Sabhi sunnewaalon ko Kamal Sharma ka namaskaar. Aaj ka yeh karyakram
samarpit hai sargam ke us sitaare ko jinhone na jaane kitne hi rangon
ke gaane gaaye hain, lekin is gaayak ke gaaye dard bhare naghmon ki
baat hi kuchh alag hai.Film sangeet ke is mahaan gaayak ko duniya
jaanti hai Mukesh ke naam se.

Song: Hum chhod chale hain mehfil ko (Jee Chahta Hai)

Aur ek din bas yunhi achaanak apne rasikon ki mehfil ko chhodkar
Mukesh chale gaye bahut bahut door.

Song: Main to ek khwaab hoon (Himalay Ki God Hoon)

Dil ko kitni bhi tasalli den par palken bheeg hi jaate hain unhe yaad
karke, unke gaaye geeton ko yaad karke.

Song: Aaj tumse door hokar aise roya mera pyar (Ek Raat)

Mukesh chale zaroor gaye, lekin apni soz bhari awaaz peechhe chhod
gaye hain hamare liye. Har kisi ko apna dard baantne ke liye sahaare
ki zaroorat hoti hai, ek aisa kandha jispe sar rakhkar ro liya jaaye,
dil halka kar liya jaaye. Duniya ke chahel pahel mein jab kisi
aatmiya ya mitra ka saath na mile to aise mein hamaare humdard ban
jaate hain MUkesh ke gaaye naghmein.

Song: Mere toote huye dil se koi to aaj yeh poochhe (Chhalia)

Mukesh Chandra Mathur ke pita Lala Joravar Chand Hissar Haryana mein
Public Works Department mein ek engineer the. Jald hi woh Purani
Dilli mein aa gayr aur yaheen pe 22 July 1923 mein janm huya Mukesh
ka. Unki school ki padhaai Dilli ke ek municipal school mein huyi
jahaan par unke sehpaathi the Roshan jo aage chalkar ek suprasiddha
sangeetkaar bane. Roshan ke sangeet nirdeshan mein Mukesh ne gaaye
kai geet, unhi mein se ek tha yeh gaana.

Song: Aaya hai mujhe phir yaad woh zaalim (Devar)

Gaane bajaane ka shauk Mukesh ko school college ke dino se hi tha.
Jalson mein, gali mohallon mein we aksar gaaya karte the. Jaanemaane
abhineta Motilal the unke chachere bhai. Woh unki gayiki se itne
prabhaavit huye ki unhone Mukesh ko Mumbai aane ka nyota de diya. Un
dino MUkesh PWD mein Assistant Surveyor ke pad par naukri kar to rahe
the par beman se. Unki manokaamna to film abhineta banne ki thi.
Isliye 1940 mein we chale aaye Mumbai aur apne chachere bhai Motilal
ke ghar rehne lage. Motilal ke sahayata se National Studios ne Mukesh
ko anubandhit kar liya apni 1941 ki film Nirdosh ke liye jismein
heroine theen Nalini Jaywant. Mukesh is film mein nazar aaye bataur
hero aur gaayak. Is film mein unka gaaya pehla gaana tha "Jab dil hi
bujha ho to fasl-e-bahaar kya". Unka pehla playback gaana Motilal par
hi filmaya gaya tha san 1945 ki film Pehli Nazar mein. Gaana tha "Dil
jalta hai to jalne do". Un dino Mukesh ki awaaz mein K L Saigal sahab
ki awaaz jhalakti thi. Sangeetkaar Anil Biswas ne unhe samjhaaya ki
agar woh apni original awaaz mein gaa sakte hain to unki awaaz kamaal
kar sakti hai. Mukesh ne unki baat maani aur nateeja hamaare saamne
hai. Mukesh ke dard bhare geeton ka kehna hi kya, kaleja cheer kar
rakh dete hain.

Song: Teri yaad dil se bhulaane chala hoon (Hariyali Aur Rasta)

Haalaanki Mukesh ke gaayan ki seemaayen thi, unke awaaz ki khaasiyat
thi usi brightness aur depth. Unke gaaye har geet mein unka
bhaavnaatmak paksh ubharkar saamne aata hai. Agar woh geet dard bhara
ho to hamaare samvedna ke taar ko hilaakar rakh dete hain.

Song: Jaayun kahaan bataa ae dil (Chhoti Bahen)

Zindegi gham aur khushi ka afsana hai. Har koi ismein khushi hi
chaahta hai, par laakh na chaahne ke baawjood ismein gham aa hi jaate
hain samay samay par. Mukesh ke gaaye dardeele geet bhi meethe lagte
hain aur in geeton ke saath dard ko hi maano bahaakar le jaate hain.

Song: Zubaan pe dard bhari daastaan chali aayi (Maryada)

Zindegi ab yun bhi ek bheed mein kho kar reh gayi hai. Insaan aur
akela, aur zyaada tanha ho gaya hai, rishte naate bhi jaise badal se
gaye hain. Jinki aankhon mein toote rishte ka dard ho, jo tanhaai ki
kisi raat mein akele aansoo baha raha ho, Mukesh ke geet unke
humsafar bankar unke dil ke bojh ko baant lete hain.

Song: Jis dil mein basaa tha pyar tera (Saheli)

Mukesh ke gaayan mein sirf sahejta hi naheen balki aatmiyata bhi hai.
Unka gaaya har dard bhara geet jaise apne hi dil ki awaaz lagti hai.
Aur inhe gungunakar aadmi zindegi ke saare ghamon ko baant leta hai.

Song: Jo pyar tune mujhko diya tha (Dulha Dulhan)

Mukesh ke swar mein naiswargik mithaas tha, os aur madhurta to thi
hi, saadhna aur lagan se unhone usmein aur nikhaar le aaye the.
Chaahe shringaarik ras ho ya masti bhara koi geet, ya phir toote huye
dil ki siskiyaan, har mood ko baakhoobi pesh karne ki kshamata rakhte
the Mukesh.

Song: Wafa jinse kee bewafa ho gaye (Pyar Ka Sagar)

Sach to yahi hai ki Mukesh ne prem se zyaada virah aur vedna ke geet
gaaye hain. Ek zamana tha jab prem nivedan mein ek shaalinta huya
karti thi. Aur pyar mein naakaami mein bhi kuchh aisi hi baat thi.
Aise hi toote huye kisi dil ki duniya mein le jaate hain Mukesh ki
awaaz. Raat ke gabheersannaate mein jab yeh awaaz haule haule goonjti
hai to bechain kar deti hai mann.

Song: Mujhko is raat ki tanhaai mein awaaz na do (Dil Bhi Tera Hum
BHi Tere)

Dard ka ahsaas aur woh bhi pyar mein thukraaye kisi dil ke dard ka
ahsaas Mukesh ki awaaz mein is qadar jeevant ho uthte hain ki film
mein naayak ka dard maano apna dard ban jaata hai. Zindegi ke is
padaav se guzarne waale har us shakhs ki awaaz ban jaati hai, ek aisa
kaandha ban jaati hai jispar sar rakh kar apne mann ka bojh kam kiya
jaa sake.

Song: Woh tere pyar ka gham (My Love)

Mukesh ke gaano mein pyar mein thukraaye kisi premi ki daastaan
bayaan hoti hai, to kabhi zamaane se shikaayat. Lekin is shikaayat
mein bhi ek bholapan chhupa hota hai. Aise kai gaano mein apne aapko
sambhaalne ki koshish hai jo kisi malham se kam naheen.

Song: Waqt karta jo wafa aap hamare hote (Dil Ne Pukara)

Mukesh bhale hi bhautik roop se hamaare beech mein aaj na hon, par
unki awaaz ke zariye woh amar ho gaye hain. Duniye jab chaahegi unke
awaaz ke saath jhoomegi, kabhi unke geeton ke daaman se apne
aansooyon ko ponchhegi, apne dil ki tadap ko shaant karegi. Mukesh ko
Vividh Bharati parivaar ki or se smriti suman.

Song: Tumhe paake khud se door ho gaye the (

Sargam Ke Sitaare, aaj ka yeh karyakram samarpit tha mahaan gaayak
Mukesh ki smriti ko. Isey Vividh Bharati ki or se aapke liye prastut
kiya Kamla Sharma ne, ab deejiye ijaazat, namaskaar!

THE END