From: santosh kumar <surhall123@...>
Subject: Re: [vividhbharati] Ameen Sayani's SKSKM - Farooq Qaiser
To: vividhbharati@...
Date: Thursday, 12 February, 2009, 1:06 PM

hi        u have  mp 3 this   thanks --- On Thu, 2/12/09, soojoi_india <soojoi_india@ yahoo.co. in> wrote: From: soojoi_india <soojoi_india@ yahoo.co. in> Subject: [vividhbharati] Ameen Sayani's SKSKM - Farooq Qaiser To: vividhbharati@ yahoogroups. co.in Date: Thursday, February 12, 2009, 7:17 PM SANGEET KE SITAARON KI MEHFIL AMEEN SAYANI'S PROGRAMME ON FAROOQ QAISER ------------ --------- --------- --------- -- ************ ********* ********* ********* ** FQ: Farooq Qaiser AS: Ameen Sayani Sangeet Ke Sitaaron Ki Mehfil ke sunnewaalon ki Khidmat mein Ameen Sayani ka aadaab. bahenon aur bhaaiyon, aaj main aapke liye do aise shaayaron ke qalaam ki Khushboo le aaya hoon jinhone hamein kai geeton ke guldaste pesh keeye, aur phir is duniya se munh moDkar chale gaye. inmein se ek the woh jinka inteqaal huya tha san 1987 mein, 10 November ke din. ab isse pehle ki main inka naam aapko bataayun, inka likha huya ek baDaa hi mashoor geet pesh karta hoon aapke liye, Lata Mangeshkar ki aawaaz thi, suron ki kirNen bikherti huyi sangeetkaar Roshan ki dhun thi, aur film ka naam tha Aji Bas Shukriya. suniye kareeb kareeb poora geet aur yaad keejiye apne mohabbat ki sulagti huyi raaton ko! ------------ --------- --------- --------- --------- --------- - Song: saari saari raat teri yaad sataaye (Aji Bas Shukriya) ------------ --------- --------- --------- --------- --------- - hamaare sunnewaalon mein jo bhaavuk sangeetpremee hain unhe san '58 ke is geet ne zaroor taDpaa diya hoga! Aji Bas Shukriya ka geet, geet to aapko yaad hi hai, aur shaayad Geeta Bali bhi yaad hai jinhone shaayad is geet ko 'screen' par gaaya tha, maine film dekhee naheen thi lekin wohi theen 'heroine' us film ki, magar kya shaayar ka naam bhi yaad hai aapko? chaliye main hi aapko bataa detaa hoon, woh shaayar the Farooq Qaiser! wohi Farooq Qaiser jo aaj tak apne geeton ke sahaare aapke dil mein base huye hain! ------------ --------- --------- --------- --------- - Song: tumko piya dil diya kitne naaz se (Shikari) ------------ --------- --------- --------- --------- - do sureelee Mangeshkar bahenon ne gaaya tha Farooq Qaiser saahab ka likha huya yeh gaana, G S Kohli saahab ne dhun banaaee thi film Shikari ke liye. aise aise kai laajawaab geeton ko apne shabdon se sanwaaraa tha Farooq Qaiser saahab ne. lekin mujhe afsos hai bahenon aur bhaaiyon ki mujhe unki zindagi aur safar ke baare mein main zyaadaa maaloomaat haasil naheen kar paaya, haan, ek baar unka ek 'interview' zaroor liya tha maine jismein unhone apne teen saathiyon ke baare mein kahaa tha, magar woh saathi koi insaan naheen the, woh teen saathi kaun the yeh aap abhi sunenge Farooq Qaiser saahab ke baDe shaayaraana aur jazbaati 'style' ke 'interview' mein. achchha to jab maine us 'interview' mein unse darKhwaast kee ki bataaiye kaun hain aapke teen kareebee saathi to woh bole: ************ ********* ********* *** FQ: bahut teDhaa sawaal hai AS: achchha, woh kyun bhai? FQ: isliye kyunki mere saathiyon ko na dekha jaa sakta hai, na sunaa jaa sakta hai, sirf aur sirf mehsoos kiya jaa sakta hai. AS: aise kaun se saathi hain aapke zaraa ham bhi to sune! FQ: Ameen saahab, dil thaam ke suniye, hausla hai, lagan hai, aur Khuloos, zindagi ke yeh teen saathi hain, kaT raha hai baDe maze mein safar, main hoon aur yeh haseen saathi hain. AS: waah, aapke yeh haseen saathi to baDe niraale nikle Farooq saahab! achchha, to ab hamaare sunnewaalon ko in saathiyon ke baare mein kuchh batlaa bhi deejiye Farooq saahab! FQ: zaroor bataayunga, baDi Khushi se bataayunga, mera pehla saathi hai Khuloos, 'sincerity', aap isey sachchaai bhi keh sakte hain. aur Ameen saahab, ab tak main ise talaash kar raha hoon AS: o ho ho, Farooq saahab, to yeh Khuloos, yeh sachchaai ab tak aapko mili hi naheen? FQ: aap milne ki baat karte hain, ab tak kahin dikhaaee bhi naheen dee. AS: yaani ki apne aap mein bhi naheen mili? FQ: kya bataayun, duniya se suna hai hamne yahi, ek haath se taali bajti naheen AS: hmmmmm, Farooq saahab, yeh duniyadaari ki baat to aap ne baDe shaayaraana andaaz se keh Daali. FQ: isliye ki mujhe sher kehne ka marz hai AS: kya main yeh poochh sakta hoon ki aapko yeh marz kab lagaa? FQ: yeh samajh leejiye ki mera mizaaj laDakpan se shaayaraaana hai AS: achchha achchha FQ: yaani 'school' baad mein, shaayari pehli shuru kari, isliye aaj tak achchhe shaayar na ban sake AS: kya baat kar rahe hain Farooq saahab, aap to bahut hi achchhe shaayar hain aur filmon ke liye bhi aapne baDe achchhe achchhe gaane likhe FQ: aji Ameen saahab, jab doodh bigaDta hai to dahi banta hai aur mere jaisa shaayar bigaDta hai to 'song writer' ban jaata hai, (AS laughs) AS: achchha Farooq saahab, to yeh bataaiye ki aap bigDe kaise? FQ: baap re baap yeh mat poochhiye, Ameen saahab, aaj tak main isi din ko filmi duniya mein DhoonD raha hoon, pataa naheen kab mile, kahaan mile! AS: ghabraaiye naheen Farooq saahab, ek na ek din to zaroor mil jaayega aapko. FQ: jee haan, main poori lagan ke saath isey DhoonD raha hoon. ************ ********* ********* *** bahenon aur bhaaiyon yaad hai na aapko, lagan hi ko Qaiser saahab ne apna doosra saathi qaraar diya tha, woh saathi to abhi aayega, tak tak aap miliye Farooq saahab ke ek aur mashoor geet se. kya aap jaante hain bahenon aur bhaaiyon, Laxmikant Pyarelal ki pehli film Parasmani ke do geet Farooq Qaiser saahab hi ne likhe the, unhi mein se ek suniye ab. ------------ --------- --------- --------- ---- Song: chori chori jo tumse mili (Parasmani) ------------ --------- --------- --------- ---- bahut dinon se aapne naheen suna tha na Faqrooq Qaiser saahab ka likha yeh geet! to sunte jaaiye, aage chalkar aur bhi achchchhe geet aapke saamne aanewaale hain, magar pehle mere us puraane 'interview' se suniye Farooq Qaiser saahab ka baDaa anokha bayaan apne doosre saathi ke baare mein, yaani lagan: ************ ********* ********* **** FQ: jee haan, isne har qadam pe mera saath diya hai aur de raha hai. isi lagan ke agan ne zindagi ke bahut se andhere ko door kar diya hai kisi hadh tak. AS: achchha, to duya karta hoon Farooq saahab ki hamesha aap is lagan mein magan rahen! FQ: jee haan, isi lagan ke sahaare chalaa jaa raha hoon, dekhen manzil kab milti hai! AS: lekin aapne manzil ko to chhoo liya hai Farooq saahab, aap to 'song-writer' ban chuke hain! FQ: lekin abhi 'director' banna baaqi hai AS: 'director' banna chaahte hain aap? FQ: jee haan AS: 'very good very good', yaani manzil abhi baaqi hai FQ: jee naheen, yeh mera aaKhri 'junction' hai AS: Khudaa kare aap apne aaKhri 'junction' par bhi jaldi pahunch jaayen FQ: lekin Ameen saahab, aage bahut baDe baDe 'signal' hain, aur main qaanoon pasand aadmi hoon aur main 'signal' toDkar aage baDhna naheen chaahta chaahe dil hi TooT jaaye! AS: Farooq saahab, aap to shaayar hai, agar dil TooT jaaaye to achchha sa dard bharaa koi geet likh lenge! ************ ********* ********* *** bhai, Farooq Qaiser saahab ke 'director' banne ki lagan to kabhi poori naheen huyi, lekin geetkaar ki haisiyat se unki shohrat baDhti hi chali gayi, baDhti hi chali gayi, aur unke geeton se shaayari ki shaayakeen ke dil jhoomte hi rahe. ------------ --------- --------- --------- --------- Song: dil looTnewaale jaadugar ab maine (Madari) ------------ --------- --------- --------- --------- film Madari ka tha yeh geet jise Farooq Qaiser ne likha tha Kalyanji Anandji ke dhun par. doston, Sangeet Ke Sitaaron Ki Mehfil mein aaj do mashoor geetkaaron ka zikr hai, jinmein se ek ka is samay ham zikr kar rahe hain, Farooq Qaiser saahab. achchha, Geet-Kosh mein maine jab inke geet DhoonDne shuru keeye na aaj ke is 'programme' ke liye, to pataa chalaa ki Aji Bas Shukriya se pehle bhi baDE hi pur-asar geet likh chuke the, jaise ki 1951 mein aayi film Simba ke liye, 1953 ki film Malika Salomi ke liye, aur 1955 ki film Sakhi Lutera mein bhi Farooq Qaiser saahab ke baDe sureele geet the saahab! Farooq Qaiser ne to waise kai filmon mein geet likhe, lekin ek film jiske kareeb kareeb sabhi geet behad 'hit' huye the, woh film thi Shikari, jismein kul chaar geet Farooq Qaiser saahab ke likhe huye the. inmein se ek geeto sun hi chuke hain aaj, baaki do ki main yahaan jhalken pesh karta hoon aur ek geet poora pesh karoonga. ------------ --------- --------- --------- -------- Song: maangee hai duyaaen hamne sanam (Shikari) ------------ --------- --------- --------- -------- is geet ko Asha aur Usha ne gaaya tha, aur Shikari ke do geeton mein Lata aur Rafi ki joDee thi. ------------ --------- --------- --------- -------- Song: agar main poochhoon jawaab doge (Shikari) ------------ --------- --------- --------- -------- bahenon aur bhaaiyon, main aapko bataa hi chuka hoon ki film Shikari ke sangeetkaar the G S Kohli. agar kabhi mauka mila to un par bhi ek 'programme' pesh karoonga. G S ohli ke sangeet mein ab Shikari ka woh geet suniye jo aajkal ke baDi umra ke logon ne apni jawaani mein gaaya hogaa. ------------ --------- --------- --------- --------- - Song: chaman ke phool bhi tujhko gulaab (Shikari) ------------ --------- --------- --------- --------- - aur ab us puraane sawaal aur jawaab par aa jaaiye jo mere puraane 'interview' mein shaamil tha. sawaal mera usmein yeh tha ki 'Farooq Qaiser saahab, aapne farmaaya tha ki aapka teesra jo saathi hai uska naam hai hausla, to hausle ke baare mein kuchh bataayenge aap?' aur unka jawaab tha: ************ ********* ******* FQ: Ameen saahab, yeh hausla hi hai jo insaan ko apni manzil tak pahunchaata hai. yeh woh hausla hai jo andhere mein kirN ejagmagaata hai. yehi woh hausla hai jo dil toDnewaale haalaat mein har shaKhs ka saathi hai, madadgaar hai AS: jee FQ: aur mere is hausle ko baDhaaya hai ek shaKhs ne AS: kaun hai woh? FQ: woh hain mere dost, mausiqaar O P Nayyar saahab. AS: achchha, O P Nayyar saahab? FQ: jee haan, woh mere dost hi naheen bahut kuchh hain. main unki baDi qadr karta hoon kyunki Ameen saahab, mujhe unse milkar zindagi ka ek naya andaaz mila hai. Nayyar saahab ke baare mein mera Khayaan hai ki yeh jitne achchhe sangeetkaar hain utne hi achchhe insaan bhi. AS: Farooq saahab, aap Nayyar saahab se bahut mutaasir maaloom hote hain FQ: jee haan, unke saath kaam karke mujhe ruhaani sukoon milta hai, woh geet ke har bol mein jaan Daal dete hain, aur Ameen saahab yeh mera hi naheen, sunnewaalon ka bhi Khayaal hai. AS: achchha Farooq saahab, ab aap O P Nayyar ka koi aisa geet bajwaa deejiye jismein Nayyar saahab ke sangeet ka jaadoo hai. FQ: isse pehle to main apne saathiyon ke liye apna hi geet bajaa chuka hoon, is baar main Ahmed Wasee saahab ka geet bajaana chaahta hoon jo unhone Pran Jaaye Par Vachan Na Jaaye ke liye likha hai aur uski Khoobsoorat dhun banaaee hai O P Nayyar saahab ne, suniye ************ ********* ******* ------------ --------- --------- --------- --------- --------- - Song: aa ke dard jawaan hai (Pran Jaaye Par Vachan Na Jaaye) ------------ --------- --------- --------- --------- --------- - zara dil dekhiye shaayar ka ki apne sabse kareebee dost sangeetkaar ke liye Farooq saahab ne geet bajaaya woh jo kisi aur shaayar ka likha huya tha, haalaanki do puraani filmon mein Farooq saahab ne likhe the geet O P Nayyar ke liye, 1971 mein Aisa Bhi Hota Hai film mein aur 1973 mein bani Ashok Kumar ki woh puraani film Taxi Driver mein. woh gaane mere paas naheen hai bahenon aur bhaaiyon, warnaa main aapko zaroor sunwaa detaa. baharhaal phir main Farooq Qaisers saahab se us 'interview' mein kahaa ki 'ab aap O P Nayyar ke alaawaa aur logon ke baare mein bataana chaahenge?' ************ ********* ********* *** FQ: main apne un doston ke naam bhi bataana chaahta hoon jinke saath maine kaam kiya hai. mere yeh dost do hisson mein baTe huye hain. maine Roshan, Chitragupt, Kalyanji Anandji, Shankar Jaikishan, Laxmikant Pyarelal, Lala Sattar, Iqbal Qureshi jaise sangeetkaaron ke saath kaam kiya hai. AS: haan to Farooq saahab, yeh to rahe woh log jinka taalluKh aapke geeton ke saath raha hai, lekin aapka jo 'junction' hai 'film direction', us 'field' mein bhi aapke bahut saare ost honge! FQ: jee haan, zaroor zaroor, unke bhi naam bataayunga. maine Mohd Hussain saahab ke saath kaam shuru kiya tha, phir Lekh Tandon saahab ke saath bhi kaam kiya hai, aur aajkal Raj Khosla saahab ke saath bhi kaam kar raha hoon. apne in doston ko yaad karte huye ek ajeeb si qaifiyat ko mehsoos kar raha hoon. ummeed karta hoon ki mere yeh dost kisi din mere saathi ban jaayenge. ************ ********* ********* ****** bas ab ek aur geet aapko sunwaakar ham marhoom Farooq Qaiser ki shaayaraana raahon ko chhoDkar muDnewaale hain aaj ke doosre shaayar ki taraf, aur isi muDne par samajh leejiye ki Farooq Qaiser saahab ka ek baDa hi pur-asar geet hamse yeh keh raha hai... ------------ --------- --------- --------- -------- Song: zid na karo ab to ruko (Lahoo ke Do Rang) ------------ --------- --------- --------- -------- THE END Audio Courtesy: N Ramaswamy