sabhi fauji bhaaiyon ko Sadhna Sargam ka namaskaar! aaj
is 'programme' ke zariye aap se mulaaqaat ho rahi hai, ham aamne
saamne naheen hain lekin meri aawaaz aap tak pahunch rahi hai,
isliye mujhe baDi Khushi ho rahi hai. har insaan kaam karta hai,
mehnat karta hai, sangharsh karta hai jeevan mein, lekin aap ka jo
kaam hai woh bahut hi mushkil hai. aap ka dushmano ke saath jo
sangharsh hota hai woh bahut kaThin hai. aap apni jaan ki baazi
lagaake hamein sukoon dete hain. aapke liye hamaare dil mein bahut,
bahut hi izzat hai, aapki zindaadilee aur bahaaduri ko main praNaam
karti hoon. to aaiye sabse pehle main aapko sunaana chaahti hoon
film Jo Jeeta Wohi Sikandar ka gaana, "pehla nashaa pehla Khumaar"

Song: pehla nashaa pehla Khumaar (Jo Jeeta Wohi Sikandar)


ab jo gaana main sunaanewaali hoon woh hai film Saathiya se. bahut
Khoobsoorat film bani thi, logon ne bahut pasand kee thi, aur is
film mein maine jo gaana gaaya hai usey likha hai Gulzar saahab ne,
aur sangeetbaddh kiya hai A R Rahman saahab ne. mujhe yeh gaana
bahut achchha lagta hai, mujhe is gaane ke liye Screen Award mila
tha. jab kisi achchhe gaane ke liye 'award' milta hai aur log pasand
karte hain to bahut Khushi hoti hai. to leejiye suniye yeh
gaana "chupke se chupke se".

Song: chupke se lag jaa gale raat ki chaadar tale (Saathiya)


fauji bhaaiyon, mujhe sachmuch bahut Khushi ho rahi hai ki main aap
se baat kar rahi hoon, meri aawaaz aap sun rahe hain, mere gaane aap
sunenge, yeh gaana hai film Hungama ka, "chain aapko milaa mujhe to
beKhudi mili", aur maine aur Shaan ne gaaya hai isey film mein. aur
mujhe mazaa isliye aata hai (laughs) sunne mein kyunki main aur
Shaan gaa rahe hain film mein, aise 'picturise' huya hai, 'party'
mein gaa rahe hain, aap ne shaayad yeh film dekhi hogi, gaana bhi
dekha hoga, aur pehli baar mujhe is tarah se film mein, parde mein
aane ka mauka mila. peechhe to gaane gaate rehte hain 'playback
singers' ki tarah, lekin jaise 'screen' pe apne aap ko dekhte hain,
to bahut achchha lagta hai. to yeh gaana aap suniye.

Song: chain aapko milaa mujhe to beKhudi mili (Hungama)


kuchh gaane aise hote hain jinse bahut achchha 'atmosphere', jinko
sunne se bahut achchha 'atmosphere create' hota hai. film Sapney ka
gaana suniye, yeh gaana hai "chanda re chanda re", jaise aasmaan
mein chaand nikal aaya ho aur koi baat kar raha ho ki 'chanda re,
kabhi to zameen par aa'. yeh gaana maine Tamil mein bhi gaaya tha
aur Hindi mein bhi gaaya hai. aur Tamil mein 'chanda' ko shaayad
kuchh 'vennilve' kehte hain, (sings) "vennilve vennilve kabhi to
zameen par aa"

Song: chanda re kabhi to zameen par aa (Sapney)


fauji bhaaiyon, aap se main yeh kehna chaahti hoon ki hameshaa aapke
baare mein main sochti hoon ki lagta hai ki kitne mushkilon ka
saamna aap karte hain. ham yahaan sukoon se baiThe rahen, ham apna
kaam aaraam se karte hain, ham gaana gaate hain, lekin wahaan aap
laDaai laDte hain, aap bilkul aaraam naheen karte hain, aur jis
tarah ki museebaton ka saamna aap karte honge, aap hi ko maaloom
hai, uska andaaza shaayad ham yahaan baiThke naheen lagaa sakte.
phir bhi, jo bhi, mujhse agar ho sakta hai, to main zaroor karna
chaahoongi aapke liye. kuchh naheen to agar mere gaano se hi aapko
achchha lagta hai to, kuchh palon ke liye aap khush hote hain to yeh
mere liye bahut baDi baat hogi. ab film ishwatma ka ek gaana sunaana
chaahti hoon, "saat samundar paar main tere peechhe peechhe aa
gayi". jab ham saat samundar paar jaate hain na, pardes
mein 'programme' karne ke liye, tab yeh gaana gaate hain to aur
mazaa aata hai.

Song: saat samundar paar main tere peechhe (Vishwatma)


main kahin baahar gayi thi, matlab 'out of India', wahaan aisa huya
ki ek pati-patni, ek 'couple' aaye huye the, unko kuchh 'problems'
the. main chal rahi thi, to unhone baad mein aakar mujhe yeh bataaya
ki 'aapka yeh gaana sunaa aur is gaane ke jo shabd hain, yeh jis
tarah se aapne gaaya aur jaisa Khoobsoorat gaana banaaya hai Rajesh
Roshan-ji ne, to yeh gaana sunke ham dono ne phir se sochaa
aur 'patch-up' kiya', aur mujhe lagta hai ki yeh to bahut baDi
kaamyaabi hai is gaane ki aur aapko bhi yeh gaana isliye sunaana
chaahti hoon kyunki yeh gaana aapko pasand to aayega hi, lekin agar
aapke ghar mein kisi ki 'wedding anniversary' hai, to aapke liye yeh
gaana pesh hai, (sings) "jab koi baat bigaD jaaye, jab koi mushkil
paD jaaye, tum dena saath mera o hamnawaaz"

Song: jab koi baat bigaD jaaye (Jurm)


ab chalte chalte main aapko gaana sunaana chaahoongi jisse bahut
achchha 'mood' ho jaaye aapka, masti se aap log bhar jaayen, film
Kal Ho Na Ho ka yeh gaana hai, (sings) "'thats the way' maahi ve".
yeh gaana suniye, lekin isse pehle main aapse do baaten kehna
chaahti hoon, ki mujhe to lagta hai ki aapko yeh gaane pasand aaye
honge, meri Dher saari shubhkaamnaayen aapke saath hai, balki ham
sab bhaaratvaasi aapke saath hain, bhaarat ke sabhi sainikon ko meri
antaraatma se namaskaar, aur main eeshwar se praarthana karti hoon
ki aap hamesha har kaam mein kaamyaab hon, eeshwar aapke aur aapke
parivaar ke saath rahe, aur dubaara aapki sevaa mein haazir hone ka
mujhe mauka mile, Jai Hind!

Song: 'thats the way' maahi ve (Kal Ho Na Ho)

THE END