AAJ KE MEHMAAN - PRAHLAD AGARWAL (NOTED FILM JOURNALIST)
--------------------------------------------------------

namaskaar, Aaj Ke Mehmaan, is kaaryakram mein ham aapki bhenT karwa rahe hain
Hindi filmon aur filmkaaron par niyameet roop se likhnewaale jaanemaane lekhak
Prahlad Agarwal se Yunus Khan ki sthal 'recording' par aadhaarit yeh baatchit.


PA: Prahlad Agarwal
YK: Yunus Khan


YK: Aaj Ke Mehmaan, is kaaryakram mein hamaare saath hain mashoor lekhak Prahlad
Agarwal. Prahlad-ji ki visheshagyataa filmon par likhne ki hai aur film sangeet
par unhone bahut kaam kiya, mujhe Shankar Shailendra par inke likhe kai lekh
yaad hai jo kai ptarikaaon mein chhape hain. Prahlad-ji, bataaiye ki bachpan
kahaan beeta aapka aur gaano ki jo lau hai, film sangeet ki jo lau hai woh kab
lagi aapko?

PA: dekhiye bachpan mera beeta Jabalpur mein. Jabalpur mein paida huya, Jabalpur
mein paDhaa, Jabalpur mein maine 7/8 saal naukri kee aur naukri karte huye
paDhaa.

YK: kis ilaake mein?

PA: maine MP Electrocity Board mein naukri kee, 'cleark' tha main wahaan par,
aur BA se leke MA tak waheen rehte huye, naukri karte huye paDhaa, aur yeh
vichitra baat thi ki main naukri karte huye paDhaa haalaanki mujhe aisa karne ki
zaroorat naheen thi. zaroorat isliye naheen thi kyunki mera parivaar, mere
sdaare bhaai bandhu, mera gharbaar, sab bahut saamarthavaan log hain, ek aise
parivaar se tha jahaan cinema dekhna bhi, yaa cinema ki baat karna bhi utna hi
gandaa samjhaa jaata tha jitna aapka vaishyaalay mein jaana. parantu main yeh
dekhta tha ki mere jitne baDe bhaai hain yaa chaachaa hain, maamaa hain, woh
saare cinema dekhte hain magar chhipke dekhte hain. mere paas paise naheen hote
the isliye main chhipke naheen dekh sakta tha. aur jis din se paise hone lage,
us din se main bhi chhipke dekhne lagaa.

YK: achchha! to chhip chhip ke kaun kaun si filmen dekhee aur kaun kaun si
Talkies mein gaye chhip chhip ke Jabalpur mein?

PA: main chhip chhip ke, maine sabse pehli film jo chhipke dekhee thi, woh thi
Anadi, woh 1959 mein maine dekhee thi aur us waqt main 11 saal ka tha, aur ek
doosri film jo mujhe yaad hai maine chhipke dekhee thi woh hai Pyasa.

YK: kya baat hai!

PA: yeh shaayad maine 60 yaa 61 mein dekhee thi. mere baDe bhaai mere saath
baiThe huye the aur 'interval' mein aise baiTha karte the ki koi dekh na le.
dekh lega to ghar mein shikaayat ho jaayegi. shikaayat ho jaayegi to yeh Theek
baat naheen hogi, bahut DaanT paDegi, maar-vaar bhi paD sakti thi, kyunki tab
tak main kamaata naheen tha. itne mein huya kya ki ham logon ne Gaur se jab
dekhaa to paaya ki Gyan Ranjan-ji bilkul saamne baiThe huye hain aur mere baDe
bhaaisaahab unke vidyaarthi the, main naheen.

YK: achchha

PA: woh G S College of Commerce mein paDhte the, to unhone dekha to unki to rooh
hi kaamp gayi, magar jab maine Gyan-ji ko dekhaa, kyunki tab tak main unki kai
kahaaniyaan paDh chuka tha, to mujhe aisa lagaa ki jo Galat kaam main kar raha
hoon, wohi Galat kaam yeh itna baDaa aadmi kar raha hai jisne Pitaa kahaani
likhee hai. to yeh koi Galat kaam naheen hai. aur jab maine Pyasa par poori ek
kitaab likhee, jo Megha Books se chhapee hai, to maine us kitaab ko Gyan
Ranjan-ji ko samarpit kiya. to Gyan-ji ne kahaa ki 'mujhe bahut achchha lagaa
ki...', maine kahaa 'yeh achchha lagne ki baat naheen hai, maine apna karz
utaara hai, mere man pe jo ek bhaari bojh tha ki main Galat kaam kar raha hoon,
woh utar gaya tha us din'.

YK: kyunki zikr Pyasa ka hai, to aap mera ishaara samajh hi rahe honge.

PA: Pyasa film ki gaano ki agar baat karen, to bahut bahut baar suni gayi hai,
"duniya agar mil bhi jaaye to kya hai", "jaane woh kaise log the jinke pyaar ko
pyaar milaa", aur bhi kai gaane hai usmein, "jaane kya tune kahee", aur ek
adbhut geet hai "aaj sajan mohe ang lagaalo". yeh main zaroor jaanta hoon ki yeh
geet sunkar ek adbhut sansaar aapke bheetar nirmit hota hai.

----------------------------------------
Song: aaj sajan mohe ang lagaalo (Pyasa)
----------------------------------------

YK: filmi geeton ke baare mein likhna, Hindi saahitya mein aur Hindi
patrakaarita mein, doin darje ka maana jaata hai, film patrakaarita ko bhi bahut
achchhi drishTi se naheen dekha jaata raha hai, jaisa ki aapne kahaa 'cinema
dekhna hi hamaare yahaan achchhi baat naheen thi'. aapne sangeet ke baare mein
kab likhna shuru kiya aur kab chhapna shuru kiya? logon ne kab isey sweekaarna
shuru kiya ki 'han, yeh bhi ek vidhaa ho sakti hai lekhan ki'?

PA: main naheen jaanta ki logon ne sweekaara yaa naheen sweekaara. magar chand
logon se milke mujhe aisa zaroor laga ki cinema ke jo geet hain, jise 'golden
era' kaha jaata hai, 40 se leke 60, 65, main thoDaa sa aur kheench dena chaahta
hoon, 70 tak bahut hi Khoobsoorat geet likhe gaye aur bahut hi Khoobsoorti se
unhe parde par bhi prastut kiya gaya. main bilkul is baare mein DriDh vishvaas
rakhta hoon ki kam se kam aadhi aisi Khoobsoorat filmen zaroor hain jo apne
sangeet ke kaaran hi aaj hamein yaad hain warnaa ham kabhi ka bhool chuke hote,
chaahe woh Nagin ho yaa Anarkali ho, aur to aur chhoD deejiye, Madhumati bhi
uske sangeet ke bina bilkul apaahij ho jaayegi...

YK: bahut sahi hai

PA:... yaddapi woh ek Khoobsoorat film hai aur bahut hi KHoobsoorti se banaaee
gayi film hai, parantu uski Khoobsoorti uske sangeet se hi nikharkar saamne aati
hai, yadi woh sangeet naheen hota to woh Khoobsoorti kabhi nikharkar saamne
naheen aati.

---------------------------------------------
Song: ghaDi ghaDi mora dil dhaDke (Madhumati)
---------------------------------------------

PA: duniya pe likhne ka koi kaaraN hi naheen tha, main sapne mein rehta hoon,
aaj bhi main sapne mein rehta hoon, parantu aaj sthiti aisa hai ki aaj mujhe
film dikhaane ke liye log mujhe bahut door door se bulaate hain ki 'aap aaiye,
film dekh leejiye aur bataaiye ki film ka bhavishya kya hoga ya kya kuchh
hogaa'. parantu woh ek aisa samay tha jab mujhe film dekhne ke liye bahut paisa
kharch karna paDta tha, to film banaana jitna kharcheela kaam hai, usse adhik
film dekhna kharcheela hai (YK laughs). ek 'common man' ke liye woh sochte
naheen ki yeh kitna kharcheela aur kaThin kaam hai. us samay to aisa hota tha ki
film 'release' hone ke 2 maheene baad, 4 maheene baad hi Jabalpur mein film aati
thi. Jabalpur koi chhoTi jagah naheen hai lekin aadhi se zyaada filmen to baad
mein hi aati theen. to ham un filmon ko dekhne ke liye, kisi tarah unko dekh
paate the, kabhi kabhi rishtedaaron ki madad se bhi dekhee. lekin 16/17 saal ki
umra mein main itna saamarthavaan ho gaya tha ki apne paise se filmen dekh sakta
tha. tab maine kisi ki baat naheen maanee aur filmen dekhta tha, kyun dekhta tha
yeh mujhe pataa naheen. maine Mera Naam Joker dekhkar hi, pratidin Mera Naam
Joker dekhkar maine apne MA ke chaaron 'papers' 'previous' ke deeye the, aur
'university' mein 'top' kiya tha.

YK: waah! (PA laughs)

-----------------------------------------------
Song: more ang lag jaa baalma (Mera Naam Joker)
-----------------------------------------------

PA: to log yeh tohmat naheen lagaa paate the ki 'tum cienema dekhoge to 'fail'
ho jaayoge, paDhta likhta naheen hai, kuchh naheen karta hai'. main naukri bhi
karta tha, paDhta bhi tha, aur cinema bhi dekhta tha. to apne kharch ke liye hi,
apne parivaar ke kharch ke liye hi mujhe naukri karne ki zaroorat thi, aur uske
saath saath cinema bhi ek aanand tha. par maine cinema par likha kabhi naheen,
meri saahitya par do teen kitaaben aa gayi, tab tak bhi maine cinema par kabhi
naheen likha tha. meri swargeeya patni Vartika Agarwal, woh swayam ek kahaani
lekhika theen, aur woh jis samay bahut beemaar paDeen, to unko bhi cinema dekhne
ka shauk tha, mujhe bhi tha, to ekaaek Vishvanath film dekhne ham gaye huye the
aur Kalicharan film dekhke mujhe lagaa tha ki yeh Subhash Ghai naam ka jo naya
nirdeshak aaya hai, yeh achchha aadmi lagta hai jinko jaankaari hai cinema ki,
to main us film ko dekhne gaya aur baDa niraash hokar lauTaa. maine ek lekh
likha bhi tha 'Vishvanath baabu, aap muqaddama haar gaye'

YK: kahaan chhapaa yeh?

PA: lekh kya likha kuchh 10/12/16 panktiyaan likhee, to Vartika ne paDheen aur
kahaa ki 'yeh to bahut baDhiyaa hai, kahin bhej do, yeh to chhap jaayegaa'.
maine kahaa 'kahaan chhap jaayega, kaun si patrika ise chaapegi?' kehne lagi
'tum kuchh mat karo', aur unhone us lekh ko dobaara likha aur likhne ke baad
Mayapuri patrika mein bhej diya, aur woh, isey kya kahen, ek haadsaa hi kehna
chaahiye, uske agle hi ank mein usey chhaap diya aur uske sampaadak mahoday ne
mujhe likha ki aage aur in in vishayon par, in in logon par likh sakte hain to
likhkar bhej deejiye. agla lekh Madhuri mein chhap gaya, phir Manorama mein mere
lekh nirantar chhapne lage. phir uske baad Ravivaar mein Udayan Sharma-ji ne
mere bahut lekh chhaape, Saaptaahik Hindustaan mein bhi mere kitaab se kuchh
ansh nikaalkar doosron ke naam se chhaape, Raj Kapoor par waali kitaab se.

YK: achchha?

PA: haan. agle ank mein phir unhone maafinaama bhi chhapaa jab maine aapatti kee
ki 'yeh lekh aapne chhaapa hai jo mere kitaab ki hai', to unhone agle ank mein
maafinaama chhaapaa ki 'ham khed vyakt karte hain ki yeh Prahlad Agarwal ki
pustak se banaaya gaya lekh tha, kintu galati se unka naam Daalna chhooT gaya
tha, uski ham truTi sudhaar karte hain'. phir maine unko likha ki agar aap ne
truTi sudhaar kar hi lee hai to uska parishramik mujhe bhej deejiye, lekin
unhone paarishramik mujhe kabhi naheen bhejaa (laughs)

YK: is tarah aapki filmi lekhan shuru huyi, matlab aap chhapne lage tamaam
jagahon par. kaun sa sangeet aapko zyaada prabhaavit karta tha aur zindagi mein
cinema aur sangeet ki itni jagah thi to aapko aisa naheen lagta tha ki aapke
kaam mein aur paarivaarik zindagi mein baadhaa aa rahi hai?

PA: naheen, paarivaarik zindagi mein baadhaa isliye naheen mehsoos kee kyunki
main dekhta tha sab gaate the. us samay ek gaana log dason saal se gaa rahe the
"mera joota hai jaapaani". mere maamaaji aaye, 1960 ki baat hai. Mughal-e-Azam
mujhe bahut achchhi lagi thi, maine Kalkatte mein dekhee thi apne mausaji ke
saath. to woh aaye aur film dekhne gaye aur uThkar jab woh aaye, main 13 saal ka
tha us samay, to unhone hamaari maa se kahaa ki 'jiji, yeh film dikhaane ham
aapko zaroor le chalenge, usmein ek bahut achchha gaana hai "pyaar kiya to Darna
kya"'. maine suna unke munh se aur man hi man kasmasaaya ki dekho buDhou kya keh
rahe hain ki inhe "pyaar kiya to Darna kya" gaana achchha lag raha hai (YK
laughs)

---------------------------------------------
Song: pyaar kiya to Darna kya (Mughal-e-Azam)
---------------------------------------------

PA: cinema ne sab par prabhaav Daala, gehra prabhaav Daala, magar is 'hypocrite'
samaaj ne cinema ke prabhaav ko kabhi sweekaar naheen kiya. huya yeh ki mera
'internal examination' tha BA ka, usmein upmaa alankaar ka udaaharaN poochha
gaya. maine upmaa alankaar ka udaaharaN usmein likh diya "dekhaa bhi naheen
tujhko, soorat bhi na pehchaani, tu aake chali chham se jo dhoop ke din paani".
to itne prasanna huye mere shikshak jiski koi had naheen thi. unhone poochha
'beTe, yeh kiski rachnaa hai? hamne to kahin paDhaa naheen, tum kahaan se yeh
udaaharaN DhoonD laaye?' maine kahaa ki yeh Shankar Shailendra ki rachnaa hai,
main jaanta tha ki woh naaraaz honewaale hain. poochha ki 'yeh kaun kavi hain?'
maine kahaa ki yeh filmon mein likhte hain (YK laughs). bole 'yeh film ka geet
hai?' unhone usey kaaT diya aur mujhe shoonya 'number' deeye. to yeh mujhe
majboor kiya, majboor naheen kehna chaahiye, galat huya, mujhe prereet kiya,
pryotsaahit kiya ki main Shailendra par ek poori kitaab likhoon aur woh kitaab
Gyan-ji ke hi, mujhe kehna chaahiye ki unke kripaa se hi sambhav huyi ki pahal
mein unhone mujhse bahut dabaaV daalkar, bahut dabaav Daalkar mujhse lekh
likhwaaya Shailendra par aur Sudha Arora-ji jo yaheen rehti hain Bambai mein,
unhone mujhe ek saptaah apne Vasundhara kaaryaalay mein bulwaakar khud chhaapna
chaahti theen woh kitaab Shailendra par, par baad mein usey Rajkamal ne chhaapa
aur maine uska shirshak bhi diya "Kavi Shailendra - Zindagi ki Jeet Mein
Yakeen". to Shailendra ko hamne kavi naheen maana, isse woh kavi hone se reh
naheen jaayenge, Shailendra kavi hain, aur dekhiye "maaTi se khelte ho baar baar
kisliye, TooTe huye khilauno se hai pyaar kisliye", "tu pyaar ka saagar hai"

YK: "teri ek boond ke pyaase ham"

PA: "lauTaa jo diya tune, chale jaayenge jahaan se ham"

------------------------------------
Song: tu pyaar ka saagar hai (Seema)
------------------------------------

TO BE CONTD...


YK: Prahlad-ji, ek geetkaar jise bahut bandhe bandhaaye daaere mein kaam karna
paDta hai kyunki hamaare yahaan filmon mein bahut vividhataa naheen hai vishayon
mein.

PA: ham phir kehna chaahte hain ki vishayon ki vividhataa duniya bhar ke cinema
mein kahaan hai, aur Raj Kapoor ki ek film mein gaana hai, Jis Desh Mein Ganga
Behti Hai, "pyaar karle naheen to phaansi chaDh jaayega", to do hi cheezen hain
ki pyaar karna chaahte hain yaa phaansi chaDhna chaahte hain, to achchhaai ki
kahaani hai yaa buraaee ki kahaani, yathaarth zindagi mein kabhi kabhi buraaee
bhi jeet-ti hai.

YK: Prahlad-ji, kuchh aise geeton ki charcha keejiye jo Shailendra ne filmon ke
liye likhe lekin jo kavita se kam naheen hain.

PA: main aapko bataayun, woh bahut adbhut geet hai aur uski 'simily' bhi bahut
adbhut 'simily' hai, aur aaj bhi woh geet aa jaata hai to naye se naye log sunte
hain, "mere piya gaye Rangoon, kiya hai wahaan se 'telephone', tumhaari yaad
sataati hai"

YK: Panna Lal Santoshi ne isey likha hai

PA: jee haan, Pyarelal Santoshi ne jo geet likha usmein 'simily' dekhiye, ki
"tum bin saajan janvari farvari ban gaye mai aur joon", dekhiye angrezikaran ki
kya shaandaar baat thi aur kis tarah se 'simily' aur kis tarah se cheezon ko
'comic' andaaz mein pesh kiya, to usmein ek aadmi ko sochne ki, ek aadmi ko ek
vyang ki ek dhaar unhone diya.

--------------------------------------
Song: mere piya gaye Rangoon (Patanga)
--------------------------------------

PA: filmi geeton ki jab baat ho, Rajendra Krishan-ji hain, aur Rajendra Krishna
ke saath Shaqeel Badayuni bhi hain, aur isse baDi agar ham baat karen, jo
saampradaayik ektaa hai, jo qaumi ektaa ho sakti hai, ki ek bhajan jise Shaqeel
ne likha, Naushad ne sangeetbaddha kiya aur Mohd Rafi ne gaaya, "o duniya ek
rakhwaale"

YK: Baiju Bawra

-----------------------------------------
Song: o duniya ek rakhwaale (Baiju Bawra)
-----------------------------------------

PA: Sahir Ludhianvi ne bhi bahut adbhut geet likhe, yeh cinema ka geet hai, ki
"yeh badkismat maa hai jo beTon ki sej pe leTee hai, aurat ne janam diya mardon
ko, mardon ne usey baazaar diya". yeh antim pankti agar aap dekhen to aaj is
aadhuniktam samay mein bhi kya koi aisi kaThor baat keh sakta hai, aur kitni
kaThor baat kitni shaaleenta se kahee jaa sakti hai, ki "avtaar payambar janti
hai phir bhi shaitaan ki beTi hai, yeh woh badkismat maa hai jo beTon ki sej pe
leTee hai"

---------------------------------------------
Song: aurat ne janam diya mardon ko (Sadhana)
---------------------------------------------

YK: aapko kya lagta hai ki bhaaratiya film udyog, jo sansaar mein mahatwapoorNa
film udyogon mein maana jaata hai, sabse zyaada filmen hamaare yahaan banti hai,
kitna mahatwapoorNa kaam kar rahi hai samaaj ko badalne ki disha mein?

PA: Dr Ramakant Shrivastava se 'telephone' par baat ho rahi thi, Vasudha ke film
ank ke baare mein, to hamne kahaa ki 'aap kis film par likhna pasand karenge?'
to kaafi 'discussion' hota raha, unhone kahaa ki 'Prahlad, dekho cinema ne bahut
kaam kiya hai Hindi 'belt' mein, usko log bhool jaate hain, usne logon ko prem
karna seekhaaya hai, aur koi bhi kraanti prem ke abhaav mein naheen ho sakti.
prem ke abhaav mein koi aap se juDegaa naheen, prem shareer par naheen hota hai,
magar yeh mat samajhiyega ki shareer se judaa bhi prem hota hai, kyunki aatma
bhi rehti hai to shareer mein hi rehti hai, to shareer ka mahatwa bahut baDaa
hai, yeh das dwaare ka jo pinjra hai, is pinjre mein bahut saari baaten samaati
hain, aur cinema par baat karenge to saahityakaar hi baat karenge, likhe paDhe
log hi baat karenge, aur saahityakaar ki jagah cinema mein kabhi bani naheen,
isliye yeh bhram kisi bhi lekhak ko naheen hona chaahiye ki cinema uska maadhyam
hai, cinema lekhak ka maadhyam katai naheen.

YK: aap itne saalon se lagaataar cinema dekh rahe hain. aaj ke abhinetaaon mein
sabse zyaada prabhaavit aapko kaun karta hai?

PA: Pankaj Kapoor, nirdwand roop se, main keh sakta hoon ki adbhut abhineta
hain, woh vishvastar ka yaani, main kya kahoon ab, abhi Halla Bol bhi maine unki
vajah se, kaaT-chhaanT ke CD banaaee, utne hi drishya usmein joD liye jitne
Pankaj Kapoor ke hain. sirf unki bhangimaa dekhiye haath ki, hinsaa dikhaane ke
liye kitni kam hinsaa dikhaane ki zaroorat hoti hai aur kitna tivra prabhaav aap
paida kar sakte hain, yeh Pankaj Kapoor ne us drishya mein dikhaa diya.

-----------------------------------------
Song: ang ang zaKhmi hai tera (Halla Bol)
-----------------------------------------

YK: kya aapko lagta hai ki bhaaratiya abhineta vishvastar par apna prabhaav
chhoD paane laayak pratibhaashaali hain?

PA: usse adhik hain, maine tamaam angrezee filmen dekhee hain, tamaam Oscar
praapt filmen bhi main dekha karta hoon.

YK: Satna mein rehte huye bhi kaise juTaate hain aap yeh sab saamagri?

PA: dekhiye, pehle to main asamarth tha, baDi mushkil huya karta tha, magar ab
to main cinema dekhne ke liye Satna par bahut kam aashrit hota hoon, aajkal to
DVD ka zamaana hai, mere paas sab taamjhaam hai aur main Khud dekh sakta hoon,
parantu ab bhi main 'theatre' mein jaakar film dekhna hi pasand karta hoon, aur
film dekhne ka mazaa 'theatre' mein hi hai, ghar mein katai naheen hai.

YK: bahut sahi hai.

PA: aur main abhi bhi filmen dekhne 'theatre' mein jaata hoon, aur bambai bhi
aata hoon aapki film dekhne ke liye, dilli bhi jaata hoon, kalkatta bhi jaata
hoon, yahaan tak ki Hyderabad bhi gaya hoon film dekhne ke liye, mujhe pataa
chalaa ki wahaan Hindi ki filmen bahut dekhee jaati hai, shaayad hi koi shahar
bachaa ho jahaan par jaakar maine filmen na dekhee ho, aur Film Festivals mein
bhi jaata hoon aur Film Festivals mein jaakar patrakaaron ke beech baiThkar film
dekhna mujhe kabhi raas naheen aaya

YK: bahut sahi hai

PA: main mahangi 'tickets' khareedke filmen dekhta hoon kyunki main ek darshak
ke saath baiThkar film dekhna chaahta hoon, main jab film dekhne ke liye jaata
hoon to film ki aalochana karne ke liye naheen jaata hoon, 'I wish to enjoy it'
aur main usko 'enjoy' karta hoon. to woh saari cheezen bahut maadak Dhang se
mere paas aati hain, aur mere saath rehti hain, aur main dekhta hoon ki mujhe
saahitya ko samajhne mein bhi cinema ne baDaa yogdaan diya. to cinema ek kalaa
hai, aur zaroor hai, aur saari kalaaon ka samoocha hai keh leejiye kyunki usmein
kavita bhi hogi, kahaani bhi hogi, naaTak bhi hoga, usmein baDhai bhi kaam
aayega, usmein 'electrician' bhi kaam aayega, usmein saari 'technology' bhi juD
jaayegi. to saare samooh ko lekar jo srijankarta hai woh sarjak, cinema ka
sarjak hota hai, saahityakaar ekaaki srijak hota hai.

YK: Prahlad-ji, ab ek gaana sun liya jaaye

PA: avashya

YK: bataaiye kaun sa gaana sunaa jaaye

PA: Mughal-e-Azam film ka ek geet suniye, woh bhi ek bahut adbhut geet hai,
"mohabbat ki jhooThi kahaani pe roye"

--------------------------------------------------------
Song: mohabbat ki jhooTi kahaani pe roye (Mughal-e-Azam)
--------------------------------------------------------

YK: aaKhri sawaal Prahlad-ji aapse, bahut aanand-daayakl baatchit aap se ho rahi
hai, sawaal yeh hai ki itni saari filmon ko dekhne aur filmon ko is gambheerta
ke saath jeene ke baad kya aapko kisi bhi pal yeh naheen lagaa ki aapko film
lekhak yaa nirdeshak hona chaahiye tha?

PA: naheen! ek mere man mein, jab maine Raj saahab se kahaa tha, jo unke saath
waale log to naheen samajh sakte the, magar woh samajh sakte the, ki main film
lekhak kabhi naheen hona chaahta, isliye kyunki film lekhak ka 'medium' hai hi
naheen, aur jo lekhak ka 'medium' naheen hai, wahaan main lekhak hoyoon jaake,
yeh bahut bhaari bewakoofi hai. yadi main lekhak hona chaahoon to main likhta
hoon, magar meri khwaahish hai ki marne se pehle ek film zaroor banaayun, aur
maine ek baar prayaas bhi kiya tha, aur woh prayaas poori tarah se asafal bhi
naheen kahaa jaa sakta, main apne shahar mein hi main yeh maanta hoon ki jab tak
film chhoTi poonji se naheen banegi to is samay mein achchhi film banna bahut
kaThin hai. main yeh bhi naheen maanta ki koi achchhe log naheen hai, koi Bimal
Roy naheen hai, koi Mehboob Khan naheen hai, koi Raj Kapoor naheen hai, main yeh
maanta hoon ki adbhut adbhut log hain, aur adbhut kaam kar sakte hain, magar is
poonji ke tantra ko...

YK: toD degaa

PA: toDnaa to paDegaa hi, poonji ka tantra cinema se naheen joDaa jaa sakta.
poonji ke tantra ko behetar upayog mein naheen laa paa rahe hain. aakhir Raj
Kapoor bhi poonji ke tantra mein kaam karte the aur V Shantaram bhi karte the
aur Satyajit Ray bhi karte the, Satyajit Ray ki adhikaansh filmen R D Bansal ne
'produce' keeye jo sabse baDe 'producer' hain Bangla filmon ke. to poonji ko aap
laDiye naheen, poonji ka sadupayog keejiye. yadi aap '18 crore' denge kisi
'star' ko, to film us 'star' ka mahima mandan naheen karegi to '18 crore'
aayenge kahaan se?

YK: to aap ne film banaane ka prayaas kiya tha?

PA: haan, kiya tha, maine film banaane ka prayaas kiya tha aur woh prayaas jaari
hai aur mujhe lagta hai ki kabhi na kabhi main safal hoyunga.

YK: Prahlad-ji, bahut aanand aaya, Aaj Ke Mehmaan kaaryakram mein aane aur itna
samay dene ke liye, bahut bahut shukriya.

PA: dhanyavaad, bahut bahut shukriya aapka huzoor.

THE END