Radio sakhi Mamta Singh ki or se aap sab ko namaste

Clip: Salaam namaste (Salaam Namaste)

Sargam Ke Sitaare karyakram mein hum aaj kar rahe hain san 2005 ke
film sangeet ka lekha-jokha aur issey judee un logon ki baaten jo is
saal kaafi 'hit' rahe.

Clip: Kajra re (Bunty Aur Bubly)

Saath hi saath hum un kalakaaron ki bhi baat karenge jo kaafi mashoor
na ho paaye

Clip: Hum hain is pal yahaan (Kisna)

Yahi naheen, hum zikr karenge kuchh gair filmi albums ki bhi.
Baherhaal shuru ho rahi hai 2005 ke film sangeet ka lekah jokha.

Clip: Dus bahaane karke le gayi dil (Dus)

Doston, is saal ka sukhad pehlu raha 'remix' ke bhanwar jaal se
shrotaaon ka dheere dheere baahar aa jaana. Pehle cover version, phir
tez shor sharaabe waale sangeet, aur phir 'remix' albums ke gaane
sunkar naa keval hamaare kaano ki chhalni ho gayi balki in 'music
videos' ko dekhkar sharm se aankhen bhi jhuk gaye.

Clip: Bangle ke peechhe (original) (Samadhi)

Abhi bhi zeher poori tarah se utri naheen hai lekin Naushad, Madan
Mohan, Khaiyam, S D Burman aur R D Burman ke sangeet mein jo kaanta
lagaa tha usme deemak lag gaya hai aur woh khokhla sa jaan padta hai.

Clip: Dheere jalna dheere jalna (Paheli)

Is saal Madhur Bhadarkar ki film Page 3 mein sangeetkaar Shamit
Tandon ki dhune logon ko kaafi kheencha aur Lataji logon ke rishton
ki zubaan ban gayeen.

Clip: Kitne ajeeb rishte hain yahaan pe (Page 3)

Ashaji ka gaaya yeh geet bhi kam charchit naheen huya tha

Clip: Huzoor-e-aala (Page 3)

Isi saal dhamaakedaar pravesh huya sangeetkaar Shantanu Moitra ka
jinka Vidhu Vinod Chopra ki film Parineeta ka sangeet karnapriya raha
aur lokpriya bhi.

Clip: Piu bole piya bole (Parineeta)

Darjeeling ki 'toy train' mein filmaya gaya yeh gaana badon ke saath
saath bachchon ne bhi khoob pasand kiya.

Clip: Kasto maja hai (Parineeta)

Abhinetri Rekha par filmaya gaya yeh gaana bhi kaafi mashoor huya

Clip: Kaisi paheli zindegaani (Parineeta)

Sangeetkaar Shantanu Moitra ki ek aur film, jiske sangeet ko bhi
kaafi saraaha gaya, yeh film hai Yahaan.

Clip: Poochhe jo koi meri nishaani (Yahaan)

Yeh naghma likha tha Gulzar ne. Jab Gulzar saahab ki baat chal padee
hai to humein yaad aa rahi hai film Paheli.

Clip: Jab raat kati aur din nikla (Paheli)

Baadshaah Khan Shahrukh Khan ki yeh film bhale hi ek paheli ban kar
reh gayi, iske sangeet ko kaafi saraahna mili. Is film ke sangeetkaar
M M Kreem apne behetareen sangeet ke liye jaane jaate hain.

Clip: Laaga re jal laaga (Paheli)

Film Paheli ko Bharat ki or se sarvasthresth film ki haisiyat se
Oscar ke liye bhejee gayi thi.

Clip: Aadhi raat jab chaand dhale (Paheli)

Doston, yeh saal nayee pratibhaaon ke aagaman ka saal tha. Ghazlon ki
duniya mein naam kar chuke geetkaar Panchhi Jalonvi film Dus se ban
gaye filmi geetkaar.

Clip: Chham se woh aa jaaye (Dus)

Waise to film Black geet-viheen film thi, lekin baad mein iski
CD 'release' kee gayi jisme ek geet suna gaya. Haalaanki is geet ko
zyaada naheen suna gaya, lekin 2005 ka yeh vishleshan adhura reh
jaayega agar hum is geet ki jhalak aap ko na sunwaayen to.

Clip: Mausam ki adla badli mein (Black)

Naye sangeetkaar Daniel B George ne film Sehar mein sangeet diya.
Isse pehle ki aap is film ka geet sune, hum aap ko yeh bataa den ki
is geet ki gaayika Alka Yagnik is saal apne sureele safar ki 25 saal
poori kar chukeen hain.

Clip: Sapnon ka shahar ho (Sehar)

25 saal to ghazlon ki duniya mein dhoom machaanewaale Pankaj Udhas ne
bhi poori kee.

Clip: Aarzuyen hazaar rakhte hain (Non-film ghazal)

Apni pehli album Aahat bankar Pankaj Udhas jab saamne aaye to
chaahnewaalon ne kaha ki jin suron ki yeh aahat hai, woh bahut door
tak pahunchegi.

Pankaj Udhas speaks: Meri pehli 'album' Aahat relerase huyi thi 1981
mein. Aahat banaane se pehle maine 10 saal 'struggle' kiya, aur aaj
ka yug aisa hai, main kabhi kabhi mazaak mein kehta hoon ki aaj koi
bathroom mein sochta hai ki main bhi singer banoonga aur agle hi din
uska CD release ho jaata hai (both laughs loudly), lekin us zamaane
mein aapko apna 'talent' saabit karni padti thi, 'proof' dena padta
tha tab koi aapko suntaa.

Clip: Tum aaye zindegi mein to barsaat ki tarah (Non-film Ghazal)

Sangeetkaar Salim Auleiman ka naam film Kaal se pehle utna jaana
pehchaana naheen tha, film Kaal mein unke sangeet ne dhamaal kar
dikhaya.

Clip: Tauba tauba ishq main kariya (Kaal)

Is saal 2005 mein gaayak Udit Narayan ko Sarvashreshtha gaayak ke
Rashtriya puraskaar se sammaanit kiya gaya film Swades mein gaaye
unke geet ke liye. Yeh unka teesra Rashtriya puraskaar hai.

Clip: Yeh tara woh tara har tara (Swades)

Kaamyaabi ki shikhar par aaj Udit Narayan hain, lekin is muqaam par
woh itni aasaani se naheen pahunche. Udit Narayan pehle Kathmandu
Radio mein 8 saalon tak Maithili aur Nepali lok geet gaaye, phir 1978
mein aakhon mein Hindi film sangeet gaayak banne ki chaah lekar, ek
music scholarship ke saath haazir huye Mumbai nagri. San 1980 mein
Rajesh Roshan ne unhe pehli baar mauka diya film Unnees Bees mein
gaane ka. Rakesh Roshan aur Mithun Chakraborty abhineet is film mein
unhone Rafi sahab ke saath geet to gaaya par na geet chali aur na hi
film. Aur unki struggle chalti rahi chalti rahi. Phir aaya Bade
Dilwale mein ek mauka jismen unhone Lataji ke saath ek geet gaaya
jisme unhone Pran sahab ka playback diya. Lekin unki awaaz ko kisi ne
tawajju naheen dee. Lekin san 1987 mein Qayamat Se Qayamat Tak ne
unhe raaton raat star singer bana diya.

Clip: Papa kehte hain (Qayamat Se Qayamat Tak)

2005 mein Udit Narayan ban gaye 'producer' jab unhone Bhojpuri film
Kab Huyi Hai Gawanwa Hamaar ka nirmaan kiya. 2005 ki is 'radio'
patrika mein Udit Narayan ko hum kehna chaahte hain ki...

Clip: Yunhi chala chal raahi (Swades)

Aur ab baat karte hain sarvashrshtha geetkaar ke Rashtriya puraskaar
ki. Doston, yahi hai woh geet jiske liye Javed Akhtar ko mila is
varsh ka Rashtriya puraskaar.

Clip: Yunhi chala chal rahi (Swades)

Jahaan ek taraf is saal Preetam, Salim Suleiman, Vishal-Shekhar aur
Shantanu Moitra jaise ubharte sangeetkaar film sangeet mein chhaaye
rahe, wahin doosri or film Aadmi, Mother India, aur Mughal-e-Azam
jaise filmon mein sangeet dene waale pitamah ki haisiyat rakhnewaale
varishtha sangeetkaar Naushad le aaye film Taj Mahal ke karnapriya
geet. Is film ke geeton ne yeh saabit kiya ki naazuk aur tareen kaam
aaj ke daud mein bhi mumkin hai.

Clip: Apni zulfen meri shaano pe bikhar jaane do (Taj Mahal)

Ab zikr karte hain geetkaar Gulzar saahab ka.

Clip: Dhadak dhadak (Bunty Aur Bubly)

Doston, chaand se hokar guzarnewaali sadken hamesha Gulzar saahab ko
hi nazar aayi. Is saal woh apne geeton ka jhola uthaakar filmon ki
taraf phir se laut aaye. Unhi ki andaaz mein agar kaha jaaye to yun
keh sakte hain ki woh khushboo ki tarah aaye, woh jaadoo ki tarah
aaye aur chhan se bole...

Clip: Chhan se bole (Yahaan)

Yeh film Yahaan ka geet hai jiske sangeetkaar hain Shantanu Moitra.
Amol Palekar nirdeshit film Paheli ke liye bhi Gulzar saahab ne
bemisaal geet likhe.

Clip: Kangna re (Paheli)

Sabse badi baat yeh hai ki Gulzar saahab ne yeh saabit kar dikhaaya
ki saare desh ko hilaa kar rakh dene ki taaqat hai unki kalam mein

Clip: Bunty aur Bubly (Bunty Aur Bubly)

Sangeetkaar Shankar Ehsan Loy is saal ke sabse safaltam sangeetkaar
rahe.

Shankar Mahadevan speaks: Pehli baar Amitabh Bachchan-ji, Abhishek
aur Aishwarya Rai ek gaane mein aa rahe the, to aise gaane ki
zaroorat thi jo kaafi 'popular' ho jaaye. Gaane ki 'sitting' mein
Amitji aaya karte the, apne 'inputs' aur 'ideas' dete the, gaane
ki 'beginning' mein jo "dhin dhinak dhin dhinak dhin" hai woh unhi
ka 'input' tha, unhone kaha ki shuru mein kuchh aisa karen ki logon
ko pasand aaye, aap dekh rahe hain nateeja kya huya, is film ke saare
gaane 'hit' ho gaye, lein sabse zyaada huya "kajra re"

Clip: Kajra re kajra re (Bunty Aur Bubly)

Shankar Ehsan Loy ki sargami tikdi aur Gulzar ke geeton ne duniya ko
thirakne par majboor kar diya.

Clip: Nach baliye (Bunty Aur Bubly)

Is saal, bahut baras baad ghazalon ke baadshah Ghulam Ali ki awaaz
kisi film mein sunaaee dee. Film thi Bewafa.

Clip: Bas yaad yaad yaad bad yaad reh jaati hai (Bewafa)

Ghulam Ali se yaad aa gaye Mehdi Hasan. Ghamzada baat yeh hai ki is
saal woh lakwe ke shikaar ho gaye aur ab woh kabhi gaa naheen
sakenge. Aayiye ab zikr karte hain kuchh aisi filmon ka jinhone
vyaapaar to zyaada achchha naheen kiya par unka sangeet ko kaafi
pasand kiya gaya. Pehle zikr A R Rahman aur Ismail Darbar ke sangeet
se sajee film Kisna ka. Subhash Ghai ko is film se kaafi aashaayen
thi par afsos, film na chal sakee, lekin iske gaane khoob chale.

Clip: Aa gaya wohi din aa gaya (Kisna)

Shyam Benegal ki film Netaji Subhash Chandra Bose mein sangeet dene
ke baad A R Rahman ne 'period' filmon mein sangeet dene se tauba kar
lee.

Clip: Azaadi laayenge (Bose- The Forgotten Hero)

Mangal Pandey, ek aur aetihaasik film A R Rahman ke khaate, hashra
wohi, ek baat achchhi thi ki iska sangeet kuchh chal gaya.

Clip: Main vaari vaari (Mangal Pandey The Rising)

Sanjay Leela Bhansali ki film Black ke alaawa Ram Gopal Verma ne film
Sarkar ko banaane mein kaafi saahas ka parichay diya. Doston, is saal
kai aisi filmen aayi jinke ek ek gaane chale. Jaise film Sheesha mein
sangeetkaar Sen Brothers ka yeh geet...

Clip: Ishq da dard jagaa baithe (Sheesha)

Film Fareb ka yeh 'item song' bhi khoob chala...

Clip: Baras jaa ae saawan (Fareb)

Yahaan ek baat ka zikr karna chaahoongi ki pichhle saal film Baghban
ke Holi geet ne kaafi dhoom machaaee thi, is saal bhi 2/3 Holi geet
bane lekin koi chal na saka jaise Mangal Pandey film ka yeh geet

Clip: Dekho aayi Holi (Mangal Pandey The Rising)

Dil Jo Bhi Kahe film mein bhi ek Holi geet tha jo asafal hi raha,
film Waqt ka Holi geet thoda bahut chal gaya

Clip: Lets play Holi (Waqt)

Film Waqt ka yeh Holi geet bhale hi logon ke zabaan pe chadh naheen
sakaa, par yeh geet logon ko khoob thirkaaya...

Clip: Miraksam (Waqt)

Ek aashcharyajanak baat yeh rahi ki filmkaar Subhash Ghai ne Mukta
Searchlight ke naam se ek 'banner' ka nirmaan kiya taaki nayi
pratibhaaon ko saamne laaya jaa sake. Isi 'banner' taley nirmit
Nagesh Kukunoor dwara nirdeshit film Iqbal ne kai aashaayen jagaaee.
Is film mein teen sangeetkaaron ne apni kalaa ke johar dikhaaye, yeh
hain Kedar Saroj, Sukhwindara Singh aur Salim Suleiman.

Clip: Hum to hawaaon pe likhte hain daastaan (Iqbal)

Aur ab baaten un gaayak gaayikaaon ki jo is saal chhaaye rahe ya phir
na reh sake. Gaayika Sunidhi Chauhan is baras chhaayi raheen.

Clip: Deedaar de deedaar le (Dus)

Parineeta film ka yeh naghma bhi Sunidhi ne hi gaaya tha

Clip: Kaisi paheli zindegaani (Parineeta)

Aisa lagta hai ki Sunidhi 'item songs' gaane mein maahir ho gayi
hain. Film Kaal ka yeh geet to kam se kam yahi kehta hai

Clip: Tauba tauba (Kaal)

Apni gaayan ki 25 saal poori kar chukeen Alka Yagnik ki awaaz is saal
bahut kam sunaaee padi.

Clip: Sapno ka shaher ho (Sehar)

Kumar Sanu ka sitara bhi gardish par hi raha, par Lata Mangeshkar aur
Asha Bhosle ne apni maujoodgi ko saabit kiya. Lataji ne do geet
gaaye, pehla film Bewafa mein...

Clip: Kaise piya se main kahoon (Bewafa)

Aur doosra geet unhone gaaya phir Page 3 mein aur behatareen gaaya.
Is geet se juDee baat bata rahe hain is film ke nirdeshak Madhur
Bhandarkar.

Madhur Bhandarkar speaks: Shamit ne gaane ka 'demo' tayyaar kiya aur
Lataji ko bhej diya, phir Lataji ke gaana sunkar kaha ki unhe gaana
bahut achchha laga aur unhone kaha ki main gaayungi. 'Recording' ke
din hum sab 'nervous' ho gaye, humein ghabraahat ho rahi thi ki
Lataji aa rahi hain aur hum sab naye log hain Shamit bhi naya hai,
Sandeep Nath bhi naya hai, ab kya hoga. To Lataji aayeen, hum sab ne
unke pair chhoo kar unse aashirvaad liya. Lataji ne kaha ki agar
mujhse koi galati ho jaaye to bataana. Maine kaha ki aap ko main
bhala kya kahoon! To unhone kaha ki naheen, aap is film ke nirdeshak
hai, aapko agar lage ki main kahin pe theek naheen gaa rahi hoon to
aap ko zaroor kehna chaahiye, yahaan pe aap 'director' hain aur main
ek 'gaayika'.

Clip: Kitne ajeeb rishte hain yahaan pe (Page 3)

Madhur Bhandarkar speaks: 'Recording' ke baad hum sab bilkul 'blank'
ho gaye, 'single take' mein Lataji ne gaana gaaya aur 'sad version'
bhi gaaya.

Clip: Kitne ajeeb rishte hain (sad) (Page 3)

Aur ab zikr Ashaji ka. Asha ji se juDee ek khaas baat is saal ka yeh
hai ki ek 'private album' ke liye unhe Grammy Awards ke liye namoneet
kiya gaya hai. Yahaan unka takkar Pandit Ravi Shankar ki beti Anushka
Shankar se hai. Ab dekhna yeh hai ki puraskaar kiske hawaale hoti hai.

Clip: Lucky lips (Lucky)

Gaayak Sonu Nigam to jaise film sangeet sansaar ke Rahul Dravid hain,
Mr. Dependable. Is saal unhone bahut saare filmi geet to gaaye hi,
unka 'private album' Chanda Ki Doli bhi khoob chalaa.

Clip: Chanda ki doli mein (Chanda Ki Doli - Nonfilm Album)

Unki filmi geeton mein film Bunty Aur Bubly ke is geet ka zikr
zaroori hai.

Clip: Dekhna mere sar se aasmaan ud gaya re (Bunty Aur Bubly)

Yeh film Chocolate ka naghma

Clip: Halka halka sa yeh yeh nasha (Chocolate)

Gaayika Alisha Chinoy ke liye yeh saal achchha raha. Chaahe woh Kajra
re kajra re ho, ya ishq di gali vich 'no entry', yaa phir film Karam
ka yeh narm-o-naazuk naghma, yeh saare gaane hit huye.

Clip: Tinka tinka zara zara (Karam)

Film Murder se 'limelight' mein aaye gaayak Kunal Ganjawala
ne 'double speed' se tarakki kee is saal. Kaal, Ek Khiladi Ek
Haseena, Bachke Rehna Re Baba, Fareb aur Kyun Ki jaisi filmon mein
goonji unki awaaz

Clip: Tera jism odh loon (Kyun Ki)

Ek lambe sangharsh ke baad Kunal ne aaj apni ek alag jagah banaa lee
hai, ab to unhi ke gaane se hota hai...

Clip: Salaam namaste (Salaam Namaste)

Gaayak Kay Kay bhi 2005 ke film sangeet mein chhaaye rahe. Iqbal aur
Dus ke alaawa film Rog ka yeh gaana khaas kar khoob pasand kiya gaya.

Clip: Maine dil se kaha dhoond laana khushi (Rog)

Is saal kai gaayak aise bhi rahe jinhone bas ek hi geet gaaye, lekin
woh geet unke pehchaan ban gaye. Aise ek gaayak hain Pakistani gaayak
Ateef, jinhone gaaya film Zeher mein.

Clip: Woh lamhen woh baaten (Zeher)

Gaayika Madhushree, film Kisna ka geet

Clip: Hum hain is pal yahaan (Kisna)

Rahat fateh Ali Khan, film Kalyug

Clip: Jiya dhadak dhadak jaaye (Kalyug)

Geetkaaron mein navodit Saeed Qadri ne kai lokpriya geet likhe. Film
Zeher ke is geet se gaayika Shreya Ghoshal ko dher saari waah-waahi
mili.

Clip: Agar tum mil jaao (Zeher)

Film Parineeta mein bhi Shreya ke gaane charchit huye. Doston, hum
baat kar rahe the geetkaaron ki. Parineeta mein gaane likhe Swanand
Kirkire ne jab ki Page 3 mein likhe Sandeep Nath ne. Is saal
sangeetkaar Himesh Reshammiya bhi khoob chale. Film Maine Pyar Kyun
Kiya ke is geet ke zariye unhone logon ko hilaakar rakh diya.

Clip: Just chill (Maine Pyar Kyun Kiya)

Aashiq Banaya Aapne film se Himesh ban gaye gaayak

Clip: Aashiq banaya aapne (Aashiq Banaya Aapne)

Jahaan ek or sangeetkaar Himesh Reshammiya aa gaye gaayan ke kshtra
mein, waheen doosri or gaayak Roop Kumar Rathod ne sangeet diya film
Zeher mein.

Clip: Ae bekhabar ae bekhabar (Zeher)

Anu Malik bhi is saal ke jaate jaate chhod gaye ek jumlaa

Clip: Ishq di gali vich (No Entry)

Is saal bhi yeh bahas chalta raha ki guzre daud ke sangeet bke
muqaable is daud ka sangeet behatar hai ya naheen. Sach to yeh hai ki
dono saath saath chalte hain aur har daud ka apna alag hi mazaa hai.
Is saal Mohd Rafi saahab ki 25veen punyatithi par unke chaahnewaalon
ne kai karyakramon ka aayojan kiya. Yeh hain Naushad:

Naushad speaks: Waaqai, Mohd Rafi aise insaan the, aise fankaar the
jo zameen par kai zamaane ki ibaadat se paida hote hain. Woh kadodon
ke liye zindegi ka hissa ban chuka tha, jiske gaane ke saath din
shuru hoti aur jiske naghmon ke saath hi raat dhalti thi. Mere saath
unka bahut purana saath raha hai yeh sabhi jaante hain. Aisa haadsa,
aisa nuksaan ho gaya ki aisa lag raha hai jaise saat suron ke sargam
se ek sur kam ho gaya, ab sirf chheh sur hi baaki reh gaye hain.

Mere sargam mein tera zikr hai,
Meri saazon mein teri awaaz hai.

Kehta hai koi dil gaya, dilbar chala gaya,
Koi kehta tha dost chala gaya, gaayak chala gaya,
Duniya se mausiki ka payambar chala gaya.

Clip: Prelude of "Aaj puraani raahon se koi mujhe awaaz na de"

Doston, saal 2005 khatam hone mein ab bas chand ghante hi reh gaye
hain. Aanewaala saal 2006 aap ke liye mangalmay ho, sukhad ho,
shaantimay ho, yahi hum kaamna karte hain. Aur saath hi is baat ki
bhi asha karte hain ki agle saal bhi aise filmi geet banenge jo
humein sukoon denge aur jin par hum khoob jhoomenge, thirkenge. Is
saal ka sangeet sukoon denewala ho, geet sajeele ho jo hamare man ke
meet ban jaaye. To doston, yeh thi san 2005 ke film sangeet ke lekha
jokha par aadhaarit hamara yeh vishesh'radio' patrika, jise aapne ne
suna Sargam Ke Sitare karyakram ke antargat.

Is karyakram ke liye khoj kiya Raviraj Pranami ne, Sehyog diya Meena
Naik ne, takniki sehyog Dilip Kulkarni ka, prastuti sehyog
Chitralekha Jain, tatha swar, aalekh aur prastuti aapke is radio
sakhi Mamta Singh ka. Ab deejiye apne is radio sakhi ko ijaazat,
namaskaar!

THE END