aaj ka yeh kaaryakram kendrit hai paarshwa-gaayika Shreya Ghoshal par

Clip: Dil to udne lagaa (Tum)

doston, kamseen Shreya Ghoshal is film sangeet sansaar mein aise
samay mein aayee hain ki jab kai 'singers' apne awaaz kaa jaadoo
jagaane mein mashgul hain. apni khanakti sureelee awaaz se Shreya ne
apne liye ek alag hi mukaam banaa liyaa hai aur safal bhi huyi hain.

Clip: Tumhe jo maine dekha (Main Hoon Na)

Shreya Ghoshal ka sangeet ke is kshetra mein aana sanyog-vash hi
huyaa. apni awaaz ka lohaa manwaane ke liye woh kai pratiyogitaaon
mein bhaag le rahee theen. aisi hi ek pratiyogitaa mein Sanjay Leela
Bhansali ki nazar unki awaaz par padee. unhi dino unki film Devdas
ban rahi thi. is nanhi si kali ko Sanjay Leela Bhansali ne apni film
mein gaane ka mauka diya aur phir kya huya, jo huya woh ek itihaas
hai.

Clip: Silsila yeh chaahat ka na maine bujhne diya (Devdas)

kudratan awaaz ka achchha honaa aur us par riyaaz, tayyaari aur poore
samarpan ke saath Shreya Ghoshal ne apni qaabliyat ko siddha kiyaa.
Shreya Ghoshal ki awaaz mein ek ajeeb si khanak hai. katheen se
katheen geet ko bhi baDe khoobsurti ke saath gaa leti hain, aur saral
sureele geet to unke awaaz se nikharkar baahar aati hain. apni madhur
suron ki taan jab woh chheD detee hain to har kisi ka man gungunaane
lagtaa hai

Clip: Chhan chhan (Munna Bhai MBBS)

Shreya Ghoshal speaks: gaane ka shauk kis umra se tha mujhe yaad
naheen. main bahut 'high pitched' roti thee aur sabke kaan kharaab
kar detee thi. mere 'mummy daddy' ne dekhaa ki main achchhaa gaatee
hoon. meri mummy riyaaz karti theen, main bhi aaspaas ghoomti rehti
thi, to kabhi kabhi woh kehti ki beti yeh gaa, beti aisa gaa. aur
main Theek Theek gaa deti thee. Tab se mere 'parents' ko lagaa ki is
mein kuch 'potential' hai, aur maine gaana seekhna shuru kar diya.
main Rajasthan ke Kota shaher se 70 km door ek chhoTi si jagah hai
Raarphata, wahaan par sangeet seekhne ka zyaada scope naheen tha.
waheen par kuch folk music seekha, thoDaa classical music seekha,
phir hamaare music teacher Bhatnagar sir se seekhaa. phir main 70 km
door Kota jaakar bhi kuch din sangeet seekha. is tarah se 'music'
mere 'routine' mein aa gaya.

Clip: Aye meri zindegi tu mere saath hai (Saaya)

Shreya Ghoshal speaks: main bahut 'lucky' hoon ki mere parents
bahut 'supportive' hain aur hamesha mujhe 'encourage' kiya hai, khaas
kar mere papa. unhone kabhi kisi cheez ke liye mujhe 'force' naheen
kiyaa. jab doosre bachchon ke 'mummy daddy' unhe paDhne baiThne ke
liye peechhe peechhe ghoomte, mujhe kabhi kisi ne aisa naheen kahaa.
main bhi yeh samajhti hoon ki kisi cheez ke liye jitnaa 'force' kiyaa
jaaye, 'they start hating that thing', jitnaa 'support' denaa hai,
unhone mujhe diyaa. main kabhi unse poochhti ki aapne mujhe kyun itni
chhooT de rakhi hai, to unhone kaha ki achchhe bure ki pehchaan tum
khud karo.

Clip: Tu hi bata zindegi jo bhi huya jyun huya (Oops!)

Shreya speaks: main aapko ek 'secret' bataati hoon, meri mummy aaj
bhi mujhse kehti hai ki yeh gaana waana chhoD, aur phir se shuru kar
de paDhaai, aur 'engineering' kar le. yeh baat to sach hai ki
is 'line' mein 'insecurity' bahut, kab kya ho jaaye keh naheen sakte.
mere paapa Kota mein 'nuclear plant' mein achchhi naukri karte the,
mere liye woh usey chhoD kar Bombay chale aaye. jab main 11 saal ki
thi, tab Sa Re Ga Ma mein bachchon ke liye ek 'episode' huyaa tha
jismein maine gaaya tha. us 'episode' ke 'judge' the
Kalyanji 'uncle'. unhone mujhse kahaa ki tum log Bombay aa jaao, main
tumhe seekhaana chaahta hoon, 'you have the potential'. maine
kuchh 'professional albums' mein gaaye the, 'mostly Bengali and
Marathi, things started growing after that', phir Bhansali ji ne sa
Re Ga Ma mein mujhe sunaa.

Clip: Bairi piya baDaa bedardi (Devdas)

Shreya Ghoshal speaks: silsilaa to shuru ho gaya Devdas se, uske baad
jo agli 'hit film' aayi, woh thi Jism, 'it was one of the
milestones'. Devdas ke baad waise to kuchh filmon mein gaaye jaise
Tujhe Meri asam, vagerah, lekin inhe itnaa 'promote' naheen kiyaa
gaya tha. Jism mein "jaadoo hai nashaa hai" bahut 'popular huya.

Clip: Jadoo hai nasha hai (Jism)

Shreya Ghoshal ne anginat filmon mein gaaye hain aur gaatee rahengee,
yeh hai ek chhoTi si jhalak unke gaaye kuchh lokpriya geeton ki.

Clip: Agar tum mil jaao zamaana chhoD denge hum (Zeher)
Clip: Aashiq banaaya aap ne (Aashiq Banaya Aapne)
Clip: Hum tumko nigaahon mein (Garv)
Clip: Bepanaah pyaar hai aaja (Krishna Cottage)
Clip: Mera dil kuchh kehna chaahta hai aap se (Plan)
Clip: Mausam ki ijaazat ho (Chehraa)

Shreya Ghoshal ne kai gaayakon ke saath yugal geet gaaye hain, inmein
Sonu Nigam ke saath gaaye huye kai geet behad lokpriya huye hain,
aayiye aise hi kuchh geeton ke bhi ansh sunte chalen.

Clip: Teri baahon mein hum jeete marte rahe (Khakee)
Clip: Pyar bhara dil yeh sanam (Loc Kargil)
Clip: Piu bole piyaa bole (Parineeta)
Clip: Vaada karo tum jaane se pehle phir milenge sanam (Phir Milenge)

jee haan doston, jaane se pehle hum vaada karte hain ki aapse phir
mulaaqaat hogi. hamaara aaj ka yeh kaaryakram kendrit hai paarshwa-
gaayikaa Shreya Ghoshal par. ab apne dost Ashok Sonawane ko ijaazat
deejiye, namaskaar!

Clip: Chalo tumko lekar chalen (Jism)

THE END