namaskaar doston, main hoon Aaj Ke Fankaar mein Shehnaz Akhtari. film
sangeet ke aakaash mein ek chamakta sitaara hai jisne aise aise bol
deeye hain honThon ko jo phool bankar mehke, sitaare bankar chamke.
jee haan, geetkaar Anand Bakshi, jinhone geet likhne ke saath saath
apni aawaaz bhi dee hai kuchh geeton mein.

Song: baaGon mein bahaar aayi (Mom Ki Gudiya)

sangeet ki duniya mein aakar Anand Bakshi bahaar bankar chhaa gaye.
abhi abhi jo geet aapne suna usmein Lataji ki aawaaz to aapne zaroor
pehchaan lee hogi lekin kya aap gaayak ki aawaaz pehchaan paaye? yeh
aawaaz thi khud geetkaar Anand Bakshi ki. Laxmikant Pyarelal ke
sangeet nirdeshan mein yeh geet tha film Mom Ki Gudiya ka. shuru
shuru mein Anand Bakshi ko fauji bannaa paDaa tha lekin seema ki
naukri unhe pasand naheen aayi aur chale aaye geet sangeet ki duniya
mein. bataur geetkaar unki pehli safal film thi Jab Jab Phool Khile,
jismein sangeetkaar the Kalyanji Anandji.

Song: ek thi gul aur ek thi bulbul (Jab Jab Phool Khile)

Jab Jab Phool Khile ke baad to jaise unhone geeton ka chaman hi
khilaa diya. shuru shuru ke daur mein Anand Bakshi ne sangeetkaar
Roshan ke saath kai filmon mein kaam kiya tha. is joDi ka ek
laajawaab naghma pesh-e-Khidmat hai Mukesh ki aawaaz mein, film ka
naam hai Devar.

Song: aaya hai mujhe phir yaad woh zaalim (Devar)

Sachin Dev Burman aur unke beTe Rahul Dev Burman ke liye bhi Anand
Bakshi saahab ne Khoobsoorat gaane likhe. machalte geeton ke saath
saath shabdon mein gehree baaton ki jhalak milti hai Anand Bakshi ke
geeton mein, jo Tees bhi dete hain aur hamaara manoranjan bhi karte
hain. seedhe saral bolchaalwaale shabdon mein gaane likh dena koi
aasaan kaam naheen hai, lekin yeh Bakshi saahab ke geeton ki
Khaasiyat thi. pesh hai ek baad ek do geeton ki jhalkiyaan, pehle
geet ke sangeetkaar Dada Burman aur doosre geet ke Pancham.

Song: koraa kaagaz tha yeh man mera (Aradhana)
Song: kuchh to log kahenge (Amar Prem)

waqt badlaa, film sangeet ke sunehre daur ke woh saare sangeetkaar ek
ek kar bichhaDte chale gaye. is badalte daur aur badalte mizaaj ko
baaKhoobi apnaaya geetkaar Anand Bakshi ne aur naye maahaul aur naye
sangeetkaaron ke saath bhi unki 'tuning' qaabil-e-taarif rahi. Nadeem
Shravan, A R Rahman, Anu Malik, Uttam Singh, Jatin Lalit jaise
sangeetkaaron ki dhuno ko lokapriya bolon se sanvaara Bakshi saahab
ne.

Song: zinda rehti hain unki mohabbatein (Mohabbatein)

Anand Bakshi ke geeton ne har peeDhee ke naujawaano ko pyar karna
seekhaaya, pyaar ka izahaar karna seekhaaya. jo mohabbatein unke
geeton ne hamein deeye, woh beshaq zindaa rahengi sadiyon tak. Bakshi
saahab ke pote hain ubharte filmkaar Aditya Dutt. jab Aditya Dutt ne
apni film Aashiq Banaya Aapne ke liye is daur ke jaanemaane geetkaar
Sameer ko film ke liye shirshak geet likhne ka anurodh kiya to Sameer
ne kya jawaab diya tha, suniye Khud unhi ki aawaaz mein:

Sameer speaks (translated): Our recent film was Aashiq Banaya Aapne
made by Aditya Dutt, who is Anand Bakshi saahab's daughter's son. I
consider Bakshi saahab as one of my gurus. When Aditya told me the
title of his film, I said that I cannot take up my pen anymore. Once
Anand Bakshi saahab had written "dard-e-dil dard-e-jigar dil mein
jagaaya aap ne, pehle to main shaayar tha AASHIQ BANAYA AAPNE". Can
anything more beautiful than this be written on this title? 'isse
behatar main kyaa likhoon?'

Song: dard-e-dil dard-e-jigar (Karz)

to doston, Anand Bakshi saahab par kendrit aaj ka yeh kaaryakram
aapko kaisa lagaa zaroor bataaiyega chiTThi likhkar, ab Shehnaz
Akhtari ko deejiye ijaazat, namaskaar!

THE END