BASED ON AN INTERVIEW OF YOGESH IN HAMARE MEHMAAN PROGRAMME BROADCAST
ON VIVIDH BHARATI ON 15 JUNE 2005


Song: Maine kaha phoolon se (Mili)

Namaskaar doston, hamare aaj ke fankaar hain film jagat ke
suprasiddha geetkaar Yogesh.

Song: Ni sa ga ma pa ni sa re ga (Anand Mahel)

Doston, Yogesh aise geetkaar hain jinhone apne geeton mein shudh
Hindi bhasha ka bahut hi sundarta se prayog kiya hai jo atyant
karnapriya ban pade hain.

Song: Kahaan tak yeh mann ko andhere chhalenge (Baaton Baaton Mein)

Aise aur na jaane kitne gaane hain jo unke aisi sundar bhasha se
susajjit huyi hai. Aayiye ek aur aisa hi meetha gaana sun liya jaaye.

Song: Kai baar yunhi dekha hai yeh jo mann ki seema rekha hai
(Rajnigandha)

Yogesh speaks: Mere pitaji ki mrityu ke baad mujhe Lucknow chhodna
padaa. Hamare ek aatmiya sambandhi Bambai mein film line mein the,
socha ki kahin na kahin laga denge, par aisa bilkul nahin huya. Balki
mera ek dost jo mere saath class V se saath mein hai, woh mere saath
Bambai aa gaya. Usi ne mujhse kaha ki tumjhe filmline mein hi jaana
hai. Yahaan aakar pehle 3 saalon tak to bhatakte rahe. 3 saalon tak
kai sangeetkaaron ne "kal aayiye parson aayiye" hi sunta raha. Aise
karte karte ek din Robin Banerjee ne mujhe bulaya aur kaha ki ek low
budget film hai, jiske liye main gaane bana raha hoon. Ek saal tak
hum gaane banaate rahe aur gaane stock hote gaye. To jab Sakhi Robin
film ke liye producer ne gaane mangwaaye, ek hi din mein 6 gaane unhe
pasand aa gaya kyunki gaane hamare paas stock mein hi tha, aur har
gaane ke liye 25 rupay mile.

Song: Tum jo aayo to pyar aa jaaye (Sakhi Robin)

Yogesh speaks: Phir log dheere dheere mujhe jaanne lage. Sakhi Robin
chhoti film thi par iske gaane hit huye the. Radio Ceylon ke
programme mein doosre bade bade geeton ke saath Sakhi Robin ka yeh
geet bhi baj raha tha. Phir ek baar Gulzar aur Anjaan sahab mujhse
aur Robinji se aakar mile aur unhone yeh prastaav diya ki kyun na hum
sab ek team banakar kaam karen, we log bhi un dino struggle kar rahe
the. Hum tayyaar ho gaye, is tarah se har film ke liye hum do do teen
teen gaane aapas mein share kar lete. Iske baad G.S.Kohli ki film
Adventures of Robinhood mein maine geet likhe.

Song: Maana mere haseen sanam (Adventures of Robinhood)

Doston, hum aapko pehle yeh bata chuke hain ki Yogesh ke geeton mein
Hindi ke shudh saral shabdon ka bahut hu sundar prayog hota raha hai,
iska kya kaaran hai, aayiye sunte hain unhi se...

Yogesh speaks: Salilda ke jo compositions the unmein Urdu ke shabdon
ki gunjayish nahin hoti thee. Unke dhune aisi hoti ki Urdu ke words
usmein fit nahin ho sakte. Pehle wahaan Shailendraji likhte the jo
seedhe saral shabdon mein gehri baat keh jaate the. Ek aur baat, main
to Salilda se yeh keh chuka hoon ki agar we sangeet ke bajaay lekhan
ki taraf dhyaan dete to Rabindranath Tagore ke baad unhi ke
kavitaayen jagah jagah goonjte.

Song: Kahin door jab din dhal jaaye (Anand)

Yun to Yogesh ne kai sangeetkaaron ke saath kaam kiya par sabse
zyaada kaam unhone sangeetkaar Salil Choudhury ke saath kiya, aur
aisa kiya ki har ek geet amar ho gaya.

Song: Na jaane kyun hota hai yeh zindegi ke saath (Chhoti Si Baat)

Doston, yeh sach hai ki Yogesh ke geet kavitaayon par aadhaarit hote
hain, par ab jo geet hum aapko sunwaane jaa rahe hain, balki jo
ghazal sunwaane jaa rahe hain, usey sunkar aapko yeh andaaza ho
jaayega ki unhe Hindi ke saath saath Urdu mein bhi maharath haasil
hai. Yeh ghazal hai film Chalbaaz ka jo release na ho paayi. Iske
sangeetkaar the Madan Mohan.

Song: Jayiye humse khafa ho jaayiye, dushmano ka aasra ho jayiye
(Chalbaaz)

Filmi geeton ke saath saath Yogesh ne kai gair filmi get bhi likhe jo
kaafi lokpriya huye. Sangeetkaar Shyam Sagar ke swarbaddha Suman
Kalyanpur ki LP record Swar Bahaar ke liye unhone likhe 3 gaane.

Song: Kitni baar mile tum mujhse (Album - Swar Bahaar)

Shyam Sagar ke hi sangeet nirdeshan mein Manna Dey ke gair filmi
album Mayurpankhi Sapney mein Yogesh ne likhe 2 geet.

Song: Kuchh aise bhi pal hote hain (Album - Mayurpankhi Sapney)

Iske alawa Doordarshan ke liye 12 choral geeton ki bhi unhone rach
kee jinhe Delhi Choir ne gaaya. In geeton ke sangeetkaar the Salil
Choudhury.

Song: Chalo bhor ke raahi (Choral Song)

Aayiye Yogesh ke likhe kuchh aur lokpriya filmi geeton ke ansh sune.

Song: Rimjhim gire saawan (Manzil)
Song: Guzar jaaye din (Annadaata)
Song: Har pal chaahe mera dil (Gudgudee)
Song: Badi sooni sooni hai (Mili)

Yogesh speaks: Mere geet gaate rehna, Mere geet gungunaate rehna,
Main agar bhool bhi jaayun geeton ka safar, Tum mujhe yaad dilaate
rehna.

Song: Zindegi kaisi hai paheli (Anand)

THE END