KISHORE KUMAR'S TRIBUTE TO S D BURMAN
-------------------------------------

Rebroadcast of excerpts from Ameen Sayani's FILMI MUQADDAMA on
KISHORE KUMAR for "not telling his fans about his long association
with S D Burman" on the occassion of Vividh Bharati's "Silver Jubilee
Celebrations"


********************************************


FILMI MUQADDAMAA - SPONSORED PROGRAMME OF VIVIDH BHARATI
--------------------------------------------------------

KK: Kishore Kumar
AS: Ameen Sayani

KK: jee haan, yeh sahi hai ki main Sachin-da ke bahut kareeb raha,
aur main maanta hoon ki maine prem ke naate is sureele rishte ke
baare mein kabhi kisi ko kuchh naheen bataaya. magar aaj aap sabko
zaroor bataayunga, suniye...

31 October, woh din, woh ghaDi, kaise bhool sakta hoon. Sachin-da
soye huye the aur main unke paas baiTha huya, unke antim darshan kar
raha tha. Sachin-da, jinhone ne mujhe sangeet bhi diya aur pyaar bhi,
aur hameshaa ke liye Khaamosh ho gaye the. woh Khaamosh to the lekin
mujhe lagaa ki unki aawaaz mujhse kuchh keh rahe the. mujhe yaad
dilaa rahe the woh ghaDiyaan jo maine unke saath guzaare. shuru se
aaKhir tak. shuru? kab shuru huya unka aaur mera saath? haaaaan yaad
aaya, pehli mulaaqaat unki aawaaz se huyi. 'college' ke zamaane mein
mujhe keval do gaayakon ke 'records' khareedne ka shauk tha. ek the
Saigal saahab aur doosre the S D Burman. woh unka gaana tha na, kya,
haan, (sings) "dheere se jaana bagiyan mein re bhanwara dheere se
jaana bagiyan mein", ek yeh aur ek banglaa gaana, (sings) "bondhu
rongeela rongeela rongeela re rongeela, aamaare chhaaDiyaa bondhu koi
gelaa re..." to yeh dono gaane main 'school' aur 'college'
mein 'stage' par gaaya karta tha, aur taareef bhi liya karta tha.
phir main Bambai aa gaya. mere baDe bhaai saahab, yaani aap ke Ashok
Kumar saahab us samay bahut baDe 'film star' ban gaye the. maine aate
hi unse kahaa, daadaamuni, aap to filmon mein sab kuchh kar sakte ho,
mera bhi ek kaam kar do na". unhone kahaa 'kya kaam?' maine
kahaa 'mujhe Sachin Dev Burman se milaa do na". unhone bolaa 'bas
itni si baat, main to unhe achchhi tarah jaanta hoon, mere film
mein 'music' bhi de rahe hain, chal unke ghar chalen'. aur ham
pahunche unke ghar. aur jab unse milaa meri Khushi ka Thikaana na
raha. baDe niraale lage, dhoti-kurta aur dono kalaaiyon mein chameli
ke gajre. tambaakuwaala paan chabaate chabaate 'harmonium' bajaa rahe
the. aur unke baaju mein baiTha ek chhoTa sa laDkaa chashmaa lagaaye
tablaa bajaa raha tha. jaante hain woh bachcha kaun tha? aapka R D
Burman aur ham logon ka Pancham. thoDi der ke baad daadaamuni ne
bataaya ki 'yeh jo mera chhoTa bhaai hai na yeh bhi thoDaa thoDaa gaa
leta hai'. unhone kahaa 'tumhaara bhaai, kaa naam hai tumhaara?'
maine kahaa 'mera naam Kishore'. 'o Kishore, zaraa gaayo to?' maine
unka wohi gaana gaaya jo us waqt bahut 'popular' tha, bangaali mein.
gaana tha "kaun nagariya jaayo re, bansiwaale, kaun nagariya jaayo'.
woh to hanste hanste bole ''wonderful', yeh to hamaara 'copy' karta,
daadaamuni iska aawaaz bahut achchha, e to khoob bhaalo gaan kore,
aami eke nishchoi 'chance' debo'. main to soch bhi naheen sakta tha
ki Sachin-da mujhe gaana gawaayenge. main to phool ke gubbaara ho
gaya.

---------------------------------------------------
Song: mere sapnon ki raani kab aayegi tu (Aradhana)
---------------------------------------------------

KK: Sachin-da ne mujhe pehla gaana gawaaya film Aath Din mein, poora
gaana naheen tha, do-teen 'line' thi. gaana tha (sings)'baanka
sipahiya baanka sipahiya baanka sipahiya ghar jaiho".

pehla poora gaana maine unke liye film Bahar mein gaaya. woh gaana
tha (sings) "qusoor aapka huzoor aap ka, mera naam leejiye na mere
baap ka".

magar yeh gaana maine Bambai mein naheen gaaya, Madras mein gaaya.
wahaan unhone mujhe apne hi kamre mein Thehraaya. aur tab mujhe pataa
chalaa ki sangeet hi unka jeevan tha. uThte baiThte chalte firte har
baat sangeet ki hoti, har kaam sureela hota. Sachin-da mujhe baar
baar samjhaate 'e Kishore, yeh jaa, aisa jaa, 'expression' ke saath,
zyaada muDkiyaan taan maarne se kuchh naheen hotaa, seedha gaayegaa
to gaana 'public' ko zyaada achchha lagegaa, samjhaa na!' phir mere
jeevan ka woh daur shuru huya jiska sambandh na keval Sachin-da se
tha balki Dev Anand ke adaakaari se bhi. Dev ke liye Sachin-da ne
sabse pehle mujhe gaana gawaaya film Baazi mein. woh gaana tha
(sings) "tere teeron mein chhupe pyaar ke taraane hain, naiya puraani
hai toofaan bhi puraane hain"

aur phir aayi Funtoosh. Funtoosh mein bahut dukh bharaa gaana tha.
sab kehne lage 'yeh naya laDkaa Kishore yeh gaana gaa naheen
sakegaa'. Sachin-da aD gaye, 'gaana Kishore hi gaayegaa, main gaana
usi se gawaayunga'. phir kya tha, maine gaaya, aur us geet se Sachin-
da mere jeevan ka ek hissa ban gaye. us geet se unmein aur mujhmein
woh naata juDaa jise na doori toD paayi hai na maut.

----------------------------------------------
Song: dukhi man mere sun mera kehna (Funtoosh)
----------------------------------------------

AS: Kishore saahab, main aap ko hamaare muqaddame ki dastoor bataa
doon, mulzim Kishore Kumar naheen kahoonga kyunki pichhla jo ilzam
aap par lagaaya gaya hai usey main ilzaam naheen kahoonga kyunki
janata ki pyaar bhari shikaayat hai Kishore-da ki aap ne kabhi pehle
kisi ko naheen bataaya ki Sachin Dev Burman se aap ka naata kya tha
aur kaisa tha, aur doosra yeh ki janata ki shikaayat door karne ke
liye aaj aap Burman daadaa ke baare mein bahut kuchh bataa hi rahe
hain. to ishore saahab, ham aur kareeb se dekhna chaahenge is mahaan
sangeetkaar ko aap ki nazron se.

KK: ab main aap ko Sachin-da ki kuchh aisi tasveeren dikhaayun jo aap
ne pehle kabhi naheen dekhee. yeh woh tasveeren hain jo mere dil mein
basee rehti hai, aur aaj main inhe shabdon mein Dhaalkar aap ke
saamne pesh kar raha hoon. pehla tasveer hai Sachin-da ke tabeeyat ke
bachpane ki, jee haan, itni baDi 'image' hote huye bhi unka dil
bilkul bachchon jaisa tha. naye dhuno mein aise kho jaate the jaise
naye khilauno mein bachchha sab kuchh bhool jaata hai. naye dhuno ki
lagan mein unhone na umra ka Khayaal rakha na aaraam ka. kabhi kabhi
subah savere 6 baje gaaDi chalaakar mere ghar aa jaate the,
aur 'horn' bajaa bajaa kar mujhe jagaate aur neeche bulaate. main
bechaara aankhen maltaa huya neeche aata to Sachin-da kehte 'Kishore,
tu so raha tha kya, koi baat naheen, zaraa sun yeh 'tune' kaisa
banaa!' kabhi kabhi raat 11 baje unka 'phone' aa jaata, 'o Kishore,
tu so raha hai kya, 'I am really very sorry''. main kehta 'Sachin-da,
itne raat gaye aap 'telephone' kar rahe hain, koi gaDbaD to naheen
huyi?' daadaa kehte 'arey naheen re, gaDbaD kaahe ki, zaraa
sun 'tune' kaisa banaa hai'. bas, phir woh 'phone' par hi gaana shuru
kar dete aur mujhse kehte 'chal tu bhi gaa mere saath, haan',
(sings) "koraa kaaGaz tha yeh man meraa, likh liya naam ispe teraa".
bas bol diya, aur main bolta (sings the same line in sleeping
mode). 'arey arey arey chup, aise kyun gaata hai, Theek se gaa
na!'. 'Sachin-da, abhi baje hain raat ke 11, baDi zor se neend ne
mujhe maara'. 'achchha achchha achchha, so jaa, kal
savere 'rehearsal' ke baad ghar pe aa jaana, Theek?' 'haan, Theek'.

kabhi kabhi to yeh hotaa ki woh kahin gaaDi se jaa rahe hain aur main
saamne se dikh gaya to dono gaaDiyaan zor se raaste ke beech rukwaate
aur waheen 'rehearsal' shuru kar dete, (laughs), dono taraf gaaDiyon
ki 'line' lag jaati, 'horn' ka shor hotaa, 'driver'-on ki
chillaachilli hoti, magar Sachin-da raasta naheen chhoDte. apni hi
dhun mein magan rehte. ek baar isi tarah raah chalte Sachin-da se
bhenT ho gayi, bole 'Kishore, ae Kishore, chal meri gaaDi mein
baiTh'. maine kahaa 'Sachin-da, mujhe kisi ki 'rehearsal' pe jaana
hai'. Sachin-da ne zid kee, bole 'chhoD chhoD, aaj mausam kitna
achchha hai, dekh kitne achchhe baadal chhaaye huye hain, apan thoDaa
ghoom kar aate hain'. bas, main unki gaaDi mein baiThaa, aur woh
mujhe le gaye, zyaada naheen, kuchh 50 meel door, hari bhari kheton
ke beech gaaDi laakar ruke aur bole 'aa ha ha ha ha Kishore, jab bhi
main khet dekhta hoon jee karta hai main khet mein khoob dauDoon, tu
bhi dauD mere saath'. Sachin-da ki aagya ko to main Taalne se rahaa,
bas, main bhi unke peechhe peechhe kheton mein bhaagne lagaa. bhaagte
bhaagte unko 'mood' aa gaya, 'Thahar, bhaagte bhaagte mere saath
gaana bhi gaa'. maine kahaa 'kaun sa gaana?' bole 'wohi,
(sings) "jhing lala hoyen la la dhing lala", arey arey arey main thak
gaya, main thak gaya hah' (the whole audience bursts into laughter)
dekha aap ne, Sachin-da ka dil bachchon ki tarah bilkul maasoom tha.
aur isi liye unka sangeet bhi baDaa bholaa saa, baDaa komal sa huya
karta tha.

aur ek baat bataayun aap ko, jo bhi gaayak Sachin-da ke geet gaate
the, un gaayakon ko aur unke galon ko woh apne bachchon ki
tarah 'treat' karte the. gaana 'take' karte huye agar kisi gaayak ko
gaana mushkil lagta to woh usko fauran aasaan kar dete the. main
kyunki uchhal kood ki 'acting' zyaada karta tha, meri aawaaz ki unhe
zyaada fikar lagi rehti thi. kai baar mujhe 'phone' karke kehte
the, 'hello Kishore?' 'haan daadaa, bolo'. to kehte ''wonderful',
Kishore, teri aawaaz bilkul Theek hai'. yeh kehkar khaTak se 'phone'
rakh dete. ek zamaana aisa aaya jab mujhe 'income taxam' bharne ke
liye kai 'stage shows' karne paDe. tab Sachin-da ki pareshaani aur
baDh gayi. 'stage' par uchhalte koodte aawaaz thak rahi thi meri, aur
Thes lag rahi thi Sachin-da ke dil ko. ek din chale aaye ghar pe aur
DaanT kar kehne lage 'Kishore, 'I am telling you very seriously',
tu 'seriously' sun, agar tu apni aawaaz ko naheen sambhaalegaa to
aawaaz bhi tere ko naheen sambhaalegaa. phir koi aur to kya ham bhi
tumko koi gaana naheen gawaayunga. 'I tell you very seriously, be
careful''. ek din to unhone kamaal hi kar diya. Prem Pujari
ka 'premiere' tha, main pahuncha unke saath, meri aawaaz kuchh
Kharaab thi. maine kahaa 'Sachin-da, kal aap ki 'recording' hai aur
yeh 'air condition' aur mujhe kuchh khaansi si (starts
coughing)'. 'arey arey tu khaansta hai, 'manager, manager', kidhar
hai 'manager', 'manager' ko bulaayo'. 'manager' dauDaa dauDaa aaya
aur 'manager' ko bole 'tumko maaloom hai ham kaun hai? aami
is 'picture' ka 'music director' hai, S D Burman aur yehy
hamaara 'singer' hai Kishore Kumar, isko khaansi aata hai, kal iska
gaana 'take' karne ka hai, 'stop your air condition machine at
once'', (the whole audience bursts into laughter). kitne niraale the
Sachin-da sab se, aur kitna pyaar karte the ham sab ko.

------------------------------------------------------------
Song: kitna madir kitna madhur tera mera pyaar (Prem Pujari)
------------------------------------------------------------

KK: abhi suniye Sachin-da ke kaam karne ke Dhang ke baare mein. idhar
main 'acting' aur gaane mein kaafi 'busy' ho gaya, aur Sachin-da ke
liye mujhe pakaDna kuchh mushkil sa hone lagaa, to ek din
unhone 'phone' karke mujhe kahaa, 'Kishore, Kishore'. maine
kahaa 'bolo Sachin-da'. 'tu mere ko pyaar naheen karta, tu mujhe
bilkul pyaar naheen karta'. 'naheen Sachin-da, yeh aap kya keh rahe
hain?' to bole 'achchha, agar tu mujhse pyaar karta hai to aaj
dopahar ko tu mere ghar aayegaa? ghabraa naheen, main tere
se 'rehearsal' naheen karwaayunga'. 'to phir kyun bulaa rahe
hain?' 'sirf khaana khilaayunga'. khaana? main to hairat mein paD
gaya. main pahunch gaya, sachin-da ne ek ke baad ek swaadishT khaane
mangwaane shuru keeye. aur kehne lage, 'arey yeh khaa, arey woh
khaana, atey yeh khaa na, roshogolla khaa'. ant mein rasgulla khaakar
main bolaa 'waah daada, waah Sachin-da, mazaa aa gaya, mazaa aa gaya,
kya khaana khilaaya aap ne! achchha, achchha main ab chalta hoon,
aaraam karoonga'. to unhone mujhe pakaD liya, aur apne naukar se
chillaake kahaa 'ei darwaaja baahar se band kar de, haan, ab bol
Kishore tu jaayega kaise? ab to tere ko 'rehearsal' karni hi paDegi,
muft mein khaana naheen khilaaya maine, ha ha, ab bol' (the whole
audience bursts into laughter).

ek aadat unki yeh bhi thi ki ek baat jo woh kehte uska bilkul
ulTaa 'expression' unke chehre pe hotaa. mujhe yaad hai ek baar
Munimji ka gaana 'record' ho raha tha. 'final rehearsal' huya aur
Sachin-da guse se uThkar khaDe ho gaye aur chillaye ''stop this
rehearsal', band karo', aur uThkar meri taraf lapke, maine sochaa, na
jaane kya gaDbaD ho gayi mujhse. Sachin-da mere kareeb aakar gusse hi
gusse mein pataa hai kya bole? bole 'Kishore, agar aisa hi gaayegaa
to mera gaana zaroor 'hit' hogaa, 'wonderful'.

------------------------------------------
Song: jeevan ke safar mein raahi (Munimji)
------------------------------------------

KK: magar aaj yeh gaana naheen gungunaane ko jee karta hai
(sings) "ab saath na guzrenge ham lekin yeh ????? vaadi ki, dohraake
rahegi barson bhoole huye afsaane ko, jeevan ke safar mein raahi
milte hain bichhaD jaane ko, aur de jaate hain yaaden tanhaai mein
taDpaane ko". chale gaye sachin-da, magar aisa lagta hai jaise kahin
paas hi chhupe khaDe hain, aur bas, bas abhi saamne aayenge,
muskuraayenge, aur kahenge 'Kishore, Kishore dekh, maine kaisi 'tune'
banaaee hai', par naheen, yeh to duniya ka dharam hai, Sachin-da ab
kabhi naheen aayenge, magar unki yaaden, unka sangeet to hamesha
rahega, magar itna pyaar kaun degaa mujhe! (And his voice chokes).

----------------------------------------------------------
Song: khilte hain gul yahaan khilke bikhaDne ko (Shamilee)
----------------------------------------------------------

*****************************************


to baheno aur bhaaiyon, yeh thi Sachin Dev Burman ko arpit
shraddhaanjali Kishore Kumar ki or se. aaj Kishore Kumar aur Sachin
Dev Burman ki woh Khushboo phir dohraaee gayi Vividh Bharati ke
vigyaapan sevaa ke 25-veen saalgirah ke din, kyunki sureela ateet hi
hamaare vartamaan ka aadhaar hai, aur hamaare bhavishya ka ujaala.

----------------------------------------------------
Clip: o re maanjhi mere saajan hai us paar (Bandini)
----------------------------------------------------

woh suhaani sugandh, woh sureelee roshni aaj aap tak dubaara pahunchi
S Kumar's ki or se jo kal aaj aur kal ke sangam se kapDe tayyaar
karte hain.

THE END

Audio Courtesy: Kaustubh