SUHAANA SAFAR - KAMCHARCHIT SANGEETKAAR
---------------------------------------

Broadcast date: 26 May 2008
---------------------------

aaj ke is kaaryakram mein ham kamcharchit sangeetkaaron ki rachnaayen
lekar aaye hain. aaj is 'classic' gaane se kar rahe hain
is 'programme' ka aaGaaz.

----------------------------------------------
Song: mohabbat zinda rehti hai (Chengeez Khan)
----------------------------------------------

Mohd Rafi ki yeh oonchee taan film Chengeez Khan se thi. Qamar
Jalalabadi ke bol the aur is 'intense' gaane ko Hansraj Behl ne
swarbaddha kiya tha. Suhana safar mein aaj aap sun rahe hain
kamcharchit sangeetkaaron ke naGhmen. aglaa naGmaa Indeevar ka likha
huya hai. is gaane ko sunne se pehle zara suniye to Qamar saahab ne
Vividh Bharati par yeh geet pesh karte huye kya kaha tha:

"hamaari filmon mein aajkal 'cabaret' bahut aataa hai. sangeetkaar
bhi lakeer ke faqeer ki tarah usi tarah kaa sangeet, wohi
angrezee 'style' kaa 'dance' aur 'sexy romance' laate hain. ek baar
mujhe bhi 'cabaret' geet likhne ka mauqaa milaa. agar main koi
saadhaaraN-saa geet likh detaa, to jo 'heroine' hai, woh logon ki
nazar se gir jaati. to maine sochaa, kyon na kuchh aisa likha jaaye,
jisse 'heroine heroine' hi bani rahe, logon ki nazron se gire nahin.
aur mujhe Khushi huyi jab maine sangeetkaar Sapan-Jagmohan ko yeh
geet sunaayaa, aur unhone kahaa ki vaaqai yeh kuchh alag hai. aur
phir unhone tarz banaaee, tarz bhi bahut achchhi banaaee. aap Khud hi
sun leejiye film 'Doraha' ka yeh gaanaa..."

------------------------------------------------
Song: tumhi rehnumaa ho meri zindagi ke (Doraha)
------------------------------------------------

yeh Doraha film ka gaana tha Asha Bhosle ki aawaaz mein. geetkaar
Indeevar aur sangeetkaar the Sapan Jagmohan. Suhana Safar kaaryakram
mein ham aise sangeetkaaron ki rachnaayen aapko sunwa rahe hain jo
bahut zyaada charchit naheen huye aur is kaDi mein ab aap ko sunwaate
hain Vanraj Bhatia ka swarbaddha kiya huya geet, rachna Bahadur Shah
Zafar ki hai, Preeti Sagar ki aawaaz, film Mandi. baDe hi anooThe
sangeetkaar rahe hain Vanraj Bhatia. unhone jitni filmon mein sangeet
diya, bheeD se haTkar hi diya. yahi vajah hai ki unki har ek film aur
uska sangeet ek Khaas mukaam rakhti hai film sangeet sansaar mein.

-------------------------------------------
Song: shamsheer bahe na maang Gazab (Mandi)
-------------------------------------------

Aag film ka geet aap sunne jaa rahe hain Shamshad Begum aur Shailesh
ki aawaazon mein. geet Deepak ka hai aur sangeet Ram Ganguly ka.
sangeetkaar Ram Ganguly film sangeetkaar banne se pehle Prithviraj
Kapoor ke naaTakon ke liye sangeet rachna karte the. aage chalkar jab
Prithviraj Kapoor ke beTe Raj Kapoor ne film nirmaan ka sankalp kiya
to bataur sangeetkaar Ram Ganguly ko chuna. aur yeh film thi Aag,
jiska ek bahut hi madhir geet abhi aap sunne jaa rahe hain. san 1948
mein bani film Aag behad kaamyaab saabit huyi. aur ismein koi shaq
naheen ki iski kaamyaabi ke peechhe iske geet sangeet ka bahut baDaa
yogdaan tha. sangeetkaar Ram Ganguly ko is film mein bataur sahaayak
sehyog diya Shankarsinh Raghuvanshi aur Jaikishen Sharma ne jo aage
chalkar Shankar Jaikishen ki joDi ke roop mein sthaapit huye.

--------------------------------------
Song: dekh chaand ki or musaafir (Aag)
--------------------------------------

Ram Ganguly ke baad ek aur bangaali kamcharchit sangeetkaar ka zikr
ham karna chaahenge aaj ke is 'programme' mein. yeh hain Romu Dev
Mukherjee. aap mein se bahuton ne shaayad is sangeetkaar ka naam
naheen sunaa hogaa. to aaiye karte hain salaam is sangeetkaar ki
rachna ko. Tu Hi Meri Zindagi film ka geet aap sunenge Asha Bhosle
aur Mohd Rafi ki aawaazon mein.

-----------------------------------------------------------
Song: jidhar bhi main dekhoon udhar tu (Tu Hi Meri Zindagi)
-----------------------------------------------------------

Suhana Safar ke agle pathik sangeetkaar hain Raghunath Seth.

-------------------------------------------------------
Song: man kahe main jhoomoon main gaayun (Ek Baar Phir)
-------------------------------------------------------

film Ek Baar Phir ka geet aap sun rahe the Anuradha Paudwal aur
Bhupendra ki aawaazon mein. isey Vinod Pandey ne likha tha,
sangeetkaar Raghunath Seth. aapko bataa den ki ek samay mein
Raghunath Seth ka taalluKh Akashvani ke Allahabad kendra se raha tha.

------------------------------------------------------------
Song: baiThe hain reh guzar par dil ka diya jalaaye (40 Din)
------------------------------------------------------------

40 Din film ka yeh geet tha, Asha Bhosle ki aawaaz thi, Kaifi Azmi ke
bol the, aur sangeetkaar the Babul. sangeetkaar Bipin-Babul ki joDee
thi, jinhone 1958 mein apna 'career' shuru kiya tha Kalyanji Anandji
ke saath. we pehle Madan Mohan ke 'assistant' rahe chuke the. is joDi
ne sangeet diya Sultana Daku, Badal Aur Bijli aur 24 Ghante jaisi
filmon mein, jinmen 24 Ghante 'hit' huyi. par aage chalkar Bipin aur
Babul ki joDi TooT gayi. Bipin ko kaamyaabi naheen mili. Babul ko
thoDi si kaamyaabi mili, jinmein shaamil hain 40 Din film ke gaane.
aur aaiye ab sunte hain Sulaxana Pandit aur Mohd Rafi ki aawaazen,
film hai Aankhen Dekhee, rachna Padma Sachdev ki, sangeetkaar G
Kaushik.

-------------------------------------------------
Song: sona re tujhe kaise miloon (Aankhen Dekhee)
-------------------------------------------------

sangeetkaar Rajkamal ke sangeet mein Bhartiya Shastriya Sangeet aur
Bhartiya lok dhuno ki jhalak milti hai. Unki dhune itni bholi, itne
saral hain ki sunkar bhi mann pavitra ho jaaye. Rajkamal ke
swarbaddha kuchh gine chune filmon ke naam hain Saawan Ko Aane Do,
Saaz, Payal Ki Jhankaar, aur Chashm-e-Baddoor. Aayiye Yesudas aur
Haimanti Shukla ka gaaya film Chashm-e-Baddoor ka yeh khoobsurat
naghma sunte hain jise likha hai Indu Jain ne.

---------------------------------------------
Song: kaali ghoDi dwaar khaDee (Grihapravesh)
---------------------------------------------

yeh hain Gulzar ke bol, Lata Mangeshkar ki aawaaz, film ka naam lekin
aur sangeetkaar Hridaynath Mangeshkar. Lata aur Asha jaisi baheno ke
bhaai Hridaynath ka apna ek alag hi muqaam hai, apna alag 'style'
hai. haan, yeh zaroor hai ki unhone Hindi vyaavsaayik filmon mein
zyaada sangeet naheen diya. ek baar lataji ne bhi Vividh Bharati par
kahaa tha ki unhe lagta hai ki Hridaynath par ek Thappa lag gaya hai
Gair filmi geet 'compose' karne ka ya phir unke gaane mein 'classical
music' ki prachoorta hone ka. doston, is baat mein koi do raay naheen
hai ki Hridaynath Mangeshkar ka sangeet utkrishT se utkrishT hai,
sarvottam hai, sukoon pradaan karnewaali hai.

----------------------------------------------------
Song: suniyoji araj mhaariyo baabulaa hamaar (Lekin)
----------------------------------------------------

aur ab ham pahunch gaye hain aaj ke Suhana safar kaaryakram ke antim
raah par. sunwa rahe hain Shamshad begum ki aawaaz mein Tipu Sultan
film ka geet. sangeetkaar S D Batish. bataur gaayak apna 'career'
shuru karnewaale S D Batish ne san 1945 ki film Daasi ka lokapriya
geet "khaamosh nigaahen" gaaya tha Pandit Amarnath ke sangeet
nirdeshan mein. san 1948 mein woh sangeetkaar bane, filmen thi Balma
aur Chhup Chhup Ke. aage chalkar unhone kai filmon mein sangeet diya
aur samay samay par filmon mein gaate bhi rahe. to aaiye sunte hain
Tipu Sultan film ka yeh gaana.

-----------------------------------------------------------
Song: kuchh to hai kaala eji daal mein zaroor (Tipu Sultan)
-----------------------------------------------------------

to yeh tha aaj ka Suhana Safar jise aapne aur hamne tay kiya kuchh
kamcharchit sangeetkaaron ki rachnaayon ke sang.

THE END