1991

Song: Afsana likh rahi hoon dil-e-beqaraar ka (Dard)

Achchhaa, to fauji bhaaiyon, mujhe tumhaare saamne aane ka mauka mil
hi gaya. Haan bhai, har koi yahi chaahta hai ki ek bangla bane nyara,
aur us mein jangla rahe pyara! Naheen naheen, jangla naheen, us mein
apna kunaba rahe saaraa. To main phir se tumhe puraane zamaane mein
ghaseet ke le jaa rahi hoon. Main woh gaana suna rahi hoon jise gaaya
hai Noorjehan-ji ne, jo aajkal mallikaa-e-tarannum kehlaati hain, aur
Surender-ji ne, jo pyaare bhagwaan ko ho gaye hain. Sunne ke qaabil
hai yeh gaana jo kehta hai, 'aawaaz de...nirdayee tu kahaan hai?'

Song: Awaaz de kahaan hai (Anmol Ghadi)

Mere sajjanon, main tumhe thodi si aap-beetee sunaati hoon. Mashhoor
heroine Suraiyya, film star Suraiyya, haay haay haay haay, ke saath
maine film 'Dard' ka yeh gaana gaaya tha. Main bilkul unse lipti
khadi gaa rahi thi. Suniye yeh geet jismein hum dono ne apne gaane ki
adaayagee kee hai.

Song: Betaab hai dil (Dard)

Kyun, achchhaa lagaa naa? Main aapko achchhi lagati hoon naa? Aap bhi
mujhe bade achchhe lagte hain. Arey, agar aap yahin saamne khade hote
to tumhe gale se chipad-chipad kar jaane hi naheen deti. Ek film thi
jiska gaana main bajwaake bhi sunaayungi aur do line gaayungi bhi.
Jab yeh film U.P. mein dikhaaee jaati thi - film thi Anokhi Ada - to
kitna hi paisa phinkta tha iske rhythm aur gaano par. Na jaane kitni
dher maaya jamaa ho gayi hogi theatrevaalon ke paas! Gaanaa thaa
(sings) 'kaahe jiyaa dole, ho kahaa naheen jaaye...'

Song: Kaahe jiya dole, ho kahaa naheen jaaye (Anokhi Ada)

Haan, mazaa aa gayaa na? Jiya dol raha hai na aapka? Mera bhi.
Achchha, aapne yeh to poochha hi naheen..arey, kahaan se poochhenge,
yahaan mere saamne hote to poochhte na..ki main Tun Tun se Uma Devi
kaise ban gayi. Arey, arey, mere chaahnewaalon, meri rasmalaaiyon,
mere rasgullon! Uma Devi se Tun Tun kaise bani yeh kehna chaahiye tha
mujhe. Abhi tak main Naushad-saahab ke gaane sunaa rahi hoon, unhone
hi to Tun Tun banaya mujhe! Aapne mere gaane sune hain? shaayad radio
par aajkal sunne ko naheen milte. Apne radio station se aap zaroor
kahiyega ki Uma Devi ke gaane bajaao! Pichhle zamaane mein kitne
mahaan-mahaan kalaakaaron ko sunaa hai humne! Naushad-saahab ka hi ek
gaana suniye, Rattan film ka, jise Zohra-ji ne kya pyaar se gaaya
hai - 'Akhiyaan milaake chale naheen jaana!'

Song: Akhiyaan milaake jiya bharmaake (Rattan)

To dekhaa! kaisi milaaeen akhiyaan? Aap jhoom uththe na? Ab doosra
gaana suniye. Isey gaaya hai Shamshad Begum-ji ne - haay haay haay
haay, kyaa gaati hain! aur Rafi-saahab ne, unke saath hain Asha
Bhosle. Haan, gaana hai, 'leke pehla pehla pyaar, only cash no
udhaar!'..ha ha ha..

Song: Leke pehla pehla pyaar (CID)

Haay haay haay haay...ab suniye Kishore Kumar-ji ko. kya kamaal ke
gaayak, kamaal ke actor..na jaane kitni kala koot-koot ke bhari huyi
hai unmein. to suniye 'khaike paan makkhanwala'. arey
naheen, 'Banaraswala'. Mere saath yehi mushqil hai, jab dekho doodh-
makkhan ki baaten karti rehti hoon. Makkhan aap bhi khaana, magar
thoda thoda.

Song: Khaike paan Banaraswala (Don)

Arey fauji bhaiyon, kabse main hi bole jaa rahi hoon, kuchh aap bhi
boliye naa! bolo naa darling, lollipop, bolo naa! achchhaa ab bataao
kaun se gaayak ki aawaaz sunaayun main aapko? Ek bahut hi pyaare
gaayak ka gaana sunaati hoon. Gaayak..woh actor bhi the.. bataaiye
kiski baat kar rahi hoon? Jaaiye, aap kya bataayenge? Yeh hain Talat
Mahmood - haay haay haay haay! to yeh geet suniye, jo ek ladka bhi
mujhe dekhkar gaata tha, isliye yaad hai mujhe (sings) 'jalte hain
jiske liye, teri aankhon ke diye...'

Song: Jalte hain jiske liye (Sujata)

Haan to mere fauji bhaaiyon, mere sajjanon, kaisa lag raha hai aapko
yeh programme? Meetha meetha lag raha hai na? Jaise ice-cream,
rabdee, laddoo, rasgulle khaa rahe hon? Waise to meri ichchhaa bahut
hai bolne kee, magar waqt naheen hai. To chalte chalte yeh bhajan sun
leejiye jise gaayika Lata ne bade bhaktibhaav se gaaya hai.

Song: Allah tero naam eeshwar tero naam (Hum Dono)

Achchhaa, behano aur bhaaiyon, arey maaf keejiye, sirf fauji
bhaaiyon, kya karoon, ladki hoon na, isliye galati kar deti hoon, to
chaliye, Jai Hind!

THE END