EPISODE 2

KS: O P Nayyar ke sangeet mein ek ek saaz ki aawaaz saaf saaf sunaaee
detee hai, aisa isliye kyunki 'orchestra' ka sanchaalan karne ke
saath saath O P Nayyar apne sangeet ki 'recording' par bhi uplabdh
hote the. 'microphone' ki 'testing' se lekar 'sound recording' tak.
aur yahi wajah hai ki aaj bhi unkaa kaam apne samkaaleen
sangeetkaaron se haTkar sunaaee paDtaa hai. daastaan-e-nayyar ki
pehli kaDee mein O P Nayyar ki yaadon ka safar aakar thamaa tha
Amritsar mein. Amritsar ke baad ka unka rachanaatmak safar kaise aage
baDhaa, iski kahaani O P Nayyar ki zabaani daastaan-e-nayyar ki
doosri kaDee.

OP: 'college' ke zamaane mein mere ek dost the, abhi 'last year' unka
inteqaal ho gaya, shree S N BHatia saahab, kitni dafaa woh
mujhe 'producer'-on ke paas, yeh Pancholi saahab ke paas mujhe
bechaare leke gaye. to Pancholi saahab ne dekha ki 'yeh chhokra sa
hai, yeh kya 'music' banaaega?' Khair, unhone bola ki aap Pandit
Amarnath, jo us waqt unki filmon mein 'music' de rahe the, aap
unke 'assistant' ban jaayo. maine kaha ki 'main Pnadit Amarnathji ke
paas jaakar kya karoonga wahaan, main to 'break' lene aaya'. wahaan
se phir nikaal diye gaye. ittefaaq dekhiye, ki Pancholi saahab, 1951
mein, Regal Cinema mein apni tasveer Nagina 'release' karne gaye.
ittefaaq dekhiye, kudrat kyaa jaadoo karti hai, kya khel karti hai,
yaa mera waqt aa gaya hai, to dono ikaTTha baahar Takraaye, Bhatia
saahab aur Pancholi saahab, Bhatia saahab Pancholi saahab ko jaante
the kyunki wahaan par woh 'chemist' the, Dewan Chand Bhatia Chemists,
to saahab Pancholi saahab ki uske saath baDi mulaaqaat thi, to woh,
hamaara dost bolaa, 'aapne to ek 'singer introduce' kar diya film
Nagina mein, doosra ek mera dost tha 'composer'...', to bole ki 'yaar
main to usi ko DhoonD raha hoon, bulaao usko'. to usne mujhe taar
bheja, 'I was in Bombay', 'to reach Bombay, Pancholi has signed you
as composer'.

--------------------------------------------------
Song: huye hain tumpe aashiq hum (Mere Sanam,1965)
--------------------------------------------------

OP: to Pancholi saahab mujhe apne ghar le gaye. Pancholi saahab
bole 'shaam ko Regal Cinema aayo', aa gaye, unhone bolaa 'kitne paise
loge?' maine kahaa i 'beggars can't be choosers, aap kya pagaar
denge? mujhe yahaan rehna hai, meri shaadi huyi hai, aur mujhe
bataaiye ki aap kyaa denge?' to kehne lage ki 600 rupay denge maheene
ke. maine kahaa ki 'dekhiye itne mein to mera chalega naheen'. bole
ki '700 doonga bas! iske upar naheen doonga' to 500 rupay
unhone 'pocket' se nikaala aur Bombay pahunch jaayo. ek 'letter'
diya, is aadmi ko milo jaake. aur ittefaaq dekhiye ki Pancholi saahab
ne kabhi tasveer 'direct' naheen kee. pehli 'picture' unhone 'direct'
kee Aasman, jismein mera 'music' tha.

---------------------------------------------
Song: raat suhaani hanste taare (Aasman,1952)
---------------------------------------------

KS: Nayyar saahab, main yeh jaanna chaahoonga ki seedhe sangeet
nirdeshan ka mauka milaa yaa pehle aapne koi 'background score' bhi
kiya tha?

OP: haan, yaad aaya, bahut aapne achchhi aur Khoobsorat baat nikaali,
main bhool hi gaya tha, Kamal saahab, ek tasveer thi Kaneez, jismein
ki us waqt ke baDe 'popular' joDi the Shyam aur Munawwar Sultana.
Shyam ko main Lahore se hi jaanta tha, Punjabi the woh. aur unhone
mujhe is Kaneez film mein 'background music' ka 'chance' dilaaya.


KS: matlab, Kaneez Aasman se pehle?

OP: Aasman se pehle. yeh 48 ki baat hai. Shyam saahab ne dilwaaya
tha, haan-ji. to woh usmein 'music' tha Master Ghulam Haider saahab
ka, kyunki woh Pakistan chale gaye the to Hansraj Behl,
aur 'background music' mera tha. to lekin woh 'background music' tha,
baDaa 'difficult' kaam tha. lekin hamne kiya woh, lekin koi 'as a
composer break' naheen milaa. 'as a composer' tabhi 'break' mila jab
Pancholi saahab ne mauka diya. aur itteffaq dekhiye teeno 'picture'-
en Aasman ke saath taallukh rakhti thi, doosra Chham Chhama Chham,
baarish bhi udhar se hi hoti hai, teesra Baaz, woh bhi Aasman mein
uDta hai, aur teeno 'picture'-en 'super flop'. ab woh socha ki koi
raasta naheen bachaa. to hamaare ek dost the Kardar Film Distributors
ke, K K Kapoor. unke paas gaye rote huye ki 'saahab, main 'hotel'
mein saamaan baandh raha tha, darwaan bola ki saamaan bhi phenk denge
agar paise naheen deeye'. to maine kahaa ki 'mere paas to mere
bachche ke doodh ke liye bhi paise naheen hai'. to unhone ek 100
rupay ka 'note' nikaal ke diya, 'tum ghar mein jaake Glaxo box ke 2/3
Dibbe khareedo, biwi ko do, yeh meri gaaDi hai, isi gaaDi mein lauT
ke aayo'. unki gaaDi mein baiThke main lauT aaya, yeh baDi haqeeqat
baaten main aapko sunaa raha hoon, sunne ke qaabil hain, woh janaab
mujhe biThaake, Guru Dutt ke ghar, mujhe pataa tha, uske ghar le
gaye. ek ghanTa main garmi mein neeche baiThaa raha, May ka maheena.
Kapoor saahab ek ghanTe ke baad neeche utre, baDi 'serious' shakal
karke ki 'chalo upar'. woh kyun leke gaye ki Guru Dutt ne mera 3000
rupay denaa tha. maine kaha ki 'mere 3000 rupay dilaayo, main 'hotel'
ke paise bharoon aur jaata hoon main waapas'.

KS: kis film ke paise baaki the?

OP: Baaz. to saahab, GUru Dutt ne dekhaa mujhe, 'smile' dee, woh
mujhe Nayyar naheen, Nayar bolaa karte the, Nayar. 'Nayar, ek film
aur karoge?' mere pairon ke neeche se zameen nikal gayi. to maine
kahaa ki 'mera 3000 rupay'. kehaa ki '1000 usmein se lo abhi, aur
1000 agli 'picture' ka 'signing'. maine kahaa 'jee Theek hai, manzoor
hai, lekin main 'contract' ke upar paise naheen loonga, mujhe maheene
ke maheene paise chaahiye'. kehte ki '1000 rupay maheene pe rakh lete
hain'. maine kahaa ki ''date fix' karo, ki kaun si 'date' pe milegaa,
main 'hotel' mein rehta hoon, meri izzat rehni chaahiye'. kehta ki '7
taareekh ko paise milegaa har maheene'. phir us 2000 rupay se 'hotel'
waale ke paise chukaaye, sab kiya.

KS: kaun sa 'hotel' tha?

OP: ???? Hotel, woh jiska naam aaj Shalimar Building hai, 2nd 'floor'
pe Mehboob Khan aur Sardar Akhtar rehte the, aur 5th 'floor' ke upar
main rehta tha.

KS: kamre ka 'number' kaun sa tha?

OP: kamre ka 'number tha 8. dekhiye woh 'hotel' aaj 'flat' ban gaya
hai, us waqt us 'hotel' ke andar ek 'hall', ek 'bedroom', khaana
banaane ki ijaazat naheen thi, aur taqmaam nazaara is 'marine drive'
ka, aur khuli hawaa, 450 rupay maheena deke ham wahaan Tike rahe jab
tak ki Aar Paar 'hit' naheen huyi.

--------------------------------------------
Song: baabuji dheere chalna (Aar Paar, 1954)
--------------------------------------------

OP: us waqt ke andar baDe paapaD bele gaye, idhar kisi ko gaana
seekhaake, kabhi udhar, kisi 'school' mein lag jaa, tabeeyat uksaa
jaati thi. phir 1950 mein meri bahen rehti thi Shivpuri mein. main
apni bahen ke paas chalaa gaya. wahaan se phir main lauTaa to
Amritsar aaya, apne ghar mein. chaar maheene pehle hi main Amritsar
aaya tha jab Bhatia saahab ne taar bhejaa ki 'sign' kar liya gaya
hoon. kismat kya khel karti hai, yeh waaqai daastaan-e-Nayyar hai.

----------------------------------------------------------
Song: main shaayad tumhaare liye ajnabee hoon (YRPNA,1966)
----------------------------------------------------------

OP: 1950, jab ki meri umar 18 baras ki hogi, us waqt ek gaana, khud
hi usko 'compose' kiya, woh C H Atma ka tha "preetam aan milo",
usmein HMV waale bole ki 'bhai 'royalty' loge?' jawaani ki
umar, 'royalty' matlab ek saal ke baad. ab ek saal kisi ne dekha
bhi? 'cash' kya dete ho? woh bole '20 rupay 'per title'. ek taraf
tha "preetam aan milo", doosri taraf tha "kaun nagar tera door
Thikaana". usko to har kisi ne sunaa hi naheen, "preetam aan
milo 'popular' huya. 20 rupay 'per title' mile, 40 rupay
hamne 'pocket' mein Daale, aur Lahore mein Lawrence mein baiTh jaate
the, jawaani ke din the, to bahut paise the us waqt, to maheena bhar
Khoob khaate peete rahe, mazaa karte rahe. is gaane ki wajah se C H
Atma ne 'royalty' lee thi, usko laakhon rupay 'royalty' ka milaa, aur
ham 80 rupay lekar baiThe rahe. agar hamko yeh akal rehti
ki 'royalty' le lete, aisi takleefen aati naheen.

-----------------------------------------------
Song: preetam aan milo (Non-film-C H Atma,1950)
-----------------------------------------------

KS: aapka sabse pehla 'popular song' to isi ko maanenge ham "preetam
aan milo"?

OP: "kabhi aar kabhi paar laaga teer-e-nazar", Aar Paar ka
pehla 'super hit' gaana Shamshad-ji ka.

-------------------------------------------------------------
Song: kabhi aar kabhi paar laaga teer-e-nazar (Aar Paar,1954)
-------------------------------------------------------------

END OF EPISODE 2