BASED ON THE MARATHI PROGRAMME ON K L SAIGAL (MADHUKAR SHYAM HAMARE
CHOR) BROADCAST ON VIVIDH BHARATI PUNE ON 17 APRIL 2005 TO MARK THE
BIRTH CENTENARY OF THE LEGEND

Hindi film sangeet ki neev rakhne wale fankaaron ki kshreni mein ek
naam aisa hai jinke awaaz ki chamak tees ke dashak se lekar

aaj tak waisa hi kaayam hai jo aaj bhi sunnewaale ko mantra-mugdh kar
deta hai.

Song: Ek bungla bane nyaara (Meri Bahen)

Is fankaar ka janm aaj se sau saal pehle huya aur jinke guzre aaj
paanch dashak ho chuke hain. Pandrah saal lambi apne saangeetik

jeevan mein unhone apne kala ki aisi sugandhi bikheri ki aaj bhi woh
mahak barkaraar hai duniya ki fizaayon mein. Woh aur koi

naheen, hamaare aaj ke Sargam Ke Sitare hain mahaan kalakaar Kundan
Lal Saigal.

Song: Karoon kya aas niraas bhayi (Dushman)

K L Saigal ne logon par aisa jadoo kiya ki poora desh unke deewane ho
gaye, woh ek prerna stambh ban gaye. Sajjad, Roshan aur O

P Nayyar jaise sangeetkaar aur Talat Mahmood, Mukesh, Kishore Kumar
aur yahaan tak ki Lata Mangeshkar ke ekmatra prernastrot

ban gaye.

Song: Main kya janoo kya jadoo hai (Zindagi)

1931 mein pehli bolti film bani Alam Ara, aur Saigal sahab ka aagaman
huya uske doosre hi saal 1932 mein jab unhone New Theatres

ki film Mohabbat Ki Ansoo mein ek chhota sa role ada kiya.

Song: Do naina matwale tihare hum par zuloom kare (My Sister)

K L Saigal ka janm pita Amirchand aur maa Kesar Kaur ke ghar 4 April
1904 ko Jammu mein huya. Bachpan se hi apne bhole surat

ki wajah se Ram Leela mein we Sita ki bhumika nibhaaya karte the.
Unki pratibha ko dekhkar unki mataji unhe protsaahit kiya karti

theen. Unhone Sufi sant Salman Yusuf se Sufiana riyaaz seekha. Pita
ki mrityu ke baad unpar zimmedaari aa gayi aur we Jalandhar,

Moradabad, aur Lucknow hote huye Kalkatta aa pahunche. Is dauraan
unhone kabhi salesman ka kaam kiya to kabhi railway mein

time keeper ka. Kalkatta mein hi unki mulaaqaat ho gayi apne
Jalandhar parichit Harish Chandra Bali se jinhone unhe New Theatres

le gaye aur shuru ho gayi unke jeeva ki agli paari. 1932 mein
Mohabbat Ke Ansoo mein kaam karneke baad 1933 mein unka pehla

gair filmi record release huya. Suniye usi ka ek geet.

Song: Jhulna jhulaao ri (Non-film)

1933 mein New theatres ki film Puran Bhagat mein K L Saigal ke gaaye
do geet the jo kaafi lokpriya huye. Is film mein unke saath

the Krishna Chandra Dey jinhone baaki geeton ko gaaya. Suniye Raag
Bihad par aadhaarit Puran Bhagat film ka yeh geet.

Song: Radha Rani de daaro na bansuri mori (Puran Bhagat)

San 1934 mein aayi film Yahudi Ki adki jo sahi maaine mein K L Saigal
ki pehli badi film thee. Raag Bhimpalasi par aadhaarit Ghalib

ki ek ghazal Saigal ki awaaz mein is film mein shobha paayee jise
logon ne behad pasand kiya. Jaante hain woh ghazal kaun si

thee?

Song: Nuktachi hai gham-e-dil (Yahudi Ki Ladki)

1934 mein hi bani film Chandidas jisme Saigal sahab nazar aaye nayika
Uma Shashi ke saath. Is film ko behad kaamyaabi mili aur K

L Saigal-Uma Shashi ki hit jodi ban gayi. Is film ki ek aur khaas
baat yeh rahi ki iske geeton ne film sangeet ko ek naye mukaam par

laa khadaa kiya. Ab tak film sangeet theatre sangeet par hi adharit
huya karta tha, lekin is film ke geeton ne film sangeet ko ek alag

ek nayi pehchaan dilwaaee. Khol, manjire aur mridang jaise vaadyon ka
istemaal kiya gaya tha iske geeton mein. Suniye K L Saigal

aur Uma Shashi ka gaaya yeh geet.

Song: Prem nagar mein basaayungi ghar main (Chandidas)

K L Saigal ki filmon ki fehrist mein shaayad sabse hit film rahi hai
1935 mein New Theatres ki banner taley bani film Devdas. Kedar

Sharma ke bol aur Timir Baran ke sangeet ke zariye Saigal saahab ke
gaaye is film ke yaadgaar naghmein pahunche ghar ghar mein.

Song: Baalam aaye baso more mann mein (Devdas)

Film Devdas ke Bangla version mein K L Saigal ne Kavi guru
Rabindranath Tagore ki ek rachna ko swar diya tha, suniye usi ki ek

jhalak.

Song: Golaap hoye uthuk phoole (Devdas-Bangla)

Chandidas aur Devdas ki apaar kaamyaabi ne K L Saigal ko superstar
banaa diya. 1935 mein unki Asha Rani se vivaah huya aur woh

apne parivaar ke saath hansi khushi din beetaane lage.

Song: Jagat mein prem hi prem bhara hai

isi dauraan New Theatres ke sangeetkaar Rai Chand Boral ne pehli baar
paarshwa gaayan shuru kiya film Dhup Chhaon mein aur K L

Saigal ne gaaya pehla play backed song.

Song: Andhe ki laathi tu hi hai (Dhoop Chhaon)

R C Boral speaks: Main aaj is industry mein 40 saal se hoon. Us
zamaane mein outdoor par bhi recording karni padtee thee. Fil

Street Singer mein to kabhi sadkon par, kabhi trck ke upar, kuchh
chalte chalte record karna padaa tha.

Aayiye sune film Street Singer ki aisi hi ek thumri.

Song: Babul mora naihar chhut hi jaaye (Street Singer)

Vividh Bharati par is samay aapne tune kiya hai karyakram Sargam Ke
Sitare jismein hamare aaj ke sitaare hain mahaan fankaar

Kundan Lal Saigal.

Song: Jeevan bhi madhur na baje (Street Singer)

San 1938 mein K L Saigal Allahabad mein aayojit Prayag Sangeet
Samaroh mein shaamil huye. Unke gaaye geeton ko sunkar

wahaan maujood Ustad Faiyaz Khan, Abdul Karim Khan, Bal Gandharva,
aur Pt Omkar Nath bhaav vibhor ho gaye. Aisa kaha jaata

hai ki Saigal sahab ki awaaz mein Raag Darbari sunkar Faiyyaz Khan ne
unhe kaha tha ki "bete, aisa kuchh naheen hai jo main

tumhe ab seekha sakoon"

Song: Deewana hoon raat se main begaana hoon (Zindagi)

Lori ki baat chale aur K L Saigal ke gaaye loriyon ka zikr na ho, yeh
to ho hi naheen sakta. Film Zindegi mein Kedar Sharma ka likha

aur Saigal sahab ka gaaya "Soja rajkumari" jaisi lori aaj tak doosra
naheen ban paaya hai. Is mein Saigal sahab ke "so jaa" kehne ka

andaaz behad niraala hai, aap khud hi suniye.

Song: Sojaa rajkumari (Zindagi)

San 1940-41 ke dauraan Dwitiya Vishva Yudh shuru gaya aur Kalkatta
mein jaatiya dange shuru ho gaye. Is damaadol mein New

Theatres dheere dheere band ho gayi. K L Saigal Bambai aa gaye aur
Ranjit Studios mein shaamil ho gaye. Bhakt Surdas thee

Saigal sahab ki pehli film Ranjit Studios ke liye.

Song: Madhukar shyam hamare chor (Bhakt Surdas)

1943 mein Ranjit Studios ki banner par bani film Tansen jismein K L
Saigal nazar aaye abhinetri Khurshid ke saath. Film behad

kaamyaab. Iske sangeetkaar the Khemchand Prakash, jinhone shastriya
sangeet ka aisa jadoo is film mein dikhaya ki is film ke

gaane amar ho gaye.

Song: Diya jalaao jagmag jagmag (Tansen)

Ustad Allahdiya Khan ki bandishon par aadharit yeh dhrupad...

Song: Sapta suran teen graam (Tansen)

Khurshid ke saath Raag Tilak Kamod par aadhaarit isi film ka yeh
geet...

Song: Bhool jayyo na (Tansen)

Film Tansen ki safalta se prerit hokar nirmata A K Kardar ne apni
agli film Shahjehan ke liye Saigal sahab ko chun liya. Is film mein

sangeet de rahe the naye sangeetkaar Naushad. Saigal sahab in dino
sharaab ke nashe mein yun apne aapko bekhud kar diya tha ki

unki haalat bigadti chali gayi.

Song: Karo mei jannat ke nazaare (Shahjehan)

Shayar Khumar Barabankvi aur is film se apna career shuru karnewale
naye geetkaar aur shayar Majrooh Sultanpuri ki rachnaayon ko

apni awaaz se amar banaya K L Saigal ne.

Song: Haaye haaye yeh zaalim zamana (Shahjehan)

Film Shahjehan mein Saigal sahab aur saathiyon ka gaaya huya ek geet
mein hai jismein Mohd Rafi sahab ne chorous mein apni

awaaz milaayee thee. Suniye woh geet.

Song: Mere sapnon ki rani Ruhi Ruhi Ruhi (Shahjehan)

Shahjehan hi K L Saigal sahab ki aakhri film thee. Is fil ke ek geet
ke recording se judee ek ghatna bataarahe hain is film ke

sangeetkaar Naushad.

Naushad speaks: "Jab dil hi toot gaya", is geet ki recording par
Saigal sahab aaye. Unhone kaha ki main chauki par baithkar hi

gayunga. To unke liye chauki mangwaya gaya, unhone galaa saaf kiya
aur apni driver ko bulakar kaha "jaayo mera kaala paanch le

aayo". Hum sab hairaan ho gaye ki yeh kaala paanch kya hai. kaala
paanch to ek raag ka naam hai. Driver kala paanch le aaya, aur

aigal sahab ne peena shuru kiya. Saath hi saath gaate bhi chale gaye,
ek ke baad ek take hota gaya, par we santusht naheen huye,

is tarah ek samay ke baad we aur gaane ki sthiti mein naheen the.
Agle din jab phir we aaye to maine kahaa ki pehle aap mujhe ek

take de deejiye, phir aap peena shuru kijiye, main kuchh naheen
kahunga. To unhone bina peeye ek take de diya aur phir peene lage

aur gaate rahe. Agle din unhone bina peeye wala version suna aur
kahaa ki "dekha maine kaha tha ki peekar hi main achchha gaata

hoon". Maine kaha ki Saigal sahab, yeh version aapka bina peeye wala
version tha. We hairaan rahe gaye. Maine kaha ki aap bina

peeye hi achchha gaate hain, jin logon ne aap se yeh kaha hai ki
peeye bagair aapki awaaz naheen khulti, woh aapke dost naheen

hai. Saigal sahab ne mujhse kaha ki "AGAR YEHI BAAT MUJHSE PEHLE KISI
NE KAHAA HOTA TO SHAYAD KUCHH DIN AUR

JEE LETA"

Song: Jab dil hi toot gaya (Shahjehan)

Aur 18 January 1947 ko 42 varsh ki aayu mein Saigal sahab is duniya
se apni antim yatra par chal pade.

Song: Chaah barbaad karegi humein maloom na tha (Shahjehan)

Hindi Film Sangeet ko pehli baar lokpriyata ki shikhar ka nazaara
karwaane ke liye Saigal sahab ke yogdaan ko hamesha yaad kiya

jaayega.

Song: Aye dil-e-bekaraar jhoom (

K L Saigal ka andaaz aisa anokha tha ki kai bade bade fankaaron ne
unke naqsh-e-kadam par chalkar apna career shuru kiya,

jinmein shaamil hain Mukesh, Kishore Kumar, C H Atma, Jagmohan aur
Surendra jaise naam.

Manna Dey Speaks: Mere chachaji K C Dey ke saath Saigal sahab ka
uthna baithna hota tha, yeh mere doston ko pataa tha, is liye

we hamesha mujhe Saigal sahab ke geet gaakar sunaane ko kehte the.
Main unhi ke geeton ko gaakar kai baar college functions

jeete.

Song: Chhupo na chhupo na humse chhupo na (My Sister)

Apne 15 saal ke chhote se filmi safar mein K L Saigal ne aise amar,
meethe aur yaadgaar gaane humein diye hain jo unke jaane ke

itne saalon ke baad bhi unhe hamaare hi beech mein jeevit kar rakhe
huye hain. Aise mahaan kalakaar is duniya se jaakar bhi apni

kala ke zariye zinda rehte hain aur hamesha zinda rahenge. Kundal Lal
Saigal ki smriti ko sahasra naman.

Song: Kyun mujhse khafa hai tu kya maine kiya hai (My Sister)

THE END