Sabhi sunnewaalon ko Kamal Sharma ka namaskaar. Yun to film sangeet
sansaar mein ek se ek diggaj sangeetkaar aaye hain, lekin aaj jis
sangeetkaar

ka zikr is karyakram mein hum karne jaa rahe hain, unki baat hi kuchh
alag hai.

Agar unke geeton mein Bhartiya shastriya sangeet aur lok sangeet ki
chhata

hai to filmi geeton mein paashchaatya dhuno ki lehar bhi wohi lekar
aaye the.

Song: Eena Meena Deeka (Asha)

Film Asha ke is thirakte geet ke sangeetkaar C Ramchandra se judee
kuchh

baaten aur yaaden lekar hum aaj haazir huye hain. To aayiye Sargam Ke
Sitare

mein aaj sune Chitalkar Ramchandra ke gaaye aur swarbaddha kiye kuch
geet.

Song: Meri jaan Sunday ke Sunday (Shehnai)

C Ramchandra ka janm Maharashtra ke Putnatambe mein 12 January 1918
ko

huya tha. Unke pita Railway mein Assistant Station Master ki naukri
kiya karte

the. Apne bete ki sangeet ke prati lagaav ko dekhkar unhe Nagpur ke
ek

sangeet vidyalay mein bharti karwa diya. Phir unhone Pune mein
Vinayakbua

Patwardhan se Gandharva Mahavidyalaya music school mein sangeet ki
shiksha

praapt kee.Un dino mook filmon ka daud tha, we Kolhapur aa gaye aur
kai

filmon mein abhinay kiya. Par unki kismat mein to likha tha
sangeetkaar bankar

chamakna.

Song: Dekh humein awaaz na dena o bedard zamaane (Amardeep)

Tab ki Bambai aur aaj ki Mumbai mein aane ke baad C Ramchandra Sohrab

Modi ki Minerva Movietone mein shaamil ho gaye jahaan we Habeeb Khan,

Hugan aur Meersahab jaise sangeetagyon ke sahaayak ban gaye. Hugan se

unhone western music seekha jo baad mein unke sangeet nazar aane
lagaa.

Song: Main hoon ek khalasi, mera naam hai Bhimpalasi (Sargam)

Song: Mr John Baba Khan ya Lala Roshandan (Barish)

C Ramchandra ne teen aur naamon se bhi sangeet diya tha. Shyamoo ke
naam

se (Yeh Hai India Duniya), Ram Chitalkar ke naam se (Suhi Jeevan,
Badla, Mr.

Jhatpat, Bahadur, Dosti), aur Annasaheb ke naam se (Bahadur Pratap,

Matwale, Madadgaar). Sangeetkaar ke roop mein unki pehli film thee
Tamil film

Jayakkodi aur Vanamohini. Anil Biswas, Basant Prakash, Dhaniram,
Vasant

Desai aur O P Nayyar jaise sangeetkaaron ke saath unhone kaam kiya
aur

sangeet srijan mein mahtwapoorna yogdaan kiya.Unke sangeet se sajee
pehli

Hindi film thee Sukhi Jeevan. Sachin Dev Burman aur O P Nayyar ki
tarah unki

shuruwaat bhi sukhad naheen rahi. Logon ke dilon mein jagah banaane
ke liye

unhe bhi kadee mehnat aur jaddojahad karni padee. Lekin ek baar
kaamyaabi

ki raah par chal nikle to phir kabhi peechhe mudkar naheen dekhe.

Song: Jhukti hai duniya jhukanewala chahiye (Sagaai)

Shuruwaati dino mein unhone kai filmon mein sangeet diya jinmein se
kuchh ke

naam hain Sagai, Namuna, Ustad pedro, Hungama, Shagufa, 26 January,

vagerah. Par jin do filmon ke sangeet se we kaamyaabi ke shikhar ko
chhuaan,

woh do filmen theen Shehnai aur Albela. Film Albela ke geeton ne us
film ko

chaar chaand lagaaye. Saare gaane hit huye aur gali gali bajne lage.
Cinema

gharon mein log khade hokar in geeton ke saath jhoomne ki bhi baat
maani

jaati hai. Aayiye sune is film ka ek geet jise aaj ki peedhee bhi
bade pyar se

sunti hai aur uske saath jhoomti hai. Isey C Ramchandra ne Lata
Mangeshkar

ke saath Chitalkar ke naam se gaaya. To suniye film Albela ka yeh
albela geet.

Song: Shola jo bhadke (Albela)

C Ramchandra ne apne sangeet mein naye naye prayog kiye hain.
Gujarati

garba ko Hindi film sangeet mein pehli baar wohi laaye the, film thee
Nastik aur

geet tha "Kanha bajaye bansuri". Film Shehnai mein "Aana meri jaan
Sunday ke

unday" mein Goan sangeet ka prabhaav tha to film Yasmeen ke is geet
mein

Arabian sangeet ki mithaas aur mandolin yantra ka dilkash istemaal
kiya.

Song: Bechain nazar betaab jigar (Yasmeen)

Doston, Vividh Bharati par aap sun rahe hain Sargam Ke Sitare, C
Ramchandra

ke gaaye aur swarbaddha kiye huye geet.

Song: Maar gayo re more dil pe katari (Nadiya Ke Paar)

Sangeetkaar C Ramchandra ke sumadhur sangeet se sajee ek film aayi
thee

Azad. Saal tha 1955. Aaj 50 barson ke baad bhi iske geeton mein wohi
taazgi

hai, wohi kashish hai.

Song: Aplam chaplam (Azad)

Film Azad C Ramchandra ko kaise mila, iske peechhe ek mazedaar kissa
hai.

Producer S H S Naidu ne pehle sangeetkaar Naushad ko is film ke
sangeet ka

uttardayitwa dena chhaha par unhone yeh Naushad sahab ke saamne shart

rakh dee ki ek maheene ke andar sabhi 9 geet unhe tayyaar chaahiye.
Naushad

ko yeh shart manzorr naheen huya. Phir Naidu sahab ne kai
sangeetkaaron se

sampark kiya par koi tayyaar naheen huya. Aakhirkaar chunauti
sweekaar kiya

C Ramchandra ne. Sach mein unhone ek maheene ke andar saare gaane

record kar liye aur sabhi geet ek se badhkar ek saabit huye.

Song: Jaa ri jaa ri o kaari badariya (Azad)

Yahi naheen, film Azad mein C Ramchandra ne Lata Mangeshkar ke saath
ek

duet gaaya jisse judaa bhi ek kissa hai. Huya yun ki us samay Dilip
Kumar ke

zyaadatar gaane Talat Mehmood gaaya karte the, aur unhi ko dhyaan
mein

rakhkar C Ramchandra ne yeh geet banaya tha. Par date ki problem ki
wajah

se Talat sahab recording tak naheen pahunch paaye. C Ramchandra ne
nirnay

liya ki us geet ko we khud gaayenge. Unhone apni awaaz ko yun Talat

Mehmood ki shaili mein dhaalkar is geet ko gaaya ki aaj bhi kabhi
kabhi yeh

shaque hota hai ki is geet ko Talat sahab ne naheen gaaya tha. Is
geet ke

Geetkaar Shailendra ne jab is geet ki recording suni to unhone C
Ramchandra

ke saamne 100 rupay ki shart rakh dee ki yeh awaaz Talat mehmood ki
hi hai.

Par jab baad mein doosre logon se unhe yeh pataa chala ki asal mein
yeh

awaaz C Ramchandra ki hi hai, to we shart haar gaye. Jaante hain woh
gaana

kaun sa tha?

Song: Kitna haseen hai mausam (Azad)

Zikr C Ramchandra ka ho aur film Anarkali ke naghmon ki baat na hon,
to aisa

lagega ki karyakram adhura hi reh gaya. Is film ke geeton ne jo dhoom

machaya ki ek ithaas rach daala. Lekin is film ke sangeet ko tayyaar
karte

samay C Ramchandra ko iske geeton se kuchh zyaada ummeeden naheen

theen. Un dino we khud nirmata bankar apni pehli film bana rahe the
Jhanjhar.

Isliye yeh swaabhavik tha ki unka zyaada dhyaan apne film ki taraf hi
thee. Film

Anarkali ke nirmata ne unse yeh kaha bhi ki woh unke film ki upeksha
kar rahe

hain. Dono filmein kareeb kareeb ek hi saath release huyi aur C
Ramchandra

yeh dekhkar hairaan reh gaye ki Anarkali ke gaane ki zyaada lokpriya
huye. Aaj

bhi jab Anarkali ke naghmein fizaayon mein goonjti hai to raah
chalnewaalon ko

thamkar inmein kho jaane par majboor kar dete hain.

Song: Yeh zindegi usi ki hai (Anarkali)

Nritya pradhaan film Navrang bhi C Ramchandra ke sangeet jeevan ki ek

mahatwapoorna film thee. Unhone iske gaane film ke kahaani ke anuroop
hi

tayyaar kiya. Is film ka ek yugal geet hai Asha bhosle aur Manna Dey
ki

awaazon mein. Is geet ke aakhir mein hai ghanta-naad jo is geet ko
saarthak

bana diya.

Song: Tu chhupi hai kahaan (Navrang)

1949 se lekar 1971 tak C Ramchandra ne 120 se adhik filmon mein
sangeet

diye. Unhone 7 Marathi, 3 Telugu, 6 Tamil aut kai hojpuri filmon ka
bhi sangeet

tayyaar kiya. 5 January 1982 mein 63 varsh ki aayu mein bhale hi unke
saans ki

dor toot gayi hon, par sangeet ke saath unka jo dor tha woh aaj bhi
barkaraar

hai aur hamesha rahega.

Song: Yeh hasrat thee ke is duniya mein bas do kaam kar jaate

(Nausherwan-e-Adil)

Abhi aap sun rahe the gaayak aur sangeetkaar C Ramchandra par kendrit
aaj

ka Sargam Ke Sitaare karykram. Aalkeh tha Ashok Iyer ka aur Vividh
Bharati ki

or se is aapki seva mein prastut kiya Kamal Sharma ne. Ab deejiye
ijaazat,

namaskaar.

THE END