Namaskaar, aaj ka yeh karyakram kendrit hai is daud ke lokpriya
sangeetkaar jodi Jatin Lalit par.

Song: Woh Sikander hi doston kehlata hai (Jo Jeeta Wohi Sikander)

Yuva sangeetkaar jodi Jatin Lalit ka taallukh sangeetmay parivaar se
to hai par parivaar ki taraf se is kshetra mein jaane ke liye unhe
koi badhaawa naheen mila. Parivaar chaahti thee ki dono bhai kisi aur
kshetra mein jaaye. Par sangeet ke prati unki rujhaan unhe isi taraf
badhne ke liye prerit karti rahi. Aur 1989 mein Jatin Lalit ke
dilkash dhuno mein sajkar release huyi ek gair filmi album - Rhythms
of Love, jiske kuchh gaane baad mein film Yaara Dildara mein shaamil
kar lee gayi.

Song: Tum hi hamari ho manzil my love (Yaara Dildara)

Iske do saal baad, unke kisi dost ne Jatin Lalit ke baare mein
Mansoor Khan ko bataaya. Unhone jab unki dhune suni to is kadar
prabhaavit huye ki apni agli film mein unhe sangeet dene ka adhikaar
de diya, aur woh film thee Jo Jeeta Wohi Sikander.

Song: Jawaan ho yaaron yeh tumko huya kya (JJWS)

Jo Jeeta Wohi Sikander ek blockbuster film saabit huyi aur is
kaamyaabi mein Jatin Lalit ke sangeet ka yogdaan kam naheen tha. Is
film ke gaane shrotaaon ko khoob pasand aaye.

Song: Pehla nasha pehla khumaar (JJWS)

1992 mein behad kaamyaab saabit huyi Jo Jeeta Wohi Sikander. Isi saal
Jatin Lalit ke sangeet se saji do aur hit filmen aayi. Inmein ek thee
Khilaadi, jismein Jatin Lalit ne apni pratibha ka loha ek baar phir
manwaya.

Song: Waada raha sanam honge juda na hum (Khilaadi)

Aur doosri film thee Raju Ban Gaya Gentleman. Is film ke gaane bhi
khoob pasand kiye gaye.

Song: Loveria huya (Raju Ban Gaya Gentleman)

Uske baad 1995 mein Jatin Lalit ke sumadhur geeton ke saath super-
duper hit film aayi Dilwale Dulhaniya Le Jaayenge.

Song: Tujhe dekha to yeh jaana sanam (DDLJ)

Is film ke baad Jatin Lalit ko sangeet premiyon ne hi dil se naheen
lagaaya balki film nirmata aur nirdeshakon ki we pehli pasand ban
gaye. Aur we ek ke baad ek hit filmein dete chale gaye. Yeh filmen
hain Yes Boss...

Song: Main koi aisa geet gaayun (Yes Boss)

Pyar Kiya To Darna Kya...

Song: O o jaanejaana (PKTDK)

Pyar To Hona Hi Tha...

Song: Pyar to hona hi tha (PTHHT)

Kuch Kuch Hota Hai...

Song: Tum paas aaye yun muskuraaye (KKHH)

aur Mohabbatein...

Song: Humko humhi se churaalo (Mohabbatein)

Jatin Lalit ki dhuno mein taazgi to hai hi, madhurta aur komalta bhi
hai jo seedhe dil mein utar jaati hai.

Song: Mere khwaabon mein jo aaye (DDLJ)

Jatin Lalit ko stardom ki raah par le jaanewaali film thee Dilwale
Dulhaniya Le Jaayenge, jismein Karan Johar Assistant Dircetor ke roop
mein kaam kar rahe the. 1998 mein jab Karan Johar ne swatantra roop
se film nirdeshit kee to unhone sangeetkaar chuna Jatin Lalit ko,
film thee Kuch Kuch Hota Hai.

Song: Koi mil gaya (KKHH)

Karan Johar ki agli film Kabhi Khushi Kabhie Gham mein bhi Jatin
Lalit ka sumadhur sangeet raha.

Song: Bole choodiyan bole kangna (K3G)

Jatin Lalit ke sangeet se sajee kuchh aur filmon ke naam hain Phir
Bhi Dil Hai Hindustani, Khoobsurat, arfarosh, Sangharsh, aur Silsila
Hai Pyar Ka.

Song: Yeh silsila hai pyar ka yeh chalta rahega (SHPK)

Jatin Lalit dwaara sangeetbaddha kiye huye geeton ka silsila yunhi
chalta rahe, unhe kaamyaabi aur shohrat ki bulandiyaan naseeb ho,
Vividh Bharati parivaar ki or se unhe hamari yahi shubhkaamnaayen
hain.

Song: Zara sa jhoom loon main (DDLJ)

THE END