Aap sabhi ko Renu Bansal ka namaskaar.

Song: Manmor huya matwala kisne jadoo daala (Afsar)

Doston, barson se yeh awaaz kaano mein ras gholti chali aa rahi hai,
is awaaz ke jadoo ne sar chadhke bola hai, is awaaz ka naam us
peedhee ke logon ko to bataane ki zaroorat naheen hai, par aaj ki
peedhee ko naam batana hi padega, yeh awaaz hai guzre zamaane ki
singing film star Suraiya ki jo hain hamare aaj ke fankaar.

Song: Mann leta hai angraai jeevan pe jawani chhaayi (Anmol Ghadi)

Suraiya, jee haan, unke baare mein kya kahen, unka to naam hi sur se
shuru hota hai. Suraiya ne jis daud mein apna career shuru kiya tha
us zamane mein playback system prachalit naheen thi, yaani ki jo
abhineta parde par gaate wohi parde ke peechhe bhi gaate. Suraiya ne
filmon mein baal kalakaar ke roop mein shuruwaat kee. Unhone Raj
Kapoor ke saath radio par bachchon ke liye kai karyakram pesh kiye.
1942 ke aas paas Baby Suraiya ke naam se kuchh 5-6 filmon mein
abhinay kiya. Abhinetri Mehtab ke saath ek geet ki recording mein
sangeetkaar Naushad ko unhe stool par khadaa karwakar gawana padaa
tha.Us
waqt kisi ko bhi yeh pataa naheen tha ki badi hokar yeh har dil pe
raaj karegi.

Song: Naino mein preet hai hothon pe geet hai (

Yun to har film kalakaar ke apne prashansak hote hain, par agar
kalakaar mein roop ke saath saath swar ka bhi sangam ho, badi badi
nasheeli ankhon ke saath saath shahad jaisi meethi awaaz ho to
prashansakon aur chaahnewaalon ki sankhya kai guna badh jaati hai.
Dhadakte dil liye cine premi bheetar ke taraf kheenche chale jaate
hain.

Song: Dhadakte dil ki tamanna ho mera pyar ho tum (Shama)

Suraiya ne apne chhote se filmi safar mein kareeb 71 filmon mein kaam
kiya. Is dauraan us daud ke lagbhag sabhi jaanemaane sangeetkaaron ke
liye gaane gaaye aur alag alag moods ke geet gaakar apne fan ke johar
dikhaaye.

Song: Yeh kaisi ajab dastaan ho gayi hai, chhupate chhupate bayaan ho
gayi hai (Rustam Sohrab)

Suraiya ne na kevalapne daud ke mashoor sangeetkaaron ke saath kaam
kiya balki apne zamane ke legendary kalakaaron ke saath bataur
abhinetri kaam kiya. Anmol Ghadi mein Noorjehan ke saath, Dard mein
Munabbar Sultana ke saath aur Kundan Lal Saigal ke saath bhi unhone
kaam kiya. 1948-49 mein Pyar Ki Jeet, Badi Bahen, aur Dillagi jaisi
filmon ke apaar safalta ke baad we highest paid star ban gayeen.

Song: Tumera chaand main teri chaandni (Dillagi)

1950 ke asspaas unki shohrat mein kuchhkamee aayi thi ki Sohrab Modi
ki film Mirza Ghalib ne ek baar phir unhe shohrat ki bulandi par
pahuncha diya. Is film mein unhone Mirza Ghalib ki mehbooba
Chaudhween Begum ka role ada kiya tha. Shayrana andaaz waale Pt
Jawaharlal Nehru ne Suraiya ko is film ke liye shabashi diya tha.
Aapko yaad hoga doston kiMirza Ghalib woh film hai jiski peshani par
Rashtrapati Puraskaar ka tilak lagaya gaya tha.

Song: Nuktacheen hai gham-e-dil (Mirza Ghalib)

Jaisa ki humne aapko bataya ki Suraiya ne apne zamane ke sabhi bade
abhinetaaon ke saath abhinay kiya, Dev Anand ke saath bataur heroine
unhone 6 filmon mein kaam kiya, inke naam hain, Sanam, Afsar, Vidya,
Neeli, Do Sitare, aur Shayar.

Song: Naina deewani ek naheen maane (

Film MIrza Ghalib Suraiya ke filmi safar ke aakhri dino ki baat hai.
Phir woh chamak dhamak se door chali gayi aur gumnaami ke andhere
mein kho gayi. Abhi haal mein ek bhavya samaaroh mein unhe film jagat
mein avismaraniya yogdaan ke liye sammaanit kiya gaya, aisa lagaa
maano ek baar phir woh sunehra zamana aakhon ke saamne taaza ho gaya.

Song: Aah ko chaahiye ek umra asar hone tak (Mirza Ghalib)

Doston, aaj humne baat kee singing film star Suraiya ki, ab deejiye
Renu Bansal ko ijaazat, namaskaar.

THE END