Sabhi sunnewaalon ko Renu Bansal ka namaskaar!

Song: Pyar ki kashti mein (Kaho Naa Pyar Hai)

Jee haan doston, Aaj Ke Fankaar roopi is kashti mein hum savaar hain
aur sureeli lehron ko cheerte huye aage badh rahe hain, aur is
sureele safar mein hamaare saath aaj hain hamare Aaj Ke Fankaar
nirmata, nirdeshak, lekhak aur geetkaar Sawan Kumar Tak.

Song: Apne dil mein jagah deejiye (Hawas)

Doston, logon ke dilon mein Sawan Kumar Tak ne to jagah banaa hi
liya, lekin unka is film jagat mein padaarpan kaise huya, aayiye unhi
se sunte hain.

Sawan Kumar Tak speaks: Main hero banna chaahta tha aur isi uddeshya
se yahaan pe aaya tha, par nahin ban sakaa. Main waapas to naheen jaa
sakta tha, isliye socha ki kuchh aisa karoon ki yaheen pe reh jaayun.
Meri pehli film thi Naunihal.

Song: Tumhari zulf ke saaye mein shaam kar loonga (Naunihal)

Sawan Kumar Tak speaks: Naunihal mein music director the Madan Mohan
aur gaane likhe Kaifi Azmi ne, jo yaadgaar saabit huye. Maine is film
mein do naye abhinetaaon ko chance diya. Mujhe kisi ne mauka naheen
diya, isliye mujhme koi badle ki bhaavna naheen thi, maine yeh soch
liya tha ki agar main kabhi producer bana to naye talents ko chance
doonga. To jin do kalakaaron ko maine is film mein liya woh the
Sanjeev Kumar aur Junior Mahmood.

Doston, Sawan Kumar Tak ki pehli film bataur nirmata thi Naunihal.
Nirmata se nirdeshak woh kaise bane suniye unki zubaani.

Sawan Kumar Tak speaks: Main ek baar Mehraji ko apni kahaani sunaane
gaya. Maine unse poochha ki aap kis director se is film ko direct
karwaane ki soch rahe hain? Unhone kaha ki jisne kahaani sunaayi
ussey achchha direcyor is film ke liye to ho hi naheen sakta. Maine
socha ki woh mazaak kar rahe hain, par unhone kaha ki aapne jis
khoobsurti se kahaani sunaayi, waise hi shoot karo. Afsos is baat ka
hai ki film bante bante hi woh is duniya se chale gaye. Main un logon
mein se hoon jo film hit hone se deewana naheen ban jaate aur film
flop hone se paagal naheen ban jaate.

Song: Kaise jeet lete hain log dil kisi ka (Saajan Bina Suhagan)

Sawan Kumar Tak speaks: Meri pehli film, as a director thi Saajan
Bina Suhagan, iske baad doosri film aayi Gomti Ke Kinare, jo Meenaji
ki aakhri film thi. iske baad maine film Hawas banaane ki sochi.
Majrooh sahab ne gaane likhne se manaa kar diya, paise ka problem
tha. Maine decide kiya ki main khud gaane likhoonga. Maine sabse
pehla gaana likha "Teri galiyon mein na rakhenge kadam aaj ke baad"
aur maien sachmuch kisi geetkaar ki galiyon mein kadam rakhna chhod
diya. Usha Khannaji ko jab is gaane ke bol sunaaye to turant unhone
tune banaa daali. Yeh mera likha pehla recorded gaana tha.

Song: Teri galiyon mein na rakhenge kadam (Hawas)

Sawan Kumar Tak speaks: Shaayri meri kamzori rahi hai, jo mujhe kaafi
hadh tak inspire bhi karti hai. Ya to main ek minutemein gaana likh
doonga ya phir ek saal mein bhi naheen likh paayunga. Film Sabak ke
is gaane ke dono versions maine dus minute ke andar likh daale.
Mukesh ka gaaya yeh gaana kaafi hit huya.

Song: Barkha rani zara jam ke barso (Sabak)

Doston, aisa kaha jaata hai ki Sawanji apne geeton mein aksar "sawan"
shabd ka prayog karte hain. Dekhen woh kya kehte hain is baare mein.

Sawan Kumar Tak speaks: Yeh maine Ghalib se seekha hai. Unke har
ghazal mein "Ghalib" shabd ka prayog woh karte the. Fark is baat ka
hai ki unhone isliye apne naam ka istemaal kiya ki log unke shayri ya
ghazlon ko unke naam se jaane. Par maine apne naam ke liye "sawan"
shabd ka istemaal naheen kiya. Jahaan par bhi "sawan" ka prayog huya
hai, us geet ki zaroorat ke mutaabik hi huya hai. Sautan ke kisi
gaane mein maine "sawan" use naheen kiya, phir bhi is film ka har ek
gaana hit huya.

Song: Shaayad meri shaadi ka khayaal (Sautan)

Doston, film Hawas ke baad, Sawan Kumar ki agli superhit film aayi
Sautan jiske saare gaane khoob chale. Zindegi ki sachchhai ko bahut
hi khoobsurat andaaz mein pesh karte huye Sawan Kumar ke kalam se
nikle yeh bol aaj bhi bahut lokpriya hai.

Song: Zindegi pyar ka geet hai (Sautan)

Sawan Kumar keval apni hi filmon ke liye geet likhte hain aisa bilkul
naheen hai, kabhi kabhi doosron ke liye bhi dosti mein kai gaane
unhone likh daale. Film Sabak ka aisa hi ek geet to hum aapko sunwa
chuke hain. Film Kaho Naa Pyaar Hai ke teen geet unhone Rakesh Roshan
ki dosti mein likh diye.

Song: Jaaneman jaaneman (Kaho Naa Pyaar Hai)

Sawan Kumar ka likha ek geet jisme "Sawan" shabd ka prayog mukhde
mein hi huya hai, woh hai film Saajan Bina Suhaagan mein. Isi film se
judee kuchh baaten bataa rahe hain Sawanji.

Sawan Kumar Tak speaks: Is film ke liye maine Rajendra Kumar aur
Nutanji ko soch rakha tha. Main Rajendraji ko sign karwaane ke liye
unke ghar jaa pahuncha to dekha ki unke janamdin ki party chal rahi
hai. Wahaan Raj ji bhi maujood the. nhone kaha ki bahut achchhe din
aap aaye hain, mere dost ke liye film sign karwaane aaye hain aapka
bahut shukriya. Maine unse kaha ki abhi mahurat kar lete hain, aap
mahurat ka clap deejiye. Raj ji bhaavuk ho gaye. Unhone kaha ki
mahurat ka clap kyun, amin is film ki Golden Jubilee ki trophy
baantne aayunga. Aur sach mein is film ki Trophy banTi.

Song: Madhuban khushboo deta hai (Saajan Bina Suhaagan)

Kisi film ki safalta mein uske sangeet ka bahut badaa haath hota hai,
aur Sawan Kumar ki sabhi filmon ka sangeet tayyaar kiya unhi ki dharm
patni sangeetkaar Usha Khanna ne. Aakhir kya baat hai Ushaji ki
sangeet mein?

Sawan Kumar Tak speaks: Ushaji ki sangeet ki khaasiyat hai ki melody
kamaal ka hai unke dhuno mein. Main bol likhkar unke saamne rakh
deta, aur jo bhi unke haath se pehle nikalta wohi dhun hit ho jaati.

Song: Ek Pakistani chehra (Dil Pardesi Ho Gaya)

Film Dil Pardesi Ho Gaya chaahe zyada na chala ho, par Usha Khanna ka
sangeet logon ko khoob pasand aaya. Sawan Kumar ne pehle bhi kaha hai
ki chaahe film chale ya na chale issey unko khaas farak naheen padta,
woh yunhi film banaate rahenge. Hamara unke liye shubhkaamnaayen hai
ki woh apne chaahnewaalon ko achchhi achchhi filem dete rahen aur
khoobsurat gaane likhte rahe.

Song: Beiraada nazar mil gayi to (Sanam Bewafa)

To yeh tha Sawan Kumar Tak par kendrit Aaj Ke Fankaar. Ab yeh
karyakram samaapt karne ki deejiye Renu Bansal ko ijaazat, namaskaar.

THE END