Sargam Ke Sitare, aaj ka yeh kaaryakram kendrit hai suprasiddha
sangeetkaar Jaidev par.

Jaidev speaks: maine Lucknow mein Ustad Ali Akbar Khan sahab se sarod
seekha. jab we Lucknow se Bambai aaye aur 1953 mein Navketan
Productions ki film Humsafar mein sangeet diya to usme maine
unko 'assist' kiya. lekin Ali Akbar Khan sahab waapas Lucknow chale
gaye. main Sachin Dev Burman se bhi kaafi prabhavit tha. mujhe yaad
hai ek baar ek 'concert' mein Sachin Dev Burman gaane ke liye aaye
huye the. waheen maine pehli baar unhe dekha. main Navketan
ka 'permanent employee' tha. to jab Burman dada ko Navketan ki filmon
mein sangeet dene ke 'offer' mile to maine unko 'assist' kiya aur
baad mein unka 'chief assistant' ban gaya. bataur swatantra
sangeetkaar, meri pehli filmen thee Joru Ka Bhai, Kinare Kinare aur
Navketan ki ek film, jo saare ke saare nakaamyaab rahi. phir mujhe
mila Hum Dono.

Song: Main zindegi ka saath nibhaata chala gaya (Hum Dono)

sangeetkaar Brij Bhushan Jaidev ko bahut kareeb se jaana hai. woh na
keval unke achchhe dost hain balki woh unke gurubhai bhi hain.

Brij Bhushan speaks: Pandit Amarnath se sabse baDe jo unke shishya
hain, woh hum dono par meherbaan the, is tarah se main aur Jaidev
gurubhai the. main jab Bambai mein naya naya aaya, akela bhi tha,
main ek 'hotel' mein Thehra huya tha. jab Jaidev ko is baat ka pataa
chala to mujhpar bahut gussa huye aur kaha ki chalo mere ghar. mujhe
unko bahut kareeb se dekhne ka mauka mila hai. 'folk, classical' aur
bhakti sangeet par unhe zabardast dakhal haasil tha. unhone anek
achchhe logon ko suna hai, 'conferences' mein bhi gaye. unke sangeet
ki vishshta hai ki ek 'loop system' milta hai unke gaano mein, jaise
ki (sings) "main zindegi ka saath nibhaata chala gaya". har melody
mein unka ek 'signature' rehta tha, har geet mein apna alag chhaap
chhoD dete the. woh S D Burman ke 'assistant' the. Chetan Anand ne
unhe Kinare Kinare aur Anjali mein sangeet dene ka mauka diya. bahut
zamaane ke baad un par nazar paDee. aisi bahut si dhune hain jinhe
Jaidev ne banaaye par S D Burman ke naam se gaye. 'Inspite of S D
Burman's influence on him, jab Dev Anand ne unhe 'chance' diya Hum
Dono mein, woh apna alag 'style' lekar aaye. 'slow' ho ya 'fast', har
gaane mein ek 'Indian colour and melody' rehta tha, 'that were rich
in Hindustani flavour'. woh bahut hi seedhe saade aadmi the, koi
dikhaawa ya 'show-off' naheen tha, kabhi 'cheap' harkaten naheen
kiya, kurta pajama pehente the. unka koi bhi rishtedaar naheen tha,
akele rehte the. lekin dost itne zyaada the ki hamesha unke ghar mein
taanta lagaa rehta tha, 'strugglers' baiThe rehte the. Khaiyyam
saahab s ebhi unki dosti ho gayi. dono ne milkar, yaani ki Jaidev
Verma aur Khaiyyam ne milkar ek film mein sangeet bhi diya tha.
aakhir ke dino mein woh bahut pareshaan the apne 'house-owner' ki
vajah se. 'but Government of Maharashtra was kind enough to provide
him a place', par zyaada dino woh iska aanand naheen uTha sake.

Song: Jab gham-e-ishq sataata hai to hans letaa hoon (Kinare Kinare)

Jaidev ko teen baar Rashtriya Puraskaar se sammaanit kiya gaya hai
Reshma Aur Shera, Ankahee aur Gaman filmon ke sangeet ke liye. unhe
Madhya Pradesh sarkaar ki taraf se Lata Mangeshkar puraskaar se bhi
nawaaza gaya hai. ek supratishThit sangeetkaar hote huye bhi nayee
pratibhaaon ko mauka dene mein woh jhijhakte naheen the. Film Gaman
mein unhone ubharti gaayika Chhaya Ganguly ko mauka diya pehli baar
film mein gaane ka aur isi geet ke liye Chhaya Ganguly ko mila us
saal ka Best Female Playback Singer ka Filmfare Award.

Chhaya Ganguly speaks: isse pehle mujhe ghazal gaane ka koi tajurbaa
naheen tha. is 'award' se mujhe protsaahan milaa aur achchhe se
achchha gaane ka. yeh unhi ki mehnat aur koshish ka parinaam hai. usi
saal 1979 ko Gaman ke liye 'Best usic Director' ka bhi award mila.
maine kabhi sochaa naheen tha ki ek din film mein gaayungi kyunki us
tarah se kabhi socha naheen tha.

Song: Aapki yaad aati rahi raat bhar (Gaman)

Chhaya Ganguly speaks: woh bahut hi udaar, 'gentle and soft-spoken'
the. naye kalaakaaron ka hauslaa baDhaate the. unhe saahitya, sangeet
aur kavitaa se bahut lagaav tha. geet ki ek pankti ko lekar 'singer'
se alag alag tarah se usey gawaate the. unke paas jaane se aisa
lagtaa hai ki 'nervous' ho jaayungi. unka ghar mere 'office' ke
nazdik hi tha. main 'All India Radio' mein kaam karti thi. to unka
jab bulaawa aaya to pehle din to main gayi bhi naheen. phir doosre
din unke 'assistant' Pyarelal-ji bulaane aaye the. tab main gayi. woh
saamnewaale se is tarah se baat karte the 'that he will make you feel
very much at ease'. unke sangeet mein bharatiya sangeet ki 'melody'
bhi hai, saath hi maanD ki lokshaily bhi jhalakti hai. kahin na kahin
unke geeton mein bhakti ras bhi mil jaata hai. mera ek 'album' nikla
tha "Bhakti Sudha" ke naam se jinme unke bhajan the. uchchaaran
seekhne ke liye woh mujhe Pandit Narendra Sharma ke paas le gaye.
unhe saahitya ka gyaan tha, par bhir bhi woh mujhe Pandit-ji ke paas
leke gaye taaki ki mujhe unse kuchh seekhne ka mauka mile. unse bahut
kuchh seekhne ka mauka mila.

Song: Maata saraswati shaarada (Alaap)

sirf film sangeet hi naheen, Jaidev ka sureela jaadoo bhajanon aur
ghazlon mein bhi jaaga. Dr Harivansh Rai Bachchan ki kriti Madhushala
ko bhi unhone hi swarbaddha kiya tha.

Song: Madiraalay jaane ko ghar se chalta hai (Madhushala - Nonfilm
Album)

gaayak Hariharan ki aaj ek alag pehchaan hai, ek alag mukaam haasil
kar chuke hain. par unki pratibha ko pehli baar pehchaan kar Jaidev
ne hi film sangeet mein unhe pehla 'break' diya tha.

Hariharan speaks: Jaidev-ji ka mere jeevan mein mahatwapoorna sthaan
hai. woh mere 'friend, philosopher and guide' the. 1977 mein pehli
baar main unse milaa ek 'competition' mein jisme woh 'judge' bane
the. wahaan se main unhe jaata hoon. 'He has treated me as a son'.
unka 'personality' ek tha, wohi 'delicacy and sensitivity' jo unke
geeton mein humein milta hai, waise hi woh aadmi the, bahut hi
achchhe aur naram-dil. maine unke saath 3/4 saal kaam kiya. gaana
seekhna, 'recordings' par jaana, unhe 'assist' karna, 'rehearsals
conduct' karwaana. unhone hi mujhe 'life' ki 'philosophy' seekhaayi
ki 'what is life about?'. 'He was a magnanimous human-being'. bikul
fakeer the. na kuchh lena na kuchh dena, bas apne kaam se kaaam
rakhte the, logon se pyar karna, sangeet se pyar karna, bas. Gaman
mein gawaane se pehle unhone mujhse kaha ki Hari, tum achchha gaa
lete ho, 'rehearsals' karo, tum ho Madrasi, abhi Urdu seekho
(laughs). main bhi Chand Bala, abhi guzar gayeen hain woh, unse main
Urdu seekhne lagaa. Jaidev-ji se 'timely advice' milne se mujhe sahee
dishaa mili. Muzaffar Ali ne jab Gaman banaaya to unhone naye
naye 'singers' ko 'chance' diya. us samay naye logon ko 'chance'
milna bahut mushkil tha kyunki baDe baDe 'singers already' the. is
film mein mera geet tha (sings) "ajeeb saaniha mujhpar guzar gaya
yaaron", maine unse poochha ki yeh 'saaniha' ka kya matlab hai.
unhone kahaa ki saaniha matlab haadsa. mujhe pehle geet mein hi Urdu
mein gaane ka mauka mila, yeh poora Urdu hi tha. meri 'mummy' aayi
theen 'recording' par. 'first take' hi 'OK' ho gaya. Jaidev-ji bahut
khush huye. is geet ke liye 1/2 tak riyaaz karwaya tha. yeh achchhi
baat hai, isse gaana yaad ho jaata hai jisse 'effect' achchha hota
tha, warnaa gaane ko apnaane mein waqt lagtaa hai, riyaaz karne se
achchha rehta hai.

Song: Ajeeb saaniha mujhpar guzar gaya yaaron (Gaman)

Jaidev ka sangeet shastriya sangeet ke rang chhalkaati, lok sangeet
se sajee, ek alag pehchaan rakhte the. woh Khud Sarod bajaate the,
iska asar unke sangeet mein to honaa hi tha. Rajasthan ka maanD unhe
bahut achchha lagta tha jo ubharkar saamne aaya hai is gaane mein.

Song: Tu chanda main chaandni (Reshma Aur Shera)

Chhaya Ganguly aur Hariharan ke saath saath film Gaman mein ek aur
gaayak ne film sangeet mein kadam rakhaa. yeh hain Suresh Wadekar, jo
Jaidev se bahut prabhaavit hain.

Suresh Wadekar speaks: papaji (Jaidev) ne bahut 'melodious' kaam
kiya, khoobsurat khoobsurat gaane deeye shrotaaon ke liye. main
bhaagyashaali hoon ki maine unko 'assist' kiya 6/8 maheene. 'Sur
Singer competition' jeetne ke baad mujhe unke saath kaam karne ka
mauka mila. woh mere guruji ke 'close friends' mein the. mere guruji
the Pt Jiyalal Basant, Lahore se woh unke kareebi dost the. papa-ji
ne mere guruji se kaha ki isey mere paas bhejo, 'experience' ho
jaayega ki gaana kaise bantaa hai, ek achchha anubhav ho jaayega.
main gaya unke paas, waheen pe meri Lataji se jaan pehchaan ho gayi.
us samay woh film Tumhare Liye ka gaana "tumhe dekhti hoon" ke liye
aaya karti theen. mujhe wahaan mazaa aata tha, kabhi 'rhythm
section', kabhi 'sittings' mein jaaya karta, tabla lekar unke saath
baiThta, kaise gaana banta hai, shaayar bhi hote the wahaan, phir
gaana banne ke baad 'arrangement' kaise kiya jaata hai, yeh sab maine
dekha aur seekha.

Song: Tumhe dekhti hoon to lagta hai aise (Tumhare Liye)

Suresh Wadekar speaks: papaji bhi mujhse bahut pyar karte the, bikul
apne beTe ki tarah. "seene mein jalan" yeh ghazal banne se pehle hi
main thoDa 'busy' ho gaya tha. unhone mujhse kaha tha ki
apne 'career' pe dhyaan do, is gaane ke baad unhone kaha ki tum
gaayoge mere liye. mujhe itni khsuhi huyi ki jis sangeetkaar ko
bachpan se sunaa karta tha ab main unhi ke geet gaa raha hoon. bas ek
hi gaana maine unka gaaya "seene mein jalan"

Song: Seene mein jalan aankhon mein toofaan sa kyun hai (Gaman)

Suresh Wadekar speaks: papaji 'melody' ka bahut zyaada dhyaan rakhte
the. jitne bhi buzurg sangeetkaar hain, woh apne geeton mein
hamesha 'melody' ko zinda rakhte the. abhi ka zamaana alag hai, logon
ko jaisa pasand hai waisa hi ban raha hai. aaj ka 'music' bhi achchha
hai, bas zyaada 'orchestration' hai, 'melody' kam hai. aaj logon ko
har gaane mein naachna zaroori hai. Jaidev-ji aur unke
jo 'contemporaries' the, unke geeton mein 'folk' ka ek rang hota tha
meeTha meeTha sa, geet classiqui aur 'melody' bhara hota tha, gaane
mein 'challenge' hamesha hota tha. papaji ki saans, 'breath' thoDi
kam thi. isko dhyaan mein rakhkar gaana banaate the kamaal ka. "main
zindegi ka saath nibhata chala gaya" mein chhoTe chhoTe tukDon mein
itna achchha lagta hai. gaana shuru hote hi lagtaa hai ki yeh to
papaji ka gaana hai. unki pehchaan, unka 'stamp' unke gaan emein hota
tha. main bahut bhaagyashaali raha, unse bahut kuchh seekhne ko mila.

chaahe shastriya sangeet ho ya lok sangeet, Jaidev ke geeton mein
kuchh bhi anaavashyak naheen lagtaa. geet ke anuroop dhun ki poornata
ka ahsaas karaata hai unka sangeet, na kuchh kam na kuchh zayada
bikul is geet ki tarah...

Song: Yeh dil aur unki nigaahon ke saaye (Prem Parbat)

dhun rachne se pehle Jaidev geetkaar ki rachna ko sunte the, uski
vazan ko parakhte the. unka vichaar tha ki shabd pehle aane chaahiye,
geet ka arth gaDbaDaana naheen chaahiye. phir uske baad woh apne
asardaar sangeet se geet ko poornata tak pahunchaate the. yeh hain
gaayak Bhupendra:

Bhupendra speaks: unka anokhaa sangeet tha, 'composition' ki
shaily 'original' thi. apne geeton mein woh 'poetry' ki tah tak
pahunchte the, har tarah ke 'compostion' ko baakhoobi anjaam dete
the. unhe kaam lena aata tha. koi zor naheen, koi zabardasti naheen.
woh un sangeetkaaron mein se the jo kehte the ki aap apni tarah se
samajhkar kya kar sakte hain keejiye. aaj ke sangeetkaaron jaise
naheen jinko aap kuchh keh naheen sakte. issey har gaane mein chaar
chaand lag jaata tha. 'artiste' ko kabhi woh 'disturb' naheen karte
the, bas 1 ya 2 'take' mein gaana 'OK' ho jaata tha. maine K A Abbas
ki ek film mein apna pehlaa gaana gaaya tha, par film Gharaunda se
main 'popular' huya. "ek akela is shaher mein" is geet ko sunkar
logon ko lagaa hoga ki gaana 'meter' mein hai. 'This song is a normal
song like any other song', woh har kism ka gaana banaa sakte the.

Song: Ek akela is shahar mein (Gharaunda)

Bhupendra speaks: agar Jaidev-ji aaj bhi hote to aaj film sangeet ki
jo paribhasha hai, usmein woh apne aap ko 'adjust' kar lete.'I am
proud of him' mujhe fakr hai un par.

unke sangeet ke baare mein aur kya kahen, unka sangeet aap hi bakhaan
karti hai unki pratibha ka. sangeet shaukeen hamesha hreeni rahenge
mahaan sangeetkaar Jaidev ke.

Song: Allah tero naam (Hum Dono)

Sargam Ke Sitare, aaj ka yeh karyakram kendrit tha mahaan sangeetkaar
Jaidev par. Is karyakram ke nirmaan mein takniki sahaayak the
Tejashree Shetty aur Mangesh Sangle, prastuti sehyog tha Ramesh
Gokhale ka, aur Vividh Bharati ki or se isey aap ke liye prastut kiya
Nimmi Mishra ne. Ab deejiye ijaazat, namaskaar!

THE END