UNTOLD STORIES ABOUT PANCHAM - RARE SESSIONS OF GULSHAN BAWRA
-------------------------------------------------------------

Courtesy: Universal Music

-----------------------------------------------------------
Clip: kal kya hoga kisko pataa, abhi zindagi ka le le mazaa
-----------------------------------------------------------

jee haan, sanget uski zindagi thi, aur wo zindagi ka bharpoor mazaa le hi raha
tha ki maut ke Khatarnaak haathon ne usey apne shikanje mein le liya. R D
Burman, yaani ki Pancham, uske chaanewaalon ko, uski hamnawaala, hampyaala
Gulshan Bawra ka namaskaar! doston, yeh mera saubhaagya hai ki main Universal
Music ke saujanya se apne jigri dost Pancham ki 'birth anniversary' pe usko apni
khaTTi meeThi yaadon ka guldasta pesh kar raha hoon, is aasha ke saath ki swarg
lok mein Pancham ko iski bheenee bheenee Khushboo aa rahi hogi. is guldaste ka
pehla phool hai film Kasme Vaade ka.

Pancham hums the tune of "kasme vaade nibhaaenge ham" in a music sitting.

Rose Movies ki har film mein R D Burman ka 'music' hota tha. Ramesh Behl, yaani
ki Gogi, uski aur Pancham ki baDi gehri dosti thi. aur Kasme Vaade Rose Movies
ki 'multi-starrer film' thi. bahut baDi film thi aur ismein Amitabh Bachchan,
Rakhi, Neetu Singh aur Randhir Kapoor the. aur sabse baDi baat thi ki Gogi zara
ghabraaya huya tha ki main itni baDi film 'handle' kar raha hoon. aur usne
Pancham ko bola ki 'Pancham, is film ki 'music' par tujhe bahut mehnat karni
paDegi'. mere dil mein kya aaya, maine bola 'Gogi, achchha 'music' mehnat se
nahin banta hai, achchha 'music' dil se banta hai. aur ham teeno ke dil mile
huye hain, mujhe poora vishvaas hai ki is film ka har gaana 'hit' hoga, aur
waaqai is film ne yeh 'prove' kar diya ki iska har gaana 'hit' tha. ab main jis
gaane ke baare mein aapko bataa raha hoon uski jab main dhun lekar aaya, ghar
aakar jab maine usko sunaa to usmein tha 'chaabu chaabu chiyaa chiyaa chaabu
chaabu chiyaa'. to maine Pancham ko 'phone' kiya, maine kahaa 'Pancham, itna
'romantic' gaana banaana hai hamne, tumne jo 'meter' diya hai mujhe 'chaabu
chaabu chiyaa', ye kyaa hai? parde par Amitabh Bachchan aur Rakhi hai, koi aisa
'meter' de jo achchha to lage!' to bole ki 'baDaa 'simple music' hai Gullu, tu
baar baar sunegaa to Theek ho jaayegaa'. bolaa 'kya kar raha hai?' maine bola
'kuchh nahin, aaja'. to bole 'Theek hai aa raha hoon'. jaise hi uski mere ghar
mein 'entry' huyi, wo gaane lagaa (sings on the tune of "kasme vaade nibhaaenge
hum) "sarson ka saag pakaana anju, makke ki roTi khilaana anju, pehle to ek mera
'peg' banaa tu, 'tune' yahi hai ab samajh gaya tu". maine bolaa 'Pancham, main
samajh gaya hoon, bilkul samajh gaya hoon, ab main tujhko bahut achchha gaana
denewaala hoon. aur phir wo bolaa 'Anju, ye hari mirchi jo hain maine apne ghar
mein ugaaee hai, inhe tu sarson ke saag mein zaroor Daalna aur phir se gaana
gaaya "sarson ka saag pakaana anju".

----------------------------------------------
Song: kasme vaade nibhaaenge ham (Kasme Vaade)
----------------------------------------------

doston, geet aap ne sunaa. Pancham mein jo Khoobi thi wo ye thi ki wo
'situation' aur kahaani par 'tune' to banaata hi tha, lekin 'location' ko dekh
kar waisa hi 'instrument' usmein Daalta tha. ab is gaane ki 'location' thi
Kashmir. to isliye usne ismein santoor, baansuri vagerah Daalee. agar Goa ki
'location' ho to 'definitely' wo usmein 'trumpet' vagerah Daalaa karta tha. ye
uski ek Khaas Khoobi thi.

ab main doston, is khaTTi meeThi guldaste ka doosra phool pesh karta hoon, woh
hai film Sanam Teri Kasam ka. doston, Pancham santa Cruz mein Odina Building ke
saatve maale pe rehta tha aur main Bandra ke Sansed Apartment mein dasve maale
pe rehta hoon. mere ghar se Pancham ke ghar ka faasla, 'by road' jo tha, woh 3
kilometer tha. lekin un dino kyonki 'high rise buildings' nahin hoti thi, to
mere ghar se Pancham ka faasla ek 'nautical mile' tha. isliye mere 'bedroom' se
Pancham ka 'bedroom' saaf dikhaaee diya karta tha. ek din subah hamaari Sanam
Teri Kasam ki 'musical sitting' thi. Barkha aayegi aur wo gaana sunegi. us raat
pataa nahin kya huya, us raat meri neend 3 baje khul gayi, to maine dekha ki
Pancham ke 'bedroom' ki 'light' jo hai, wo 'on' hai. maine phone karne ki
koshish kee lekin 'phone' nahin lagaa. subah jab milne uske ghar gaya to sabhi
'musicians music room' mein baiThe huye the. maine 'bedroom' mein gaya to dekha
ki Pancham gehri neend mein soya huya hai. maine usko bolaa 'oye gorkhe, jaldi
uTh, 9 baj gaye hain aur kal hamaari film ki 'recording' hai jiski naa abhi
'tune' bani hai aur naa hi abhi bol bane hain, bataa kyaa hogaa? tu raat ko kya
karta rahaa, maine 3 baje teri 'room' ki 'light on' dekhi hai'. to bola 'Gullu,
mat poochh maine raat ko mazedaar film dekhee. Zaina Do, kya film thi, main
poora dekh kar hi soyaa. maine kahaa 'Pancham, tujhe pataa honi chaahiye ki
subah hamaari 'sitting' hai aur abhi tak gaana nahin banaa nahin hai, kya
hogaa?' to bolaa 'koi nahin koi nahin Gullu, ban jaayegaa'. aur mere saath
'music room' mein aaya aur 'harmonium' pe baiTh gaya. 'harmonium' pe baiThaa to
gaane lagaa, (sings) "zaina Doo", aur idhar 'newspaper' paDaa thaa jismein
'headlines' thi 'Ziya is not coming', to wo gaane lagaa (sings) "zainaa Dooo,...
ziyaa... ziyaa" (in the tune of "jaanejaan o meri jaanejaan"). main bolaa
'Pancham, yaar koi 'tune' banaa, achchhi si 'tune' banaa, nahin to mar jaayenge.
kal tune 'recording' rakhi huyi hai, kya hogaa?' kehne lagaa 'ban jaayegi
'tune', 'dont worry'!

Pancham sings "ziyaa ziyaa, arey zainaa Doo....." (in the tune of "jaanejaan
arey jaanejaan").

to maine jhaT se usko mukhDaa diya, dekha usko bahut achchha lagaa, usko lagaa
ki kamaal ka ho gaya hai. itni der mein Barkha aa gayi. aur wo Barkha par baras
paDaa. bola ki 'Barkha, 9 baje ka 'time' tha aur tu 10 baje aayi hai? dekh main
8 baje se lagaa huya hoon aur maine 8 'tunes' banaaee hai, aur ye waali 'final'
kee hai'. aur usne Barkha ko 'tune' sunaaee. Barkha uchhal paDee, bolee ki
'achchha main jaa rahi hoon, mera RK mein 'set' lag raha hai, main kal
'recording' pe aa jaayungi'. to Pancham ne usko poochha ki 'Kamal Hassan aa raha
hai?' bolee ki 'mujhe to pataa nahin, shaayad aa jaaye gaana sunne'. to Pancham
bola ki 'maine uske liye bhi thoDaa Daal diya hai, "dhan tanak dhin, dhan tanak
dhin, dhan tanak dhin, ziyaa".

---------------------------------------------------
Song: jaanejaan o meri jaanejaan (Sanam Teri Kasam)
---------------------------------------------------

yeh gaana aapne sunaa, yehi woh film hai jiske liye R D Burman ko zindagi ka
pehla Filmfare Award milaa.

Pancham devi Saraswati ka pujaari tha. har saal apne ghar mein Saraswati Puja
baDi dhoom dhaam se manaata tha. us din Amitabh Bachchan, Jaya, Jeetendra,
Dharmendra, Rishi Kapoor, Randhir Kapoor, 'directors' mein Nasir Hussain, Shakti
Samanta, Pramod Chakravarty, geetkaaron mein Anand Bakshi, Majrooh saahab,
Gulzar aur main, ham sab ikaTThaa hote. pehle pooja hoti, aur uske baad 'lunch'
hota. 'lunch' baDaa hi lazeez hota tha aur 'especially' baingan ke jo pakoDe
bante the, unka to mazaa hi alag tha. aur sone pe suhaagaa, Asha ji baDe pyaar
se sabko 'serve' karti theen. jitne bhi Pancham ke 'musicians' the us din Khoob
'enjoy' karte the. aur yeh usi din ki baat hai ki 'after lunch' hamne Satte Pe
Satta ki kahani sunni thi. jab sab log chale gaye to ham kahaani pe baiTh gaye.
jab kahaani sunee, to kahaani to bahut achchhi thi. Sachin Bhowmik, aur Raj
Sippy saahab, jo is film ke 'director' the, wo to chale gaye lekin Pancham ne
mera laTkaa huya munh dekh kar bolaa 'Gullu, kya tujhe kahaani achchhi nahin
lagi?' maine kahaa 'Pancham, kahaani to bahut achchhi hai, aur mujhe yeh bhi
pataa hai ki baDi 'starcast' ki film hai, aur yeh bhi pataa hai ki film '7
Brides & 7 Brothers' pe 'base' karti hai, aur wo film bahut 'hit' thi aur
'musically hit' thi. mujhe yeh bhi pataa hai ki 'western' filmon ka jo 'music'
hota hai, wo 'instrumental oriented music' hota hai. aur hamaari hindustaani jo
'music' hota hai wo 'word oriented music' hota hai. agar Hindi filmon ke gaano
mein bol nahin hai, to wo gaane kabhi 'hit' nahin ho sakte. to bataa ismein main
kya likhoonga? har 'situation' mein 8-8 10-10 gaa rahe hain! main to ghabraa
raha hoon' Pancham bolaa ki 'dekh Gullu, aaj hamne Saraswati devi ki poojaa kee
hai, mujhe poora vishvaas hai ki is film ka 'music' aisa banegaa ki duniya yaad
rakhegi, tu ghabraa mat, bas tu ismein ek kaam karna, tu bas apne 'pen' ke saath
pahalvaani mat karna aur main bhi qasam khaataa hoon ki main bhi apne
'harmonium' ke saath pahalvaani nahin karoonga. jo kuchh bhi 'characters' bolte
hon, ham wahi boli 'use' karenge, waise hi 'instruments use' karenge'. maine
bolaa 'Pancham, is film ka ek gaana 'solo' hai, pehle kyon na wahi 'record' kar
len?' bolaa 'Theek hai'. usne usi waqt 'tune' banaaee aur maine usi waqt 'words'
likh diye aur gaana aap Khud sun leejiye.

Pancham hums "dilbar mere kab tak mujhe aise hi taDpaaoge" in music sitting.

------------------------------------------------
Song: dilbar mere kab tak mujhe (Satte Pe Satta)
------------------------------------------------

doston, ek film ban rahi thi Khel Khel Mein. aur doosri film ban rahi thi, jiska
nam tha Nikamma. Nikamma Ramesh Behl ki 'direction' mein ban rahi thi. Khel Khel
Mein jaldi jaldi ban rahi thi, aur Nikamma, kabhi uski 'shooting' hoti, kabhi
nahin hoti, kabhi uske naam mein 'double K' lagaaya jaataa, kabhi 'double M'
lagaaya jaataa. lekin phir bhi woh film na bikti thi na aage baDhti thi. to
doston, Khel Khel Mein ke 'hero heroine' the Rishi Kapoor aur Neetu Singh.
Nikamma ke 'hero heroine' the Randhir Kapoor aur Neetu Singh. Nikamma to ban hi
nahin rahi thi, dheere dheere chal rahi thi lekin Khel Khel Mein jaldi
'complete' ho gayi. aur jab uska 'background' ban raha tha to Pancham ne ek uska
'theme piece' banaaya tha aur woh Ramesh Behl ko 'haunt' karta rehta tha.

Pancham hums the background theme in a music sitting.

to jab Nikamma phir se 'resume' huyi to Ramesh ne Pancham ko bolaa, 'Pancham, wo
jo tera 'piece' hai na 'background' ka, Khel Khel Mein, jo tune banaaya tha, wo
'piece' mujhe Jaanejaan mein chaahiye, iska main ek sureela gaana lena chaahta
hoon. aur woh sureela gaana ban hi gaya, doston, aap bhi suniye.

-----------------------------------------------------
Song: tere bina main kuch bhi nahin hoon (Jaane Jaan)
-----------------------------------------------------

TO BE CONTINUED...