Hamari aaj ke fankaar hain First Lady of the Indian Screen - Devika
Rani Choudhary. Cornell Choudhary ki beti aur Rabindranath Tagore ki
grand niece, Devika Rani ne 30 aur 40 ke dashakon mein apni adaakaari
aur film making se poore Hindustan ke logon ka dil jeet liya.

Song: Mere jeevan ke path par chhaaye yeh kaun

Devika Rani ka janm Andhra Pradesh ke Waltier mein 30 March san 1907
mein huya tha. 20 ke dashak mein woh London chali gayi jahaan unhone
Royal Academics of Arts and Music se Architecture ki degree praapt
kee.. Waheen unki mulaaqaat huyi Himanshu Rai se jinse unhone 22
varsh ki aayu mein vivaah kar liya. Devika Rani ki filmon mein entry
huyi san 1929 mein Prapanch Pash film mein fashion designer ke roop
mein. Is film ka post production Germany mein huya. Bataur abhinetri
unki pehli film thee 1933 mein bani film Karm jiske naayak the khud
Himanshu Rai. Yeh film English mein bhi bani. Himanshu Rai ke saath
milkar DEvika Rani ne nirmaan kiya Bombay Talkies ka jiski pehli film
aayi Jawani Ki Hawa san 1935 mein, jo ek murder mystery par aadhaarit
tha. Phir 1936 mein bani film Achhut Kanya jismen nayak the Ashok
Kumar. Film behad kaamyaab rahi aur Devika Rani - Ashok Kumar ki on
screen jodi tayyaar ho gayi. Is film ke geet bhi bahut mashhoor huye.

Song: Main ban ki chidiya banke ban ban bolun re (Achhut Kanya)

Achhut Kanya ki kaamyaabi ke baad Devika Rani aur Ashok Kumar
abhineet filmen aayi Jeevan Nayya, aur Janmabhoomi jaisi kaamyaab
filmen. Himanshu Rai ne Lucknow se Khurshid Homji ko Bambai bula liya
aur Saraswati Devi ke naam se unhe bataur sangeetkaar introduce kiya
film Janmabhoomi mein. Saraswati Devi pehli mahila sangeetkaar bani.

Song: Mere dil ki duniya ujad gayi (Janmabhoomi)

Devika Rani ki samvedansheel abhinay aur unki khoobsurti ne unki ek
alag pehchaan banaayi poore film jagat mein.

Song: Kise karta murakh pyar (Achhut Kanya)
Song: Kit gaye ho khevnihar

Devika Rani 1935 se lekar 1943 tak abhinay karti rahi. Unki kuch
prachalit filmen hain Karm, Jawani Ki Hawa, Jeevan Nayya, Achhut
Kanya, Izzat, Savitri, Jeevan Prabhat, Nirmala, Vachan aur Anjaan.

Song: Bharne de mohe neer (Izzat)

1940 mein Himanshu Rai ki mrityu ho gayi aur Bombay Talkies ke dekh
rekh ka zimma aa gaya Devika Rani par. Unhone produce kiya kai
musical hit filmen jaise...

Film Bandhan

Song: Chal chal re naujawaan

Film Kismat

Song: Mera bulbul so raha hai

Film Jhoola

Song: Aaj mausam salauna re

Devika Rani ne kai naye kalaakaaron ko bhi khoj nikaala. Unhone ne hi
Md Yusuf Khan ko Nainital se Bambai laakar bana daala Dilip Kumar
apni film Jwar Bhata mein bataur naayak break dekar.

Song: Saanjh ki bela panchhi akela (Jwar Bhata)

1940 se 1945 tak Bombay Talkies ka bhaar sambhaalne ke baad Devika
Rani ne Russian painter Svetoslav Roerich se shaadi kar lee aur
Bangalore jaakar apna ghar basaa liya aur filmon ko hamesha ke liye
keh diya alvida. Jeevan ke antim dinon tak woh Bangalore mein hi
raheen aur 9 March 1994 ko nikal padee apni mahayatra par.

Filmon mein unki yogdaan ke liye san 1958 mein unhe Padmashree se
sammaanit kiya gaya. San 1970 mein unhe diya gaya pehla Dadasaheb
Phalke puraskaar.

Devika Rani ne mahilaayon ke liye filmon ka dwaar khol diya, isse
unki pragatisheel vichaardhaara ka pataa chalta hai.

Devika Rani ka yogdaan hamesha sunehre aksharon mein hamari film
itihaas mein likha rahega.

THE END