Hamare aaj ke sargam ke sitaare hain ek aise geetkaar jinke geeton ko
paakar sargam bhi dhaya huye hain. Aur woh hain film jagat ke
suprasiddha geetkaar Shailendra.

Song: Tum jo hamare meet na hote, geet hamare geet na hote (Ashiq)

30 August 1923 ko Rawalpindi mein janme Shankarlal Kesrilal
Shailendra apni maa Parvati Devi aur apne pita Kesrilal ke chaar
beton mein sabse bade the. bachpan mein hi unka poora parivaar
Rawalpindi se Mathura aa gaye. Bachpan mein hi maa ka saaya
Shailendra ke sar se uth gaya. We Jhansi mein Railway ki naukri karne
lage. Uske baad 1948 mein poore parivaar ke saath Bambai aa gaye aur
parel ke Railway workshop mein kaam karne lage.

Borivali niwasi Susheel Thakur ke behnoi the Shailendra. Unhone
Shailendraji ko kaafi kareeb se dekha tha aur jaana. Bata rahe hain
Susheelji:

Susheel Thakur speaks: Mera aur unka to jaise baap bete ka rishta
tha. Jaadon ke dino mein main unke rajaai mein ghoos jaata tha aur
unhe kavitaayen sunane ke liye kehta tha. Unke shabd bade hi saral
huya karte the. 1947 mein unki shaadi huyi aur Parel ke railway
workshop mein naukri le lee. Railway ka chhota sa kamra tha jisme bas
ek palag tha. Poora khaandaan usi mein rehte the. Un par communist
party ka prabhaav tha. Ek baar IBTA ke kisi jalse mein we apni
kavitaaen suna rahe the ki Raj Kapoor ki nazar un par padee aur unhe
geet likhne ka offer de diya. Par unhone usey thukra diya. Raj sahab
ne kaha tha ki kabhi bhi agar paison ki zaroorat pade to unhe zaroor
bataayen, we unse geet likhwana chahte hain. Shailendraji ka jab
bachcha huya to unki financial crisis ho gayee aur we Raj sahab ke
paas jaa pahunche. Raj Kapoor ne kaha ki abhi abhi main film Aag bana
chuka hoon, phir jab main koi film banayunga to aapko zaroor mauka
doonga. Unhone unki aarthik sahayata kee aur film Barsat mein unhe
geet likhne ka offer de diya.

Song: Barsat mein humse mile tum sajan (Barsat)

Raj Kapoor, Shankar Jaikishen, Mukesh, Hasrat Jaipuri aur Shailendra
agar chheh suron ke naam hain, to saatwaan sur hai unke srijan.

Hasrat Jaipuri speaks: 14 December ko hum sab Raj Kapoor ke janamdin
ki tayyari mein lage the, achanak Shailendra ki tabiyat kharaab ho
gayi , unhe nursing home le jaaya gaya, aur dekhte hi dekhte sab kuch
khatam ho gaya. Hamare is team ka pehla member humse alag ho gaya.

Song: Tera jaana dil ke armaanon ka lut jaana (Anari)

Shailendra ek nihaayati nek, saral aur udaar kism ke insaan the jo
daulat aur shohrat ki trishna se koson door the.

Song: Kisi ke muskurahaton pe ho nisaar (Anari)

Shailendra bhasha aur sahitya ke vidwaan the. Russi sahitya jaanne ke
liye unhone Russi bhasha seekha. Rabindra Nath Tagore ki Nobel jayee
kriti Geetanjali ko samajhne ke liye unhone Bangla bhi seekhaa. Raj
Kapoor unhe Pushkin kaha karte the.

Susheel Thakur speaks: We bahut hi saadharan jeevan jyaapan karte
the. Itna saadharan maine aaj tak kisi ko naheen dekha. Ya to safed
kurta pajama pehente ya phir ek badami pant aur ek mamuli shirt. Unhe
joote ke lace aur gale ka tie baandhna bhi naheen aata tha. Ek baar
unhe kisi award function par jaana tha, humne unhe zabardasti suit
aur tie pehna diya to we gussa ho gaye aur kehne lage ki yeh kya gale
mein baandh diya, maine naheen jayunga aise. Hum logon ne samjhaya ki
Nasir sahab aane waale hain us function mein, aapka pehla award
function hai, is tarah se unko raazi karwaya.

Shankar speaks: R K Studios mein pehla drishya ubharta hai, hum
baithe huye hain - main, Jaikishen, Hasrat Jaipuri aur Raj Kapoor aur
ho rahi hai geeton ki barsat...

Song: Barsat mein...

phir Awara

Song: Awara hoon...

phir uske baad Shree 420

Song: Ramayya vattavaiya...

Aah

Song: Raja ki aayegi baraat...

Boot Polish

Song: Hum matwale polishwale...

Sangam

Song: Bol radha bol....

Jis Desh Mein Ganga Behti Hai

Song: O basanti pawan....

aur Mera Naam Joker

Song: E bhai zara dekhke chalo....

aur tabhi jaise film toot jaati hai, roshni uya aur dekha ki
Shailendra naheen hai.

Shaili Shailendra (Son of Shailendra) speaks: Main jab bahut chhota
tha, tabhi se main apne pitaji ke geet sunta chala aa raha tha. Kuch
mujhe samajh aate kuch samajh naheen aate the. Baba ka ek adhura geet
maine poora kiya film Mera Naam Joker ke liye, aur isi geet ke saath
meri is filmi duniya mein entry huyi.

Song: Jeena yahaan marna yahaan (Mera Naam Joker)

Shailendra behad swaabhmaani the, zara sa bhi anyaay unhe pasand
naheen tha.

Song: Dil ka haal sune dilwala

Shailendra vichaaron se Marx waadi the, saalon tak we IBTA se jude
rahe.

Song: Ab kahaan jaayen hum

Duniya ki daav penchon se koson door, kisi par bhi aasaani se
vishwaas kar lete the Shailendra aur unki isi saralta ka logon ne
bharpoor faayda uthaya.

Song: Sab kuchh seekha humne na seekhi hoshiyari (Anari)

Aap sun rahe hain Sargam Ke Sitare aur iske antargat hamare aaj ke
sitaare hain film jagat ke suvikhyaat geetkaar Shailendra.

Song: Aaja re pardesi (Madhumati)

Shabdon ki duniya Shailendra ki daasi thee, bhaasha ki pakad behad
mazboot lekin behad saral shabdawali ka istemaal kiya karte the.
Sangeet Sarita karyakram ke ek ank mein Asha Bhosle, aur Gulzar ke
saath baat karte huye bata rahe hain R D Burman:

R D Burman speaks: Ek baar unhone (SDB) mujhe Shailendra sahab ke
paas bheja ek geet likhwakar le aane ke liye, aur kaha ki geet liye
bina mat aana. Main Shailendra sahab ke ghar pahuncha to. Maine unse
kaha ki babuji ne kaha hai ki geet lekar hi waapas aana. To unhone
mujhe apne saath samundar ke kinare Juhu beach le gaye. Waqt ho raha
tha raat ke 11, 11:30. Maine unse kaha ki aap geet to likhiye, to we
bole ki are aise koi geet likh sakta hai, uske liye mood chaahiye.
Unhone mujhse kaha ki theek hai tum maachis ke box par dhun bajaao.
Unhone aasmaan mein chaand ko dekha aur bol pade "khoya khoya chaand
khula aasmaan...", aur is tarah se yeh geet poora ban gaya.

Song: Khoya khoya chaand (Kala Bazar)

Susheel Thakur speaks: Film Sangam ke liye jab unhone "O mere sanam
do jism magar ek jaan hain hum" yeh geet likha to Raj sahab ne kaha
ki yeh geet naheen chalega. Shailendraji ne mujhe bataya ki aisi aisi
baat hai, Raj sahab ko geet pasand naheen aaya. Maine jab woh linen
suni to mujhe to bahut achchha laga aur maine unse kaha ki kaise
naheen chalegi geet to bahut achchha likha hai aapne. Baad mein geet
bani aur kaamyaab bhi huyi.

Song: O mere sanam (Sangam)

Susheel Thakur speaks: Hum log bahut darte the jab woh car drive
karte, steering par dhun bajaya karte the, ek baar to accident bhi ho
chuka tha. Film Patita ka ek geet mujhe bahut pasand hai "Hai sabse
madhur woh geet"

Song: Hai sabse madhur woh geet (Patita)

Geet likhne ke saath saath Shailendra ne abhinay bhi kiya hai. Film
Naya Ghar mein unka badaa role tha aur Shree 420 aur Barsat mein
unhone chhote chhote role kiye. Fim Boot Polish ka yeh geet to unhi
par filmaya gaya hai.

Song: Chali kaun si des (Boot Polish)

Geet lekhan Shailnedra ka pesha zaroor tha par sirf paisa kamaane ke
liye naheen. Filmi geeton ka star unhone unchaayee tak hi naheen
pahunchaya balki unhe garima bhi pradaan kee.

Song: Ab ke baras bhej bhaiya ko babul (Bandini)

Shailnedra ne apni mahatwakanshi film Teesri Kasam banaayee lekin
unse kiye unhe kayi kadwi abhigyataaon se guzarna padaa. Baad mein
unhe us film ke liye Rashtrapati puraskaar bhi diya gaya par us samay
woh jeevit naheen the.

Song: Sajanwa bairi howe hamaar (Teesri Kasam)

Shailendra ek aise roshan sitaare hain jinhone apni chhoti si aayu
mein na jaane kitne amar geet humein de gaye hain. Unke yeh amar geet
duniya ke honthon par sadiyon tak thirakte tahenge.

Song: Yeh raat bheegi bheegi (Chori Chori)

Shailendra kaamyaabi ki bulandiyon tak pahunchkar bhi apne ateet ko
naheen bhulaya tha.

Susheel Thakur speaks: Unki khwaahish thee ki woh apne gaaon dekhne
jaaye jahaan par unka janm huya tha, jahaan unki bachpan beeti thee.
Yahi unki antim khwahish thee.

Song: O jaanewale ho sake to laut ke aana (Bandini)

Hamara aaj ka sargam ke sitare karyakram samarpit tha Shailendraji ki
smitiyon ko.

THE END