HAMAARE MEHMAAN - Interview of singer SNEHA PANT
------------------------------------------------

2008

SP: Sneha Pant
MS: Mamta Singh



MS: Sneha-ji, aaiye Vividh Bharati ke 'studio' mein aap ka swaagat
hai, namaskaar!

SP: bahut bahut dhanyavaad Mamta-ji

MS: kaisa lag raha hai 'studio' mein aakar?

SP: bahut achchha lag raha hai, 'in fact' main paapa se keh hi rahi
thi ki itna 'huge', aisa lag hi naheen raha hai ki main Bombay mein
hoon, 'especially' baahar bhi itna baDaa paarivaarik sambandh jaisa
(laughs)

MS: aap Delhi ki rehnewaali hain, to Delhi se Mumbai ki 'train' aap
ne kaise pakDee?

SP: 'train', haan, 'train' hi pakDee thi (both laughs). naheen, main
bahut chhoTi thi, tabhi ham log 'shift' ho gaye the. 'basically'
mujhe Delhi ki bahut kam yaad hai kyunki main bahut chhoTi thi. 6 yaa
7 'standard' mein thi. aur hamaari 'family' mein koi bhi is 'film
line' mein naheen hai. to meri 'mummy' lekin gaati thi. unko jab
pataa chalaa ki main gaati hoon, to 'mummy - daddy' dono 'governmkent
offices' mein kaafi achchhe 'posts' pe hain, to unhone socha ki chalo
isko 'classical' seekhaate hain. to meri 'proper training', 5 - 6
saal ki thi, tab se 'classical' seekhna bhi shuru kar diya tha, ghar
pe meri guru maa aati theen, Shikha Ganguly-ji, aur saath hi saath us
waqt 'musical competitions' hote the Delhi mein, Mandi House mein,
jismein Bombay ke 'judges' aate the. to lag bhag saare 'competitions'
main jeet-ti thi, 'first' aati thi hameshaa, 'apart from school'.
xxxxxxxxxxxxxxxxx. to unhone salaah dee paapa ko ki aap Bombay aaiye
aur Kalyanji bhaai se miliye. unka ek 'group' hai Little Wonders. tab
unka ek 'group' hota tha Little Wonders jismein chhoTe chhoTe
bachche 'perform' karte the.

MS: bahut mashoor

SP: bahut 'popular' huya karta tha. to paapa ne kahaa chalo ghoom
aate hain. tab 1994 ka 'new year' tha mujhe yaad hai, tab ham raat ko
aaye the. paapa bole 'ham 15 din ke liye jaakar aate hain'. to
January 1st 1995 ko, matlab 1995 ka pehla jo din tha, us din Bombay
aaye. uske ek yaa do din baad Kalyanji bhaai ko milne gaye.
unhone 'time' diya tha ki khaali 10 'minute' main sunoonga. lekin woh
2-3 ghanTe sunte hi rahe. wahaan kaafi baDe baDe 'singers' bhi the,
matlab sabhi jaante hain ki aaj ke jitne 'singers' hain woh sabhi
Kalyanji Anandji ke 'under trained' hokar aaye hain, chaahe Shaanu-
ji, Udit-ji, Sadhna Sargam, sabhi. to Kalyanji bahut khush ho gaye
aur paapa se kahaa ki aap ke beTi ki jagah Delhi naheen hai, aap
jaldi Bombay 'shift' ho jaaiye. to yeh 'through and out'
paapa 'mummy' ka hi 'decision' tha aur main to Bombay mein hi reh
gayi, mere 'relatives' ke ghar hai, paapa Delhi waapas gaye, aur
mera aur mere 'sister' ke 'school' ka jo bhi 'transfer' vagerah hai
woh sab karke, aur meri 'mummy' ko 'job' chhoDnee paDee, aur paapa
ne 'job' naheen chhoDee, paapa 'up and down' karte the Delhi -
Mumbai. 5 saal tak woh aate jaate rahe.

MS: to jo gaane aap ne sunaaye the Kalyanji Anandji bhaai ko, kuchh
yaad hai kya?

SP: kaafi, unko itna shauk hai 'classical' ka, jab unko pataa chalaa
ki itni chhoTi bachchi 'classical trained' hai, to unhone zyaadaatar
mujhse 'classical' gaane hi sune, 'classical' bandishen hoti hai,
haalaanki aajkal ham 'classical' ka itna riyaaz to naheen kar paate
hain, lekin zyaadaatar unhone wohi geet sune.

MS: agar ek koi yaad ho to ek 'line' sunaaiye.

SP: OK, zaroor, yeh 'uncle' ka kaafi 'favourite' gaana hai, film
Imaandaar ka gaana hai, jo main sabhi Little Wonders 'shows' mein
gaati thi, aur kaafi 'applause' milta tha, gaane ke bol hain "more
ghar aaye sajanwaa", (sings) "more ghar aaye sajanwaa, Daal Daal
kooke koyaliya...".

MS: kya baat hai, bahut achchha lagaa, sachmuch bahut sureelee hain
Sneha. ab Kalyanji Anandji bhaai ke liye unka yeh gaana sun lete
hain, phir aage baatchit karte hain.

SP: zaroor

-----------------------------------------
Song: more ghar aaye sajanwaa (Imaandaar)
-----------------------------------------

MS: Sneha-ji, yeh bataaiye ki Kalyanji Anandji se jab aap ki
mulaaqaat huyi, kyunki woh bahut baDe sangeetkaar hain, unka baDaa
naam hai, unke saamne ek chhoTi si bachchi, to kaisa 'experience' tha?

SP: bahut bahut zyaada Dar lagta tha, Kalyanji 'uncle' se to bahut
zyaada Dar lagta tha kyunki unki bahut 'serious personality' thi,
dikhne mein 'serious' the lekin jo baaten thi, unke mukh se ek ek jo
shabd nikalte the, unse kuchh na kuchh to seekhne ko milta tha,
unhone hamesha bachchon ko yahi seekhaaya, bahut saare bachche unke
yahaan aate the, main bahut 'lucky' hoon ki poore 5 saal main unke
wahaan gayi hoon, 5 saal itna kuchh seekhne ko milaa, 'life' ke baare
mein, aadhyaatma aur 'spiritual' ki aaj yeh sab kaam aa rahi hai.

MS: gaane ki kuchh baarikiyaan?

SP: gaane ki baarikiyaan, woh kehte the ki unhone bahut
zyaada 'classical' seekha naheen hai, woh mujhse bandishen sunte the,
unhone khud ki raag bhi banaaee hai, jaise "more ghar aaye sajanwaa"
saarang bairaagi raag hai jo Kalyanji 'uncle' ne khud banaaye hain.
unka yahi tha ki kam samay mein 'classical', ki log 'bore' na ho
jaayen, kam samay mein log 'classical' ka aanand uThaa sake, 'right
from' aalaap, bandish, taane, aaro abhro sab. to Little Wonders
mein "more ghar aaye sajanwa" jab main gaati thi to Ojas Adiyar
tablaa bajaate the, to 'uncle' pehle hi bol dete the 'yeh 'last
climax song' hai, 'climax' hai 'show' ka, is 4 'minute' mein yeh
bachchi sab kuchh', 'end' mein itni taaliyaan milti thi.

MS: achchha chaliye ab ek gaana ho jaaye aap ki pasand ka, phir aage
baat karenge.

SP: main Lata Mangeshkar ki bahut baDi 'fan' hoon, unhi ka ek gaana
sunaana chaahoongi, (sings) "suno sajna papeehe ne kahaa sabse pukaar
ke..."

------------------------------------------------
Song: suno sajna papeehe ne (Aaye Din Bahaar Ke)
------------------------------------------------

MS: ab hamein yeh bataaiye ki, mera Khayaaal hai Yaaden aapki pehli
film thi

SP: jee haan

MS: to yeh maukaa aapko kaise milaa, kaise juDee is film se aap?

SP: jaisa maine bataaya ki paapa Delhi mein hi 'job' kar rahe the
aur 'up down' kar rahe the, to 'year 2000' mein Kalyanji 'uncle'
ki 'death' ho gayi, to unhi ko maine 'Godfather' maana tha, wohi guru
the, unhi ke yahaan aana jaana tha, unhi ke 'shows' karti thi main,
to uske baad paapa 'shift' huye 'voluntary retirement' leke, aur uske
baad maine Sa Re Ga Ma Mega Final bhi jeeta tha, Children Special jo
tha, to do 'achievemnts' thi bataane ke liye, ek to sa Re Ga
Ma 'winner' aur doosra Kalyanji Anandji ke wahaan ka 'experience'.
uske 'basis' pe paapa ne 'film magazines' dekhke sabhi 'directors'
ko 'phone' karna shuru kiya, dheere dheere logon ne bulaaya sunne ke
liye. aise hi ek din Anu-ji ne, Anu Malik-ji ne bulaaya, woh Yaaden
kar rahe the, aur unko achchha lagaa jo bhi do 'minute' ka maine
sunaaya, aur unhone kahaa ki 'iska main ek gaana karne jaa raha hoon,
to aap gaa do khaali'. woh mere 'life' ka pehla gaana, maine socha
bhi naheen tha ki woh 'final' mein reh jaayegaa, 'but' baad mein
Subhash-ji ko, Anu-ji ko gaana itna achchha lagaa ki, 'thats why'
gaana 'final' reh gaya. film mein shaamil ho gaya. isi tarah se ham
Rajesh Roshan-ji ko milne gaye, unhone us samay achchhe se sunaa
mujhe aur do filmon mein gawaaya, Na Tum Jaano Na Hum aur Moksh mein.
to yeh filmen kaafi pehle aa chuki thi, 2000 mein.

MS: aur kaafi charchit huyi thi mere Khayaal se

SP: ek baar aap kaam karna shuru kar dete ho to aage doosre 'music
directors' ko bataana 'easy' rehta hai.

MS: to in teeno filmon mein se kaun sa gaana sunwaana chaahengi aap?

SP: 'definitely' Yaaden ka, mera 'favourite', abhi tak ka mera
sabse 'favourite' gaana wohi hai, Yaaden film se main sunaana
chaahoongi.

MS: zaraa gungunaayengi?

SP: zaroor, (sings) "ae dil dil ki duniya mein aisa haal bhi hota
hai, baahar koi hansta hai andar koi rota hai...."

----------------------------------------
Song: ae dil dil ki duniya mein (Yaaden)
----------------------------------------

MS: to Sneha, kuchh aage ki filmon ki baat karte hain, kuchh haaliya
filmon ki baat karte hain, Halla Bol film kaafi charchit huyi,
Sukhwinder-ji ka 'music', aur gaana bhi bahut maqbool huya, uske
baare mein bataaiye, 'recording' se juDee huyi Khaas baat, gaane se
juDee huyi Khaas baat bataaiye.

SP: Sukhwinder-ji jo hain woh mere bahut hi pasandida, aaj ki taariKh
mein jo hain, kuchh 'singers' ko hi main bahut maanti hoon,
aise 'singers' mein ek hain Sukhwinder-ji, unhone in dino 'music
direction' bhi shuru kiya hai, kaafi filmon mein 'music' de rahe
hain. to unhe 'personally' mere 'singing' mein bahut 'faith' hai,
bahut. woh kaafi logon ko kehte bhi hain, kyunki maine jo seekha hai,
yaa jo 'classical training' ki jo baat hai, woh hamesha kehte hain,
ek gaana diya aapko to kis tareeke se apne tareeke se gaana chaahiye
usko, aur khaTke, muDkiyaan, harkaten, jis tarah se Sukhwinder-ji
gaate hain, woh usi tarah se mujhe gawaate hain, woh bahut khush hote
hain jab main unke bataaye jaisa kar paati hoon. to Halla Bol mein
usi tarah ka tha ki unhone jab bulaaya to 'background' ke liye
bulaaya tha, Halla Bol ke 'background' ke liye, 'background score'
bhi main gaati hoon, tab Rajkumar Santoshi-ji ko meri aawaaz bahut
achchhi lagi, tab unhone kahaa ki 'main chaahta hoon ki isko kisi
tarah ka, 'not exactly theme music', iski aawaaz ko ek 'track' mein
banaakar 'final CD' mein Daalen to!' to aap ne agar dekha hogaa Halla
Bol to Vidya Balan ke jahaan jahaan 'shots' aate hain, ek 'female
voice' chalti hai, "main tere qurbaan ve", to utna hi mera 'part' tha
Halla Bol mein. baad mein Sukhwinder-ji ne mujhe 'studio' mein
bulaake "barsan laagi", ek Thumri hai bahut puraani, do chaar 'line'-
en gawaayi, aur 'free lance' gawaayi, matlab 'just' ek sur de diya
tha mujhe 'recording' mein aur woh kabhi bhi 'recording studio' mein
alag alag 'partition' mein naheen hote, 'monitor' pe yaa 'recording',
woh saamne apne 'computer' pe khud hi 'record' karte hain, khud
hi 'edit' karte hain, wahaan se baiThke woh ek 'line' gaa rahe hain,
yahaan se main wohi 'line repeat' kar rahi hoon. to "barsan laagi" ko
unhone mujhse kam se kam 10-15 'type' se gawaaya hogaa. unko achchha
lage jaa raha tha, woh achchha gaa rahe the, main yahaan se 'repeat'
kar rahi thi, to woh keh rahe the ki 'bilkul 'xerox copy' aa rahi hai
baahar' (laughs), is tarah ka bahut 'faith' hai unko meri 'singing'
pe. kabhi kabhi to yeh bhi kehte hain ki 'tu to 'female' Sukhwinder
hai' (both laughs), unke saath bahut hi achchha lagta hai kyunki aaj
aise bahut hi kam 'music directors' hain jo is tarah
ki 'compositions' banaa rahe hain. yaani aajkal zyaadatar 'hip-hop,
rock', aisa 'music' chalta hai, Sukhwinder-ji ka, jaise Black & White
ka 'music' bhi aap ne sunaa hogaa, bilkul haTke hai

MS: bilkul

SP: to unka yahi hai ki jahaan pe zaroorat hai wahaan pe 'fast music'
bhi woh dete hain, aur jahaan pe aise alag ang ke gaano ki baat hai
woh aisa 'music' dete hain. to "barsan laagi" aaj ki 'date' mein mera
Khud ka bahut hi 'favourite' gaana hai 'because' itne acvhchhe se,
Thehraav, mujhe lag hi naheen raha hai ki woh 'background' hai, ki
meri aawaaz 'background score' se mil jaati hai, to yeh mera bahut
hi 'favourite' hai.

MS: to aap apne is 'favourite' geet ko apne sunnewaalon tak pahuncha
deejiye (laughs)

SP: jee (laughs), (sings) "barsan laagi saawan bundiya raaja, tere
bin laage naa mora jiya...."

---------------------------------------------------
Song: barsan laagi saawan bundiya raaja (Halla Bol)
---------------------------------------------------

MS: waaha bahut achchha lagaa. ab tak is 'programme' mein aap ne
jitne gaane gaaye, unmein ek Thehraav tha, baDe gambheer kism ke
gaane aap ne gaaye, ab main ek aise gaane ka zikr kar rahi hoon,
Golmaal film ke gaane ka.

SP: zaroor

MS: ismein thoDi alag si aawaaz bhi hai aapki, aawaaz thoDi alag
lagti hai, 'nasal touch' hai ismein aur thoDaa 'rhythm' bhi 'fast'
hai. to uske baare mein bataaiye, Golmaal film ki ham baat kar rahe
hain, Vishal-Shekhar ka 'music'.

SP: jee. Golmaal film ka gaana mujhe is tarah se milaa ki 'apart from
the film songs' maine 'remixes' kaafi saare gaaye, matlab mujhe Khud
yaad naheen, 100-200 gaaye honge, jab 'remix' ka daur aaya tha tab.
aapne mere ek do 'remix' sune bhi honge jo kaafi 'popular' huya
tha, "saiyaan dil mein aana re", aur "kabhi aar kabhi paar". "kabhi
aar kabhi paar" ke liye mujhe MTV Award bhi mila tha. to 'being a
singer', bahut se 'singers' aap ne dekha hogaa bahut achchhi tarah
nakal utaarte hain, 'immitate' bahut achchhi tarah karte hain.
to 'remixes' jab ban rahi thi to Harry Anand ne kahaa ki, maine unke
liye bahut 'remixes' gaaye hain, to unhone kahaa ki '"saiyaan dil
mein aana re" main banaa raha hoon, to thoDaa Shamshad Begum 'style'
se gaana'. to maine us tarah se gaaya, woh 'popular' ho gaya, "kabhi
aar kabhi paar" bhi 'popular' ho gaya. to Vishal aur Shekhar ne
mujhe 'phone' kiya to unhone yahi poochha ki 'Sneha, have you
sung "saiyaan dil mein aana re"?' maine kahaa 'yes'. to unhone kahaa
ki 'bas bas, wohi aawaaz, Golmaal film mein ek gaana hai
jismein 'situation' aisa hai ki Paresh Rawal apne puraane zamaane ke
din yaad karke gaate hain. to wohi aawaaz mein main yeh 'record'
karna chaahta hoon'. to ham log 'studio' gaye, aur sabse 'funny' baat
yeh ho rahi thi ki jab "saiyaan dil mein aana re" 'record' huyi thi
to maine naak pe ungli rakhke gaana gaaya tha, (both laughs), aur
Shekhar mujhse yahi baat keh rahe the ki 'woh baat aa naheen paa rahi
hai, 'are you sure' ki kuchh alag Dhang se gaaya tha?' maine
kahaa 'naheen Shekhar, maine 'actually' naak pe ungli rakhkar gaaya
tha'. unhone kahaa 'please please naak pe ungli rakhke hi gaayo', aur
maine waise hi, aur naak pe ungli rakhte hi 'voice' change ho jaata
hai. to yeh bahut 'funny', bahut mazaa aaya unke saath bhi kaam
karke, to unke saath Home Delivery mein bhi maine gaaya, Golmaal mein
bahut mazaa aaya, mujhe maaloom naheen tha ki Shekhar-ji bhi
gaayenge. 'male part' Paresh-ji ke liye unhi ki aawaaz hai. woh Khud
bahut achchhe 'singer' hain.

MS: kis tarah ke hansi-mazaak karte hain?

SP: zyaadaatar ham ek doosre ke nakal utaarte rehte hain (both
laughs). to chaahe ham 'singers' bhi jab milte hain, chaahe Sunidhi
ho yaa Sonu ho yaa Sukhwinder ho, jab bhi ham milte hain to hansi
mazaak to har jagah hai hi, 'serious' ham kabhi naheen hote,
gaane 'serious' hote hain, maahaul 'light' hi rehta hai.

MS: chaliye usi gaane ki, jaise naak mein ungli Daalkar...

SP: (laughs) (sings) "kyun aage peechhe Dolte ho bhanwron ki tarah,
kyun dekhte ho mujhe yun besabron ki tarah...."

------------------------------------------------------------
Song: kyun aage peechhe Dolte ho bhanwron ki tarah (Golmaal)
------------------------------------------------------------

MS: aur ab Sneha, film Partner ki baat karte hain, "soni ke nakhre",
bataaiye is gaane ke liye kis tarah ke nakhre uThaane paDe.

SP: (laughs) Sajid Wajid ne 'again call' kiya tha, unhone bataa diya
tha ki ismein zyaada 'part' naheen hai, yeh 'male song' hai, ismein
Katrina Kaif bas ek baar hi izhaar karna hai, do teen hi 'lines' hain
jo 'repeat' karti hain, to woh jo Laabh Janjua, Punjabi singer hai,
kaafi 'popular' hain unke gaane, unka itna 'high pitch' mein tha, woh
itna 'high pitch' mein gaate hain, to usko 'maintain' karne ke liye
hamein kaafi saare 'takes' karne paDe 'so that', haalaanki us 'range'
mein gaane mein mujhe takleef to naheen huyi, 'in fact high pitch'
mein gaane ki wajah se meri aawaaz patli ho gayi, wohi ek baat thi.
bas do-teen hi 'lines' thi, gaana bahut 'popular' huya, sabhi kehte
hain ki bahut achchha gaana hai. to bas, bahut khaas kuchh naheen
tha, 'recording' aajkal bahut jaldi jaldi ho jaata hai, par mujhe
itni ummeed naheen thi yeh itna zyaada 'popular' ho jaayegaa.

------------------------------------------
Song: soni de nakhrre sone lagde (Partner)
------------------------------------------

MS: kuchh aanewaali filmon ki baat ab karen, kaun kaun si aapki
aanewaali filmen hain?

SP: aanewaali filmon mein Chal Chalaa Chal hai, jiske 'promos' abhi
chaalu hain TV pe, Govinda-ji ki film hai, aur Mr Fraud ek aayegi,
Himesh Reshammiya ka 'music' hai usmein, Guzarish film aanewaali hai,
jiska 'music', main 'personally' kehna chaahoongi shrotaaon ko
ki 'its one of its kind', bahut achchhe uske gaane, aur maine 3 gaane
gaaye hain us film mein, aur 'musical film' hai, kaafi baDi film hai,
aur Three Sisters hai, Anarkali aanewaali hai, 'again' Sukhwinder-ji
ka 'music' hai, ab bas itna hi yaad hai mujhe.

MS: yeh to aanewaali filmen hain, aur bhi kuchh filmen jo aap kar
chuki hain jaise Masti, Baghban, Dreams, Tumko Na Bhool Paayenge,
aisi tamaam filmen hai, aap bataaiye ki in filmon mein aapko kaun
kaun si filmen bahut pasand hai?

SP: mere saath 'actually' huya yun tha ki main itni chhoTi umra se,
mujhe pehli film Yaaden mili, aur phir Rajesh Roshan-ji ne mujhe Na
Tum Jaano Na Hum aur Moksh mein gawaaya, to sab logon ne mujhse kahaa
ki itni chhoTi umra mein tumne itne dukhi aur dil TooTnewaale gaane
gaaye, 'sad songs' gaaye. to main 'personally enjoy' karti thi kyunki
mera 'taste' waisa hi hai, to main sochti thi mujhe koi dhamaal masti
waala gaana milna chaahiye. to Ek Aur Ek Gyarah mein Shankar
Mahadevan ne, Shankar Ehsaan Loy ka 'music' tha, to unhone do gaane
gawaaye, ek 'soft romantic number' tha, aur ek "tu jogiya tu jogiya",
to wahaan se mujhe ek 'bteak' mila ki 'OK, yeh aisi gaane bhi sakti
hai'.

---------------------------------------------------
Song: main jogiyaa main jogiyaa (Ek Aur Ek Gyaarah)
---------------------------------------------------

SP: 'then' Masti aayi, Masti mein mere do gaane the. to film
bhi 'hit' huyi aur gaane bhi 'hit' huye. "on the roof in the rain"
aur doosra gaana tha "saiyaan ji saiyaan ji". phir to aate gaye, Kyun
Ho Gay Na mein tha, "pyaar mein sau uljhane hain pyaar mat karna",
aur Baghban mein aarti thi Aadesh-ji ki, "om jai jagdish hare", aur
Dreams thi, Tumko Naa Bhool Paayenge mein Said-Wajid ka 'music' tha,
do gaane the, kabhi kabhi yaad bhi naheen aate hain, har gaane ko
naya samajhke maine gaaya hai. alag alag tarah ke gaane gaaye hain.
pehle pehle kaafi 'sad songs' aaye mere paas, to main 'personally
never say no' kyunki 'mike' ke saamne jitna jaati hoon
utna 'experience' milta hai. Yaaden film 2000 mein 'release' huyi
thi, to aaj 'film line' mein mujhe 8 saal ho gaye, is dauraan
maine 'remixes' kaafi gaaye hain, 'regional' kaafi gaaye hain, alag
alag bhaashaayon mein, 'jingles' gaaye hain.

MS: kin kin bhaashaayon mein gaaye hain?

SP: lagbhag 20-25 bhaashaayon mein gaayi hoon. jitne praant hai India
mein, sabhi ke filmon mein gaayi hoon.

MS: 'folk' bhi gaaya hogaa?

SP: jee

MS: to sunaaiye na kisi praant ka

SP: 'regional' mein kya hota hai ki 'recording' ke baad maine kabhi
sunaa hi naheen kyunki apne apne 'states' mein woh gaane 'release'
hote hain, lekin aise 'folk', Rajasthani 'folk' mujhe bahut pasand
hai "kesariya baalma", woh main sunaana chaahoongi.

MS: jee

SP: (sings) "kesariya baalmaa aayo ji, padhaaro mhaare des ji...."

MS: kya baat hai Sneha, bahut achchha lagaa. aur thoDi der pehle jab
filmon ka zikr chalaa tha to Masti film ka zikr kiya tha, aur Ek Aur
Ek Gyaraah, jismein masti bhare geet the. to ham chaahte hain ki aap
Masti ke gaano ka zikr karen.

SP: Masti ka yeh gaana bahut 'popular' tha "on the roof in the rain",
Vivek Oberoi aur Lara Dutta pe 'picturise' huya tha.

MS: Anand Raaj Anand ka 'music' hai

SP: Anand Raaj Anand ne bhi mujhe bahut 'initial stage' mein Qila
film mein gawaaya tha 'but somehow' woh gaana 'dub' ho gaya tha, main
bahut chhoTi thi aur gaana Rekha-ji par tha, to 'obviously'
aawaaz 'match' naheen ho sakti thi, to Anand Raaj Anand-ji ne bhi
mujhe bahut saari filmon mein gawaaya hai. usmein Masti film ke
gaane 'popular' huye, to main is film ka gaana sunaana chaahti hoon,
(sings) "chori chori chhora chhori chhat pe milenge to khelenge
prem 'game'....."

---------------------------------------
Song: 'on the roof in the rain' (Masti)
---------------------------------------

MS: ab Sneha yeh bataaiye ki kaun kaun 'music directors' ke saath aap
kaam kar chuki hain aur kaun kaun sangeetkaaron ke saath kaam karna
aap zyaada pasand karti hain.

SP: 'right from start' jaise Anu Malik, Rajesh Roshan, Shankar Ehsaan
Loy, Sajid-Wajid, Vishal Shekhar, Sukhwinder-ji, Himesh Reshammiya,
kaafi 'newcomer music directors' hain unke saath, Anand Raaj Anand.

MS: A R Rahman?

SP: bas unhi ke saath kaam karna baaki hai, baaki sabhi ke saath kaam
kar chuke hain. koi aise 'music directors' naheen hain jinke
saath 'uncomfortable' lagaa ho kyunki har kisi ke wahaan ek alag
maahaul, ek alag tareeka hota hai 'recording' karne ka, har ek ka
alag 'style' hota hai baaten karne ka, alag 'atmosphere' hota hai, to
sabhi ke saath 'comfortable feel' hoti hai.

MS: to aap ne zikr kiya tha aapne Sukhwindara Singh ke saath kaam
kiya, jo khaTkaa, muDiyaan aur yeh sab jo aap ko seekhne ko milaa
tha, to kya aap hamein bataayengi 'example' dekar ki...

SP: (laughs) matlab unke munh se, jo bhi 'line' woh gaate hain, woh
kuchh aisa gaa jaate hain ki jisko 'copy' karna mushkil hai, wohi
sirf 'cut paste' kar sakte hain, unki 'copy' koi naheen kar sakta.
main koshish karti hoon, woh kai baar kehte hain ki main
kaafi 'close' jaati hoon, jaise woh gaana, aise hi baiThe baiThe,
unka bahut 'favourite hai, (sings) "ke aaja teri yaad aayi", yeh
gaana mujhe poora yaad naheen hai, woh antara bhi jaise jaata hai
(hums the antara tune), aisa 'original' mein Rafi saahab ne gaaya
tha, ab inhone isko aise gaaya (hums the tune as Sukhwindara Singh
sings), to yeh unke khaTkaa muDkiyaan hain, baareek, yeh sab seekhne
ko mile hain.

MS: bilkul sahi hai. Sneha, yeh sab to gaano ki baat thi, ab ham yeh
jaanna chaahte hain ki kuchh Ghazlen bhi gaayi hain aap ne, uski
kuchh baaten keejiye, uske baad ham aapke bachpan aur ateet ki baaten
bhi karenge. hamein Ghazlon ke baare mein bataaiye, kaun kaun
se 'albums' aaye.

SP: 'albums' to aayi naheen hai, lekin mujhe Ghazlon ka bahut shauk
raha hai, jaisa maine kahaa Kalyanji Anandji ke wahaan har tarah
ka 'music' ham seekhte the, to woh Khud Mehdi Hasan saahab ke, Ghulam
Ali saahab ke, 'classical' mein Rashid Khan saahab ke bahut
baDe 'fan' rahe hain, to unke wahaan maine itne achchhe
achchhe 'music' sune hain ki, jaisa maine kahaa tha sa Re Ga Ma, to
har baar maine Ghulam Ali saahab ki ek ek Ghazal to gaayi hogi, har
baar, isliye main jeet jaati thi ki shaayad logon ko lagta hoga ki
itni chhoTi bachchi itni 'tough' Ghazal kaise gaa rahi hai!
mujhe 'personally' Ghazlon ka bahut shauk hai, main aaj bhi Ghulam
Ali saahab ko bahut sunti hoon.

MS: aur kin kin logon ki Ghazal aap pasand karti hain?

SP: zyaadaatar Ghulam Ali saahab ke, unka bahut kam aise 'concerts'
hote hain Bombay mein jismein main naheen jaayun. unke 'concerts
attend' karti hoon, mere 'favourite singer' hain woh.

MS: to unke liye ek Ghazal sunaayenge hamein?

SP: zaroor, (sings) "apni tasveer ko aankhon se lagaata kya hai, ek
nazar meri taraf bhi tera jaata kya hai...."

--------------------------------------------------------------
Song: apni tasveer ko aankhon se (Non-film Ghazal- Ghulam Ali)
--------------------------------------------------------------

MS: bahut achchha laga hamein. Sneha, aap gaati itna sureela hain,
yeh bataaiye ki gaano ke alaawa kya shauk farmaati hain?

SP: mujhe 'games' ka bahut shauk hai, 'computer games' ka to bahut hi
zyaada shauk hai, matlab jab jab main ghar pe hoti hoon to
zyaadaatar 'computer' pe 'games' khel rahi hoti hoon. mujhe 'films'
dekhne ka bahut zyaada shauk hai.

MS: puraani yaa nayi?

SP: puraani, Black & White chhoDke, 60s aur 70s ke to mujhe bahut hi
pasand hai. aur 'theatre' mein bhi matlab, 'every Friday' jo 'film
release' hoti hai, mujhe aise 'uncomfortable' lagne lag jaata hai ki
maine yeh film chhoD kaise dee. to main English, Hindi saari filmen
dekhti hoon ghar pe jab hoti hoon, to 'paper' mein dekhti hoon ki aaj
kaun si filmen TV par aanewaali hain, to mujhe film dekhne ka bahut
shauk hai. 'serials' main 'follow' naheen karti hoon, 'comedy
serials' kuchh achchha aa raha ho to dekhti hoon, jaise Sarabhai hai,
KhichDi, aur Friends, 'otherwise' mujhe 'films' ka bahut shauk hai,
aur 'games' mein jitne 'indoor games' hain, jaise 'carrom'
yaa 'computer games' hain, aur kaafi bachpan se hi 'sports' mein
hameshaa se thi main, to 'athelete' bhi bolte the mujhe Delhi
mein, 'runnings' vagerah bahut achchha karti thi, 'cricket' bhi khela
hai

MS: achchha?

SP: (laughs) ab to waisa 'interest' naheen hai, lekin jab bhi
koi 'game' khela hai, chaahe woh 'tennis' ho yaa 'badminton'
yaa 'cricket', sab mein matlab main 'rarely' haari hoon.

MS: to kya agar aap gaayika naheen hoti to khilaaDi hoti? (laughs)

SP: (laughs) naheen, khilaaDi to naheen hoti lekin mujhe shauk bahut
hai. ab iske alaawa kuchh socha hi naheen ki main kuchh aur kar sakti
hoon, 'singing' ke alaawa, bachpan se hi main gaa rahi hoon, to mauka
hi naheen milaa yeh sochne ka ki 'singing' ke alaawa main kya kar
sakti hoon. 'peace lover', mujhe bahut shauk hai aadhyaatma ka,
jahaan achchii baaten ho rahi ho bhagwaan ka, yaa achchhi baaten
bataayi jaa rahi ho, Osho, Acharya Rajneesh, unko bahut sunti hoon,
yeh bhi Kalyanji 'uncle' ne aadat lagaayi thi, aur kabhi kabhi kisi
achchhi sansthaa mein chali jaati hoon.

MS: bachpan mein paDhaai mein kaisi theen?

SP: paDhaai mein 'I was always above average', matlab hamesha 70% -
80% aisa aaye, 'first' kabhi naheen aayi, lekin aise hi 'marks' aate
the. 7th tak Delhi mein paDhaai kee, 8th se 'college' tak poora
yahaan pe kiya. jaise jaise saal baDhte gaye, 'percentage' kam hote
gaye (laughs), kyunki 'singing' baDhti gayi aur ek ek maheene 'shows'
baahar hote the, mujhe 'school' waalon ne, 'college' waalon ne
bahut 'help' kee, bahut 'help' kee, Malviya sir the hamaare Central
School ke Principal sir, Mithibai College ki Rupa Shah 'madam',
unhone mujhe dekhke hi 'admission' de diya tha, main aur paapa baiThe
the, to waheen pe paas mein Little Wonders ka 'show' huya tha, to
unhone kahaa ki 'tum to aa hi rahi ho hamaari 'college' mein, bahut
saari 'trophies' aayenge 'singing' mein hamaare 'college' ke liye'.

-------------------------------------------------
Song: jaa sanam mujhko hai (Na Tum Jaano Na Hum)
-------------------------------------------------

MS: Mumbai mein bahut saalon se aap hai, bahut chhoTi theen tab aayi
hain, ab bhi aap chhoTi hi hain (laughs), main yeh jaanna chaahti
hoon ki Delhi ki kaun si cheez aap yahaan bahut 'miss karti hain?

SP: golgappe, 'without any doubt' (both laughs)

MS: aawaaz pe koi nuksaan naheen hoti?

SP: naheen, sab poochhte hain jaise aap poochh rahi hain, maine Sonu
Nigam ke saath bahut 'shows' keeye hain, Little Wonders ke baad, Sonu
Nigam ke saath 3 saal tak 'shows' keeye, ham log 'world tours' par
jaate the, unki 'family' poori bahut 'close' hai, main bahut 'close'
maanti hoon, unki 'sister' chhoTi, unhone hamesha bahut 'guide' kiya
mujhe.

MS: jab Sonu Nigam ka zikr chalaa hai, to chaliye unke saath aapka
gaaya film Tumko Naa Bhool Paayenge ka ek geet sunte hain yahaan par,
phir aage ki baatchit karenge.

-------------------------------------------------------
Song: main to laDki kunwaari (Tumko Naa Bhool Paayenge)
-------------------------------------------------------

MS: ab Mumbai ki baat chali hai. Mumbai mein Marathi gaane bahut
chalte hain, log Marathi gaane bahut pasand karte hain, alag ek
shaili hai Marathi gaano ki, to aap ne Marathi gaane naheen gaaye?

SP: maine Marathi gaane gaaye hain, lekin 'again' main kahoongi ki
mujhe yaad naheen hai kyunki kabhi waapas unko suna hi
naheen 'recording' ke baad, Lataji Ashaji ke kuchh 'cassettes' hain
mere paas jinmein unke puraane gaane hain, lok geet hain, woh main
sunti hoon aur thoDi bahut gaati bhi rehti hoon. 'diction'
mujhe 'proper' maaloom naheen hai Marathi 'language' ka, lekin kaafi
maine seekhe aur gaaye hain.

MS: ek 'line' gungunaaiye

SP: zaroor, Bombay mein hoon to Marathi ka ek 'line' gaana
chaahoongi, Ashaji ka gaana hai yeh (sings Marathi song).

MS: bahut achchha lagaa Sneha, bahut achchha. Sneha, hamein ab yeh
bataaiye ki 'stage shows' kahaan kahaan keeye aapne?

SP: 'all over world' mein, matlab kaafi jaagh kee hoon 'shows', 'with
lots of big singers, music directors and obviously stars also',
kaafi 'lucky' hoon ki baDe baDe 'banners' ke saath 'shows' kee hoon,
aur ab mere khud ke 'shows' hote hain, mere naam ki, aur kaafi
achchha 'response' milta hai. aur 'world tours' mein US kai baar,
1997 se har saal kahin na kahin jaana hota hi hai, America, Europe
mein har jagah, West Indies, Dubai, Muscat, East Asia, kaafi jagah,
jahaan jahaan Indians baste hain, jahaan jahaan 'shows' hote hain
wahaan wahaan gayi hoon main.

MS: itni chhoTi umra mein duniyabhar ki sair karna kaisa 'experience'
hai aur koi Khaas 'experience' kahin kisi desh ka ho to bataaiye.

SP: meri 'hobbies' mein hai ghoomna, 'again' shaayad main 'traveller'
hoti

MS: agar 'singer' naheen hoti (laughs)

SP: (laughs) mujhe pataa chal gaya is 'show' mein main kya hoti,
mujhe bahut shauk hai ghoomne phirne ka, nayi nayi jagah 'explore'
karne ka, to 'shows' mein, is 'line' mein yahi 'plus point' hai ki
aap 'shows' ke liye nayi nayi jagah jaate hain, aur aap ko pataa
chalta hai wahaan kaisa 'culture' hai, kya khaana hai, kaise log
rehte hain, 'climate' kya hai, to main bahut 'enjoy' karti hoon,
chaahe woh, 'out of India' hi naheen, 'out of Mumbai' bhi jaana ho to
main bahut shauk se jaati hoon.

---------------------------------------------------
Song: pyar mein sau uljhane hain (Kyun Ho Gaya Na!)
---------------------------------------------------

MS: bahut achchha lagaa Sneha, bahut achchha aapne gaaya is
poori 'interview' ke dauraan, poori baatchit ke dauraan, bahut
achchhi baaten huyi, bahut bahut shukriyaa aapka.

SP: mujhe bhi bahut achchha lagaa, 'thank you very much'.

THE END