UJAALE UNKI YAADON KE
---------------------
INTERVIEW OF ANANDJI
********************

swaagat hai aap sab ka is nayi shrinkhala mein. aaj se hamaare beech
hain...

AN: namashkaar! vividh bhaarati ke mere sunnewaale bhaaiyon, main
Anandji bol raha hoon, main Anandji yaani chhoTa bhai hoon Kalyanji
bhaai ka, yaadon ka Khazaana leke aaya hoon. haalaanki main 'radio'
pe aapse miloonga lekin dil se main aapke saath hi rahoonga har waqt.
to 'enjoy' keejiyega.

Medley of preludes & interludes from Kalyanji Anandji compositions.

to aayiye sunte hain Kalyanji Anandji bhaai ke Anandji Shah se Kamal
Sharma ki lambee baatchit par aadhaarit is shrinkhalaa ki pehli kaDee:

AN: Anandji
KS: Kamal Sharma

EPISODE 1
---------

KS: Anandji, aapka is kaaryakram mein bahut bahut swaagat hai.

AN: Kamalji, aapko mera namashkaar, sunnewaale sabhi bhaaiyon ko mera
namashkaar! Vividh Bharati ke sunnewaalon ke liye main Anandji,
kalyanji bhaai ka chhoTa bhaai hoon, 'Kalyanji bhaai is no more
here', aaj woh hote to wohi yahaan aate.

KS: Kalyanji bhaai aapse kitne baDe the?

AN: Kalyanji mere se saaDhe chaar saal baDe the, mujhse kaafi
lambe, 'handsome', 'he was a tall man', gore bhi the, aap dekh sakte
hain mere ko, main paanch 'foot', sawaa paanch 'foot' ka hoon, samjhe
na? lekin 'he was very tall and very simple person', bahut sanjeeda
baat karte the, bolna bhi jo tha unka, ki kis 'time' pe bolnaa, kitna
bolna, woh jaante the, main bachpan se chhoTa bhaai hi rahaa, kuchh
bhi boltaa tha.

KS: Anandji, aapke bachpan ka bahut baDaa hissa jo hai woh Mumbai
mein beeta, lekin paidaaish kahaan ki hai aapki?

AN: ham log Kuchchi hain, Gujarat ke, Kuchch ko aajkal log jaanne
lage hain 'earth quake' ke baad, naheen to log poochhte the ki yeh
Kuchch kahaan pe hai? samjhe na? taajjub hota tha ki yeh Hindustan
ka 'part' hai ya kya hai? yahaan pe Mohenjodaro aur sab cheezen
jahaan pe hai, aur yeh sanskriti jo hai itni, Shree Krishnaji jo aaye
the aisi jagah mein, to aise jagah ko log jaante naheen kyunki 'map'
mein iski itni ahmeeyat naheen hai, aur wahaan ke ham rehnewaale log
jo hain, wahaan ki 'climatic conditions' ki wajah se log dheere
dheere wahaan se nikal gaye, lekin ek baat jo hai Kuchch mein, ki
Kuchch ke log Kuchch ko bhoole naheen hain abhi tak. wahaan Kuchch
mein rahe thoDe dino tak. Mumbai mein kaarobaar tha to aana jaana
lagaa rehta tha, pitaaji ki dukaane thi yahaan.

KS: Kuchch ka gaaon kaun sa tha jismein aap rehte the?

AN: yeh Mundhra taaluka mein Bhadreshwar karke ek bahut puraana Jain
Temple hai uske paas hamaara gaaon hai Kundroli karke, wahaan pe
rehte the ham. bahut achchha gaaon hai, jin logon ne gaaon ghoome
hain unko pataa hogaa, hamaara gaaon bilkul alag hai, abhi tak woh
gaaon hai, jahaan pe chauraaha bhi hai, talaab bhi hota hai, achchhe
makaane bhi hain, log baiThe huye hain, achchha lagta hai ki gaaon
abhi bhi gaaon ki tarah hai. TV aane ke baad wahaan bhi ab badlaav
dekh raha hoon, 'lights' aa gayi naheen to chaandni raaton mein
ghoomne ka mazaa aata tha, baarish mein mor jo bole uskaa mazaa aata
tha, panchhion ki chahak thi, lok sangeet the.

KS: lok sangeet ki baat bhi karenge, lekin usse pehle yeh geet sun
lete hain.

------------------------------------------------------------
Song: main to bhool chalee baabul ka des (Saraswati Chandra)
------------------------------------------------------------

KS: yahaan Mumbai mein aap aate the aapne bataaya, yahaan aapke
pitaaji ki dukaan thi, kaahe ki dukaan thi?

AN: anaaj ki dukaane, kyunki Gujarati, Jaini jo hain, maine ek baar
pitaaji se poochha tha ki 'aapne anaaj ki dukaane kyun kee?' to
unhone kaha ki 'ham log jab Kuchch se nikle to vyaapaari aadmi the,
mere pitaaji bhi vyapaari the, to Kutch ke logo.n ne yeh faislaa kiya
ki aise kisi cheez ka vyaapaar kiya jaaye jiski hamesha zaroorat bani
rahegi, ameer ho gareeb ho dukh ho sukh ho, to wohi kaam sabne kar
lee, is anaaj ke 'business' mein aa gaye Kutch ke log. unhone kahaa
ki ismein mehnat hai lekin ismein kabhi chhoTaapan naheen hogaa. un
dino mein 'packing' mein jo maal mil raha hai, waisa naheen tha,
sab 'loose' miltaa tha, dukaano mein kaafi boriyaan dikhti hain, tel
ke Dabbe dikhte hain.

KS: to aap bhi baiThe the? dono baiThte the?

AN: dono baiThte the, mazaa aata tha, Kalyanji bhaai kam baiThte the,
main to mazaa letaa tha uska.

KS: kab tak baiThe aap?

AN: 'picture'-en, 1958-59 tak to main baiThtaa raha, bas 1960 mein
pitaaji ko akele chhoD denaa paDaa, to hamne dukaane band kee, kyunki
woh yeh the ki 'bhai kaam karna hai to 'seriously' karo, teen teen
dukaane sambhaalna'. baDe bhaai mauji the, woh gaate the, 'radio' par
bhi gaate the, unhone woh zimmedaari lee, uske baad 'high funda' hone
lage to 'factory'-ian lagaa lee.

KS: yaani ki aapke parivaar ka sangeet se kuchh lenaa denaa naheen
tha?

AN: kataee naheen, kataee naheen, jaisa kehte hain na ki bachpan se
seekhte aaye hain, aisa kuchh naheen tha. lekin mere naanaa jo the
woh Rangoon mein rehte the, woh bhi hamaare liye 'foreign' jaisa hi
tha, un dino mein unka bhi aana jaana Bombay mein hotaa tha, to woh
bhi thoDe 'music' seekhe huye bhi the, 'harmonium' bhi tha, gaaon
mein jaate the to baaja bajaate the. gaaon mein aisa tha ki 'folk
music' ka, Rajasthan mein, Kuchh mein, yahaan pe, Gujarat mein, shaam
ko jab 'ladies' jamaa ho jaati theen, woh gaati rehti theen, naachtee
theen, phir Jainion ke bhajan hote the, yeh sab sunte rahe hain
bachpan se aur saath mein gaate rahe hain. maahaul tha par 'not as a
professional'.

KS: Anandji, lok sangeet ki baat chal rahi hai aur mujhe yaad aata
hai ek gaana film Paap Aur Punya ka, aapne lokgeet shailee
mein 'compose' kiya tha, pehle woh gaana sun lete hain, phir baatchit
ko aage baDhaayenge.

-------------------------------------------------
Song: main hoon Jodhpur ki Jugni (Paap Aur Punya)
-------------------------------------------------

KS: Anandji, filmi sangeet mein aapka padaarpaN to baad mein huya,
pehle Kalyanji bhaai aaye, Kalyanji Veerji Shah ke naam se. aap kab
aaye?

AN: aisa to naheen kahoonga main, baat thoDi si ulTee hai, 1944 mein,
aazaadi ke pehle ki baat kar raha hoon main, jab bahut
saare 'studios' huya karte the. wahaan pe, ham logon ko 'school' se
ek 'shooting' pe bulaaya gaya tha. to haqm log 'shooting' pe gaye to
Devika Rani aur yeh sab the. to wahaan pe ham gaye aur ek nayaa
maahaul tha, mere chaacha the jo 'encourage' karte the to thoDi
chhooT bhi milee thi, to wahaan pe gaye aur aana jaana shuru ho gaya.
aur 'school' mein bhi to 'teacher' ko paTaana paDega na? 'teacher' ko
bhi samjhaa diya ki 'aap 'roll number' lagaa denge' to chhuTTiyaan
mil jaati thi, to faaida isse bhi huya ki main dheere
dheere 'monitor' ban gaya 'class' ka, 'monitor' banne ka faayda yeh
huya ki mera 'lesson' poochhne ki kisi ko zaroorat naheen thi, ab
pehle se paDhne mein the hi maasha-allah! samjhe na aap? uska
bhi 'advantage' ho gaya. lekin yeh sab jo kuchh kar rahe the yeh
sab 'professionally mind' mein naheen tha. 'acting' karte huye dheere
dheere thoDa sa lamba hone lagaa main, lekin aaine mein dekhaa
to 'height' naheen baDh rahi thi. aur un dino jo 'hero' the, woh sab
6 fooTiye the, aur apna 5/5.25 se aage baDh naheen rahe the.
maine 'cycle' chalaaee, 'swimming' karke dekhaa, bahut kuchh karke
dekhaa, goliyaan khaake dekhee, usse kam hotaa gaya, baDaa naheen
huya. phir main 'editing' mein bhi chalaa gaya kuchh din. 'but
everthing was not in a professional level'. un dino ham 'studio' mein
jo 'recording' karte the, to is tarah ke 'studio' naheen
the, 'recording' jo hoti thi woh 'set' pe hi hoti thi. 'stage' lagaa
huya hai, usi 'acoustics' mein sab kuchh karna paDta tha. to gaane
ki 'recording' jo hoti thi, 'stage' lagaa huya hai, kahin pe pahaaD
banaa huya hai, kahin par peD banaa huya hai, kahin par jaake khaDe
jaaiye aap, aur uspe yeh hai ki 'train' ki paTree paas hai to 'train'
jaa rahi hai to 'recording' band karni paDti thi. isliye log jaan
boojhkar raat ko 12:30 ke baad, 'trains' band ho jaane ke
baad 'start' karte the.

KS: 'recording' kis tarah ka hota tha un dino?

AN: dekhiye un dino 'magnetic recording' naheen aaya tha, 'optical'
hi chal raha tha to jab film 'shoot' karte the to 'negative' chalaate
the, usi pe gaane 'record' ho jaate the. 'cameras' bhi 'technically
advanced' naheen the, usmein na to 'zoom' hotaa tha, na 'trolley'
aayi thi, kuchh naheen thi aur shuru mein to yeh tha ki jo 'actor'
tha wohi gaana gaata tha. hamne to yeh bhi dekhaa tha ki peTiwaale ko
camere ke peechhe rakhke woh apna bajaa rahe hain Dham Dham Dhum
Dhum, aur saamne woh gaana gaa rahe hain. koi bhi puraana gaana
dekhenge aap to 4/5 'shots' mein poore gaane ho jaate the.

KS: us daur ka koi gaana yaad aata hai aapko jo yahaan par ham apne
shrotaaon ko sunwaayen aur woh gaana unhe us daur mein le jaaye.

AN: kai gaane hain jaise "dheere dheere aa re baadal dheere mera
bulbul so raha hai..", woh gaana bahut chalaa tha, phir ham log sunte
the "aayo bachchon tumhe dikhaayen...", haalaanki woh, us waqt
thoDi 'advanced technology' aa gayi thi. hotaa yeh tha ki yeh gaana
jab aa jaaye to 'negative print' karni paDti thi. to 'print' karke
jab 'negative' 'positive' ho jaaye to agar gaana OK naheen huya hai
to woh phir se karna paDta tha. aur wohi 'singer' mile na mile, kabhi
kuchh hota tha, 'length' kaaTne ke liye kuchh naheen tha, abhi jo
3 'minute' ka gaana banaate the, uske liye HMV mein jaake 3 'minute'
ka 'record' banaana paDta tha. 'So you had to record the song twice',
samjhe na aap?

KS: ek baar film ke 'purpose' ke liye aur ek baar agar bechnaa hai
aapko, 'record' ke liye?

AN: jee haan, 'that was part of life', har gaana jo hai do baar karna
paDta tha.

------------------------------------------------
Song: dheere dheere aa re baadal dheere (Kismet)
------------------------------------------------

KS: Kalyanji bhaai ka hamne jab zikr kiya to aapne kahaa ki kahaani
kuchh doosri tarah ki hai, yaani ki unse pehle aap filmon mein aa
gaye the. aisa kyun?

AN: ek to ghar mein bigDaa huya main hi tha (laughs), to woh maukaa
mujhe milaa aur woh thoDaa sanjeeda kism ke the, kam bolte the. main
to pitaaji se Hindi mein hi baat karta tha ki mujhe filmon mein jaana
hai, chaachaaji bhi kehte the. aur jahaan pe ham rehte the Girgaum
mein, wahaan pe ek gaDh tha jahaan pe yeh puraane zamaane ke log
rehte the, yeh V Shantaramji, sab nazdeek nazdeek rehte the, Hema
Malini, Hemlata, Shankarji bhi waheen se aaye huye hain, N Duttaji
bhi waheen se aaye huye hain, Lataji bhi Nana Chowk mein rehti theen,
apne Mahendra Kapoorji bhi paas mein rehte the, to woh ek 'area' ha
ki, Sanjeev Kumar bhi waheen pe rehte the, Rajesh Khanna bhi waheen
ke, phir apne Jeetendraji ko aap Jeetendra bolte hain, woh...

KS: Jeetendra Kapoor

AN: Jeetendra Kapoor, Ravi Kapoor unkaa naam tha!

KS: Ravi Kapoor!

AN: to yeh log wahaan se hain, lekin iske pehle ka jo zamaana tha ki
koi 'star' hai to kaise pataa lage ki 'star' hain, to Topi
hogi, 'white shirt' hogaa, aur woh sab 'train' mein jaate the, 'first
class' mein, phir usse utarkar baggi mein baiThkar 'studio' mein
jaate the.

KS: aapki umra kya thi us samay?

AN: us samay, meri 11 to ho gayi thi.

KS: sangeet ki taraf aap kaise muDe the?

AN: yeh kya hai na ki aap jo sochte hain ki yeh mujhe karna hai,
waisa eeshwar karta naheen, pehle to kis ghar mein paidaa hona hai
yeh bhi aapke haath mein naheen hai. to uparwaale ne poora 'plan'
banaa rakha hai ki isko kya karna hai, isko kya karna hai. ham
khaamakhaa apni sar khori karte rehte hain ki yeh bannaa tha ur yeh
naheen banaa. 'So, time to tme everything is changing'. aap jis ghar
mein paidaa huye woh jab aapke haath mein naheen, laDka banna laDkee
banna yeh aapke haath mein naheen, 'businessman' ke ghar mein paidaa
hona hai ya gareeb ke ghar mein paida hona hai yeh bhi aapke haath
mein naheen, aur aapka kismat bhi aapke haath mein naheen.

---------------------------------------------------------
Song: aayi jhoom ke basant jhoomo sang sang mein (Upkaar)
---------------------------------------------------------

END OF EPISODE 1