Sargam Ke Sitare, aaj ka yeh kaaryakram samarpit hai ek aise fankaar
ko jinhe sansaar jaantee hai ek umdaa shaayar aur ek behatareen
geetkaar Qamar Jalalabadi ke naam se.

Song: Ek pardesi mera dil le gaya (Phagun)

Qamar Jalalabadi, film sangeet ke ek aise geetkaar jinke anginat
jhilmilaate geeton se film jagat ka aasmaan roshan hai.

Song: Dum dum diga diga (Chhalia)

Qamar Jalalabadi ne apne naghmon ko kabhi zindegi ki khushiyon se,
kabhi unke ghamon se sajaaya, kabhi mohabbat ka paigaam diya, kabhi
aansooyon ki namee dee, aur kabhi jawaan umangon aur hasraton se bhar
diya.

Song: Piya piya na laage mora jiya (Phagun)

Qamar saahab ke aise kai geet hain jo behad 'popular' rahe hain
jinhone unka naam Hindi film sangeet ke sunehre itihaas mein jaD diya
hai.

Song: Tu hai mera prem devta (

Qamar Jalalabadi ke zindegi ki shuruwaat huyi 28 February 1917 ko
Punjab ke Jalalabad shaher mein. Unka asli naam tha Om Prakash
Bhandari. Bachpan se ki kalaa aur lekhan ke prati unka rujhaan tha.
apne 'professional career' ki shuruwaat unhone patrakaarita se
kiya. 'Daily Milaap' naamak patrika mein unhone apna ek Khaasa jagah
banaaya. ptrakaarita ke saath saath woh apna ek aur pehchaan bhi
banaa rahe the, shaayar ka.

Qamar Jalalabadi recites his a number of shers from his ghazals
(These were recorded for Chitrashala programme)

Shaayri aur sangeet ke sangam ne unhe ek naghma-nigaar banaa diya.
1940 mein Mumbai ke Prabhat Pictures mein unhe pehla 'break' diya tha
Ram Shastri ne. is film se shuru huyi unke ek sunehre 'career' ka.
1940 se 1970 tak Qamar saahab ke kalam ne Khoob dhoom machaayee aur
woh ek se ek 'hit' geet dete chale gaye.

Song: O door jaane waale vaada na bhool jana (Pyar Ki Jeet)

Qamar Jalalabadi ne apne samay ke sabhi naami sangeetkaaron ke liye
geet likhe, in mein se kuchh ke naam hain Husnlal Bhagatram. Raag
PahaaDi par aadhaarit film Ansoo ki yeh rachnaa film sangeet ke
itihaas mein ek sarvashreshTha geet ke roop mein maana aur jaana
jaata hai.

Song: Sun mere saajna dekhoji mujhko bhool na jaana (Aansoo)

Anil Biswas ne Qamar saahab ke naghmon ko kya khoob baandha hai apne
dhuno mein...

Clip: Raahi matwaale (Waris)
Clip: Roothke tum to chal deeye (Jalti Nishani)

Hansraj Behl...

Clip: Bhool jaa sapney suhaane bhool jaa (
Clip: Mohabbat zinda rehti hai (Chengeez Khan)

Qamar Jalalabadi ke naghmon ko ek alag hi rang diya sangeetkaar O P
Nayyar ne.

Clip: Nazron ke teer maare kas kas kas (

Kalyanji Anandji ne bhi Qamar Jalalabadi ke anek geeton ko apne
dilkash dhuno se sanvaarkar amar banaa diyaa.

Song: Main to ek khwaab hoon (Himalay Ki God Mein)

Vividh Bharati par is samay aapne 'tune' kiya hai 'programme' Sargam
Ke Sitare aur aaj ka yeh kaaryakram samarpit hai geetkaar aur shaayar
Qamar Jalalabadi ko.

Qamar Jalalabadi speaks: 'Director' Manmohan Desai ki pehli film
Chhalia apne bhai Subhash Desai ke liye 'direct' kiya. Subhash Desai
ne sangeetkaar ke liye Kalyanji Anandji ka naam chuna. Subhash Desai
ka naam sunte hi Kalyanji bhaag khaDe huye. Subhash Desai ne unka
peechha naheen chhoDa, unhe pakaD kar unhe sangeetkaar banaakar hi
dam liya. leejiye film Chhalia ka geet suniye meraa likha huya.

Song: Teri raahon mein khaDe hain dil thaam ke (Chhalia)

Qamar Jalalabadi ke geeton mein prem, virah aur milan, tanhaaiyon,
umangon aur hasraton ke rang paaye jaate hain, to kai geet
unhone 'league' se haT kar bhi likhe hain, jinmein haasya vyang bhi
bharpoor nazar aata hai. aisa hi ek geet suniye Kishore Kumar ki
awaaz mein.

Song: Jai Govindan Jai Gopalam (Aansoo Aur Muskaan)

Qamar Jalalabadi speaks: sangeetkaar Laxmikant-ji ne ek baar mujhe
bataaya tha ki bahut saal pehle jab woh 'musician' the aur 'music
director' naheen bane tab unhone sochaa tha ki 'chance' mila to mujhe
apna mustaqeel shaayar rakhenge. phir kya huya, mere man kuchh aur
hai, daata ke kuchh aur. bahut saal baad mauka huya Laxmikant
Pyarelal ke liye Malakchand Kochchad ki film Kachcha Chor mein geet
likhne ka, isi film ka ek geet suniye Asha-baai ki awaaz mein, jise
parde par Rekha ne gaaya hai.

Song: Pehle woh muskuraaye phir hum muskuraaye (Kachcha Chor)

Qamar Jalalabadi speaks: kuchh arsaa pehle ek 'producer' ne mujhe
Khandala le jaakar 3 din aur 3 raaton ke liye ek bangale mein qaid
kar diyaa aur keh diya ki jab tak unka 'script' poora naheen ho jaata
main wahaan se nikal naheen saktaa. naa woh Khud aaraam karte aur naa
mujhe chain ki saans lene dete. is baat se aap ko jang ke din yaad aa
gaye honge. mujhe lag raha tha "qaid mein hai bulbul Sahyaad
muskuraaye". phir mujhe ahsaas huya ki woh 'producer' bhi to mehnat
kar raha hai. woh 'producer' the Prem Nath aur film thi Gyaniji. is
film mein Sardar Malik aur Prem Nath ka 'music' tha. leejiye is film
ka ek geet suniye.

Song: Kabhi woh Laila kabhi woh Majnu (Gyaniji)

Qamar Jalalabadi ki Khoobi sirf geet lekhni tak hi seemeet naheen
rahi. woh ek aadarniya shaayar aur ek achchhe insaan the. film jagat
ki chakaa-chaundh mein rehkar bhi woh ek sachche karmyogi ka jeevan
jeete rahe. 1950 ke dashak mein kaamyaabi ki shikhar par pahunchne ke
baad bhi unki saadgee par uska koi prabhaav naheen paDaa. unki
sanjeedgee unke kai geeton mein nazar aati hai.

Song: Mere TooTe huye dil se koi to aaj yeh poochhe (Chhalia)

Qamar Jalalabadi ne jahaan ek taraf aise dard bhare geet likhe,
waheen doosri taraffilm Howrah Bridge ke aise naTkhaT geet bhi likhe.

Song: Mera naam Chin Chin Chu (Howrah Bridge)

Aur ab suniye woh geet jiska jaadoo aaj bhi ek nasheela samaa baandh
detaa hai.

Song: Aayiye meherbaan (Howrah Bridge)

san 1944 mein banee film Chaand ki yeh rachnaa film geet ke sabhi
maandanDon mein khaDee utartee hai.

Song: Do dil ko yeh duniya milne hi naheen detee (Chand)

Qamar saahab ke geet aam aadmi ki zubaan par chaDh jaane ki taaqat
rakhte the. Unke geeton ki saralta hi unki sabse baDee Khoobi thi.
gehri baat ko sahejta se keh dena koi aasaan kaam naheen hai. tabhi
to unka shumaar desh ke mahaan geetkaaron mein hota hai.

Song: Baaje paayal chhun chhun hoke bekaraar (Chhalia)

Qamar Jalalabadi ne apne filmi safar mein kuchh 166 filmon mein
kareeb kareeb 700 gaane likhe. ek kaamyaab geetkaar aur shaayar hote
huye bhi unhone 41 filmon ka samvaad lekhan kiya. iske alaawa
4 'screenplay' aur 5 kahaaniyaan bhi likhe. is tarah se unki kalaa
aur pratibha film nirmaan ke anek kshtron mein nazar aayeen. Film
Writers' Association ki sthaapna mein Qamar saahab ka mahatwapoorna
yogdaan raha. woh uske 'Founder Secretary' aur 'President' bhi rahe.
9 January 2003 ko Qamar saahab ne is faani duniya ko alvidaa keh
diyaa aur amar ho gaye apne kaaljayee kritiyon ke zariye. Qamar
saahab apne geeton ke baare mein kahaa karte the ki "yeh naghmein
qaum ke hain jo chaahe gungunaa le"

Clip: Jaate panchhi neel gagan mein geet milan ke gaayen (

Sargam Ke Sitare, aaj ka yeh kaaryakram samarpit tha jaane-maane
geetkaar Qamar Jalalabadi ko. ????? ke shodh aur aalekh par aadhaarit
is kaaryakram ke nirmaan mein prastuti sehyog diyaa P K A Nair ne aur
Vividh Bharati ki or se isey aapki sevaa mein prastut kiya Kamal
Sharma ne. ab deejiye ijaazat, namaskaar!

THE END