SANGEET SARITA
--------------

MERI SANGEET YATRA: PT SHIV KUMAR SHARMA (Noted Santoor Player)
---------------------------------------------------------------

Excerpts from the Series where he talks about his journey as a Film
Music Composer, SHIV-HARI, with Pt Hari Prasad Chaurasia
**************************************************************

PART 2

SS: Shiv Kumar Sharma
AP: Aneesh Pradhan (Tabla Player)

AP: R D Burman saahab ke saath aapke bahut kareebi rishte rahe

SS: achchhi dosti thi unke saath aur isiliye maine apne beTe ka naam
Rahul rakha. aur woh 'music' matlab, seekhe huye 'musician' the. Ali
Akbar Khan saahab ke paas arod bhi seekhaa unhone, table ka bhi shauk
tha, aur 'western music' ka bahut shauk tha. to mere saath unka aisa
hota tha ki tab woh bhi shuruwaat kar rahe the, to Burman daada rehte
the yahaan Khar mein, unke 'bungalow' ka naam tha 'The Jet', Linking
Road pe. aur main rehta tha 14th Road pe, woh Linking Road se saDak
jab idhar aati hai, to main rehta tha ek 'building' mein jiskaa naam
tha Shanti Villa. to shaam ko aksar Pancham unke paas, Pancham kehte
the ham unko, R D Burman ko, to unke paas ek Fiat gaaDi thi, to woh
leke chale jaate the aur koi na koi 'music' unke paas hotaa tha. to
usko 'cassette' ko, ham log 'drive' pe chale jaate the. aur sunte
the, kabhi 'jazz music' sun rahe hain, kabhi koi Siddheshwari-ji ka
koi Thumri sun rahe hain, aur unko 'rhythm' ka baDaa shauk tha, table
ka baDaa shauk tha. to table ki shauk ki wajah se hi, main bhi kabhi
baiThta tha to, tablaa waise main tabhi chhoD raha tha, mera bajaana
kam ho raha tha, lekin aise dosti mein baiThe huye kabhi tablaa bajaa
diya, to unko maaloom tha to usiki vajah se ek din unhone mujhe bahut
majboor kiya ki Guide film ban rahi thi, to usmein ek gaana tha,
jismein table ka kaam tha, to kahaa ki 'ismein aap tablaa bajaaiye'.
maine kahaa ki 'mera abhi riyaaz bhi naheen hai, bhool chukaa hoon
aur yeh bahut mushkil kaam hai, film mein bilkul 'perfection' honi
chaahiye aur sab cheez sahee bajni chaahiye'. lekin bahut
unhone 'insist' kiya, to Lata-ji ka gaana tha "mose chhal keeye jaaye"

AP: waah waah

SS: to usmein majbooran maine tablaa bajaaya tha aur mere Khayaal
mein abhi wohi ek 'record' maujood hai jismein maine tablaa bajaaya
huya hoon.

AP: lekin kyaa Khoobsoorat bajaaya PanDit-ji aur kam shrotaa honge
jinko is baat ka pataa hogaa, to aaj ham sunaate hain is gaane ko.

SS: is gaane mein maine bajaaya tha aur main yeh zikr karna
chaahoonga us waqt R D Burman ke saath Maruti ?????? tablaa bajaate
the aur woh unke saath 'permanent assistant' hote the aur woh bhi
saath mein baiThe huye the.

----------------------------------------------------------
Song: mose chhal keeye jaaye dekho saiyaan beimaan (Guide)
----------------------------------------------------------

AP: PanDit-ji, Rahul Dev Burman-ji ke saath aapke kareebi rishte rahe

SS: gehri dosti thi hamaari, abhi Pancham ka jab zikr kar rahe hain
ham log, to jaisa kehte hain na bahut jiddat ki baat sochte rehte
the. kuchh aisi baat ki is baat mein se nayaa kya nikaale. to usi ki
main aapko ek misaal bataayunga ki film ban rahi thi Sholay.
Sholay 'film industry' ki ek 'all time great film' hai. to
usmein 'music' unhone diya tha. aur ek, jaisa maine kahaa, jiddat
kuchh na kuchh karte rehte the, to apne gaane mein bhi kuchh aawaaz
aisi banaate the ki alag andaaz ka ek gaane ka 'style create' kiya.
to Sholay ka ek gaana bahut 'popular' huya tha, "mehbooba mehbooba".
woh Pancham ne Khud gaaya tha. to usmein unhone Iranian Santoor
istemaal kiya. Iranian Santoor hamaare Santoor se 'tonal quality'
mein alag hai, 'shape' bhi alag hai, 'system' to wohi hai, aur yeh
mere paas kaise aaya, ki 1969 mein main Iran gaya tha Shiraz Festival
mein bajaane ke liye. International festival huya tha to wahaan ki
Government ne mujhe ek 'gift' diya tha. to Pancham ne kya kiya ki
Iranian Santoor ko, ab sochiye ki yeh 'electronic music' to aaj huya
hai, Sholay kabhi aayi thi, Rajkamal Studio mein unhone apni tarah se
ek 'experiment' karke uski 'tone' mein kuchh badlaav kiya aur ek alag
andaaz ka 'tone' banaaya, jo us gaane ki 'mood' ko 'suit' kare, (hums
the music), is kism ka 'piece' tha. yeh main shrotaaon ko sunaana
chaahoonga, Pancham ki aawaaz aur saath mein Iranian Santoor.

AP: waah waah!

--------------------------------
Song: mehbooba mehbooba (Sholay)
--------------------------------

AP: PanDit-ji, aaj ham thoDaa sa peechhe muDte hain aur 1960 ke
kareeb jab aap Mumbai aaye, un dino aapka film sangeet ke saath ek
gehra taallukh banaa, uske baare mein zaraa sunnewaalon ko bataaiyega.

SS: zaroor zaroor! 1960 mein main yahaan aa gaya. aur koi aisa yeh
naheen tha ki yahaan kya karoonga. ghar chhoDke chale aaye, anjaan
jagah, anjaan log, ek do logon ko jaanta tha, ek Vasant Desai-ji ko,
aur woh jo Jhanak Jhanak Payal Baje mein maine bajaaya tha,
uska 'record' bhi nikal chukaa tha. to logon ko yeh maaloom tha ki
koi saaz ismein bajaa tha lekin woh shakhs nazar naheen aaya. to jab
pataa chalaa ki main yahaan rehne lagaa hoon, to mujhe phir dheere
dheere log bulaane lage, film ke liye bajaane ke liye. to jaise
Jaidev-ji, Roshan-ji, Khayyam saahab, S D Burman, shuru shuru mein in
logon ke saath maine filmon mein bajaana shuru kiya.

AP: O P Nayyar-ji bhi

SS: Nayyar saahab, unki bahut filmon mein maine bajaaya, aur R D
Burman, Laxmikant Pyarelal, unke saath bahut achchhe sambandh hamaare
the, aur aksar hi unke saath bajaaya hamne. aur bhi bahut
saare 'music directors' ke saath aur woh ek aisa daur tha ki jismein
Santoor ko, jise ham angrezi mein 'integral part of film music' keh
sakte hain. jahaan bhi koi 'romantic' gaana ho, yaa 'outdoor'
ka 'scene' ho, 'background' mein, yaa 'romantic scene' ho, usmein
Santoor ke baGair aisa lagtaa tha ki 'incomplete' hai. to Santoor ek
aisa hissa ban gaya 'film music' ka bhi, to yeh udhar 'classical
music' mein Santoor ki 'acceptibility' ho rahi thi, aur idhar film
mein bhi yeh cheez hoti rahi. to ismein yeh huya ki kai 'music
directors' ke saath maine bajaaya aur unmein kuchh 'music directors'
ne bahut achchha Santoor ka istemaal kiya. aur chand ek gaane main
shrotaaon ko sunaana chaahoonga, jaise 'music directors' hain O P
Nayyar saahab...

---------------------------------------------------
Clip: jaaiye aap kahaan jaayenge (Mere Sanam)
Clip: yeh chaand sa roshan chehra (Kashmir Ki Kali)
---------------------------------------------------

SS: S D Burman saahab...

-------------------------------------------------------------
Clip: tere bin soone nain hamaare (Meri Surat Teri Ankhen)
Clip: aise to na dekho ke hamko nasha ho jaaye (Teen Deviyan)
-------------------------------------------------------------

SS: Naushad saahab...

--------------------------------------------------------------
Clip: mere mehboob tujhe meri mohabbat ki kasam (Mere Mehboob)
--------------------------------------------------------------

SS: Jaidev-ji...

------------------------------------------------
Clip: tu chanda main chaandni (Reshma Aur Shera)
------------------------------------------------

SS: Madan Mohan-ji...

----------------------------------------------------
Clip: hai tere saath meri wafaa (Hindustan Ki Kasam)
Clip: naino mein badraa chhaaye (Mera Saaya)
----------------------------------------------------

SS: Khayyam saahab...

----------------------------------------------------
Clip: ae dil-e-naadaan aarzoo kya hai (Razia Sultan)
----------------------------------------------------

SS: Laxmikant Pyarelal...

----------------------------------------------------
Clip: main shaayar to naheen magar ae haseen (Bobby)
Clip: suno sajna papeehe ne (Aaye Din Bahaar Ke)
----------------------------------------------------

AP: PanDit-ji, bahut achchha lagaa aapse baaten karke, Santoor ka jo
filmi geeton mein prayog huya hai, uski bahut si jaankaarian milee
hamein, aapka bahut bahut dhanyavaad!

SS: dhanyavaad!

THE END