SUHAANA SAFAR - KAMCHARCHIT SANGEETKAAR
---------------------------------------

Broadcast date: 08 June 2008
----------------------------

aaj Suhana Safar mein ham aapko kamcharchit sangeetkaaron ke
sangeetbaddha keeye geet sunwaa rahe hain, aur is kaDee mein sabse
pehle aap sunenge Jhumroo film ka yeh geet.

----------------------------------------------------
Clip: prelude of "ThanDi hawaa yeh chaandni suhaani"
----------------------------------------------------

doston, Kishore Kumar, ek sampoorN kalaakaar. gaayak ke roop mein
jinka koi saani ab tak paidaa naheen huya. lekin yahi ek roop naheen
tha unka. jaisa ki maine abhi abhi kahaa woh ek sampoorNa kalaakaar
the. paarshwagaayan ke saath saath unhone aisa abhinay kiya ki log
hanste hanste apne peT pakaDkar reh gaye. film nirmaaN, nirdeshan,
geet lekhan, aur ek sangeetkaar bhi the rahe woh. lekin ek gaayak ke
roop mein woh jitne maqbool huye, utne sangeetkaar ke roop mein
naheen huye. lekin unhone jitni bhi filmon mein sangeet diya kamaal
ka sangeet diya. aur yeh geet yeh film Jhumroo unhi ke sangeet se
sajee film thi.

-------------------------------------------------
Song: ThanDi hawaa yeh chaandni suhaani (Jhumroo)
-------------------------------------------------

Kishore Kumar ke baad hamaare agle pathik kamcharchit sangeetkaar
hain Mukul Roy. Mukul Roy mashoor gaayika Geeta Dutt ke bhaai the.
lekin apni bahan ki tarah unhe usd had tak kaamyaabi naheen
mili. 'late 50s' ke kuchh saalon mein unhone teen-chaar filmon mein
sangeet diya. aisi hi ek film thi san 1958 ki Detective, jiske gaane
behad mashoor huye the. is film mein unhone Geeta Dutt se gaane
gawaaye, haalaanki Asha Bhosle aur Sudha Malhotra ke bhi kuchh gaane
the is film mein. to aaiye Mukul Roy ke sangeet nirdeshan mein film
Detective ka geet sunte hain, Geeta Dutt ki aawaaz hai, Shailendra ka
geet hai.

-----------------------------------------------------
Song: do chamakti aankhon mein kal Khwaab (Detective)
-----------------------------------------------------

Sudhir Phadke ek aise sangeetkaar rahe hain jinka naam Marathi
sangeet mein bahur shraddha ke saath liya jaata hai. Hindi filmon
mein bhi unhone jo madhur sangeet diya hai, woh anooTha hai, utkrishT
hai. Sudhir Phadke Hindi cine sangeet mein bhale hi kuchh zyada
sakriya na rahe hon, par Marathi film sangeet aur gair filmi sangeet
mein shirshastha sangeetkaar rahe hain. geetkaar Madgulkar, nirmata
Raja Paranjape aur gaayak va sangeetkaar Sudhir Phadke ki trimurty
banee aur bane kuchh kaaljayee geet jinhone chakit kar diya duniya
ko. aayiye sune ek aisa hi geet.

----------------------------------------------
Song: main ban ki bholi gwaaliniya (Ratnaghar)
----------------------------------------------

yeh geet abhi aapne Lata Mangeshkar ki aawaaz mein sunaa. N. Sharma
ka geet tha, Sudhir Phadke ka sangeet, film ka naam Ratnaghar. Sudhir
Phadke ne zyaadaatar shaastriya raagon par aadhaarit gaane rache.
aise hi ek aur sangeetkaar the Avinash Vyas, jin par dhaarmik filmon
mein sangeet dene ka Thappa lag chuka tha. aaj jab dhaarmik filmon ke
sangeet ka zikr chhiDtaa hai to Avinash Vyas ka naam izzat se liya
jaata hai. aisi hi ek film thi Dwarkadheesh jismein Avinash Vyas ne
sangeet diya tha. aaiye sunte hain Asha Bhosle, Manna Dey aur
saathiyon ki aawaazon mein isi film ka geet, geet Bharat Vyas ne
likha hai.

--------------------------------------------------
Song: main naina hoon tum kaajal ho (Dwarkadheesh)
--------------------------------------------------

Asha Bhosle aur Manna Dey ki aawaazon mein ek aur geet sun liya
jaaye, lekin yeh hai film Reshmi Rumaal se, jiska sangeet tayyaar
kiya tha Babul ne. doston, pichhle kaaryakram mein hamne Bipin-Babul
ke joDi ka zikr kiya tha. chaliye aaj Babul ke baare mein aapko thoDi
si aur jaankaari dete hain. Babul ki tamanna thi gaayak banne ki.
Lucknow ke Morris college se taalim lekar Lucknow, Dilli aur Lahore
ke 'radio' se juDe rahe lekin desh vibhaajan ke baad unhe Bhaarat
lauT aana paDaa aur Bambai aakar Madan Mohan ke 'assistant' ban gaye.
Madhosh se lekar Railway Platform jaisi filmon mein unhone Madan
Mohan ke saath kaam kiya. thoDe se samay ke liye hi sahi par Babul ne
apni pehchaan zaroor banaayi thi bataur sangeetkaar. aur unke sangeet
se saje filmon mein ek ullekhniya film thi Reshmi Rumaal. to aaiye
sunte hain Reshmi Rumaal film ka geet Babul ka swarbaddha kiya. Raja
Mehendi Ali Khan ke is geet ko Asha Bhosle aur Manna Dey ne gaaya hai.

----------------------------------------------------------------
Song: zulfon ki ghaTaa lekar saawan ki pari aayi (Reshmi Rumaal)
----------------------------------------------------------------

Asha Bhosle aur Manna Dey ki aawaazon mein aapne ek ke baad ek do
gaane sune. pehla Avinash Vyas aur doosra Babul ka swarbaddha kiya
huya. leejiye ek aur gaana suniye inhi aawaazon mein, yaani Asha-ji
aur Manna-da ki aawaazon mein. Main Aur Mera Bhai, is film ka geet
hai yeh. Jan Nisar Akhtar ka likha huya aur sangeet C Arjun ka hai.

----------------------------------------------
Song: bheegi bheegi hawaa (Main Aur Mera Bhai)
----------------------------------------------

ab sunte hain Mohd Rafi ka gaaya huya Actress film ka geet. Naqshab
ne is geet ko likha hai aur dhun banaayi hai Shyam Sunder ne. Shyam
Sunder ka asli naam tha S S Gawa. unhe pehla 'break' diya tha Prabhat
Film Company ne san 1943 ki film Nai Kahani mein. un dino Master
Ghulam Haider Punjabi lok sangeet ko Khandan aur Khazanchi jaisi
filmon mein istemaal kar behad lokpriya banaa diya tha. Shyam Sundar
ne bhi usi Punjabi lok sangeet ka daaman thaamaa, kai prayod keeye
bhi keeye. unhone hi maTke ko bataur saaz filmi geeton mein shaamil
karwaaya tha. 1948 mein bani Filmistan ki film Actress ka sangeet
behad lokapriya huya tha, Khaas kar ke Rafi saahab ka gaaya yeh
naGmaa, aaiye sunte hain...

----------------------------------------------------------
Song: ham apne dil ka fasaana unhe sunaa na sake (Actress)
----------------------------------------------------------

Vividh Bharati par is samay aap sun rahe hain Suhana Safar. aaj
Suhana Safar mein ham aap ko kuchh kamcharchit sangeetkaaron ke
swarbaddha keeye huye naGhmein sunwaa rahe hain. ab jo geet ham aapke
liye laaye hain, uske na keval sangeetkaar kamcharchit hain, balki
geetkaar aur gaayak kalaakaar bhi zyaada charcha mein naheen rahe.
yeh geet hai film Rifleman ka, sangeetkaar Harbans, geetkaar Shaad,
aur gaayikaa ka naam to aapne zaroor sunaa hogaa, jee haan, Sudha
Malhotra.

------------------------------------------------
Song: baaje ghungharwa naache jiyarwa (Rifleman)
------------------------------------------------

hamaare film sangeet ke itihaas mein sangeetkaar joDeeyaan Khoob rahi
hain. Kalyanji Anandji, Laxmikant Pyarelal, Sonik Omi, Anand Milind,
Nadeem Shravan, Jatin Lalit, Vishal Shekhar, aur bhi na jaane kitne.
lekin kya aapko maaloom hai ki sabse pehli joDee kinki thi? jee haan,
Husnlal Bhagatram ki. is sangeetkaar joDee ne bahut lambi paari to
naheen khelee, par bahut kam samay mein inke kuchh aisi filmen aayeen
ki yeh shohrat ki bulandi par jaa baiThe the. naam ginaayen aapko
inki kuchh mashoor filmon ke? Pyar Ki Jeet, Badi Bahan, Afsana,
Sanam, Kafila, vagerah vagerah. aisi hi ek aur film thi san 1955 ki
Adil-e-Jahangir. to aaiye sunte hain Pandit Husnlal Bhagatram ka
sangeetbaddha kiya huya Lata Mangeshkar ki aawaaz mein Qamar
Jalalabadi ki rachnaa, film wohi, Adil-e-Jahangir. geet sunne se
pehle aapko yeh bhi bataa den ki is geet ka ek 'version' Talat
Mahmood ki aawaaz mein bhi tha.

--------------------------------------------------------------
Song: ae meri zindagi tujhe DhoonDoon kahaan (Adil-e-Jahangir)
--------------------------------------------------------------

doston, pichhle kaaryakramon mein hamne aapko sangeetkaar Jaidev ki
kuchh rachnaayen sunwaaye hain, jo shaastriya aur lok sangeet ki
meeThee chaashni mein Dooboye se lagte hain. film Parinay mein bhi ek
aisa hi shaastriyata ka aadhaar liye ek gaana tha, behad sureelaa. ab
ham aapko sunwaa rahe hain wohi geet, jise Naqsh Lyallpuri ne likha
hai, aur aawaazen hain Manna Dey aur Vani Jayram ki.

------------------------------------------------------
Song: mitwaa more man mitwaa aaja re aaja re (Parinay)
------------------------------------------------------

kamcharchit sangeetkaaron mein ek mahatwapoorNa naam hai Iqbal
Qureshi. Iqbal Qureshi ko bachpan se hi sangeet ka shauk tha. jab woh
12/13 saal ke the, tabhi se Aurangabad 'radio station' par gaane
gaaya karte the. phir Hyderabad mein jaakar unhe unke kaam ke liye
pryotsaahan mila. wahaan ki jo Khoobiyaan thi, 'Hyderabadi culture'
jise kehte hain, woh unmein aayeen. Hindi filmon mein unka pehla
gaana tha "ta thaiya karte aana", film thi Panchayat, jo kaafi 'hit'
huyi aur unhe aur bhi kaam milte chale gaye. film Bindiya
unke 'career' ki ek ullekhniya film rahi hai. is film mein Rajinder
Krishna ka likha aur Lata Mangeshkar ka gaaya yeh gaana behad
lokpriya huya tha.

-----------------------------------------------------
Song: itna na sataa ke koi jaane o deewaane (Bindiya)
-----------------------------------------------------

aaiye ab sunte hain Sawan Ko Aane Do film ka geet Jaspal Singh,
Kalyani Mitra aur saathiyon ki aawaazon mein. Gauhar Kanpuri ka likha
huya aur iski tarz banaaee hai Rajkamal ne. shraavan maheene ke aas
paas jab hum is Khoobsoorat gaane ko sunkar Khush ho uThte hain,
waheen doosri or yeh sochkar dil udaas ho jaata hai ki is sundar geet
ke sangeetkaar ab hamaare beech naheen hain apni is sundar rachna ke
baare mein hamein apni zubaan se kuchh bataane ke liye. lekin ismein
koi shaq naheen ki unka yeh geet Khud boltaa hai apni amaratwa ke
baare mein.

-----------------------------------------------------
Song: tumhe geeton mein Dhaaloonga (Sawan Ko Aane Do)
-----------------------------------------------------

doston, hamne kaaryakram ki shuruwaat kee thi Kishore Kumar ke
swarbaddha keeye gaane se. ab is safar ke antim muqaam par ham
pahunch gaye hain, aur aapko film Jhumroo ka hi ek aur naGhma sunwaa
rahe hain, jise likha hai Majrooh Sultanpuri ne, aur ismein Kishore
Kumar ke saath aawaaz milaaee hai Usha Mangeshkar ne. to chaliye
masti mein jhoom uThen is naGhme ke saath.

-----------------------------------------
Song: baabaalu baabaalu baa baa (Jhumroo)
-----------------------------------------

THE END