EPISODE 9

----------------------------------------------
Clip: Prelude of "jeevan se bhari teri aankhen"
----------------------------------------------

KS: Anandji, main aapke ghar gaya aur mera saubhaagya raha, baDaa
achchha laga mujhe, jaise kisi sanstha mein aa gaya hoon, jo
maine 'observe' kiya, baDa hi gharelu sa maahaul, kahin par bhi us
tarah ki taDak bhaDak naheen jo filmi logon mein hoti hai. mujhe
lagta hai ki woh jo film ka maahaul hai woh aapki ghar mein naheen aa
paaya hai.

AN: film ka kaam alag hai, kabhi mere dost log kisi se kehte hain
ki 'yeh music director so and so hain', to log maante naheen hain.
abhi aaj main yahaan aaya hoon to 'I am a common man', main yahaan
seekhne aaya hoon ki yahaan log kaam kaise karte hain, agar woh
naheen samajhta hoon to Theek hai kya fark paDta hai mujhe. ghar ki
baat aapne kahee hai to, film line mein rehke agar ghar ki 'life'
ko 'balance' mein rakhna hai to pehle to auraton ko aap pe vishvaas
honaa paDegaa. aap kai logon se milenge, raat ko der se bhi lauTna
paDta hai, to aapki aurat ko is baat ko samajhna hoga. woh har cheez
samajhti hai, ghar ki har cheez ko 'balance' karna hi unkaa kaam hai.
poora ghar chalaana bahut mushkil kaam hai. ghar chalaana aur uske
baad agar har cheez mein chik chik kare to aap kaam naheen kar sakte,
aapke gaane bhi waise hi banenge. to ghar mein yahi philosophy chalti
hai, hamne yahi koshish kee hai ki ghar ghar jaisa lage.

KS: to aap dono ki kaamyaabiyon ke peechhe dono patniyon ka bhi
yogdaan raha hai?

AN: yogdaan raha hai. patniyon ka, paDosiyon ka, aur logon ka jo
pyaar mila hai, hamko log filmwaalon ki tarah naheen dekhte, mujhe
aisa lagtaa hai, jo bhi milta hai 'bhaai' kehke bulaata hai. aur
pehli baar milne ke baad 'bhaai' kehke bulaaye to woh pyaar alag hi
hotaa hai. unki nazar alag hoti hai, aapke milne ka andaaz alag hota
hai. aur eeshwar ki yeh kripa rahi hampe ki ham jahaan pe bhi gaye,
log hamse baDe pyaar se mile. hamne bhi woh milaa huya pyaar baanTne
ki koshish kee hai.

KS: Kalyanji bhaai ne kalyaaN kee aur aapne bhi aanand ko luTaaya....

------------------------------------------------------------------
Song: jeevan se bhari teri aankhen majboor kare jeene ke liye (Safar)
------------------------------------------------------------------

KS: Anandji, aapne bataaya tha ki aap bi dukaan par baiThaa karte
the, to kabhi aisa bhi hotaa hogaa ki koi graahak aaya maan lo, aur
woh aapko pehchaanta ho, usne aapki koi film dekhee hai jismein aapne
sangeet diya hai, to kabhi koi 'reaction', graahak to chhoTe aur
baDe, dono tarah ke hote hain, to kabhi koi aisa mauka aaya ki woh
aaya aur aapse...

AN: (laughs) Kamalji, aap aise 'psychologocal question' poochhte
hain, yeh bhi main mazaak mein hi letaa tha, main 'music director'
ban jaane ke baad bhi dukaan mein jaakar baiThta tha. dukaan mein ek
hi 'philosophy' chalti hai ki 'customer is always right'. yeh har
dhandhe mein honaa chaahiye. agar 'customer' aapke saamne aakar koi
galat baat bhi kare to bhi aapko yeh kehna chaahiye ki 'yes, you is
right'. to 'automatic' uska 'ego' khatam ho jaata hai. to dukaan mein
har jo 'customer' aata hai, woh maalik hai. kai baar aDos paDos ke
log aa jaate the, woh mujhe jaante bhi the, woh aakar kehte the 'arey
tera woh picture dekha, bahut achchha lagaa, chal ek naara de to, ek
woh de to'.

KS laughs

AN: ab jo dukaan mein baiTha hai, woh 'de to de to' hi karega.

KS: aur aapke mohalle mein jin logon ne aapko bachpan se baDe hote
dekhaa hai, unke chere par bhi woh Khushi aati hogi jo mohalle ke
bachchon ko baDe hote dekhkar hoti hai.

AN: log hamein sabse zyaada pasand isliye karte hain ki itne baDe ho
jaane ke baad bhi ham logon mein koi akaD naheen hai, sabse bartaav
achchha karte hain, yeh karte hain, woh karte hain, aur yeh guN jo
hai hamaare baDon ne hamko seekhaaya hai aur eeshwar ki kripa rahi ki
hamne us par chalna seekha.

-------------------------------------------------------------
Song: baDi door se aaye hain pyar ka tohfa laaye hain (Samjhauta)
-------------------------------------------------------------

AN: Kalyanji bhaai ki zindagi mein bahut saare, 'classical' unko
bahut pasand tha, lekin unkaa jo 'soul' tha, usmein maine har waqt
yeh dekha ki woh ek baDe bhaai ke naate, 'family' mein hota hai,
chhoTa baDaa, sab kuchh hota hai, mere bhi bachchon ko woh apne
bachche samajhte the kyunki hamaara poora ghar ek tha, aisa naheen
tha ki chhoTa baDaa koi hai. main jab baahar rehta tha to woh
meri 'wife' ko poochhte the ki 'koi kaam hai, kisi cheez ki zaroorat
hai'. 'office' mein jaane se pehle ek baar aa jaate the aur sab kuchh
poochhte the, aur woh, mere hisaab se, mujhe aisa lagtaa hai
ki 'samjhauta Ghamon se kar lo, zindagi mein Gham bhi milte hain,
dukh aur sukh sab saath mein hotaa hai, lekin unhone har waqt
yeh 'compromise' hi rakha...

--------------------------------------------
Song: samjhauta Ghamon se kar lo (Samjhauta)
--------------------------------------------

KS: Anandji, aajkal aksar ham yeh sunte hain ki gaane ki dhun pehle
se hi tayyaar ho gayi hai. aise gaano ke samay aap geetkaar ke saath
mein, 'producer' ke saath mein, 'director' ke saath mein,
aur 'singer' ke saath mein kis tarah ki 'sitting' huya karti thi us
samay?

AN: Kamalji, bahut achchha sawaal poochha hai aapne. kya hota hai ki
aap aksar dekhenge ki 'producer/director' ke saath jinki joDee jamee
huyi hai unka kaam achchha hota hai. aap bolenge ki Shankar Jaikishan
aur Raj Kapoor ka 'music superhit' raha. ham bolenge ki Om Prakash
Mehra aur Kalyanji Anandji ka 'music superhit' raha. to yeh kya hai
ki 'tuning' hai. ek doosre ko samajhte hain ki unki 'technique' kya
hogi, unko kaisa gaana chaahiye, woh do 'line' mein bhi kahenge to
samajh jaayenge baat ko. aap maanenge naheen, Prakashji aur ham kaam
karte hain, unke gaane baDe lambe hote hain, lekin 'sitting' kitni
hoti hai maaloom hai? 'hardly' do yaa teen 'sitting' mein ho jaati
hai. aur woh gaana jo hai teesri 'sitting' ke baad 'complete' ho
jaati thi. to unko kyaa chaahiye hamko maaloom hai, 'technique' hamko
maaloom hai, kahaani ka kya 'situation' hai woh hamko maaloom hai,
aur ek doosre ko samajhte the.

KS: aisa koi gaana jo aapko yaad hai?

AN: yeh waqt ki heraa pheri hai.

KS: na teri hai na meri hai.

------------------------------------------
Song: aur waqt ki heraa pheri hai (Hera Pheri)
----------------------------------------

END OF EPISODE 9