EK DHUND MEIN JAANA HAI
-----------------------

VBLC's Tribute to Mahendra Kapoor
(9 Jan 1934 - 27 Sep 2008)
*********************************


CLIP:
---------------------------------------
"abhi alvidaa mat kaho doston, na jaane kahaan phir mulaaqaat ho, na
jaane kahaan phir mulaaqaat ho" NIKAAH
---------------------------------------

doston, zindagi ki aaKhri sachchaai hai mrityu. jo bhi is dharti par
aata hai, usey ek na ek din is faani duniya ko chhoD kar chale jaana
hi hota hai. lekin kuchh log jaakar bhi naheen jaate, hamaare dilon
mein base rehte hain, hamesha hamesha, aur jinki yaaden reh reh kar
yaad aati hain hamein. apni kalaa ke zariye aise log kuchh aisa amiT
chhaap chhoD jaate hain zamaane par ki jo miTaaye naheen miT sakte.
unka yash itna apaar hota hai ki suraj chaand ki tarah jinki roshni
yugon yugon tak, anantkaal tak prakaashmaan rehti hai. aise hi ek
mahaan kalaakaar, film jagat ke suprasiddha paarshwa gaayak Mahendra
Kapoor ab hamaare beech naheen rahe. kal yaani 27 September ko 74
varsh ki aayu mein unhone is duniya-e-faani ko chhoD kar apni anant
yaatra par chale gaye. lekin woh hamesha jeeveet rahenge, hamaare
dilon mein sada raaj karenge apni anginat sumadhur geeton ke zariye.
apne chaahnewaalon ka pyaar unhe kabhi unse alag naheen kar saktaa.

SONG:
---------------------------------------
"mera pyaar woh hai ke mar kar bhi tumko judaa apni baahon se hone
na degaa, mile mujhko jannat to jannat ke badle meri jaan Khuda se
tumhe maang legaa" YEH RAAT PHIR NA AAYEGI
---------------------------------------

"na jaane kaun sa pal maut ki amaanat ho, har ek pal ki Khushi ko
gale lagaake jeeyo. yeh zindagi kisi manzil pe ruk naheen sakti, har
ek makaam se aage kadam baDhaate jeeyo". doston, zindagi aur maut is
duniya ke do sire hain. is kshaNbhangur zindagi ka budbudaa kab
phooT jaaye, kab bikhar jaaye koi naheen keh saktaa. zindagi ke is
falsafe ko wohi sahi tareeke se samajh paaya hai jisne har pal ko
Khushi Khushi jeeya hai, zindagi ke har pal ka mazaa kiya hai binaa
yeh soche ki kal kya honewaala hai. Mahendra Kapoor saahab ne apni
zindagi ko kuchh isi tarah jeeya hai. har ek gaane ko unhone poori
shiddat se, poori laagn se, aur poore dil se nibhaaya hai. yahi
wajah hai ki unka ek ek geet ek ek anmol moti hai.

SONG:
---------------------------------------
"na munh chhupaake jeeyo aur na sar jhukaa ke jeeyo, Gahmon ka daur
bhi aaye to gale lagaake jeeyo" HUMRAZ
---------------------------------------

Mahendra Kapoor ki aawaaz aur gaayiki hi unki taarif hai. aaj jab
is 'industry' mein itne saare gaayak hain, Mahendra Kapoor ke awaaz
ki ek alag hi jagah hai, jiska koi doosra saani naheen. jis waqt
Mahendra Kapoor is filmi duniya mein aaye, us waqt Talat Mahmood,
Mohd Rafi, Mukesh, Kishore Kumar, Manna Dey aur Hemant Kumar jaise
naamcheen gaayak 'industry' par raaj kar rahe the. baawjood iske
unhone apni ek alag pehchaan banaayi aur kuchh gaane to aise bane jo
sirf unhi ke liye bane. desh bhakti ras ke geeton mein unka koi
muqaabla naheen tha. unke gaaye Upkar, Purab Aur Pashchim aur Kranti
jaisi filmon ke deshbhakti geeton ke baGair shaayad hi koi
deshbhakti parv sampanna ho sakta hai. doston, kisi ke chale jaane
se yeh duniya naheen rukti. duniya nirantar chalti rehti hai,
zindagi aage baDhti rehti hai, lekin jaanewaale ki yaad zaroor reh
jaati hai. Mahendra Kapoor ke gaaye geeton ka Khazaana hamaare paas
hai jo aanewaali peeDheeyon ke gaayakon ke liye maargdarshak
hain. "andhere kya ujaale kya na yeh apne na woh apne, tere kaam
aayenge pyaare tere armaan tere sapne, zamaana tujhse ho barham, na
aaye raah par mausam, bahaaren phir bhi aati hain, bahaaren phir bhi
aayengi"...

SONG:
---------------------------------
"badal jaaye agar maali chaman hota naheen Khaali, bahaaren phir bhi
aati hai bahaaren phir bhi aayengi" TITLE SONG
---------------------------------

9 January 1934 ko Amritsar mein janme Mahendra Kapoor apne 40 din ki
aayu mein hi Bambai aa gaye. 5 varsh ki aayu mein unhone gaana shuru
kiya. 12 varsh ki aayu mein we pahunch gaye apne aadarsh Mohd Rafi
saahab ke paas. Rafi saahab ne unhe samjhaaya ki agar ek achchha
gaayak banna hai to pehle shaastriya sangeet ka seekhna behad
zaroori hai. aur har gaayak ka apna ek maulik 'style' hona chaahiye.
1957 mein jab we 'college' mein paDh rahe the tab All India Metro
Murphy competition mein unhone hissa liya jiska vishay tha Hindi
filmon mein parshwa gaayan ka mohra. haalanki Mahendra Kapoor ne
1951 mein V.Balsara ki film Madmast mein gaa chuke the, par
is 'competition' ne unke liye paarshwa gaayan ka dwaar khol diya.
is 'competition' mein 'judge' the Naushad aur C Ramchandra jaise
sangeetkaar. unke gaayan se prabhaavit hokar Naushad saahab ne Sohni
Mahiwal aur C Ramchandra ne Navrang mein unhe baDaa 'break' diya.

SONG:
---------------------------------------
"maangi thi ek dua jo qabool ho gayi, ummeed ki kali khilke phool ho
gayi" SHAKTI
---------------------------------------

Mahendra Kapoor dwaara Naushad saahab ke liye gaaye huye Sohni
Mahiwal film ke gaane ka 'master take' jab Yash Chopra ne suna to
unhe lagaa ki Rafi saahab gaa rahe hain. unhone is baat ka zikr apne
baDe bhaai B R Chopra se kiya. B R Chopra un dino Dhool Ka
Phool 'plan' kar rahe the. bas phir kya tha, unhone Mahendra Kapoor
ko de diya mauka us film mein gaane ka. B R Chopra ke saath Mahendra
Kapoor ki bahut achchhi joDee jamee. B R Chopra, Sahir Ludhianvi, N
Dutta, Ravi aur Mahendra Kapoor ki 'team' banee aur is 'team' ke
mehnat se banee kai laajwaaab 'musical hit' filmen. aage chalkar
Manoj Kumar aur Kalyanji Anandji ke saath bhi Mahendra Kapoor ki
achchhi 'tuning' jamee. Mahendra Kapoor ek se baDhkar ek geet gaate
chale gaye. unke chaahnewaalon ne unka poora poora saath diya aur
woh ek se ek mast naGhme luTaate chale gaye, kuchh is tarah se...

SONG:
-------------------------------
"tum agar saath dene ka vaada karo, main yunhi mast naGhmen luTaata
rahoon" HUMRAZ
-------------------------------

Mahendra Kapoor ke gaayiki ke kai alag alag aayaam hain. ek taraf
agar Khoon ko deshbhakti ke junoon se garm kar denewaali deshbhakti
ke geet hain to doosri taraf narm-o-naazuk prem geet, ek taraf
jeevan darshan aur aashaavaadi vichaaron se ot-prot naGhmen hain to
doosri taraf Ghamgeen TooTe dil ki pukaar bhi unki aawaaz mein
Dhalkar kuchh is qadar baahar aayi hai ki seedhe dil par asar kar
gayi hai. "tumhe bhi koi uljhan rokti hai pesh kadmee se, mujhe bhi
log kehte hain ke yeh jalwe paraaye hain, mere hamraah bhi
ruswaaiyaan hain mere maazee ki, tumhaare saath bhi guzree huyi
raaton ke saaye hain"

SONG:
----------------------------------------------
"chalo ek baar phir se ajnabi ham dono" GUMRAH
----------------------------------------------

beeta huya samay kabhi waapas naheen aata. film sangeet ka swarNa
yug bhi beet chukaa hai aur us daur ke naamcheen fankaaron mein se
bahut se fankaar aaj hamaare beech naheen hain. bhale hi woh sunehra
daur beet chuka ho, bhale hi woh kalaakaar aaj hamaare ru-ba-ru
maujood na hon, lekin unki krityaan, unke naGhmen aaj bhi fizaayon
mein goonj rahi hai. yeh anmol sangeet hamaare dil mein base huye
hain. aur yeh kalaakaar bhi hamaare Khwaabon Khayaalon mein aksar
apni jhalak dikhlaa jaate hain. Mahendra Kapoor ke geet hi naheen,
unka shaant vinamra swabhaav, unki bholi si muskaan, ham jab bhi jee
chaahen apni aankhen band karke dekh sakte hain, mehsoos kar sakte
hain. "phoolon ki tarah dil mein basaaye huye rakhna, yaadon ke
charaaGhon ko jalaaye huye rakhna, lamba hai safar ismein kahin raat
to hogi, Khwaabon hi mein ho chaahe mulaaqaat to hogi, beete huye
lamhon ki kasak saath to hogi"

SONG:
---------------------------------
"beete huye lamhon ki kasak saath to hogi, Khwaabon hi mein ho
chaahe mulaaqaat to hogi" NIKAAH
---------------------------------

beete huye in lamhon ki kasak yakeenan hamaare saath rahegi, hamesha
hamesha. Mahendra Kapoor amar rahenge apni dilkash aawaaz aur
sureele geeton ke zariye. Vividh Bharati Listeners Club parivaar ki
or se swargeeya Mahendra Kapoor ko hamaari bhaavbheeni shraddhanjali
aur smriti suman. chalte chalte unhi ke ek geet ki chand panktiyaan
ham paDhna chaahenge - "yeh raah kahaan se hai, yeh raah kahaan tak
hai, yeh raaz koi raahi samjha hai na jaana hai, sansaar ki har shay
ka itna hi fasaana hai, ek dhund se aana hai EK DHUND MEIN JAANA
HAI, EK DHUND MEIN JAANA HAI, EK DHUND MEIN JAANA HAI".

SONG:
---------------------------
"sansaar ki har shay ka itna hi fasaana hai, ek dhund se aana hai ek
dhund mein jaana hai" DHUND
---------------------------

Script: Sujoy Chatterjee

THE END

FILMI MULAAQAAT - SPONSORED PROG ON VB
--------------------------------------

Pt Narendra Sharma on Lata Mangeshkar
-------------------------------------

NS: Pt Narendra Sharma
AS: Ameen Sayani

AS: Lata Mangeshkar, hamaare hindustaan ki azeem tareen gaayika.
unke baare mein kuchh bataaiye, maine kaha tha ki woh bhi ek tarah
se aap ki shishyaa hain.

NS: woh mere upar bahut meherbaani rakhti hain, jaise aap bhi
meherbaan hain, aur sach poochhiye to shishya shabd jo hai na, jo
bachaa rehta hai wohi shishya hota hai, jo aage ke liye, bhavishya
ke liye, jo avashishT hai, wohi shishT hai, wohi bachaa huya hai,
wohi reh jaayenge, aage baDhaayenge phir parampara ko. ant mein main
shishya maan leta hoon, lekin baDi hastiyaan hain. Lata-ji jab
chhoTi theen, tab ek film thi Jeevan Yatra shaayad, aur Master
Vinayak uske 'director' the. tab maine pehli baar suna tha unka
gaana, aur "chiDiyaa bolee chun chun chun", gaana aisa tha.

AS: kis saal ki baat hai?

NS: yeh mera Khayaal hai '46 ki baat hai. 1946 ya '45, '46 hi mera
Khayaal hai. woh maine gaana suna tha aur tabhi mujhe yeh lagaa ki
yeh chhoTi si bachchi kabhi kamaal karke zaroor dikhaayegi. aur sach
baat hai, bhagwaan ki den hai ki unhone bahut se geet gaaye, aur
Malati Madhav ke dino mein, woh 1950 ki baat hai, tab bhi ek unka
gaana tha "baand preeti phool Dor, man leke chitchor, bhool jaana
na", yeh tha, phir uske baad unhi dino shaayad ek geet, Ratnaghar ek
film tha, uske liye gaaya tha jo unko bhi bahut pasand hai, "aise
hai sukh sapan hamaare, ban ban kar miT jaate jaise baalu ke ghar
nadi kinaare, aise hain sukh sapan hamaare". aur Lata-ji ki aawaaz
mein mere kai geet 'record' huye hain, aur us aawaaz mein gaaye
jaane ki wajah se woh aur bhi zyaade pasand keeye gaye, main aisa
maanta hoon.

AS: Pandit-ji, do gaano ka zikr kiya aap ne, unmein se kam se kam ek
gaana to hamaare paas hai, aur main chaahoonga ki woh gaana jo
kaafi 'rare' gaana hai, woh aap bhi sune, baheno aur bhaaiyon, yeh
woh gaana hai jiske film ka naam hai Malati Madhav.

Song: baand preeti phool Dor (Malati Madhav)

THE END

Tusshar Kapoor congratulates VB on Golden Jubilee and requests to play
dad's song from Kinara "naam gum jaayega"

Download from Files/Audio Files/VB's Golden Jubilee Celebrations.

Happy listening!!!...

Sujoy

INSE MILIYE
-----------

Interview with Classical Singer SHRAVANI CHAUDHURY
--------------------------------------------------

PART 2
------

SC: Shravani Chaudhury
AS: Ashok Sonawane


AS: doston, Inse Miliye kaaryakram mein aajkal ham baat kar rahe hain
ubharti huyi shaastriya gaayika Shravani Chaudhury se. pichhle hafte
jahaan hamne baat chhoDee thi, balki pichhle hafte hamne unse kuchh
upshaastriya rachnaayen suni thi.

-----------------------------------------------------------
chhab dikhlaaja baanke saanwariya (Thumri in Raag Khamaaj)
-----------------------------------------------------------

--------------------------------------------------
dil ko har waqt tasalli ka gumaan hota hai, dard hota hai magar jaane
kahaan hota hai (Ghazal)
--------------------------------------------------

AS: waah waah waah, inki zindagi shuru to waise Kalkatte mein, yaani
bangaal mein huyi, paDhaai Cochin mein, aur filhaal jo hai apni
zindagi woh Bambai mein bita rahi hain, aur unki jo gaayikaaon mein
aadarsh rahi hain unmein Shubha Gurtu bhi hain, aur aajkal woh jinse
baaqaayde taaleem paa rahi hain woh hain suprasiddha shaastriya
gaayika Shobha Joshi. aaj woh hamein kya sunaane jaa rahi hain?

SC: yeh main ek, meri guruji Shobha Joshi-ji ne hamein sekhaaee hain,
bahut ek 'effective' aap keh sakte hain praarthana hai, "jai jag
janani maa"

----------------------------------------------------------------
jai jag janani maa, girinandini bhayabhanjani bhoyi bhawaani maa
----------------------------------------------------------------

AS: waah waah waah, is rachana ko sunkar man bilkul bhaav-vibhor ho
gaya, bhakti se bhar gaya.

SC: maa ko yahi praarthana karti hoon ki 'maa, aap sun rahi hain
mujhe, aap sabka man is tarah se bhaa deejiye, moh deejiye ki main
sabke man tak pahunch sakoon, dil-dimaaG tak pahunch sakoon, aap ki
aashirvaad rahe.

AS: kya baat hai! bahut baDhiyaa aapne gaaya hai, har vidha ka thoDa
thoDa gaake aap gaayiki ka jo poora ang hai, jaisa ki aap ne Ghazal,
Thumri aur bhajan aur daadra bhi gaaya, usse aap ki jo gaayiki hai,
usmein jo 'variety' hai woh dekhne ko mila, balki sunne ko milaa, aur
hamaare sunnewaale bhi zaroor Khush huye honge, mohit huye honge,
aapko sunkar unke man zaroor bhaav-vibhor ho uThe honge, ismein koi
do raay naheen. to ham yeh jaanna chaahenge ki agar filmon
ke 'offers' aapko aate hain to, har kalaakaar ki tamanna hoti hai ki
woh film, jo ki ek bahut hi lokapriya maadhyam hota hai, logon tak
pahunchne ke liye ek bahut achchha zariya hai, to agar is kshetra
mein aapko bulaawaa aaya to aap zaroor jaayengi?

SC: yeh to Ashok saahab, aap ne mere dil ki baat keh dee. aaj
sabse 'effective media' jo hai ham keh sakte hain ki woh film hai aur
kaafi pehle bhi iska ek 'tradition' reh chuka hai, jaise Pankaj-ji,
Jagjit-ji, Pankaj Udhas-ji ne filmon mein na ki 'playback singing'
kee hai, balki woh parde ke aage unhone apna fan pesh kiya hai.

AS: sahi baat hai.

SC: to bas yahi tamanna hai ki kabhi koi is 'art' ko bhi pehchaane
ki 'other than' aaj ki jo sangeet hai, aaj bhi bahut achchhi dhune
ban rahi hai aur kaafi alag alag 'genres of music' jise ham keh sakte
hain, kaafi alag alag 'voices' jo saamne aa rahi hain, kabhi mauka
mile to, koi aaye aur kahe to main to zaroor usmein jaana
chaahoongi. 'but yes, the exposure should be good', jo main chaahti
hoon, meri jo 'portrayal' hai 'as a' Thumri daadra Ghazal 'semi-
classical artiste', woh jo 'impression' hai 'as an artiste' woh
barkaraar rakhen. baaki to 'the most effective media is films today'.

AS: aap ki sharten huyi yeh tamaan (laughs)

SC: (laughs) naheen, aisi baat naheen hai, aap 'voice' ko jis tarah
se istemaal karna chaahen, jo bhi achchhe 'directors' honge, kisi ke
dimaag mein aisi baat hogi, is tarah ki aawaaz ko kis tarah se pesh
kar sake, main to bahut shukriya adaa karoongi agar aise 'offer'
aaye, aur aap ne jaise kahaa 'manshaa hai', to yeh ek bahut baDi
mansha hai (laughs) main kahoongi.

AS: swaabhaavik si baat hai

SC: jee jee, aaj, kyunki bahut saare 'reality shows' aa gaye hain,
achchhe gaanewaale bahut aa rahe hain, kamaal ke gaate hain, kamaal
ki tayyaari hai, to 'competition' bahut hai aur 'very healthy
competition I must say'

AS: sahi baat hai, aur ek kalaakaar ki yeh bhi tamanna hoti hai ki
falaana sangeetkaar agar mujhse gawaaye, baDaa achchha hoga, meri
kalaa nikhar sakti hai, sanvar sakti hai, to aisi aapki tamanna
zaroor hogi, to ham yeh zaroor jaanna chaahte hain ki woh kaun se
sangeetkaar hain jinke saath kaam karne ke liye aap utsuk hain yaa
aap sochti hain ki unke saath kaam karne ka mauka mile to achchha ho.

SC: (laughs) sabse pehle 'I think' main A R Rahman saahab ka naam
loongi, 'I think contemporary music' ke saath unhone jo 'classical'
ka 'blend' unhone kiya hai 'I think' bahut kam aise 'directors' hain
jinhone kiya hai. Vishal Shekhar aajkal bahut achchha kaam kar rahe
hain, Shankar Mahadevan, Shankar Ehsan Loy, yeh jo aajkal ke
sangeetkaar hain, Pritam Chakraborty bahut achchha kaam kar rahe
hain, Vishal Bharadwaj, bahut baDhiya unki jo ek 'music'
ki 'impression', inmein se koi bhi agar mujhe aaj kahe ki 'beTaa aa
jaayo, 'lets record'', (laughs)

AS: to ham duya karte hain ki aap ki yeh jo ichchha hai, jo yeh
tamanna hai, yeh poori ho, aur bahut jald ham aapko, jo filmon ke
gaane hain, unmein aap ko gaate huye sune.

SC: jee shukriya

AS: yeh sab aap ne Vividh Bharati ke 'studio' mein aake kiya, hamse
baaten kee, bahut hi khulkar baaten kee, aap ki jitni bhi manshaayen
hain woh bataaeen hamse, ham Vividh BHharati parivaar ki or se, tah-e-
dil se shubhkaamnaayen dete hain aap ki ujwal bhavishya ke liye, aur
dhanyavaad bahut bahut.

SC: bahut bahut shukriya Ashok saahab, aap ne bahut pyaar se, itni
achchhi tarah se saari baaten, hamaari jo, jitna bhi thoDaa sa hamne
kiya hai, aap ne itni achchhi tarah se pesh kiya, 'thank you so
much', aur bas aap sab ka aashirvaad chaahiye, taaki aage kuchh
achchha kar sakoon.

END OF PART 2

THE END

PART 2
------

VSD: Virendra Singh Datta (V S Datta)
KPS: Kanchan Prakash Sangeet


KPS: Datta saahab, aap ne bahut saare un geeton ke baare mein bataaya
jo ki woh dhun kisi aur sangeetkar ne uThaa lee aur apna gaana banaa
liya, chaahe woh thoDe fark ke saath banaa ho yaa waisa ki waisa
uThaa liya ho. lekin kya aap ko kisi aise geet ki jaankaari hai ki do
sangeetkaaron ne milke usey banaaya.

VSD: ek film thi Anarkali, jo ki bahut lokpriya thi, aur us film ka
gaana "yeh zindagi usi ki hai"

KPS: bahut hi lokpriya gaana

VSD: to bataaya yeh jaata hai, C Ramchandra ne yeh bataaya tha
ki 'maine yeh film bahut jaldi mein banaayi hai, mujhe
bilkul 'interest' naheen tha is film mein aur 'minute'-on mein maine
is film ka sangeet maine diya'. to "yeh zindagi usi ki hai" ke 'last
stanza' mein yeh dikhaana tha ki deewaar mein usko, "ae zindagi ki
shaam aa tujhe gale lagaayun main, tujhi mein Doob jaayun main,
jahaan ko bhool jaayun main, bas ek nazar mere sanam alvidaa
alvidaa", to kahe ki bahut sochne par bhi unhe dhun naheen sunaai
diya, to Roshan-ji dikh gaye. unhone Roshan-ji se kahaa ki 'bhai
kuchh iske baare mein madad karo', to kehte hain ki "ae zindagi ki
shaam aa" woh jo hai Roshan-ji ne unko 'idea' diya aur unko bahut
pasand aaya, aur is geet mein is prakaar Roshan-ji se madad lee thi.

--------------------------------------------
Song: yeh zindagi usi ki hai (Anarkali,1953)
--------------------------------------------

VSD: jab Sahir Ludhianvi saahab idhar aaye to maine poochha ki 'aap
ka to bahut 'criticism' hota hai, log kehte hain ki yeh to naujawaano
ke liye hi likhta hai', to kehte hain ki 'haan, maine bhi yeh
aalochanaaen suni hai, aur main unse kehta hoon ki aap log to aise
keh rahe hain jaise kal se 'colleges' mein 'admissions' hi band ho
jaayegi' (KPS laughs). 'young men' to hamesha hi rahenge, inpar geet
hamesha hi pasand keeye jaayenge. isiliye "palaT tera dhyaan kidhar
hai bhaai" us waqt bhi, main kehta hoon na kaafi 'cheap lyrics' huya
karte the, ek Shukriya film aayi thi, jismen tha "ek shahar ki
launDiya peena pilaana bhulaa gayi".

KPS: woh kaise gaaya tha?

VSD: (sings) "ek shahar ki launDiya peena pilaana bhulaa gayi..."

KPS: achchha!

VSD: isi film mein ek aur geet tha jise baad mein Memsahib film mein
Talat aur Asha ne gaaya, main aap ko woh 'original' sunaata hoon,
(sings) "hamaari gali aana achchhaji, hamein na bhulaana
achchhaji..", to yeh 'original' tha, isko Memsahib mein "hamaari gali
aana" se hi huya hai, lekin 'original' tha Shukriya film ka gaana,
puraana, jismen Ramola 'heroine' theen, par woh waala naheen 'hit' ho
paaya.

---------------------------------------
Song: hamaari gali aana (Memsahib,1956)
---------------------------------------

magar fark dekhiye, un dino yeh gaane jo hain ghaTiyaa paatra gaaya
karte the. ab 'heroine' ke munh se kabhi naheen sunaa jaata tha ki
woh is tarah ke gaaye, woh to gaayegi "aa jaayo taDapte hain armaan
ab raat guzarnewaali hai", aur Cuckoo gaati thi "ek do teen aaja
mausam hai rangeen". to woh gaane alag alag paatra gaaya karte the,
aajkal yeh pataa hi naheen lagta ki yeh 'heroine' gaa rahi hai yaa
khalnaayika gaa rahi hai.

-----------------------------------------------------
Song: ek do teen aaja mausam hai rangeen (Awara,1951)
-----------------------------------------------------

KPS: aap zikr kar rahe hain bahut saare logon ka, to kya aapne
koshish kee hai ki unse mulaaqaat kee jaaye?

VSD: yahaan jo log aaye, yahaan pe Madan Mohan bhi aaye, C Ramchandra
bhi aaye, yahaan pe Vasant Desai bhi aaye, aur yahaan pe Mukesh aaye,
Manna Dey aaye, Mahmood aaye, Talat Mahmood saahab bhi aaye, woh rahe
ghar hamaare saath 8/9 baje se subah 2/2:30 baje tak, itne
shareef 'singer' maine naheen dekha hoga, unhone kai gaane sunaaye
naye puraane, unhone kahaa 'yeh meri aanewaali film ka gaana
hai', "pyaar par bas to naheen hai" bahut baar sunaaya, us
waqt 'record' naheen nikla tha, yeh maine unse 'gramophone record'
par 'autograph' liya, ek gaane pe unhone 'aah, yeh to
mera 'favourite' gaana hai', Madan Mohan ka "hamse aaya na gaya",
Dekh Kabira Roya film ka.

------------------------------------------------
Song: hamse aaya na gaya (Dekh Kabira Roya,1957)
------------------------------------------------

VSD: phir doosra 'record' maine unko diya, maine kahaa 'ispe bhi kar
deejiye, yeh naya maine liya hai', uski taraf dekhne lage 'yeh maine
kab 'record' kiya, mujhe to naheen yaad paDtaa', mujhs ekehne lage
ki 'aap ne sunaa hai yaa aise hi le aaye?' maine kahaa ki 'maine
sunaa hai aur yeh gaana bahut 'hit' hogaa'. to bole 'achchha', woh
muskuraaye aur 'sign' kar dee.

KPS: lekin woh gana kaun sa tha jo aap ne kahaa ki 'hit' hogaa aur
unhe yaad naheen tha?

VSD: woh gaana do saal pehle unhone 'record' kiya tha aur gaana
tha "sab kuchh luTaa ke hosh mein aaye to kya kiya"

KPS: waah!

------------------------------------------------------
Song: sab kuchh luTaa ke hosh mein aaye (Ek Saal,1957)
------------------------------------------------------

VSD: aur Guru Dutt aaye the, C Ramchandra aaye the, aur C Ramchandra
ka peechha karte karte koi Bombay aur Delhi se chale aaye the
ki 'yaheen ham 'contest' le le, shaayad yaheen ham safal ho jaayen',
to woh bole ki 'kyun tum peechhe peechhe chale aaye ho, tumko to
maine 'reject' kar diya hai'. Vasant desai jo the woh bahut sharaafat
se pesh aate the us 'contest' mein. unhone kahaa, jab unhone Lata ka
gaana shuru kiya, 'Lata is Lata, Lata ka koi muqaabla naheen hai',
Vasant Desai-ji ne kahaa. aur Raj Kapoor-ji ne mujhse poochha ki 'aap
kab se meri filmen dekh rahe hain?' maine kahaa 'Aag se, jab Aag film
mein aap aaye the', maine kahaa 'magar usmein Lata-ji ke gaane naheen
the, Lataji se gaane to aap ne Barsat film mein leeye, woh 'bag'
leke'. unhone kahaa 'haan, woh 'bag' leke ghoomti thi', woh 'bag'
laTkaake 'bus-stop' mein jaaya karti theen aur 'bus' mein 'studio'
jaaya karti theen.

KPS: aur Guru Dutt saahab ke baare mein aap kuchh baat kar rahe the.

VSD: Guru Dutt saahab ke saath main khaDaa huya, unse baat karee, aur
Guru Dutt ekdam chup, woh itne maunkeeya hain, pataa naheen kya soch
rahe the, 'credit' pe 'sign' karte the, unse jab 'autograph' maanga
to kehne lage ki 'main itna baDaa naheen hoon ki 'autograph' doon'.
woh jab jaane lage to maine unse kahaa ki 'aapne mujhe 'autograph'
naheen dee lekin mere paas aapke 15 'autographs' hain'. kehne
lage 'kahaan se mili?' maine kahaa 'woh jo aap ne 'credit voucher
sign' kee hai, woh ab se mere liye 'autographs' ho gayi.

KPS: waah! to Pyasa film ka kaun sa gaana aapko bahut achchha lagta
hai?

VSD: Geeta-ji ka "aaj sajan mohe ang lagaalo janam safal ho jaaye".
ismein woh jo Saigal ne gaana gaaya tha, shaayad maine aap ko
dikhaaya tha, "suno suno he krishna kaala", to jab yeh gaana nikla
tha "suno suno he krishna kaala" aur "panchhi kaahe hot udaas", to
dukaanwaale ne mujhe bataaya ki yeh 'film song' naheen tha lekin ek
din mein 1 laakh pratiyaan iski bik gayi theen, Saigal ke itne
zyaada 'fans' the, Saigal ne usi dhun mein gaaya, (sings) "chanDidaas
kahe sakhi he....", yahi dhun usi Pyasa ke gaane mein hai

KPS: jee jee

VSD: "aaj sajan mohe ang lagaalo janam safal ho jaaye", jo Geeta-ji
gaati hain.

---------------------------------------------
Song: aaj sajan mohe ang lagaalo (Pyasa,1957)
---------------------------------------------

END OF PART 2

Download from Files/Audio Files/VB's Golden Jubilee Celebrations.

Happy listening!!!...

Sujoy

---hi, 60_Annu_Kapoor_speaks_Patriotic_Song_Talaakh.mp3

     is 60 not 50 pleas.



  In vividhbharati@..., "soojoi_india" <soojoi_india@...>
wrote:
>
> Annu Kapoor congratulates VB, talks about the importance of radio and
> plays patriotic song from the film Talaakh written by Kavi Pradeep &
> sung by Manna Dey.
>
>
> Download from Files/Audio Files/VB's Golden Jubilee Celebrations.
>
> Happy listening!!!...
>
> Sujoy
>

Hi,

Sorry! There was some problem in uploading the file yesterday, didn't
realise it, have uploaded it now.

Good to know that someone is downloading these clips :-)

Regards
Sujoy


--- In vividhbharati@..., "surhall123" <surhall123@...>
wrote:
>
>
>
>  hi, pl. note they no file  VB50: Anmol Moti - 57 (Annu Kapoor)
>
>
>    thanks
>

hi, pl. note they no file  VB50: Anmol Moti - 57 (Annu Kapoor)


    thanks

SUHAANA SAFAR - KAMCHARCHIT SANGEETKAAR
---------------------------------------

Broadcast date: 27 April 2008
-----------------------------

aaj ka yeh Suhaana Safar kendrit hai kamcharchit sangeetkaaron par.
sabse pehle aapke liye lekar aaye hain Hansraj Behl ke sangeet
nirdeshan mein Lata Mangeshkar, Mukesh aur saathiyon ki aawaazon mein
Prem Dhawan ka likha gaana, film ka naam hai Sawan. film Sawan ki jab
baat aati hai to Mohd Rafi aur Shamshad begum ka gaaya "bheega bheega
pyaar ka samaa" yeh gaana hi sabse pehle zahan mein aata hai. lekin
Lata aur Mukesh ka gaaya yeh gaana bhale hi kamcharchit ho, lekin
hamein poora yakeen hai ki yeh geet bhi aapko utnaa hi pasand
aayegaa. to chaliye sunte hain yeh gaana.

---------------------------------------------
Song: nain dwaar se man mein woh aake (Sawan)
---------------------------------------------

aaiye ab sunaa jaaye C Arjun ke sangeet nirdeshan mein Mohd Rafi aur
Asha Bhosle ki aawaazon mein Gulshan Bawra ka likha gaana, film ka
naam Punarmilan. Rafi saahab aur Asha-ji ne sainkDon yugal geet gaaye
hain bahut saare sangeetkaaron ke liye, jinmein lokapriya hain O P
Nayyar, Shankar Jaikishan, Ravi vagerah. lekin kuchh kamcharchit
sangeetkaaron ke liye bhi in dono ne kuchh laajawaab yugal geet gaaye
hain, jinmein se beshaq ek hai yeh geet jo ham aapko ab sunwaane jaa
rahe hain film Punarmilan se, jo C Arjun ke 'career' ki ek ullekhniya
film rahi hai.

--------------------------------------------------------------
Song: in pyaar ke raahon mein tera hi sahaara hai (Punarmilan)
--------------------------------------------------------------

ab ham aapko sunwaa rahe hain Suvarna Sundari film ka geet Lata
Mangeshkar ki aawaaz mein, Bharat Vyas ke bol hain, aur Adi Narayan
Rao ka sangeet. doston, Adi Narayan Rao dakshiN ke jaanmaane
sangeetkaar rahe hain. kareeb 35 saal ke 'career' mein unhone keval
30 filmon mein sangeet diya hai. aur Hindi ke kshetra mein to unka
sangeet keval Suvarna Sundari aur Bhakt Tukaram mein hi sunne ko
milaa. lekin baawjood iske, unhone Hindi film sangeet mein bhi apni
chhaap chhoDee. Suvarna Sundari unhi ke 'banner' tale san 1957 mein
banee thi, jo behad kaamyaab rahi. is film ke sangeet ko Adi Narayan
Rao ke 'career' ki sabse lokapriya kriti maani jaati hai. to aaiye
sunte hain isi film se Lata Mangeshkar ka gaaya yeh gaana.

--------------------------------------------------------------
Song: chhup chhup chhaliya re mujhe na bulaa (Suvarna Sundari)
--------------------------------------------------------------

kamcharchit sangeetkaaron ki kshreNi mein ek naam Suhrid Kar ka bhi
raha hai. aur inka zikr chalte hi hamein yaad aati hai san 1961 mein
bani film Kaanch Ki Gudiya ki aur is film mein Mukesh aur Asha Bhosle
ke gaaye us geet ki jo ab ham aapko sunwaane jaa rahe hain. to
leejiye Shailendra ka likha huya yeh gaana suniye.

-----------------------------------------------------
Song: saath ho tum aur raat jawaan (Kaanch Ki Gudiya)
-----------------------------------------------------

kitna meeTha, meeTha sureela, kitna dilkash naGma tha na yeh! doston,
Suhrid Kar ki ek aur film thi Ek Phool Chaar Kaante, jiske gaane bhi
maqbool huye the. Suhrid Kar ne Guru Dutt ki kai filmon mein bataur
sangeet sahaayak bhi kaam kiya aur sangeet srijan mein apna
mahatwapoorNa yogdaan diya. itna hi naheen 1962 mein bani Kishore
Kumar ki bahucharchit film Half Ticket ki kahaani bhi Suhrid Kar ne
hi likhi thi. bahumukhi pratibha ke dhani Suhrid Kar gaate bhi the.
unhone 1961 ki film Jhumroo mein Kishore Kumar aur Asha Bhosle ke
saath milkar ek geet gaaya tha "mahanga sauda hai luT mat jaana". yeh
to thi Suhrid Kar ke baare mein kuchh baaten. aaiye sunte hain film
Kaanch Ki Gudiya ka hi ek aur geet sunwaana chaahenge Asha Bhosle ki
aawaaz mein, bol ek baar phir Shailendra ka.

--------------------------------------------------------
Song: tumhara pyaar meri zindegaani ka sahaara hai (KKG)
--------------------------------------------------------

doston, is geet se pehle hamne aapko bataaya tha ki Suhrid Kar ne
Kishore Kumar aur Asha Bhosle ke saath film Jhumroo mein ek geet
gaaya tha. film Jhumroo ke sangeetkaar the Kishore Kumar, aur yeh
film Kishore Kumar dwaara abhineet aur swarbaddha ullekhniya filmon
mein gini jaati hai. to jab Jhumroo ki baat chal hi paDee hai to
chaliye yahaan par kamcharchit sangeetkaar Kishore Kumar ke sangeet
nirdeshan mein Kishore Kumar ka hi gaaya aur unhi par filmaaya
Jhumroo ka yeh geet sun lete hain, geet likha hai Majrooh Sultanpuri
ne.

-----------------------------------------
Song: matwaale tum matwaale ham (Jhumroo)
-----------------------------------------

ab ham aapko sunwaane jaa rahe hain Suman Kalyanpur ki aawaaz mein
Night Bird film ka geet. Aziz Ghazi ke bol hain aur Iqbal ka sangeet.
san 1961 mein Navshakti Films ke 'banner' tale bani film Night Bird
ke mukhya kalaakaar the Azad aur Shanta Kumari. A R Zamindar dwaara
nirdeshit is film mein Iqbal ne sangeet diya tha. doston, yeh Iqbal
Iqbal Qureshi naheen hain. Iqbal Qureshi 1958 ki film Panchayat se
film jagat mein aaye the, jab ki Iqbal 50 ke dashak ke shuru shuru
mein apna 'career' shuru kiya tha film sangeet ke kshetra mein. to
chaliye sunte hain Iqbal ke sangeet mein Night Bird film ka yeh
Khoobsoorat chulbula sa gaana Suman Kalyanpur ki aawaaz mein.

--------------------------------------------------------
Song: baalon ka gajraa aur nainon ka kajraa (Night Bird)
--------------------------------------------------------

doston, ham baat kar rahe the sangeetkar Iqbal aur Iqbal Qureshi ki.
aur hamne aapko yeh bhi bataaya tha ki Iqbal Qureshi film jagat mein
aaye the 1958 ki film Panchayat se. Iqbal ki sangeet rachna to aapne
sun lee, ab pesh-e-Khidmat hai Iqbal Qureshi ke sangeet mein usi film
Panchayat ka geet Lata Mangeshkar ki aawaaz mein. rachna hai Shaqeel
Romani ki. lekin geet sunne se pehle suniye Iqbal Qureshi ki aawaaz
jo saalon pehle 'record' kiya tha Vividh Bharati ke 'studio' mein:

Iqbal Qureshi speaks: bachpan se hi mujhe 'music' ka shauk tha. Jab
main 12/13 saal ka tha jab Aurangabad 'radio station' par gaane gaaya
karta tha. Phir Hyderabad mein jaakar mujhe mere kaam ke
liye 'encouragement' mila. Wahaan ki jo khoobiyaan hai,
Hyderabadi 'culture' mujh mein aayi. Hyderabad ke woh din mera
sunhera daur tha, waheen maine shohrat paayee jo zindegi ke liye,
meri sangeet zindegi ke liye aage chalkar bahut faaydemand saabit
huya. Mera pehla gaana tha "ta thaiya karte aana", film Panchayat
mein, jo kaafi 'hit' ho gaya tha jisse mujhe aur bhi
kai 'assignments' mile.

--------------------------------------------------------
Song: main gun gaayun tera tu hi shyaam mera (Panchayat)
--------------------------------------------------------

Vividh Bharati par is samay aapne 'tune' kiya hai Suhana Safar aur
aaj is kaaryakram mein aapko ham sunwaa rahe hain chand kamcharchit
sangeetkaaron ki rachnaayen.

-------------------------------------------------------
Song: raat bhi hai kuchh bheegi bheegi (Mujhe Jeene Do)
-------------------------------------------------------

abhi aap sun rahe the Jaidev ke sangeet nirdeshan mein Lata
Mangeshkar ka gaaya Sahir Ludhianvi ka likha geet. film thi Mujhe
Jeene Do. Jaidev ke hi sangeet mein Manna Dey aur Vani Jayram ki
aawaazon mein Naqsh Lyallpuri ka likha gaana aapko sunwaane jaa rahe
hain. film ka naam hai Parichay. doston, Jaidev ke sangeet ke baare
mein kuchh kehne ki zaroorat naheen hai, yeh sangeet hai keval
mehsoos karnewaali, sureele dhuno ke saagar mein Gote lagaane ki, bas
aankhen moond len aur kho jaayen in madhur dhuno mein.

----------------------------------------------
Song: mitwaa more man mitwaa aaja re (Parinay)
----------------------------------------------

yun to Rajkamal ko filmon mein sangeet dene ka kuchh Khaas mauka
naheen mil paaya, par unke sangeet nirdeshan mein bani film Saawan Ko
Aane Do ke gaane behad kaamyaab huye aur aaj bhi sangeet rasikon ko
aziz hain. aisa bhi kaha jaa sakta hai ki is film ki kaamyaabi ke
peechhe iske geeton ka ek bahut baDaa haath tha. is film ka "chaand
jaise mukhDe pe bindiya sitaara" gaayak Yesudas ka gaaya ek behad
mashoor geet hai, jiske bol jitne pyaare hain utna hi sureela hai
iska sangeet. saarangi ka Khoobsoorat istemaal sunaayi eta hai is
geet mein. apni mehbooba ki Khoobsoorti ka isse sundar ullekh aur
bhalaa kya ho saktaa hai! to chaliye ham aanand uThaate hain isi
Khoobsoorat naGme ka.

------------------------------------------------
Song: chaand jaise mukhDe pe (Saawan Ko Aane Do)
------------------------------------------------

jab baat chalti hai aise sangeetkaaron ki jo kaam ke'quantity' ke
bajaaye 'quality' ke liye mashoor the to ek aur naam yaad aata hai
Jani Babu Qawwal ka. Jani Babu Qawwal ne jab filmi sangeetkaar ke
haisiyat se kaam kiya, to sangeet ke har pehlu ko dhyaan mein rakhaa.
shaayad yehi wajah hai ki film Noor Mahal ke sabhi gaane logon ko
Khoob pasand aaye. Khaas taur par is film ke liye Saba Afghani ki
likhi aur Suman Kalyanpur Ki gaayi yeh rachna to bemisaal hai.

---------------------------------------
Song: mere mehboob na jaaa (Noor Mahal)
---------------------------------------

Jani Babu Qawwal mooltah qawwali ke jaane maane gaayak rahe hain.
filmon mein bhi unhone apni aawaaz ke jalwe bikhere hain. film Shor
ki woh mashoor qawwali "baaki kuchh bachaa to mehengaai maar gayi"
aapko yaad hai na jise Jani Babu Qawwal ne Lata Mangeshkar aur Mukesh
ke saath milkar gaaya tha? Jani Babu ka asli naam tha Syed Jan
Muhammad. unka janm 1935 mein Nagpur mein huya tha. 10 saal ki umra
mein unhone apne 'school' mein ek qawwali ke 'competition' mein bhaag
liya tha. 1955 ke aaspaas unki 'superhit' qawwali "damaadam mast
kalandar" ne unko shohrat ki bulnadi par biThaaya. uske baad unke ek
ke baad ek qawwaaliyon ke 'records' aate gaye. filmon mein Noor
Mahal, Awlia-e-Islam aur Roti Kapda Aur Makaan mein unhone apni amiT
chhap chhoDee. Janu Babu Qawwal ke sangeet nirdeshan mein film
Noormahal ka ek aur geet suniye Mohd Rafi ki aawaaz mein, geetkaar
hain Saba Afghani.

----------------------------------------------
Song: naino mein kajra maashallah (Noor Mahal)
----------------------------------------------

aur ab chalte chalte Jaidev ki ek aur dilkash sangeet rachnaa, Asha
Bholse ki aawaaz mein. Sahir ke bol hain, aur film ka naam Mujhe
Jeene Do.

------------------------------------------
Song: nadi naare na jaayo (Mujhe Jeene Do)
------------------------------------------

THE END

JUBILEE JHANKAAR - GOLDEN JUBILEE CELEBRATION OF VIVIDH BHARATI
---------------------------------------------------------------

INTERVIEW OF NOTED GRAMOPHONE RECORDS COLLECTOR V S DATTA
*********************************************************

PART 1

doston, Jubilee Jhankaar ke is ank mein ham aapki mulaaqaat karwa
rahe hain ek aise shaKhs se jo Vividh Bharati ke praacheentam shrota
hain, film sangeet ko sunne aur usko sangrahit karne ka shauk un par
ek deewaangee ki tarah sawaar hai. peshe se angrezee ke patrakaar
hain aur Khud bhi gungunaane ka shauk rakhte hain. to aaiye chalte
hain Civil Lines Allahabad ke us ghar mein jahaan par kuchh aise
durlabh 'film records' maujood hain jo shaayad Vividh Bharati ke
Khazaane mein bhi naheen hai! 'records' ke alaawa is shaKhs ki
smritiyon mein aisi jaankaariyaan maujood hain jisse shrotaa
chamatkrit ho jaayenge. in saahab ka naam hai V S Datta, aur inse
baatchit kee hai Kanchan Prakash Sangeet ne. to aaiye sunte hain.


VSD: Virendra Singh Datta (V S Datta)
KPS: Kanchan Prakash Sangeet

KPS: Shri Virendra Singh Datta, yaani V S Datta, Datta saahab, Vividh
Bharati parivaar ki taraf se aapko namaskaar!

VSD: meri taraf se bhi Vividh Bharati ko bahut bahut namaskaar! main
Vividh Bharati tab se sun raha hoon jab se yeh shuru huya tha, balki
main 'radio' sangeet tab se sun raha hoon jab se Delhi
se 'programmes' shuru huye the. ki jab sab log daawaton par chale
jaayen, main ghar pe dilli ke farmaaishi kaaryakram sunne ke liye
ghar par baiTha rehta tha (KPS laughs), isliye mujhe bahut saari
puraani yaaden hain 'radio' ke saath.

KPS: lekin Datta saahab, mujhe yeh bataaiye ki 'radio' jo aap sunte
the '38 mein, 40s ke dashak mein, to us 'radio' se jo 'broadcast'
honewaale 'programmes' the, woh aur baad mein 3 October 1957 se jo
Vividh Bharati ki shuruwaat huyi, to Vividh Bharati ka rang Dhang hi
alag tha, to kuchh fark aap ne mehsoos kiya?

VSD: dekhiye, woh jo hamein apnaapan lagaa tha ki Delhi Radio
ke 'programme' ghar ghar pahunch jaate the kyunki aur koi 'station'
naheen tha, aur dilli ke 'programme', jaise farmaaishi 'programme'
sunne ke liye log beqaraari se door door se 'radio' ke paas pahunch
jaate the. aur mujhe ab tak woh 'meter' yaad hai, jab woh kaha karte
the - "ham dilli se bol rahe hain 338 ashaariya 6 aur 31 ashaariya
15 'meter'-on par", phir yeh ho gaya "338 dashamlav 6 aur 31
dashamlav 15", pehle bolte the "hamaari pehli mazlis shuru ho rahi
hai", phir bolne lage "hamaari pehli sabhaa aarambh ho rahi hai".
pehle Aap Ki Farmaaish 'programme' aata tha, phir usi ko Aap Hi Ke
Geet kar diya, jisko Radio Ceylon ne uThaaya, isko 'lift' kiya, aur
aaj bhi is 'title' ko istemaal kar rahe hain, lekin yeh tha dilli ka.

KPS: Aap Hi Ke Geet

VSD: jee, Aap Hi Ke Geet, yeh 'title' dilli ka tha, Mittal saahab jo
the, bahut si chiTThiyaan aaya karti theen, woh zamaana yeh tha ki
samjheeye Noorjehan jo Mallika-e-Tarannum hain, woh aakaashvaaNi
dilli ke Draame mein hissa lene aati theen aur ek 'drama' tha jiska
naam tha Rambha, aur yeh Noorjehan jo theen, woh 'side- heroine' theen

KPS: achchha!

VSD: uske baad to itni oonchee ho gayeen, us waqt ek bachchi si
thi. 'radio' yeh samjheeye ki ek saathi sa hai. uske baad jab bahut
se 'stations' aa gaye, to 'reception' Kharaab ho gaya. dilli ka phir
sunaai naheen deta, phir log kehne lage 'local station' lo wahaan
par. February 1949 mein AkaashvaaNi Allahabad aaya to itni raahat
mili ki raat ko pankhe ki khaD-khaD se 'disturb' naheen hote the (KPS
laughs loudly), naheen to DC pankhe bahut 'disturb' karte the.

KPS: achchha, woh kaaryakramon mein woh aawaazen chhup jaati theen.

VSD: jee jee. to jab Radio ceylon aaya to 2-2 3-3 ghanTon tak
lagaataar bajaane lagaa, to lokpriyataa udhar chali gayi,
sabki 'attention' udhar chali gayi. Vividh Bharati jab aaya, pehle
bahut ajeeb lagaa, Dar lagaa ki Vividh Bharati ne shuru to kiya hai
lekin pataa naheen kitne din chale kyunki un dino bahut saKhtee thi
ki film sangeet 'radio' par na bajaaya jaaye jab ki woh 'melody era'
thi. mera jo patrakaarita tha usmein maine yahi liya tha ki 'radio'
par film sangeet ko band na kiya jaaye kyunki filmi sangeet ko yeh
naheen haTaa sakenge, itna hi mushkil hai ki jitna 'tooth-paste'
ki 'tube' mein 'tooth-paste' waapas Daalna mushkil hai (KPS laughs
loudly). aisi 'simily' maine dee thi. to Akashvani se tab filmi geet
naheen bajte the kyunki filmi 'producers' se abhi 'contract sign'
naheen huya tha.

KPS: jahaan tak ki jaankaari hai ki us waqt ke jo 'minister' the,
unko 'classical music' se bahut zyaada lagaav tha...

VSD: jee jee

KPS: aur woh naheen chaahte the ki aisa 'pollution' aa jaaye. isiliye
Vividh Bharati ke jaisa koi 'channel' ho jispar filmi geet bhi bajnaa
shuru ho jaaye, aise Vividh Bharati ki shuruwaat huyi.

VSD: haan, aur Vividh Bharati ki shuruwaat huyi, aur bahut zor shor
se shuruwaat huyi. jo Hindi film sangeet ke premee the, unko lagaa ki
ekdam se bahaar aa gayi, veeraane mein bahaar aa gayi, Vividh Bharati
ne yeh kaam kiya tha. 'radio' ka ek bahut baDaa 'role' hai, aur akele
Vividh Bharati, mere Khayaal se to akele Vividh BHarati woh 'role'
adaa kar raha hai kyunki koi aisa 'station' naheen jisko poora
Hindustaan sunta ho.

KPS: Datta saahab, jab aap '38 mein sunte the 'radio', tab aapki kya
umra thi?

VSD: main bachcha tha bilkul, aur main aapko bataayun, mujhe itna
shauk tha, woh 'records 78 rpm' ke paDe huye hain, main 'school' bhi
naheen jaata tha, tab bhi jo hai aise paDe rehte the, aur meri
numaaish lag jaati thi, log aate the, bolte the 'isse poochhiye yeh
gaana nikaal laayo to wohi gaana le aayegaa'. main jaayun aur woh
gaana nikaal ke le aayun. kisi ko yakeen na aaye ki yeh to abhi
tak 'school' naheen jaata aur na hi yeh kuchh paDh sakta hai, phir
mere se poochha ek baar ki 'tum kaise pehchaan lete ho?' maine
kahaa 'kisi 'record' ke 'scratch' laga huya hai, kisi ka
kaala 'portion' chhoTa hai, kisi ka baDaa hai, kisi ke 'label'
ka 'colour dark' hai, kisi ke 'label' ka rang halkaa hai, koi laal
hai, koi aisa hai, to yeh isiliye hota tha kyunki jab koi 'record'
bajta tha to main uski taraf dekhke sunta rehta tha. '3 minute' tak
gaana baj raha hai to '3 minute' tak main uski taraf dekhta rehta
tha, is vajah se jo hai, ab tak mere 'mind' mein hai, ek baar main ek
mitra ke ghar gaya, woh mujhe puraane gaane dikhaane lagaa, maine
kahaa 'yeh to Anmol Ghadi ka lag raha hai', bole 'aapko kaise
pataa?', maine kahaa ki 'ek to yeh Columbia ka hai, aur doosra iska
yeh...'. ek baar doordarshan par ek 'play' aaya, usmein Anmol Ghadi
ka gaana dikhaaya jo ek 'character' bajaa raha hai, aur woh HMV
ka 'record' dikha diya. to maine likhaa, zabardast, maine aalochana
likhi ki woh gaana to Columbia pe nikla tha, aapne HMV par kaise
dikhaa dee!

--------------------------------------------
Song: jawaan hai mohabbat (Anmol Ghadi,1946)
--------------------------------------------

VSD: Noorjehan ko baad mein Master Ghulam Haider ne 'train' kiya,
phir Khandan mein "mere liye jahaan mein na chain hai na qaraar hai",
iske saath juDee ek bahut achchhi ghaTanaa aapko bataata hoon.

KPS: haan

VSD: Pran aaye the yahaan Allahabad mein, Pran aaye huye the, unke
saath Manoj Kumar bhi baiThe the, aur log bhi the, Purab Aur Paschim
ki 'shooting' ke liye yahaan aaye the. to main unke kamre mein
pahuncha, maine unse poochha 'Pran saahab, kya san 1942 ke baad kisi
ne aap ko Chaand kehke pukaara hai?' to meri taraf dekhne
lage, 'kyaa?'. maine kahaa 'woh Noorjehan ne aapke liye gaana gaaya
tha "tu kaun si badli mein mere chaand hai aaja"'. (KPS laughs). to
hanse bahut aur mujhe apne paas biThaa liya, kahaa ki 'tumhe bahut
baaten yaad hai', maine kahaa ki 'haan, woh gaana bahut achchha tha'.
oorjehan-ji ki aawaaz bilkul 'set' huyi, woh Khandan se huyi, "tu
kaun si badli mein mere chaand hai aaja, taare hain mere zaKhm-e-
jigar inmein samaa jaa", us gaane se jo hai Noorjehan Noorjehan
banee. to oorjehan-ji ka yeh gaana bahut 'hit' huya tha, Lahore mein
yeh 'picture' bani thi, (sings) "tu kaun si badli mein mere chaand
hai aaja, taare hain mere zaKhm-e-jigar inmein samaa jaa".

------------------------------------------------------
Song: tu kaun si badli mein mere chaand (Khandan,1942)
------------------------------------------------------

VSD: ek baar aisa huya ki Nainital mein Pandit Govind Vallabh Pant,
us samay ke kendriya griha mantri the, woh wahaan aaye aur wahaan xxx
College jo hai uska 'function' tha, usko inhone 'inaugurate' karna
tha. aur main wahaan pe gaya to logon ne kahaa ki yeh Allahabad
University se hain, aur inse kaho ki ek gaana sunaaye. maine kahaa ki
ekdam se main kaise gaa sakta hoon, main naheen gaayunga. main jaake
baiTh gaya. phir do teen logon ne, mujhe thoDi kheench bhi uThi,
maine kahaa ki 'aap log apne 'artistes' se gawaaiye', phir ek ne
aakar kahaa ki 'Allahabad ki 'oye oye' ho gayi, jab yeh baat uThi to
maine kahaa ki 'Theek hai main gaayunga'. main uThkar gaya,
pehla 'item' to yeh tha ki Govind Vallabh Pant aaye, unko maala
pehnaayi, 'welcome' kiya, phir kahaa ki 'Pandit-ji ka 'speech' sunne
se pehle ham ek gaana sun len'. un dino gaana naya naya chalaa tha,
maine sunaaya poore 'audience' ko "maine chaand aur sitaaron ki
tamanna kee thi, mujhko raaton ki syaahi ke siwaa kuchh na milaa", jo
Mohd Rafi ka Chandrakanta se hai. turant uske baad Pant-ji ko bolna
tha. to Pant-ji ne kahaa 'naujawaan, tumse yeh ummeed naheen thi'.
maine socha kya ho gaya, shaayad filmi gaana gaa diya isliye naaraaz
ho gaye, to unhone kahaa ki 'dekho, tumhe jo hai aashaavaadi hona
chaahiye aur tum yeh kaho ki chaand sitaare toDke laayoge, aur chaand
sitaaron ki tamanna kee thi naheen hona chaahiye'. to Khair baat
waheen khatam huyi, phir kya huya ki 'speech' Khatam hone ke baad
Pant-ji chale gaye, aur wahaan ke jo kaaryakram the unhone koi naheen
sunaa, unko bas Allahabad University ka yaad reh gaya, kyunki woh
Khud Allahabad University se paDhe the.

------------------------------------------------------
Song: maine chaand aur sitaaron ki (Chandrakanta,1956)
------------------------------------------------------

VSD: ek main aapko aur dilchasp baat bataata hoon. Naushad saahab ke
baare mein kaha jaata hai ki woh 'classical music' diya karte the, jo
sahi baat hai. magar Naushad saahab ne aapke Vividh Bharati mein bhi
jo kaaryakram kiya, Sharda ke baad woh Baiju Bawra pe aa gaye the,
unhone beech ka 'portion' bilkul gol kar diya tha. ab main aap se
kehna chaahoonga ki us beech ke 'portion' mein unhone aise gaane
gaaye jo bahut saste the. ek mere paas hai, jo aap chaahen to lekar
shrotaaon ko sunaayen to bahut achchha lagegaa. ek Charlie hota
tha 'comedian', unhone Charlie 'comedian' se gaana gawaaya aur gaana
aisa tha, (sings) "arey palaT tera dhyaan kidhar hai bhaai", aur yeh
film shaayad Sanjog.

-----------------------------------------------------------
Song: arey palaT tera dhyaan kidhar hai bhaai (Sanjog,1943)
-----------------------------------------------------------

KPS: Datta saahab, yeh jo gaana hamne sunaa Naushad saahab ka, yeh
san 1946 ka gana, 45-46 ka gaana, aur abhi aajkal filmon mein 'ae
maamu', jaise jaise woh...

VSD: haan, nakal hai. dekhiye yeh to Naushad saahab ne aapko Vividh
Bharati mein hi bataaya tha ki woh jo gaana hai "jaadu nagari se aaya
hai koi jaadugar", uski 'tune' mere geet se nakal kee huyi hai. woh
jo ek film thi Namaste, uska ek 'tune' main aap ko bataayun,
(sings) "dil na lage mora man na lage, 'neck-tie'waale baabu ko bhi
laate koi re.... jaadu nagari se aaya hai koi jaadugar". to yeh
namaste film aayi thi 1941 vagerah mein, aur CID aayi baad mein,
kuchh 12 saal baad mein, woh Nayyar saahab jo hain, jaisa ki Naushad
saahab ne kahaa ki 'mera gaana 'lift' kiya gaya hai'.

---------------------------------------
Song: leke pehla pehla pyaar (CID,1956)
---------------------------------------

VSD: aur bataayun, Talat Mahmood saahab ka yeh geet bahut mashoor
huya tha "aaye bhi akela jaaye bhi akela", aap ne suna hogaa

KPS: haan haan

VSD: iska jo hai Punjabi film Lachhi se 'lift' kiya gaya tha. aur
Lachhi mein jo hai isko Mohd Rafi saahab ne gaaya tha aur bahut
behatareen gaana tha, main aapko uski ek 'line' sunaata hoon

KPS: jee jee

VSD: (sings) "jagwaala melaa yaaron thoDi der da, hans de ya raat
langi pataa nahi saver da...". yeh gaana peechhe reh gaya aur woh
gaana aage nikal gaya. isi tarah se aur bhi gaane the jo Punjabi mein
the. ek gaana tha jise Noorjehan ne gaaya tha, (sings) "huk meri
kismat so gayi jaago huzoor re", isey phir film Chhoti Bhabhi mein
Husnlal Bhagatram ne 'lift' kiya, (sings) "Khushi ka zamaana gaya
rone se ab kaam hai, pyar iska naam tha judaai iska naam hai..." to
aise log dhun ek doosre ki 'lift' karte aaye hain.

-------------------------------------------------
Song: Khushi ka zamaana gaya (Chhoti Bhabhi,1950)
-------------------------------------------------

KPS: aaj isko lekar kaafi charchaayen hoti hai, kaanoon tak mein
jaane ki bhi baaten hoti rehti hai, lekin us waqt to kitna anaayaas
hota tha aur is baat ko lekar koi kisi se kuchh kehta tak naheen tha!

VSD: naheen woh bataate hain ki Talat Mahmood saahab ka jo gaana tha
na, (sings) "yeh hawaa yeh raat yeh chaandni"...

----------------------------------------------------
Song: yeh hawaa yeh raat yeh chaandni (Sangdil,1952)
----------------------------------------------------

VSD: ... iske aadhaar par Madan Mohan saahab ne Aakhri Dao film mein
gaana banaa diya, (sings) "tujhe kya sunaayun main dilrubaa tere
saamne mera haal hai", ismein kya huya Sajjad ki 'music' thi Sangdil
mein jismein Talat saahab ne gaana gaaya tha, woh bigaD gaye Madan
Mohan pe, 'tumne kaise mere gaane se 'lift' kiya?' madan Mohan ne
kahaa ki 'huzoor maine socha ki usi dhun ko thoDaa sa badalkar dekhen
to kaisa lagegaa'. par uske baad Madan Mohan ne kahaa ki 'maine aisi
GustaaKhi phir kabhi naheen karee'.

--------------------------------------------------------
Song: tujhe kya sunaayun main dilrubaa (Aakhri Dao,1958)
--------------------------------------------------------

To be continued...

Annu Kapoor congratulates VB, talks about the importance of radio and
plays patriotic song from the film Talaakh written by Kavi Pradeep &
sung by Manna Dey.


Download from Files/Audio Files/VB's Golden Jubilee Celebrations.

Happy listening!!!...

Sujoy

Sonu Niigaam's Tribute to Mohd Rafi

Watch this event held in London, on 21st Sep from 8 pm IST on Sony.

Regards
Sujoy Chatterjee

SWARNA SMRITI - INTERVIEW OF HANSRAJ BEHL
-----------------------------------------

Recorded in 1981 (Re-broadcast under SWARNA SMRITI series)
----------------------------------------------------------

HB: Hansraj Behl
AJ: Anuradha Joshi

-----------------------------------------------
Song: mohabbat zindaa rehti hai (Chengeez Khan)
-----------------------------------------------

AJ: Behl saahab, namaskaar!

HB: mera bhi sabko namashkaar!

AJ: Behl saahab, ham aap ke vishay mein, aur aapke sangeet mein
ruchi, aur aap ke sangeetkaar hone ke vishay mein kuchh sawaalaat
poochhenge aur kuchh jaankaari praapt karna chaahenge, to aapki aagya
ho to shuru karen?

HB: zaroor!

AJ: sabse pehle ham aapse jaanna chaahenge ki aap Bambai ke hi
niwaasi hain yaa aap hamaare desh ke kisi anya kshetra se sambandh
rakhte hain?

HB: dekhiye Anuradha-ji, pehle main Lahore mein tha, main Lahore se
yahaan aaya, Bombay, to yeh 1944 ki baat hai.

AJ: to sangeet mein aapki ruchi bachpan se thi aur aap ne kis guru se
gyaan praapt kiya tha is vishay mein bataayenge? shaastriya sangeet
aur...

HB: Lahore mein hi, bachpan se shauk tha gaane ka, aur hamaare wahaan
ek Pandit-ji ka 'school' tha, Shankar Vidyalay, Pandit Chunnilal,
wahaan se maine seekha, 'classical' sangeet seekha, aur 'instruments'
vagerah bhi seekha, aur kuchh ek saal raha unke paas. uske baad maine
apna kuchh 'school', maine bhi khola Lahore mein. magar meri jo ruchi
thi zyaada 'modern' sangeet mein, to main woh chhoDke seedha Bombay
chalaa aaya.

------------------------------------------
Song: koi mujhko na bulaaye (Kisi Ki Yaad)
------------------------------------------

HB: Bombay aakar do teen maheene sab film companiyon mein 'try' kiya,
phir Ranjit Film Company mein Seth Chandulal Shah-ji the, unhone mere
saare gaane sune aur unhone mujhe 'chance' diya tha, film Pujari
mein, to us 'picture' se maine yahaan kaam shuru kiya tha.

AJ: achchha. is tarah aap film sangeet ke jagat mein pehla qadam
rakhaa, film sangeetkaar ke roop mein

HB: haan jee, haan

AJ: to uske baad aap kai filmon mein sangeet dete rahe aur aap ne kai
kalaakaaron ko, naye naye kalaakaaron ko 'chance' diya hogaa, gawaaya
hoga unse?

HB: bhagwaan ki meherbaani rahi ki chalta hi gaya sab. hamne bahut
saari 'picture'-en banaayi Ranjit mein, phir chhoD diya
aur 'freelancer' ke roop mein kaam karna shuru kiya. aur
phir 'partition' ke baad bahut se log Lahore se yahaan aa gaye, phir
bani Raat Ki Rani, jo us zamaane mein bahut mashoor huyi thi.

-------------------------------------------------------
Song: jin raahon mein neend uD jaati hai (Raat Ki Rani)
-------------------------------------------------------

HB: meri Punjabi ki bahut 'picture'-en thi, meri pehli 'picture'
Punjabi mein bahut chalee thi, uske baad bhi bahut 'picture'-en
banaayi. Hindi mein bhi maine bahut si 'picture'-en banaayi hai aur
aaj tak banaata aa raha hoon.

AJ: matlab aap ne filmon ka nirmaN bhi kiya. aap sangeetkaar aur
filmkaar dono rahe.

HB: jee haan, mera chhoTa bhaai Gulshan Behl, jo 'producer' hai N C
Films ke naam se, ham dono 'partner' hain, aur unhone film shuru kee,
ham dono bhaaiyon ne milke, pehli 'picture' hamne shuru kee Lal Pari
se hamne shuru kee.

-------------------------------------------------
Song: keh rahi hai dhaDkane pukaar kar (Lal Pari)
-------------------------------------------------

HB: uske baad hamne bahut si 'picture'-en banaayi, 15/16 'picture'-en
banaayi, Sikander-e-Azam iske andar aa jaata hai, Milan bhi aata hai,
Saawan bhi aata hai, aur aaj bhi ham nayi 'picture' banaa rahe hain,
usmein bhi mera sangeet hai.

AJ: aur aapne apne sangeetkaar hone ke naate aap ne kai kalaakaaron
ko mauka diya hoga, unke baare mein aap kuchh bataayenge, un
kalaakaaron ke baare mein?

HB: dekhie, yeh to, jab ham kaam karte hain to bahut 'artistes' aaye
hamaare paas, hamne bhi koshish yahi kee hai ki jo achchhe kalaakaar
hain unko aage aane hi chaahiye, jaise jaise 'chance' milta raha ham
koshish karte rahe. unko gawaaye bhi hai.

AJ: Madhubala Zhaveri ko aapne sabse pehle gawaaya tha.

HB: jee haan, Apni Izzat, Jaggu, Moti Mahal jaisi filmon mein maine
unko gawaaya tha.

-----------------------------------------
Song: dil mere tera deewaana (Apni Izzat)
-----------------------------------------

HB: jis waqt main is 'industry' mein aaya, us waqt 'hero'
aur 'heroine' Khud gaate bhi the. meri Khushkismatee hai ki maine
Madhubala ko bhi gawaaya hai, Meena Kumari ko bhi gawaaya hai, aur
Khursheed se gawaaya hai, Suraiyya se gawaaya hai, to aise Nalini
Jaywant ko gawaaya hai, sabse maine gawaaya hai.

AJ: aur abhinetaaon mein bhi?

HB: abhinetaaon mein Karan Diwan the, Surendra-ji the, aur bhi kai
the jo us zamaane mein gaate the. magar 'playback' mein laDkiyon mein
zyaada gaanewaali theen. phir to Rafi saahab ke aane ke baad to yeh
shuru ho gaya.

------------------------------------------
Song: bheega bheega pyaar ka samaa (Sawan)
------------------------------------------

AJ: to aap kisi kalaakaar ke baare mein bataayenge jinko sabse pehle
aap ne paarshwa-gaayan ke liye...

HB: sabse pehle 'picture' banaai thi, Kuldeep Pictures ki, jiska naam
tha Chunariya, us 'picture' mein Geeta Roy-ji ke saath sabse pehle
maine gawaaya tha Asha-ji ko. bahut achchha gaayi theen. uske baad
naam unka chamkaa.

AJ: Asha Bhosle-ji ko sabse pehle aap ne gawaaya

HB: jee haan, sabse pehle unko maine gawaaya.

-------------------------------------------------------------
Song: saawan aaya saawan aaya re jaage more bhaag (Chunariya)
-------------------------------------------------------------

AJ: aapka naye kalaakaaron ko protsaahan dene mein kaafo yogdaan raha.

HB: meri hamesha koshish rehti hai ki naye achchhe jo hain unko aage
aana chaahiye, unko kaam dena chaahiye, aage woh kahaan tak baDhte
hain, woh to bhagwaan ki den hai.

AJ: aur aajkal jo naye filmon mein aap sangeet de rahe hain, to
unmein bhi aap naye kalaakaaron ko 'chance' de rahe hain?

HB: aaj bhi kuchh 'picture'-en nayi maine shuru kee hai jinmein naye
kalaakaaron ko maine leeye hain. ek to Savita Suman karke laDki hai,
usse maine gaane gawaaye hain, aur abhi meri nayi 'picture' ek hai,
usmein Mr Vinod Sehgal karke ek laDka hai, mere saath 3/4 saal se
kaam kar raha hai, mujhe 'assist' kar raha hai, maine abhi usko
gawaaya hai, aur bahut achchha gaaya hai usne, gaane sab ne pasand
kiya hai, aur mera Khayaal hai aise laDke aur aage aayenge.

AJ: Behl saahab, ek aap se baat poochhnee thi, kalaakaaron ke vishay
mein baat ho rahi thi, aap yeh bataaiye ki kudrat ki tarah se
jo 'born artiste' hote hain, aur kuchh hote hain jo mehnat karke aage
baDhte hain, to iske baare mein aapki kya raay hai?

HB: dekhiye, kudrat ki taraf se jo hai usko to koi inkaar hi naheen
kar sakta, woh to bhagwaan ne jo banaa diya woh to aTal hai, kudrat
to kudrati hoti hai, lekin aadmi ki jo mehnat hoti hai woh aadmi par
hai, mehnat karke woh aage aane ki koshish karta hai, kuchh log aise
hote hain ki mehnat karne ke baad, bhagwaan ne itna achchha galaa
diya hota hai ki, thoDi mehnat karne ke baad woh kamaal kar dete
hain, aur naam bhi bahut hota hai. yahaan kuchh aisi baat hai ki Asha
aur Lata-ji aap logon ke saamne hain, in dono ne kitni mehnat kee
hai, kitni koshish kee hai, kitna 'time' lagaaya hai, aur kya woh
gaati hain. aur yahaan pe mehnat bhi hai aur kudrat bhi hai.

----------------------------------------
Song: haaye chanda gaye pardes (Chakori)
----------------------------------------

HB: ek Suraiyya-ji theen kisi zamaane mein, woh bhi Khoob gaati
theen, unhone kisi se seekhaa naheen tha, unka koi ustaad hi naheen
hai, to bahut filmon mein gaati raheen, bahut naam raha unka

-------------------------------------
Song: yeh kiski yaad aa gayi (Rajput)
-------------------------------------

HB: magar yeh zaroor hai ki in dono baheno ke aane ke baad, saraswati
vaas karti hain inke gale mein, jo aaj bhi log usko sunke mugdh ho
jaate hain aur mera Khayaal hai ki jab tak yeh hain tab tak mugdh
hote rahenge. aur yeh duniya jab tak hai tab tak bhi rahega kyunki ab
to itne 'instruments' aa gaye hain hamaare paas, 'record' hai, yeh
hai woh hai, to hazaaron saal inko yaad kar sakte hain, pichhle
zamaane ke Tansen ka naam sunte hain, magar naam hi sunte hain, unka
gaaya huya kuchh naheen sun sakte. in logon ki aawaaz, Rafi saahab
hain, Mukesh saahab huye, in logon ko jab tak yeh duniya hai tab tak
ham sunte rahenge. aap naam yaad karenge aur saath mein log sunenge
ki yeh log gaate the, yeh aisa inka gaana tha.

AJ: ab ek Khaas sawaal ham jaanna chaahte the aap se, woh yeh ki aap
to bahut zamaane se filmon mein sangeet de rahe hain, shuru aap ne
kiya tha tab se, aur aaj ka jo film sangeet hai, to us zamaane aur
aaj ke zamaane ke film sangeet ke baare mein aap ke kya raay hain?

HB: dekhiye, us zamaane mein jab maine shuru kiya tha, woh zamaana
kuchh aur tha, 'theatre' Khatam huya tha aur anyi nayi filmen shuru
huyi theen, to 'theatre' se hi filmon mein 'music' aaya tha. Ghazal,
qawwaali us zamaane mein 'stage' mein log gaaya karte the, aur usi
roop mein film mein aayi, aisa karte karte, bahut se kalaakaar, bahut
baDe baDe 'music directors' huye hain, New Theatres hain, Khemchand
Prakash-ji hain, jaise jaise yeh log aaye unhone 'change'
kiya, 'expressions' ko aur geeton ko laane ki koshish kee. to jab woh
log apne geeton ko laaye to thoDaa 'change' huya, aise aise 'change'
aata raha. aur aaj ka jo zamaana hai, aaj ke hisaab se bhi 'music'
buraa naheen hai, bahut achchha hai, kyunki hamaara kaam hai logon ko
Khush karne ka, manoranjan karne ka, aur jis cheez se unka manoranjan
ho wohi kaam karna chaahiye. aur jo 'music directors' aaj ke hisaab
se karte hain woh bhi bahut achchhe hain, aur jo pehle ke zamaane ke
log hain, jo unhone kiya hai woh bhi bahut achchha tha. aur aaj log
jis cheez ko pasand karte hain, 'naturally' hamein wohi dena paDegaa.
aur main naheen samajhta ki pehle ke 'music' mein aur aaj ke 'music'
mein, farak zaroor hai, tab kuchh aur 'type' tha, ab kuchh aur 'type'
hai.

--------------------------------------------------------
Song: din ho yaa raat ham rahen tere saath (Miss Bombay)
--------------------------------------------------------

AJ: aur aajkal vaadyon mein bhi...

HB: bahut farak aa gaya hai, bahut saare 'instruments' aa gaye hain

AJ: uska asar bhi to paDta hi hai.

HB: pehle kul 10 log huya karte the, aajkal 10 saaz bajaane ke liye
10 log hain, kitna fark paD gaya hai. pehle ek 'instrument' ko
bajaane ke liye kitni mehnat karni paDti thi, ek 'piece' ke liye
saazinde ko kitni mehnat karni paDti thi, aaj woh baat naheen hai,
aaj haath lagaate hain aur 6-6 alag alag dhune bajti hain. to usse
bhi 'colour' mein bahut fark paD gaya hai. to wohi hai ke jaise jaise
zamaana 'change' hota hai, har cheez 'change' hoti hai, pehle yeh
baaten kahaan thi? aaj hai to iske hisaab se Theek hi hai.

--------------------------------------------------------
Song: kamal ke phool jaisa badan tera chikna (Do Ankhen)
--------------------------------------------------------

AJ: Behl saahab, to aap ne jo bataaya ki pehle ke film sangeet mein
aur aaj ke film sangeet mein, saaraansh mein yeh kehna paDegaa ki
waqt ki maang ke saath sangeetkaar logon ki pasand ke hisaab se
sangeet dete hain, to usmein aapki kya raay hai ki kis taraf zyaada
jhukaav hai, yaa kaun se sangeet ko zyaada mahatwa diya jaa raha hai
aajkal film sangeet mein?

HB: dekhiye Anuradha-ji, aajkal teen Dhang se sangeet ko filmon mein
laaya jaa raha hai, ek hai Punjabi 'based', aur ek hai 'modernized'...

AJ: paaschaatya

HB: jee haan, 'westernized' jisko ham kehte hain, aur ek
hamaara 'classical' hai jo rehta hi hai, jo har gaane ka 'base' banaa
huya hai. to yeh teeno 'music mix' hoke hamaare upar chhaaya huya
hai, aur isi 'mix' ke upar 'base' karke hamaare saare filmi gaane
bante hain.

AJ: aur usko log pasand bhi karte hain.

HB: pasand karte hain kyunki jo Punjabi Dhang ka 'music' hota hai,
woh 'folk mix' hoke aa gaaya hai

AJ: aam janta ko pasand aa rahe hain...

HB: pasand aa rahe hain, aur Punjabi ko aur 'western' ko 'mix' karke
gaane ban rahe hain, to yeh jo logon ko achchha lagta hai, jo cheezen
chaalu ho jaati hai, woh chal paDte hain aur logon ko pasand aati
hai.

AJ: aapne pehle bataaya hai ki aap ne Punjabi filmon mein sangeet
diya hai, filmen bhi banaayi hai, to aapka jo Punjabi 'music' tha
usmein bhi aap ne aisa 'modernization' kiya tha?

HB: bilkul maine kiya, lekin 'picture'-on ko dekhkar maine kiya,
kai 'picture'-en aisi hain jo 'modern picture' hain, unmein
maine 'classical' aur 'folk' ko 'modern' ke saath 'mix' karke kiya,
aur jo dhaarmik yaa 'period picture'-en hain, unmein
maine 'classical' ko liya, aur usmein thoDaa 'old type' ka Dhang
istemaal karke kiya taaki logon ko us 'time' ka sangeet jaisa lage.
phir 'modern type' ki film ho to usmein 'dance' chaahiye, 'cabaret'
chaahiye, to usmein waisa hi 'music' dena paDegaa. dehaati film hogi
to usmein 'folk' ka 'colour' dena paDegaa. to aise 'picture'
ka 'mood' dekha jaayega ki kis tarah ke 'facts' hain, kis tarah ke
gaane honge, uske hisaab se usi 'type' ka 'music' usmein rakha jaata
hai magar 'base' sabka wohi teen hai, 'folk, classical and modern'.

AJ: Behl saahab, aapki sangeet mein ruchi hai to kya aap koi vaadya
bhi bajaate hain? yaa aap sirf 'compose' hi karte hain?

HB: jab main shuru shuru mein is 'line' mein aaya tha, tab
main 'violin' bhi bajaata tha, tablaa bhi bajaata tha,
aur 'classical' gaata bhi tha. to aahista aahista jab is 'line' mein
aaya to zaroorat naheen paDee, sirf baaja, 'harmonium', usi ke upar
dhun banaata hoon, aur usi pe main kaam karta raha hoon.

AJ: Behl saahab, aapne hamaare saath itni baatchit kee, bahut saari
jaankaari dee, hamaare shrotaaon ko pasand aaya hogaa, uske liye main
aapka shukriyaa adaa karti hoon.

HB: main bhi aap sabka shukriya adaa karta hoon.

AJ: namaskaar!

HB: namashkaar!

-------------------------------------------------
Song: woh bhaarat desh hai mera (Sikander-e-Azam)
-------------------------------------------------

THE END

PITAARE MEIN PITAARA - INTERVIEW OF ALTAF RAJA
----------------------------------------------

AR: Altaf Raja
MS: Mamta Singh


MS: Altaf-ji, namaskaar, aapka Vividh Bharati ke 'studios' mein bahut
bahut swaagat hai.

AR: jee namaskaar, aur aapke zariye main sabhi sunnewaalon ko Altaf
Raja ka namaskaar, aadaab, satsriakaal, vaNakkam!

MS: Altaf Raja ki aawaaz se sabhi log waaqif honge, Khaaskar
woh 'album' Tum To Thehre Pardesi, yeh jo 'non-film album release'
huya tha, tab se lekar aaj tak, kisi se bhi poochha jaaye to bhoolne
jaisi baat to aayegi hi naheen, balki woh gungunaake bataayega
ki "tum to Thehre pardesi", isiliye main shuruwaat hi isi gaane se
kar rahi hoon, Altaf-ji zara gungunaake yeh logon ko sunaa deejiye.

AR: (sings) "tum to Thehre pardesi saath kya nibhaaoge..."

-------------------------------------------------------------
Song: tum to Thehre pardesi (Tum To Thehre Pardesi - Nonfilm)
-------------------------------------------------------------

MS: yeh jo "subah pehli gaaDi se ghar ko lauT jaayoge", yeh jo 'line'
hai, to gaaDi se mujhe yaad aayi ki aap Nagpur ke rehnewaale hain, to
Nagpur ki gaaDi kaise pakDee ki aap Mumbai aa gaye?

AR: darasal meri paidaaeesh Nagpur ki hai, mere pitaaji Ratnagiri se
taalluKh rakhte hain, jo Konkan 'coast' mein...

MS: jahaan ke aam bahut mashoor hai (laughs)

AR: jahaan ke alfonso bahut mashoor hai, aur hamaari 'mother'
Farrukhabad se 'belong' karti hain, aur ittefaaq se 'mummy daddy'
dono hi 'singers' hain, hamaari 'mummy' ka naam hai Rabi Rooplata
aur 'father' ka naam hai Ibrahim Iqbal. woh dono apne zamaane ke, us
zamaane mein unke HMV se 'records' aate the, qawwaali 'singers',
bahut mashoor the. to ittefaaqan 'mummy' ka jaana Nagpur huya, aur
hamaari paidaaeesh Nagpur ki ho gayi.

MS: achchha achchha, gaane ke silsile mein gayeen theen?

AR: 'mummy', haan, 'programme' ke silsile mein gayi theen to waheen
rukna paDaa tha, ham bahut kareeb aa gaye the.

MS: to gaane ka jo hunar hai woh aapko paidaaishi mila hai.

AR: haan, 'mummy' paapa se viraasat mein mila hai, lekin bahut saare
ustaadon ka ismein haath hai ki unse main seekh paaya hoon, ki jo
kuchh bhi aaj hoon main. bahut se logon ka ismein haath hai,
aur 'mummy' ke saath to main 'chorus' bhi karta tha, 'daddy' ke saath
bhi 'chorus' karta tha, saath hi saath 'mummy' ne mujhe 'harmonium'
ki shiksha dilwaaee, aur 'rhythm' ki, Dholak ki shiksha dilwaaee, aur
aawaaz ka jo taaleem hai 'classical' sangeet ka, Pandit Govind Prasad
Jaipurwale-ji the, mujhe dilwaaye. to is tareeke se, yaani aap keh
sakte hain ki 'mummy' paapa se mujhe viraasat mein mila hai.

MS: bachpan se aap gaayan karte the to aap riyaaz karte honge, ghar
mein 'music' ka maahaul tha. to un dino jo gaane aap gaaya karte the
woh gaane aapko yaad hain?

AR: us waqt to Lata-ji hain, Kishore-ji hain, Rafi saahab hain, Asha-
ji hain, inke gaane suna karta tha. to ek geet jahaan se mujhe aisa
laga ki, yaani sangeet mere dil ko chhuya, woh ek geet tha Raat Aur
Din film ka, Lata-ji aur Manna Dey saahab ka gaaya huya, aur woh geet
sunke, "dil ki girah khol do chup na baiTho koi geet gaayo", yeh geet
sunke dil mein ek ajeeb kashish jaagi sangeet ki

MS: aisa lagaa ki 'singing' ke 'field' mein jaana chaahiye

AR: 'singing' ke 'field' mein, usse pehle main 'composer', yaani main
pehle c'omposer' hoon baad mein 'singer' hoon, 'composing' ka bahut
pehle se shauk tha mujhe.

MS: jee, agar yaad ho to "dil ki girah khol do" agar ek 'line'
gungunaa sake to...

AR: (sings) "dil ki girah khol do chup na baiTho koi geet gaayo..."

-----------------------------------------
Song: dil ki girah khol do (Raat Aur Din)
-----------------------------------------

MS: Altaf-ji, yeh bataaiye ki aap kitne baDe the jab aapne pehla
gaana 'compose' kiya tha?

AR: jee main kareeb 11-12 saal ka tha, tab 'mummy' gaaya karti theen,
to ek Ghazal Qasool Jaffri saahab ki c'ompose' kee thi.

MS: jee jee, yaad hai?

AR: koshish karta hoon, Ghazal ka maslaa tha ki "chaandni ke Doobte
hi ghar mein kya reh jaayega, tum chale jaayoge darwaaza khula reh
jaayega"

MS: kya baat hai

AR: to woh maine 'compose' kee thi, (sings) "chaandni ke Doobte hi
ghar mein kya reh jaayega..."

MS: waaha, kya baat hai! aap keval 10-12 saal ke the aur aapne itni
umdaa Ghazal 'compose' kar liya tha. bahut achchha lag raha hai. un
dino ko yaad karte huye koi gaana sun liya jaaye, phir aage baat
karte hain? phir aapke 'albums' par aate hain.

AR: jee zaroor

MS: kaun sa gaana sunwaayen aapki pasand ka?

AR: "agar tum mil jaayo zamaana chhoD denge ham". is geet ke baare
mein yeh kahoonga ki 2003 mein mera ek 'album' aaya tha Ek Dard Sabhi
Ko Hota Hai, usmein ek geet tha "agar tum mil jaayo zamaana chhoD
denge ham", woh baad mein Zeher film mein 2005 mein aaya,
alag 'singers' ne gaaya, lekin meri 'composition, singing'
aur 'arrangement' jo aap sunenge to bilkul muKhtaleeb paayenge,
bilkul geet ka rang tha ismein.

--------------------------------------------------------------
Song: agar tum mil jaayo (Ek Dard Sabhi Ko Hota Hai - Nonfilm)
--------------------------------------------------------------

MS: Altaf-ji, yeh gaana hamne sun liya, ab yeh bataaiye i yeh gaana
aapke 'album' mein tha, to yeh film mein kaise gaya? aap se kisne
baat kee?

AR: jee kisi ne baat naheen kee, woh alag 'company' se tha, aur hamne
bhi itna Gaur naheen kiya, aur do saal ke baad, kyunki main
ek 'creative' aadmi hoon, aur koshish yeh rehti hai ki ek cheez banaa
dee, bante waqt pora dhyaan usi par rehta hai, aur jab woh ban gayi,
ek khuli kitaab hoti hai 'artiste', ek cheez jab baazaar mein aa
jaati hai to woh 'public' ki amaanat ban jaati hai, us waqt main
doosre kaam mein lag jaata hoon, maine kabhi yeh dhyaan naheen diya,
lekin Khushi huyi ki jo 'composition' maine banaaee thi woh 'hit'
huyi.

MS: jee, ab 'albums' ki baat chali hai to aapki anya 'albums' ki baat
karte hain, uske baad filmon ki taraf aate hain. to bataaiye ki Tum
To Thehre Pardesi pehla 'album' tha aapka aur Khoob Khoob mashoor
huya tha. to yeh bataaiye ki kaisi thi iski rachna prakriya, kaise
aapke zahan mein aaya, kaise itna kaamyaab huya tha?

AR: jee, iska ek ajab waaqya hai, Tum To Thehre Pardesi ka, haalaanki
Tum To Thehre Pardesi ke pehle, Tum To Thehre Pardesi 1996 mein aaya
tha 'album', aur 1997 mein yeh maqbool huya, lekin iske pehle 1993
mein mera ek 'devotional album' aaya tha, Sajdaa Rab Ko Karlo,
Venus 'company' se aaya tha, to "tum to Thehre pardesi" main 1990 se
gaata tha mehfilon mein, mehfilon mein uska 'response' bahut achchha
aata tha, uska jaise aapne 'audio' suna hai, jaise shaayri, nazm, aur
rubaayen, woh sab main paDh paDh ke gaata tha. to 1996 tak main itna
thak gaya tha isko gaa gaake, ki Venus se ek naya 'album' banaane ki
peshkash aayi. to apne 'album' ka 'highlight' hi apne 'song' ka
banaaya "pangaa le liya", jo 'album' ke banaane ki dekh rekh kar rahe
the Mohd Shafi Niyazi saahab, jo ab is duniya mein naheen hain,
unhone kahaa ki 'tum mehfil mein kaun se kaun se gaate ho?' to maine
unko sab bataaya, yeh woh "dono hi mohabbat ke jazbaat mein jalte",
sabhi kuchh jo bhi main gaata tha, "tum to Thehre pardesi", "meri
yaad aayi judaai ke baad", to unhone kahaa ki "panga le liya"
ko 'highlight' karte hain. to ek aur gaane ki zaroorat thi, ab "tum
to Thehre pardesi" main gaa gaakar thak gaya tha, 'mummy' ne kahaa
ki 'tumhara woh 'item' jo jantaa ne itni pasand kee hai, to tum usko
bhi Daal do apne 'album' ke andar', to maine kaha ki 'log to itna sun
chuke hain', to unhone kaha ki 'jinhone naheen suna hai woh to
sunenge', to is hisaab se "tum to Thehre pardesi" ko Daal diya gaya,
aur baad mein aapne jo dekhaa, phir wohi geet aaj tak main gaa raha
hoon.

MS: to aapne kahaa ki "tum to Thehre pardesi" aap gaa gaakar thak
gaye hain lekin log sun sunke bilkul naheen thake, aaj bhi...

AR: bas yeh logon ka pyaar hai.

MS: to bataaiye ki isi 'album' se aur kaun sa geet sunwaayen?

AR: is 'album' se mera ek 'favourite' Ghazal hai, is Ghazal ka waaqya
yeh hai ki unhi dino Venus se Hariharan-ji ka bhi ek 'album' ban raha
tha, to yeh Ghazal bhi Qasool Jaffri saahab, woh bhi do saal
pehle 'expire' ho gaye, woh hamaare beech naheen hain, elkin unka bhi
hamaari kaamyaabi mein bahut baDaa haath hai, to unhone ek Ghazal
likhi thi aur mujhse kaha ki 'kaisi hai yeh Ghazal?' "meri yaad aayi
judaai ke baad, woh roye bahut bewafaai ke baad". to maine bola
ki 'bahut achchhi Ghazal hai aur aap isey mujhe de deejiye, main
isey 'compose' karoonga aur mujhe bahut chhooi hai yeh Ghazal'. to
unhone kahaa ki 'Theek hai tum le lo', kyunki Hariharan-ji ka to 16
GHazlon ka hi 'album' ban raha tha. to unke liye Ghazlon ki koi kamee
naheen thi. lekin mujhe yeh Ghazal  aam fehm lagi ki jo main kehna
chaahta hoon woh logon tak pahunchegi. aur is tarah se yeh Ghazal
logon tak pahunchee.

MS: kaun si Ghazal sunwa rahe hain?

AR: wohi, "meri yaad aayi judaai ke baad"

----------------------------------------------------
Song: meri yaad aayi judaai ke baad (TTTP - Nonfilm)
----------------------------------------------------

MS: ab yeh bataaiye ki aap likhte bhi hain na? aapne bahut
saare 'albums' ke liye likha hai...

AR: jee koshish karta hoon, jab koi achchhi dhun ban jaati hai, ya
koi, to uspe main likhne ki koshish karta hoon, varna meri koshish
yahi rehti hai ki achche achchhe shaayaron ki jo 'poetries' hain, us
par main dhun banaake logon ke saamne laayun.

MS: Altaf-ji, jo jhamaajham sangeet ka daur hai, jo tez 'music' ka
daur hai, to is daur mein aap ko apne 'albums' ko kaamyaab karne ke
liye, 'hit' karne ke liye kis tarah ki tayyaari karni paDti hai, kin
baaton par dhyaan dena paDta hai?

AR: jee, dekhiye, koi bhi daur ho, agar aap ke paas 'poetry' achchhi
hai, aur 'melody' hai, aur usko achchhe tareeke se gaaya jaaye, aur
achchhi tareeke se 'marketing' kee jaaye, achchhe tareeke
se 'arrange' kiya jaaye, to woh koi bhi daur mein chalta hai. jaise
Umraojaan ke gaane dekhiye, aaj bhi kitne sune jaate hain, ktne 'hip-
hop' ke daur aaye, aaye aur gaye, lekin woh aaj bhi sune jaate hain.
uska yahi matlab hai ki achchhi 'poetry' ho, achhoote alfaaz ho,
yaani har film mein geeton ke alfaaz milte julte paayenge,
mere 'albums' mein koshish yahi rehti hai ki kuchh nayee cheezen ho,
kuchh nayaapan lage, aur usi pe main mehnat karta hoon. bolon mein
taazgee, aur jo bhi geet hai, Ghazal hai, woh ek 'subject'
pe 'matter' ho, aajkal 'albums' ko uske prachaar ke liye, 'publicity'
ke liye 'videos' banaaye jaate hain, taaki logon ko maaloom chale
ki 'album release' huya hai. lekin 'audio' hi aisa cheez jo barson
baras yaad kiya jaayega. Tum To Thehre Pardesi ka 'video' naheen tha,
abhi hamne 'shoot' kiya hai. uska jo 'audio' hai, alfaaz
hai, 'melody' hai, log aaj tak yaad karte hain, bas yahi meri koshish
hai.

MS: bilkul sahi baat hai. abhi mere zahan mein ek 'album' ka naam aa
raha hai Taaza Hawa Lete Hain. to yeh bhi bahut maqbool huya tha

AR: jee

MS: aur naam bhi baDaa alag kism ka hai

AR: jee

MS: to iske baare mein bataaiye

AR: mujhe 'typecast', yeh jo 'media' waale hain, woh har 'interview'
mein mujhse poochha karte the ki 'aap Ghamzadaa gaane hi kyun gaaya
karte hain? aap masti bhare geet kyun naheen gaate'. to maine kahaa
dekhiye "pangaa le liya" maine gaaya tha Tum To Thehre Pardesi mein,
masti bhara hi tha yeh, haalaanki sandesh bhi tha ki kisi se, lekin
usmein ek 'gimmick' hai, ek 'logic' hai, aur "ishq aur pyaar ka mazaa
leejiye", yeh gaana bhi mastibharaa hi tha. to hamne socha ki
ek 'album' hi aisa banaaya jaaye, to "ham woh deewaane hain jo taaza
hawaa lete hain, khiDkiyaan kholke mausam ka mazaa lete hain"

MS: kya baat hai!

AR: to isko hamne 'highlight' kiya aur iske andar jitne bhi geet
hain, aap ko, zaraa 'fast rhythm' ke gaane hain.

MS: aap gungunaake sunaayen to hamein zyaada achchha lagegaa

AR: (sings) "ham woh deewaane hain jo taaza hawaa lete hain,
khiDkiyaan kholke mausam ka mazaa lete hain"

------------------------------------------------------------
Song: ham woh deewaane hain (Taaza Hawa Lete Hain - Nonfilm)
------------------------------------------------------------

MS: Altaf-ji, aapke taazaa 'album' ke baare mein baat karna
chaahenge, Harjaai. iske baare mein bataaiye, kaise iska naam rakha,
kaise shirshak rakha aur kis tarah se 'compose' kiya.

AR: jee. Harjaai jo hai bahut hi mere dil ke kareeb hai, naya 'album'
hai, aur iske andar sabhi bilkul alag alag kism ke geet hain. 'music'
bhi mera hai aur ismein maine 4 geet likhe hain. Afghani 'flavour' ke
maine 'rhythm use' keeye hain.

MS: jaise?

AR: (sings) "dil leke sanam kahaan tum jaayoge, jaayoge pachhtaaoge
lauT ke aayoge...vai vai qurbaana dilbar diljaana". iska 'rhythm' jo
hai, poora Afghani 'folk' ka 'rhythm' hai. aur ismein hamne ek 'south
Indian type' ka geet banaaya hai, jo main chaahoonga ki ismein se aap
bajaayen

MS: jee

AR: "yun na sharmaa", (sings) "yun na sharmaa zaraa nazren to
milaa..."

----------------------------------------
Song: yun na sharmaa (Harjaai - Nonfilm)
----------------------------------------

MS: yeh bataaiye Altaf-ji ki itne saare aapke 'albums' hain ki sabke
naam ginwaane jaayen to kaafi waqt lag jaayega. aap bataaiye ki aapke
dil ke kareeb kaun kaun se albums hain?

AR: dekhiye jaise maa baap ko apne sabhi bachche pyaare hote hain (MS
laughs), to maine har 'album' pe, aisa naheen ki maine ????? se kaam
liya hai, jo bhi 'album' maine banaaye hai bahut hi mehnat se, maine
kabhi 'quality' se samjhauta naheen kiya, 'quantity' pe kabhi dhyaan
naheen diya, aur sabhi 'album' mere dil ke kareeb hain, lekin ek baat
hai ki jis 'album' se mujhe shohrat mili, logon ne pyaar diya, logon
ne ek 'cassette' ko chaar chaar baar 'repeat' kar kar ke sunaa, woh
hai Tum To Thehre Pardesi, main iska naam naheen loonga to naainsaafi
hogi. to woh to dil ke kareeb hai hi, baaki sab 'albums' bhi mere dil
ke kareeb hain.

MS: Dil Ke Tukde Hazaar Huye

AR: bahut Khoob, iske andar bhi bahut alag alag kism ke geet
the. "pehle to kabhi kabhi Gham tha", yeh sunaate hain shrotaaon ko.

MS: jee.

---------------------------------------------------------------
Song: pehle to kabhi kabhi (Dil Ke Tukde Hazaar Huye - Nonfilm)
---------------------------------------------------------------

MS: Altaf-ji, ab aap hamein yeh bataaiye ki aapne apni aawaaz ka
jaadoo sabse pehle aapne kis par chalaaya, aur filmon mein aap ne
kaise pravesh kiya? kisse aapki mulaaqaat huyi jisse ki aap filmon
mein aaye, jaise ki pehli film Ram Gopal Varma saahab ki...

AR: haan, Ram Gopal Varma saahab 2002 mein, darasal yeh 'credit' main
Tum To Thehre Pardesi ko hi doonga, yeh itna maqbool huya ki
ek 'producer' the Rajeev Babbar saahab, woh gaye huye the Vaishno
Devi ke darshan ke liye, to mujhe to naheen pataa tha, unka 'phone'
aaya ek din ki 'main ek film banaa raha hoon aur aapka gaana rakhna
chaahta hoon, aap mujhse 'meeting' keejiye'. milne gaye to unhone
bataaya ki darshan karne gaye the to neeche se upar tak unko yahi
gaana sunne ko milaa "tum to Thehre pardesi". to bole ki aap mere
film ke andar, Mithun Chakraborty-ji hain aur Jackie Shroff-ji hain,
aur bhi achchhe achchhe kalaakaar hain. to maine poochha ki mujhe
kinke liye 'playback' karna hai. to bole ki 'naheen naheen, aapko
kisi ke liye 'playback' naheen karna hai, aapko Khud 'appearance'
karna hai, main bataana chaahta hoon film ke andar Altaf Raja'.
kyunki us waqt sirf 'audio' mein aur 'photos' se log mujhe jaante
the. Anand Milind us film ke sangeetkaar the aur geet tha
(sings) "ishq aur pyaar ka mazaa leejiye, thoDaa intezaar ka mazaa
leejiye..."

-----------------------------------------------
Song: ishq aur pyaar ka mazaa leejiye (Shapath)
-----------------------------------------------

MS: achchha Altaf-ji, Ram Gopal Varma ki film Company ka gaana "tumse
kitna pyaar hai" Khoob mashoor huya tha, gali gali mohalle mohalle
mein Khoob Khoob bajaa tha. to iske baare mein bataaiye ki kaise Ram
Gopal Varma se aapki mulaaqaat huyi, kaise is film se juDe? Sandeep
Chowta ka sangeet tha.

AR: Sandeep Chowta ka sangeet tha. mere paas Sandeep-ji ka 'phone'
aaya ki 'Altaf-ji, maine aapke liye ek geet ki 'composition' kee hai,
aapko gaana hai, aur Ram Gopal Varma-ji ki film hai'. to mujhe bhi
Khushi huyi, to maine poochha ki 'kis 'type' ka geet hai kyunki
aajkal to 'remix' aur us 'type' ke...', to bole ki 'naheen naheen,
aapko dhyaan mein rakhte huye yeh geet banaaya hai, aap sun leejiye
pehle ek baar aur agar aapko kuchh lage to 'change' kar sakta hoon
main iske andar'. main jaake sunaa 'crude track', mujhe bahut pasand
aaya, to ek DeDh ghanTe mein 'tune' yaad karke, uske andar aalaap jo
bhi the, woh sab karte huye 'dubbing' kar dee, aur baad mein aap
sabhi jaante hain ki geet kitna 'hit' huya.

MS: jee jee. to yeh geet sunte hain

AR: jee jee

-------------------------------------
Song: tumse kitna pyaar hai (Company)
-------------------------------------

MS: aur kaun kaun si filmen hain aapki?

AR: waise to bahut si filmen hain, Shapath, Company hai, Market film
mein maine sangeet bhi diya hai, Market hai, Dukaan hai, ek Bhojpuri
film aayi thi Maai Ka Bitua, usmein bhi maine sangeet diya tha, aur
Mother 98 aayi thi Saawan Kumar-ji ki, usmein mera geet hai, Mard
film aayi thi Mithun-ji ki, usmein mera geet hai, Trishakti, Arshad
Warsi-ji 'solo hero' hain usmein, Madhur Bhandarkar-ji ki film thi,
woh pehli film thi Bhandarkar-ji ki, Rajesh Roshan-ji ka 'music' tha,
usmein bhi mera geet hai, Pardesi Babu hai, pataa naheen, aaj tak
maine kabhi 'count' naheen kiya, kyunki filmon se zyaada dhyaan
mera 'albums' pe raha kyunki logon ne mujhe iske zariye hi pyaar
diyaa, aur aaj main aap ke saamne hoon, 'interview' de raha hoon.

MS: jee (laughs), lekin filmon mein bhi jo gaane aap ne gaaye woh
kaafi mashoor huye

AR: shukriya

MS: aur logon ko yeh bataane ki zaroorat naheen huyi ki yeh Altaf
Raja gaa rahe hain

AR: jee jee

MS: to ek aur filmi gaana sun liya jaaye. kaun si?

AR: yeh film Market ka gaana hai, meri 'composition' hai, Sanu-ji aur
Alka-ji, "ham pyaar jo tera paayenge"

-----------------------------------------
Song: ham pyaar jo tera paayenge (Market)
-----------------------------------------

MS: Altaf-ji, film Market ki hamne baat kee aur ismein aap ne sangeet
diya hai. to yeh kaise sambhav huya, matlab is film se aap kis tarah
se juDe?

AR: jee, Venus 'produce' kar rahi thi yeh film, aur Jai Prakash-ji
ekal 'subject' leke aaye the, unko ek naya 'music director' chaahiye
tha aur thoDaa haTke chaahiye tha ki jo 'uncommon' ho. to Champak
Jain saahab ne kahaa ki aap Altaf-ji se, dekh leejiye, unki dhune sun
leejiye, agar aapko karna hai to, to pehle to zaraa woh jhijhke,
kyunki usse pehle unhone ek film banaayi thi Saajan Ki Baahon Mein,
usmein Nadeem Shravan-ji ka 'music' tha, to ek naamvar sangeetkaar ke
saath kaam karne ke baad ek 'singer' ko bataur sangeetkaar lene mein
woh jhijhke, lekin jaise jaise 'fast numbers' maine unko
sunaaye, 'romantic numbers' sunaaye, shaadi ka bhi ek geet tha woh
bhi sunaaya, to woh phir bahut mutaasir huye.

MS: to yeh to film Market ki baat thi jiska ek gaana bhi hamne sunwaa
diya hai. ab kisi aur film ka gaana bataaiye jo ham sunwaaten.

AR: Dukaan film mein maine sangeet diya tha. uske andar ek 'duet' hai
jo mere dil ke bahut kareeb hai, achchi dhun thi, Abhijeet aur Alka-
ji ne gaaye the, main chaahoonga ki shrotaaon ko woh sunaaya jaaye.

-----------------------------------------
Song: dil tere naam kar diya hai (Dukaan)
-----------------------------------------

MS: Altaf-ji, bahut saare 'stage shows' aap karte hain.
to 'recording' par gaane mein aur 'stage' par gaane mein kya fark aap
mehsoos karte hain?

AR: dekhiye in dono ka alag alag lutf hai, dono ka alag alag mazaa
hai, 'recording' mein yeh hota hai ki ham cheez ko 'perfectly' yaad
kar lete hain, aur jo bhi dhun hai, 'composition' hai,
usko 'perfectly' yaad karke bas 'mike' pe jaana hai 'studio' ke
andar, 'recordist' hain, 'dubbing supervisor' hain, aur ek do log
hain, koi cheez achchhi lagi to 'record' ho gayi, aur achchhi naheen
lagi to aajkal to 'cut paste' ka zamaan hai, aur 'software' ka
zamaana hai to sabkuchh ho jaata hai. lekin meri koshish rehti hai ki
poora geet main 'feelings' se gaayun. ismein thoDaa 'time' bhi lag
jaata hai. aur 'stage show' mein jo dhun ham yaad kar chuke hote
hain, 'recording' ke andar ek bandish hoti hai ki '7 minute' ka
gaana, '6.5 minute' ka gaana hai, yaa jaise "tum to Thehre pardesi"
ka 'record' hai ki 'music history' mein sabse 'longest song' hai, '16
minute' ka, to iska bhi ek 'record' hi maanaa jaayegaa

MS: jee jee

AR: to ek bandish hoti hai, aur jab 'audience' mein main "tum to
Thehre pardesi" gaata hoon to main, usmein kuch '45 minutes' lag
jaate hain

MS: achchha?

AR: usmein kuchh naye ashaar Daal ke, nayi mujhe mera jo bhi 'poetry'
yaad hoti hai, to uska ek alag mazaa hota hai, jab 'public'
ka 'response' aata hai, daad milti hai aawaam se.

MS: '45 minute' ka gaana aap gaate hain "tum to Thehre pardesi". to
kis tarah ka 'reaction' hota hai 'audience' ka?

AR: aap hi andaaza lagaa leejiye ki '45 minutes' taka agar log sun
rahe hain to kuchh na kuchh to...

MS: taaliyon ki aawaazen (laughs)

AR: aur kabhi kabhi to doosre geet ho jaane ke baad phir se yeh gaana
paDta hai.

MS: kin gaano ki farmaaish aati hai 'stage' par?

AR: 'stage' pe, is maamle mein main Khushnaseeb raha hoon ki 'shows'
mein main apne hi gaane gaata hoon, aur mere hi gaano ki itni
farmaaishen aati hain, jaise "jaa bewafaa jaa hamein pyaar naheen
karna", Dil Ke Tukde Hazaar Huye 'album' ka, aur mera ek aur 'album'
aaya tha Do Dil Haare, uske sabhi geeton ki farmaaishen aati hain,
jaise "maine dhokhe dhokhe hai khaaye umra bhar dosti ki gali mein,
zindagi tune laakar biThaaya bewafaa aadmi ki gali mein", "pehle to
kabhi kabhi Gham tha", "pangaa le liya", aur "ek dard sabhi ko hota
hai", "ek Gham judaai kayun", "taaza hawa lete hain", aur "ishq aur
pyaar ka mazaa leejiye", "tumse kitna pyaar hai", aur Ek Dard Sabhi
KO Hota Hai ka "is duniya mein pyaar ka rog lagaayo na baaba, baiThe
baiThe yun main taDpoon aur taDpaao na baaba".

MS: to is waqt aapki pasand se kaun sa geet sunwaaya jaaye shrotaaon
ko?

AR: Dil Ke Tukde Hazaar Huye ka (sings) "jaa bewafaa jaa hamein pyaar
naheen karna"

----------------------------------------------------------
Song: jaa bewafaa jaa (Dil Ke Tukde Hazaar Huye - Nonfilm)
----------------------------------------------------------

MS: ab hamein yeh bataaiye ki baat 'stage shows' ki chali hai to
duniya ke kin kin jagahon par 'stage shows' keeye hain aapne?

AR: ab logon ke pyaar se, unki duyaaon se, aadhi duniya to ghoom
chuka hoon.

MS: kaun si jagah yaadgaar rahi hai?

AR: poore America mein, jaise New York, Los Angeles, Denvar, jahaan
aajkal Madhuri Dixit-ji rehti hain, St Louis, California, yaani jitni
bhi America ke 'cities' hain, Canada, Europe, Holland mein abhi karke
aaya oon 'shows', Russia mein kiya hai, to sabhi jagah, ab dekhiye
wahaan jo angrez yaa Russian hain woh naheen samjhegaa mere geet ko,
kuchh kuchh log aate hain hamaara 'culture' dekhne ke liye, lekin
wahaan jo Indians hain, bhaartiya bhaai jo base hain woh pasand karte
hain, woh bahut izzat karte hain.

MS: ab bataaiye 'stage show' ke naam kaun sa gaana?

AR: 'stage show' ke naam.... mera ek 'album' hai Ek Dard Sabhi Ko
Hota Hai, uske andar ek geet mujhe bahut pasand hai, bahut mehnat se
maine uski 'composition' kee hai, aur uska 'video' bhi bahut
Khoobsoorat banaa hai, (sings) "Gham judaai ka yun to bahut tha
magar, door tak haath phir bhi hilaana paDaa...".

----------------------------------------------------------
Song: Gham judaai ka (Ek Dard Sabhi Ko Hota Hai - Nonfilm)
----------------------------------------------------------

AR: logon ne mujhe bahut pyaar diya hai aur aap log yeh duya keejiye
ki isi tarah aap logon ki Khidmat karta rahoon.

MS: bahut bahut shukriya Altaf-ji ki aap Vividh Bharati ke 'studio'
mein aaye, aur itni saari baaten kee aur itne saare gaane gungunaaye
hamaare anurodh par, bahut shukriya aapka, namaskaar!

AR: namaskaar!

THE END

Download from Files/Audio Files/VB's Golden Jubilee Celebrations.

Happy listening!!!...

Sujoy

INSE MILIYE
-----------

Interview with Classical Singer SHRAVANI CHAUDHURY
--------------------------------------------------

PART 1
------

SC: Shravani Chaudhury
AS: Ashok Sonawane


AS: upshaastriya sangeet mein ubharti huyi gaayika Shravani
Chaudhury. Shravani-ji, aapka bahut bahut swaagat hai Vividh Bharati
ke 'studio' mein.

SC: Ashok-ji, bahut bahut shukriya, yahaan aake bahut Khushi mehsoos
ho rahi hai, mere guruji yahaan aa chuke hain aur is vajah se yeh
jagah mujhe bahut paawan lag raha hai, aur 'thank you so much for
inviting me'.

AS: aap ne guru ki baat kee to ham yeh bhi jaanna chaahenge ki kinse
aap ne seekha.

SC: sabse pehle maine sangeet vishaarad kee hai Shrimati Shashikala
Kaikani-ji ke paas se, Bharati Vidya Bhawan, Chaupati. uske baad
Shrimati Shubha Gurtu-ji se 'semi-classical' ki taaleem lee, saath
saath Shrimati Shampa Pakrashi, unse bhi lee sangeet ki shiksha, aur
filhaal main Shrimati Shubha Joshi ke paas sangeet ki shiksha le rahi
hoon. aur Shubha Joshi jo hain, unse main kaafi pryotsaahit hoon main
is waqt, woh mujhe sangeet mein alag alag nazariya jo hai, woh mujhe
dene ki koshish kar rahi hain.

AS: Shravani-ji, yeh bataaiye ki aap mooltah kahaan se hain?

SC: main West Bengal ki hoon, mera janm Kalkatte mein huya, uske baad
main Cochin, Kerala mein kuchh saal rahi, wahaan se paDhaai kee, uske
baad 'last' 20 saal se main Bambai mein hoon, aur yaheen pe
maine 'Masters' kiya hai Economics mein, St Xaviers se maine 'degree'
kee hai. paDhaai ke saath saath gaana bhi main karti rahi kaafi aur
filhaal to main bilkul isi mein hoon.

AS: bahut achchhi zabaan hai aapki, aur gaayiki mein zabaan ka ek
mahatwa hota hai, talaffuz ka ek mahatwa hota hai, aur jaise baatchit
ke dauraan bataaya aap ne ki aap ko Ghazal aur Thumri mein mahaarath
haasil hai, balki aap seekh bhi rahi hain, to in sangeet ki vidhaaon
mein zabaan ka ek mahatwa hota hai.

SC: sahi baat hai

AS: shuruwaat se hi aapko sangeet ki taraf rujhaan raha hai?

SC: bachpan mein sangeet ki taraf rujhaan kam hi thi main kahoongi,
meri 'mummy' ne bahut, kyunki woh gaati theen aur jaisa ki
ek 'married family' mein hota hai, ghar-baar ki taraf unka dhyaan
chala gaya aur woh naheen kar paayi. to hamesha unki ichchha thi ki
main gaayun, aur bachpan se mujhe bahut 'encourage' kiya, aur isi
vajah se aaj main gaa rahi hoon.

AS: aap mein kuchh baat aisi hogi jisse unko lagaa hoga ki aap ko is
kshetra mein jaana chaahiye.

SC: yeh aap keh sakte hain, paDhaai ke saath saath, hamaari
jo 'family' thi woh paDhaai ki taraf zyaada, 'academic oriented'
tha, 'but' uske saath saath bahut saari 'music
competitions', 'school' mein, 'trophies' main jeet-ti thi 'for the
schoolo', aur ek bahut 'gutsy', main Khud jaake naam
deke, 'competition' jeet ke ghar aa jaati thi, to yeh jo baat hai
bhagwaan shaayad kisi kisi mein dete hain, jo baat 'performer' mein
hona zaroori hai, ki jo aapka hunar hai woh aap logon ke saamne
rakhen.

AS: aaKhir yeh 'performing art' hai.

SC: yeh 'performing art' hai, aap aankh naheen chura sakte logon se.
aap jab tak 'stage' pe hain aapko sabhi se aankh milaake apna jo
hunar hai woh pesh karna hai. unko lagaa ki chalo, isi ko agar thoDaa
aage baDhaaya jaaye, paDhaai ke saath saath, use 'equal importance'
diya jaata tha.

AS: sahi baat hai! ab tak is kshetra mein aap ne kya kya kaam kiya
hai?

SC: sabse pehle to main All India Radio ki 'graded artiste' hoon.
main abhi kuchh saal se gaa rahi hoon 'radio' pe. baaki, Sur
Shringaar Samsad, Bambai ke, kal ke kalaakaar sammelan, kaafi yuvaa
mahotsav, 'youth festivals', Dada Matunga Cultural Center, Nehru
Center, in sab mein main bhaag le chuki hoon. aur ek baat jo main
kehna chaahti hoon ki Sa Re Ga Ma, Aadaab Arz Hai, jo 'TV programmes'
ho chuke hain...

AS: aajkal jiska chalan bahut zyaada hai...

SC: bahut zyaada hai, jo 'reality shows' aaj, jo itne
achchhe 'artistes' sab aa rahe hain in 'shows' mein se, kuchh saal
pehle main bhi isi mein thi, 'but' aaj mera jo rujhaan jo alag kism
ki 'music' ki taraf hai, isliye shaayad main ismein naheen hoon,
lekin main bhi ismein se guzar chuki hoon. ismein bhi maine 'prizes'
jeete hain. yeh bhi main kehna chaahoongi ki Sapphire College mein
main 'lecturer' reh chuki hoon, aur (laughs) 'lecturer' ki haisiyat
se Close-Up Antakshari mein maine 'part' liya huya hai.

AS: kya baat hai, 'lecturer' kaun se vishay mein?

SC: jee main Economics mein, MA Economics mein kiya huya hai.

AS: iske baawjood aap ne sangeet ke kshetra mein bahut achchha naam
kamaaya hai, aur ham samajhte hain ki aage bhi isi tarah se kamaati
rahengi aap, ummeed hai aap se. yeh jo sangeet ka kshetra hai yeh to
bahut baDaa hai, par aap ne jo chuna hai Ghazal aur Thumri, aap
praathamikta kise deti hain?

SC: dekhiye, aapka 'commercial' hona zaroori hai, aapka rujhaan kis
taraf hai yeh alag baat hai, lekin logon ko kya pasand hai yeh bahut
zaroori hai, aapko agar logon tak pahunchna hai to unhe kya pasand
hai yeh aapko dekhna hai, to main samajhti hoon ki Ghazal ek zariya
hai jisse main zyaadaatar logon tak pahunch sakti hoon. isi tarah
aage ke liye kuchh 'plan' hai, 'fusion', 'exactly pop album' to
naheen kahoongi, 'classical' ko agar aap 'instruments', 'westernized'
karke agar aap pesh karen, usi ko 'fusion' aajkal kahaa jaa raha hai,
to us tarah ki koshish hai aage, aage kuchh 'sponsors' achchhe mile
to kaam aisa kuchh kar sakte hain. baaki main to kahoongi 'my first
love is semi-classical' Thumri gaana. lekin haan, 'commercial' baat
ko dhyaan mein rakhna bhi to bahut zaroori hai aajkal.

AS: insaan ko kuchh 'practical' bhi hona chaahiye.

SC: bahut sahi baat hai

AS: ham to chaahte hain ki Thumri ki thoDi si baandhgi agar hamaare
sunnewaalon ke liye pesh karen

SC: main khamaaj mein ek Thumri jo meri guru-ji Shubha Gurtu-ji ki
hai, woh pesh karne ki koshish karti hoon...

-----------------------------------------------------------
chhab dikhlaaja baanke saanwariya (Thumri in Raag Khamaaj)
-----------------------------------------------------------

AS: waah waah, isko sunte huye shiddat se yaad aayi Shubha Gurtu-ji
ki. ham yeh chaahenge ki aap ek namoona Ghazal ka bhi pesh karen.

SC: zaroor, main bhi kabhi kuchh Khud 'compose' karne ki koshish
karti hoon...

AS: kya baat hai

SC: isi koshish mein ek Shaji Hyderabadi ka kalaam hai, aur raag
Chandrakons mein maine yeh Ghazal koshish kee hai...

--------------------------------------------------
dil ko har waqt tasalli ka gumaan hota hai, dard hota hai magar jaane
kahaan hota hai (Ghazal)
--------------------------------------------------

AS: waah waah waah, ham to yahi kahenge ki hako bhi har waqt yahi
gumaan ho raha hai ki ham ek aisi fankaara ke ru-ba-ru hain jo apne
aap mein...

SC: bahut bahut shukriya

AS: aap ke liye duya karenge ki aap isi tarah se aage baDhte rahen,
aur aap ke sangeet ki jo saadhana hai woh aage bhi isi tarah se jaari
rahe, aur aap achchhe achchhe mukaam haasil karen

SC: bahut bahut shukriya

AS: ham aap se ab yeh jaanna chaahenge ki aap ne 'commercially' bhi
kuchh kiya huya hai?

SC: 'records' agar aap kahen to maine Films Division ke saath kuchh
kaam kiya hai, 'music director' ushar Bhatia, agar aap ne unka naam
suna hogaa, to unke saath maine kuchh 'jingles, ads' keeye hain,
jaise ki yeh Nakshatra Diamonds ki 'ad', yeh jo Aishwarya Rai ki 'ad'
hai, meri jo aawaaz hai, taraana ki, woh maine gaaya hai,
baaki 'commercial' to naheen keh sakte, 'but again in the field of
art' agar aap kahen to kathak ke saath kuchh 'performances' maine
keeye hain, Prachi Shah hamaari ek bahut achchhi 'friend' hai, ek
bahut kamaal ki kalaakaara hain, kathak nrityaangana hain, unke saath
Bombay ke baahar 'out of India' bhi ham Zimbabwe, Harare
International Festival of Arts mein hamne 'last year part' liya huya
hai. to 'commercial' to naheen kahenge isey 'but yes, activities in
terms of cultural' kaafi keeye hain. 'I am waiting for some good
offers in commercial'.

AS: ham bhi duya karte hain, aur apki mansha kya hai, kis mukaam tak
aap jaana chaahti hain, waise to kehte hain ki aasmaan ki bulandi
bahut hi oonchi hai aur har kalaakaar, har fankaar ki chaahat hoti
hai ki ek bulandi ke baad doosri tak woh jaayen aur is tarah se,
yaani uska koi ant naheen hai, aapki kya mansha hai, kya karna
chaahti hain aap?

SC: Ashok saahab, is waqt to yeh mansha hai ki ek achchhi si 'album
release' ho, jo bahut bike, log pasand kare aur ek 'established'
Ghazal 'singer' ke haiseeyat se main logon tak pahunch paayun, dilee
tamanna hai ki apna jo fan hai woh logon ke saamne pesh karoon aur
jahaan jahaan bahut baDe baDe sangeetkaar, 'all over the world'
jahaan jahaan 'perform' kar rahe hain, wahaan sab jagah 'perform'
karoon, yeh bahut dilee manshaa hai meri. main kabhi-kabhaar
Khud 'visualize' karti hoon ki bahut log baiThe hain aur main gaa
rahi hoon, aur mujhe daad mil rahi hai, meri ek dilee Khwahish hai,
ek sapna hai jo kabhi na kabhi zaroor poora hogaa.

AS: kehte hain ki jo sapne dekhte hain aur uske liye prayaas karte
hain, baat ko paane ke liye sapna dekhna bahut zaroori hota hai, jo
sapne dekhte hain wohi antatah safal bhi hote hain. ab baari daadra
yaa bhajan ki hai. to aap kya sunwaana chaahengi?

SC: des mein bahut hi pyaara ek 'composition' hai...

------------------------------------------------------------------
chhaa rahi kaali ghaTaa jiya mora lehraaye re (Daadra in Raag Des)
------------------------------------------------------------------

AS: bilkul samaa baandh diya aap ne, aisa lag raha hai jaise waaqai
kaali ghaTaa chaa rahi hai

SC: bilkul (both laughs)

AS: is raah pe chalte huye aap manzil ko paayen ham bhi duya karte
hain.

END OF PART 1

BHOOLE BISRE GEET - ASHA BHOSLE SPECIAL
---------------------------------------

Broadcast Date: 8 September 2008
--------------------------------

Presented By: Ajay Joshi
------------------------

suprabhaat doston, aaj ke is Bhoole Bisre Geet kaaryakram mein ham
aapka haardik haardik haardik swaagat karte hain. kyaa aapke zahan
mein hai doston ki aaj taareeKh kaun si hai? aaj hai 08 09 08, jee
haan, aaj hai 8 sitambar 2008. aur 8 sitambar ka din hai hamaari,
aapki, ham sab ki chaheetee gaayika Asha Bhosle-ji ka janamdin.
Vividh Bharati parivaar ki taraf se ham de rahe hain Asha-ji ko
janamdin ki Dher saari shubhkaamnaayen. aur aaj ke is Bhoole Bisre
Geet kaaryakram mein ham aap tak pahuncha rahe hain Asha-ji ke hi
gaaye kuchh sumadhur rachnaayen jin par dheere dheere waqt ka dhool
chaDh gaya hai, yaani aajkal yeh gaane zyaada sunaayi naheen dete. to
chaliye waqt ki jamee dhool ki is parat ko ham saaf karen, yaani ki
Asha-ji ke gaaye in bhooli bisri naGhmon ko ek baar phir se taaza
karen.

-----------------------------------------------
Song: pyaar karle milaa le nazar (Roop Sundari)
-----------------------------------------------

8 sitambar 1932 ko janm huya tha Asha Bhosle ka. haalaanki unhone
paarshwagaayan ka apna safar shuru kiya tha 1948 ki film Chunariya
mein jismein unhe gawaaya tha sangeetkaar Hansraj behl ne, unhe agle
kai saalon tak kaDee sangharsh karni paDee choTi ki gaayika banne ke
liye, kyunki un dino unki baDi bahan Lata Mangeshkar raaj kar rahi
theen har sangeetkaar ki dhuno par. 50 ke dashak ke aaKhir tak bas do
hi naam shirsh par reh gaye - Lata Mangeshkar aur Asha Bhosle.
baharhaal aapko yeh bataa den ki abhi jo kaaryakram ka pehla gaana
aapne sunaa usey hamne liya tha san 1964 mein bani film Roop Sundari
se. shabd the Bharat Vyas ke, sangeet tha Sardar Malik ka, aur
aawaaz, jaisa ki hamne bataaya, Asha Bhosle ka. kaaryakram ka doosra
gaana bhi san 1964 ki bani film ka hai, aur yeh film hai Samson.
Majrooh Sultanpuri ke bol hain aur sangeet hai Chitragupt ka. sunte
hain Asha Bhosle ki aawaaz mein Samson film ka yeh geet.

-------------------------------------------------
Song: teri deed se tasalli to na ho saki (Samson)
-------------------------------------------------

"teri deed se tasalli to na ho saki hamaari, wohi pyaas hai nazar ki
wohi dil ki beqaraari". jee haan doston, yahi baat ham ASha-ji ki
aawaaz aur gaayiki ke baare mein bhi keh sakte hain ki unke gaaye
geeton ko sunkar sunne ki pyaas naheen bujhti, balki aur zyaada baDh
jaati hai. ek ajeeb si kashish hai unki aawaaz mein, ek anokha
nasheelaapan hai jo bina peeye hi aadmi ko madmast banaa deta hai.
aisa hi ek masheela naGhmaa ab ham aapke liye lekar aaye hain film
Sarfarosh se. geetkaar hain Naqsh Lyallpuri, sangeetkaar S Mohinder,
aur aapko yeh bhi bataa den ki yeh film bhi san 1964 ki pradarshit
film hai. to chaliye sunte hain ki Asha Bhosle ki aawaaz kaisa
nasheela samaa baandhti hai.

--------------------------------------------------------------
Song: phool muskuraaye kyun chaand jagmagaaye kyun (Sarfarosh)
--------------------------------------------------------------

doston, ek ke baad ek teen gaane abhi hamne aapko sunwaaye Asha
Bhosle ki aawaaz mein aur yeh teeno gaane 1964 mein bani filmon ki
thi. 60 ka yeh dashak, jise ham 'sweet sixties' bhi kehte hain, film
sangeet ke liye sabse behetareen dashakon mein se ek tha. is dashak
mein jahaan ek or lokpriya sangeetkaaron ki kataar lagi huyi thi,
jaise ki Naushad, S D Burman, Roshan, Madan Mohan, Shankar Jaikishan,
Ravi, O P Nayyar, Hemant Kumar, Salil Chaudhury, aur phir Kalyanji
Anandji, Laxmikant Pyarelal aur R D Burman jaise sangeet dhoom machaa
rahe the, waheen doosri taraf kai aise sangeetkaar bhi the jinki apni
alag pehchaan thi, yeh sangeetkaar bhale hi kamcharchit rahe, lekin
unke sangeet ki miThaas mein koi kamee naheen thi, unki
srijansheelata mein, unki anooThi pratibha ke baare mein koi doraay
naheen tha. aise hi ek kamcharchit sangeetkaar ki sangeet rachanaa
pesh hai ASha Bhosle ki aawaaz mein.

---------------------------------------------------------------
Song: he kirnon ke raaja na karo savera (Shankar Seeta Anusuya)
---------------------------------------------------------------

sangeetkaar Shivram ke sangeet nirdeshan mein yeh tha Shankar Seeta
Anusuya film ka gaana Asha Bhosle ki aawaaz mein. geetkaar the Kavi
Pradeep. is geet se pehle ham baat kar rahe the naamcheen aur
kamcharchit sangeetkaaron ki. yahaan yeh bataana bhi behad zaroori
hai ki Asha Bhosle ne in sabhi sangeetkaaron ke saath kaam kiya hai.
kaamyaabi ki bulandi par pahunchkar bhi Asha-ji ne in kamcharchit
sangeetkaaron ko kabhi niraash naheen kiya. jab jab aise
sangeetkaaron ne unhe nyotaa diya, unhone unke liye gaane gaaye, phir
chaahe film chhoTi 'budget' ki hi kyun na ho. Asha-ji ka yeh bhi
maanna hai ki unke bure samay par aise hi kamcharchit sangeetkaaron
ne unhe kaam diya tha aur inhi ki badaulat unka sangeetmay safar
chalta raha. to aaiye ab ek aur aise hi kamcharchit sangeetkaar ka
swarbaddha kiya huya gaana sunte hain, aur yeh sangeetkaar hain
Krishna Kamal. inke sangeet mein suniye Pandit Kafil ki rachanaa Asha
Bhosle ki aawaaz mein, film ka naam hai Daku Mansoor.

--------------------------------------------
Song: khoya huya dil mil gaya (Daku Mansoor)
--------------------------------------------

50 ke dashak mein geetkaar Rajinder Krishan aur sangeetkaar C
Ramchandra ki joDee kaafi achchhi jamee thi, aur in dono ne bahut
saari filmon mein ek saath kaam kiya tha. haalaanki in filmon ke
adhiktar gaane Lata Mangeshkar ne gaaye, lekin samay samay par film
ki 'situation' aur charitra ko dhyaan mein rakhte huye kuchh gaane
Asha Bhosle se bhi gawaaye gaye. aisi hi ek film thi Sharada. is film
mein in dono bahano ne, yaani ki Lata-ji aur Asha-ji ne ek bahut hi
lokapriya geet gaaya tha "o chaand jahaan woh jaaye tu bhi saath
chale jaana". lekin kyunki yeh Bhoole Bisre Geet kaaryakram hai, to
is film ka ek aisa geet aapko sunwaana chaahenge jo shaayad aapke dil
ki waadiyon mein kahin shaayad goonj rahi hogi lekin aapne haal mein
isey kahin naheen suna hogaa. aisa hi ek geet Asha Bhosle ki aawaaz
mein yeh raha Khaas aapke liye film Sharada se.

--------------------------------------------
Song: lehraaye jiya balkhaaye jiya (Sharada)
--------------------------------------------

Vividh Bharati par is waqt aap sun rahe hain Bhoole Bisre Geet, aur
aaj paarshwa-gaayika Asha Bhosle ke janamdin par ham aapko sunwaa
rahe hain unhi ke gaaye kuchh bhoole bisre naGhmen.

-----------------------------------------------
Song: o mere chaand tum kahaan (Ek Armaan Mera)
-----------------------------------------------

"yeh udaas aasmaan raat yeh dhuyaan dhuyaan o mere chaand tum kahaan,
thak gayi meri zubaan aa gayi labon pe jaan o mere chaand tum
kahaan". Asha Bhosle ki aawaaz se jo dard chhalakta hai woh seedha
dil par choT karti hai, aur naayika ki vedanaa, uski vyathaa maano
ham mehsoos karne lagte hain. shaayad aap ne bhi yahi mehsoos kiya
hogaa is geet mein jise likha tha Rahil Gorakhpuri ne film Ek Armaan
Mera ke liye. sangeetkaar the S D Batish. dard ka ek aur ahsaas, ek
aur andaaz suniye is agle geet mein jise hamne chuna hai Chaand Ki
Duniya film se. Qamar Jalalabadi ke bol hain, aur Nirmal Kumar ka
sangeet.

---------------------------------------------------------
Song: sachchi hai agar daata meri preet (Chand Ki Duniya)
---------------------------------------------------------

Asha Bhosle ke gaaye bhoole bisre geeton ka lutf aap uThaa rahe hain
aaj ke is kaaryakram mein. aur aapne agar Gaur kiya hogaa to is
kaaryakram mein baj rahe hain zyaadaatar kamcharchit sangeetkaaron ki
rachnaayen. Nirmal Kumar ke baad ek aur kamcharchit sangeet ki
sangeet rachana ab ham aapko sunwaane jaa rahe hain. yeh hain G S
Kohli. inke sangeet mein Asha Bhosle ne gaaya tha film Faulad ke
geet. inmein se ek pesh hai jise likha hai Farookh Qaiser ne.

------------------------------------------------------
Song: o matwaare saajna chala gaya mera pyaar (Faulad)
------------------------------------------------------

Faulad film ke is geet mein ghoDe ke Taapon ki 'rhythm' ko sunkar
shaayad aapko yaad aa gayi hogi O P Nayyar ke swarbaddha keeye huye
gaane. doston, Asha-ji ke gaaye huye puraane gaano ka zikr ho raha ho
aur sangeetkaar O P Nayyar ka 'composition' shaamil na ho yeh kaise
ho sakta hai. O P Nayyar ke geeton ko gaakar hi to Asha Bhosle apaar
safaltaa ki choTi par pahunchi theen. Naya Daur, Mere Sanam, Kashmir
Ki Kali, Tumsa Nahin Dekha, Phagun, Kismat, Yeh Raat Phir Na Aayegi,
Ek Musafir Ek Haseena, Sawan Ki Ghata, Humsaya, aur Pran Jaaye Par
Vachan Na Jaaye, aur na jaane kitni aisi filmen hain jinmein O P
Nayyar aur Asha Bhosle ki joDee ne aisi dhoom machaaee ki in filmon
ke gaane aaj bhi utne hi pasand keeye jaate hain jitne us samay yeh
gaane chale the. lekin is kaaryakram mein yahaan pe ham aapko O P
Nayyar ka swarbaddha kiya aur Asha Bhosle ka gaaya huya ek
kamcharchit geet sunwaana chaahenge film Farishta se. geetkaar Jan
Nisar Akhtar ki yeh rachnaa hai.

-----------------------------------------------------
Song: aaj maine jaana mera dil hai deewana (Farishta)
-----------------------------------------------------

Asha Bhosle ki aawaaz woh maKhmalee aawaaz hai, jaani pehchaanee si,
kuchh nayee kuchh puraani si, kabhi komal kabhi buland si. aawaaz
wohi par andaaz hamesha nayaa. Ashaji ki aawaaz aur andaaz sirf
Hindustan mein hi naheen, videshon mein bhi Khoob lokpriya huya. haal
mein unhone kai videshi 'bands' ke saath milkar 'pop albums' mein
gaane gaaye hain, jo duniya bhar mein Khoob sune gaye. Ashaji ki
aawaaz ke liye sangeetkaar aur filmkaar aaj bhi aamaada rehte hain
jaisa guzre zamaane ke sangeekaar aur filmkaar rehte the. guzre daur
ke ek aise hi sangeetkaar the Sanmukh Babu jinka swarbaddha kiya huya
Asha-ji ka gaaya ek gaana yahaan par ham aapko sunwaane jaa rahe
hain. Uday Khanna ne is geet ko likha hai Hamir Hath film ke liye.

---------------------------------------------------------------
Song: yun hamein jo bhi sazaa dee meherbaani aapki (Hamir Hath)
---------------------------------------------------------------

Asha Bhosle ek 'versatile singer' hain. woh jab 'romantic' geet gaati
hain to jaise pyaase dharti par baarish ki boonden barasne lagti
hain, jab udaasi bharaa naghmaa gaati hain to aankhen aansooyon se
nam ho jaati hain aur jab bhakti ras ka koi geet prastut karti hain
to jaise saakshaat devi ke darshan ho jaate hain. pop, rap aur
cabaret bhi baDi sahejta aur nipoornta se gaa leti hain Ashaji.
Ashaji ke awaaz ki kuchh visheshtaayen hain unke gale ki harkat,
awaaz ka nukeelapan aur Tees upjaane ki unki kshamata. unke awaaz ki
khanak har ek geet ko laajawaab bana deti hai. aur ek aisa hi
laajawaab geet pesh hai film Insaf se. Asha Bhosle aur sakhiyon ki
aawaazon mein is geet ko likha hai Asad Bhopali ne aur sangeet se
sanwaara hai Chitragupt ne.

-----------------------------------------------
Song: dil pe nazar hai pyaar ka Dar hai (Insaf)
-----------------------------------------------

to doston yeh tha aaj ka Bhoole Bisre Geet jismen hamne aapko
sunwaaye Asha Bhosle ke gaaye huye kuchh kamcharchit naGhmen. chalte
chalte Vividh Bharati parivaar ki or se ek baar phir Asha-ji ko
janamdin ki Dheron Dheron shubhkaamnaayen, ab deejiye apne dost Ajay
Joshi ko ijaazat, namaskaar!

THE END

Listen to Lyricist cum Former VB Announcer Ahmed Wasee having a fun-
filled discussion with Amarkant Dubey & Yunus Khan.


Download from Files/Audio Files/VB's Golden Jubilee Celebrations.

Happy listening!!!...

Sujoy

2008

mere pyaare fauji bhaaiyon ko Dr Jaspinder Narula ka namashkaar,
satsriakaal, 'hello', aadaab! bahut saal ke baad ek baar phir aap se
muKhaatib hoon. bahut din ho gaye. sach maaniye to aaj main yahi soch
rahi hoon ki kaash main aap logon ke saamne baiThi hoti, aur phir aap
se baaten karti, kuchh aapki sunti, kuchh apni kehti. lekin koi baat
naheen, woh bhi ek din zaroor hoga. to aaj main aapko kuchh khaTTi
meeThi yaaden aap ke saath baawasta karne aayi hoon. main chaahti
hoon ki wahaan baiThe jo bhi mujhe sun rahe hain, mere chhoTe bhaai,
mere baDe bhaai, jo bhi wahaan hain, unko main bataatyun ki jab main
Bombay nagari mein aayi to yahaan aakar mujhe kaise
kaise 'experiences' huye. sach kahoongi ki bahut hi haseen ek jeevan
milta hai, bahut karmon ke baad, yeh jeevan ek 'bank account' ki
tarah hota hai, jab aap achchhe aur bure kaam karte hain, to yeh usi
tarah aap ke jeevan mein juD jaate hain jis tarah aap paise jamaa
karte hain apne 'account' ke andar. to baDe karmon ke baad, baDe
achchhe karm karne ke baad hamein manushya roop mein aana paDta hai.
ab jab ham manushya roop mein aate hain, to achchhe achchhe karm
karne se aage apna jo 'bank account' hai woh bharta hai. to main
samajhti hoon ki jo aap log kar rahe hain, yeh 'bank' ke us 'account'
mein aage ke liye jamaa ho raha hai, isliye aap log sach hain. isse
pehle ki main 'programme' shuru karoon main kehna chaahoongi aap log
sach bahut mahaan hain. aap wahaan seema pe baiThkar apne gharon se
door, apne parivaar se door, ham logon ki raksha kar rahe hain. aaiye
shuru karte hain apni zindagi ki kuchh baaten, lekin usse pehle main
sochti hoon ki ek geet ho hi jaaye. kaisa Khayaal hai? yeh geet main
Khaas karke fauji bhaaiyon ke liye 'dedicate' kar rahi hoon, aur apne
desh ko.

Song: jahaan Daal Daal par sone ki (Sikander-e-Azam)


haal hi mein guru poorNimaa gayi hai, yeh geet maine isliye bhi
sunwaaya ki ham log kisi ko to apna guru maante hain na apne jeevan
mein! to sarvpratham apne guru se shuru karna chaahiye. to yeh desh
ko bhi 'dedicated' tha, aap ko bhi, aur guruyon ko bhi. to ab main
aap se kuchh apni yaaden jo hain, woh baawasta karoongi. sabse pehle
jab main Bombay nagri mein aayi to main yahaan kisi ko bhi jaanti
naheen thi. kuchh kalaakaar loh jo jeevan mein mujhe mil chuke the
pehle, bachpan se kyunki gaa rahi hoon, sabse pehle to main aapko
bataayungi ki main kahaan se hoon. main dilli shahar se hoon, aur
dilli shahar mein maine ek bahut hi 'musical' parivaar mein janam
liya. mere pitaaji Sardar Kesar Singh Narula, maaata Mohini Narula-
ji, dono hi sangeet mein, log unhe 'living legend' kehte hain, Khaas
kar ke Punjabi 'industry', Haryana 'industry' ke liye. 'mummy'
Haryanvi bhaashaa mein bahut hi mashoor hain, to aise parivaar mein
mera janam huya, aur kis tarah mere maata pitaa ne yeh paaya ki mere
andar sangeet hai woh bhi ek kahaani hai. meri maataaji ne kahin koi
gaana sun rahi thi, Ghazal thi, aur main thi koi 7 baras ki. to maine
woh Ghazal sunte sunte usko 'appreciate' kiya tha, 'appreciate' karne
ka matlab, sangeet mein jo log hote hain woh kehte hain 'waah waah
waah' ya phir 'aa ha ha'. to maine ekdam se aa ha ha kiya. jaise
hi 'aa ha ha' kiya to meri 'mummy' ko lagaa ki, woh choTi banaa rahi
thi to unko lagaa ki baal kheench gaye. to poochhi mujhe ki 'kya
huya?' maine unse kaha ki 'maa aapne suna naheen kitna Khoobsoorat
tareeke se is Ghazal mein ek harkat lee hai'. woh 'harkat' shabd
sunkar baDi stabdh ho gayeen, aur mujhe kehne lagi ki 'yeh shabd
tumne kahaan sun liya?' aur uske baad hamaari koi vaartaalaap huyi
hogi, ab mujhe poori tarah yaad naheen, itna yaad hai ki mere pitaaji
kuchh 'compose' kar rahe the doosre kamre mein, to wahaan unhone
aawaaz dee, aur mujhe bulaaya aur poochha ki 'tumhe gaana-waana aata
hai?' maine bolaa 'bilkul aata hai'. bole 'kaun sa gaana aata hai?'
to maine bola ki main to Sufi gaana, bulisha ki kaafi naheen aayi woh
film Bobby mein, mujhe woh gaana bahut pasand hai, Narendra Chanchal-
ji ne gaaya tha. to kehne lage ke 'achchha, zara sunaayo'. maine
sunaaya. sunaaya to dono ekdam hairatanGez, maine unko dekha to unke
chehre, bahut Khush aur bahut pyaar kiya mujhe, kuchh aisi aisi
baaten unhone kahee jo mere upar se nikal gayi lekin mujhe aaj tak
yaad hai bahut Khush huye the. to ase parivaar se main 'belong' karti
hoon, usi din se meri 'music' ki taaleem shuru ho gayi, 'classical'.
to isi ke saath main pehle to aapko ek gaana sunaayungi, aur yeh
gaana 'film industry' mein mera pehla 'released' gaana tha, film
Judaai ke liye. yeh gaana bhi mere dil ke bahut kareeb hai kyunki
isse bhi bahut saari yaaden baawasta hain, lekin woh baad
mein 'share' karoongi, pehle aaiye sunte hain yeh gaana.

Song: mujhe ek pal chain na aaye (Judaai)


kaisa laga yeh geet aapko? achchha tha na? yeh mera pehla geet tha.
mujhe yaad hai ki jab pehli baar milna huya mera Nadeem Shravan-ji
se, to dono ne mujhse kahaa ki 'koi Nusrat saahab ka gaana aata hai?'
to Nusrat saahab ko main bahut sunti thi, aur shuru se hi mujhe bahut
shauk raha hai Sufi logon ko sunne ka, to Nusrat saahab ki gaayiki
mujhe bahut pasand thi. to maine unse kahaa ki 'jee haan, mujhe unka
ek geet bahut achchha lagta hai "mainu ek pal"', (sings) "o mainu ek
pal chain na aaye sajna tere binaa", to woh Punjabi mein tha, to
unhone kahaa ki 'yeh geet to ham ismein istemaal karenge, Judaai
mein, is tarah se yeh geet mujhe mila, bahut Khush huye, bahut jaldi
mein maine yeh geet kiya, 15 'minute' mein, jitni geet ki 'duration'
thi utne der mein maine ek 'take OK' karke aur uske baad
maine 'producers' ko, Boney Kapoor-ji aur unke parivaar ko, sabko
ikaTTha hote dekha, unhone sabko bulaa liya, Sunny Studio mein hamne
yeh kiya, Dharmendra-ji ka jo 'studio' tha, usmein isko 'record' kiya
tha, bahut hi mazaa aaya aur bahut hi behetareen geet huya. aur pehli
baar yeh pehla gaana 'release' huya mera 1997 mein. to ab main aapko
apna doosra gaana sunaana chaahti hoon jo 'again' phir bahut
Khoobsoorat geet hai, aur uske baare mein main baad mein bataayungi,
pehle yeh geet suniye.

Song: taaren hain baaraati (Viraasat)


is geet ki jo shuruwaat thi woh Anu Malik ko maine Khud dee thi,
kyunki Anu Malik bahut hi achchhe 'artiste' hain, bahut achchhe
kalaakaar, bahut hi zaheen 'music director' hain. 'melody' ke woh to
waise bhi baadshaah rahe hain. to unhone ek baar, ek mulaaqaat mein
maine unko yeh geet sunaaya, jo shuruwaat thi "akhiyaan milaake
channa paawe na judaai", unhone kahaa ki 'isko 'use' karenge'. ek din
unka 'phone' aaya mujhe, woh Chennai mein baiThe the, kaha
ki 'ticket' leke aa jaayo Chennai mein. main wahaan pahunchi to bole
ki 'woh gaana tum us din gunguna rahi thi', aur unko yaad tha, lafs
to naheen yaad the, dhun yaad thi, woh gungunaaye unhone to maine
kahaa 'achchha Theek hai'. to maine jab gaaya to unhone uske
saath "taaren hain baaraati" woh unki apni upaj thi, kaise kamaal ka
kaam kiya na unhone! to yeh geet jo tha unhi ka diya huya mujhe is
Viraasat film ka gaana tha. unke saath bhi kaam karne ka mujhe bahut
mazaa aaya, bahut achchhe geet, Kareeb ka gaana gaaya maine, uske
baad maine unke liye Baadal ka gaaya, "jugni jugni", aur pataa naheen
kya kuchh, Punjabi 'flavour' ke bahut se gaane unhone mujhse gawaaye,
phir Fiza ka "na leke jaayo mere dost ka janaaza hai". to ab main
soch rahi hoon ki aapko, baaten to bahut saari kar chuki hoon, ab
thoDaa gaana phir se ho jaaye, aur aapko ek baar phir, sangeet
ke 'mood' mein phir se le jaayen, to leejiye chaliye chalte hain aur
agle geet ki baat karte hain, agla geet aapko sunaate hain. aap to
aise bandook se goli maarte hain, ab yahaan baat ho rahi hai laDki
akhiyon se, laDkaa akhiyon se goli maar raha hai, to sunte hain pehle
ki aankhon se kaise goli lagti hai.

Song: akhiyon se goli maare (Dulhe Raja)


(sings) "jaag dil-e-deewaana rut jaagi vasl-e-yaar ki...", kya aap
jaante hain yeh kiska sangeetbaddha hai? yeh Chitragupt-ji, aur
Chitragupt-ji ke beTe Anand Milind jinka gaana abhi maine sunaaya
aapko "akhiyon se goli maare", bahut hi behetaeen joDi 'music
directors' ki, Anand Milind ki joDi thi, inhone 'I think 90s' mein
bahut kaam kiya. aur yeh log jitne achchhe 'music directors' the,
utne hi achchhe insaan the. jab inko pataa chalaa ki main nayi nayi
aayi to in logon ne mujhe sunaa, to har maheene yeh do se teen gaane
mujhe gawaa hi dete the. aur inka ahsaan main zindagi mein kabhi
bhool naheen sakti kyunki in logon ne mujhe us waqt pe bahut 'help'
kee jis waqt ek naye, jaise kehte hain na ki Doobte ko tinke ka
sahaara hota hai, us taraf naye log jab nayi 'city' mein aate
hain, 'struggle' kar rahe hote hain, logon ki zaroorat hoti hai, un
logon mein main samajhti hoon Anand Milind mere jeevan mein Khaas
unka kirdaar hai, meri aaj tak ki meri jitni bhi kamaai hai, aur
kamaai 'as not only' paise ki, balki jahaan main hoon, aaj jis makaam
pe hoon, wahaan Anand Milind-ji ko yeh shrey jaata hai. ab ek aur
zaheen insaan ka naam lenewaali hoon main, jo bahut hi achchhe 'music
director, bahut hi achchhe kalaakaar 'family' ke, unka naam hai Viju
Shah. Viju Shah se meri mulaaqaat unke pitaaji Kalyanji bhaai ne
karwaayi thi. Kalyanji bhai se meri mulaaqaat bahut saal pehle Amjad
Ali Khan Sahab ke ghar pe huyi thi. aur unhone mujhe yahaan aane ka
nyota diya tha ki 'aap ko to Bombay mein hona chaahiye,
koi 'competition' naheen hai aapke liye'. lekin bahut saal main beech
mein Canada chali gayi aur jab wahaan se waaapas aayi Bombay mein to
main unse milne gayi. to tab tak woh bahut vriddh ho chuke the aur
beemaar bhi the. to unhone kaha ki 'main to aajkal kaam naheen karta
lekin mera beTaa bahut kaam kar raha hai, main usse zaroor aapko
milwaayunga'. bahut hi Kalyanji bhai ne pyaar diya aur baDe pyaar se
Viju bhai se meri mulaaqaat karwaayi. aur tab unhone mujhse ek gaana
gawaaya film Master ke liye jo Navketan waalon ki film thi, aur Khair
woh gaana to main aapko naheen sunwaa paayungi, lekin ek aur gaana
maine unke liye gaaya Bade Miya Chhote Miya film se, yeh gaana kuchh
tha baDaa, (sings) "dhin tak dhin dhin tak dhin, hona tha yeh ek din"

Song: dhin tak dhin (Bade Miya Chhote Miya)


aur ab yeh aur 'music director' ki baat karte hain, aur woh koi aur
naheen balki mere sabse zyaada 'hit' gaane ke 'music director' Jatin
Lalit hain. 'I wish they were still together, very unfortunate but',
bahut 'melodious music director', bahut achchha geet banaate hain,
unka 'music' jo tha mujhe hamesha Pancham-da ki yaad dilaate hain.
aur dono hi bahut 'talented music director', bahut hi 'talented'
laDke hain. to maine inke saath kaam kiya, sabke gaane gaane ke baad
ek din inse bhi mulaaqaat huyi, main 'first floor' pe kisi ka
gaana 'record' kar rahi thi, yeh log 'second floor' pe kisi ka
gaana 'record' kar rahe the, to mujhe kisi ne kahaa ki 'woh log upar
hain', to main mili naheen thi. jaake mili fauji bhaaiyon unse main.
unhone dekha mujhe aur mujhe kahaa ki 'aap Canada mein rehke bhi itni
Hindustaani hain, ki aap haath naheen milaati, aur aap English kam
bolti hain Hindi zyaada bolti hain'. to maine bolaa ki sabse pehle to
main Hindustaani hoon, baad men 'country' ki baat aati hai, 'country'
to main apni shauk se, 'choice' se chali gayi, lekin hoon to main
Hindustaani. to bahut hi achchha 'experience' in logon ke saath mera
raha. aur unhone mujhe aisa Khoobsoorat gaana diya, jis gaane ki
wajah se aaj jo kuchh bhi main hoon, jo astitva mera bana, woh inki
gaane se tha. yeh gaana aap pehechaanenge, (sings) "pyaar to honaa hi
tha...."

Song: pyaar to hona hi tha (Pyar To Hona Hi Tha)


mere achchhe fauji bhaaiyon, ab mujhe jaana hogaa. lekin jaate jaate
apni e dilee tamanna bataana chaahti hoon, aur woh yeh hai ki main
kabhi 'border' par, sarhad par aana chaahoongi, aur wahaa aakar,
aapke saamne baiThkar aapko apne geet sunaayungi. eeshwar meri har
tamanna poori karta hai, ek din mujhe maaloom hai, meri yeh tamanna
bhi zaroor poori hogi. isi aas ke saath aap sab ko mera bahut saara
pyaar, shubhkaamnaayen, aur ek bahan ka aashirvaad. bahan maine
isliye kahaa kyunki ek bhaai hi ek bahan ki raksha karta hai. usi
prakaar jis prakaar aap hamaari raksha kar rahe hain, sarhad par
baiThkar. to bhagwaan, eeshwar aapki raksha karen, main chaahti hoon
ki main 'enjoy' karoon jaate jaate, aap bhi karen, yeh meer chhoTe
bhaai Mickey Narula ke sangeet mein maine gaaya tha, meri ek 'album'
aayi thi Kuch Kuch Dil Mein, usse yeh geet bahut 'hit' huya,
bahut 'popular' huya, to aaiye jaate jaate, 'being a Punjabi', main
kaise jaa sakti hoon aapko binaa Punjabi geet sunaaye, to chaliye yeh
gert sunte hain aur main chaahoongi ki aap sab 'enjoy' karen,
naachiye Khoob, aur main aapko yaheen baiThkar dekhoongi aur mehsoos
karoongi. aur isi ke saath JAI HIND!

Song: munDaa tu hai Punjabi soNaa (Kuch Kuch Dil Mein - Nonfilm)


THE END

SWARNA SMRITI
-------------

A SHORT INTERVIEW OF SINGER MINU PURUSHOTTAM
--------------------------------------------

MP: Minu Purushottam
SB: Savita Bajaj


---------------------------------------------------------------
Song: unse nazren mili aur yeh yaad aa gaya (Ghazal, with Lata)
---------------------------------------------------------------

SB: bachpan se jab aap ne gaana shuru kiya to tab se yeh naam aap se
juDaa huya hai? 'nickname' tha yaa...

MP: tha to 'nickname' hi lekin mujhe yeh achchha lagaa. sab logon ko
bhi yahi achchha lagaa. kuchh kuchh ajaghon par to aisa huya ki
log 'purushottam' naheen lagaate, sirf 'minu' lagaate hain, usse
bahut sundar, aur bhai aisa lagta hai ki bahut woh to naheen hai, har
ek aadmi Minu naam naheen rakhte, kyunki yeh aam naam naheen hai. ek
shaadi ka 'programme' tha, usmein Rafi saahab gaye the aur ham log
bhi gaye the, to ajeeb sa, us 'programme' ka to ajeeb sa 'experience'
huya, ke shaadi ka 'programme' huya aur wahaan pe Governor aaye huye
the, woh kehne lage 'Rafi saahab, hamein to aapka woh gaana pasand
hai "o duniya ke rakhwaale sun dard bhare mere naale"', bole 'yeh
gaana aap pehle gaa deejiye, phir chaahe jo marzee gaana gaayen'. to
saara maahaul hi ajeeb sa ho gaya, kyunki pehle hi 'sad song' gawaa
diya unse, lekin kya karen unki jo baat hai woh Taal naheen sakte
the, iske baad to 'happy type' ke 'songs' huye, lekin sabse pehle
Rafi saahab ne yeh waala gaana gaaya.

SB: tabhi aap se mulaaqaat huyi hamaari!

MP: (laughs) main agar aisa kahoon ki aap pehle 'stage' par gaake
phir filmon mein aayeen theen to sahi baat hogi na?

MP: naheen naheen, main filmon se 'stage' pe gayi hoon.

SB: filmon se 'stage' par gayeen? zyaadaatar log to 'stage' se filmon
mein jaate hain, 'stage' ko ek 'stepping stone' banaake filmon
mein 'entry' lete hain.

MP: naheen aisa naheen hai, main 'school' se nikalte hi,
samjheeye 'school' ke 'time' se hi main Roshan-ji ke paas jaati thi,
aur unhone mujhe Taj Mahal mein gaana gawaaya tha.

SB: kaun sa gaana?

MP: woh tha "na na na re haath na lagaana"

SB: ohhh, haan haan yaad aaya

----------------------------------------------
Song: na na na re haath na lagaana (Taj Mahal)
----------------------------------------------

MP: uske baad filmon mein main pehle aa gayi, uske baad 'stage' pe
gayi hoon main, aur 'stage' pe bhi Rafi saahab ke saath hi shuru
kiya. sabse pehla 'programme' maine kiya tha Hyderabad mein,
jo 'stage' pe gaayi thi. woh Baisakhi ka 'programme' tha.

------------------------------------------------
Song: vardi hai bhagwaan fauji mera naam (Fauji)
------------------------------------------------

SB: usmein to Punjabi gaane honge?

MP: Punjabi mein gaa rahe the zyaadatar gaane, lekin main to Hindi
gaati thi zyaada, mujhe Punjabi 'folk songs' ka zyaada pataa naheen
tha.

------------------------------------
Song: ni main yaar manaana ni (Daag)
------------------------------------

SB: aap to Gujarati mein bhi gaati hain, Marathi bhi gaati hain, aur
bhi koi zabaan hai jo aapne chhoDi ho?

MP: naheen, main South Indian to naheen gaaya abhi. dekhiye kitna
gaayega na aadmi dekhiye, aur phir mere Khayaal se, jahaan tak mujhe
lagta hai ki bahut zyaada 'languages' mein gaane se apni 'language'
pe bahut fark paDta hai. jaise Hindi hai, Urdu hai, KhaamaKhaa ham
doosre 'languages' mein lage rehte hain to inmein fark to aa jaata
hai. bahut 'singers' hain South India mein, kitne achchhe achchhe
gaane waale hain.

SB: achchha aap Bambai mein to gaati hain, aas paas ke shehron mein
bhi jaati hongi

MP: haan, har jagah jaati hoon

SB: aap Hindustaan se baahar bhi jaati hain kya?

MP: haan main Hindustaan se baahar 6 baar gayi hoon

SB: kahaan kahaan gayi hain?

MP: bas yaheen Dubai gaye the...

SB: bas yaheen Dubai han? (both laughs)

MP: aur USA, Canada, West Indies

SB: wahaan par aapka kaisa 'experience' raha, Bambai jaisa yaa alag?

MP: naheen, wahaan to mujhe Punjab jaisa 'experience' raha.

SB: baap re, wahaan Punjabi?

MP: Punjabi, aur itne kaTTar Punjabi ki poochhiye mat, jaise ham
kehte hain na ki 'aaiye khaana khaa leejiye', woh kahenge ki 'aayo
bhai roTTi kha lo', itna mazaa aata hai woh roTTi khaane mein, bahut
achchha lagaa aaj tak yaad hai mujhe.

SB: ek baat main jaanna chaahti hoon ki wahaan par aap Punjabi yaa
Hindi mein gaati hain, English mein to aap gaati naheen hongi...

MP: naheen, ek do 'words' aa jaate hain gaano mein, waise English
gaane ki zaroorat naheen paDtee

SB: to aap ki zabaan samajh jaate hain wahaan pe?

MP: saare Hindustaani hi to aate hain gaana sunne ke liye

SB: achchha

MP: aur zyaada karke Punjabi mein

-----------------------------------------------------------
Song: huzoor-e-wala jo ho ijaazat (Yeh Raat Phir Na Aayegi)
-----------------------------------------------------------

SB: aur kuchh log chaahte hain ki aap filmon mein 'acting' bhi karen,
gaane bhi gaayen, to aapne bhi kabhi 'acting' kee thi yaa sirf gaane
mein hi rujhaan hai?

MP: naheen maine do filmon mein kaam kiya tha chhoTa chhoTa

SB: kaun si film?

MP: ek 'picture' ka naam tha Naya Khoon, usmein 'hero' ke 'sister'
ka 'role' kiya tha. lekin mujhe jamta naheen tha, 'acting' mein mujhe
kuchh Khaas mazaa naheen, isliye uske taraf dhyaan naheen diya,
haalaanki jo bhi aata tha gaana gawaane ke liye wohi kehta tha
ki 'picture' mein kaam karo. Sagar saahab, Ramanand sagar saahab ne
bhi ek baar kaha tha, jab unki 'picture' ban rahi ti na Ankhen, tab
main America se aayi thi, tab unhone aate hi kahaa tha
ki 'meri 'picture' mein kaam karo tum. mujhe 'picture' mein kaam
naheen karna, gaane gawaaiye mujhse.

SB: aap ne 'acting' seekha to naheen hoga kahin se

MP: naheen seekha to naheen tha, pehle bhi seekhte kaun the,
aajkal 'school' vagerah khul gaye hain, 'acting' kaun seekhta tha!

SB: sangeet aapne seekha hoga

MP: sangeet maine seekha, baaqaayda uski 'training' huyi, 'classical'
ki maine 'training' lee hai

SB: kisse?

MP: Laxman Prasad Jaipurwale-ji se seekha, phir Delhi jaati
thi, ????? Khan saahab se bhi maine thoDaa 'light' seekha, aur apne
yahaan 'radio' pe Hafeez Ahmed Khan saahab se seekha. 'classical' ka
to bahut shauk hai lekin ab aa gayi hoon 'film line' mein, to ismein
zyaada 'earning' hoti hai, shohrat milti hai, iski taraf bhi bhaagta
hai, aur bhi zariya bhi yahi ban gaya hai na ab to, waise
mujhe 'compose' karne ka shauk hai, 'composition' karne ka shauk hai,
agar koi achchha 'tune' aa rahi hai dimaag mein to uske upar do chaar
bol likhke samajh leejiye ek asthaayi ek banaa lee, uske baad doosra
antara to, waise likhne ka shauk bhi naheen hai aur itna zyaada paDta
hai uska...

SB: asar paDta hai dimaaG mein

MP: haan, to main to 'tune' rakhne ke liye thoDa bahut bol likh leti
hoon 'folk type' ke. aaj ka hai jo gaana woh 'story' ko 'disturb'
karta hai, aur pehle log gaana sunne ke liye 'hall' mein jaate the,
ki falaane 'picture' ka falaana gaana bahut achchha hai, to gaana
sunne ke liye ham 'hall' mein jaa rahe hain

SB: bahut Khoob

MP: Minu-ji, hamaara waqt Khatam ho raha hai, to main yeh kahoongi
ki 'Minu-ji hamaari 'studio' mein aayeen Khuda ki kudrat hai, kabhi
ham unko kabhi apne aapko dekhte hain" (both laughs), achchha
ji 'studio' mein aane ke liye bahut bahut shukriya.

MP: aapka bhi bahut bahut shukriya Savita-ji

-----------------------------------------------------
Song: nigaahen churaao na daaman chhuDaao na (Faasla)
-----------------------------------------------------

THE END

Satish Kaushik congratulates VB on Golden Jubilee.

Download from Files/Audio Files/VB's Golden Jubilee Celebrations.

Happy listening!!!...

Sujoy

SUHAANA SAFAR - KAMCHARCHIT SANGEETKAAR
---------------------------------------

Broadcast date: 21 July 2008
----------------------------

aaj ka yeh Suhaana Safar kendrit hai kamcharchit sangeetkaaron par.
doston, kamcharchit sangeetkaar ka matlab yeh ki gaane baDe suhaane,
meeThe meeThe, haalaanki yeh sangeetkaar zara kamcharchit hain lekin
inke gaane baDe raseele aur meehe hain. suniye yeh pehla geet.

-------------------------------------------------------------
Song: e aayo karen baaten, aur baaten mulaqaaten (Naya Nasha)
-------------------------------------------------------------

Anand Bakshi ke bol the, Lata Mangeshkar ki aawaaz mein yeh thi Naya
Nasha film ka geet, sangeet tha Sapan Chakraborty ka. jee haan,
nashaa to aisi dhuno mein hi hai jinhe hamaare in madhur
sangeetkaaron ne rachaa hai. inmein se kuchh kamcharchit rahe aur
kuchh sangeetkaaronn ko zyaada khyaati mili. lekin guNvatta ki
drishTi se har sangeetkaar, chaahe woh khyaatimaan ho yaa
kamcharchit, sabhi ne utkrishT kaam kiya hai apne apne tareeke se.
aur aisa hi ek naam hai Sapan Chakraborty ka, jinka swarbaddha kiya
yeh gaana aapne abhi sunaa. Sapan-da ne haalaanki Hindi filmon mein
bataur sangeetkaar gne chune filmon mein sangeet diya hai, lekin kai
Bangla filmon mein bhi unhone sangeet diya hai. woh R D Burman ke
sahaayak the aur bataur paarshwa gaayak unhone kuchh geet bhi gaaye.
unki pratibha yaheen Khatam naheen hoti, unhone R D Burman ki kai
Bangla filmon mein aur Durga Puja ke mauke par bannewaale Gair
filmi 'albums' mein geet bhi likhe. aur aapko yeh bhi bataa den ki
yeh woh Sapan Chakraborty naheen hain jo naam aap Sapan Jagmohan ki
joDi mein sunte hain. darasal Sapan Jagmohan waale Sapan ka poora
naam hai sapan Dasgupta. chaliye, ab agla geet sunaa jaaye.

----------------------------------------------------
Song: khoya khoya chanda (Door Gagan Ki Chhaon Mein)
----------------------------------------------------

Door Gagan Ki Chhaon Mein, is film ka geet aap sun rahe the Asha
Bhosle ki aawaaz mein. Shailendra ke bol the, Kishore Kumar ka
sangeet tha. jee haan, Asha Bhosle ne yeh geet Kishore Kumar ke
sangeet nirdeshan mein gaaya tha. aur yeh film Door Gagan Ki Chhaon
Mein hamein sabse pehle yaad dilaate hain Kishore Kuamr ki jinhone is
film mein marmsparshi sangeet diya, abhinay kiya, gaane gaaye, aur
film ko nirdeshit bhi kiya. sampoorN kalaakaar Kishore Kumar ki
bahumukhi pratibhaa ka parichay hai film Door Gagan Ki Chhaon Mein.

-------------------------------------------------
Song: ham bhool gaye re har baat (Sautan Ki Beti)
-------------------------------------------------

Lata Mangeshkar ki aawaaz mein Sautan Ki Beti film ka yeh geet behad
lokpriya huya tha. shabdkaar the Saawan Kumar aur sangeetkaar the Ved
Pal. Ved Pal Sharma ke sangeetbaddha geet zyaada sunaaee to naheen
paDe, lekin Sautan Ki Beti film ke sabhi geet kaafi charchit huye
the. Lata Mangeshkar aur Kishore Kumar jaise gaayakon ne unke
nirdeshan mein is film mein geet gaaye the. aaiye aage baDhte hain
kamcharchit sangeetkaaron ki shrinkhalaa mein aur sunte hain
sangeetkaar Ganesh ke sangeet nirdeshan mein Chalak film ka geet Asha
Bhosle aur Kishore Kumar ki aawaazon mein. geetkaar hain Hasrat
Jaipuri.

---------------------------------
Song: dil ka nazraana le (Chalak)
---------------------------------

sangeetkaar joDi Bipin-Babul ne 1958 mein film sansaar mein kadam
rakha tha. aage chalkar Bipin aur Babul alag alag sangeet dene lage.
yun to dono ko hi bahut zyaada kaamyaabi naheen mili, phir bhi Babul
ne Bipin se thoDe zyaada naam kamaaye. Babul ke sangeet nirdeshan
mein 40 Din aur Reshmi Rumaal filmon ke geet to aapne is kaaryakram
mein sune honge. aaj leejiye suniye Anjum Jaipuri ki rachna film Sara
Jahan Hamara se. Babul ke sangeet nirdeshan mein isey gaaya hai Suman
Kalyanpur ne.

-----------------------------------------------
Song: yeh phoolon ka gajraa (Sara Jahan hamara)
-----------------------------------------------

yun to sangeetkaar Hansraj Behl ne bahut saari filmon mein achchha
sangeet diya hai, lekin unka naam hamesha se kuchh kam hi charche
mein raha hai. Mohd Rafi aur Shamshad Begum ke gaaye yugal geeton ki
fehrist se jab ham guzarte hain to film Sawan ka ek geet zaroor zahan
mein aata hai, jise swarbaddha kiya tha Hansraj Behl ne. Shamshad
Begum ki khanakti aawaaz, Mohd Rafi ke manmohak andaaz, aur Prem
Dhawan ke dilkash bol, aur uske saath Hansraj Behl ka anooTha
sangeet, leejiye pesh-e-Khidmat hai.

------------------------------------------
Song: bheega bheega pyaar ka samaa (Sawan)
------------------------------------------

Mohd Rafi aur Shamshad Begum ke gaaye is yugal geet ke baad ab pesh
hai Mohd Rafi aur Mubarak Begum ki aawaazon mein ek yugal geet, jise
hamne chuna hai film Susheela se. geet likha hai Jan Nisar Akhtar ne
aur swarbaddha kiya hai sangeetkaar C Arjun ne. san 1963 mein
pradarshit huyi film Susheela sangeetkaar C Arjun ki pehli safaltam
filmon mein se thi. isi film mein Mohd Rafi aur Talat Mahmood ki
aawaazon mein ek geet tha "subah zaroor aayegi", jise sunkar
sangeetkaar Madan Mohan ne unhe mubaaraqbaad dee thi. yeh geet ham
aapko aaj ke is kaaryakram mein aage chalkar sunwaane ki zaroor
koshish karenge. baharhaal aaiye sunte hain isi film ka Rafi saahab
aur Mubaraq Begum ka gaaya yeh gaana.

-------------------------------------------------------
Song: bahut Khoobsoorat hai aankhen tumhaari (Susheela)
-------------------------------------------------------

Vividh Bharati par is waqt aap ne 'tune' kiya hai Suhana Safar
kaaryakram, aur aaj ke is kaaryakram ke pathik hain film jagat ke
kuchh kamcharchit sangeetkaar aur unki sumadhur sangeet rachnaayen.

--------------------------------------
Song: dekh lo aawaaz dekar (Prem Geet)
--------------------------------------

yeh thi jagjit Singh ke sangeet nirdeshan mein Anuradha Paudwal ka
gaaya Indeevar ka likha geet, film ka naam tha Prem Geet. ab aapko
sunwa rahe hain Damad film ka gaana Asha Bhosle ki aawaaz mein.
Yogesh ki rachnaa hai, Hemnat Bhosle ka sangeet. jee haan, Hemant
Bhosle Asha Bhosle ke beTe hain. Vividh Bharati ke ek kaaryakram mein
Asha-ji ne apne beTe ka zikr kiya tha. yeh geet sunne se pehle aaye
Asha-ji ki kahee huyi woh baaten sun lete hain:

Asha Bhosle speaks: Koi koi kshaN zindegi ke aise hote hain jo
bhulaaye naheen jaa sakte, baDe mazedaar hote hain. mera laDka
Hemant, aap samajhte honge maa ke liye beTa kya cheez hota hai, ek
din woh 'music director' ban gaya aur mere paas aakar kehne laga ki
yeh mera gaana hai, tum gaayo. kaisa lagta hai na? jo kal tak itna sa
tha, aaj woh mujhse keh raha hai ki mera gaana gaayo!

---------------------------------------------------
Song: jaage jaage nainon mein andekhe sapne (Damad)
---------------------------------------------------

Hemant Bhosle kuchh gine chune filmon mein sangeet de rahe the. lekin
unhe jald hi yeh ahsaas huya ki unhe apne film mein sangeetkaar lekar
unke zariye film nirmaata darasal unki maa aur baDi maasi tak
pahunchna chaahte the. yeh baat unhe pasand naheen aayi aur woh film
sangeet se door chale gaye. aur aaiye ab sunte hain aglaa geet.

-----------------------------------------------------------------
Song: bhaabhi teri bindiya ki le loon re balaiya (Do Boond Paani)
-----------------------------------------------------------------

Do Boond Paani, is film ka geet aap sun rahe the Laxmi Shankar aur
saathiyon ki aawaazon mein. Bal Kavi Bairagi ke bol the aur Jaidev ka
sangeet tha. jaisa ki pehle bhi kai kai baar is kaaryakram mein hamne
aapko Jaidev ki rachnaayen sunwaaee hain, aur har baar yeh zikr kiya
hai ki unke sangeet se aati hai hamaare desh ki miTTi ki saundhi
saundhi mahak aur yahaan ke lok sangeet aur shaastriya sangeet ki
miThaas. aur yahi baat ek baar phir se saabit huyi film Do Boond
Paani ke is gaane se. aisa hi ek aur man ko chhoo lenewaali rachana
hai film Gaman ka. Chhaya Ganguly ki aawaaz mein pesh-e-Khidmat hai
Makhdoom Mohiuddin ka likha film Gaman ka naGhmaa. zara mehsoos
keejiye is geet mein naayika ki virah vedanaa ko. kam se kam saazon
ka istemaal karke Jaidev ne is geet ki miThaas ko aur bhi baDhaa diya
hai kai gunaa.

--------------------------------------------
Song: aapki yaad aati rahi raat bhar (Gaman)
--------------------------------------------

Kishore Kumar ke sangeet nirdeshan mein yeh hai film Door Ka Rahi ka
ek bahut hi pyaara sa geet, jise Kishore Kumar aur saathiyon ne gaaya
hai. jeevan se haare huye aadmi ko pal bhar mein jeevan ke prati
aashaavaadi banaa dene mein qaableeyat rakhti hai yeh geet. jeevan
mein sukh aur dukh to lage hi rehte hain. dukh se ghabraakar haar
maan lenaa zindagi ka falsafaa naheen hai. isi baat ko ujaagar kiya
gaya hai is geet mein jise likha hai A Irshad ne. sunte kaaryakram ke
ant mein Kishore Kumar aur saathiyon ka gaaya film Door Ka Rahi ka
yeh jeevan se bhara geet.

-------------------------------------------------
Song: jeevan se na haar jeenewaale (Door Ka Rahi)
-------------------------------------------------

aur ab ham aa pahunche hai aaj ke Suhana Safar kaaryakram ke antim
gaane par. doston, is kaaryakram mein hamne aapse kahaa tha ki film
Susheela ka Talat Mahmood aur Mohd Rafi ka gaaya huya gaana ham
kaaryakram mein aage chalkar sunwaayenge. to leejiye C Arjun ke
sangeet nirdeshan mein geetkaar Jan Nisar Akhtar ki yeh rachnaa
suniye aaj ke Suhaane Safar ke antim geet ke roop mein.

------------------------------------
Song: subah zaroor aayegi (Susheela)
------------------------------------

THE END

JUBILEE JHANKAAR - Celebrating 50 Years of Vividh Bharati
---------------------------------------------------------

CINE YATRA KI GAWAAH - VIVIDH BHARATI
-------------------------------------

PART 7 (The 90s & After)
************************

lambe samay se safalta ki talaash mein bhaTak rahi sangeetkaar joDi
Nadeem Shravan ke liye 1990 ka saal behad bhaagyashaali saabit huya.
is saal Nadeem Shravan ke sangeet se sajee film Aashiqui pradarshit
huyi. yeh film apne samay ki bahut baDi 'hit' saabit huyi. har taraf
iske geet goonjne lage aur dekhte hi dekhte Nadeem Shravan ka naam
Aashiqui ke geeton ki tarah har zubaan par chaDh gaya.

------------------------------------------------------------
Clip: bas ek sanam chaahiye aashiqui ke liye (Aashiqui,1990)
------------------------------------------------------------

90 ke dashak mein ek baar phir se kai behad guNi fankaaron
ka 'cinema' ke kshetra mein aagaman huya. iske saath hi film nirmaaN
ke tareekon mein zabardast badlaav aa gaya. ek waqt tha jab lekhak
kahaani lekar nirmaataa ki khoj mein nikalta tha. kahaani sweekrit
hone ke baad nirdeshak ko khoja jaata tha. lekin 90 ka dashak aate
aate lekhak kahin peechhe chhooT gaya. yeh zimmeedari nirdeshak ne le
lee. kisi bhi nirdeshak ke paas achchhi kahaani ka hona zaroori ho
gaya. hamaari filmen desh ki seemaayen laanghkar videshi baazaaron
tak pahunch gayeen. nirmaataa ab videshon mein base bhaartiyon ko
dhyaan mein rakhkar filmen banaane lage. film nirmaaN ki laagat kai
gunaa baDh gayi. bhaarat ke gaaon bahut peechhe chhooTte chale gaye.
gaaon ki prishThbhoomi par 80 ke dashak mein bani thi film Nadiya Ke
Paar. 90 ke dashak mein bhaari bharkam laagat se bani chamakti
damakti film Hum Aapke Hain Koun. jee haan, Hum Aapke Hain Koun film
Nadiya Ke Paar ki hi 'remake' thi.

---------------------------------------------------------
Clip: didi tera devar deewaana (Hum Aapke Hain Koun,1994)
---------------------------------------------------------

Hindi cinema ke antarraashTriya hone ka faayda mila kshetriya cinema
ko. Hindi cinema se Gaayab huya apnaapan. miTTi se juDe bhaaratiyon
ko diya kshetriya cinema ne diya. swaabhaavik taur par kshetriya
cinema se uska juDaav baDhne lagaa. is dashak mein Shahrukh Khan
jaise abhinetaa, A R Rahman aur Ismail Darbar jaise guNee
sangeetkaar, aur Sanjay Leela Bhansali jaise utkrishT nideshak ko
Khaas pehchaan mili. durbhaagya se isi dashak mein 4 January 1994 ko
sangeetkaar Rahul Dev Burman hamaare beech naheen rahe. viDambanaa
dekhiye, unke nidhan ke baad pradarshit huyi film 1942 A Love Story,
aur is film ke liye Rahul Dev Burman ko sarvashreshTh sangeetkaar ka
Filmfare puraskaar haasil huya. is puraskaar ko lene ke liye woh
duniya mein zinda naheen the. is film ke geetkaar the Javed Akhtar.

---------------------------------
JAVED AKHTAR SPEAKS:

fauji bhaaiyon, aaj yeh 'programme' karte huye mujhe yaad aa raha hai
ki jab main 'college' mein paDhta tha, yahi 'programme' kitne shauk
se sunaa karta tha. aaj yeh 'programme' karte huye kitni puraani
yaaden mere paas aa gayi hain. yaadon ko to bahaana chaahiye hota hai
aane ka. kabhi geet banke aa jaate hain, kabhi dost banke aa jaate
hain, aur kabhi chiTThi banke.
----------------------------------

-------------------------------------
Clip: sandese aate hain (Border,1997)
-------------------------------------

1996 mein pradarshit huyi Sanjay Leela Bhansali ki pehli nirdeshit
film Khamoshi - The Musical. saaf suthri paTkathaa ke saath bani yeh
film darshakon par jaadoo naheen chalaa paayi. lekin 1999 mein bani
unki agli film Hum Dil De Chuke Sanam. is film ne safalta ke
saare 'records' dhwast kar deeye.

-----------------------------------------------------------
Clip: Dholi thaaro Dhol baaje (Hum Dil De Chuke Sanam,1999)
-----------------------------------------------------------

ek baar phir se saabit ho gayi ki aam darshak bhaartiya sanskriti ki
buniyaad par bani filmen dekhna pasand karti hai. Ismail Darbar ke
sangeet se sajee yeh film Hindi cinema ki safaltam filmon ki suchee
mein apna naam darj karaa chuki hai.

----------------------------------------------------------
Clip: ham dil de chuke sanam (Hum Dil De Chuke Sanam,1999)
----------------------------------------------------------

Cineyatra ki gawaah Vividh Bharati. Vividh Bharati ki swarnajayanti
ke silsile mein yeh hai June ki maheene ki vishesh peshkash. Shahrukh
Khan 1992 ki film Deewana se aandhi ki tarah aaye, aur dekhte hi
dekhte unhone samooche film udyog ko apni giraft mein le liya, aur
bahut jald woh kehlaane lage Bollywood Ka Baadshaah. Shahrukh Khan ki
is safalta ke peechhe nirmaata nirdeshak Yash Chopra ka bhi bahut
baDaa haath hai. unki filmen Darr, Dilwale Dulhaniya Le Jaayenge, Dil
To Paagal Hai, Mohabbatein, aur Veer Zaara ki safalta ne Bollywood Ka
Baadshaah ke tamuye par Shahrukh ke haq ko aur zyaada mazbootee dee.
film Dilwale Dulhaniya Le Jaayenge Mumbai ke Maratha Mandir 'cinema
hall' mein pichhle 12 saalon, yaani takreeban 625 hafton se lagaataar
dikhaayi jaa rahi hai. yeh apne aap mein ek 'record' hai.

------------------------------------------------
Clip: tujhe dekha to yeh jaana sanam (DDLJ,1993)
------------------------------------------------

-------------------------------
YASH CHOPRA SPEAKS:

waise to main apne man ki baat ane filmon mein keh deta hoon, lekin
aaj aap se milne ar baaten karne ka mauka mila hai. to filmi duniya
ki oonch neech aur kisse kahaaniyaan bataane ke bajaaye aapko yeh
bataana chaahoonga ki ab tak main filmon mein kya kya keh saka hoon
aur apni filmon ka zikr isliye karoonga kyunki har taraf se main inke
liye zimmedaar hoon.
-------------------------------

film Veer Zaara ko Madan Mohan ke sangeet bhi yaad rakhaa jaayega.
iske geeton ke liye Yash Chopra ne swargeeya sangeetkaar Madan Mohan
ke banaaye dhuno ka istemaal unke nidhan ke kareeb 30 varshon baad
kiya. Yash Chopra ka yeh prayog safal bhi raha.

------------------------------------------------
Clip: tere liye ham hain jeeye (Veer Zaara,2004)
------------------------------------------------

nayi sadi apne saath badlaav ki aisi aandhi le aayi ki cinema ka
chehra poori tarah se badal gaya. dashakon se chale aa rahe ek
pardewaale baDe baDe 'cinema hall' 'multiplexes' mein tabdeel ho
gaye. baDi baDi 'corporate' campaniyaan film nirmaaN ke kshetra mein
utar aayi. film udyog mein paison ki barsaat hone lagi. laakhon mein
bannewaali filmen ab karoDon mein banne lagi. filmon ke vishay bhi
bhaaratiya seemaayen laanghkar antarraashTriya hone lagi. aisi
vishayon par bani Dhoom, Koi Mil Gaya, aur Krishh jaisi filmon ko
darshakon ne behad pasand kiya.

-------------------------------------------
Clip: dil na liya dil na diya (Krishh,2006)
-------------------------------------------

lekin isi dashak mein ek naya prayog huya, woh yeh ki 50 ke dashak ki
Madhumati aur 70 ke dashak ki Karz ko milaakar usmein baaki tamaam
masaale Daale gaye aur is tarah paida huyi desi 'hit' film' Om
Shaanti Om. is film ko bhi darshakon ne haathon haath liya. yeh film
beete saal ki sabse baDi 'hit' rahi.

----------------------------------------
Clip: om shaanti om (Om Shaanti Om,2007)
----------------------------------------

agar ham Aamir Khan ki baat karen to unhe Mr Perfectionist kehna
zyaada behetar hoga. Yaadon Ki Baraat, Madhosh aur Holi jaisi filmon
mein abhinay ke baad 1988 mein pradarshit film Qayamat Se Qayamat Tak
mein woh pehli baar 'hero' bane. uske baad to Aamir film dar film
darshakon par apne abhinay pratibhaa ki chhaap chhoDte gaye. aur 1998
ki film Ghulaam mein unhone ek geet kya gaaya ki woh geet har gali
har chauraahe par bajne lagaa.

--------------------------------------
Clip: aati kya Khandala (Ghulaam,1998)
--------------------------------------

san 2001 mein Aamir ne Lagaan film ka nirmaaN kiya. paramparaagat
kahaani se haTkar graameeN prishThbhoomi par aadhaarit DheeTh desi
kism ki yeh film aashaateet roop se safal rahi.

-------------------------------------
Clip: mitwaa sun mitwaa (Lagaan,2001)
-------------------------------------

film Lagaan ke sangeetkaar the A R Rahman aur is film ke nirdeshak
the Ashutosh Govarikar.

----------------------------------
ASHUTOSH GOVARIKAR SPEAKS:

jab ham desh bhakti ki baat karte hain to use mehsoos karna
zyaada 'important' hai, woh mehsoos karne ka hai, na kisi ko sandesh
dene ka. mujhe sandesh dene ke door rehna tha, aur is tarah se mujhe
sandesh dete huye bhi ek mehsoos karaane ka jo 'feel' hai, woh main
koshish kar raha tha. to maine jo raasta apnaaya woh bahut
hi 'simple' tha, jitna 'satility' ho sake, utna karne ki koshish kee
is film mein, phir woh chaahe kahaani mein ho, chaahe paatron mein
ho, chaahe 'music' mein ho.
----------------------------------

------------------------------------------------------
Clip: ghanan ghanan ghir ghir aaye badra (Lagaan,2001)
------------------------------------------------------

Lagaan ki safalta ne saabit kar diya ki aam bhaaratiya darshak aaj
bhi bhaavnaayon ko varyataa deta hai, phir chaahe woh desh bhakti ka
jazbaa hi kyun na ho. Ashutosh Govarikar aur A R Rahman ki joDi ki ek
aur film thi Swades jisne samaalochakon ki bharpoor waah-waahi baTori
thi. is film ke naayak the Shahrukh Khan. is film ka sangeet bhi
Khaasa lokpriya huya tha.

---------------------------------------
Clip: yeh jo des hai tera (Swades,2004)
---------------------------------------

aur ab baat isi joDi ki haaliya behad mahatwakaanshi film Jodha Akbar
ki. aetihaasik filmon ki daur ko lauTaane mein is film ka bahut baDaa
yogdaan hai.

--------------------------------------------------
Clip: azeem-o-shaan shahanshaah (Jodha Akbar,2008)
--------------------------------------------------

is sadi mein filmi duniya ko ek behad zaheen nirdeshak mila, woh hain
apni filmon ke vishay aam zindegi se uThaane mein mashoor Madhur
Bhandarkar.

-----------------------------------
MADHUR BHANDARKAR SPEAKS:

kya hai ki aaj 'multiplex culture' jo aa chuka hai, itna mashoor ho
chuka hai 'all over India', ki chhoTe shehron mein bhi
aaj 'multiplex' hai, log filmen dekhna chaahte hain. jo
filmi 'theatre' them, woh bhi TooTke ab 'four theatre, five theatre'
ban chuke hain. to film aaj ek 'mall' ki tarah ban chuki hai ki aap
jaayo to har prakaar ki film aapko dekhne ko milti hai. kahin log
Bunty-Bubly bhi dekhna chaahte hain, kahin Iqbal bhi dekhna chaahte
hain. to kahin log Page 3 bhi dekhna chaahte hain to kahin log
Dus 'picture' bhi dekhna chaahte hain. to log hara tarah ki 'picture'-
en dekhan chaahte hain. to aap yeh naheen keh sakte ki log is tarah
ki 'picture'-en dekhna chaahte hain. haan yeh baat hai ki 'satellite'
aane se ek bahut baDaa 'change' huya hai, ghar mein baiThe TV
mein '40 channel' aapke haath mein hai, log chaahte hain ki alag alag
prakaar ka cinema dekhen, to har tarah ke 'filmmaker' ke liye jagah
hai yahaan pe.
------------------------------------

------------------------------------------------------
Clip: kitne ajeeb rishte hain yahaan pe (Page-3, 2005)
------------------------------------------------------

san 2001 mein 'bar girls' par film Chandni Bar banaakar unhone sabko
chaunkaa diya tha. uske baad Satta, Page-3, Traffic Signal, aur ab
aanewaali film Fashion. yaani ki Madhur Bhandarkar ki baini nazar se
samaaj ka koi bhi hissa bach naheen paaya hai. aaj ke daur ke zaheen
yuvaa nirdeshakon mein naam aata hai Nagesh Kukunoor ka. peshe se
rasaayan vugyaani rahe Nagesh Kukunoor America se apni achchhi Khaasi
naukri chhoDkar bhaarat aaye aur unhone banaayi film Hyderabad Blues.
uske baad Teen Deewaren, Dor aur Iqbal jaisi filmen banaakar nagesh
agraNi yuvaa nirdeshak ban chuke hain.

----------------------------------------
Clip: yeh hauslaa kaise jhuke (Dor,2006)
----------------------------------------

in zaheen nirdeshakon ke alaawa aaj cinema ke har ek vibhaag mein
aatmavishwaas se bhare fankaar kaaryarat hai, phir chaahe woh sangeet
ka hi kshetra kyun na ho! Shankar Ehsaan Loy, Shantanu Moitra, Vishal-
Shekhar, aur Pritam aaj ke vyastatam sangeetkaaron mein se hain.
zaraa dekhiye baandhgi. Pritam jahaan ek taraf "dhoom machaa le"
jaise gaane ki rachna karte hain, waheen doosri taraf mauka milte hi
bhaaratiya shaastriya sangeet ka istemaal karne se bhi naheen chookte.

----------------------------------------------
Clip: mere Dholnaa sun (Bhool Bhuulaiyya,2007)
----------------------------------------------

doston, aapne is meeThi aawaaz ko pehchaana? jee haan, yeh hain
Shreya Ghoshal. inki aawaaz ki miThaas aur gaayan Khud hi inka
parichay de deta hai. aaiye sunte hain kya kehna hai Shreya Ghoshal
ka.

--------------------------------
SHREYA GHOSHAL SPEAKS:

gaane ka shauk kis umra se shuru huya yeh to mujhe yaad naheen,
lekin 'mummy' kehti hai ki 4 saal ki umra se, jab se maine bolna
shuru kiya maine gaana shuru kiya. bahut 'high pitch' mein roti thi
aur sabke kaan kharaab kar deti thi. usi dauraan mummy paapa ne dekha
ki yeh achchha gaati hai, kyunki jab mummy riyaaz karti theen, mummy
achchha gaati hain, to main aaju baaju ghoomti rehti thi, to mummy
kehti thi ki 'beTaa yeh gaa', to main sahi sahi 'note' lagaa deti
thi, khelte khelte hi. lekin mummy papa ko lagaa ki ismein koi baat
hai, unko lagaa ki ismein 'potentials' hai to isko gaana seekhaayo.
jis jagah rehti thi wahaan itna 'scope' to naheen tha, main Rajasthan
mein palee baDhee, abhi to main Bombay mein, lekin pehle main
Rajasthan ke Kota shahar se 70 km door ek jagah thi Lal Bhata, wahaan
pe 'music' seekhne seekhaane ka itna 'atmosphere' naheen tha. to
wahaan pe maine kuchh din tak 'folk music' seekhaa, phir
mere 'school' ke 'music teacher' Bhatnagar sir ne 'classical music'
seekhaaya. phir main Kota shahar mein jaati thi seekhne ke liye, to
is tarah se seekhne ka silsila shuru huya.
---------------------------------

inhi dino ek aisa daur aaya jab desi kism ke filmi geet abne aur
Khoob baje, aur aaj bhi baDe chaav se sune jaa rahe hain.

-------------------------------------------------------
Clip: billo raani kaho to abhi jaan de doon (Goal,2008)
Clip: sajna ji vaari vaari (Honeymoon ravels Pvt Ltd,2006)
Clip: beeDee jalaile jigar se piya (Omkara,2006)
-------------------------------------------------------

inhi dino ek daur 'remake' ka bhi aaya. haal hi mein Don aur Sholay
jaisi lokpriya filmon ko naye kalebar mein phir se parde par utaarne
ki koshishen huyi. itna hi naheen in filmon ki mashoor geeton ko bhi
phir se 'record' karke in filmon mein istemaal kiya gaya. mool geet
to aap hamesha se sunte aaye hain, lekin ab zara 'remake' filmon ke
in 'remake' geeton par Gaur kar liya jaaye.

---------------------------------------------
Clip: yeh mera dil pyar ka deewana (Don,2006)
---------------------------------------------

aur aaiye ab ek sarsari nigaah Daal lee jaaye un geeton par jo in
dino KHoob baj rahe hain aur chaav se sune jaa rahe hain

-----------------------------------------------
Clip: pehli nazar mein kaisa jaadoo (Race,2008)
Clip: mauja hi mauja (Jab We Met,2007)
-----------------------------------------------

yeh thi Vividh Bharati ki swarNajayanti ke kaaryakramon ki shrinkhala
ki naveentam kaDee. aap jaante hi hain ki san 19031 mein film Alam
Ara ke saath shuru huyi cineyaatra, 77 saal baad aaj bhi ba-dastoor
jaari hai. Majrooh Sultanpuri ne sahee likhaa tha ki "main akela hi
chalaa tha jaanib-e-manzil magar, log saath aate gaye aur kaarwaan
banta gaya". is kaarwaan ke anginat musaafir hain aur inmein se kuchh
musaafiron ki charcha hamne is kaaryakram mein kee. 3 ghanTe mein
sabhi musaafiron ki charcha karna mumkin naheen tha. chalte chalte
aap se itna vaada karna chaahte hain ki Vividh Bharati is cineyaatra
ka aham hissa rahi hai aur hamesha rahegi. bas aapka saath aur aapki
shubhkaamnaayen Vividh Bharati ke saath isi tarah bani rahe, aameen!

chalne se pehle aapko itna bataa den ki is kaaryakram ki parikalpana
thi Mahendra Modi ki, saari jaankaariyaan juTaakar shodh aur aalekha
tayyaar kiya Shishir Krishna Sharma ne.

END OF PART 7

CONCEPT: MAHENDRA MODI
SCRIPT: SHIRSHIR KRISHNA SHARMA
NARRATION: KAMAL SHARMA, RENU BANSAL, YUNUS KHAN, KIRAN GWALANI

THE END

Music Director Ismail Darbar congratulates VB on Golden Jubilee

Download from Files/Audio Files/VB's Golden Jubilee Celebrations.
Happy listening!!!...

Sujoy

Interview of GULZAR
-------------------

Re-broadcast on 23 Aug 2008 under SWARNA SMRITI series
------------------------------------------------------

GZ: Gulzar
AS: Anuradha Sharma


AS: Gulzar saahab, namaskaar!

GZ: namaste

AS: Gulzar saagab, aap, yeh sabhi jaante hain ki aap filmi duniya ke
jaane maane geetkaar, lekhak, nirdeshak, nirmaata to hain hi, main
yeh jaanne ke liye utsuk hoon ki aap ne 'acting' aur gaayan ka
kshetra kyun chhoD diya?

GZ: baaki jitne kaam kar raha hoon, usi se log kaafi pareshaan hain,
to koi mere 'dialogues' se pareshaan hai, to koi mere 'direction' se
pareshaan hai, unki pareshaani aur naheen baDhaana chaahta.

AS: naheen, unmein to aap mahaarath haasil kar chuke hain

GZ: meherbaani aapki ki aap itni hauslaa afzaai karte hain. yeh jo do
kaam hai 'acting' aur gaane ki, aisa naheen ki yahi do kaam reh gaye
hain, aur bhi kaam hain jaise 'camera'

AS: main Khaas kaamo ka naam liya hai

GZ: aur bhi bahut saare kaam hain, shaayad aapko inmein zyaada
dilchaspi ho, yaa aap mujhe inmein dekhna chaahti hon

AS: jee haan

GZ: aur 'acting' main zaroor karta hoon, lekin 'camera' ke saamne
naheen. main jab 'script' likhta hoon to 'script' likhte huye
har 'character' ki 'movement' ko samajhke, uske jazbaat se, uske
andar jo mehsoos hota hai usko samajhke usmein se guzarna paDtaa hai,
aur 'script' likhte huye hamesha yeh mehsoos kiya hai ki main
poore 'scene' se guzarta hoon, agar usmein chaar 'characters' hain to
un chaaron ke andar se hoke guzarta hoon. mujhe 'camera' ke
saamne 'medium' banke naheen aana paDtaa. to main sabki 'acting' kar
chuka hoon. aur isiliye 'direction' karte huye main har 'actor,
actress' ko bataa sakta hoon ki kahaan par mujhe kaun si 'movement'
ki zaroorat hai, kya karna hai. to us 'character' se guzarta hoon
main Khud pehle. to ek nashaa, yeh to bahut chhoTaa nashaa hai, main
bahut baDe nashewaala aadmi hoon. 'direction' bahut baDaa nashaa hai.

AS: to aap 'acting' ko 'direction' se kam maante hain?

GZ: jee haan, yaani chhoTaa nashaa hai, main isey kam naheen maantaa,
nashaa chhoTaa hai.

AS: to 'acting' kabhi aapne rangmanch mein kiya hai? kabhi 'stage' se
aapka taalluqaat naheen raha? kabhi 'acting' naheen kee?

GZ: naheen, 'acting' kee hai waise, woh bhi majbooran kee hai, kabhi
chanda jamaa karne ke liye kee hai, IPTA ke zamaane mein 'plays' mein
kaam kiya hai, isliye ki chanda jamaa karne ke liye, isliye naheen
ki 'actor' banna hai. ek aadh filmon mein 'acting' kar chuka hoon,
jaise Basu ki filmon mein, saari duniya jaanegi ki unhone 'lunch' ke
liye bulaaya aur 'acting' karwa liya, muft mein 'lunch' naheen
khilaaya.

AS: aur jahaan tak 'singing' ka sawaal hai...

GZ: dekhiye main bahut besuraa hoon, bahut hi besuraa hoon

AS: yeh to aap Taalnewaali baat keh rahe hain taaki ham aapse yeh na
keh den ki aap apna ek geet gungunaaiye.

GZ: naheen Anuradha-ji, aisa naheen hai, main isiliye kamalm thaamaa
hai ki jo sur gale se naheen nikal sakti woh haath se nikal jaaye.

AS: achchha Gulzar-ji, yeh bataaiye ki aap geetkaar bhi hain aur
lekhak bhi hain. to aapne pehle kaun sa kaam shuru kiya, yaani geet
lekhan shuru kiya yaa lekhak ke roop mein shuru kiya tha?

GZ: main ek geet lekar is 'film industry' mein daaKhil huya
tha, "mora gora ang lai le, mohe shyaam rang dai de", jee haan, is
geet se saath shaamil huya tha is 'film industry' mein, Bimal-da ki
film mein.

AS: Bandini

GZ: jee haan, Bandini ka gaana tha, Bimal-da ke yahaan is film ke
gaane likhne jaa rahe the, uske liye meer dost Debu Sen woh le gaye
the Bimal-da ke paas. Sachin-da ke liye yeh pehla gaana likha tha.
aur uske saath hi 'film industry' mein daKhil ho gaya.

-------------------------------------
Song: mora goraa ang lei le (Bandini)
-------------------------------------

AS: aur shaayri usse pehle bhi karte the?

GZ: jee haan, yeh maine filmon ki baat kee. shaayri to chal hi rahi
thi. ab bhi, balki, is qadar shaayri ke baGair to Khair saans  naheen
aati. jitne bhi 'prose' likhoon, jitne bhi nazar likhoon, sher zaroor
kehta hoon, aur filmon mein bhi koshish karta hoon ki jahaan pe log
gaano se parhez karke guzar haate hain, main koshish karta hoon ki
gaane zaroor likhoon. aur aksar 'actress' ko shaayar banaa  dete
hain, baDaa mazaa aata hai, lekin ek hi tarah se shaayar naheen, aap
ne meri filmon mein shaayar ka 'character' zaroor dekha hogaa, aur
har dafaa ek alag kism ka shaayar hai, to woh ek aur saath mein mera
peshaa hai ki shaayron ko pehchaante raho, khojte raho, DhoonDte
raho. pichhli film Namkeen mein, agar aapko yaad ho to ek goongee ko
shaayar banaaya hai maine, Mitthu us 'character' ka naam hai, Shabana
ne woh 'role' kiya hai, aur woh bol naheen paati, goongee hai, lekin
shaayri likhti hain.

-------------------------------------------
Song: phir se aaiyo badraa bidesi (Namkeen)
-------------------------------------------

GZ: ek to shaayar 'romance' karta hai, main shaayron ke
saath 'romance' karta hoon.

AS: (laughs) Gulzar saahab, aap Hindi aur Urdu mein to likhte hain.
aur bhi kisi zubaan mein likhte hain?

GZ: baaqaayda naheen likha, lekin 52-53 ka jo 'period' hai, aur IPTA
mein aur PSS ki 'meetings' mein, yaani Punjabi Sahitya Sabha, to us
zamaane mein Punjabi mein nazmen likhee, kavitaayen likhee. phir
bangaali mein, zabardasti kisi ne, koshish kee thi,
lekin 'professionally' naheen.

AS: achchha, aap doosron ki filmon mein naheen likhte?

GZ: ab doosre log mujhe mauka naheen dete, aur main shaayri kahe
baGair kaise baaz aa jaayun!

AS: (laughs) bahut Khoob! achchha Gulzar saahab, yeh bataaiye ki,
lekhak ke baare mein kuchh charcha ho jaaye, geetkaar ke baare mein
to hamne jaan liya. to yeh bataaiye ki ek achchha lekhak banne ke
liye aap logon ko kya jaankaari dena chaahenge?

GZ: dekhiye, achchha 'writer' kaise banaa jaata hai yeh kehna to
baDaa mushkil hai, baDaa mushkil hai bataana, yeh 'formula' haath lag
gaya hota to main achchha 'writer' ban gaya hota.

AS: (laughs) jo ki aap hain, isiliye ham jaanna chaahte hain ki...

GZ: main itna kehna chaahoonga ki filmon mein likhne ke liye film
ka 'medium' jaanna zaroori hai, yahaan 'radio' par likhne ke
liye 'radio' ka 'medium' jaanna zaroori hai, aur 'stage' par likhne
ke liye 'stage' ka 'medium' jaanna zaroori hai. to 'on the whole'
achchha 'writer' banne ke liye aapke apne ahsaasaat hain, aur
usko 'extract' karne ke liye aapki zabaan, ki kahaan tak aapko
zabaan  aati hai aur kahaan tak haath chalaana aap jaante hain. uske
liye zabaan ka jaanna bahut zaroori hai. filmon ke liye do teen
cheezen zaroori hai, jismein se 'screenplay' bahut zaroori
hai. 'screenplay', sach kahiye to 'screenplay' hi 'direction'
hai, 'director' ki pehli 'stage' bhi 'screenplay' hi se shuru hoti
hai, ki woh film ko kis tarah se pesh karta hai. aur woh tabhi jaana
jaa sakta hai jab aane film ka 'medium' seekh liya ho. agar film
ki 'medium' ko na jaante hon, film ki jo 'technical requirements'
hain unhe na jaante hon, to 'screenplay' likhna mushkil hai. aap soch
sakte hain lekin likhna mushkil hai. mujhe mehsoos hota hai ki
kahaani sunaana, jaise ki hamaari daadi naani sunaati hai, 'that is
the simplest form of screenplay'. kyunki naani jab kahaani sunaati
hain to hansi mazaak mein, thapkiyaan deti huyi sunaati hain to
woh 'dramatize' karti hain. har 'sequence' ko kis tarah
se 'dramatize' karna hai yeh woh jaanti hain. jab aap beech mein
unghte hain to phir se woh Daraa deti hain, buDDha aayega, falaana
aayegaa, film mein baDi hoshiyaari se aapko dekhna paDtaa hai ki
yahaan jamhaai lee aapne ki udhar darwaaze ke peechhe se do laashen
giri.

AS: bahut achchha bataaya aapne. aur uske baad 'dialogues'?

GZ: achchhe 'dialogues' ke liye apni apni sharte hain, apne apne
mizaaj hain, mujhe 'dialogues' woh achchhe lagte hain jo 'dialogues'
na lage. matlab, 'author' ki apni 'personality', uske
Khayaalaat 'character' ki 'personality' par 'reflect' naheen honi
chaahiye mera yeh Khayaal hai. main ek 'motor garage' mein kaam kiya
karta tha kisi zamaane mein. bahut pehle ki baat hai yeh. aur ek
chhoTa sa aadmi tha, chhoTe kad waala, aur ek bahut baDe, oonche
kadwaale 'mechanic' ke saath jhagDaa kar liya. aur gaali galoch,
jaisa 'motor garage' mein hota hai, aur woh baDaa waala us chhoTe se
aadmi ko maar naheen paa raha tha kyunki bahut chhoTaa aur buzurg
tha. to kya maarenge, usko bhagaa diya wahaan se, DaanT ke bhagaa
diya aur kahaa ki "jugnu sasura samjhta hai ki usi ki roshni se subah
hoti hai", ab yeh jumla sirf usi 'character' ke zubaan se nikal sakti
hai, ismein 'author' ki 'personality reflect' naheen karta. isliye
main isey bahut Khoobsoorat 'dialogue' samajhta hoon. to jo
bhi 'dialogue' hai woh us 'character' ko 'reflect' karna chaahiye,
us 'character' hi ke munh se nikalta huya lagna chaahiye. aur bahut
kam hota hai ki 'real life' mein koi 'draamtic style' mein bolta
ho. 'I think' zyaadaatar 'situations' par woh 'dialogues' Kharaab
hote hain jinpe taaliyaan paDti hain, kyunki woh 'character' ke
naheen hote hain.

AS: jee haan, kyunki woh 'dramatic' zyaada ho jaati hain.

GZ: kyunki jab tak woh 'character' se nikla na lage to woh achchha na
lage, aur aise aap ko roz-marra ki zindagi mein kitne log milte hain
jisne baat kee aur aap ne taali bajaaee? aisa o naheen hotaa.

THE END

CHHAYA GEET - GUZRE ZAMAANE KE ANMOL NAGHMEN
--------------------------------------------

Presenter: Yunus Khan
---------------------

Chhaya Geet sunnewaale sabhi ko Yunus Khan ka namaskaar. Chhaya Geet
mein jab bhi aapki aur meri mulaaqaat hoti hai, main aap ke liye
lekar aata hoon guzre zamaane ke kuchh anmol naGmen. aur aaj ke is
kaaryakram mein jo naGmen main aap ke liye lekar aaya hoon, unmein se
kuchh ki baDi hi anmol kahaani hai. ab jaise Ragini film ke is gaane
ko le leejiye. isey Mohd Rafi ne gaaya hai. Jan Nisar Akhat ne likha
hai aur O P Nayyar ne swarbaddha kiya hai. is gaane ki sabse dilchasp
baat yeh hai ki is gaane ka filmaankan Kishore Kumar par kiya gaya
hai. aur jab yeh film ban rahi thi, to 'producer' Ashok Kumar ke
paas, yaani apne baDe bhaai ke paas Kishore Kumar pahunche aur unhone
kahaa ki O P Nayyar, jo ki is film ke sangeetkaar the, woh yeh gaana
unse naheen gawaa rahe hain jab ki gaane ka filmaankan unhi par hona
hai. to 'producer' aur jaanemaane abhinetaa Ashok Kumar ne apne
chhoTe bhaai se kahaa ki sangeetkaar ke kaam mein woh daKhalandaazi
naheen karnewaale. isliye behetar yahi hogaa ki sangeetkaar ko apna
kaam karne diya jaaye. is tarah se ek aisa gaana hamein milaa jo
filmaaya to Kishore Kumar par gaya lekin gaaya Mohd Rafi ne hai. is
gaane ko sunwaane se pehle aap ko yeh bhi bataa den ki aisi hi ek aur
film aayi thi Shararat jismein ek gaana tha "ajab hai daastaan teri
yeh zindagi", yeh gaana bhi Kishore Kumar par filmaaya gaya tha lekin
isey Mohd Rafi ne gaaya tha. film Shararat ke sangeetkaar Shankar
Jaikishan the. aaiye O P Nayyar ka sangeetbaddha kiya huya Ragini
film ka yeh gaana sunte hain...

Song: man mora baawraa (Ragini)

san 1965 mein ek film aayi thi jiska naam tha Namasteji. is film ke
nirdeshak Daljeet Krishna the, Anjaan ne iske bol likhe the aur
sangeet G S Kohli ka tha. is film mein kuchh baDe hi madhur geet the.
inmein se ek gaana maine aap ke liye chunaa hai, jise Lata Mangeshkar
aur Mukesh ne gaaya hai. zaraa is gaane ki madhurta ka ahsaas to
keejiye. aap ko yeh zaroor lagegaa ki yeh gaana bahut zyaada mashoor
kyun naheen huya!

Song: mere do naina matwaare kiske liye (Namasteji)

Minerva Movietone ne Sohrab Modi ke nirdeshan mein Mirza Ghalib film
ka nirmaaN kiya tha. film Mirza GHalib kai maaeeno mein mahatwapoorNa
hai. ismein Bharat Bhushan ne Ghalib ka kirdaar nibhaaya tha, aur
Ghalib ki premeeka ka kirdaar, yaani Chaudhveen ka kirdaar nibhaaya
tha Suraiyya ne. Suraiyya ne is film ke kuchh behetareen gaane gaaye
hain. iske alaawa is film mein Talat Mahmood aur Mohd Rafi ke alaawaa
Shamshad Begum aur Sudha Malhotra ki bhi aawaazen hain. lekin Mohd
Rafi ki aawaaz waala is film ka ek gaana main aap ke liye lekar aaya
hoon, jo apni junoon mein, apni raftarr mein, aur apni asar mein
baaki saare gaano par bhaari paDtaa hai. Mohd Rafi ki aawaaz mein
kalaam-e-Mirza Ghalib, sangeetkaar Ghulam Mohammed. suniye...

Song: karte hain mohabbat to guzarta hai gumaan aur (Mirza Ghalib)

guzre zamaane ke anmol naGmen aap sun rahe hain apne dost Yunus Khan
ke sang Chhaya Geet mein. ab jo geet aapko sunwaane jaa rahe hain,
yeh Madhu film ka geet hai jise bahut yaad kiya jaata hai iske
achchhe sangeet ke liye. Maya Arts ki 'banner' taley 1959 mein yeh
film aayi thi. iske nirdeshak the Gyan Mukherjee aur S Banerjee. yeh
gaana jo aap ke liye main Khaas-taur par lekar aaya hoon, isey Lata
Mangeshkar ne gaaya hai, Naqsh Lyallpuri ne likha hai, Roshan ki tarz
hai. "dhaani chunar", is gaane ka lutf uThaaiye.

Song: dhaani chunar mori haaye re jaane kahaan uDi jaaye re (Madhu)

baat san 1959 ki hai. N K Productions mein Inder ke nirdeshan mein ek
film aayi thi Mr John. Mr John ka sangeet N Dutta ne tayyaar kiya
tha. iske gaane Jan Nisar Akhtar ne likhe the. Mr John ka sangeet
bahut hi lokpriya huya tha. aayiye is film ka ek gaana sunte hain,
jise Lata Mangeshkar ne gaaya hai. yeh gaana aapke man ki vaadiyon
mein lambe samay tak goonjaa karegaa.

Song: o mere bichhDe balam tune kaisa diya Gham (Mr John)

doston, san 1965 mein Aspi ke nirdeshan mein banee Basant Pictures ki
film Nishan ko ham is gaane ko ham is gaane ke liye yaad karte hain...

Clip: haaye tabassum tera (Nishan)

Javed Anwar ne is film ke gaane likhe the, aur Usha Khanna ki tarz
thi, aur Khud Usha Khanna ne is film ka ek baDaa pyaara sa gaana
gaaya tha. yeh gaana aaj aap ke liye Chhaya Geet mein, kyunki guzre
zamaane ke anmol naGmen aap ka yeh dost Yunus Khan baDi koshishon ke
baad aap ke liye DhoonDkar laata hai. is gaane mein Usha Khanna ki
aawaaz mein aap ko thoDaa thoDaa Kamal Barot ka puT nazar aayegaa.
suniye yeh gaana...

Song: ae jaanewafaa maine dil rakh diya (Nishan)

guzre zamaane ke anmol naGmen aap sun rahe the apne dost Yunus Khan
ke sang. aaj ka silsilaa yaheen Khatm karte hain, agli baar jab
mulaaqaat hogi, to aap ka yeh dost aap ke liye phir le aayegaa kuchh
ansuni, bhoole bisre aur anmol naGmen.

THE END

Singer Abhijeet congratulates VB on Golden Jubilee

Download from Files/Audio Files/VB's Golden Jubilee Celebrations.

Happy listening!!!...

Sujoy

Hi,

Below is the link that lists all recordings that AIR has put on sale.

http://allindiaradio.org/Akashvanisangeet/akashvani-sangeet-02062008.pdf

Music lovers may buy these cassettes/ CDs from appropriate counters.
For more details, see information given in the following link.

http://allindiaradio.org/Akashvanisangeet/releases1.html

Regards
Sujoy Chatterjee