----- Original Message -----

From: soojoi_india

To: vividhbharati@...

Sent: Wednesday, May 02, 2007 6:05 PM

Subject: [vividhbharati] Aaj Ke Fankaar - Bulo C Rani

sabhi sunnewaalon ko Renu Bansal ka namaskaar. hamaare Aaj Ke Fankaar
hain sangeetkaar Bulo C Rani.

Song: hamein to looT liya milke husnwaalon ne (Al Hilaal)

jee haan, film Al Hilaal ke is dil looT lenewaali qawwaali ke
sangeetkaar the Bulo Chandiram Ramchandani, jo aaj bhi filmi duniya
mein Bulo C Rani ke naam se yaad keeye jaate hain.

Song: main hoon deewaana baDaa mastaana (Haqdaar)

is deewaane sangeetkaar ka janam 1920 mein Hyderabad mein huya tha jo
ab Sind Pakistan mein hai. unki filmi 'career' ki shuruwaat huyi thi
1939 mein Ranjit Movietone mein sangeetkaar Khemchand Prakash ke
sahaayak ke roop mein. aapko yeh bhi bataa den ki Khemchand Prakash
kabhi New Theatres ke sangeetkaar Timir Baran ke sahaayak huya karte
the. Khair, Khemchand Prakash ne Bulo C Rani ko bataur gaayak gaane
ka mauka diya tha san 1942 ki film Mehman mein. 1943 ki mashoor film
Tansen mein Bulo C Rani the Khemchandji ke sahaayak sangeet
nirdeshak. swatantra roop se Bulo C Rani ne pehli baar sangeet diya
film Pagli Duniya mein, yeh bhi Ranjit Movietone ki hi film thi. unke
sangeet nirdeshan mein san 1946 ki film Rajputani ka Mukesh aur
Hamida Bano ka gaaya yeh yugal geet aaj bhi lokapriya yugal geeton
mein yaad kiya jaata hai.

Song: jaa parwaane jaa kahin shamaa jal rahi hai (Rajputani)

Bulo C Rani ka sangeet sureela hai, kam saazon ka istemaal karte the
woh. unka sangeet Khemchand Prakash ke sangeet se prereet to tha hi,
lekin apni alag pehchaan ke saath.

Song: teri mast nigaahon ne banaaya hai hamein deewana (

Bulo C Rani us daur ke sangeetkaar the jab bhaari aawaazon ko zyaada
mauke deeye jaate the, jaise ki Hamida Bano, Khursheed, Amirbai
Karnataki, Zohrabai, vagerah. Bulo C Rani ne Geeta Roy ko chunaa film
Jogan ke liye. Geeta Roy ki dard bhari aawaaz mein Meerabai ke bhajan
gaayeen jo aaj bhi baDi shraddhaa ke saath sune jaate hain.

Song: ghunghaT ke paT khol (Jogan)

usi daur mein film sangeet sansaar mein ek aur aawaaz chhaane lagi
thi, jo sirf patlee hi naheen balki baareek maanee jaati thi. yeh
aawaaz thi Lata Mangeshkar ki. lekin is aawaaz mein dard kamaal ka
tha. Bulo C Rani ne unse gawaaya film Sunehre Kadam mein ek dard
bharaa geet. Lata Mangeshkar ki dard bhari aawaaz aur Bulo C Rani ke
sangeet ka yeh ek 'milestone' maana jaata hai.

Song: maangne se jo maut mil jaati (Sunehre Kadam)

Bulo C Rani ka sangeet safar bahut lambaa naheen rahaa, is baat ka
unhe ranj tha lekin fakr is baat ka tha ki unhone kabhi kisi dbaav
mein aakar apne sangeet ke saath samjhauta naheen kiya. san 1947 mein
film Piya Ghar Aaja mein unhone 10 mein 8 gaane Meena Kumari se
gawaaya. 1954 mein Bulo C Rani ki ek aur mahatwapoorna film aayi,
Bilwamangal. Is film mein Suraiya ka gaaya huya yeh gaana unke gaaye
tamaan lokpriya geeton mein se ek hai.

Song: parwaano se preet seekh lee (Bilwamangal)

dikhne mein duble patle se, Bulo C Rani ne 60 ke dashak mein bahut
si 'stunt' filmon ke liye bhi sangeet diya. lekin sangeet wahi,
sureela, meethaa.

Song: ab dekh ke kya karen taaron ki baraat ko (

aapko yaad hogaa maine aapko bataaya tha ki shuru shuru mein Bulo C
Rani Khemchand Prakash ke liye ek film mein apni aawaaz dee thi. aage
chalkar unhone Sindhri lokgeeton mein apna swar diya.

Song: Sindhri folk song sung by Bulo C Rani

hamaare Aaj Ke Fankaar the beete daur ke sangeetkaar Bulo C Rani, ab
deejiye Renu Bansal ko ijaazat, namaskaar!

THE END