kendra maankar chalaa jaata hai. isliye isey pancham
mishraa gaara bhi kehte hain. film Pooja Ke Phool ke is geet mein
naayika ke man mein prem ki pyaas hai. shaastra mein isey mugdhaa
naayika kahaa gaya hai. naayika ke aise bhaav ko prastut karne ke
liye isse bahetar koi dhun kaise ho saktaa hai? mishra gaara ek dhun
raag hai jismein shaastriya sangeet ke raag jaisa bojh naheen hotaa,
yeh halka phulka raag hai, isliye Thumri mein iskaa prayog hotaa
hai. to chaliye sunte hain Pooja Ke Phool film ka yeh geet.

Song: meri aankhon se koi neend liye jaata hai (Pooja Ke Phool)

jaisa ki humne pehle aapko bataaya hai ki Thaat 10 kism ke hote
hain, to ismein bhairavi antim ThaaT hai. bhairavi ki Khaasiyat yeh
hai ki ismein sabhi komal sur lagte hain. Thumri mein bhairavi ke
alag alag sur lagte hain, komal aur shuddh dono. is raag ko gaane ke
liye kalaakaaron mein mehnat ho, taaleem ho, to hi sambhav hai.
sindh bhairavi aur multaani kaafi Arab sangeet se prabhaavit lagte
hain. jaise film Bhai Bhai ka yeh geet jismein Dholak ka istemaal
huya hai, Punjab ka lok sangeet saamne aa gaya hai.

Song: qadar jaane na moraa baalam bedardi (Bhai Bhai)

shaastriya paddhati se bhi is raag ka bahut sundar prayog hotaa hai,
lok sangeet se bhi Madan Mohan-ji ne kiya, Thumri se bhi kiyaa.
Punjab mein heer gaane ka chalan hai. zaahir hai Heer Ranjha film ke
kisi geet mein Madan Mohan-ji ne heer ka prayog kiya hogaa. jee
haan, yeh hai woh geet.

Clip: Doli chaDhke Heer ne (Heer Ranjha)

Madan Mohan ki rachnaaon mein gaayiki, is shringkhalaa ko pesh karte
huye jo sukoon aur aanand mujhe milaa hai, uskaa main shabdon mein
bayaan naheen kar sakti. Theek waise hi jaise Madan Mhan-ji ke
geeton ki taareef shabdon se sambhav naheen. haan, to hum baat kar
rahe the ki bhairavi ko kaise alag alag tarah se pesh kiyaa jaa
sakta hai, lok sangeet mein, shaastriya sangeet mein aur Thumri ke
saath bhi. film Jab Yaad kisi Ki Aati Hai mein ek geet hai isi raag
par jiske bol hain "tere bin saawan kaise beetaa tu kyaa jaane
saajana", ismein "tu kyaa" mein jo chubhan aur Tees hai, woh hriday
ko chhoo jaati hai.

Song: tere bin saawan kaise beetaa (Jab Yaad Kisi Ki Aati Hai)

Madan Mohan ki rachnaaon mein gaayiki, is par shodh karte huye hum
ab aakhri paDaav par aa pahunche hain. aur hum baat kar rahe hain
raag bhairavi ki. bhairavi ka ek doosra hi roop Madan Mohan-ji ne
film ke prasang ke anuroop Rishte Naate film mein prastut kiyaa hai.
yeh geet paarshwa sangeet ke roop mein bajtaa hai. jo baat naayika
zubaan se keh naheen sakti aur chup bhi naheen reh sakti, woh
aatamaa se wohi baat kehti hai. vaadyavrind ka samaayojan itnaa
sundar hai is geet mein. bhairavi ko naa bigaaDte huye vaadyavrind
alag or chalaa gaya hai.

Song: mujhe yaad karnewaale tere saath saath hoon main (Rishte Naate)

chalte chalte main yahi kahoongi ki Madan Mohan-ji jaisa kalaakaar
sadiyon tak paidaa naheen hote. aisaa lagta hai ki jaise woh keh
rahe haon ki "mere sangeet ko yaad karnewaale tere saath saath hoon
main, aapko chhoDkar kahaan jaayunga". aatma ko bheegaakar agar
sangeet prastut na ho to woh rookhaa ho jaata hai. Madan Mohan-ji ke
geet hamaare liye kisi dharohar se kam naheen, jo hameshaa hamaare
saath rahegi. aaj main aksar dekhti hoon ki chhoTe chhoTe kalaakaar
pratiyogitaaon mein aksar Madan Mohan-ji ke geet gaate hain. kabhi
sochaa hai kyun? kyunki unmein jo baat hai woh bahut kam
sangeetkaaron mein hogi. to shrotaaon, ab main bhaari man se aapse
ijaazat maangti hoon, bhut achchha lagaa, namaskaar!

END OF SERIES