Courtesy: N Sridhar


SANGEET KE SITAARON KI MEHFIL

AMEEN SAYANI'S PROGRAMME ON SHANKAR JAIKISHAN
---------------------------------------------
*********************************************

PART 2

RK: Rajinder Krishan
SH: Shankar
LM: Lata Mangeshkar
HJ: Hasrat Jaipuri
PJ: Pallavi Jaikishan
AS: Ameen Sayani


behnon aur bhaaiyon, dekhiye aaj kya keh rahi hai Sangeet Ke Sitaaron
Ki Mehfil aap se

------------------------------------
Clip: ghar aaya mera pardesi (Awara)
------------------------------------

haan magar ek nahin do shaandaar pardesiyon ki yaaden aaj phir aayi
hain hamaare 'programme' mein, filmi duniya ke 'superhit' sangeetkaar
Shankar aur Jaikishan. Sangeet Ke Sitaron Ki Mehfil ke
pichhle 'programme' mein unke jeevan ki raahon par hamaara safar sirf
aadha hi raha tha, jo aaj hoga poora. lekin behno aur bhaaiyon, yeh
to sirf hamaara safar poora hoga. Shankar Jaikishan ke sangeet ka
safar to itna vishal, itna phaila huya tha ke humein uska jayzaa lene
mein to kai maheene lag jaayenge.

---------------------------------------
Clip: tumhe yaad karte karte (Amrapali)
---------------------------------------

baharhaal aaj hum Shankar Jaikishan ke safar ke shuru ka haal ek alag
nazar se dekhenge, mashoor geetkaar Rajinder Krishan ke nazron se, jo
Shankar, Jaikishan, Shailendra aur Hasrat ki tarah Khud bhi ab is
duniya mein nahin rahe. aayiye behnon aur bhaaiyon, yaad karen
Rajinder Krishan ke puraani yaadon ko:

RK: Shankar Jaikishan ke saath maine kam kaam kiya hai, lekin jab jab
kiya hai to mera dil hi jaanta hai kitna nuks uThaaya hai. waise
Shankarji se meri bahut puraani mulaaqaat hai. ek zamaane mein,
main 'Famous Pictures' mein kaam karta tha jinke do mashoor tasveeron
ke naam abhi tak aapko bhi yaad honge, Pyar Ki Jeet aur Badi Behan.
Un dinon Shankarji hamaare saath ek 'musician' ke haisiyat se kaam
karte the. aur unhi dinon se unki lagan kehti thi ek din yeh filmi
duniya mein apna naam paida karenge. Jaikishan saahab se bahut baad
mein mulaaqaat huyi, lekin huyi to Khoob huyi. Shankar Jaikishan ki
joDi ne filmi 'music' ke itihaas ko jo chaar chaand lagaaye us se
kaun waaqif naheen hai! maine jab jab inke saath kaam kiya hai, mujhe
aisa mehsoos huya hai yeh donon sangeet ke poojari hain. kaam ko
pooja aur aaradhana samajh ke karte hain.

-----------------------------------------------------
Song: beet chali hai raam rut yeh bahar ki (Sachchai)
-----------------------------------------------------

kuchh geet, kuchh baaten, kuchh yaaden, kuchh suni sunaayi
ghaTnaayen, kuch apna aankhon dekha haal, in sab ke sahaare ham
banaate jaa rahe hain Shankar Jaikishan ke jeevan aur sangeet ke
tasveer. kareeb 23 barson tak Shankar Jaikishan film sangeet ki
duniya par chhaaye rahe. unki shuru shuru ki filmon se hi sangeet
premiyon ke dilon par unka jaadoo chalne lag gaya tha.

------------------------------------------
Song: kisi ne apna banaake mujhko (Patita)
------------------------------------------

behnon aur bhaaiyon, Shankar aur Jaikishan se meri kaafi dosti thi,
baDi gehri dosti thi aur mujhe woh ek baar 'film producer' bhi
banwaana chaahte the, nahin ban paaya, Khair woh meri kismat thi.
aksar unse milna hota tha kabhi unke ghar pe kabhi 'music room' par,
to kabhi kisi 'restaurant' mein aur unke geeton se milna to har hafte
zaron mein hota hi tha, kyunke shuru hi se mere 'hit parade'
ke 'program' Geet Mala mein unke geet behad 'hit' huya karte the. aaj
main aapko bataaoonga ki Shankar Jaikishan ke kaun kaun se geet, Geet
Mala ke vaarshik prograamon mein 'top' par yaani ke choTi ke
paaydaanon par rahe. main unki bas ek jhalak yaa ek antaraa pesh
karta jaayoonga aur geeton ke beech beech kuchh suhaani yaadon ki
khusbooyen aati rahengi, sunte rahiye. Shankar Jaikishan ke jo tarz
pehli baar saal ki 'number 1' tarz bani woh san 1955 mein bani. film
thi Shri 420...

----------------------------------------
Clip: mera joota hai jaapaani (Shri 420)
----------------------------------------

yeh geet likha to tha Shailendra ne, lekin dhun kisne banaayi thi,
Shankar ne yaa Jaikishan ne? bhai bahut kam logon ko pataa chalta tha
iske baare main. par ham sab jo unke 'fans' the na, unke to man mein
bhi yeh sawaal nahin uThaa tha. magar iske baare mein ek do mazedaar
baaten abhi kuch der mein aanewali hai aaj ki mehfil mein behnon aur
bhaaiyon. tab tak suniye Geet Mala mein agla 'superhit' geet kaun sa
tha. yeh film Sasural ka geet tha jo 'number 1' bana tha san 1961
mein.

--------------------------------------------
Clip: teri pyaari pyaari soorat ko (Sasural)
--------------------------------------------

Shankar Jaikishan ke sangeet mein, gaayakon mein do awaazon ka
hamesha zor raha. ek to Khair Mukesh aur doosre hain Mohammed Rafi
saahab. aur yahaan main pesh karoonga ek hissa Shankar saahab ke
aawaaz ka jismen unhone Rafi saahab ke inteqaal par unhe yaad karte
huye kaha tha.

SH: unki aawaz aur unka tareeka, unki awaaz ki Khoobsoorti aur unki
aawaaz ke andar bolon ko kehne ka Dhang. bol ko kis tareeke se bolna
chaahiye woh wohi jaante the. 'Classical' se lekar Thumri, 'semi
classical, modern, modern' se 'modern' gaana, Gazal, koyi unka
muqaabala nahin!

AS: hmmm... waaqai Shankar saahab, magar yeh bataayiye aap ka kaun sa
tha woh sabse pehla gaana jo Rafi saahab ne aapke liye gaaya?

SH: jab yeh gaana bana, Barsat ka gaana hai, jab Raj Kapoor saahab
gaana sune - "main zindagi mein hardam rota hi raha hoon", mere
Khayal se unko bahut pasand aaya tha, jab dekha ke bhai yeh gaana
kaun gaa sakte hain, to ham logon ke dimaaG mein ek hi baat thi, yeh
Rafi miyaan se gavaana chaahiye, aur yeh gaana Rafi miyaan bahut
achchha gaayenge, kyunki sur ki baat thi. to Rafi miyaan ko bulaaya.
jab Rafi miyaan bulaaye gaye, ham to chhoTe hi unke saamne the,
kyunki wo hamse bahut hi baDe the. jab woh aayen, ham to Khushi ke
maare, jaise paagal hote hain, yeh haalat tha mera aur Jaikishan ka.
Chalo Rafi Saahab aa gaye, Rafi Saahab aa gaye. aate hi ham yeh uTh
gaye, pehle Khade ho gaye. haath joD ke keh rahen 'aap hamaara
achchha gaana gaa deejiye'. hamaara 'hit' kar deejiye gaana. hamaara
gaana chalna chaahiye. bas ham to aapko kya bataa sakte hain aur kya
ham aapko 'rehearsal' karwa sakte hain. hamaari yeh dhun hai, yeh bol
hain, aap isko sajaa deejiye, bas.' aur unhone bahut achchha gaaya,
bahut hi achchha gaaya.

---------------------------------------
Clip: main zindagi mein hardam (Barsat)
---------------------------------------

Sangeet Ke Sitaaron Ki Mehfil mein is hisse mein ham dekh rahen hain
Shankar Jaikishan ke kuchh zabardast dhunon ke jalwe. beech mein
Shankar Saahab ki aawaaz bhi aa gayi, Mohd Rafi ko shraddhaanjali ke
roop mein. magar gaayikaaon mein jinhone Shankar Jaikishan ke sabse
zyaada dhunon ko sanwaara hai, woh hain Lata Mangeshkar. aur Lataji
ki hi awaaz ab aap sunenge, Geet Mala ke 'hit parade' ke san 1962 ke
saalaana 'program' ke 'geet number 1'. aisa geet tha woh jisne
Junglee ko bhi insaan bana diya tha.

-----------------------------------------
Clip: ehsaan tera hoga mujh par (Junglee)
-----------------------------------------

ab yeh mujhe to Thik se nahin pataa behnon aur bhaaiyon, magar kuchh
aisa sun ne mein aaya tha ki yeh dhun pehelwaan Shankarji ne nahin,
balke 'romantic' tabeeyat waale Romeo Jaikishan ne banaee thi.
barahaal Jaikishan ke dehaant ke kuchh arse baad, maine Lata
Mangeshkar se guzaarish kee thi ki woh kuchh baate bataayen apne us
chahite dost ke baare mein.

LM: Jaikishan aur main, hum dono hum umar the. bas 6 maheenon ka
farak tha hum donon mein. Barsat aur Nagina jaise filmon ke baad, hum
logon ka ek baDa mazedaar 'group' ban gaya tha.

AS: hum logon ka yaani?

LM: hum log yaani, Shankar saahab, Shailendraji, Hasrat aur Mukesh
bhaiyya. hum sab ek saath kaam bhi karte, ghoomne bhi jaate, tarzen
bhi 'discuss' karte, aur kabhi kabhi bahut jhagDe bhi hote the.

AS: jhagDe kis baat par?

LM: bas chhoTi chhoTi baaton par, Khaas taur par Jaikishan ke saath.

AS: achchha achchha, woh kaise?

LM: kabhi main unki dhun ki buraayi kar doon, to kabhi woh meri awaaz
par koi jhumla kar de. aur is tarah jab than thi tho dinon tak thani
rehti. mujhe yaad hai, maine ek baar jhunjhlakar usse keh diya 'Jaao
ab main tumhare liye nahin gaati, kisi aur se gawa lena', yeh keh kar
main chal diya apne ghar. ghar pahunch kar main bhi pachhtaayi aur
woh bhi pachhtaaye. lekin dono hi aDe rahe. phir Shailendra aur
Shankar bhaai unhe pakaDkar mere ghar le aaye. aur bas phir dosti
waisi ki waisi.

---------------------------------------------
Clip: aji rooThkar ab kahaan jaaiyega (Arzoo)
---------------------------------------------

AS: Lataji, ek Khaas baat humne paayi, hamesha Jaikishanji ke sangeet
mein, woh yeh ki woh shastriya sangeet aur lok sangeet ka baDa hi
sureela aur bada hi saral sangam pesh kiya karte the. to kya aap
humein bataa sakti hain ki unhone baaqaayda taur par shaastriya
sangeet aur lok sangeet seekha tha?

LM: 'Classical' sangeet unhone seekha zaroor tha. par kisse seekha
tha yeh mujhe ab yaad nahin hai. par haan itna zaroor yaad hai, ke
woh aksar kaha karte the ki sangeet ka shauk unhe apni maataaji se
mila. Gujarati lok geet woh gaaya karti theen aur yeh sun sun kar
apne man mein utaara karte the.

AS: lekin Lataji, Gujarati lok sangeet ka asar Jaikishan ke dhunon
main to maaloom nahin hota tha?

LM: yahi to Khaas baat thi Jaikishan ki dhunon mein. agar
woh 'classical, folk, western' yaa Arabic sangeet se prerna paate
the, to usey apne rang main Dhaalkar pesh karte the. 100 se zyaada
filmon mein 'music' diya unhone Shankarji ke saath aur har film mein
koyi na koyi nayi cheez zaroor thi.

AS: aur un nayi cheezon mein un suhaani sureeli sabki man mein basne
waali cheezon mein ek dhun woh thi jo san 1964 mein Geet Mala ki
vaarshik sangeet ki choTi par bajee. Sangam.

---------------------------------
Clip: mere man ki gangaa (Sangam)
---------------------------------

doston usi saal Geet Mala ke geet 'number 2' bhi film Sangam ka
tha. "yeh mera prem patra paDhkar" aur yahi the woh do geet jinse
mujhe kuch kuch pataa laga ke jaise geet banT-te the Hasrat aur
Shailendra mein, waise shaayad dhune bhi banT-ti thi Shankar aur
Jaikishan mein. kyunki mujhe yaad hai Shankar bhaai bahut naaraaz
huye the us saal Geet Mala par. aur unhone mujhse kaha bhi tha 'yeh
kaise aapne "bol raadha bol" ko 'number 1' aur "yeh mera prem patra
paDhkar" ko 'number 2' par bajaa diya?. Sangam ka sabse achchha geet
to tha "dost dost na raha". ab doston main is 'controversy' mein na
tab paDnaa chaahta tha na ab paDnaa chaahta hoon, kyunki mere liye to
Shankar aur Jaikishan dono baraabar the. dekhiye donon mein pyar bhi
bahut tha ek doosre ke liye. zara suniye to Jaikishan ke maut par,
Shankar kaise TooT se gaye the.

SH: Ameen bhai, main kya kahoon, mere zindagi ka saathi chala gaya,
ab mere paas raha kya kehne ke liye. maine socha bhi nahin tha ke
Jaikishan itni chhoTi umar mein hamko chhoDke chalaa jaayega. Khair.
lekin uski baaten, jo usmein achchhi baaten thi woh saari duniyaa ko
yaad rahegi. itna Khush, itna guNee apne kaam mein, apne sangeet
mein, apni saari baaton mein milansaar, aur ek doosre se kaise milke
rehna, ek doosre se kaise pyaar dikhana aur kaise pyaar lena, wohi
jaante tha. woh to mujhe bhi nahin aata. aksar mujhe bhi DaanT-ta tha
ki 'arre yaar tum to hamesha hi gusse mein rehte ho. kisi na kisi ko
DaanT-te hi rehte ho'. lekin waqaai mein hi woh bahut pyaara tha,
saari duniya uske liye aur uski Khoobsuratiyon ke liye, uske achchhe
kaam ke liye, aur usne jo achchha kaam kiya hai, woh sab logon ko
yaad rahega.

---------------------------------------
Clip: ae mere dil kahin aur chal (Daag)
---------------------------------------

behnon aur bhaaiyon kuchh der pehle maine baat cheDi thi Shankar
saahab aur Jaikishan ke beech dhune banaane ke baTwaare ki. aur isi
ke baare mein ek 'interview' mein Hasrat Jaipuri saahab ne mujhe kya
bataaya tha?

HJ: do tan aur ek jaan ki tarah Shankar Jaikishan bhi the, aur mera,
main bhi aisa hi tha Shailendra ki aur main bhi wohi do tan aur ek
jaan. lekin zyaada kaam hone ki wajah se tum kuchh karlo aur hum kuch
kar lete hain. Jaikishanji mere saath baiTh jaaya karte the aur
Shailendraji unke saath. lekin pehle na aise ittefaaq thi yaa aise
koi baat nahin thi. Woh ek hi samajh leejiye unhone kiya to unhone
kiya aur unhone kiya to unhone kiya. ek hi baat hai. donon ke naam
saath aate the. lekin tarzen woh alag alag banaate the, haan yeh ho
sakta tha woh ek doosre se poochh liya karte the, ke bhai dekho yeh
hai, agar ismein kamee thi donon ka naam aata hai, isi tarah hum
donon, 'bhai dekho yeh is tareeqe se hai, Shailendraji'. Shailendraji
kehte the 'Hasrat miyaan dekho maine yeh Gazal likhi hai pehli
martabaa, is mein kuch Galati to nahi hai!' to maine kahaa 'nahin
aisi koi baat nahin hai'. agar mere zehan mein koi baat aisi aati hai
ke jo fan ke Khilaaf hai to main bata deta. isi tareeqe se hindi
geeton ke andar main usse poochh leta tha, to is tareeqe se miljul ke
hum baDe prem aur pyaar se kaam kiya karte the.

AS: lekin Hasrat bhai, abhi aapne kaha ki zyaadaatar Jaikishan aapke
saath kaam karte the aur Shailendraji Shankar ke saath. lekin kai
gaane aise bhi to hai jo aapne likhe aur Shankar ji ne unki tarz
banaayi ho aur yaa Shailendra ne likhe ho aur Jaikishan ne tarz
banayi ho?

HJ: haan aise bhi kai gaane hain. bahut se gaane aise hain jo maine
likhe aur Shankar-ji ne tarz banayee. aisa bhi hua Shailendraji ne
gaane likhe aur Jaikishan ne tarz banayi. Woh to ek hi baat thi na.
Naak idhar se pakDo ya udhar se pakDo kul milaakar to ek hi baat hai.
par yeh gumaan aisa hota ki kabhi Shankarji ki tarz ho to log
samajhte hain Jai ki hai, Jai ki agar koi 'tune' ho to log samajhte
hain ki Shankar ki hai. yahi dhokhaa hamaare gaanon mein hota tha.
mere gaane pe log kehte 'nahin saab, yeh to Shailendraji ka likha hua
hai'.

AS: haan ek gaana Khaas taur par mujhe yaad hai.

HJ: Kaun saa?

AS: mujhe yaani maine jab tak 'record' par paDhaa nahin tab tak mujhe
yakeen nahin aaya, yeh dekhiye film thi aapki Chori Chori jismen
bahut hi Khoobsoorat gaana tha aur woh rang jo us gaane mein hai woh
Shailendra ka hai. jab paDhaa 'record' par tab pataa lagaa ki Hasrat
saahab ka likha hua hai. yeh gaana tha woh...

--------------------------------
Song: rasik balmaa (Chori Chori)
--------------------------------

Sangeet ke Sitaron ke Mehfil ke kadardaanon, ab phir aa jaayiye Geet
Mala ke choTi ki paydaanon ke Shankar Jaikishan ke bahaaron mein.

------------------------------------
Song: bahaaron phool barsaao (Suraj)
------------------------------------

woh mehboob to film Suraj se hota huya saalaana Geet Mala ki choTi
par pahunch gaya tha san 1966 mein. lekin us se teen saal pehle,
Jaikishan ki jeevan mein bahaar bankar aayi thi ek baDi pyaari, baDi
Khoobsoorat, baDi suljhi hui laDki - Pallavi Mariwala. aage chalkar
Jaikishan ki patni bani.

--------------------------------------------------
Song: man bhaawan ki ghar jaaye gori (Chori Chori)
--------------------------------------------------

behnon aur bhaaiyon, maine yeh geet dulhan ki bidaai ka unke maike ke
ghar se samjho ke bajaaya tha. Kyunke, Pallavi meri bhatiji ke samaan
hai. dekhiye unke chacha jo hain Jaisingh Mariwala woh mere saath
school mein paDhaa karte the aur bilkul bhaai ki tarah the. Aur
behnon aur bhaaiyon Khaas Sangeet Ke Sitaaron Ki Mehfil ke is program
ke liye maine Pallavi ko yahaan bulaaya hai taaki woh Jaikishan ke
baare mein biwi ki nazar se kuch bataaye.

AS: to Pallavi, sabse pehle yeh bataao, Jaikishan se mulaaqaat
tumhaari kaise huyi aur kahan?

PJ: Woh ji huyi thi 'cricket match' ke dauraan

AS: 'Cricket Match' ke dauraan?

PJ: haan ji

AS: achchha achchha, kaunsa 'match' tha bhai woh?

PJ: woh to abhi mujhe yaad nahin hai

AS: nahin?

PJ: 'I think', main sab kuchh bhool gayi thi. bhool gayi

AS: yaani, pehle milan ka yeh yeh anand tha ki aur kuchh yaad nahin
hai haan?

PJ: jee haan

AS: achchha yeh bataao ki aage baat kaise baDhee?

PJ: bas, us 'time' to kaafi 'known personality' the. Geet Mala ke
dauraan vagerah, hum log saare 'fans' the unke

AS: achchha!

PJ: main aur meri saheliyaan, to wahaan pe koi unhe jaanta tha,
unhone 'introduce' kiya aur hamaara 'music' ka shauk humein leke gaye
unke 'recording' pe

AS: 'recording' dekhni thi aapko?

PJ: haanji bahut 'interest' tha waise

AS: to aap kaun se 'studio' mein dekhi thi 'recording' aur kaun si
geet thi?

PJ: woh us zamaane mein Famous Studio mein karte the 'recording'

AS: achchha gaana kaun sa tha?

PJ: gaana tha "mujhko apne gale laga lo ae mere humrahi"

AS: arre waah waah waah aur phir unhone gale laga liya!

PJ: Rafi saahab .. (both laugh together). us 'time' to nahin

AS: achchha uske baad shaadi mein kitni der lagi aur gharwale jo the
tumhaare woh raazi nahin ho rahe the?

PJ: nahin, woh bilkul 'against' the. kyunki 'different backgrounds'
ho gaye the. 'Film people' itne 'accepted' nahin the.

AS: achchha achchha achchha. to phir shaadi huyi kaise?

PJ: bas kar lee shaadi. 'elopement'.(Both laugh together)

AS: 'Very good, Very good'. achchha chalo, shaadi ho gayi ab hum ek
zaraa sa 'jump' lete hain aur pahunch jaate hain tumhaare ghar pe,
Marine Drive pe baDaa hi Khoobsoorat ghar hai. tum donon wahaan rehte
the aur kayi baras saath guzaare. aur main hamesha dekha karta tha
tum dono ki joDi bahut achchhi lagti thi, bahut Khush rehte the dono.

PJ: Shukriya

AS: kuchh mujhe bataao Jaikishan ke baare mein, tumne unhe ek patni
ki nazron se kis tarah dekha? kaise the woh? ghar mein bartaav kaisa
tha unka?

PJ: bahut hi milansaar

AS: bahut hi milansaar!

PJ: bahut hi Khayaalwaale, bahut hi dildaar

AS: achchha

PJ: bahut hi 'straight' kism ke aadmi

AS: achchha achchha

PJ: jaise bhagwaan us zamaane mein is 'type' ke insaan ko banake, woh
jo khaaka to woh hi phenk diya tod diya. aise log abhi bante nahin

AS: kya baat hai, dekhiye, behnon aur bhaiyon, biwi ho to aisi.

PJ: 'husband' ho to aise!

AS: lekin kaam unke paas itna rehta tha, ke parivaar ke liye kabhi
samay milta tha unko?

PJ: kaafi mil jaata tha, kyunki jaasti karke woh ghar se kaam karte
the, 'composing' vageraah

AS: achchha

PJ: savere Hasratji aaya karte the ghar pe 9 baje.

AS: achchha jis tarah Shankar 'music room' mein 'rehearsal' vagairah
kaam karte the?

PJ: Jaikishanji ghar se karte the aur 'producers' vagairah bhi aaya
jaaya karte - 'Story sessions', yeh woh. aur khaali 'recording' ke
waqt pe.."

AS: Wahaan jaana paDta tha

PJ: haan. wahaan jaana paDtaa tha. 'Otherwise he was very close to
the children'. bachchon ke saath bahut lagaav tha, bahut ..."

AS: kitne bachche the tumhaare?

PJ: teen

AS: teen bachche hain na. do beTe ........"

PJ: do beTe aur ek beTi hai. beti ka naam unhone apne 'favorite' raag
pe rakha - Bhairavi

AS: aur beTe?

PJ: baDe ka naam hai Chaitanya, chhoTe ka naam hai Yogesh.

AS: achchha aur inmein se kisi ko gaane ka shaukh hai?

PJ: sunne ka shauk hai. gaate hain. achchha gaa lete hain,
lekin 'professionally they don't want to enter the ...'

AS: achchha achchha achchha. kuchh aur bataaogi Jai ke baare mein?

PJ: unka 'nature' aisa tha, 'I mean' ki jo bhi hamaare ghar pe aata
tha jaise koi sawaal leke aata tha, Kyunki woh kabhi Khaali haath
nahin gaya ghar se. aur shaayad unki wohi achchhaayi abhi tak hum
logon ko 'protect' kar rahi hai, 'his family looking after, goodwill'
jo banaayi thi unhone.

AS: aur main hamaare sabhi sunnewaalon ki taraf se aur apni taraf se
bhi, Pallavi yeh zaroor kahoonga, ki hum sab tumhaare saath roye the,
bahut dukhi huye the, jab woh itni kam umar mein chale gaye. sirf 39
umar thi unki.

-----------------------------------------------------------
Song: bedardi baalma tujhko mera man yaad karta hai (Arzoo)
-----------------------------------------------------------

behnon aur bhaaiyon, Sangeet Ke Sitaron ki Mehfil mein ab aanewaali
hai Shankar Jaaikishan ki woh aaKhri rachna jo Asia bhar mein
mahshoor 'hit parade program' Geet Mala ki saalaana sangeet seeDhee
ki choTi tak pahunchi. woh dhun thi film Andaz aur saal tha 1971.

------------------------------------------
Song: zindagi ek safar hai suhaana (Andaz)
------------------------------------------

mujhe yaad hai ki Geet Mala mein Shankar Jaikishan ki kaamyaabi ki
barson mein ek baar main us 'program' ki 'jubilee' par Shankarji ko
bulaaya tha. aur unhone jo shubhkaamnayen dee thi us 'program' ko
uska ek baDaa chhoTaa sa hissa main aapko sunwaata hoon. Suniye.

SH: Ameen Sahab mubaarak ho aapko Geet Mala, bahut bahut mubaarak ho,
yeh 'program' jo aapne kiya hai sirf hamaare liye nahin,
hamaare 'music' ke liye saari duniya ke andar aapne isko pesh kiya
hai aur hamaare 'music' ki jo sewa kee hai aur 'music' ko logon ke
saamne aapne sunaaya hai, uske liye bahut bahut shukriya aur hamaari
duyaaen hai aapki tabeeyat achchhi rahe, aur aapko bhi zyaada tarakki
mile, aur bhagwaan aapko 'success' de.

Shankar aur Jaikishan ka kya zabardast 'group' huya karta tha behnon
aur bhaaiyon. magar us 'group' ke mardon mein dekhiye ab koyi bhi
baaki na raha. na Raj Kapoor, na Rafi, na Mukesh, na Hasrat aur na hi
Shailendra. Jaikishan ki dehaant ki tareeKh thi 12 September 1971 aur
Shankar humse juda huye the 26 April ke din 1987 mein. donon chale
gaye, apne saathiyon, apne qadardaanon apni tarzon ko choDkar aur
sangeet ke duniya ke kai basanten pathjhaD mein badal gayi.

------------------------------------------------------------
Song: o basanti pavan paagal (Jis Desh Mein Ganga Behti Hai)
------------------------------------------------------------

behnon aur bhaaiyon, main aapko Sangeet Ke Sitaron Ke Mehfil ke
pichhle 'program' mein bhi aur aaj bhi, Shankar Jaikishan ki suron
waali daastaan sunaata jaa raha hoon, magar bhai mujhe bhi to pata
chalna chaahiye ke hamaare mehfil ki yeh dastaane aapko kaisi lag
rahi hai. bhai mujhe 'e-mail' karke bataaiye na is pate par
sayani@... achchha doston in do 'program'-on mein yaani ki
pichhle 'program' mein aur aaj aapne Shankar aur Jaikishan ki bolti
huyi aawazen bhi suni aur Shankar saahab ki bajaayi huyi Piano par ek
dhun bhi sunee. lekin ab tak aapne kahin bhi, kabhi bhi yeh nahin
socha hoga ki ek din aapka yeh dost Ameen Sayani aapko Jaikishan ki
gaati huyi awaaz bhi sunwaayega. behnon aur bhaaiyon, yeh awaaz
Jaikishan ki dehaant ke kuch arse baad Pallavi ne mujhe dee thi aur
maine aaj tak usey 'tape' par sambhaal ke rakha huya hai. 'tape'
bahut puraana hai aur aawaz kai barson se is duniya mein nahin hai,
aap to jaante hi hain. magar leejiye Khaas aapke liye main Jaikishan
ki unhi ke apne ghar mein 'record' kee huyi unhi ke bajaaye
huye 'harmoniun' ke saath gaayi huyi Gazal pesh karna chaahta hoon.
aap sab zara Khaamosh ho jaayiye behnon aur bhaaiyon aur suniye
Jaikishan ki gaati huyi aawaaz...

Jaikishan singing ghazal.

ab to zamaana beet gaya Shankar aur Jaikishan ki awaazen Khaamosh
huye. magar unki dil ki dhaDkane, unki kalpana ke rang abhi tak
mehfooz hain un saare suhaane sureele geeton mein jo yeh dono sangeet
ke shehzaade mastaane hamaare tanhaaiyon ko deta hai.

------------------------------------------------------
Clip: aaye bahaar banke lubhaakar chale gaye (Rajhath)
Clip: rulaakar chal deeye ek din (Badshah)
Clip: sajanwa bairi ho gaye hamaar (Teesri Kasam)
------------------------------------------------------

aur Sangeet ke Sitaaron Ki Mehfil mein Shankar Jaikishan ko aaKhri
salaami dene ke liye hum lenge suron ki mallika Lata Mangeshkar ka
sahaara. Lata jinki yaadon mein bhi Shankar aur Jaikishan hamesha
hamesha zinda rahe. Zara suniye to Jaikishan ke dehaant par Lataji ne
kya kaha tha.

LM: jeevan aur maran to vidhaata ki marzi hoti hai. lekin Jaikishan
ke chale jaane par yeh zaroor laga yeh to bhai behad naa-insaafi huyi
hai. baDi kam umar mein unke jigar ne unko dhokha de diya aur apne
doston, apne saathiyon, apni maa, apni patni, apne pariwaar, sab ke
koshishon aur duyaaon ke baawjood Jaikishan hum sab ko chhoDkar chale
gaye.

-----------------------------------------------------
Song: tera jaana dil ke armaanon ka luT jaana (Anari)
-----------------------------------------------------

doston Shankar Jaikishan ke do 'program' aap itne pyaar se sune, iske
liye Ameen Sayani aapka bahut bahut shukriya adaa karta hai aur vaada
karta hai ke Sangeet Ke Sitaron Ki Mehfil ke har 'program' mein aap
koyi na koyi gehri baat zaroor paayenge- kabhi guzre huye palon ki,
to kabhi jeete jaagte aaj ki. to aayiyega har baar is mehfil mein.
aapke aane se hi to bhai yeh mehfil mehakti rahegi.

THE END