04/01/2006 16:00 to 17:00 hrs

MUSAFIR HOON YAARON

A musical discussion of Asha Bhosle, Gulzar & R D Burman recorded
years back in the Vividh Bharati studio.

AB: Asha Bhosle
GZ: Gulzar
RD: R D Burman

NOTE: Some insignificant words that frequently occur in a discussion
like 'jee haan' etc have been excluded in certain places of the
transcript.


Song: Musafir hoon yaaron (Parichay)

AB: shrotaaon ko R D Burman saahab, Gulzar saahab aur main Asha
Bhosle namaskaar karte hain.

GZ: Namaskaar

RD: Gulzar, aap ne namaskaar kiya, main bhi karta hoon

GZ: Dil Padosi Hai ke baad aaj hum phir paDos mein baiThe hain,
Bambai ki zindegi mein phir mauka mila saath baiThne ka

RD: Ashaji, aapko yaad hai koi geet jo aapne kafi mehnat se gaaya
hoga?

AB: Haan, ek geet aapne toDi mein banaya tha. waise toDi mein dha se
pancham lagaana chaahiye, par filmi geet mein agar poora ka poora
raag waise hi rakh diya jaaye to us raag par aadharit sabhi geet ek
jaise hi lagenge. thoDi bahut 'change' karke agar geeton ko Dhaala
jaaye to ek nayapan bhi aata hai aur sunne mein bhi achchha lagta hai.

GZ: Haan sahi baat hai, agar 'classical music' ko misaal banaakar koi
film ban rahi hai tab alag bat hai.

RD: Gulzar, aap ko yaad hai "bheeni bheeni bhor' album ka yeh pehla
gaana rakha tha humne?

AB: Gulzar bhai, aap ne is gaane mein "goTa" shabd ka bahut
khoobsurat istemaal kiya tha.

GZ: sone ki chamak ki 'similies' hamare filmi geeton mein kaafi paaya
jaata hai, kabhi aag se, kabhi dhoop se. 'But all that glitters is
not gold' (all 3 laughsO), hamaare yahaan shaadi mein goTedaar chunri
dekhne ko milti hai, to usi se maine yeh liya tha.

AB: Lekin aapne to baadal ko goTa lagaya tha na?

GZ: mujhe lagta tha ki gote ki jo chunri hai woh bahut hi khoobsurat
hai. Ashaji, aap ne kahaa ki Pancham ne toDi ka "chalan" badlaa.
mujhe to hamesha hi iske chaal chalan pe shaque raha hai (all 3 burst
into laughter), aap ne kaha ki inhone apna chalan badla! (continues
laughing)

RD: yeh subah ka gaana tha, isme humne murgiyon ki awaaz Daali thi,
bahut saare 'sound effects' the ki jisse subah ka 'atmosphere' saamne
aaye, ek aadat ho chukee thee, ab aap isey chalan kahiye, aise koi
raag ban jaata hai, 'mood' ban jaata hai.

Song: Bheeni bheeni bhor aayi (Dil Padosi Hai)

GZ: "dil DhoonDta hai fursat ke raat din, baiThe rahe yunhi tasavvur
re jaana kiye huye", Ghalib ka yeh sher maine istemaal kiya tha,
kuchh sheron mein maine is tarah ke nazmon ka istemaal kiya hai. woh
kaise fursat ke din honge jiski talaash Ghalib kar rahe the? Is gaane
ke liye film mein 'hero' chhuTTiyon ki talaash kar raha hai, isliye
maine Ghalib ki is sher ko le liya.

RD: Waah!

AB: "fursat" shabd bahut khoobsurat lagta hai is gaane mein (sings
the first line of the song)

Song: Dil dhoondta hai phir wohi (Mausam)

GZ: Yeh Madan Mohan saahab ka kamaal tha, woh to ustaad the

RD: Bahut hi achchhe 'music director' the

AB: Ek baat hai, Madan bhaiya ne ghazal, Thumri, kajri par bahut
gaane banaaye hain.

RD: woh Akhtari Bai, Siddheshwari Bai jaise kalakaaron ko itna sunte
the, aur ek aur baat, woh khaana bhi bahut achchha banaate the, aap
ko pataa hai?

GZ: main to swaad se bataa detaa tha ki yeh Madan bhaisahab ne
banaaya hai.

RD: woh mere pitaji ke liye banaakar laate the, TinDe gosht

AB: maine to bhinDi gosht khaaya hai

GZ: pataa naheen lekin sangeet aur 'cooking' ka kya 'relation' hai,
maine bahut se 'music directors' dekhen hain jo bahut baDhiya khaana
banaate hain, jaise Madan Mohan, Salil Choudhury, Alla Rakha Khan aur
Pancham. Ashaji aur Pancham saath lage rehte hain (Asha & RD laughs)

RD: Ustad Ali Akbar Khan mujhe yaad aa gaye, unse main bachpan
mein 'classical music' seekhta tha. log kehte hain ki meri
dhune 'westernized' hain, 'modern' hain, par tumhare (Gulzar ke)
saath to 'western music' ka sawaal hi naheen uThta.

AB: Burman saahab, Ghar film mein ek gaana tha "tere bina jeeya jaaye
na", pataa naheen aap kahaan kahaan se 'rhythm' DhoonD kar le aate
haina ur hum 'singers' ko bhugatna paDta hai, tabley pe aap ne woh
kya kiya tha bataaiye?

RD: Haan, ismein maine jis sur mein mukhDa khatam ho raha hai, usi
sur mein maadal bajaaya. maadal moTe munh ka hota hai

AB: achchha to woh tabla naheen maadal tha?

GZ: to sunte hain ki aapne us geet mein kya kartab dikhaaya tha.

Song: Tere bina jeeya jaaye na (Ghar)

AB: Burman saahab, ek aur gaana tha "raina beeti jaaye"

RD: yeh gaana kaise yaad aa gaya?

AB: yeh raag aap ne raat ko kaise de diya?

RD: parde par?

AB: jee haan

RD: gaana banaate 'time' yeh pataa naheen tha ki film mein kis waqt
yeh gaaya jaayega. gaana ban gaya, sabko bahut achchha lag gaya, phir
pata chala ki raat ka waqt hai, koThe mein 'heroine' gaa rahi hai.
Gulzar ko maaloom hoga, yeh 'director' hain, ki raagon ka aisa pher
badal kar pesh karne se ek 'freshness' aati hai.

GZ: jee haan, waqt ke hisaab se agar raag DhoonDe to kuchh dino mein
yeh 'monotonous' lagne lagega, saare gaane ek jaise lagenge, Amar
Prem ki woh laDki baDee pavitra hain, haalaanki koThe pe baiTheen
hain, to gaane mein 'freshness' hogi to uski ek 'reflection' aa
jaayegi 'character' mein.

Song: Raina beeti jaaye shyaam na aaye (Amar Prem)

GZ: isse pehle ki hum aage baDhen, Pancham, aap ka pehla gaana kaun
sa tha?

RD: Film Chhote Nawaab mein mera pehla gaana 'record' huya Latabai ki
awaaz mein. isse juDee ek dilchasp kahaani hai. ek kahaavat hai na ki
puraane chaawal ghamanDi hote hain, to mere pitaji bhi ghamanDi the,
unka didi (Lata) ke saath kuchh an-ban ho gayi thi, unhone keh diya
tha ki main kisi aur se gawaayunga. to woh kya huya ki woh mera
pehla 'picture' tha, main didi ke paas gaya aur kaha ki aap ko mere
liye gaana paDega. woh boli kyun naheen gaayungi. un
dino 'rehearsals' huya karta tha. didi, Ashaji, Rafi sahab, sabhi
bahut 'rehearsals' karte the, aaj durbhaagya hai ki 'rehearsal' ka
zamana naheen raha. to woh aayeen hamaare ghar mein 'rehearsal' karne
ke liye aur 'rehearsal' mein gaana sunke bahut aashirvaad diya aur
unhone kahaa ki pitaaji se naheen milaaoge? maine kaha ki woh
darwaaze pe khaDe hain, doosre kamre mein, woh aane ki soch rahe
hain. unhone awaaz dee ki "dada, andar aayiye"

GZ: achchha, rooThe huye the

RD: andar aakar bole, Lata, kitne 'dates' de sakti ho mujhe? woh aise
hi baat karte the, boleen, aapko jitna chaahiye, ek maheene ka
chaahiye, phir uske baad pitaaji ke saath Latabai ka achchha ho gaya.

AB: ek baat poochhoon? sach bataayenge? us din aap andar se kaamp
rahe the na?

RD: bilkul, maine pehli baar unhe 1951 mein "Thandi hawaayen lehra ke
aaye" gaate huye dekha tha, 'she is so simple', lagta hi naheen tha
ki itni baDee 'singer' hain.

Song: Ghar aaja ghir aaye (Chhote Nawab)

AB: Gulzar bhai, suna hai "mora gora ang lai le" aap ka pehla gaana
tha?

GZ: jee haan

RD: ab iske saath bhi ek kissa hai, us samay Gulzar naya naya aaya
tha, main pitaji ka 'assistant' huya karta tha, hum Bimal Roy Studios
mein milte the. mere pitaaji 'conscious' ho gaye ki Gulzar 'meter'
mein likh sakega ki naheen. is gaane ke baad woh khush ho gaye ki
jaisa 'tune' unhone banaaya tha waisa hi inhone likha.

GZ: yeh waaqai 'meter' pe likha gaana tha, aur bhi kai likhe, aap ke
liye bhi kai likhe. yeh gaana mera pehla 'ticket' tha is 'film
industry' mein aane ka. Lataji 3 saal ke baad Burman dada ke liye
gaane waali theen.

RD: 'exactly'

AB: aapke pehle gaane mein hi S D Burman aur Lata Mangeshkar?

GZ: jee haan

Song: Mora gora ang lai le (Bandini)

GZ: Pancham, aap bataanewaale the ki dada kaise pankh se parinda
banaa dete the?

AB: waah, kya kahaa hai aapne, pankh se parinda, aap 'writer' hain na!

RD: main pitaaji ka 'assistant' huya karta tha, main kuch tabla
bajaata tha aur woh gaate the, unse kaafi kuch humne seekhee hai, hum
sab logon ne seekhee hai, aisa tha ki woh jab 'music compose' karte
the, unke kuchh 'set' tareeke huya karte the, jaise ki ek tareeka
main aap ko bataata hoon, ki woh ulTe bol bolte the, jaise Bengali
mein hum bolte hain ki "kau Taaka chhilo?" matlab kitna kilo tha
keemat? to woh bolte the "chhau Taaka kilo" yaani chheh rupay kilo.

GZ: achchha, ulTa ho gaya (laughs)

RD: is tareeke se gaane ko bhi woh aisa banaate the, pitaaji hamesha
bola karte the ki nayaapan agar karna ho to yeh sab 'experiments'
kiya karo. ek baar hum Bridge on the River Qwai film dekhne gaye,
usmen ek 'tune' tha jo pitaaji ko pasand aa gayi. (RDB hums the
tune). film khatam hone ke baad unhone mujhse kaha ki is chand ko lo,
baDaa achchha chhand hai, unhone us chhand ko liya aur banaa
Daali "yeh dil na hota bechaara", chhand wahaan se aaya aur 'tune'
yahaa ka ho gaya

Song: Yeh dil na hota bechaara (Jewel Thief)

RD: Ashaji, aap bataaiye, aap ne kya seekha unse?

AB: awaaz pe kaise 'control' kee jaati hai yeh maine unse seekha,
iske baare mein main baad mein bataayungi, Gulzar bhai, aap ka Bengal
se rishta hai, aap ki beTi ka naam Boski hai

GZ: Bengal ke aap ke zikr se main socha aap meri biwi ka zikr karenge
(laughs)

AB: (laughs) woh aap khud hi karen to behetar hoga. aap ne jo gaana
likha tha "lakDi ki kaaThi", kya woh usi ke liye tha? aap ne aur bhi
bahut si bachchon ki kavitaaen aur geet likhe hain.

GZ: woh kahaavat hai na ki 'charity begins at home' (all 3 laughs),
to beTi ghar pe hi theen, 2 baras, 4 baras, 6 baras, 8 baras, yeh
sab 'stages' ke liye alag alag baateb likhni paDtee hain, to main har
saal ek kitaab likha karta tha, 'perspective' bachchon ke liye sahi
rehta hai, yeh gaana rawaayat se haTkar maine likha. naheen to kya
hota hai wohi "hari bhari patti dekho, pattioyon mein shabnam dekho",
to kya hota hai bachche 'bore' ho jaate hain. ek 'pinch' chaahiye,
bachche ko gaane ke saath khelne deejiye. "aap ki aapaDi paani mein
jaa paDee" yeh jo 'phonetics' hain inhe bachche bahut jaldi pakaD
lete hain.

RD: bahut baDhiya!

GZ: yeh ek misaal tha, is gaane ke baad mujhe baDe 'phone calls' aate
the is gaane ki kya kahin se yeh gaana humein mil sakta hai? mera
bachcha naashta naheen karta!

Song: LakDi ki kaaThi (Masoom)

RD: Ashaji, ek baat bataaiye, mera gaana na ho, aisa koi gaana hai
jise aap aur Gulzar ne mehnat se banaaya hai?

AB: mera bhai Hridaynath ka gaana hai, is film ki kahaani
aur 'direction' Gulzar saahab ka tha, isme ek gaana tha raag
bilaaskhaani toDi par. Hridaynath bahut shuddh sangeet deta hai, koi
milaawat naheen karta.

GZ: jee haan, shuddhata hai, woh khaalispan mein vishvaas naheen
rakhte.

AB: yeh gaana tha "jooThe naina bole saanchi batiyaan", lekin log
isko samjhe "jhooTe naina bole..."

GZ: Ashaji, aayiye, do milkar aaj is baat ka khulaasa kar dete
hain. "jooThe naina" se mera yeh matlab tha ki jin aankhon ne kisi
doosre ko dekh liya to woh jooTha ho gaya, pataa naheen sabko yeh
samajhne mein mushkilaat kyun huyi!

RD: yeh to bol the, lekin main poochh raha hoon ki kya aisa koi geet
hai jise gaane mein aap ko mushkil huyi thee?

AB: suniye (in a taunting tone), yeh saahab (Gulzar) yeh
gaana 'cancel' karnewaale the. kehne lage ki 'situation' se 'match'
nahene ho raha hai. main London gayi huyi ti to mere bhai ne kisi
laDki se gaana gawaa liya, jisse gawaya usne seedhe seedhe gaane ko
gaa diya. main waapas aayi to yeh log mujhse kehne lage ki 'double'
mein jaayo (Asha sings to clarify the difference between the two). to
Hema Malini par gaana 'already' filmaya jaa chuka tha, unke 'lip
movements' ko dekhkar mujhe gaana paDaa, bahut mushkil tha.

GZ: kamaal ki bandish hai aur kamaal ka gaaya hai

Song: JooThe naina bole saanchi batiyaan (Lekin)

AB: Burman saahab, aap ne Shivranjani raag mein woh gaana banaya tha
na?

RD: "mere naina saawan bhaadon", yeh gaana Lata bai ne bhi gaaya aur
Kishoreda ne bhi, maine jab gaana sunaya to Kishoreda ne kaha ki
naheen bhai, yeh gaana to mujhse naheen hoga, tum Lata ko pehle
gawaayo, maine Lataji ko jaakar 'request' kiya, uske baad Kishore da
ko kaha ki yeh shivranjani raag hai. woh boley raag ki to aisi ki
taisi, mujhe gaana sunaao, main 'by heart' karke waisa hi gaayunga,
to woh gaana suna aur kam se kam 7 din tak sunte rahe, unke gaane ke
baad aisa naheen lag raha tha ki woh seekh kar gaa rahe hain, woh man
se hi gaa rahe hain. kitna 'dedication' tha unme!

Song: Mere naina saawan bhaadon (Mehbooba)

GZ: Ashaji, aapko pataa hai chaand par kisne sabse pehle kadam rakha
tha? Neil Armstrong. Unke baad Edwin ne doosra kadam rakha, bas
ek 'step' se woh peechhe the, aur dekhiye sabhi Armstrong ki hi baat
karte hain, Edwin, jo unke peechhe hi the, unko kisi ne yaad naheen
rakha. Aap dono baheno ki 'achievement' bhi waisi hi hai.

RDB laughs

AB: mujhe koi gila naheen hai

GZ: Naheen naheen, yeh to fakr ki baat hai ki woh aap ki baDee bahen
hain.

AB: (sings) "Sili hawa chhoo gayi, sila badan chhil gaya, geeli nadi
ke pare, geela sa chaand hil gaya". mujhe samajh naheen aata ki kabhi
chaand ko aapne geela kaha, kabhi shakkar, to kabhi mishri ka tukDa,
aap kya kya kehte hain chaand ko! mujhe aap dono se yahi shikaayat
hai ki saare achchhe achchhe geet aap didi ko hi dete hain.

GZ: Aisi baat naheen hai, film Khushboo ka geet "Ghar jayegi doli
chadh jayegi" jab maine likha to maine kaha ki yeh aap hi gaayengi.

RD: maine kaha tha ki film mein ise heroine Hema Malini gaayengi to
phir Ashaji kaise gaa sakti hain, par inhone aapka naam hi suggest
kiya.

Song: Ghar jaayegi tar jaayegi (Khushboo)

PRASTUTI SEHYOG: HUSSAIN KHAN
PRESENTED BY: KAMLESH PATHAK

THE END