VBLC SANGEET KE SITAARE
-----------------------

EPISODE 18: SHIVRAM KRISHNA (PT SHIVRAM)
----------------------------------------

namaskaar, VBLC Sangeet Ke Sitaare ke ek aur sureele ank ke saath ham haazir
hain. guzre zamaane ke bhoole bisre aur kamcharchit sangeet sitaaron ko yaad
karne ki paramparaa kaa naam hai VBLC Sangeet Ke Sitaare. yeh woh sitaare hain
doston, jinki mand mand roshni se chamak rahaa hai film sangeet sansaar, lekin
aaj ki bhaag dauD bhari zindagi mein ham bahut kam yaad karte hain inhe. aur yeh
kaaryakram ek chhoTi si koshish hai in kalaakaaron ki yaadon ko ek baar phir se
taazaa karne ka. aaj ke is ank mein hai ek bhoole bisre lekin anokhe sangeetkaar
ki kahaani. raajasthaan ki dharti par janme is anokhe sangeetkaar ke naam kaa
aap Khud hi andaazaa lagaaiye raajasthaan ke hi lok dhun par banaaye huye unke
is geet ko sunkar.

-----------------------------------------------------------
Clip: khamma khamma o rama ruNiche ra dhaNiya (Baba Ramdeo)
-----------------------------------------------------------

yeh tha 1963 ki Maarwaarhi film Baba Ramdeo ka geet Mahendra Kapoor ki aawaaz
mein. Rajasthan ke mahaan sant Baba Ramdeoji ki kahaani par aadhaarit is film ke
sangeetkaar hain hamaare aaj ke VBLC Sangeet Ke Sitaare. isse pehle ki ham unkaa
parichay aapko den, suniye isi Rajasthani geet ki dhun par aadhaarit is
sangeetkaar ka banaaya yeh Hindi geet Suman Kalyanpur ki aawaaz mein. Bharat
Vyas ka geet hai aur film ka naam hai Kan Kan Mein Bhagwaan.

------------------------------------------------------------------
Song: apne piya ki main to bani re joganiya (Kan Kan Mein Bhagwan)
------------------------------------------------------------------

ab tak aap ne zaroor anumaan lagaa liyaa hogaa doston, us sangeetkaar kaa
jinhone is mashahoor geet ka sangeet tayyaar kiyaa tha. jee haan, hamaare aaj ke
VBLC Sangeet Ke Sitaare hain sangeetkaar Shivram Krishna, jinhe aap Pandit
Shivram ke naam se bhi jaante hain.

---------------------------------------------------
Song: tumse hai pyaar mujhe (Teen Batti Char Raste)
---------------------------------------------------

aur hamein pyaar hai guzre zamaane ke aise sureele sumadhur geeton se jo aaj bhi
hamaare dilon ko behlaate hain, hamein pyaar karna sikhaate hain. Pandit Shivram
Krishna kaa Hindi film sangeet sansaar mein Talat Mahmood ke gaaye huye isi geet
ke saath padaarpaN huyaa tha san 1953 mein. yeh film thi V Shantaram ke Rajkamal
Kalamandir ke 'banner' tale bani Teen Batti Char Raste. isse pehle Rajkamal ki
filmon mein zyaadaatar Vasant Desai ka sangeet huya karta tha. do ek filmon mein
C Ramchandra aur Purushottam ka bhi sangeet raha hai. lekin 1953 mein
Shantaramji ne apne is 'banner' mein do filmen banaayi aur in dono filmon ke
sangeet ke liye unhone chunaa Pandit Shivram Krishna ka naam. inmein se ek film
to thi Teen Batti Char Raste, lekin kya aapko doosri film ka bhi naam pataa hai?
doosri film thi Surang. sunte hain isi film se Manna Dey ka gaaya huya ek geet,
jise likha hai geetkaar Shewan Rizvi ne.

-------------------------------------------------------
Song: chal ae dil majboor is zulm ki duniya se (Surang)
-------------------------------------------------------

Pandit Shivram Krishna ka janm 22 March 1927 ko Rajasthan ke Jodhpur mein huya
tha. unkaa sangeet yaatraa 16 varsh ki aayu mein shuru huyi jab Jodhpur ke
raajkumaar Umed Singh ke darbaar mein unhe sangeetkaar ki naukari milee. uske
baad woh Lahore chale gaye aur wahaan par Pandit Amarnath aur Master Ghulam
Haider jaise diggaj sangeetkaaron ki chhatra-chhaayaa mein kaam karne lage. desh
ke baTwaare ke baad woh bhaarat waapas chale aaye aur Lucknow mein HMV ke liye
kaam karte rahe. yeh baat hai san 1948 se 1950 ke beech ki. filmon mein
swatantra sangeetkaar banne ki chaah dil mein liye woh aaKhirkaar Mumbai pahunch
hi gaye 1951 mein. V Shantaram ki paarkhi nazaron ne heeraa pehchaan liyaa aur
is tarah se Shivram Krishna ka film sangeet sansaar mein bataur swatantra
sangeetkaar swaagat huyaa 1953 ki film Teen Batti Char Raste aur Surang mein. V
Shantaram ki in dono hi filmon ne 'Silver Jubilee' manaaee, aur Shivram Krishna
ko bhi sangeetkaar ke roop mein khyaati milee, aur unka man bhi Khushi se naach
uThaa kuchh unke hi sangeetbaddha kiye huye Teen Batti Char Raste film ke is
geet ki tarah...

------------------------------------------------------------
Song: naach mere man naach Khushi se (Teen Batti Char Raste)
------------------------------------------------------------

Talat Mahmood ki aawaaz mein yeh geet tha. doston, Teen Batti Char Raste ke
mukhya kalaakaar the Karan Dewan aur Sandhya, tathaa Surang ke kalaakaar the
Vinod Kumar aur Sheela Ramani. in dono filmon mein Pandit Shivram krishna ke
sangeet nirdeshan mein Lata Mangeshkar ne bhi kai Khoobsoorat geet gaaye the. to
kyun na agle film ki or baDhne se pehle jaldi jaldi Lataji ke gaaye in dono
filmon ke kuchh sumadhur geeton ki jhalakiyaan yahaan pesh kar diyaa jaaye!
suniye...

------------------------------------------
Clip: chhalken na Gham ke pyaale (Surang)
Clip: gehri gehri nadiya mein (Surang)
Clip: guzaari thi raat aadhi (Surang)
Clip: kitna meeThaa hota hai (TBCR)
Clip: apni ada par main hoon nisaar (TBCR)
Clip: koi hamko na dekhe (TBCR)
------------------------------------------

apni shuruwaati do filmon ki safalta ke baad Shivram Krishna ko 1955 mein
sangeet dene ke liye do filmen milee - Oonchi Haveli aur Raftar. Oonchi Haveli
Dhirubhai Desai ki film thi jisme mukhya bhoomikaaon mein the Karan Dewan aur
Nirupa Roy. is film ne swarna jayanti manaee. is film mein Bharat Vyas ke likhe
aur Mohd Rafi ke gaaye ek geet ne Pt Shivram ka naam phir se charcha mein le
aayaa. "daulat ke jhooThe nashe mein ho choor, Gareebon ki duniya se rehte ho
door, aji ek din aisa aayega jab maaTi mein sab mil jaayega, maaTi hi oDhan
maaTi bichhaavan maaTi ka tan ban jaayega jab maaTi mein sab mil jaayega".
Pandit Shivram Krishna ne bhi kabhi paison aur shoharat ke nashe mein aakar apni
kalaa ke saath samjhautaa naheen kiya, aur kyaa pataa shaayad yahi wajah rahi ho
unke film sangeet sansaar mein kamcharchit reh jaane ki. Khair, leejiye suniye
Oonchi Haveli film ka yeh mashahoor geet Rafi saahab ke swar mein.

-----------------------------------------------------------
Song: daulat ke jhooThe nashe mein ho choor (Oonchi Haveli)
-----------------------------------------------------------


doston, VBLC Sangeet Ke Sitaare ki pichhli hi kaDee mein hamne aapko geetkaar
aur filmkaar Nakshab Jarachavi se milwaaya tha. aapko shaayad hogaa ki 1955 mein
Nakshab saahab ne Talat Mahmood aur Nadira ko lekar ek film banaaee thi Raftar.
is film mein sangeet dene ke liye Nakshab saahab ne nyotaa diyaa tha Shivram
Krishna ko, aur Shivram ne is nyote kaa shat pratishat maan rakhaa. kehne ka
matlab yeh hai ki film Raftar ke gaane bahut pasand kiye gaye. zaahir si baat
hai ki Talat Mahmood ne is film mein bahut se gaane gaaye honge! "kya karoon
seene mein hook uThti hai ghabraata hai dil, laakh behlaata hoon behlaaya naheen
jaata hai dil", "sahaara koi mil jaata to kab ke ham sambhal jaate, ke jis
saanche mein dil kehta usi saanche mein Dhal jaate", aur "tumhe maine chaaha
baDi choT khaayi, mohabbat mein kya yeh haalat banaayee", yeh sabhi gaane Talat
Mahmood ke ekal swar mein the, aur AsSha Bhosle ke saath bhi inka gaaya huya ek
geet tha is film mein "mohabbat mein jeena hai toofan mein jeena".

--------------------------------------------------------
Song: mohabbat mein jeena hai toofan mein jeena (Raftar)
--------------------------------------------------------

is waqt aap ne 'tune' kiyaa hai VBLC Sangeet Ke Sitaare, jismein hamaare aaj ke
sitaare hain guzre zamaane ke sangeetkaar Pandit Shivram Krishna.

-----------------------------------------------------------
Song: aaj kyun na karoon bhagya par abhimaan (Sati Anusuya)
-----------------------------------------------------------

Asha Bhosle ki aawaaz mein aap sun rahe the 1956 ki film Sati Anusuya ka geet.
geetkaar the Bharat Vyas. Shivram Krishna ke sangeet se sajee Sati Anusuya unki
pehli dhaarmik film thi. ek dhaarmik film hote huye bhi is film ne swarnajayanti
manaaee aur Pt Shivram Krishna ka naam pauraaNik aur dhaarmik filmon ke safal
sangeetkaaron mein shumaar ho gayaa. lekin doston, haqeeqat utna sukhad naheen
thaa. bhale hi Sati Anusuya film 'hit' rahi, lekin hamaari 'film industry' ka ek
baDaa dardnaak pehlu yeh bhi raha hai ki yeh bahut jaldi kisi kalaakaar ko
'type-cast' kar detaa hai. Pandit Shivram ke saath bhi yahi huya. ek baar kisi
pauraaNik film mein unhone sangeet kya de diya ki un par jaise ek Thappaa sa lag
gaya pauraaNik filmon ke sangeetkaar hone ka. nateejaa yeh ki unhe baDe
'banners' ke lokapriya saamaajik filmon mein sangeet dene ka avsar kabhi naheen
mil paayaa aur unki pratibhaa dhaarmik filmon ke khaanche mein qaid hokar reh
gayi.

-------------------------------------------------------------
Song: jab kailaash shikhar par shankar baiThe (Gauri Shankar)
-------------------------------------------------------------

1958 mein Gauri Shankar aur isi saal sangeetkaar Narayan ke saath unhone film
Naya Kadam mein sangeet diya tha. Pandit Shivram Krishna sangeet ke achchhe
jaankaaron mein se the. is baat ka pramaaN hai unke filmi gaano mein shaastriya
sangeet aur sugam sangeet ka sumadhur samaavesh. woh na keval ek achchhe
sangeetkaar the balki ek achchhe gaayak aur 'hamonium' vaadak bhi the. 1960 mein
V Shantaram ne ek baar phir se Shivram ko nimantraN diya apni film Phool Aur
Kaliyan tathaa Kaale Gore mein sangeet dene ka. Kaale Gore ke sangeet ke liye
Shivram Krishna ko pradhaan mantri kaa swarNa padak bhi milaa thaa. 1960 mein hi
Rangeela Raja aur Shravan Kumar jaisi filmen bhi aayeen, aur 1962 mein aayi
Durga Pooja. in sabhi filmon mein Shivram Krishna ka sangeet uchcha koTi ka to
tha, lekin dhaarmik filmon ka sangeet utna naheen chalta hai hamaare yahaan
jitna ki doosre saamaajik filmon kaa. aur yahi wajah hai ki unke rache in filmon
ka sangeet bhi aaj kahin kho saa gaya hai. 1963 mein Pandit Shivram ke sangeet
se sajee film Kan Kan Mein Bhagwan ka zikr hamne kaaryakram ke bilkul shuru mein
hi kiya tha. is film mein Suman Kalyanpur, Manna Dey aur Mahendra Kapoor ne kai
sundar geet gaaye hain Bharat Vyas ke likhe huye. film ke saath saath iske gaane
bhi Khoob lokapriya huye the. suniye Mahendra Kapoor ki aawaaz mein is film ka
shirshak geet.

--------------------------------------------------
Song: kaN kaN mein bhagwaan (Kan Kan Mein Bhagwan)
--------------------------------------------------

Kan Kan Mein Bhagwaan Rajasthan ke mahaan sant Baba Ramdeoji ki kahaani par
aadhaarit tha. is film ka maarwaari mein bhi nirmaaN huya tha Baba Ramdeo ke
naam se, jismein bhi Shivram ka hi sangeet tha. lekin yeh unki pehli maarwaari
film naheen thi. aadarshlok krit pratham maarwaari film 'Baba Sari Ladli' mein
sangeet dene ka shrey bhi unhi ko hi jaata hai. yeh film bani thi san 1961 mein.
Hindi aur Maarwaari ke alaawaa Pt Shivram ne Haryanvi aur Punjabi filmon mein
bhi sangeet diya hai. waapas aate hain unki Hindi 'filmography' par. 1964 mein
unka sangeet raha film Mahasati Behula mein. 1965-66 ke do saal unke liye
achchha siddha huya jab unke sangeet nirdeshan mein teen filmen aayeen - Sati
Nari, Shri Ram Bharat Milap, aur Shankar Seeta Anusuya.

--------------------------------------------------------------
Song: he kirNon ke raja na karo savera (Shankar Seeta Anusuya)
--------------------------------------------------------------

Asha Bhosle ki aawaaz mein Kavi Pradeep ka likha yeh geet tha Shankar Seeta
Anusuya film ka. Shivram Krishna film dar film apni pratibha ke johar dikhaate
huye apna sureela safar tay karte jaa rahe the. inke athak parishram ka phal
rang laaya 1966 mein jab Mahendra Kapoor ke gaaye film Sati Nari ke geet "tum
naacho ras barse" ke liye unhe 'Swami Haridas Puraskaar' se sammaanit kiya gaya.
man praaN pulkit kar denewaala yeh geet bajaaye binaa is kaaryakram ko poora
naheen samjhaa jaa saktaa doston. suniye geetkaar Neeraj ki yeh rachanaa.

--------------------------------------
Song: tum naacho ras barse (Sati Nari)
--------------------------------------

aur film Shri Ram Bharap Milap ke to kya kehne. is film ke liye Pt Shivram ne
Mohd Rafi saahab ki aawaaz mein kuchh aise aise bhajan 'record' kiye jinhe
sunkar man pavitra ho jaata hai. bhaatri prem se ot-prot yeh bhajan aaj ke
samaaj mein bhi utna hi saarthak sthaan rakhta hai. "dekho re pehli baar meri
zindagaani phalee, bhagwaan ko karne paar bhagat ki naav chali", aur, "bolo
dishaaon bolo hawaaon tum ko bharat pukaare, koi bolo re kaun se ban mein base
mere raam pyaare", aur, "jagat mein hon raam bharat jaise bhaai".

-------------------------------------------------------------
Song: jagat mein hon Ram Bharat jaise bhai (Ram Bharat Milap)
-------------------------------------------------------------

1966 mein Veer Bajrang, 1967 mein Badrinath Yatra aur 1970 mein aayi Sampoorna
Teerth Yatra jo Pandit Shivram Krishna ke sangeet se sajee antim film thi. iske
das saal baad, 2 February 1980 ko Pt Shivram Krishna ka keval 53 varsh ki aayu
mein dehaavasaan ho gaya. unke paanch beTon mein Jugal Kishore aur Tilak Raj
sangeetkaar ke roop mein film sangeet ke maidaan par utare. Jugal Kishore ke
sangeet mein Lata-Rafi ka gaaya huya film Bheegi Palken ka woh mashahoor geet to
aapko yaad hai na!

----------------------------------------------
Clip: janam janam ka saath hai (Bheegi Palken)
----------------------------------------------

Shivram Krishna ke sabse chhoTe beTe Navindra Chandra ne bhi ek 'TV'
dhaaraavaahik 'Apnapan' mein sangeet diyaa hai. is tarah se unke beTon ne kuchh
hadh tak sangeet ki paramparaa ko jeevit rakhne ka prayaas kiya hai. Pandit
Shivram ka sangeet woh divya sangeet hai jise sunkar man pavitra ho jaata hai,
dil ko sukoon pradaan karti hai unka madhur sangeet. vishvaas naheen hota ki
aise sumadhur geeton ke sarjak itni jaldi is duniya se chale gaye. magar maaTi
ki is deh par kya bharosaa karna! manushya to apne karmon se avismaraNiya banta
hai. aur yeh kathan Pt Shivram Krishna par khara utarta hai. VBLC Sangeet Ke
Sitaare ki or se Pandit Shivram Krishna vinamra nama.

----------------------------------------------------
Clip: yeh zindagi hai chaar din ki (Badrinath Yatra)
----------------------------------------------------

References:

1. Obituary of Shivram Krishna, Listeners' Bulletin, Issue 41, 1980
2. 150 Music Directors, Yogesh Jadhav
3. www.hamaraforums.com
4. www.earthmusic.com
5. www.indianscreen.com

Special Help & Advice: N. Ramaswamy

THE END