SUHAANA SAFAR - KAMCHARCHIT SANGEETKAAR
---------------------------------------

Broadcast date: 05 May 2008
---------------------------

aaj ke is sangeetmay safar ke hamsafar hain hamaare saath kuchh
kamcharchit sangeetkaar. sabse pehla geet aapko sunwaa rahe hain film
Prem Geet se, Anuradha Paudwal aur Suresh Wadkar ki aawaazon mein,
geetkaar hain Indeevar aur sangeetkaar hain Jagjit Singh. jee haan
doston, wohi Jagjit Singh jinka Gazal gaayiki mein koi saani naheen
hai. poore duniya bhar mein unke Gazlon ke chaahnewaale laakhon
karoDon mein phaile huye hain. lekin aaj ham unke ek doosre paksh par
nazar Daal rahe hain. bataur sangeetkaar unhone do chaar filmon mein
sangeet diya tha, jinmein se Prem Geet ek jaanaa-maana naam hai.
Jagjit Singh ke mausiki ki yeh Khaasiyat rahi hai ki we kam saazon ka
istemaal karte hain, jo bolon ko saral banate hain. raagon ka Khayaal
bhi unhe Khoob rehta hai, aur yahi wajah hai ki unki awaaz ho ya phir
unka sangeet, sabke dilon ko chhoo leti hai.

----------------------------------------------------------------
Song: aayo mil jaayen ham sugandh aur suman ki tarah (Prem Geet)
----------------------------------------------------------------

aisa rishta hi aap ka bhi ban chuka hai na apne Vividh Bharati ke
saath jo is saal manaa rahi hai apni 50-veen saalgirah. doston, yeh
Suhaana Safar isi swarNa jayanti par shuru kiya gaya
Khaas 'programme' hai jo salaam karti hai film sangeet ke sunehre
daur ko. Jagjit Singh ke geeton, Gazlon aur unki sangeet ko logon ne
apne honThon se lagaaya, apne dilon mein basaaya, aur unhe amar banaa
diya. ek aisa hi amar geet suniye Khud Jagjit Singh ki aawaaz mein.
film ek baar phir, Prem Geet, aur geetkaar ek baar phir Indeevar.

----------------------------------------
Song: hoThon se chhoo lo tum (Prem Geet)
----------------------------------------

aaiye ab apna yeh 'caravan' aage baDhaate hai Mohd Rafi ke gaaye huye
geet se. naGmaa-nigaar hain ek baar phir se Indeevar, aur sangeetkaar
hain C. Arjun, aur film ka naam hai Punarmilan. C Arjun ki kuchh
filmen 'flop' hone ke baad nirmaataaon ne piTaa mohra maankar unse
munh pher liya tha. lekin yeh wohi C Arjun hain jinki phir baad mein
Punarmilan, Susheela, Main Aur Mera Bhai jaisi filmon ke gaane gali
gali goonje. doston, C Arjun ke banaaee tarzon mein film Punarmilan
ke gaane Khaas makaam rakhte hain, aur Punarmilan film ka Khaaskar
yeh gaana to bahut hi Khaas hai.

-----------------------------------------------------
Song: paas baiTho tabeeyat bahal jaayegi (Punarmilan)
-----------------------------------------------------

Prem Dhawan filmi geetkaaron mein ek mashoor naam hai. unke likhe
asankhya geet behad kaamyaab rahe hain. lekin geetkaari ke saath
saath unhone filmon mein nritya nirdeshan bhi kiya aur kai filmon
mein sangeet bhi deeye. lekin unhe zyaada prasiddhi unke geetlekhan
se hi mili. Vividh Bharati ke ek kaaryakram mein ek baar Prem Dhawan
saahab ne kahaa tha ki unhe lok sangeet behad priya hain aur woh
jagah jagah ghoomkar wahaan ke lok sangeet ikaTTha karte hain jinki
jhalak unke sangeetbaddha keeye huye geeton par saaf dikhaayi paDte
hain. to chaliye ek aisa hi lok sangeet par aadhaarit gaana sunte
hain film Pavitra Paapi se jise unhone Khud likhaa bhi hai. aawaazen
hain Asha Bhosle, Mohd Rafi aur saathiyon ki.

-----------------------------------------
Song: le de saiyaan oDhni (Pavitra Paapi)
-----------------------------------------

film Shaheed Prem Dhawan ke 'career' ka ek behad mahatwapoorNa film
hai. shaheed Bhagat Singh ke jeevan par aadhaarit is film ke banne ke
dauraan Prem Dhawan Bhagat Singh ke gaaon gaye the aur Bhagat Singh
ki maa se mile the. jahaan is film ke deshbhakti geet behad charchit
huye the, ek halka phulka rumaani geet bhi tha jise Lata Mangeshkar
aur saathiyon ne gaaya tha. Bhagat Singh ke gaaon mein ek laDkee thee
jo unse bahut pyar karti thee, par na to usne kabhi apne pyar ka
aadhaar kiya aur na hi Bhagat Singh ne kabhi us or dekha. Bhagat
Singh ka ek hi pyar tha, apne desh ke prati. Prem Dhawan ne us laDkee
ke jazbaaton ko is geet mein peerone ki jo koshish kee hai, woh
atulaniya hai, aaiye sunte hain.

----------------------------------------------------
Song: jogi, hum to lut gaye tere pyar mein (Shaheed)
----------------------------------------------------

Prem Dhawan ka likha aur swarbaddha kiya huya gaana aapne sunaa.
aglaa gaana bhi Prem Dhawan ka hi likha huya hai lekin sangeetkaar
hain Kanu Ghosh. Mukesh ka gaaya film Pyar Ki Raahen ka yeh dard
bharaa naGmaa sunkar aisa lagta hai jaise yeh geet iske sangeetkaar
par hi likha gaya hai. "do roz mein woh pyaar ka aalam guzar gaya,
barbaad karne aaya tha barbaad kar gaya". sangeetkaar Kanu Ghosh ke
liye bhale hi film sangeet ka safar do roz ka tha, lekin unka yeh
sumadhur sangeet film sangeet ko barbaad naheen, balki samriddha kar
gaya hai. is geet se ham karte hain Kanu Ghosh ki pratibhaa ko salaam!

----------------------------------------------------
Song: do roz mein woh pyaar ka aalam (Pyar Ki Rahen)
----------------------------------------------------

Vividh Bharati par is samay aap sun rahe hain Suhaana Safar kuchh
kamcharchit sangeetkaaron ke swarbaddha geeton ke saath. is safar ke
agle pathik hain sangeetkaar joDee Nikhil Vinay. Nikhal Vinay ke
sangeet ki Khaaseeyat rahi hai 'melody'. unke sabhi gaane behad
sureele huya karte hain. ek aisa hi sureela naGhmaa pesh hai Anuradha
Paudwal aur S P Balasubrahmanyam ke aawaazon mein. geetkaar Yogesh
aur film ka naam Chor Aur Chaand.

---------------------------------------------------------
Song: sapnon mein aana dil mein samaana (Chor Aur Chaand)
---------------------------------------------------------

Nikhil Vinay ki tarah 90 ke dashak mein film sangeet mein kadam
rakhnewaale sangeetkaaron mein ek naam tha Shyam Surendra ka. yeh
sach hai ki unhe zyaada prasiddhi naheen mil paayi, lekin unki kuchh
filmon ke gaane behad pasand keeye gaye the. badkismati unki ki yeh
filmen 'flop' rahi jiski wajah se inke lokapriya geet sangeet ko
baDhaawa naheen mil paaya. ek aisi hi film thi Maashooq, jiske gaane
Khoob goonje the. isi film ka ek gaana aapki nazr kar rahe hain Kumar
Sanu aur Kavita Krishnamurthy ki aawaazon mein. Gauhar Kanpuri ka
likha huya gaana hai, suniye.

-------------------------------------------
Song: tumhe dil to de chuke hain (Maashooq)
-------------------------------------------

kamcharchit sangeetkaaron mein ek naam hai Vanraj Bhatia ka, jinhone
kai kalaatmak filmon mein Khoobsoorat sangeet diya hai aur bahut
saari filmon ka 'background music' bhi tayyaar kiya hai. Bhumika,
Mandi, Sardari Begum, Manthan, Nishant, Junoon, Mammo, Tarang, Hip
Hip Hurray jaisi filmon mein unka mashoor sangeet raha hai. gaayika
Preeti Sagar ne unke kai geet gaaye hain. Preeti Sagar ki maa Vanraj
Bhatia saahab ki bachpan se lekar MA tak 'classmate' theen. is tarah
se unhe Preeti ki gaayiki ka anumaan huya. to chaliye sunte hain
Vanraj Bhatia aur Preeti Sagar ki joDee kar yeh sureela naGhmaa jise
likha hai Bahadur Shah Zafar ne. isey film Mandi mein shaamil kiya
gaya tha.

-------------------------------------------
Song: shamsheer bahe na maang Gazab (Mandi)
-------------------------------------------

film Reshma Aur Shera sangeetkaar Jaidev ke sangeet safar ka ek
mahatwapoorNa mukaam hai. is film ke liye unhe Rashtriya Puraskaar se
sammaanit kiya gaya tha. Jaidev ka sangeet shastriya sangeet ke rang
chhalkaati, lok sangeet se sajee, ek alag pehchaan rakhte the. woh
Khud Sarod bajaate the, iska asar unke sangeet mein to honaa hi tha.
Rajasthan ka maanD unhe bahut achchha lagta tha jo ubharkar saamne
aaya hai is gaane mein. zaraa suniye to Rajasthaani maanD ki yeh
vyakulta, yeh beqarari, is geet mein jise likha hai Bal Kavi Bairagi
ne aur kya Khoob gaaya hai Lata Mangeshkar ne.

------------------------------------------------
Song: tu chanda main chaandni (Reshma Aur Shera)
------------------------------------------------

sangeet ke is suhaane safar ka raasta aaj ham tay kar rahe the Jagjit
Singh, C Arjun, Prem Dhawan, Kanu Ghosh, Nikhil Vinay, Shyam
Surendra, Vanraj Bhatia aur Jaidev ke sangeet se saje sanvre geeton
ko sunkar.

THE END