SANGEET SARITA - RASIKESHU
--------------------------

IN CONVERSATION WITH ANIL BISWAS & MEENA KAPOOR
-----------------------------------------------

Recorded & First Broadcast in 1997
----------------------------------

EPISODE-1
*********

AB: Anil Biswas
TB: Tushar Bhatia

TB: shrotaaon ko Tushar Bhatia ka namaskaar! aaj jis sangeet vibhuti ke saamne
baiTha hoon, unka varNan karne ke liye mere paas koi shabd nahin hai. jab raat
gungunaati hain, loriyan sunaati hain, chaand ki Doli mein baiThke taaron ki
Toliyaan nikalti hain, dheere dheere baadal aata hai, aur dheere dheere jaata
hai, to kahin aawaaz aati hai, "yaad rakhna chaand taron is suhaani raat ko".
aisa lagta hai koi nas nas mein amrit ghol gaya, koi pyaar ki boli bol gaya.
doston, aaj ek bahut baDe vishvaas ke saath ye sangeet yaatra shuru ho rahi hai,
apne sangeet ki boli se nas nas mein amrit gholne waale film sangeet jagat ke
bheeshma pitaamah ke saath, param vidvaan, suprasiddha aur varishThatam sangeet
nirdeshak, aadarNeeya, Shri Anil Biswas ji. daada, praNaam!

AB: namashkaar! aaj bahut dino ke baad mein All India Radio ke 'microphone' ke
saamne baiTha huya hoon, aur ye 'programme' shuru hone jaa raha hai, jiska hamne
sheershak rakha hai RASIKESHU. yah sanskrit shabd hai, matlab hai 'rasikon ko
samarpit'. main chaahoonga ki Vividh BHarati jis gaane se shuru huya tha, usi
gaane se is 'programme' ko shuru karen to kaisa lagega?

TB: bahut achchha lagega daada.

AB: main tumko bataata hoon ki ye shuru hone se pehle yahaan ke ek 'producer'
Ninu Mazumdar mere paas aaye the gaana lekar, Narendra Sharma ji tab yaheen the,
'producer' the, aur unhone kahaa ki ye shuru ho raha hai aur aap ispe swar aarop
keejiye aur ham log isi se Vividh BHarati ki shuruaat karenge. to maine gaana
sunaa, aur dekha ki yeh gaana film ka nahin hai to ismein thoDaa sa rang bharte
hain. to do jagah mujhe itni achchhi lagi kuch kar dikhaane ke liye, wo main
tumhe bhi kahoonga aur rasik shrotaaon ko bhi kahoonga ki wo ispe zara tavajju
den, aur dhyaan den aur sune. jaise ek jagah hai sam par sam, saa par saa, yehi
hai na, ismein kis tarah se sam par sam aur saa par saa laaya gaya hai, is gaane
ki Khaaseeyat yeh hai. to is gaane ko isi drishTikoN se sune to kuchh zyaada
mazaa aayegaa. aap ye gaana shuru karenge "naach re mayoora"?

TB: jee

--------------------------------------------------
Song: naach re mayoora (Non-film: Manna Dey, 1957)
--------------------------------------------------

TB: daada, ab aap kyaa sunaane waale hain?

AB: 'film music' ki shuruaat se shuruaat karna chaahta hoon. inka naam Rai Chand
Boral hai. unse shuruaat karna chaahta hoon kyonki unko ham film sangeet ke
pitaa maante hain. aur unke baare mein jitna kahoon utna kam hai, wo ek to guNee
the, Khud tablaa bajaate the, aur 'piano', dono bajaate the, aur in do cheezon
ki jo Khoobiyaan hain na, yaani ki lay kaa aur sur ka, aur saahitya ka, itna
Khoobsoorat 'composition', to woh gaana hamko sunaao, "jeevan been madhur na
baaje".

------------------------------------------------------
Song: jeevan been madhur na baaje (Street Singer,1938)
------------------------------------------------------

AB: aaj koi aisa lekhak hai, Narendra Sharma bhi chale gaye, lekin aaj ka koi
lekhak tum mujhe de sakte ho jo pancham chheDo madhyam bole, kharaj bane
gandhaar. ye likhne waala koi aisa hai? main Khaas karke shrotaaon ka tavajju
chaahoonga ki isko wo dekhen ki saahitya kya hota tha us zamaane mein. main
doosra gaana chaahoonga tum sunaao usko, jo aap sunenge to aapke hriday bhi sur
ke hindolon mein jhoolte rahenge. "Dole Dole Dole hriday ki naiya" Vidyapati ka.

-----------------------------------------------------
Song: Dole Dole Dole hriday ki naiya (Vidyapati,1937)
-----------------------------------------------------

AB: abhi aapne ye do achchhe gaane R C Boral ke 'composition' mein sun liye
hain, jismein pehla gaana tha K L Saigal ka aur doosra gaana tha Kanan Devi ka.
inke baare mein kuchh kehna, mujhe lagta hai ki ek dhrishTataa hogi. aur ab jo
geet sunaa raha hoon wo Bimal Roy ki pehli tasveer jo hai na, Humrahi, usmein
Binota Bose ka gaaya huya ek chanchal shoKh 'romantic' gaana hai.

---------------------------------------
Song: bahaar ke din aaye (Humrahi,1945)
---------------------------------------

END OF EPISODE 1