Aaj Ke Fankaar, yeh kaaryakram sunnewaalon ko aapke dost Ajay Joshi
ka pyar bhara namaskaar! doston, aaj ke is kaaryakram mein us
sangeetkaar ka sangeet jisne jawaan dilon ko dhaDakne par majboor kar
diya.

Song: kaho na kaho yeh aankhen bolti hain (Murder)

kaho na kaho unkaa sangeet bolta hai, jee haan, Aaj Ke Fankaar mein
ham aaj baat kar rahe hain sangeetkaar Anu Malik ki. ham sab jaante
hain ki woh guzre daur ke mashoor sangeetkaar Sardar Malik ke beTe
hain. yaani ki Anu ko sangeet viraasat mein hi milee. baawjood iske
unke 'career' mein sangharsh ki bharmaar rahi. 1977 se 1986 tak woh
sangeet to dete rahe par kisi ne shaayad unki taraf zyaada dhyaan
naheen diya. unhe sahee pehchaan milee film Baazigar mein. is film ke
baad unhone phir peechhe muDkar naheen dekha aur chhaa gaye ham sabke
dil-o-dimaag par.

Song: pehle kabhi na hamne kahaa (Hum Aapke Dil Mein Rehte Hain)

1997 mein Border, Ishq, Naajayaz, 1998 mein China Gate, 1999 mein
Soldier aur Mela jaisi filmen. lagaataar 'hit' geet denaa jaise Anu
Malik ki aadat ban gayi.

Song: tumse milke dil ka hai jo haal (Main Hoon Na)

doston, jis tarah Main Hoon Na fil ki is qawwaali ko aap naheen bhool
paaye hain, waise hi 2004 mein Murder, 2005 mein Zeher, aur phir Fiza
bhi to woh film thi jiske naGmon ko aap shaayad hi bhulaa paayenge.

Song: tu hawaa hai fizaa hai zameen ki naheen (Fiza)

pitaa sangeetkaar Sardar Malik aur maama geetkaar Hasrat Jaipuri ke
saannidhya mein rehkar Anu Malik ki gaayiki ka andaaz barbas hi unke
gale se jhalakta hai. ek achchhe sangeetkaar hone ke saath saath woh
ek umdaa gaayak bhi hain. unke gaaye geeton ko bhi ham kabhi na kabhi
gungunaate rehte hain. filhaal unke sangeet ka ek aur Khoobsoorat
namunaa pesh hai.

Song: aisa lagta hai jo na huya hone ko hai (Refugee)

aaj ke daur mein jahaan itne saare sangeetkaar hain, Anu Malik ki ek
alag pehchaan hai. unka filmi 'graph' utaav chaDhaav se bhara huya
hai, lekin waqt dar waqt safalta ki seeDhee unhe salaam karti rahi
hai.

Song: salaam salaam (Umraojaan)

aur doston, chalte chalte ham duya karte hain ki saflata ke dwaar Anu
Malik ke liye yunhi khulte rahe aur unkaa naam bulandion ko yunhi
chhoota rahe.

Song: hamko maaloom hai ishq maasoom hai (Jaaneman)

THE END