-- hello ji
kay aap ke paasin sab ka mp3 hai too pl. u/l kar dee.

thanks
- In vividhbharati@..., "soojoi_india"
<soojoi_india@...> wrote:
>
> UJAALE UNKI YAADON KE
> ---------------------
> INTERVIEW OF RAVINDRA JAIN
> **************************
>
> RJ: Ravindra Jain
> AD: Amarkant Dubey
>
> EPISODE 1 (01/11/2007)
> ----------------------
>
> AD: doston namaste, aaiye aapki mulaaqaat karwaate hain
sangeetkaar,
> geetkaar aur gaayak Ravindra Jain se jinhe log daadu bhi kehte
hain.
> Ravindra-ji, aapka bahut bahut swaagat hai Vividh Bharati
ke 'studio'
> mein, namashkaar!
>
> RJ: namashkaar bhaai, sabse pehle to Vividh Bharati mein jo Bharati
> hai, us Bharati ko praNaam karta hoon kyunki maa Bhaarati ki
vishesh
> anukampa se ham yahaan tak pahunche hain aur unhi ki aaradhana
karte
> hain.
>
> RJ sings Saraswati Vandana.
>
> RJ: Maa Bhaarati ko praNaam karne ke baad Vividh Bharati ko praNaam
> karta hoon aur sabhi shrotaaon ka bahut aabhaar maanta hoon ki
hamein
> pyaar se yaad kiya hai yahaan pe.
>
> AD: to isse pehle ki ham is baatchit ko aage baDhaayen, main aapko
> yeh bataa doon ki Ravindra Jain se pyaar karnewaale chhoTe baDe
sabhi
> pyaar aadar aur sneh se daadu kehte hain. to main bhi daadu hi
> kahoonga.
>
> RJ: bilkul Theek hai
>
> AD: daadu, aapka itna lambaa filmi 'career' hai, aur filmon ke liye
> aapne gaane likhe yaa gaaye, balki 'private' ghazal yaa bhajan
> yaa 'album' hai, yaa doosri bhaasha ki jo filmen hain, itna baDaa
ek
> Khazaana hai aapke andar, to ham chaahte hain ki ek ek ek ek karke
us
> Khazaane se moti aap hamaare sunnewaalon tak pahunchaayen.
>
> RJ: (laughs) aap hukum kariye, aap jahaan se shuru karenge wahaan
se
> bataa doonga.
>
> AD: to daadu, ham chaahenge ki shurwaat aapke bachpan se hi ho.
>
> RJ: achchhaaa..., bachpan to abhi tak gaya naheen hai, kyunki
jahaan
> tak gyaan ka sambandh hai aadmi hamesha bachcha hi rehta hai, yeh
> main maanta hoon. umra mein bhale hi hamne bachpan kho diya ho,
lekin
> gyaan mein abhi bachche hain. to Aligarh mein the mere maata pitaa,
> Aligarh se hi janm mujhko milaa, Aligarh mein hi ho gaya tha shuru
> yeh geet aur sangeet ka silsilaa.
>
> --------------------------------------------------------------------
--
> -----------------
> Song: jab bhi nain moondo jab bhi nain kholo raadhe krishna bolo
(Jai
> Jai Shri Krishna)
> --------------------------------------------------------------------
--
> -----------------
>
> RJ: Dr Mohanlal, jo mere pitaashree ke 'contemporary' the, mere
> pitaaji ka naam Pandit Indramani Gyan Prasad-ji, to Mohanlal-ji ne
> janm ke din hi aankhon ka chhoTa sa ek 'operation' kiya, unhone
> aankhen kholee, kyunki ban thi aankhen, aankhen band hone ka
vardaan
> mujhe janm se milaa hai. kyunki yeh main maanta hoon ki aankhen
> insaan ko bhaTkaa dete hain kyunki aankhen jo hai na, insaan ka
> dhyaan yahaan wahaan lagaa deta hai, to 'concentration' ke liye
> wauise bhi ham aankhen band kar lete hain. to Dr Mohanlal
> ne 'operate' kiya aankhon ko, Aligarh ke baDe naami 'doctor' the,
aur
> unhone kahaa ki 'is bachche ki aankhon mein roshni dheere dheere aa
> sakti hai aur aayegi lekin paDhnaa munaasib naheen rahegaa utna
> kyunki usse jitna dekh paayega uska nuksaan hogaa'. to aise mein
mere
> pitaaji, unki doordarshitaa ko main saraahta hoon ki dekhiye unhone
> kya mere liye nirnay liya, ki sangeet hi mere jeevan ka lakshya
hogaa
> aur sangeet mein hi meri pehchaan banegi. to yahaan naaTakon mein
> Master G L Jain sangeet nirdeshan kiya karte the, Arya Jain samaaj
> ke, aur unhone sabse pehle jo ghazal mujhe seekhaaee thi, uska
> Khayaal mujhe aa raha hai, (sings) "labon pe tabassum nigaahon mein
> bijli qayaamast kahin pe chali aa rahi hai...."
>
> AD: yeh aapke 'master' Ghamandi Lal ji ne...
>
> RJ: 'right right right'. inkaa naam Ghamandi Lal hai, ghamanD kuchh
> naheen tha. seedhe saade vyaktitva ke dhani the. uske baad Pandit
> Janardan Sharma, jinhone swar ka gyaan karaaya. baDi mehnat karaaee
> unhone, unka abhyaas karaane ka ek Dhang tha, woh aise naheen kehte
> the ki itni baar isko gaana hai tumko, ek 'match box' le liya,
> maachis ki teeliyaan nikaal ke rakh lee, unhone kahaa ki ismein se
> aap ek ek teeli nikaal ke rakhte jaayiye aur 10 - 10 baar un
sargamon
> ko gaaiye, ab kisko ginna hai ki usmein kitni teeliyaan hain aur
utni
> baar gaana hai, qaid naheen thi samay ki. aise ki ek kaTori le lee
> chane ki, usmein se ek ek chanaa nikaaliye aur gaaiye usko, sargam
> gaate rahiye. is tarah poora din nikal jaata tha, kab din nikal
gaya
> pataa bhi naheen chalaa.
>
> AD: daadu, us samay kya umra rahi hogi aapki?
>
> RJ: 5 saal. mujhe ek chhoTaa sa 'harmonium' diya tha khilaoune ke
> jaisa, kyunki baDaa 'harmonium' to 'handle' naheen kar sakta tha,
> haath hi naheen jaata tha wahaan tak, to chhoTaa sa 'harmonium'
diya
> gaya tha, aur phir Pt Janardan Sharma ne raagon se parichit
karaaya,
> swar gyaan karaaya, aur ek chhoTa sa 'course' hai Prayag Sangeet
> Samiti ka, 'formal education' jise ham kehte hain, Aligarh ke hi
> Pandit Nathuram Sharma, unke saath baiThke phir unke shikshaN mein
> Sangeet Prabhakar ki 'degree' haasil kee, phir gurudev ne kahaa
> ki 'tumhaari Aligarh ki jo seekhnaa hai woh ho chuka hai, ab
> deshaaTan karo' aur is beech mein baDe bhaiya ke saath, D K Jain-ji
> ke saath, inka baDaa yogdaan hai mere 'career' mein, mere saahityik
> prakaash mein, Khaas taur se unhone baDaa yogdaan diya, to unke
saath
> Nagpur aaya aur ittefaaq ki baat hai ki Nagpur se Bambai ki doori
ek
> raat ki thi. aur Ranchi phir gaya, Ranchi se Kalkatte ki doori ek
> raat ki thi. to mere 'cousin' the jo mujhe Kalkatte le gaye aur
> Calcutta se hi jo mera filmi 'career' aur 'non-filmi recordings'
> shuru huyi.
>
> ------------------------------------------------
> Song: har har mahaadev jai bhawaani jai bhawaani
> ------------------------------------------------
>
> RJ: Aligarh mein ek vikhyaat 'family' thi jahaan main jaaya karta
> tha, Durga Puja mein Bangla gaane sunne jaaya karte the ham log.
> mujhe hameshaa 'attact' karte the bengal ki 'melodies' aur Bengal
> ka 'literature' aur unko sunne ke liye Khaas taur se Bengal aaya.
> Calcutta jab aaya to Vishva Bharati, wahaan pe Ravindranath Tagore
ki
> University hai, wahaan gayaa lekin kisi ne 'entertain' naheen kiya
> wahaan pe, koi tayyaar naheen huya.
>
> AD: daadu, yahaan pe main aapko thoDaa roknaa chaahoonga, ki aap
baDi
> tezee se Aligarh se Bambai aur phir Bambai se Ranchi aur phir
Ranchi
> se Kalkatta nikal gaye, beech mein bahut se 'station' aate hain
> jahaan pe hamein rukte huye jaana hai
>
> RJ: (laughs) jee jee
>
> AD: aap se main yeh bhi jaanna chaahta hoon ki aapke bachpan ke jo
> din rahe hai, usmein aapke bhaai bahen dost yaar mitra, sab aaj bhi
> aapko yaad karte honge, aur jinka aapne abhi zikr kiya D K Jain
> saahab, jinka aapke jeevan mein baDaa mahatwa raha hai, inke baare
> mein bataaiye.
>
> RJ: bhaai saahab saahitya kar rahe the un dino, unhone Doctorate of
> Literature (D.Lit kiya), Jain Authors of French pe kaam kar rahe
the,
> to kitaaben rehti thi unke 'room' mein Dher saari, to main waheen
> baiTha rehta tha unke paas, unko kehta tha ki thoDaa zor zor se
> paDhen taaki main apne andar sameT sakoon un rachnaayon ko, us
> saahitya ko sahej ke rakh sakoon. aap jo bhi aaj sunte hain woh
saara
> waheen se anuprerit hai. aur Aligarh mein mere zyaadatar dost
Muslims
> rahe, mere ghar ke paas hi mohalla hai, upar 'court', din wahaan
> guzarta tha, meri bachpan ki ek vaandhavi mere liye ghazlen
ikaTThaa
> karti theen, Guldasta, ek 'magazine' aati thi Shamaa, Urdu saahitya
> ki bahut 'popular magazine' thi, usmein se ghazlen chhaanT chhaanT
ke
> sunaaya karti thi mujhe.
>
> AD: woh jo bachpan ke aapke din hain woh bahut hi ek dam matlab...
>
> RJ: Khoobsoorat din the, maine ek sher kaha ki, "aaj kitne bhi
haseen
> rang mein guzre lekin kal jo guzre the wohi lagte hain behatar
> lamhe", to Theek hai, dinon ke saath saath aadmi tarakki bhi karta
> hai, shohrat daulat bhi kamaata hai lekin woh jo ateet ham kehte
> hain, maazi jisko kehte hain na, woh hamesha hi 'haunt' karta hai
aur
> Pt Janardan se jab main seekhta tha, tab mere ek aur 'comtemporary'
> dost the, hamaari ek 'family' thi Aligarh mein, Hema-ji mere saath
> seekha karti thi, ab to America mein reh rahi hai, to saath mein
> abhyaas kiya karte the, phir meri 'sister' Lakshmi, Munni jisko ham
> bulaate the, unka bhi nidhan ho gaya hai, aur woh bhi hamaare saath
> saath sur abhyaas karti thi.
>
> AD: achchha to Hema-ji se tab se hi...
>
> RJ: naheen woh hema-ji naheen, Kalkatte waali naheen, woh Hema
> Aligarh waali thi, Calcutta mein to main baad mein aaya hoon, woh
60s
> ki baat hai, yeh main baat kar raha hoon 1949, 51, 52.
>
> AD: daadu, is tarah ki mehfilon mein chhoTi si umra mein hi aap...
>
> RJ: goshThiyaan jinko ham kehte hain, usmein mere dost Iqbal Umar,
> Aligarh ke shaayar, Hashmi saahab, kya Khoobsoorat unhone sher
kahaa
> hai, "uff yeh haal-e-mareez yeh talaaKh yeh Gham, ab to har dawaa
se
> naakaam ho jaayegi, Gham se harGiz na lo inteqaam aansooyon warnaa
> yeh rasm bhi aam ho jaayegi".
>
> AD: waah waah
>
> RJ: Nissar, bahut achchha mera gaayak dost, gaaya karta tha Rafi
> saahab ke gaane, Mukesh-ji ke, har 'singer' ko 'copy' karta tha. to
> ham log aise hi shaam guzaara karte the, kahin ghoomne baaG mein
> chale gaye, 'restaurat' mein baiTh gaye, chaay pee rahe hain aur
der
> raat tak is tarah ki mehfilen chalaa karti thi.
>
> AD: us samay jo mehfilen huya karti thi, unmein filmi gaano ka bhi
> koi shumaar huya karta tha?
>
> RJ: filmi hi gaate the na, Hemant-da ke gaane, Rafi saahab ke
gaane.
> main filmi gaane naheen gaata tha, main 'harmonium' bajaaya karta
> tha. waise hi ghazal aur geet, mujhe yaad karne ka baDaa tha, meri
> jo 'memory' hai, woh bahut 'strong' thi. main sab yaad karta tha,
> Madhushala ke 135 chhand aur Haldighati, aur Dinkar-ji ki Raswanti,
> Kurukshetra, yeh sab us smay ki yaad kee huyi rachnaayen hain. aur
> jab ham antakshari khelte the, tab agar koi kahin aTak jaata tha to
> main turant keh deta tha.
>
> AD: to in sab mehfilon mein jaane ki wajah se Daant vageerah naheen
> paDee kabhi?
>
> RJ: paDee, Daant matlab isliye paDee kyunki main Gaayab rehta tha,
> yahaan koi 'time' to hota naheen tha aur raat ko darwaaza
> khaTkhaTaata tha, pitaaji ko uThkar aana paDtaa tha. unko 'heart of
> hearts' yeh jaante the ki kahin koi gaDbaD naheen hai. ek baar main
> aur mera ek dost, ham log Katpura ek jagah hai, wahaan ek din
baahar
> khaane ka baDa shauk huya, to hamne ek Tin lee aur gaane bajaane
lage
> aur logon se paise ikaTTha keeye. jab mere pitaaji ko yeh baat
pataa
> chalee to baDe naaraaz huye aur bole ki 'jaayo, jin jin se paise
> leeye the unko lauTaa ke aayo'. lekin yeh kaise ho sakta hai, kisse
> kitne leeye yeh main kaise yaad rakhta (laughs). phir maine socha
ki
> isse achchha hai mandir mein jaake Daal deta hoon. thoDe se paison
se
> hamne khaa leeye the jo hamko khaana tha, lekin aise hi baDe
mazedaar
> ghaTnaayen hain. bahut baar 'programme' mein bulaa liya logon ne,
aur
> wahaan se lauT rahe hain baaja haath mein uThaaye, na 'rickshaw' ke
> paise deeye na...
>
> AD: aapne bataaya ki ghar mein dhaarmik vaatvaran tha.
>
> RJ: jee haan, subah sabse pehle uThke (sings morning prayer). yeh
> Prakrit bhaasha hai aur phir har roz mandir mein meri 'duty' thi
har
> roz ek bhajan sunaane ki.
>
> ------------------------------------------------
> Song: krishna o krishna chitchor hamaara krishna
> ------------------------------------------------
>
> END OF EPISODE 1
>