SPECIAL CHHAYA GEET - A TRIBUTE TO GULSHAN BAWRA
------------------------------------------------

Script & Presentation: Yunus Khan
---------------------------------

sabhi sunnewaalon ko Yunus Khan ka namaskaar! Chhaya Geet kaaryakram mein aaj
ham shraddhaanjali de rahe hain geetkaar Gulshan Bawra ko.

Clip: sapna mera TooT gaya

ye wo geetkaar hain jinhone hamein ek aisa taraana diya jiske zariye ham apne
desh par garv karte hain, ham Khud par garv karte hain ki ham is desh ke niwaasi
hain, hamne is desh mein janm liya

Clip: bailon ke gale mein jab ghungroo.... mere desh ki dharti

Gulshan Bawra ke 'career' ka sab se mahatvapoorN gaana tha yeh. lekin yeh unka
pehla geet naheen tha. yeh to unhone tab likha tha jab woh Railway ke maal
godaam mein 'clerk' the. darasal Mumbai ke maal godaam mein Punjab se gehoon ki
hazaaron boriyaan aati theen. unhe utarte huye dekh kar Gulshan Bawra ne apne
bahi khaate ke kone mein likha "mere desh ki dharti sona ugle". jab sangharsh ke
dino mein unke saathi Manoj Kumar ko in panktiyon ke baare mein pataa chalaa,
unhone film Upkaar mein is gaane ko shaamil kar liya. geetkaar Gulshan Bawra ka
safar kaise shuru huya, filmon mein woh kis tarah se aaye, yeh apne aap mein
baDaa dilchasp hai. Railway mein naukri karte the aur geetkaari ke liye
sangharsh karte the. unki pehli film kaun si thi Khud unhi se suniye. yeh
'recording' Vividh Bharati ke sangrahaalay se hamne lee hai...

Gulshan Bawra speaks: dekhiye main aapko sab se pehle yeh bataa doon ki mera
sabse pehla geet film Chandrasena ke liye 'record' kiya gaya. yeh meri
Khushkismati hai ki mera pehla gaana Lataji ki aawaaz mein 'record' huya, aur
yeh gaana 23 August 1958 ko 'record' kiya gaya tha Basant Studio mein. un dino
gaane jo hote the, woh jahaan par aajkal 'shooting' hoti hai na 'studio' mein,
waheen 'record' hote the, koi 'special studio' naheen hote the. is geet ke
'record' par jo naam hai 'composer' ka, woh Kalyanji Veerji Shah hai. Kalyanji
Veerji Shah ne teen filmen kee, chauthi film mein unke bhaai Anandji ne unhe
'join' kar liya, phir unka sangeet jo tha 'as' Kalyanji Anandji ke naam se
jaanaa jaane lagaa. aur ek aur, aapke 'information' ke liye baat bataa doon, ki
is geet ke 'record' par mera naam bhi 'as' Gulshan aaya huya hai.

Song: main kya jaanoo kaahe laage yeh saawan matwaalaa

Chandrasena Gulshan Bawra ki pehli film thi aur sab se dilchasp baat yeh rahi ki
unka pehla hi geet Lata Mangeshkar ne gaaya. Gulshan Bawra ki sabse baDi
Khaaseeyat yeh hai ki woh maanaveeya rishton par vishvaas rakhte hain. unke
gaane insaani rishton ko baDi gehraaee se parakhte aur pehchaante hain. Gulshan
Bawra ke gaane sun kar hamein pyaar par vishvaas hone lagta hai.

Clip: hamein aur jeene ki chaahat na hoti

film Agar Tum Na Hote film ke is sadaabahaar geet ki jab 'recording' ho rahi thi
to Lataji ne R D Burman se poochha ki is geet ko kisne likha hai. R D Burman ne
unhi ko anumaan lagaane ko kahaa. Lataji Majrooh, Anand Bakshi, aur Gulzar
saahab ke naam liye. jab R D Burman ne unse kaha ki is geet ko Gulshan Bawra ne
likha hai, to Lataji ghar jaa kar Gulshan bawra ko 'telephone' kiya aur itna
achchha geet likhne ke liye badhaaee dee.

Clip: ek main aur ek tu dono mile is tarah

pyaar ke ek gaane ne Gulshan Bawra ko geetkaari ki duniya mein ek chamakta huya
sitaara banaaya. aapko yaad hai woh gaana kaun sa tha?

Clip: Dooba hoon Gham ki gehraaiyon mein... tumhe yaad hogaa kabhi ham mile the

Gulshan Bawra ka janm Shekhupura Punjab mein huya tha. sangharshon mein bachpan
beeta aur uske baad woh Railway mein 'cleark' ho gaye. likhne ki aadat bachpan
se hi thi. filmon min likhne ka man tha, sangharsh kiya, aur Chandrasena aur
Satta Bazar ke zariye filmon mein mahatwapoorN sthaan haasil kar liya. majboori
mein aur kai baar shaukhiya taur par kuchh filmon mein unhone kaam bhi kiya.
jaise film Satta Bazar mein woh mukhya 'comedian' the.

Clip: deewaane hain deewaano ko na ghar chaahiye

Gulshan Mehta Gulshan Bawra kaise bane iski bhi ek daastaan hai.Vividh Bharati
mein unhone Khud bataaya tha...

Gulshan Bawra speaks: Gulshan Bawra hoon, lekin Bawra main bhi 3/4 filmon ke
baad banaa. jab main Satta Bazar film kar raha tha, do geet the mere, ek
"chaandi ke chand TukDon ke liye imaan ko bechaa jaataa hai"...

Clip: chaandi ke chand TukDon ke liye

Gulshan Bawra speaks: aur doosra gaana tha "tumhe yaad hogaa kabhi ham mile
the". to in dono geeton mein Tasan chal rahi thi. Kalyanji bhai bol rahe the
"tumhe yaad hoga" achchhaa geet hai..

Clip: agar zindagi ho apne hi bas mein... tumhe yaad hogaa kabhi ham mile the


Gulshan Bawra speaks: 'distributor' the Shanti bhai, woh bolte the, 'naheen,
"chaandi ke chand TukDon ke liye" achchhaa geet hai. to jaise hi main pahuncha
to Kalyanji bhai bole Shanti bhai se ki 'yeh in dono ka 'writer' hai aur isi se
poochho kaun sa geet achchha hai'. teesra geet main likhne gaya tha. to woh bole
ki 'kyon tum jhooTh bolte ho Kalyanji bhai, kyon tum mazaak uDaate ho, yeh
geetkaar tumhe kis nazar se lagta hai? yeh to kisi bhi taraf se geetkar naheen
lagta! yeh kaise geet likhegaa, abhi to iski moonchhen bhi naheen niklee hain!'
main kaafi chhoTaa tha. to itne mein Ravindra Dave ki 'entry' huyi. to unhone
poochhaa ki 'dekho Kalyanji bhai mera mazaak uDaa rahe hain, keh rahe hain ki is
aadmi ne dono geet likhe hain'. bole ki 'haan, isi ne likhe hain'. us film mein
Shailendra ke geet the, Hasrat ke geet the, Indeevar ke geet the. to Shanti bhai
ne bola ki 'agar yeh dono gaane isne likhe hain, phir main 'banner' pe sirf isi
ka naam doonga. yeh baawra sa lagtaa hai, isliye aaj se main iska naam rakhta
hoon Gulshan Bawra'. tab se mera naam Gulshan Bawra paD gaya.

Clip: mujhe kehte hain Kallu qawwaal

jaisa ki maine kahaa Gulshan Bawra ke gaane insaani rishton par vishvaas karne
ke gaane hain. Kalyanji Anandji, Rajesh Roshan, Usha Khanna, na jaane kitne
mahatwapoorNa sangeetkaar hain jinke saath Gulshan Bawra ka kaam baDaa hi
shaandaar raha.

Clip: yaari hai imaan mera yaar meri zindagi

Chhaya Geet mein aaj ham geetkaar Gulshan Bawra ko shraddhaanjali arpit kar rahe
hain.

Clip: zindagi milke beetaayenge (sad)

yun to kai sangeetkaaron ke saath Gulshan Bawra ke baDe suhaane naGhmen aaye.
lekin jab Rahul Dev Burman ke saath unki joDee banee, to jaise ek sureela
toofaan aa gayaa.

Clip: dilbar mere kab mujhe aise hi taDpaaoge
Clip: hamne tumko dekha tumne hamko dekha aise
Clip: khullam khulla pyar karenge ham dono
Clip: dukki pe dukki ho ya satte pe satta
Clip: aati rahengi bahaaren jaati rahengi bahaaren
Clip: sapna mera TooT gaya tu na raha kuchh na raha


aaiye ab Gulshan Bawra ke kuchh behad puraane, lekin bahut hi Khoobsoorat gaane
aapko sunaayen. film First Love ka yeh geet, Dattaram ki tarz, Suman Kalyanpur
ki aawaaz. aaj kyun naheen bante aise pyaare gaane!

Song: beete huye din kuchh aise hi hain, yaad aate hi dil machal jaaye


film Neeli Ankhen ka yeh geet suniye aur us zamaane, Gulshan Bawra ki kalam ko
lekar puraani yaadon mein kho jaaiye.

Song: yeh nasheeli hawaa chhaa raha hai nashaa


film Sunehri Nagin ka yeh gaana Gulshan Bawra ki kalam ke kamaal ko yaad
dilaataa hai...

Song: milke bhi ham mil na sake, kya mila phir pyaar mein


Gulshan Bawra ko Vividh Bharati parivaar ki or se vinamra shraddhaanjali!

Clip tumhe yaad hogaa kabhi ham mile the, mohabbat ki raahon mein milke chale
the.

THE END