Clip: Ho jaa rangeela re (Rangeela)

Sabhi sunnewaalon ko Nimmi Mishra ka namaskaar. Hamare aaj ke sitaare
film sangeet ki akash ka woh chamakta sitara hain jinki awaaz ka
jadoo har umra ke sunnewaalon par huya hai.

Clip: Le gayi le gayi (Dil To Paagal Hai)

Dil ki gehraai mein utarnewaali, har bhaav, har rang ko ujaagar
karnewaali yeh awaaz hai paarshwa-gaayika Asha Bhosle ki.

Clip: Tanha tanha yahaan pe jeena (Rangeela)

Asha Bhosle ke awaaz ki agar hum taarif karen to shaayad shabd bhi
pheeke pad jaaye unki awaaz ki chamak ke saamne. Aur yeh chamak din
ba din badhti chali gayi hai alag alag rang badalkar, theek waise
jaise koi chitrakaar alag alag rangon se apne chitra ko sundarta
pradaan karta jaa raha ho.

Song: Husn ke laakhon rang (Johny Mera Naam)

Ashaji ki awaaz aisi hai ki kabhi sharaab aur suroor ki maadakta hai
to kabhi maa ki lori ki mamta. Vedna aur udaasi bhare geeton mein
jaan daal deti hai unki awaaz.

Song: Pawan more angna mein dheere dheere aana (

Ashaji ke puraane gaano mein bhaavon ki gehraai ko unhone aisi
sundarta se vyakt kiya hai ki unke awaaz ke bholepan se sehsa yeh
vishvaas hi naheen hota ki ek hi awaaz mein itni saari khoobiyaan ho
sakti hai.

Asha Bhosle speaks: Mujhe shuru se hi har bhaasha se lagaav raha hai.
Maine alag alag praanton ke bhashaaon mein gaaye hain, kahaan tak
safal huyi hoon yeh to aap hi bataa sakte hain. Suniye kuchh aise hi
geeton ke namoone. Yeh hai Punjabi geet...

Clip: Main to challiyaan (Punjabi Song)

Gujarati...

Clip: Thaari baanki re paayal (Gujarati Song)

Rajasthani...

Clip: O rang rangeelo aati jo (Rajasthani Song)

aur yeh Bangali geet...

Clip: Aami khaataar paataay cheyechhilaam (Bangla Song)

Bhojpuri...

Clip: Jiyara kasak masak mo rahe (Bhojpuri song)

Asha Bhosle se baatchit kar rahe hain Gulzar aur R D Burman

RDB: Aapko yaad hai koi geet jo aapne kafi mehnat se gaaya hoga?

Asha: Haan, ek geet aapne todi mein banaya tha. Waise todi mein dha
se pancham lagana chaahiye, par filmi geet mein agar poora ka poora
raag waise hi rakh diya jaaye to us raag par aadharit sabhi geet ek
jaise hi lagenge. Thodi bahut change karke agar geeton ko dhaala
jaaye to ek nayapan bhi aata hai aur sunne mein bhi achchha lagta hai.

Gulzar: Haan sahi baat hai, agar classical music par film ban rahi
hai tab alag bat hai.

Asha: "Yeh bheeni bheeni bhor", is ka ek antara hai...

Song: Bheeni bheeni bhor aayi

Gulzar: Sone ki chamak ki similies hamare filmi geetonmein kaafi
paaya jaata hai. Lekin kehte hain na ki "All that glitters is not
gold", shaadi mein gotedaar chunri dekhne ko milti hai.

Asha: Lekin aapne to baadal ko jo gota lagaya tha?

Gulzar: Mujhe lagta tha ki gote ki jo chunri hai woh bahut hi
khoobsurat hai.

Asha Bhosle ki awaaz Bharatiya naari ki har ek roop ko saakaarkarti
hai. Phir chaahe woh kisi gaaon ki bholi bhaali baalaa ho ya phir
kisi disco club ki maaadakta liye koi dancer.

Song: O panchhi pyaare (Bandini)
Song: Aayiye meherbaan (Howrah Bridge)

Dukhon mein doobi asahaay naari ki maanviya peeda ko saakaar karti
hai Ashaji ki dardeelee awaaz, jiski gehraai mein Bhartiya stree ki
vedna ki pukaar hai.

Song: Thukra na de jahaan ko kahin bedili se hum

Asha Bhosle speaks: Main hamesha yahi kehti hoon ki playback singing
bhi itna aasaan naheen hai. Har singer ko classical music seekhna
chaahiye naheen to baad mein awaaz utni achchhi naheen rehti.

Song: Jhoothe naina boley saanchi batiyaan (Lekin)

Gulzar: Aapko pataa hai chaand par kisne sabse pehle kadam rakha tha?
neil Armstrong. Unke baad Edwin ne doosra kadam rakha, bas ek step se
woh peechhe the, aur dekhiye sabhi Armstrong ki hi baat karte hain,
Edwin, jo unke peechhe hi the, unko kisi ne yaad naheen rakha. Aap
dono ki achievement bhi waisi hi hain.

RDB laughs

Asha: Mujhe koi gila naheen hai

Gulzar: Naheen, yeh to fakra ki baat hai ki woh aap ki badi bahen hai.

Clip: Sili hawa chhoo gayi (Libaas)

Asha hums "Sili hawa chhoo gayi, sila badan chhil gaya, geeli nadi ke
pare, geela sa chaand hil gaya". Mujhe samajh naheen aata ki kabhi
chaand ko aapne geela kaha, kabhi shakkar, to kabhi mishri ka tukda,
aap kya kya kehte hain chaand ko! Mujhe aap dono se yahi shikaayat
hai ki saare achchhe achchhe geet aap didi ko hi dete hain.

Gulzar: Aisi baat naheen hai, film Khushboo ka geet "Ghar jayegi doli
chadh jayegi" jab maine likha to maine kaha ki yeh aap hi gaayengi.

RDB: Maine kaha tha ki film mein ise heroine Hema Malini gaayengi to
phir Ashaji kaise gaa sakti hain, par inhone aapka naam hi suggest
kiya.

Song: Mera kuchh saamaan tumhare paas padaa hai (Ijaazat)

Vividh Bharati par is samay aap sun rahe hain karyakram Sargam Ke
Sitaare jismein hamare aaj ke sitare hain Asha Bhosle.

Song: Dil cheez kya aap meri jaan leejiye (Umraojaan)

Asha Bhosle speaks: Kudrat ne jo mujhe awaaz dee hai, uski khoobiyon
ko Nayyar sahab ne pehchaana aur apne geeton mein istemaal kiya.
Sachchhai jo hai, usey maan lene mein koi buraayi naheen hai. Manzil
mein pahunchkar raahvar ko bhoola dena yeh meri aadat mein naheen.

Song: Aankhon se jo utri hai dil mein (Phir Wohi Dil Laya Hoon)

Ashaji ke awaaz ki kuchh visheshtaayen hain unke gale ki harkat,
awaaz ka nukeelapan aur tees upjaane ki unki kshamata. Unke awaaz ki
khanak har ek geet ko laajawaab bana deti hai.

Song: Paan khaaye saiyaan hamaar (Teesri Kasam)

Umra ke saath saath Ashaji ki janmajaat sumadhur awaaz nikharti chali
jaa rahi hai. Umra ke har padaav par unki awaaz ek alag hi jadoo
dikhaati chali jaa rahi hai. Ashaji aaj bhi us padaav par khadeen
hain jahaan se aankhen sapne dekhna shuru karti hai.

Asha Bhosle speaks: Log kehte hain ki meri awaaz ab bhi pehle jaisa
hi hai, mujhe naheen pataa. Par haan, main apne aap ko maintain karne
ki koshish karti hoon.

Song: Jab chhaaye mera jadoo koi bach na paaye (Lootmaar)

Ashaji ki awaaz mein jitni vividhtaayen hain, un sabka kahan, tulna
bauni, sab kuchh khatam ho jaati hai unki awaaz ke aage.

Song: Main pyar ka rahi hoon (Ek Musafir Ek Haseena)

Ashaji ke gaaye vividh rangi geet zindegi se jud jaate hain. Ek
chitrakaar jaise alag alag rangon se apne tasveer ko sajaata hai,
waise hi Ashaji ne apna sangeetmay jeevan ko ranga hai alag alag
rangon ke gaane gaakar.

Song: Zindegi ke rang kai hain (Aadmi Aur Insaan)

Asha Bhosle speaks: Gaana chaahe happy ho ya sad, classical ho ya
comedy, har tarah ke geet maine gaaye hain. Maaf keejiye, yeh main
naheen sunnewaale kehte hain. Is taarif ke zyaada haqdaar hain Nayyar
sahab jinhone mujhe alag alag tarah ke geet gaane ka mauka diya hai.

Song: aayo huzoor tumko sitaaron mein le chaloon (Kismat)

Asha Bhosle speaks: Phool ki to sabhi taarif karte hain, par usko
khilaane mein jo maali din raat mehnat karta hai, usko koi yaad
naheen karta, uske baare mein koi naheen sochta. Usi tarah kisi bhi
geet ki safalta ke peechhe jitna haath gaayak-gaayika ka hota hai,
usse kahin zyaada haath hota hai uske geetkaar aur sangeetkaar ka.

Song: Tora mann darpan kehlaaye (Neelkamal)

Ashaji ki awaaz ko sunkar hairaan huye bina naheen raha jaata. Kya
yeh wohi awaaz hai jo kabhi kisi ke dardeele avsaad bhare dil ko
bayaan karti hai to kabhi kisi ke nasheele mann ki maadakta? Kabhi
yeh awaaz allahrpan se bhar deta hai dil to kabhi utni hi sanjeedgi
se.

Song: Yeh kya jagah hai doston (Umraojaan)

Itni bahurangi awaaz autr iske itne saare aayaam, jiski chamak badhti
hi chali jaa rahi hai. Ashaji ke liye hamari yehi duya hai ki aise hi
apni awaaz ka jadoo woh dikhaati rahe, woh gaaye aur bas gaati hi
chali jaayen.

Song: Gaa mere mann gaa, yunhi beetaaye jaa din zindegi ke (Lajwanti)

Sargam Ke Sitare mein aaj ke sitare the gaayika Asha Bhosle. Is
karyakram ka aalekh tayyaar kiya Nimmi Mishra ne aur prastuti Yunus
Khan aur Nimmi Mishra kee. Ab deejiye ijaazat, namaskaar.

THE END