Aap sabhi ko Renu Bansal ka namaskaar. Doston, hamare aaj ke fankaar
hain geetkaar aur nirdeshak Bharat Vyas.

Bharat Vyas speaks: Apni dharti apna hi aakaash paida kar, apni
mehnat se apna jahaan tayyaar kar.

Isi aatmavishvaas ke saath Bharat Vyas Mumbai aaye, aur vishamtaaon
mein bhi unhone is vishvaas ka pallu kabhi naheen chhoda. Rajasthan
ke Churu mein janme aur Kalkattamein shiksha praapt karne ke baad we
Mumbai chale aaye nirdeshak banne ka sapna lekar. Nirdeshak we ban
naheen paaye, paristhitiyon ne unhe geetkaar bana diya. Unka jiya dol
raha tha nirdeshak banne ko, par bhagya ke atariya par baitha kaaga
kuchh aur hi bol raha tha.

Song: More atariya pe kaga bole (Ankhen)

Doston, abhi jo yeh geet aapne suna, film Ankhen ka yahi geet Bharat
Vyas ko ek geetkaar ke roop mein sthaapit kar diya tha. Sanyog se is
geet ko sangeetkaar Madan Mohan ne sanwara aur yeh film Madan Mohan
ki bhi pehli film thee. Bataur geetkaar Bharat Vyas ki pehli film
thee san 1943 ki Duhaai jismein unhone kul 9 gaane likhe. Is film ke
gaane to Vividh Bharti ke library mein uplabdh naheen hai. Yeh gaane
keval film ke print par utaare gaye. Pata naheen aaj is film ke print
surakshit hain bhi ke naheen! 40 ke dashak mein nirmata W Z Ahmed ke
saath we Pune chale aaye aur Shalimar Company ka nirmaan huya. Is
company ki pehli film Prem Sangeet ke liye Bharat Vyas ne 12 geet
likhe aur iska ek geet "Ghaayal karke poochhte ho dard hota hai kya"
unhone khud gaaya. San 1944 mein Shamilmar ki film Man Ki Jeet ke
liye 2 gaane likhe jiske baaki ke geet likhe Josh Malihabadi ne.
Shalimar company ki ek aur ullekhniya film Prithviraj Sanyogita mein
bhi Bharat Vyas ne geet likhe. Kuch samay baad Bharat Vyas Pune se
Madras chale gaye, par jald hi haalat unhe Mumbai liwa laaye, kyunki
unke naseeb mein to bas geet likhna hi likha tha. Atah we lautkar aa
gaye sirf geetkaar ke roop mein.

Song: Aa laut ke aaja mere meet (Rani Roopmati)

Bharat Vyas ke geeton mein bhaavnaaon ka kaavyatmak varnan milta hai
jiski wajah se unhe filmi duniya mein ek alag hi sthaan haasil hai.
Film duniya se unki aisi lagan lagi ki baaki sab kuchh chhoot gaya.

Song: Laagi tumse lagan saathi chhoote na (Saranga)

Shuru shuru mein filmi geeton mein Urdu ka zyada chalan tha. Aise
mein Bharat Vyas ne apni alag pehchaan banaayi aur Hindi ka daaman
thaamaa. Kavita ke dang mein kuchh aise geet likhe ki sunnewaale
mohit huye bina naheen reh paaye.

Song: Tum gagan ke chandrama ho main dhara ki dhool hoon (Sati
Savitri)

Jo geet abhi aapne suna woh Bharat Vyas ke geeton ki kadiyon mein
bahut baad mein darj huya. San 1949 mein we mile sangeetkaar
Khemchand Prakash se aur in dono lubhana shuru kar diya apne
shrotaaon ko. Ziddi, Saawan Aaya Re, Tamasha aadi filmon mein in dono
ne saath saath kaam kiya. 50 ke dashak mein Bharat Vyas ke dhaarmik
aur aetihaasik filmi geet khoob lokpriya huye. Hindi ke jatil shabdon
ko bade khoobsurat andaaz mein unhone geeton mein dhaala. Kalidas ki
amar naatak Abhigyan Shakuntalam par aadhit V Shantaram ki film ka
yeh pranay geet is baat ka satheek pramaan hai.

Song: Aaj madhubaataas dole (

Bharat Vyas ke aetihaasik aur dhaarmik gaane likhne ka yeh matlab
katai naheen hai ki we filmi geeton ke aadhunik awashyaktaaon se
anabhigya the. Aaj jis tukbandi aur rap ka zamana chala hai, usey kai
saal pehle Bharat Vyas ne hi shuru kiya tha. Film Navrang mein
baakhubi se tukbandi ko utaara, bahut hi niraale shabdon ka prayog
unhone kiya, jismein na to bematlab ke bol the aur na hi sasti
tukbandi. Zara baandgi to dekhiye.

Song: Kaviraja kavita ke ab (Navrang)

Apni lkehni ko na keval adhunik rap sangeet mein dhaala, balki haasya
vyang ko bhi ismein shaamil kiya. Film Navrang ke ek geet mein unhone
swayam bhi ek geet gaaya tha.

Song: Dhande ki kuchh baat karo kuchh paise jodo (Navrang)

Bharat Vyas ko filmon mein geet likhkar paise jodne mein kitni
safalta mili yeh to hum naheen jaante, par sangeetkaar Vasant Desai
ke saath milkar humein kuchh aise geeton ka uphaar unhone diya jo
apne aap mein ek anmol dharohar hai aur jinka mulyaankan karna
mushkil hi naheen asambhav hai. Is geetkaar-sangeetkaar jodi ne Do
Ankhen Barah Haath, Toofan Aur Diya, Goonj Uthi Shehnaai, Mausi,
jaise kai filmon mein sumadhur sangeet diya. Vasant DEsai ke sur aur
Bharat Vyas ke geeton ne geet sangeet ki aisi barsaat kee ki Sargam
ki devi ne bhi khoob dil kholkar aashish barsaaye.

Song: Tere sur aur mere geet (Goonj Uthi Shehnaai)

Aaj Ke Fankaar the suprasiddha geetkaar aur Rajasthani filmon ke
nirdeshak Bharat Vyas. Ab yeh karyakram samaapt karne ki Renu Bansal
ko deejiye ijaazat, namaskaar.

THE END