Namaskaar doston, haazir hai Amarkant aur aaj mere saath hain Aaj Ke
Fankaar.

Song: Hansta huya noorani chehra (Parasmani)

Hamare aaj ke fankaar hain geetkaar Asad Bhopali.

Song: Woh jab yaad aaye bahut yaad aaye (Parasmani)

Film sangeet ko geeton se samriddha karnewale geetkaaron mein ek naam
Asad Bhopali ka bhi hai, jinhone barson baras tak har mood, har rang
ke geet humein diye.

Song: Hum tumse juda hoke mar jayenge ro ro ke (Ek Sapera Ek Lutera)

Saathiyon, barson pehle Asad sahab ne Vividh Bharati ke ek karyakram
mein shirkat kee thee, aayiye hamare sangrahalay se praapt usi
recording se kuchh ansh sune.

Asad Bhopali speaks: 29 saal pehle Fazli Brothers ne film Duniya ke
liye gaane likhne ko bulaya, aur main Bhopal ki galiyon mein
ghumnewala Bambai aa gaya, aur aaj tak 2000 gaane likh chuka hoon.
Aaj bhi main yahaan pane aap ko ajanabi mehsoos karta hoon, par kabhi
koi mujhse kehta hai ki...

Song: Ajanabi tum jaane pehchaane se lagte ho (Hum Sab Ustad Hain)

Geetkaar Asad Bhopali ne jahaan ek taraf yeh geet likha...

Song: Sau baar janam lenge (Ustadon Ke Ustad)

...doosri taraf film Maine Pyar Kiya ka yeh geet bhi lokpriyata ke
shikhar par pahuncha.

Song: Kabootar ja ja ja (Maine Pyar Kiya)

Asad Bhopali speaks: Do sher mulaiza keejiye - Khwaabon se khayaalon
se haqeeqat bahut achchhi, Jannat se mere ghar ki angnaai bahut
achchhi, Ahsaas ke sheeshe pe kyun dhool chadhaate ho, Naadaano ki
sohbat se tanhaai bahut achchhi. Baat sohbat ki jab aa gayi hai to
aapko bataa doon ki geetkaar ka sohbat sangeetkaar se sabse zyaada
hoti hai. Maine ab tak naye puraane lagbhag sabhi sangeetkaaron ke
saath kaam kiya hai jaise C.Ramchandra, Hansraj Behl, Shyam Sundar,
Naushad, Husnlal Bhagatram, Chitragupt, Ganesh, Laxmikant Pyarelal,
Kalyanji Anandji, Ravi, aur Usha Khanna. Bahut hi dostana maahaul
mein in sab ke saath maine kaam kiya.

Song: Ae mere dil-e-nadaan tu gham se na ghabrana (Tower House)

Asad Bhopali ke kalaam ka yeh jadoo hai ki jo bhi geet unhone
likha,logon ke zubaan pe chadhaa, aur phir aisa chadhaa ki aaj bhi
kaayam hai. Aayiye Asad sahab ke likhe kuchh aur naghmon ke ansh sun
liya jaaye.

Song: Mere dil mein halki si (Parasmani)
Song: Do dil dhadak rahe hain aur awaaz ek hai (Insaf)
Song: Chaand kya hai roop ka aangan (Dhamkee)
Song: Dil ki baaten dil hi jaane (Roop Tera Mastana)
Song: Main jis din bhula doon (Police Public)
Song: Dil deewana bin sajna ke (Maine Pyar Kiya)

Asad Bhopali aaj hamare beech nahin hain, par unke likhe geeton ke
zariye aaj bhi zamana unhe dhoondta hai, unhe yaad karta hai. Vividh
Bharati parivaar ki or se Asad sahab ko shraddhanajali.

Song: Dil ka soona saaz tarana dhoondega mujhko mere baad zamana
dhoondega (Ek Naari Do Roop)

THE END