This is to inform you I will appear on Radio Farishta channel of
WorldSpace (http://www.worldspace.in) at 11 pm on Sunday, November 16.
I will talk about some songs I have selected, and play them. The
programme will be aired again from 2 pm on Friday, November 21.
Please tune in if possible.
Thanks
Shirish Koyal

Hi all,

Hope you have already started tuning into the new VB program
called 'SMS KE BAHAANE VBS KE TARAANE'. Yes, now u can SMS your
favourite song everyday between 12 & 12:50 pm and listen to them
instantly.

Type VBS<space>film name<space>song name<space>your name<space> place

and send it to 5676744.

Names of 12 films are given at the beginning of the program and u have
to select your song from the list only!

Happy Listening!

Sujoy

hi friends,
every one in this cummunity knows soojoi. his contribution is
unmatched. with his and mr. mahenra ji's permission i translate his
bupendra singh interview in roman along with the songs braodcasted on
the show, kindly have a look and if u guys like this effert we can
continue to do his other works in ths fashion.

http://podcast.hindyugm.com/2008/11/inse-milie-singer-bhupendra.html

thanks

VBLC SANGEET KE SITAARE
-----------------------

EPISODE 2: KAMAL BAROT
----------------------

namaskaar! VBLC Sangeet Ke Sitaare ki doosri kaDee mein aapka bahut
bahut swaagat hai. is shringKhalaa ki rawaayat hai ki ham ismein aise
fankaaron ki sur yaatra par roshni Daalte hain jo apne sangeet safar
ke dauraan bahut zyaada charchit naheen rahe. baawjood iske in
fankaaron ne film sangeet sansaar mein apna anooThaa chhaap chhoDaa
hai. aaj is kaaryakram mein zikr ek anokhi paarshwa-gaayika ki. miTTi
ki sondhi sondhi Khushboo jaisi aawaaz-waali yeh hain Kamal Barot.

-----------------------------------------------
Song: kahiye janaab kaisa haal hai (Gangu Dada)
-----------------------------------------------

Kamal Barot speaks: sabhi ko Kamal Barot ka namashkaar. ek kalaakaar
ke naate mujhe is baat ki bahut Khushi hai ki aaj aapki sevaa mein
yeh 'programme' pesh karne ka mauka mila hai. hamaare gaaye geet
aapki tanhaaiyon mein rang bharte hain, aapke udaas honThon ko
gungunaahaT dete hain, aur kuchh der ke liye aapko ek aisi duniya
mein le jaate hain jahaan aap apne aap ko bhool jaate hain. to aaj
bhi is 'programme' ko sunte huye mujhe poori ummeed hai ki aap apne
saare Ghamon ko bhool kar kuchh lamhe Khushi ke saath beetaayenge.

---------------------------------------------
Song: bijli hai mere paaon mein (Rocket Girl)
---------------------------------------------

Kamal Barot ne us daur mein film sangeet jagat mein kadam rakhaa jab
duniya bas do aawaazon ki deewaani bani huyi thi. yeh do aawaazen
theen Lata Mangeshkar aur Asha Bhosle ki. aise mein kisi nayi gaayika
ke liye yahaan par jagah banaana behad mushkil tha aur na hi har kisi
ke bas ki baat thi. Sudha Malhotra, Suman Kalyanpur, Sharda, Minu
Purushottam, Usha Mangeshkar, Mubaraq Begum ke saath saath Kamal
Barot ne bhi gaana shuru to kiya, lekin in gaayikaaon ko
baDe 'banners' ki filmon mein gaane ke mauke zyaada naheen mile. aur
agar mile to yugal aur samooh geeton mein bataur doosri gaayika ke
roop mein gaane ka mauka milaa. in saari kaThinaaiyon ko sweekaar
kiya Kamal Barot ne aur jab jaise gaane unki jholee mein aaye, woh
gaati chalee gayeen. unke gaaye ekal geeton mein bhi kai geet behad
lokapriya huye. aisa hi ek behetareen naGmaa aapki Khidmat mein
yahaan prastut hai.

-----------------------------------------
Song: aaj hamko hansaaye na koi (Badshah)
-----------------------------------------

ullekhniya baat yeh hai ki Kamal Barot ko pehli baar gaane ka mauka
Lata-ji ki sifaarish se hi milaa tha. yehi baat bataa rahi hain Khud
Kamal-ji:

Kamal Barot speaks: zindagi ki tez dhoop mein sangeet ki chhaiya mil
jaaye to kehna hi kya. maine sangeet ki duniya mein pehli baar kadam
rakha jab Lata-ji ne Kalyanji bhaai se meri sureelee sifaarish kee.
unhone kahaa 'aap Kamal se gaana kyun naheen gawaa lete hain!' asal
mein woh gaana Lata didi gaanewaali theen, par woh jaa rahi theen
Kolhapur aur gaana mil gaya mujhe. woh gaana tha "dil leke jaate ho
kahaan".

suniye Kamal Barot aur Subir Sen ka gaaya huya Indeevar ka likha aur
Kalyanji Anandji ka sangeetbaddha kiya O Tera Kya Kehna film ka yeh
gaana.

-------------------------------------------------
Song: dil leke jaate ho kahaan (O Tera Kya Kehna)
-------------------------------------------------

Kamal Barot ne doosri gaayika ke roop mein asankhya yugal geet aur
qawwaaliyaan gaayee hain jinmein se kai behad kaamyaab rahi hain.
aayiye ab kuchh aise hi geeton ki charcha karen. san 1961 mein ek
film aayi thi Gharana, jismein Kamal Barot ne Asha Bhosle ke saath
apni aawaaz milaayi thi bachchonwaale is gaane mein, jo us saal Ameen
Sayani dwaara prastut vaarshik Geet Mala ke 26-ve paaydaan par raha.
yeh geet sunkar aap bhi apne bachpan ke dino mein kho jaayenge, zaraa
suniye to...

------------------------------------------------
Song: daadi amma daadi amma maan jaayo (Gharana)
------------------------------------------------

Kamal Barot speaks: dil leke jaanewaalon mein, yaani apni geeton se
dil churaanewaalon mein shaamil hain Asha Bhosle. apni tarah ki ek
aisi anooThi aawaaz jis par waqt ka koi asar naheen ho paaya. Ashaji
ki aawaaz ke saath ham sab ka yeh kambaKht ishq aisa hai jo saal dar
saal parwaan hi chaDhta raha hai. shoKhi, sharaarat, maadakta, saare
guN simTe huye hain is aawaaz mein. aur mujhe to isliye yeh aawaaz
bahut pasand hai kyunki ham dono hamKhayaal hain, aur saheliyaan bhi
hain.

Asha Bhosle ke saath Kamal Barot ne aage chalkar bahut saari filmon
mein gaane gaaye, jinmein se kuchh ke naam hain Teen Bahuraniyan,
Awara Badal, Do Dushman, Dilli Ka Dada, Yaari Zindabad, Balram Shri
Krishna, Shankar Seeta Anusuya, Shamsheer, Jahan Sati Wahan Bhagwan,
Jantar Mantar, Shri Ram Bharat Milap, Shrimanji, Raaka, Sher Khan,
Watan Se Door, Sab Ka Ustad, Maya Jaal, Nasihat, Maharani Padmini,
Killers, aur Humjoli.

---------------------------
Song: hu tu tu tu (Humjoli)
---------------------------

jaisa ki Kamal Barot ne Khud kahaa hai ki unhe sabse pehle film ke
liye gaane ka mauka Lata Mangeshkar ne hi dilwaaya tha film O Tera
Kya Kehna Mein. yeh film pradarshit huyi thi san 1959 mein. isi saal
Kalyanji Anandji ke sangeet nirdeshan mein ek aur film aayi thi
Madari, jiska sangeet Khoob Khoob chalaa tha. is film mein Kamal
Barot ko Lata Mangeshkar ke saath ek yugal geet gaane ka mauka milaa.
sunte hain wohi geet lok sangeet ki meeThee chaashni mein Dooba huya
yeh gaana

----------------------------------------
Song: akeli mohe chhoD na jaana (Madari)
----------------------------------------

lekin Lata Mangeshkar ke saath gaaye Kamal Barot ke jis gaane ne
itihaas rachaa woh thi Laxmikant Pyarelal ki pehli 'hit' film
Parasmani ka. 1962 mein bani is film ka yeh gaana aaj bhi film
sangeet ke sabse zyaada lokapriya 'female duet' geeton mein shaamil
kiya jaata hai. "hansta huya nooraani chehre" waale is geet ne Ameen
sayani ke vaarshik Geet Mala mein '6th position' praapt kiya tha.

---------------------------------------------
Song: hansta huya nooraani chehra (Parasmani)
---------------------------------------------

is waqt aap sun rahe hain VBLC Sangeet Ke Sitaare aur aaj is
kaaryakram mein aap sun rahe hain guzre daur ki paarshwa-gaayika
Kamal Barot ke gaaye huye gaane.

---------------------------------------------------
Song: garjat barsat saawan aayo re (Barsat Ki Raat)
---------------------------------------------------

Roshan ke sangeet mein raag gaur malhaar par aadhaarit Kamal Barot
aur Suman Kalyanpur ka gaaya film Barsat Ki Raat ke is gaane ka
shumaar aaj bhi shaastriya sangeet par aadhaarit baarish ke lokapriya
aur oochcha koTi ke geeton mein hota hai. yeh geet Kamal Barot ke
sangeet safar ki ek yaadgaar geet rahi hai jiske ullekh ke bina yeh
kaaryakram adhuraa hi reh jaata. aur ab aaiye jaldi jaldi jhalkiyaan
sun lete hain kuchh aur aise yugal geeton ki jinhe amal barot ne
doosri gaayikaaon ke saath milkar gaaya hai. yeh hai Shamshad Begum
ke saath gaaya film Ek Din Ka Badshah ka gaana...

-------------------------------------------------------------
Clip: allaah teri aahon mein itna asar de (Ek Din Ka Badshah)
-------------------------------------------------------------

yeh hain Mubaraq Begum Kamal Barot ke saath film Hum Ek Hain mein...

------------------------------------------------
Clip: matwaare saanwariya ke naina (Hum Ek Hain)
------------------------------------------------

Minu Purushottam aur Kamal Barot ki aawaaz mein Kala Chashma film ka
geet...

-----------------------------------------------------
Clip: aankhon mein koi yaadon mein koi (Kala Chashma)
-----------------------------------------------------

Madan Mohan ke sangeet mein yeh hai Krishna Kalle ke saath film
Naunihal ka gaana...

------------------------------------------------
Clip: chhutti aa gayi dhol bajaayenge (Naunihal)
------------------------------------------------

film Bada Aadmi mein Kamal Barot ne saath diya hai Usha Mangeshkar
ka...

--------------------------------------------------------
Clip: hamen yeh duniyawaale pyaar ka ilzaam (Bada Aadmi)
--------------------------------------------------------

Usha Timothy aur Kamal Barot, film Sati Nari...

----------------------------------------------------
Clip: jaiyo na jamna pe akeli tum raadha (Sati Nari)
----------------------------------------------------

Asha Bhosle aur Usha Mangeshkar ke saath gaaya film Ankhen ka yeh
gaana behad lokapriya huya tha...

-------------------------------------------
Clip: luT jaa luT jaa yehi din hai (Ankhen)
-------------------------------------------

gaayakon ki baat karen to Kamal Barot aur Mahendra Kapoor ki joDee ne
bahut saare geet ek saath gaaye hain. chand filmon ke naam ginaayen
aapko? yeh kuchh filmen hain Khooni Khazana, Patthar Ka khwab,
Bankelal, Rustom-e-Rome, Ram Leela, Apna Ghar Apni Kahani, Sunehra
Jaal, Teen Sardar, Jadui Angoothi, aur Sangeet Samrat Tansen. sunte
hain Shailendra ka likha aur S N Tripathi ka swarbaddha kiya Sangeet
Samrat tansen film ka yeh gaana jo aadhaarit hai raag jogiya par.

-----------------------------------------------------------
Song: he naTraaj gangaadhar shambhu (Sangeet Samrat Tansen)
-----------------------------------------------------------

Mohd Rafi ke saath film Umar Qaid mein Kamal Barot ne gaaya tha
yeh 'duet' geet...

-------------------------------------------------
Clip: bambai puraani kalkatta puraana (Umar Qaid)
-------------------------------------------------

bahut hi anokhaa 'combination', Kishore Kumar aur Kamal Barot, film
Baghi Shahzada mein sangeetkaar Bipin Babul ne in dono ko ek saath
gawaaya tha...

----------------------------------------------
Clip: yeh nazaara mohabbat ka (Baghi Shahzada)
----------------------------------------------

Bipin Babul ki tarah ek aur kamcharchit sangeet the Robin Banerjee,
jinke liye Kamal Barot ne kai filmon mein geet gaaye, jo
zyaadatar 'stunt' filmen theen. aisi hi ek film thi Tarzan And King
Kong, jismen Robin Banerjee aur Kamal Barot ka gaaya ek yugal geet
bhi tha...

----------------------------------------------
Clip: monni idhar to aa (Tarzan And King Kong)
----------------------------------------------

ab tak hamne jitne filmon ka zikr kiya hai aur gaane sunwaaye hain,
aapko shaayad is baat ka andaazaa laga hoga ki Kamal Barot ne
zyaadaatar 'stunt' filmon aur dhaarmik filmon mein paarshwa-gaayan
karne ke mauke mile hain. aur yahi wajah hai ki unki zyaada charcha
naheen huyi. lekin unhe baDe baDe sangeetkaaron ke nirdeshan mein
gaane ke mauke mile hain jinmen shaamil hai Roshan, Kalyanji Anandji,
Laxmikant Pyarelal, Usha Khanna, Ravi, aur O P Nayyar jaise
sangeetkaar.

----------------------------------------
Song: dhaDka to hoga dil jigar (CID 909)
----------------------------------------

to doston, Kamal Barot ke gaaye geeton ki yeh maalaa kaisi algi
aapko? hamein ummeed hai ki in bhoole bisre geeton ko bahut dino ke
baad sunkar aap un puraane dino mein kho gaye honge! chalte chalte
ek ullekhniya baat aapko bataa den ki Kamal Barot ke bhaai Chandra
Barot ne hi 1978 ki 'blockbuster film' Don ka nirdeshan kiya tha.
aajkal Kamal Barot 70 varsh ki aayu paar kar chukee hain aur in dino
woh London aur Mumbai mein baari baari se aakar rehti hain. VBLC
Sangeet Ke Sitaare ki taraf se ham de rahe hain Kamal-ji ko lambi
aayu aur swastha jeevan ki tah-e-dil se shubhkaamnaayen, aur chalte
chalte aapko sunwaa rahe hain jhalak Kamal Barot aur Mukesh ke gaaye
ek bahut hi Khoobsoorat yugal geet ki film Rocket Girl se. suniye yeh
geet aur deejiye hamein ijaazat, phir mulaaqaat hogi VBLC Sangeet Ke
Sitaare ki agli kaDee mein, ek aur kamcharchit fankaar ke sangeet
safar ke saath, namaskaar!

----------------------------------------------
Clip: na jaane chaand kaisa hoga (Rocket Girl)
----------------------------------------------

THE END

INSE MILIYE - VIJEYTA PANDIT
----------------------------

VP: Vijeyta Pandit
RB: Renu Bansal

RB: Inse Miliye kaaryakram mein aap sabhi ka swaagat, aap sabhi ko
Renu Bansal ka namaskaar. aaj jis shahseeyat se aapki mulaaqaat
karwaane jaa rahe hain, unka naam bataane se pehle soch rahi hoon ki
ek gaane ki ek jhalak aapko sunwaa doon jisse ki unka naam bhi aapko
yaad aa jaayegaa aur unki salauni soorat bhi aapke aankhon ke saamne
tair jaayegi.

-------------------------------------------------------
Clip: yeh laDki zara si deewaani lagti hai (Love Story)
-------------------------------------------------------

RB: kahiye, pataa chal gaya na naam? pyaari si muskuraahaT waali
abhinay ki deewaani aur jaapaani guDiya si aap hain Vijeyta Pandit jo
aaj Vividh Bharati ke 'studio' mein mere saamne baiTheen hain.
Vijeyta-ji, bahut swaagat hai, namaskaar!

VP: dhanyavaad Rebu-ji, mera saubhaagya hai ki main pehli baar Vividh
Bharati mein aakar yahaan aapke saath 'programme' kar rahi hoon, aur
main apne aap ko bahut 'lucky' maanti hoon.

RB: Vijeyta-ji, yeh bataaiye ki aap filmon mein ek Khushnuma jhonke
ki tarah aayi theen, aur Love Story aapki abhinay se sajee pehli film
thi, to yeh jo Khushnuma jhonka tha uske baad waisi ThanDi hawaa kyun
naheen aayi?

VP: dekhiye woh Love Story aayi to pyaar ka ek sandes bhi laayi aur
mohabbat bhi aayi, (laughs), to Love Story ke baad maine Mohabbat
mein kaam kiya jismein mera 'I think' bahut hi achchha 'role' tha,
bahut achchha 'challenging performance' tha Anil Kapoor ke saath, jo
maine kiya, aur usey bhi logon ne bahut saraahaa, aur uske baad to
bas gaane, aap to jaanti hain mere 'family' mein sab sangeet ke
deewaane hain, Jatin bhaai, Lalit, Sulaxana, Aadesh Shrivastava
mere 'husband', ham 'music' se hi taalluKh rakhte hain, to hamaara
poora 'basically' jo 'family' hai, Khaandaan hai, woh 'music' ke hi
maadhyam se juDee rehti hai, to sangeet mein main hameshaa bachpan se
thi hi, Love Story mein jo main 'heroine' bani yeh bhi ek ajeeb sa
ittefaaq hai ke Sulaxana-ji ki tarah main bhi dikhne mein shaayad
bahut Khoobsoorat thi (laughs), to Rajendra Kumar-ji ne jab mujhe
dekha to bole ki 'meri 'heroine' bas yahi hai, mujhe isi se 'acting'
karaani hai', aur is tarah mujhe Love Story mein 'heroine' banne ka
mauka milaa. to yeh meri Khoobsoorati hi thi ki, main chaahti to
thi 'singer' banna, ban gayi 'heroine'. uske baad maine 'singing' ko,
gaane ko, sangeet ko, 'I mean first priority' rakhaa, aur aaj bhi
maine ek 'album' nikaalaa hai apna, Propose, usmein Sonu Nigam aur
Hariharan-ji ke saath maine gaaya hai gaana, main chaahoongi
woh 'album' aap zaroor sune aur apne aap hi 'judge' karen ki main
kaisa gaati hoon.

RB: Vijeyta-ji, yeh to aapki abhinay ki kahaani huyi ki kis tarah
abhinay ki duniya mein aapke kadam paDe, lekin ek baat aap se zaroor
jaanna chaahenge ki sangeet ke maahaul mein aap paleen baDheen,
sangeet aapke nas nas mein basaa hai, aur abhinay ka bhi koi na koi
ansh to hoga hi aapke man mein?

VP: bilkul, abhinay to sangeet se aur gaane se juDaa huya hai, woh
koi alag cheez to hai naheen. jab koi 'singer' gaata hai to kuchh
sochkar abhinay ko apne andar Dhaalkar hi woh 'feeling' baahar aati
hai aur wohi abhinay hai. to main sochti hoon har 'singer' pehle
ek 'actor' hai, phir 'singer' hai. to isi tarah 'singing' aur 'music'
hamaare andar to hai hi, bas kudrat ki den samajheeye ki gaane ke
saath saath uparwaale ne thoDi shakal bhi dee ki jiski wajah se
Sulaxana aur main, ham dono ko aap logon ne filmon mein 'as heroine'
dekhaa.

RB: sangeet ke maahaul mein jab aap baDi ho rahi theen, to aapne kya
sochaa tha ki duniya ke saamne Vijeyta Pandit ek gaayika ke roop mein
prastut hongi yaa abhinetri ke roop mein prastut hongi?

VP: gaayika ke roop mein. main bachpan mein jab 9 saal ki thi, maine
gaana hi gaaya tha, maine seekha tha 'classical' mere pitaaji Pandit
Pratap Narayan-ji se, woh aaj naheen hain mere saath mein lekin unki
seekhaayi har cheez mere saath hai, mere rom rom mein basee hai, main
bachpan se gaana hi gaati thi, film Johny aur Jeany mein Kishore-ji
ke saath, mere sabse 'favourite singer' hain, unke saath maine pehla
gaana gaaya tha 'duet', "Johny ko maine jaana hai aaj, jhooTa hai yeh
dil ka sachcha naheen", to main apne aapko bahut saubhaagyashaali bhi
samajhti hoon ki 9 saal ki umra mein maine Kishore Kumar-ji ke saath
gaaya, aur woh bhi us zamaane mein. aajkal aap to jaanti hain ki
gaana aisa hota hai ki 'voice' ko pehle le le 'music' baad mein
Daalen, woh ek 'combination' saath mein naheen hota jo pehle huya
karta tha, jab 'musicians' aur 'singers live' khaDe hokar gaate the.
to us daur se main bhi guzree hoon, aur Kishore-da ke saath main
khaDe hokar 50-60 'musicians' ke saath maine yeh gaana gaaya tha.

-------------------------------------------
Clip: sun jiniaa arey jaa (Jinny Aur Johny)
-------------------------------------------

RB: Vijeyta-ji, aap ne woh daur bhi dekhaa aur aaj ka daur bhi dekh
rahi hain apne bhaaiyon aur apne pati ke saath jahaan 'music'
alag 'record' kiya jaata hai aur 'singer' apni aawaaz alag deta hai.
aap ke hisaab se kaun sa daur zyaada achchha tha haalaanki kehte hain
pehle ke jo gaane the unmein aatma basti hain aur aajkal ke gaano
mein aatmaa naheen hai keval shareer hai.

VP: bilkul, yeh bahut sahee baat hai, pehle ke jo gaane hote the,
pehle jis tarah se gaane 'record' keeye jaate the, 'singers' saath
mein khaDe hain, hans rahe hain, bol rahe hain, gaane ko saath
mein 'rehearsal' kar rahe hain, 'with 40-50-60 musicians, along with
them', woh ek mazaa hi kuchh aur tha, insaan ek doosre
ko 'acknowledge' karta tha, 'hello hi' hota tha, lagta tha ek
poori 'family', ek poora 'studio' bharaa huya 'singers'
se 'musicians' se, aur aapas mein baatchit hoti thi, hans-khelkar
gaana banaaya jaata tha, ek 'combination' karke gaana gaaya jaata
tha, aajkal to akele soone 'studio' mein aayo, akele 'music director'
ke saath gaayo aur bas chale jaayo, bahut hi 'different genre' hai
aaj ka, bahut alag 'type' ka maahaul hai, lekin main yahi sochti hoon
ki pehle ka jo daur tha woh bahut Khoobsoorat tha aur usmein abhut
aatma thi, bahut sachchaai thi, bahut achchha tha woh.

RB: shaayad isiliye jab aap sabke saath milkar kaam karti hain,
bahut 'rehearsals' hote hain to jo 'expressions' hain woh khulkar
aate hain...

VP: khulkar aate hain

RB: shaayad aaj ke gaano mein 'expressions' kam nazar aate hain?

VP: bilkul bilkul, aajkal ka jo 'trend' hai woh bahut 'mechanical' ho
gaya hai, 'machine' jaisa ho gaya hai, pehle dekhiye na 'musicians'
sab 'acoustic' tha, saarangi woh bajaa rahe hain to saarangi hi hota
tha, aaj 'electronics' mein kaafi woh sab 'tones' nikal jaate hain to
dil ki gehraaee ki woh cheez na aapko samajh aayegi aur na aap 'feel'
karenge.

RB: Vijeyta-ji, jab jab aapki aur Sulaxana-ji ki abhinay aur gaayan
ki baat nikalti hai to shrotaaon ke man mein ek sawaal zaroor aata
hai ki aap dono ne abhinay aur gaayan, dono ko saath saath aage
baDhaane ka socha, lekin aap aisa naheen kar paayeen ismein kitna
sach hai?

VP: Sulaxana-ji ne to mere se bahut zyaada 'struggle' kiya hai 'life'
mein, woh jab gaana chaahti thi to bahut baDe baDe 'singers' the unke
saamne, Lataji theen, Ashaji theen, jinse 'compete' karna
har 'singer' ke bas ki baat naheen thi. to woh 'genre' bahut
zyaada 'difficult' tha na ki aaj ka. aaj ka jo daur hai
ismein 'singers' ke liye raastaa seedhaa aur 'easy' ho gaya
hai 'chance' milne ke liye. pehle ki tarah 'difficult' naheen
hai 'because' aajkal itna 'talented' mahaan 'singer' saamne mujhe
naheen lagta koi hai.

RB: achchha chaliye, hamne aapke abhinay ki baat kee, aapke sangeet
ki baat kee, aur aapne bataaya ki aapne apna 'album'...

VP: maine apna ek 'album' banaaya hai Propose, jismein Sonu Nigam ne
do gaane gaaye hain mere saath, Hariharan ne do gaane gaaye hain,
iska main ek mukhDaa sunaati hoon, (sings) "koi sapna banke koi apna
banke nainon mein aaye chheDe sataaye main kya karoon kya na karoon
haaye"

RB: ab main aap se 'propose' yeh kar rahi hoon (VP laughs) ki Vijeyta
Shrivastava jab ghar pe hoti hain, jab sangeet se unhe fursat milti
hai, to woh kya karti hain, kyunki aap ke paas se jab main guzree to
khaane ki bahut pyaari Khushboo aayi.

VP: (laughs) jab main ghar pe rehti hoon to mujhe ghar ki safaai ka
zyaada shauk hai, mujhe har cheez bahut saaf chaahiye, safaai ka
bahut shauk hai, aur khaana pakaane ka bahut shauk hai. to zyaadaatar
mere ghar mein khaana banaake ke liye 'cook' hai, mahaaraaj, par main
hamesha koshish karti hoon ki jab bhi fursat mile to Khud
apni 'dishes' Khud banaayun, kyunki aap jaante hain ki apne haath se,
kahin bhi aap chale jaayen, apne haath se banaayi cheez agar log
taareef karen aur pasand karen to bahut Khushi milti hai.

RB: achchha Vijeyta-ji, yeh bataaiye aap 'vegetarian dishes' banaati
hain, 'non-vegetarian dishes' banaati hain yaa dono?

VP: dono banaati hoon

RB: aur aapki pasandida 'dish' kaun si hai?

VP: meri pasandida 'dish' hai, ek main banaati hoon "dahi baingan",
Laxmikant Pyarelal ke Pyarelal-ji hamesha mujhse kehte hain
ki 'Vijeyta, tumhara dahi baingan mujhe bhejo, mujhe bahut pasand
hai' (both laughs), to woh ek mera 'special dish' hai.

RB: ghar ka rakh-rakhaav aur khaana banaane ka jo shauk hai iske
alaawaa Vijeyta ke aur kya kya shauk hain, aur Vijeyta ki ichchhaayen
kya hain abhi?

VP: meri ichchha to yahi hai abhi ki main phir se ek 'singer' ki
tarah saamne aayun, main abhi ek aur 'album' banaa rahi hoon, Aadesh
jiska 'music' de rahe hain, aur main usmein lagi huyi hoon, ham
uspe 'work' kar rahe hain, 'compositions' ban rahe hain, Javed Akhtar
mere gaane likh rahe hain, aur ummeed kar rahi hoon ki usmein gaane
achchhe bane, aur 'as a singer' main jantaa ke saamne ek baar phir aa
jaayun aur log mujhe bhoole naheen, kisi na kisi tarah main unke
aaspaas ghoomti rahoon.

RB: Vijeyta, hamaari shubhkaamnaaen aur sunnewaalon ki shubhkaamnaaen
aapke saath hain ki log ek baar phir aapko parde par dekhen, parde
par dikhne ke do maadhyam hain, ek to aap abhinay karen, aur doosra
aap 'albums' ke liye abhinay karen. to kya iraade hain aapke?

VP: maine pehle 'album' ki bhi CD banaayi thi lekin shaayad woh Theek
se 'promote' naheen huyi, Hariharan-ji ke saath, aur ab doosra
jo 'album' banaa rahi hoon usmein bhi gaane main Khud par 'picturise'
karoongi, aur main chaahoongi ki jald se jald woh 'album release' ho,
aap mere gaane sune aur mujhe yaad karen, aur jitna pyaar aap ne diya
hai mujhe Love Story ek dauraan woh main phir se haasil karoon.

RB: Vijeyta-ji, aapka bahut dhanyavaad, aap hamaari 'studio' mein
aayeen aur hamaare sunnewaalon se itni pyaari pyaari baaten aapne kee.

VP: yeh mera bahut baDaa saubhaagya hai, main bahut Khush hoon ki
main aap logon ke saamne aayi hoon aut itna achchha 'programme' lekar
aayi hoon, dhanyavaad, 'I am so much thankful to you'.

-----------------------------------------------
Clip: jawaan ho yaaron (Jo Jeeta Wohi Sikander)
-----------------------------------------------

THE END

VBLC SANGEET KE SITAARE
-----------------------

EPISODE 1: NINU MAZUMDAR
------------------------

namaskaar! VBLC Sangeet Ke Sitaare mein aapka swaagat hai. aaj se ham
is shrinGkhalaa ki shuruwaat kar rahe hain. yeh shrinGkhalaa samarpit
hai film sangeet jagat ke kuchh aise sitaaron par jinki chamak
shaayad utni na faili ho jitni doosre fankaaron ki faili hai, lekin
baawjood iske in kamcharchit fankaaron ne jo amoolya yogdaan diya hai
film sangeet jagat mein, woh anmol hai, avismaraNiya hai. VBLC
Sangeet Ke Sitaare ki yeh shrinGkhalaa salaam karti hai aise hi
kamcharchit geetkaar, sangeetkaar aur gaayak gaayikaaon ko. aaj is
shrinGkhalaa ki suruwaat ho rahi hai sangeetkaar Ninu Mazumdar ke
sangeet rachnaayon se.

---------------------------------------------------
Song: aa bahaar karke phoolon ka singaar (Pul,1947)
---------------------------------------------------

doston, abhi aap ne Ninu Mazumdar ki aawaaz mein 1947 ki film Pul ka
gaana sunaa. Pt Narendra Sharma ka likha huya aur Ninu Mazumdar ka
sangeet se sanvaara huya. Ninu Mazumdar, jinka alsi naam tha
Niranjan, jo unhone baad mein apni Gazlon mein bataur taKallus
istemaal kiya. Ninu Mazumdar ek filmi gharaane se taalluKh rakhte
the. woh aise ki unke pitaa Nagendra Mazumdar mook filmon ke daur
mein film nirmaataa the. shuruwaati dino mein Ninu Faiyaz Khan se
prabhaavit huye, uske baad kai raahon par chalte huye unhone alag
alag taraf ke sangeet seekhe, aur aage chalkar unke naam ka shumaar
Gujarati ke pratham sugam sangeet gaayakon ki shreNee mein huya. Ninu
Mazumdar ke sangeet yaatra ke aage ka haal ham aapko is geet ke baad
bataayenge, yeh geet hai 1943 ki film Amanat ka, jise Nilkanth Tiwari
ne likha hai aur Harish ne gaaya hai.

------------------------------------------------------
Song: chhoo gayi chhoo gayi koi mera man (Amanat,1943)
------------------------------------------------------

Gujarati sugam sangeet gaayak banne ke baad Ninu Mazumdar Khud dhune
banaane lage aur gaane bhi likhne lage. un par Bangla Rabindra
Sangeet ka bhi achchha Khaasaa asar huya. lekin jis sangeet ka un par
chir-shtaayi asar huya, woh tha Uttar Pradesh ka lok sangeet aur
upshaastriya sangeet, jaise ki hori, chaiti, barkha biraha, Thumri
aur daadraa. yeh un dino ki baat hai jab Ninu U.P. mein kheti-baaDi
sambhaalte huye Satyendra Trivedi aur Siddheshwari Devi jaise
hastiyon ke sansparsh mein aane ka saubhaagya praapt huya. ab ham aap
ko ek bahut hi durlabh gaana sunwaane jaa rahe hain, durlabh isliye
ki isey Hamida Banu aur Suraiyya ne saath milkar gaaya hai, D N
Madhok ne likha hai aur sangeet hai, jee haan, Ninu Mazumdar ka.

-----------------------------------------------------------
Song: aaj hans hanse ke do do baaten (Main Kya Karoon,1945)
-----------------------------------------------------------

do chaar baaten ham bhi aapko bataa rahe hain sangeetkaar Ninu
Mazumdar ke baare mein. Ninu Mazumdar jab Baroda mein sangeet ki
shiksha le rahe the, tabhi se unke dil mein film sangeetkaar banne ki
Khwaahish machal rahi thi. 1937 se woh Gujarati sugam sangeet ke
kaaryakramon mein bhaag lete aur AkaashvaaNi ke liye bhi kaaryakram
karte the. film jagat mein unka aagaman huya san 1942 mein, jab
Standard Pictures ke 'banner' tale bani film Black Cat mein unhe
sangeet dene ka mauka milaa. is film ke mukhya kalaakaar the
Benjamin, Shobha aur Sardar Akhtar. sunte isi film se Ninu Mazumdar
aur Leela sawant ka gaaya Wahid Qureshi ka likha huya yeh gaana.

----------------------------------------------------
Song: saajan aayo chalen kahin door (Black Out,1942)
----------------------------------------------------

1942 mein hi ek film aayi thi Uljhan jiske sangeetkaar the Ramchandra
Pal. inke sangeet nirdeshan mein Ninu Mazumdar ne Sardar Akhtar ke
saath ek gaana gaaya tha. yahaan par ham aapko Ninu Mazumdar ka gaaya
aur sangeetbaddha kiya ek doosra geet sunwaate hain, film ka naam hai
Teen Tasveeren, geetkaar hain Prem Dhawan.

-------------------------------------------------------
Song: dekh liya jagwaale jag tera (Teen Tasveeren,1954)
-------------------------------------------------------

agle saal, yaani ki 1943 mein Ninu Mazumdar ne 3 filmon mein sangeet
diya. yeh filmen theen Amanat, Masterji aur School Master. film
Amanat ka ek geet to ham aapko sunwaa hi chuke hain, yahaan par ham
aapko School Master film ka ek geet zaroor sunwaana chaahenge jise
Rajkumari aur Karan Dewan ne gaaya hai, geet likha hai Indra Chandra
ne.

------------------------------------------------------
Song: kuchh bhool huyi bhool huyi (School Master,1943)
------------------------------------------------------

1944 mein bhi unki 3 filmen aayi - Kiran, Paristan, aur Rangile Dost.
film Paristan mein Ninu Mazumdar ne Amirbai Karnataki ke saath ek
yugal geet bhi gaaya tha. 1945 mein aayi film Main Kya Karoon, jismen
Ninu Mazumdar ke rache geet charchit huye. Hamida Banu aur Suraiyya
ka gaaya is film ka ek gaana to aap sun hi chuke hain is kaaryakram
mein, aaiye isi film ke kuchh aur geeton ki jhalkiyaan aapko sunwaate
chalen yahaan par...

--------------------------------------------------
Clip: aankh milaake baalmaa (Main Kya Karoon,1945)
Clip: baamna ki chhori dil le gayi (MKK,1945)
Clip: jaaniya maaro hamri o rasiya maano (MKK,1945)
Clip: suno more raajaa najariya milaaike (MKK,1945)
---------------------------------------------------

doston, is waqt aap sun rahe hain VBLC Sangeet Ke Sitaare kaaryakram
ki pehli kaDee aur aaj ke is pehli kaDee ke sitaare hain guzre daur
ke sangeetkaar aur gaayak Ninu Mazumdar. aaj ka yeh kaaryakram
aadhaarit hai inhi ki sangeet yaatra par.

---------------------------------------------------
Song: o gori kahaan chali us paar (Jail Yatra,1947)
---------------------------------------------------

Meena kapoor aur Ninu Mazumdar ki yugal aawaazen thi is geet mein jo
abhi aapne sunaa. film thi Jail Yatra. yeh film behad Khaas hai
kyunki is film mein Raj Kapoor ne na keval ek bhumika adaa kee thi,
balki Ninu Mazumdar ke sangeet nirdeshan mein ek geet bhi gaaya tha,
suniye wohi durlabh naGmaa Raj Kapoor ki aawaaz mein.

--------------------------------------------------
Song: piya milne naveli jaaye re (Jail Yatra,1947)
--------------------------------------------------

1947 mein Jail Yatra ke alaawaa Ninu Mazumdar ne do aur filmon mein
sangeet diya - Gudiya aur Pul. film Pul ke gaane bhi pasand keeye
gaye. is film mein unhone Khud bhi kai geet gaaye, jinmein se ek geet
ham kaaryakram ke sabse pehle geet ke roop mein bajaa chuke hain. ab
is film ka ek yugal geet pesh hai jise Ninu Mazumdar ne ek baar phir
Meena Kapoor ke saath milkar gaaya hai.

--------------------------------------------------------
Song: aaye bhi naheen beet gaye din bahaar ke (Pul,1947)
--------------------------------------------------------

"aaye bhi naheen beet gaye din bahaar ke", waaqai, yeh behad afsos ki
baat hai ki aise sureele meeThe sangeet denewaale sangeetkaar Ninu
Mazumdar ka filmi sangeet safar bahut zyaada dino tak naheen chalaa.
baharhaal ab ham aate hain san 1948 mein. jee haan doston, yeh wohi
saal hai jismein bani thi film Gopinath. is film ka nirmaaN Ninu
Mazumdar ne hi kiya tha Shanti Lok Chitra 'banner' ke tale. Mahel
Kaul dwaara nirdeshit is film ke mukhya kalaakaar the Raj Kapoor aur
Tripti Mitra. is film mein sangeetkaar Ninu Mazumdar ne Meena Kapoor
aur Kaumudi Munshi se ek Meera bhajan gawaaya tha. yahaan aapko yeh
bataa den ki Kaumudi Munshi se aage chalkar Ninu Mazumdar ki shaadi
huyi san 1954 mein. baharhaal aaiye yahaan par wohi Meera bhajan
sunte hain.

-------------------------------------------------
Song: sakhi mohe neend na aaye re (Gopinath,1948)
-------------------------------------------------

Ninu Mazumdar ko aisa lagne lagaa ki film sangeet ka kshetra bahut hi
seemeet hai kyunki ek to ismein bahut tez raftaar ke saath kaam karna
paDtaa hai aur aam janataa ki ruchi ka sabse zyaada dhyaan rakhna
paDtaa hai. Ninu ne ek naya prayog shuru kiya, woh aadi sangeet
samraaTon, jaise ki Surdaas ke rachnaayon ka apne sangeet mein
istemaal shuru kiya. isse Gopinath film ke sangeet ko bahut achchha
rang milaa jise kaafi saraahana mili. aisi hi ek Surdas ki rachanaa
suniye  Meena Kapoor ki aawaaz mein Gopinath film se.

------------------------------------------------------------
Song: aayi gori raadhika brij mein balkhaati (Gopinath,1948)
------------------------------------------------------------

yeh geet sunkar aapko zaroor ahsaas ho gaya hoga ki is geet se
prereet hokar kai saal baad Raj Kapoor ne apni film Satyam Shivam
Sundaram mein ek gaana rakhaa jiski dhun is gaane se milti julti hai,
zaraa suniye to jhalak us geet ki...

-----------------------------------------------------------
Clip: yashomati mayya se bole (Satyam Shivam Sundaram,1977)
-----------------------------------------------------------

yugal geeton ki baat karen to Meena Kapoor ke saath Ninu Mazumdar ne
sabse zyaada geet gaaye. Jail Yatra aur Pul filmon mein is joDi ke
gaaye yugal geet to aap sun hi chuke hain. film Gopinath mein bhi in
dono ne yugal geet gaaye. 1948 mein Ninu Mazumdar ke sangeet se sajee
ek aur film aayi Kuch Naya, jismein bhi Ninu aur Meena Kapoor ne
yugal geet gaaye.

----------------------------------------------------
Song: piya milan kaise jaayogi gori (Kuch Naya,1948)
----------------------------------------------------

aur phir aaya 50 ka dashak. film sangeet karwaT badal rahi thi. bahut
se naye naye sangeetkaaron ne is udyog mein kadam rakhaa. sangeet aur
janataa ki ruchi badalne lagi. paashchaatya sangeet ka prayog baDhne
lagaa. film sangeet apne sunehre daur se guzarne lagi. 1950 mein Ninu
Mazumdar ke sangeet se sajee film aayi Aflatoon, 1951 mein Raj Ratan,
1952 mein Azmaish, 1953 mein Rami Dhoban, aur 1954 mein Bhai Saheb
aur Teen Tasveeren jaisi filmen aayi, lekin na to yeh filmen chalee
aur na hi Ninu Mazumdar ka sangeet kuchh Khaas lokapriya huya. Bhai
Saheb film mein C H Atma 'hero' bane aur unhone kai gaane bhi gaaye.
sunte hain C H Atma ka gaaya Bhai Saheb film ka yeh gaana. geetkaar
hain Shailendra.

--------------------------------------------------------------
Song: nazar ne keh diya afsaana mere pyar ka (Bhai Saheb,1954)
--------------------------------------------------------------

1954 ke baad Ninu Mazumdar ne film sangeet se sanyaas le liya. un
dino sangeet jagat ke naamcheen fankaaon ko AkaashvaaNi par aamantrit
kiya jaa raha tha apna amoolya yogdaan dene ke liye. P.L. Deshpande,
V.G. Jog, Ustad Hafiz Ahmed Khan aur Anil Biswas ke saath saath Ninu
Mazumdar bhi juDe AakaashvaaNi se. Ninu Mazumdar Vividh Bharati se
juDe and Vividh Bharati par lokapriya kaaryakram Jaimala
ke 'producer' bane. woh agle 20 saalon tak 'radio' se juDe rahe.

---------------------------------------------------------------
Song: sapnon ki nagariya hai qismat ke haathon (Raj Ratan,1951)
---------------------------------------------------------------

Asha Bhosle ki aawaaz mein yeh tha Raj Ratan film ka gaana jis elikha
tha Bharat Vyas ne. Hindi filmon ke alaawaa Ninu Mazumdar ne Gujarati
filmon mein bhi sangeet diya hai. unke sangeet se sajee kuchh mashoor
Gujarati filmon ke naam hain Jeevano Jugari, Okha Haran, Sharad
Poonam vagerah. 1942 se lekar 1954 tak filmon mein utkrishT sangeet
dene ke baawjood Ninu Mazumdar film sangeet mein woh muqaam haasil
naheen kar paaye jiske woh haqdaar the. 3 March 2000 ko unhone is
faan-i-duniya ko hameshaa ke liye alvidaa keh diya. is waqt hamein
Saraswati Kumar Deepak ka likha aur S D Batish ka gaaya film Poonam
Ka Chaand ka ek geet yaad aa rahi hai.

-----------------------------------------------
Song: duniya faani aani jaani (Poonam ka Chand)
-----------------------------------------------

Ninu Mazumdar bhale hi kamcharchit sangeetkaar rahe hon, lekin jab
bhi film sangeet ka itihaas likha jaayegaa, unka naam utkrishT
sangeet srijan ke liye shraddhaa se liya jaayegaa. Ninu Mazumdar ki
pratibhaa ko hamaara shat shat praNaam. VBLC Sangeet Ke Sitaare mein
hamaare aaj ke sitaare the guzre daur ke sangeetkaar aur gaayak Ninu
Mazumdar. agli baar ham ek aur aise kamcharchit fankaar ki daastaan
lekar aapke saamne haazir honge, tab tak ke liye namaskaar!

THE END

CHHAYA GEET - GUZRE ZAMAANE KE ANMOL NAGHMEN
--------------------------------------------

Presenter: Yunus Khan
---------------------

Chhaya Geet ke sunnewaalon ko Yunus Khan ka namaskaar. doston, Chhaya
Geet mein jab bhi aapki aur hamaari mulaaqaat hoti hai, to main aapke
liye lekar aata hoon guzre zamaane ke kuchh anmol naGmen. yeh puraane
zamaaen ke anmol naGmon ko khojne aur sunne aur baanne ka ek
lagaataar chalnewaala silsila hai. bahut baras pehle ek film aayi thi
jiska naam tha Ek Ke Baad Ek. darasal is film ka nirmaaN parivaar
niyojan ke naare ko lekar kiya gaya tha. is film ke kathaanak par ham
naheen jaa rahe, balki baat is film ke sangeet ki hai. Manna Dey ka
ek bahut hi mashoor gaana is film mein tha jise sangeet ke qadrdaano
ne hamesha yaad rakha. lekin aajkal yeh gaana na to kisi 'radio
channel' se sunaayi deta hai aur na hi kahin aur sunaayi deta hai.
hamaare man ki vaadiyon mein lambe samay se goonjte aa rahe is gaane
ko aaj ham Chhaya Geet mein sabse pehle aapke liye pesh kar rahe
hain. isey Kaifi Azmi ne likha hai, sangeetkaar hain Sachin Dev
Burman. yeh film Nagina Films ke 'banner' tale aayi thi. suniye...

Song: na tel aur na baati na qaaboo hawa par (Ek Ke Baad Ek)


Manna Dey aur saathiyon ka gaaya yeh gaana aap ne sunaa, film thi Ek
Ke Baad Ek. darasal 60 ke dashak mein kai mashoor gaane aaye aur ek
saath kai peeDhiyon ke sangeetkaar is dashak mein poori tarah se
sakreeya the. aise hi sangeetkaaron mein ek naam Bulo C Rani ka hai.
Bulo C Rani ne bahut kam filmon mein sangeet diya, aur aur kuchh
filmon mein diya gaya unka sangeet bahut mashoor huya, jaise ki
Jogan. lekin aaj ham 1966 mein aayi film Sunehre Kadam ka geet aap ke
liye lekar aaye hain. Lata Mangeshkar ki aawaaz hai, is gaane ko M
Pran ne likha hai, jo apne zamaane ke mashoor nirdeshak huya karte
the. yeh film Saraswati Kalamandir ke 'banner' tale aayi thi. darasal
isey geet kehna Theek naheen hoga, kyunki yeh ek Gazal hai. aaiye
isey sunaa jaaye. film Sunehre Kadam.

Song: na baaz aaya muqaddar mujhe miTaane se (Sunehre Kadam)


guzre zamaane ke anmol daastaan waaqai ajeeb hai. kai baar kuchh aise
geet hamaare zahan mein aa jaate hain jo bahut baras se sunne ko
naheen mile aur kis tarah se hamaari yaadon ke paraton ko upar
haTaate huye saamne aa jaate hain yeh samajhna baDaa mushkil ho jaata
hai. Son of Hatimtai Bulo C Rani ki ek baDi hi mashoor film rahi hai.
is film ke gaane M Hussain ne likhe the. Meena Patki ne is film mein
ek geet gaaya tha jo aapne shaayad kai saalon se na suni ho. lekin
main aaj aapko sunwa raha hoon. yeh gaana bahut hi naazuk, bahut
komal aur bahut sureela hai.

Song: tere baGair mere zindagi ka kya hoga (Son of Hatimtai)


sangeetkaar Salil Chaudhury ne Hindi filmon ke saath saath Bangla
filmon mein bhi bahut kaam kiya. unki Bangla gane aur Hindi gaane
samaan roop se mashoor rahe hain. kai baar to yeh sunne mein aaya ki
jab gaane ki dhun banaate the Salil Chaudhury to gaane ke 'dummy' bol
bhi likh liya karte the. aur kai baar geetkaaron ne Salil-da
ke 'dummy' bolon ko hi aadhaar banaakar gaana tayyaar kiya. unhi
bolon ko thoDaa yahaan wahaan kiya, thoDaa bahut her-pher kiya.
Sabita Banerjee ki aawaaz mein 'programme' ka agla gaana hai,
Honeymoon film ka hai. is film ke kuchh gaane mashoor huye the lekin
yeh gaana bahut zyaada charchit naheen huya tha. yeh film Jubilee
Films ke 'banner' tale 1960 mein aayi thi.

Song: tum jo mile to khila hai gulaab mere dil ka (Honeymoon)


1963 mein Bihar Films ke 'banner' tale ek film aayi thi Bidesiya.
darasal uttar bhaarat ke Khaas ilaakon mein bidesiya ki parampara
hai. yeh woh geet hain jo pardes mein aa base graameeN man ki aawaaz
huya karte hain. yaani bidesiya woh log gaate hain jo apne gaaon ko
chhoDkar pardes mein aa gaye hain aur apne gaaon ki yaad unhe baDi
vikalta se aa rahi hai. bas isi baat ko aadhaar banaakar Bidesiya
film tayyaar kee gayi thi. waise Bidesiya ke naam se baDaa mashoor
naaTak bhi raha hai. R N Chaturvedi ne Bidesiya film ke gaane likhe
the, sangeetkaar the S N Tripathi, aur Manna Dey ki aawaaz mein gaaon
ki sondhi miTTi ki mahak waala yeh geet aapki nazar.

Song: na taDpe na taDpe na taDpe raam (Bidesiya)


Chhaya Geet ke aaj ke is kaaryakram mein kuchh gaane hamne aapko Bulo
C Rani ke sunwaaye, phir Salil Chaudhury ka ek geet aaya aur S N
Tripathi ka ek geet aaya. ab C Arjun ki baari. C Arjun film sangeet
ke bahut kamcharchit sangeetkaaron mein se ek rahe hain. ek baar phir
yeh woh naam hai jinhone bahut zyaada kaam naheen kiya lekin inke
kaam ka star bahut oonchaa raha hai. mujhe yaad aa rahi hai 1966 mein
Shri Vinay Chitra ke 'banner' tale bani film Susheela, jiske kuchh
gaane behad maqbool the. Mubaraq Begum ka gaaya yeh gaana bahut
mashoor huya tha. aajkal bhale yeh gaana bahut kam baje, lekin is
gaane se aapko puraane dino ki woh mahak yaad aa jaayegi. Jan Nisar
Akhtar ne is geet ko likha hai, C Arjun ki tarz, 1966 mein yeh film
aayi thi.

Song: bemurawwat bewafaa begaana-e-dil aap hain (Susheela)


Chhaya Geet mein abhi aapne sune guzre zamaane ke kuchh anmol naGmen
apne dost Yunus Khan ke sang. jab ham agli baar milenge to main kuchh
aise hi aur anmol naGmen aapke liye lekar aayunga. tab tak in gaano
ko khojne, aur sunne ka silsila jaari rakhiye.

THE END

INSE MILIYE - SHAIL HADA
------------------------

SH: Shail Hada
RB: Renu Bansal

RB: Shail-ji, aapka Vividh Bharati ke 'studio' mein bahut swaagat
hai, namaskaar!

SH: namaskaar!

RB: kaaryakram se pehle main aap se baatchit kar rahi thi, to ek
bahut hi dilchasp si, kahaani si bangayi thi, to main chaahti hoon ki
aapke safar ki yeh kahaani jo maine suni woh hamaare shrotaa bhi sune.

SH: jee jee zaroor!

RB: jo safar Kota se shuru huya tha, woh safar Mumbai kaise pahuncha?
isse pehle jaana chaahenge ki aapka janm aur aap pale baDhe kahaan pe
hain?

SH: Renu-ji, mera janm Kota mein, Rajasthan mein ek shaar hai Kota,
wahaan par mera janm huya

RB: bahut hi prasiddha si jagah hai, Kota ki saaDiyaan, Kota Silk...

SH: Kota ke patthar...

RB: aur 'students' ke liye bahut 'famous' naam hai Kota, jo paDhne
likhne waale hain wahaan pe 'training' lene jaate hain

SH: jee bilkul, mera to paDhne likhne se isliye zyaada sambandh hai
kyunki mere paapa 'lecturer' hain aur meri 'mummy' wahaan Principal
rahi hain 'school' mein. to 'education' to 'was in my house', 'in-
house pruduction' tha. Bombay jab main aaya to main bhi 5
saal 'teacher' tha yahaan 'school' mein, HAB Academy mein.
to 'journey' aisa hai ki, kabhi socha naheen tha bachpan mein ki is
taraf aayunga, 'because accidentally' yahaan pe aaya main. '10th
class' tak St Pauls School mein tha Kota mein, bahut 'strict', 'mummy
Principal' paapa 'lecturer' to 'education', sanskaar bahut achchhe
mile, ek yeh tha ki zindagi mein kuchh karna hai, to '10th std' ke
baad, '1st grade marks' mile, 'distinction' bhi mila to 'I took
Science Maths', uske baad 12 khatam karne ke baad 'I started for
PET/PMT', jitne bhi 'exams' hote hain 'engineering' ke, sab 'start'
kar diye maine. wahaan pe lekin 'suddenly' Akashvani ke Yuva
Vani 'programme' mein aate waqt mera bahut bhayaanak 'accident' huya.
to usmen bahut zyaada choT vagerah mujhe aayi thi. 'this is my second
birth I can tell you, I can se that'. 'mummy' ne bola ki 'ab aap ko
jo karna hai aap kariye'. maine kahaa 'mama, mujhe gaana gaana hai'.
main seekhta tha mere paapa se, mere paapa Shrui Jaswant Singh Hada,
kaafi mashoor kalaakaar hain Kota ke, main unse seekhta rehta tha,
jab woh 'college' chale jaate the, main 7 se leke 11 baje tak gaata
rehta tha, riyaaz karta rehta tha, to chhup chhup ke 'voice culture'
mera achchha hota jaa raha tha ki aise 'broad width' ke saath gaana
hai, 'plus' unhone yeh bhi bataaya tha ki jo bhi gaana dil se gaana.
phir 'suddenly' unhone kahaa ki 'ab kya karenge?' to maine socha ki
kuchh 'computer software' banaayunga 'music' ke, 'so I joined NIIT',
lekin wahaan dekha ki sab kuchh 'commerce' hai, 'related to commerce,
and I was from Science, so it was little difficult for me'. to kisi
ne kahaa ki Mumbai University mein Department of Music mein BA
ka 'admission' mil jaayega. 'I have already done my Sangeet Vishaarad
from Gandharv Mahavidyalay'. to wahaan gaya to Ajay Ponkar-ji ne
mujhe 'select' kiya ki unke paas seekhoon main. unke paas jaakar
seekhne lagaa, lekin seekhna isliye naheen ho paata tha
kyunki 'university' ke 'competitions' mein 'represent' karne
lagaa, 'gold medal' jeeta, phir 'different universities' mein jaa
jaakar 'medals' jeetne lagaa,  aur maine 7/8 'gold medals' maine 5/6
saal mein jeete. aur mujhe maaloom hi naheen paDaa ki mere 5/6 saal
nikal gaye Mumbai mein. phir usmein main kuchh ek saal Mithibai
College ka 'director' tha, ek saal 'group song' unko seekhaaya, jo
poore India mein First aaya. phir Mumbai University ka bhi 'director'
raha main ek saal. 'some way or the other God was very kind to me'
ki 'job' mil gaya. 'exams' jitne bhi 'pass' keeye sab Kota University
se keeye. saath mein 'school' mein jab main paDhaata tha to bachche
mujhe bahut prerit karte the, to kabhi yeh naheen huya ki main ek
umar paar karta jaa raha hoon, 'I was always young', 17/18 saal ka hi
samajhta tha apne aap ko, bachche itna pyaar dete the, itna chaahte
the, 5 saal inka pyaar milta raha, aise 11 saal nikal gaye the mere,
to 2005 mein maine 'post graduation' bhi 'complete' kiya, 'so I am MA
in music, angeet Vishaarad and 7/8 times Gold Medalist'. to
mera 'profile' achchha ho gaya tha ki 'I was learned'. 'That way my
parents were also satisfied' ki haan 'he is educated'. saath mein
phir 2005 ke andar mujhe pehli baar lagaa ki 'a genuine human being
is in front of me', mere ek 'uncle' hain Balwant uncle, unko milne ke
liye main thoDaa 'hesitent' tha ki saamne se jaakar miloon aur agar
unhone alag tareeke se bolaa to dukh hoyegaa. main Monty Sharma-ji se
milaa, unhone mujhe Sunday ko bulaaya tha, 'at that time Black was
happenning', Black ke 'background' ki baaten chal rahi thi. to ek din
Prasoon Joshi-ji, Monty-ji, Sanjay-ji sab the to main gaya tha.
phir "mausam ki adlaa badli mein" jo gaana tha, ek hi gaana tha Black
mein, jo film mein naheen hai, CD mein hai, to woh banaaya Monty
bhaai ne, maine faTaafaT yaad karke gaa diya. yeh itna 'easy' gaana
naheen hai, ki 'chord combination' naheen samajh mein aayega to gaana
kahin bhi jaayega, to 'on the spot' yaad karke gaa diya to 'everybody
was happy'.

RB: to yaad karte chalen us gaane ko kaun sa gaana tha?

SH: (sings) "mausam ki adlaa badli mein pawan gulaabi ho jaati hai..."

RB: bahut baDi film se juDe aur bahut baDe naamo se juDe, mujhe
maaloom hai ki aap film Black mein aur Saawariya mein Assistant Music
Director bhi rahe. to yeh jo ek kashmakash thi ki aap sangeet ki
taraf jaayen yaa gaayan ki taraf jaayen, abhi bhi hai yaa raaste saaf
ho gaye hain?

SH: main aapko bataayun, mera jo abhivyakt karne ka jo maadhyam hai
woh mera gaana hai. aur Monty bhaai ke saath, aur bhi
kuchh 'directors' jaise Adnan Sami-ji ke liye maine gaana gaaya, yaa
jo naye 'music directors' hain, Prem Paras naam ke ek aa rahe hain,
jo mere liye gaane banaa rahe hain, jo mere 'style' ke hain, jo
puraane 'time' mein hota tha ki woh woh karte the jo achchha lage aur
jo duniya ko samajh mein aaye, woh woh kaam naheen karte the jo
duniya ko achchha lage aur unko karna paDe. yeh bahut
baDaa 'difference' tha, to yeh kuchh log hain jo yeh samajhne lage
hain ki yeh yeh gaa sakta hai, isko chhoD do, to yeh mujhe achchha
lagaa. doosra main yeh seekhna chaahta tha ki 'instruments' ke
kya 'range' hain, Monty bhaai 'comes from that background' ki jab Pt
Ram Prasad-ji, jinhone 98% 'musicians' ko seekhaaya 'industry' mein,
to unka 1% bhi unke saath rehkar seekh paaya to mera saubhaagya
hogaa. to main ek bahut achchhe gharaane mein gaya Monty bhaai ke
paas ki mujhe har ek 'instrument' ka maaloom paDta hai. Black ka
jo 'background' huya hai, na kabhi aisa huya hai aur na kabhi hoga,
aisa sirf Monty bhaai hi kar sakte hain. kahin pe mera aalaap 'use'
kiya gaya hai, kahin pe 'classical' puriya dhanaashree gaa raha hoon
main, kahin pe bhup gaa raha hoon, kahin pe bhairav gaaya hai, kahin
pe naTbhairav gaaya hai. to aapko bataayun main ki unhone mujhe ek
baar bhi naheen bolaa ki jab 'mike' pe jaana hai, na Sanjay-ji ne
bolaa na Monty bhaai ne bolaa ki kya gaana hai, unhone 'piece' banaa
diya, aapke andar kya hai, 'this is the freedom I liked the most'.

RB: Black se jo silsila shuru huya woh aage baDhaa aur Saawariya tak
aaya. sab jaante hain ki Saawariya aapka 'landmark' hai, aapki
pehchaan ban gayi hai. to Saawariya kaise mili aapko, aapne ismein
gaana kaise gaaya, yeh hamein bataate chalen?

SH: 'sittings' mein baiThke ham log, kaun sa gaana gaana hai, kaun sa
naheen rakhna hai, in sabka chayan ham karte the. yeh gaana Ranbir ke
upar kaun sa achchha lagegaa, Sonam ke upar kaun sa achchha lagegaa,
main matlab gaata hi rehta tha 7/8 ghanTe. 'but as an assistant music
director, my job was to teach each and every song to everyone'. sabko
seekhaana mera kaam tha, chaahe Shreya ho, chaahe Kunal ho, chaahe
Shaan ho, Reecha-ji ko, aur bhi bahut 'singers' aaye jinke gaane
naheen rakhe gaye, lekin inko seekhaane ka kaam mera tha. to poore
tanmaytaa ke saath main apna 100% deta tha, yeh naheen tha ki
main 'singer' hoon to chhupaa loon, karta raha karta raha, 2005 se
leke 2007, yaani 2.5 saal ho gaye the. 'suddenly 6th JUly 2007' ko
jab gaana 'record' honewaala tha to 'decision' lena tha ki kisko
bulaayen. maine Sanjay-ji ko kahaa ki 'sir, let me go to the mike for
1 minute'. 'I remembered my mom, she was too ill', bahut beemaar
theen woh, maine unko yaad kiya aur ek to woh theen aur ek do log the
jinko mujhpe bahut bharosa tha ki mera gaana bahut achchha hoga ek
din, unko yaad kiya main, uske baad jo huya mere ko maaloom hi
naheen, gaana khatam hone ke baad yeh bhi naheen yaad hai ki Sanjay-
ji baiThe hain, Monty bhaai baiThe hain, kaun baiTha hai saamne mujhe
kuchh yaad naheen tha, 'I was just singing'. '25 minutes' mein
gaana 'over' ho gaya.

RB: to woh 25 minute ka jo suroor tha woh aaj tak shrotaaon ke dimaag
par chhaaya huya hai

SH: jee (laughs)

RB: achchha to Shail-ji, aapse yeh sunkar bahut achchha lagaa ki
aapne jo chaahee thi woh aaKhir poora huya. aap yeh bataaiye ki
hamaare jo yuvaa hain, jo is 'line' mein aana chaahte hain, ham sab
yeh to jaante hain ki mehnat rang laati hai aur sangeet mein ji
riyaaz hai woh bahut zaroori hota hai kyunki sangeet woh athaah
saagar ke samaan hai jiski thaah paana mushkil hota hai, hai na?

SH: jee haan

RB: to unko aap kya 'tips' denge ki woh apne 'talent' ko pehchaane.

SH: aap seekh kar aayenge to bahut achchha hogaa kyunki yeh karat
vidyaa hai, aap sunke abhivyakt karna apne aap ko, ki aap ne us cheez
ko sun liya aur uska 'replica' kar diya, lekin kisi gaane ko apnaa
banaa ke gaana, ki 'this is my trademark', ki yeh Kunal ka gaana hai,
yeh Shreya ka gaana hai, yeh Shaan ka gaana hai, yeh Sonu-ji ka gaana
hai, yaa Abhijeet-da ka gaana hai, to unhone apna 'trademark'
banaaya. 'playback singing' mein kya hota hai ki 'on the spot' aapko
apna banaake woh gaana aana chaahiye. aur yeh karat vidyaahai, main
phir se bolta hoon ki aap jitna riyaaz karenge aap utna ismein Doobte
jaayenge, aur yeh bahut lambi 'journey' hai.

RB: thoDaa sa 'trend change' ho raha hai sangeet ka.

SH: jee main boloon, 'playback singing' bahut kam ho gaya
hai, 'character singing' jise ham kehte the woh bahut kam ho gaya
hai, jaise Kishore-da the, Rafi saahab the, woh 'character singing'
karte the, ab 'item singing' ho gaya hai. yeh gaana 'item' maana
jaata hai, ki chalo yeh gaana iske upar sabse achchha lagegaa to
chalo kaun si aawaaz hai jo sabse haTke hai, usko 'try' karte hain.
jo ek chalan tha ki aisi aawaaz aani chaahiye ki jismein 'width' ho,
aisa gale ka Thehraav hona chaahiye, bahut kam 'music directors' hain
jo is cheez ko samajhte hain, is cheez ko apne kaam mein Dhaalte
hain, abhi yeh hai ki gaana chalna chaahiye, yeh naheen ki 'singer'
ke upar gaana banaaya jaaye. jaldi jaldi kaam ho jaana chaahiye.

RB: iska matlab yeh hai ki aaj 'industry' mein kisi ki 'monopoly'
naheen ho sakti, kuchh 'rstablished singers' rahe hain 'industry'
mein jo saalon saal chhaaye rahe 'film industry' pe aur aaj bhi
hamaare dilon pe raaj karte hain. iska matlab yeh hai aaj
jo 'singers' aa rahe hain woh aayenge aur jaayenge?

SH: 'survival of the fittest' (RB laughs). bahut 'tough competition'
ho gayi hai

RB: gaayan ki duniya mein aapke aadarsh kaun hain?

SH: mere paapa

RB: to aaj jab aapke paapa aapko sunte hain to 'critic' hote hain woh?

SH: bahut zyaada, subah subah 'lecture' shuru ho jaata hai ki riyaaz
shuru naheen kiya, aadhaa ghanTaa 'late' ho gaya, yeh kya hai, bahut
abhi bhi bahut DaanT-te hain

RB: aapki yaatra bahut aage baDh gayi hai, aapne riyaaz bhi bahut kar
liya hai, aapko abhi bhi lagta hai ki aapko 'continuous' riyaaz ki
zaroorat hai yaa ab thoDaa sa 'relax' kar sakte hain?

SH: naheen 1000% zyaada zaroori hai

RB: aapki aanewaali jo filmen hain unmein se kaun kaun se pramukh
naam hain?

SH: ek Chamku hai, ek Run Bhola Run hai

RB: ek baat bataa deejiye ki Shail Hada ko, waise to 'time' naheen
milta hogaa, agar 'time' milta hai to, aapki jo umra hai woh 'party'
ki umra hai, to kaam mein, 'party' mein, aur mauj masti mein aap
kitna 'balance' rakhte hain?

SH: 'time' bilkul naheen milta hai, kyunki 'I am assiting'
na, 'assiting' mein bahut, 'background' bhi karte rehte
hain, 'studio' se ghar, ghar se 'studio' bhaagte rehte hain,
itna 'time' milta hi naheen, 'and I love working'. kyunki
itna 'struggle' kiya hai yahaan tak pahunchne ke liye, to 'I love
sruggle'.

RB: to bahut achchha lagaa aap se baaten karke, aap hamaare 'studio'
mein aaye, hamaare shrotaaon se baaten kee, bahut bahut shukriya

SH: 'thank you, its my pleasure!'

THE END

Once he had rocked the audience with his numbers in films like Disco
Dancer, Commando, Dance Dance, Pyar Ke Naam Qurbaan, Love Love Love,
and many more. He became the screen voice of Mithun Chakraborty. The
trio of Mithun, Bappi Lahiri and Vijay benedict had rocked the 80s
decade.

But all of a sudden Vijay vanished, and now he is a Gospel Singer.

To know the reason for this transformation from a Disco Singer to a
Gospel Singer, read the following article. This would surely inspire
you in your life.

http://www.vijaybenedict.com/testimony.html

Regards
Sujoy

Hi,

AIR does not broadcast on the internet, but if u can get the DTH
signals of Doordarshan, u can listen to a number of AIR channels
including Vividh Bharati on your TV.

Below is the VB's website:

http://www.vividhbharati.co.cc

Regards
Sujoy



--- In vividhbharati@..., "Neil" <radioasia1460@...>
wrote:
>
> I live in the US and unfortunately do not get vividh bharti here. Just
> came back from India recently and loved listening to vividh bharti on
> radio there. Just wondering if vividh bharti broadcasts on internet.
> If so, what is the website and if not, someone should start it.
Thanks.
>
> Neleen Chandra
>

I live in the US and unfortunately do not get vividh bharti here. Just
came back from India recently and loved listening to vividh bharti on
radio there. Just wondering if vividh bharti broadcasts on internet.
If so, what is the website and if not, someone should start it. Thanks.

Neleen Chandra

Hi,

Thanks to all of you for your wishes.

Regarding transcripts and running of this group, a major part of the
credit goes to someone who records the programmes that I cannot listen
to, and who doesn't want to be credited. Its only because of her
efforts that members get to read most of the transcripts I post.

Enjoy your stay in this group.

Regards
Sujoy Chatterjee

INSE MILIYE - BHUPENDRA
-----------------------

BH: Bhupendra
RB: Renu Bansal

RB: doston, paarshwa gaayan ki duniya mein yun to bahut si aawaazen
sunaayi dete hain, lekin ek aawaaz sabse alag sunaayi paDti hai, yun
lagta hai jaise bahut alsaayi si ho aur meeThee Khumaari si bhari ho.
jaise jaise woh aawaaz taan leti hai, yun lagta hai koi doshizaa
angDaai le rahi ho. yeh woh aawaaz hai jo kabhi hamaara haath pakaDke
bachpan ki galiyon mein, kabhi gaaon ki meDon par door kisi raah par
le jaati hai jahaan yaadon ke saath saath zindagi ke kitne hi rangon
ke Khoobsoorat ahsaason se hokar ham guzarte hain. kabhi inhone Khud
hi kahaa tha...

--------------------------------------------------------
Clip: meri aawaaz hi pehchaan hai gar yaad rahe (Kinara)
--------------------------------------------------------

RB: yaad aaya aapko? aaj ham ru-ba-ru ho rahe hain Inse
Miliye 'programme' ke tahat paarshwa gaayak Bhupendra se. Bhupendra-
ji, aap ka Vividh Bharati ke 'studio' mein swaagat hai, namaskaar!

BH: namashkaar, bahut bahut shukriya

RB: aap Delhi ke rehnewaale hain, aur Delhi se aap ke kadam jab
Mumbai ki taraf baDhe to woh filmi duniya ke liye hi baDhe the kya?

BH: main Bombay to filmi duniya ke liye hi aaya tha, zyaati taur par
mujhe Bombay aane ka kuchh shauk naheen tha. lekin mujhe kuchh
achchhe logon ne yahaan aane ke liye kahaa tha aur mujhe
unhone 'promise' kiya tha ki 'ham agar aap ke liye koi gaana
banaayenge to aap aakar gaayenge kya?' to maine kahaa ki 'main zaroor
gaayunga'. to aise hi Madan saahab ne mujhe poochha tha Delhi mein,
marhoom Madan Mohan saahab ne aur Chetan Anand saahab ne. unki film
Haqeeqat ban rahi thi to shaayad unko koi nayi aawaaz chaahiye thi.
to unke kehne par main 'film industry' mein gaane ke liye hi aaya tha.

-----------------------------------------------------
Clip: hoke majboor mujhe usne bulaaya hoga (Haqeeqat)
-----------------------------------------------------

RB: lekin haqeeqat yeh bhi hai ki film Haqeeqat mein aap ne ek 'role'
bhi kiya tha aur ek 'role' aap ne Aakhri Khat mein bhi kiya tha.

BH: (laughs) yeh bahut ek ajeeb si baat hai ki jis cheez ke baare
mein naheen socha tha woh thi 'acting'. ki main kabhi filmon
mein 'acting' karoon, yeh baat mere dimaag mein kabhi aati naheen
thi. to main to gaane ke liye aaya tha, pataa naheen Chetan saahab ko
mujhmein kya nazar aaya, mera gaana jo maine gaaya tha mere upar
hi 'picturise' karke aur bahut logon se taaliyaan bajwaayi thi ki,
aur yeh bhi, baDi baat main bolna naheen chaahta hoon ki, yeh
bhi 'announce' kiya tha ki 'I am going to make another Singing Saigal
in the film industry'. to tab main zara kuchh aur dimaag ka hota tha,
maine socha ki aisi baat aadmi bolte rehte hain, 'acting' mujhe
pasand naheen thi 'actually', 'acting' mujhe shuru se hi kuchh lagaav
naheen tha. aap ne agar Haqeeqat 'picture' dekhi hogi to aapne dekha
hoga ki main 'picture' mein se 'suddenly' Gaayab ho jaata hoon,
kyunki uske baad main Bombay se DElhi bhaag aaya, main uske baad
Bombay aaya hi naheen. mujhe zabardasti 'acting' karni paDti agar
main aata to. 'acting' mujhe naheen karni thi. aise mujhse Aakhri
Khat mein gaana gawaakar mujhpar 'picturise' kar lee.

-------------------------------------
Clip: rut jawaan jawaan (Aakhri Khat)
-------------------------------------

RB: Bhupendra-ji, aapne jin gaano ka zikr kiya, woh beshaq itne
sureele itne meeThe hain ki aaj bhi tanhaai mein 'haunt' karte hain.
parde ke peechhe jab aap chale gaye, paarshwa gaayan jab aap ne apna
liya, to paarshwa gaayan mein Gazlon ka daaman aap ne kis tarah
thaamaa?

BH: achchha 'question' hai kyunki mujhe pehli baar kisi ne poochha
hai, jab maine filmon mein 'playback' shuru kiya tha to us samay
mere 'favourite playback singers' the, Mohd Rafi saahab the, Talat
Mahmood saahab the, Kishore dada the, Manna Dey saahab hain, inko
dimaag mein chhoDke mujhe aur kuchh, doosra gaana jamta hi naheen
tha. to mere dimaag mein ek baat thi ki yeh log bahut hi
zabardast 'singers' hain, dimaag mein kya yeh to sahi baat thi aur
bahut zabardast log the aur hain bhi, to inse achchha main naheen gaa
paayunga yeh main sochta rehta tha, ki 'this is one thing I will
never be able to do'. to gaana bhi mera chalta raha, main
thoDa 'guitar' bhi bajaata tha us waqt, 'Spanish Guitar', to usmein
bhi maine 'film industry' mein kaafi naam kamaaya, to main kya huya
ki main 'side by side' main 'guitar' bhi bajaata tha, koi gaane ke
liye bulaata tha to wahaan bhi chala jaata tha, to aisa karte
karte 'almost 15 years' guzar gaye, tab meri Mitali se mulaaqaat
huyi, 'she was already singing on the stage', Gazal gaati thi, 1983-
84 mein 'we got married', shaadi ho gayi. main 'stage' ke saKhti
Khilaaf tha, mujhe 'stage' mein gaane se baDi takleef hoti thi. yeh
un dino ki baat hai jab main Gazlen 'compose' karta tha aur apne liye
yaa apne doston ke liye hi karta tha, Khud hi ham ghar mein baiThke
gaate the. lekin 83-84 mein 'I was convinced', jaise Kishore dada
mujhse kahaa karte the ki ''stage' pe gaaya kar', meri ThoThi
pakaDkar kahaa karte the jaise chhoTe bachche ko kehte hain, ''stage'
pe gaaya kar, gaayega naheen to 'popular' kaise hogaa!' to us waqt
main samajhta naheen tha unki baat. baad mein 'when I started singing
gazal on the stage', kyunki filmi gaano ka mera 'stage' pe itna lamba
chauDaa 'programme' naheen ho sakta tha, isliye main jo Gazlen gaata
tha yaa 'compose' karta tha, yaa jo bhi 'record' huye the, 'I started
singing those gazals on stage, and believe me, I felt for it'. mujhe
itna achchha lagaa ki 'instant' jo ek 'recognition' milti
hai 'audience' se, aur itne dino se jo log kehte the ki 'Bhupendra
ko 'stage' pe le aaiye', Mitali se kehte the, mere doston se kehte
the, to 83-84-85 mein mera jo jhukaav tha woh filmon se, geeton se
nikalkar Gazlon mein aur 'stage' ki taraf chala gaya, aur
kaafi 'records' banaaye maine, jo kaafi bikte hain, log yaad karte
hain abhi bhi.

RB: Bhupendra-ji, gaayan ki duniya mein aapki ek alag pehchaan hai,
iske peechhe kaun si prerNaa hai?

BH: prerNaa to shaayad kudrat hi hai, main to yeh maantaa hoon ki
bhale maine kam gaane gaaye hain 'film industry' mein, lekin jitne
bhi gaaye hain woh logon ko bahut pasand hain aur bahut 'popular'
hain, aur aaj bhi jab main aur Mitali gazlon ke 'programme' mein
jaate hain, to 'belive me' ki aaj bhi un gaano ki do do baar
farmaaishen aati hain. 'reason' shaayad yeh ho sakta hai ki meri
aawaaz mein shaayad mera apnaapan hai, maine aawaaz mein kisi
ki 'copy' naheen kee, mera apna 'style' hai, mujhe kudrat ne jo
aawaaz baKhshi hai, jo 'reward' mujhe diya hai, main usi ko aage
istemaal kar raha hoon, main ismein koi banaawaT naheen kiya. main
kisi aur ki aawaaz ko naheen apnaaya, meri apni hi 'style' hai, mera
apna hi aawaaz hai, shaayad isliye main thoDaa sa alag lagta hoon.

-----------------------------------------
Clip: ek akela is shahar mein (Gharaunda)
-----------------------------------------

RB: Bhupendra-ji, kuchh saal pehle baazaar mein jaise Gazlon ka
ek 'boom' sa aa gaya tha, achaanak bahut saare log bahut saari
cheezen gaa rahe the aur Gazlen hi Gazlen chaaron taraf se sunaayi
deti thi. Gazal aajkal Khaamosh kyun hai?

BH: hamaare mulk mein bahut se 'changes' aa rahe hain, aur
woh 'changes' hamaari jo 'culture', jo sabhyataa hai, usse ThoDe se
haTke hain. to 'recording companies' shaayad yeh sochte hain ki
Gazals ke 'records' shaayad naheen bike, aur isliye woh
zyaada 'promote' karte hain yeh 'pop music albums', aur yahi 'reason'
hai ki filmi Gazlen yaa aisi filmen jinmein kuchh 'authentic' Gazlen
ho sakte hain woh aapko zyaada nazar naheen aa rahi hai. yahi
kaaran 'filmmakers' ki taraf se bhi hai, unki bhi yeh zimmedaari honi
chaahiye thi ki hamaari 'culture' ko zindaa rakhen. main yeh sochta
hoon ki 'film directors', 'actors', 'music directors', 'artistes'
log, inke upar bhi ek zimmedaari hoti hai, ek 'moral obligation' inke
upar hoti hai, ek 'moral' zimmedaari hoti hai, kyunki agar bhagwaan
ne inko 'art' diya hai to isko achchhe 'side' mein istemaal karen,
usko 'misuse' na kare, 'art' ke naam pe kuchh Galat baat na kare, jo
ki logon ko behkaaye, jo ki logon ko Galat raaste pe Daale, jo ki aaj
log thoDaa sa naam aur paisa kamaane ke liye thoDi si 'controversy
create' kar lee, aur naam kamaa liya, paise kamaa liye, kitaab likh
Daali, to yeh baDe saste Dhang hain apne aap ko 'popular' karne ke,
to apne hi 'culture' se ham bahut door jaa rahe hain, jiska mujhe
saKht afsos hai aur main ummeed karta hoon ki bahut jald logon ko
kuchh smaajh aaye ki apni 'culture' ko zinda rakhne ki koshish kee
jaaye, yeh unke haath mein yeh zimma hai, bahut baDe baDe 'film
producers', bahut baDe baDe 'music directors', 'film directors', yeh
unke haath mein hai ke woh hindustaan ke 'culture' ko isse zyaada na
giraayen, aur bachchon ko kuchh achchhi baaten seekhaayen, kyunki
yahi bachche baDe hokar kya karenge? jo aaj dekh rahe hain yeh to
naheen karenge, isse sau guna zyaada hi hoga na! to yeh 'reason' hai
ki filmon mein Gazlen aajkal kam sunaayi der rahe hain, lekin
sunnewaale hain, ham log 'programmes' mein jaate hain to sunnewaale
wohi hain

---------------------------------------------------------------
Clip: kabhi kisi ko mukammal jahaan nahin milta (Ahista Ahista)
---------------------------------------------------------------

RB: Bhupendra-ji, har cheez ka ek daur aata hai, samay gatisheel hai,
aata hai aur nikal jaata hai. ham ummeed karte hain ki sangeet ka jo
sunehra daur jo dekha hai logon ne, ummeed karte hain ki woh phir
aaye aur aanewaali peeDhee us daur ko dohraaye.

BH: main aap ke saath praarthana karoonga ki jo aap soch rahi hain
kaash aisa ho, kaash kuchh logon ko itni samajh aaye ki is baat par
Gaur kare ki hamaari aanewaali peeDhiyon ko hindustaani hi rehne de,
kyunki jo ham denge wohi 'coming generation' usko 'grasp' karegi.
unko kuchh achchhi cheez denge to woh kuchh achchhi cheez seekhenge,
aur kuchh Kharaab cheez denge to woh Kharaab hi seekhenge.

RB: Bhupendra-ji, aaiye yahaan se ek baar phir muD jaate hain
kavitaaon aur shaayari ki taraf. kavitaa likhne ka yaa shaayari
paDhne ka ek tareeka hota hai, ek niyam hota hai, yaani kavita likhne
yaa shaayari likhne mein 'meter' ka dhyaan rakha jaata hai. aur aap
ne kai geet aise gaaye hain jinmen 'meter' ka dhyaan naheen rahaa,
yaani aise 'experiment' keh sakte hain jaise film Mausam ka ek geet
hai, aise 'experiment' ko aap kya kahenge?

BH: usko 'black verse' kehte hain, 'black verse' yaani jiska 'meter'
naheen hota hai, jaise aap mujhse baat kar rahi hain, jaise ham aapas
mein baat karte hain, 'its called black verse', 'actually black
verse' gaayi naheen jaati, usko gaana mushkil hota hai, usko 'meter'
pe le jaana mushkil hota hai, lekin phir bhi main aap se kehna
chaahta hoon ki maine ismen 'experiment' kiya tha, maine ek 'record'
banaaya tha, woh jo Shaayar tha uska naam tha, aur usmein jitne bhi 6
ke 6 Gazlen theen, woh 'black verse' theen. to main is 'experiment'
ko bahut 'challenge' se leta hoon. yeh kaam zara, 'you get to do
something different you know'. Mausam ka jo gaana hai, 'beginning' ka
jo sher hai ki "dil DhoonDta hai phir wohi fursat ke raat din", uske
baad Gulzar saahab ne kitni hi shaayari 'black verse type' ki likhi
hai, 'and I enjoy singing it always'.

-----------------------------------------------------------
Clip: dil DoonDta hai phir wohi fursat ke raat din (Mausam)
-----------------------------------------------------------

RB: Bhupendra-ji, har woh geet yaa har woh Gazal jo aap ki aawaaz se
sajaa hai, aap ke bachche ke samaan hai, yeh poochhna to GustaKhi
hogi ki aap ko apna kaun sa bachcha sabse zyaada achchha lagta hai.

BH: yeh baat to sahi hai ki jo bhi 'composition' karta hoon, woh apne
bachche ki tarah hi hoti hai, lekin phir log jo hain aage woh
bachchon ko alag alag kar dete hain, kisi ko kuchh pasand aata hai,
kisi ko kuchh pasand aata hai, to main jitni bhi 'composition' karta
hoon, jo main aur Mitali banaate hain, unmein kuchh na kuchh sabke
liye rakhte hain, jo ki mehfil mein, abhi sanjeeda Gazlen to log
naheen sunte, haalaanki sanjeeda Gazlen gaana aur
sanjeeda 'composition' gaana mera 'subject' hai 'you know, I love to
sing it', lekin phir kuchh 'romantic' Gazlen, kuchh chheD-chhaaD ke
geet, yaa kuchh sharaab ke geet yeh sab kuchh gaane paDte hain, so
aap mujhe poochhen to main jitni bhi 'compositions' karta hoon, 'I
love them, I like them'.

RB: zindagi mein aisi koi Khwaahish jo abhi tak poori na huyi ho?

BH: bas aur achchha gaa sakoon, aur logon ki Khidmat kar sakoon, aur
achchha gaata rahoon!

----------------------------------------------------
Clip: zindagi hai ke badalta mausam (Ek Naya Rishta)
----------------------------------------------------

THE END

Many happy returns to Sujoy, who is preserving some of our heritage.
Shirish Koyal

2008/10/14 Anup Manchalwar <anupmanchalwar@...>:
>
>
>  Hi Sujoy,
>
> Many Many Happy Returns of the day... God bless you always and keep you
> healthy, wealthy. You started and maintained this club so well. We have lot
> of things in store just because of you. We could really hear some missed
> interviews of greats like Lataji, because of you. We all are thankful to
> you. Wish you a very happy birthday.
>
> Cheers!
>
> - Anup Manchalwar,
> Pune
>
>
>
>
>
> ________________________________
> Bollywood news, movie reviews, film trailers and more! Click here.
>
>

Interview of Noorjehan by Ameen Sayani
--------------------------------------

First Broadcast on 17th & 24th March 1982 in INSE MILIYE
--------------------------------------------------------

Rebroadcast under 'SWARNA SMRITI' series on 30 Aug 2008
-------------------------------------------------------


NJ: Noorjehan
AS: Ameen Sayani

----------------------------------------
Song: aawaaz de kahaan hai (Anmol Ghadi)
----------------------------------------

AS: Hindustaan ke karoDon premeeyon ki taraf se main Noorjehan ka
swaagat karta hoon. Noorjehan-ji, swaagat to aapka kar liya,
istakbaal to aapka kar liya, lekin saath saath istakbaal ke ek
chhoTi si shikaayat bhi karoonga, shikaayat yeh hai ki baDi der kee
mehmaan aate aate, 35 saal lagaa deeye aap ne, ham intezaar karte
rahe aapka. aap ke gaano se, puraane geeton se bhi aur naye geeton
se bhi apna dil behlaate rahe. ho sakta hai aap ko bhi Hindustaan ki
yaad aati rahi ho, to kya aap bataayengi ki woh kaun se log hain,
woh kaun si ghaTnaayen hain, waaqayaat hain, woh kaun se maahaul the
jinse aapna saath chhoTa tha 35 saal pehle, aur jin sabki yaad aap
ko aati rahi? shuru agar aap karen un logon se jo aap ke saathi rahe
filmon mein, sangeet ki duniya mein, aur jinhe aap yaad karti raheen?

NJ: aap ko yeh sab to maaloom hai, yeh sabon ko maaloom hai ke kaisi
nafsaa nafsee thi jab main yahaan se gayi. mere miya mujhe le gaye
aur mujhe unke saath jaana paDaa, jinka naam Syed Shaukat Hussain
Rizvi hai. yeh to maaloom hai na?

AS: jee

NJ: us waqt agar mera bas chalta to main unhe samjha saktee, koi bhi
apna ghar ujaaDkar jaana to pasand naheen karta, haalaat aise the
mujhe jaana paDaa. aur yeh to aap naheen keh sakte ki aap logon ne
mujhe yaad rakha aur maine naheen rakha, apne apne haalaat hi ki
bina pe hota hai kisi kisi ka waqt nikaalna, aur bilkul yakeen
karen, agar main sabko bhool jaati to main yahaan kaise aati!
(laughs). magar mere bachche bahut chhoTe the, unki parvarish, unka
paDhaana, aur wahaan jaakar bhi allaah ki meherbaani se mujhe bahut
pyaar milaa, main dekhti hoon ki wahaan par bhi log itna pyaar bahut
kam logon ko karte hain. is maamle mein main baDi Khushnaseeb hoon,
jisko jitna pyaar diya jaata hai, mujhe hazaaron darje zyaada wahaan
pyaar milta hai. magar yahaan ka main udaas thi, sochti thi sab
logon se milne ko, meri yeh tamannaen theen, aur duyaaen theen, ki
yaa allaah, (laughs), sabko marna to hai magar mujhe marne se pehle
ek baar mere bhaai bahan, mere dost, jinmein ek to bechaari allaah
ko pyaari ho gayi, Nargis-ji, aur uska baDaa Gham mujhe raha, kuchh
saal pehle woh mujhe 'airport' pe mili theen, jab ki main waapas aa
rahi thi Ceylon se, iska badaa Gham huya ki is waqt jab main aayi
yahaan to woh na mili, aur yeh tamanna thi ki main Dilip-ji ko
miloon, Pran-ji ko miloon, aur yahaan par aapaa, Mrs Mehboob hain,
yeh log hain, Sitara-ji hain, Sajjad saahab 'music director', aur
Naushad saahab, Koregaonkar saahab to guzar gaye, matlab yeh
tamannaayen meri hamesha rahi, us waqt bhi in logon ne mujhe itna hi
pyaar diya, magar ab aayi hoon to mehsoos kiya ki usse kahin zyaada
inhone pyaar, jitni meri soch thi, usse kahin, iska main
aapko 'limit' hi naheen bataa sakti, jitna in logon ne yahaan aur
aap logon ne pyaar diya hai. main kaise bhool sakti hoon Dilip-ji ke
pyaar ko, Pran-ji ke pyaar ko, Lata-ji meri bahan, itna mujhe pyaar
karti hain, ki unhone kisi des mein bhi jaakar mujhe naheen
bhulaaya. barson pehle woh mujhe Wagah Border par milne aayeen, un
dino to 'telephone' vagerah bhi kar leti theen, phir aisa huya ki
kai saal hamaari baat na huyi, aur main 6-7 saal pehle yahaan se
guzar rahi thi, to woh 'airport' par bhi milne aayeen Nargis-ji ke
saath. phir pichhle dino main New York mein thi, woh Detroit mein
theen. sirf meri Khaatir woh Detroit se New York aayeen aur teen
dino tak woh meri New York Hilton mein hi Thehreen. aur mujhe teesre
din ilm huya ki jab woh kehne lagi ki 'didi, aaj main jaa rahi hoon,
main Detroit se yahaan sirf aap hi ke liye aayi hoon', to mujhe itni
Khushi huyi, woh mujhe itna pyaar karti hain, main kaise bhool sakti
hoon, yeh unka baDappan hai ke... aap yakeen keejiye jis din main
yahaan aayi, mera saara kamra phoolon ke guldaston se bhara huya
tha, aur main soch rahi thi, 300 guldaste honge mere kamre
mein, 'cards' the sabke jo log wahaan aa naheen paaye, aur Lata-ji
aur Asha-ji '10 minute' ke liye mere kamre mein aaye, aur unhone
mujhe itna pyaar diya, yahaan R D Burman saahab bhi mile,
saare 'music director'-on se mulaaqaat huyi, main jitna soch rahi
thi usse hazaar darje zyaada pyaar mila hai. Yusuf-ji, Pran-ji, in
logon ne apna kaam band kar rakha hai aur har roz raat ko, aap log
dekh rahe hain main yahaan 20-22 dinon se hoon, koi din koi raat
mera aisa naheen ki main baazaar jaa sakoon, siwaay iske ki main
sirf 'dinner' aur 'lunch' le rahi hoon, aur sab log mere liye
apna 'time' waqt kar chuke hain. Yash Chopra saahab, unke baDe bhaai
B R saahab, unki begum, mujhe bahut in logon ne pyaar diya, aur 35
baras maine kaise guzaare is din ka intezaar karte huye ki main in
sab se miloongi, to phir aap kaise keh sakte hain ki maine aap logon
ko yaad naheen kiya?

AS: main mehsoos kar rah hoon Noorjehan-ji aur mujhe yakeen hai ki
sunnewaale muttafiq honge mujhse ki jo aawaaz aapki us zamaane mein
thi jab aap yahaan pe theen, is aawaaz mein katai fark naheen aaya
hai, wahi shoKhi, wahi jawaani, wahi shabaab, wahi kashish jo pehle
thi woh aaj bhi hai, aur ab bhi jo aap gaane gaati hain woh bilkul,
woh yaad dilaate hain us maahaul ke, us zamaane ke, jab aap Anmol
Ghadi vagerah ke gaane gaaya karti theen, aur gaane aap ke har dil
mein basaa karte the aur aaj bhi bas rahe hain. kuchh gaanewaalon ka
zikr karen, un gaayakon ka jinke saath aap ne gaane gaaye the
Hindustaan mein aur aajkal gaa rahi hain Pakistan mein?

NJ: yahaan maine gaane Surendra-ji ke saath Anmol Ghadi mein gaaye
the, Durrani saahab ke saath Mirza Sahiban mein gaayi hoon,

---------------------------------------------------------
Song: haath seene pe jo rakh do to qaraar (Mirza Sahiban)
---------------------------------------------------------

NJ: Rafi saahab, unka bhi mujhe baDa dukh huya tauba. Mukesh-ji to
itnhe pyaare, jin dino mein main yahaan aayi hoon, shuru shuru mein,
to meri 'picture' yahaan 'release' ho chuki thi Khandan. main chhoTi
thi, to aaj tak mujhe Mukesh-ji ka woh pyaar naheen bhoolta, woh
mile mere miyaa ko ki 'bhai, yahaan aapki shaadi mein to koi jalsa
hi naheen ho raha!' 17 din huye mujhe yahaan aaye to meri shaadi ho
gayi Shaukat saahab se, to unhone sabko ikaTTha kiya, un dino mein
to 'industry' mein yeh baat to naheen thi na, matlab, 38 saalon mein
fark to aata hai, unhone sabko ikaTTha kiya aur sabko DaanTaa
ki 'hamaari itni pyaari laDki wahaan se aayi ha', meri shaadi ke
liye unhone wahaan ek 'hall' liya, Khud gaaye baaja leke aur sab
laDkiyon ko Khoob 'dance' karwaaya, aur sab 'artsites' ko kahaa ki
Khoob shor machaayo, itni Khushi manaayo ki jaise yeh hamaari beTi
hai. itna pyaar diya unhone, main aaj tak Mukesh saahab ka ahsaan
naheen bhoolee, mujhe ab tak yaad hai. aur jab main yahaan aayi to
pehle to mujhe 'award' mila, mere naam ke saath Malika-e-Tarannum
usi din se lagaa diya gaya, jo main samjhoongi ki yeh aap hi logon
ka inaam hai, 'public' ka pyaar hai. aur Rafi saahab ke saath mujhe
gaana gaana paDaa Jugnu mein, mere miya ne unko pasand kiya, woh
ghar pe aaye to itna, log kehte hain ki 'main is tarah kehti hoon ki
kaam naheen karne deti', koi bhi saari umar kaam karne ke liye to
yahaan naheen aaya, meri aadat bilkul 'opposite' hai, mere saath koi
naya aata hai to main uska dil rakhti hoon, aur Daraane ki koshish
naheen karti, balki usey is 'line' pe laane ki koshish karti hoon,
yeh apni apni soch hai ki kuchh is tarah ki baaten uD jaaye, jiske
paas waqt zyaada hai woh Galat baaten bhi soch sakta hai, magar aap
log, ham log itne masroof hain ki hamein waqt hi naheen hai ki ham
yeh Galat baaten soche. Rafi bhaai ke saath gaana mujhe gaana paDaa,
to pehle din woh aaye mere paas, to yakeen karen tki woh kaamp rahe
the, ki pataa naheen main koi hauwaa hoon, khaa jaayungi unko, phir
Shaukat saahab ne unhe samjhaa, maine kahaa 'main khaana pakaati
hoon apne haath se'. unhone kahaa ki 'main khaana apna lekar aaya
hoon'.

----------------------------------------------------
Song: yahaan badla wafaa ka bewafaai ke siwa (Jugnu)
----------------------------------------------------

NJ: Dilip saahab bhi un dino hamaare yahaan kaam karte the Jugnu
mein, jinhe ham pyaar se Yusuf-ji kehte hain, to Shaukat saahab ke
paas bahut dosti thi, to main khaana pakaati thi, unhe bhi khilaati
thi, aur woh pyaar ab tak naheen bhoola, aur main samajhti hoon ki
yeh ek Khazaana jo main leeye jaa rahi hoon. yahaan aakar maine
mehsoos kiya ki jaise yeh log mujhe sadiyon se jaante hain. yeh log
mujhe bahut apne kareeb mehsoos huye. woh kehte hain 'Noorjehan-ji,
aap kisi janam mein hamaari theen!' (laughs)

AS: aap ne farmaaya 'kisi janam mein hamaari theen', main to yeh
kahoonga ki har janam mein aap hamaari hi rahengi aur aap ke gaane
hamesha hamaari zindegi ka ek hissa bane rahenge, jo ek gaana hai
woh hamaare liye kabhi na gaayiega Noorjehan-ji aur woh yeh
ki "mujhe pehli si mohabbat mere mehboob na maang" (both laughs).
aapki mohabbat, aapka Khuloos hamesha ham sab ke saath rahe.

NJ: aap logon ke liye thoDe kahi jaa rahi hoon, woh to nazm itni
pyaari hai, aise uske utaar chaDaav hai, aisi uski dhun hai, aap
jaise 'artiste'-on aur fankaaron ko sunaane ka to dil chaahta hai.

-------------------------------------------------------------
Song: mujhe pehli si mohabbat mere mehboob na maang (Nonfilm)
-------------------------------------------------------------

AS: Noorjehan-ji, aaj aap ke saamne baat karna bhi mushkil ho raha
hai, jo sangeet ke shaukeen hai woh aapke sangeet ke baare mein,
aapke gaane ke baare mein yeh sawaal zaroor poochhna chaahenge, unki
taraf se main poochh leta hoon, woh yeh ki sangeet ki duniya mein
aap ne qadam kaise rakha, shuru kaise kiya, kuchh 'classical music'
se shuru huya tha, yaa Ghazalon se, geeton se?

NJ: gaana mera shuru huya hai, jab main is duniya mein aayi, jab
mujhe mehsoos huya ki main is duniya mein hoon, to allaah ki aisi
den thi ki mujhe mehsoos huya ki main gaati hoon. aur jin jin logon
ne sunaa mujhe, misaal ke taur pe main 6 baras ki thi, to maine
pehli baar sunaa Akhtaribai Faizabadi ki Ghazal, "deewaana banaana
hai to deewaana banaa de", maine uski 'copy' bilkul waisi hi kar dee
jaisa woh gaayeen theen 20 yaa 30 baras ki riyaaz ke baad. usimein
Mukhtar Begum saahiba ka zikr baDaa zaroori hai, unki Ghazal sunee
to uski 'copy' kar dee. to phir mere waalid saahab ko logon ne kahaa
ki 'dekhiye, yeh ek allaah ki den hai, is bachchi ko, aur aap isko
zaroor 'classical' ki taaleem dilwaayen', jiske bina pe
mujhe 'classical'ki taaleem dilaaee gayi, aur maine 14 baras ki umar
tak 10-10 aur 12-12 ghanTe 'classical' ka riyaaz kiya. magar
meri 'ideal' bankar reh gayeen Mukhtar Begum, allaah unhe zindagi
de, woh Karachi mein rehti hain, aur woh mere dil ke bahut kareeb
hain. jab main chhoTi si thi to main unko 'stage' pe sunoo, main
kehti thi ki 'allaah miya, main itni baDi hokar, aisi hi
safed 'saree' pahankar, aur main itni hi 'public' se daad liya
karoongi jaise yeh gaati hain!' aur unki bhi duyaaen mere saath
hain. woh mere abbu ko kehti theen ki 'baaba, yeh apne waqt ki
inshaallah ek hi hogi'.

---------------------------------------------------------
Song: jawaan hai mohabbat haseen hai zamaana (Anmol Ghadi)
---------------------------------------------------------

AS: kuchh sangeet ke baare mein bataaiye. yahaan par to aap ne jitne
gaane gaaye ab tak zindaa jaaved hain, har ek ke dil mein base huye
hain, wahaan kaun kaun se gaane aapko gaate waqt bahut pasand aaye?

NJ: Intezaar ke gaane sabhi ko yaad hai mera Khayaal hai, uske baad
Dupatta ke gaane, Anarkali ke gaane, Dosti ke gaane. Heer Ranjha
mein Khurshid Anwar saahab ka 'music' tha, Punjabi 'picture', mera
Khayaal hai wahaan ho 'picture'-en ho rahi hai Punjabi mein, woh
baut umdaa ho rahi hain, Urdu mein bhi achchha huya. aur ab jo nayi
paudh uThi hai unmein, pehle huye the Rashid Atre saahab, unke bahut
saari 'picture'-on maine kaam kiya tha, Mausikaar vagerah, ab unke
saahabzaade Wajahad Atre saahab, bahut Khoobsoorat kaam kar rahe
hain, yeh aajkal ki hamaari nayi paudh jo hai, inmein Altaf Hussain
Tafu saahab hain, yeh tablaa nawaaz hain, yeh apni misaal Khud hain
tabley mein, aur ab ismein shauk huya shuru to maashaallah ismein
bhi bahut achchhe huye. aur ek Abdullah saahab hain, woh bhi kamaal
ke hain, jitni taareef karen kam hai, bahut 'intelligent'
hain, 'genius' log hain, jo hamaare apne Nazir Ali hain, unka apna
ek Dhang hai, apna ek andaaz hai dhun banaane ka, woh kisi se naheen
miltaa. ek Nazar Hussain saahab hain, inhone Ghazlen mujhse gawaai
hain 'video' pe, mere wahaan 13 'programme' huye TV par, aur
13 'programme' mein mera Khayaal hai unke 11/12 GhaZlen hain. yeh
apne misaal aap hain, aap sunenge bhi, main pasand karoongi agar aap
saamaeen ho sunaayenge bhi, aur ek nayi cheez hogi, Gazal ka andaaz
badlaa hai, yeh zaroori naheen ki Gazal mein itni lambi aavart lee
jaaye ki aadmi doosra ghabraa jaaye aur agar "door" kahaa jaaye to
itna "dooooooooor" kahaa jaaye ki jab tak aap "door" kahen ham ghar
se hokar aa jaayen (AS laughs). yeh na kiya jaaye, balki 'public'
jaisa chaahti hai, waisa karen. misaal ke taur pe "dil hi dil mein
sulag ke bujhe ham aur sahe Gham door hi door", yeh Zia Jalandhari
saahab hain hamaare, TV ke, MD saahab hain, Pindi mein rehte hain,
inhone mujhe yeh Gazal dee aur Nazar bhaai ne baDe Khoobsoorat
andaaz mein banaaee. uske alfaaz hain, main phir se arz
karoongi, "dil hi dil mein sulag ke bujhe ham aur sahe Gham door hi
door, tumse kaun si aas bandhee thi tum se rahe ham door hi door".
to isko unhone itni Khoobsoorti se banaaya hai ki woh jaldi hi
se "door" bhi kahaa jaata hai, "door" ki 'feelings' bhi hoti hai,
mehsoos hota hai ki waaqai "door" kahaa hai, aur doosri 'line' bhi
jaldi aa jaati hai.

----------------------------------------------------------
Song: dil hi dil mein sulag ke bujhe ham (Non-film Ghazal)
----------------------------------------------------------

AS: mera Khayaal hai yeh Gazal sunkar dooriyon ko nazdeekiyon mein
badal denge.

NJ: aur ek inhone ek aur Gazal banaaee hai, iska dekhiye bair kitna
ajeeb hai, dhun banaanewaale ko zaroor sochna paDegaa, magar mushkil
banegi itni achchhi dhun, yeh zaroor aap 'please' sunaayen. "jab yeh
jaan-e-hazeen baKht-e-aalaam huyi, woh saath kaise kaise badnaam
huyi, haaye woh kaisa Khwaab tha, barson beet gaye jab se aankhen
kholee neend haraam huyi"

---------------------------------------------
Song: jab yeh jaan-e-hazeen (Non-film Ghazal)
---------------------------------------------

NJ: ek Ghazal aur hai, yeh bhi Nazar bhaai ki dhun hai, "dil
dhaDakne ka sabab yaad aaya, woh teri yaad thi ab yaad aaya", yeh
hamaare Nassir Qazmi saahab, inteqaal kar gaye, magar main kya
bataayun ki inki kitni Ghazlen mujhko pasand hai, kaash allaah waqt
degaa main inki aur Ghazlen gaayungi, iski dhun bhi Nazar bhaai ne
utni hi achchhi banaaee hai, jitni Khoobsoorat likhi huyi hai.

-------------------------------------------------------
Song: dil dhaDakne ka sabab yaad aaya (Non-film Ghazal)
-------------------------------------------------------

AS: Noorjehan-ji, ek aaKhri baat main poochhoonga, balki guzaarish
hai ek chhoTi si, woh yeh ki aap ne apne baare mein bahut kuchh
bataaya, ab kuchh thoDaa saa pyaara sa sandesaa de de un gaayakon ke
liye, un sangeetkaaron ke liye, woh jo aap jaise achchhe achchhe
gaayakon aur sangeetkaaron ko yaad karte huye apne kaam mein aage
baDhte jaa rahe hain. aap unke liye koi sandeshaa de den.

NJ: meri duya hai ki allaah in logon ko din duguni raat chauguni
tarakki de, aur yeh log isi tarah mehnat karen aur is kaam ko isi
tarah aur aage baDhaayen. aajkal ke bachche jo gaana shuru keeye
huye hain, unke liye bhi zaroori hai ki woh 'classical' ki buniyaad
qaayam karen. isliye bachchon ke liye yeh paiGaam doongi ki yeh
togaana aisi cheez hai ki aap isey banaayenge to yeh banegaa, lekin
banegaa mushkil se. iske liye waqt chaahiye, apni zindagi waqt karna
chaahiye. aur sab logon ko, sunnewaalon ko, aaj ke din ki main
mubaaraqbaad kehti hoon, allaah hazaaron saal aisi hi bahaaren
laayen aur Khushiyaan de, aur mera sabko salaam!

---------------------------------------------------------------
Song: mere bachpan ke saathi mujhe bhool na jaana (Anmol Ghadi)
---------------------------------------------------------------

THE END

RAAG ANURAAG
------------

Programme presented by LAXMIKANT (rec in 1974)
----------------------------------------------

Re-broadcast on 29 Sep 2008 under SWARNA SMRITI Series
------------------------------------------------------

sunnewaalon ko LAXMIKANT PYARELAL ka namaskaar! aur bhaaiyon maaf
keejiyegaa, mere saathi Pyarelal-ji zaroori kaam ki wajah se naheen
aa sake, isliye aapki sevaa mein main hi haazir ho gaya hoon. aap ke
is Raag Anuraag 'programme' mein, kyunki geet sangeet ki hi charcha
hoti hai, yahi sochkar main filmi duniya ki uljhano ko kinaare
rakkhaa, aur aapke liye lok dhuno par aadhaarit gaane chun laaya
hoon. pehla gaana hai film Roti Kapda Aur Makaan ka. jee haan, jab
se aadmi ne janam liya hai, isi chakkar mein bechaara des se pardes
pahunchaa, magar ghar mein baiThi huyi premikaa suhaane mausam mein
akeli des kaise rahe, man ki aag se jab tan jhulasne lagta hai, to
mukh se nikle huye shabd bhi virah ke geet ban jaate hain. isi ki ek
misaal hai Lata-ji ka yeh gaana, aap isey gaaon ki kisi alhaD baalaa
ki pukaar bhi samajh sakte hain.

------------------------------------------------------
Song: haaye haaye yeh majboori (Roti Kapda Aur Makaan)
------------------------------------------------------

aap ne aksar saDak par majmaa jamaaye madaariyon ko khel dikhaate
huye dekha hogaa! unke gaane ka 'style' waise to seedhaa saada hota
hai, magar jo baat unhe kehni hai gaakar keh jaate hain. aur Khaas
baat yeh hai ki jitne madaariyon ko aap gaate huye dekhenge, sab ek
hi jaise gaate honge. isiliye unki gaayiki ko ham 'folk' samajhte
hain. aur haqeeqat to yahi hai ki ham film sangeetkaar bhi ek tarah
se madaari hi hain. kyun Theek hai na! haan, to film Roti mein
tamaashaa dikhaane ki ek 'situation' nikal aayi, hamne socha ki
madaariyon ka 'folk' tareeka hi kyun na apnaaya jaaye! to leejiye
madaari Kishore Kumar ki aawaaz mein yeh gweet suniye.

----------------------------------------------
Song: naach meri bulbul ke paisa milega (Roti)
----------------------------------------------

yeh aap sab jaante honge ki hamaara lok sanskriti aur lok sangeet
prem gaathaayon se bharaa paDaa hai. yahi wajah hai ki har
sangeetkaar ne apne apne Dhang se filmon mein lok geeton ka sahaara
liya hai. ham bhi avsar milne par kabhi chuke naheen. misaal ke taur
par Raj Khosla-ji ki film Do Raaste, Mera Gaon Mera Desh, aur
Kachche Dhaage mein aap ko Rajasthani lok geeton ki jhalak mili
hogi. Khosla-ji ki doosri film, Prem Kahani, ismein bhi yahi
parampara qaayam hai. is film ka naam hi Prem Kahani hai, aur geet
ab sun hi leejiye, yeh bhi ek prem kahaani hi hai.

-------------------------------------------------------
Song: prem kahaani mein ek laDka hota hai (Prem Kahani)
-------------------------------------------------------

is thoDe se samay mein kuchh baaton se aur kuchh geeton se maine aap
ka manoranjan kiya. isi tarah phir kabhi milenge!

THE END

JUBILEE JHANKAAR - GOLDEN JUBILEE CELEBRATION OF VIVIDH BHARATI
---------------------------------------------------------------

INTERVIEW OF NOTED GRAMOPHONE RECORDS COLLECTOR V S DATTA
*********************************************************

PART 3
------

VSD: Virendra Singh Datta (V S Datta)
KPS: Kanchan Prakash Sangeet


VSD: Saigal ko samajhne ke liye thoDa Gaur se sunna paDta hai,
kyunki doosre gaano mein 'orchestra' aa jaata hai, Saigal saahab ke
gaano mein 'orchestra' itna naheen rehta tha, lekin unke gaano ki ek
baar agar lat lag jaaye, main aap ko bataayun, main jab chhoTa tha
mujhe Saigal saahab se itni chiDh thi, mere ghar mein jo 'records'
the Saigal ke maine toD deeye, ghar mein taaki koi bajaaye na. phir
ekdam se jab baDaa huya, ek 'friend' ke ghar gaya to khiDki
waala 'gramophone' tha wahaan, to usmein usne lagaaya "ab main kaa
karoon kit jaayun". ekdam chhan ke jo aawaaz aayi main ekdam paagal
ho gaya, arey yeh itna achchha gaate hain yeh aaj mujhe pataa lagaa.
uske baad jitne 'records' maine toDe the sab khareede phir se. ek
gaana "karoon kya aas niraas bhayi", ek hi gaane mein niraashaa bhi
hai aur usi gaane mein aashaa bhi hai. kehte hain "karoon kya aas
niraas bhayi", aaKhir mein kehte hain "karna hoga Khoon ka paani,
deni hogi har qurbaani, himmat hai itni to samajh le aas bandhegi
nayi, kaho naa aas niraas bhayi, kaho naa aas niraas bhayi". ek hi
gaane mein...

KPS: "kaho na" aur "kaho naaa"

------------------------------------------------
Song: karoon kya aas niraas bhayi (Dushman,1939)
------------------------------------------------

KPS: Datta saahab, aap baat kar rahe the ki Usha Mangeshkar-ji bhi
yahaan aayeen aur unse bhi aapki mulaaqaat huyi.

VSD: Usha Mangeshkar-ji se mulaaqaat bhi baDi dilchasp hai. usha
Mangeshkar aur Manna Dey 'practice' kar rahe the gaana "aaja sanam
madhur chaandni mein ham", to ham baahar sun rahe the. to Lata-ji
ka 'portion' Usha-ji gaa rahi theen. to Manna-ji unse keh rahe
the 'dekho aise naheen aise hai, didi tumhaari aise gaati hain'.
phir woh gaakar unhe bataate the. phir woh usi leheze mein gaa rahi
theen. to woh sun sunke baDa achchha lag raha tha ki Manna Dey ko
sab yaad, bilkul 'accurate', jaise aur log apne hi gaane ko alag
tareeke se gaa jaate hain, lekin unhone aisa naheen kiya, mujhe to
aisa hi lagaa.

------------------------------------------------------------
Song: aaja sanam madhur chaandni mein ham (Chori Chori,1956)
------------------------------------------------------------

VSD: Geeta Dutt-ji jab aayeen, unko yahaan 'stage' pe gaana tha aur
Mahendra Kapoor bhi the, aur 'Mahendra' aur sabko woh 'order about'
kar rahi theen. unse farmaaish kiya gaya gaana "mera naam chin chin
chu", achchha woh gaana to itna.., aur Geeta-ji us waqt
itna 'serious', Geeta-ji baiTheen 'stage' pe, unhone baaja liya, aur
gaana shuru kiya. aap ko aashcharya hoga ki jab woh gaane lagi to
unke chehre par bilkul gambheer 'expression' tha aur dekhiye,
gaana 'cheap' hai lekin unhone usko 'cheap' tareeke se gaaya naheen.

--------------------------------------------------
Song: mera naam chin chin chu (Howrah Bridge,1958)
--------------------------------------------------

VSD: Ashok Kumar ka pataa naheen woh sansmaraN aapko pataa hai ki
naheen

KPS: kya?

VSD: Kishore Kumar bole 'mujhe Saigal saahab se milaaiye', to Ashok
saahab bole ki 'Theek hai main tumko Saigal saahab se milaa deta
hoon'. to Saigal saahab se milwaaye. Ashok saahab ne Saigal saahab
se poochha ki 'aap mere bhaai ke baare mein kya sochte hain?' to
Saigal saahab ne kahaa ki 'dekho, tumhaara bhaai bahut honhaar hai,
bahut achchha gaayak niklegaa, par ek usmein dosh hai'. poochha
ki 'woh kya dosh hai?', to bole ki 'anga dosh hai' (KPS laughs
loudly). to bole ki 'anga dosh matlab?' kehte hain ki 'baDaa
uchhalta hai gaate waqt'. phir Kishore Kumar ne gaaya Saigal ka
gaana, kehte hain 'main dang reh gaya', lagaa ki bilkul Saigal
saahab ka gaaya huya, apne kamre mein Saigal saahab ki baDi tasveer
Kishore saahab ne lagaayi.

KPS: kaun sa Saigal saahab ka gaana Kishore-ji ne gaaya jo?

VSD: (sings) "kisne yeh sab khel rachaaya, apne aap sabhi kuchh
karke apne aap chhipaaya", yeh Kishore ne gaaya tha, lagaa ki yeh
bilkul Saigal saahab ne gaaya hai.

-------------------------------------------------
Song: marne ki duyaaen kyun maangoon (Ziddi,1948)
-------------------------------------------------

VSD: maine Screen mein ek 'article' likha jiski baDi charcha huyi.
maine yeh likha ki bhaarat ki aazaadi se pehle Hindi zyaada thi
hamaare geeton mein, aur aazaadi ke baad Urdu zyaada hai, jabki
ulTaa hona chaahiye tha.

KPS: bilkul

VSD: aur phir maine udaaharaN deeye, aap dekhiye Bhakt Surdas film
aayi, usmein Khursheed ne gaana gaayi (sings) "panchhi baawra chaand
se preet lagaaye", to yeh to unhone chaand aur chakora yeh sab baat
kari, yahi film jab Bilwamangal ke naam se 1951-52 mein bani, tab
Suraiyya ne geet gaaya "parwaano se seekhe, shamaa bhi seekhe jal
jaana, is duniya ko yaad rahega tera mera afsaana", to shamaa
parwaana aa gaya aazaadi ke baad. phir main aapko bataayun, Pt
Narendra Sharma-ji ko hi leejiye, Hamari Baat film mein unhone likha
hai, "main unki ban jaayun re, palchhin unka panth nihaaroon nainan
deep jalaayun, khaDi rahoon main piya ke path mein, aayen woh chanda
ke rath mein"

------------------------------------------------
Song: main unki ban jaayun re (Hamari Baat,1943)
------------------------------------------------

VSD: sab Hindi mein, ab udhar dekhiye Saigal ne gaaya "ek bangla
bane nyaara, rahe kumbhaa jismein saara, prem ka hai is jab mein
panth niraala, prem nagar mein basaayun ri ghar main tajke sab
sansaar", yeh sab gaane bahut lokpriya huye jinhe Peshawar se lekar
Kalkatte tak log gaate the, aur sab Hindi ke, Lahore jo tha,
Iqbal 'poet' ka 'world' tha, wahaan pe Khazanchi film jo aayi, main
uska ek 'line' sunaata hoon, ki usmein bhi Hindi thi, Shamshad Begum
ne gaaya tha, waise to doosre gaane zyaada mashoor huye the, "saawan
ke nazaare" vagerah, is gaane ke bol the "lauT gayi paapan
andhiyaari sheetal chandrika aayi hai, chaand ki thaali pe rakhkar
aasha ke moti laayi hai". to aap bataaiye ki 'sheetal chandrika'
jaise shabd Lahore se nikalkar aayi hai, (sings) "lauT gayi paapan
andhiyaari sheetal chandrika aayi hai, chaand ki thaali pe rakhkar
aasha ke moti laayi hai..." aur agar aap chalen Bombay Talkies mein,
bahut zabardast Bombay Talkies 'company' thi un dino, wahaan par
Kavi Pradeep ne "pihu pihu bol praan papeehe pihu pihu bol",
(sings) "mere jeevan ki jamuna mein jaag uhe manjul kallol, praaN
papeehe pihu pihu bol...", aur yeh gaane zabardast 'hit' huye the.
par maine dekha hai ki undi 'dialogues' Urdu mein hote the aur gaane
Hindi mein. yeh ek 'trend' tha, isliye woh geet paraaye naheen
lagte, kyunki bhaashaa apni hai.

KPS: woh ek zamaana tha, to jis prakaar ki dhune banti thi, koi bhi
aam aadmi sahajta se gungunaa leta tha

VSD: do cheezen unke dimaag mein rehti thi, ki 'audience' tak
pahunche bhi, aur 'audience' ka 'taste' Kharaab bhi na
kare. 'audience' ke 'taste' ko saath mein leke chale aur
usko 'improve' kare. 'classical' gaane kabhi kabhi aate the
to 'classical' gaane zyaade 'hit' bhi ho jaate the, ab Devta film
mein "kaise aayun jamuna ke teer" 'hit' huya aur geeton se.

---------------------------------------------
Song: kaise aayun jamuna ke teer (Devta,1957)
---------------------------------------------

KPS: Datta saahab, aisi bahut saari baaten, aapke paas to bhanDaar
hai, lagta hai phir kabhi ek baar, phir kisi aur din...

VSD: main bahut aabhaari hoon ki Vividh Bharati mere ghar aayi, mere
liye isse baDaa aur maan kya ho sakta hai, main aap sab ka bahut
bahut aabhaari hoon, Vividh Bharati ko bhi praNaam karta hoon.

THE END

This marks the end of this series ANMOL MOTI!!!

Download from Files/Audio Files/VB's Golden Jubilee Celebrations.

Happy listening!!!...

Sujoy

2008

fauji bhaaiyon ko Shantanu Moitra ka pyaar bhara namashkaar! aapko
koi andaazaa naheen hai ki main kitna aabhaari hoon Vividh Bharati
ka jinhone mujhe aamantrit kiya hai aap logon se baat karne ke liye.
yeh ek aisa 'programme' hai jo bachapan se sunta aaya hoon main.
mujhe ab tak yaad hai itne achchhe achchhe gaane ismein sunne ko
milte the, itne achchhe achchhe sandesh sunne ko milte the, meri ek
chhoTi bahan hai, woh bahut achchha gaati hai, woh ek gaana bahut
gaati thi, Anand film ka, "naa jiya laage na", aur main chaahta hoon
ki pehla gaana main unke naam 'dedicate' karoon.

Song: naa jiya laage na tere bina (Anand)


ab main aapko bataa doon ki mujhe bahut shauk tha fauj 'join' karne
ka. pataa naheen kyun, maa baap ko shaayad lagaa ki eklata beTa hoon
to fauj mein chala jaayunga to ghar se door chala jaayunga, to
unhone rok liya, aur paDhaai likhaai karne ke baad ek sangeet ka jo
safar shuru huya, woh ek bahut hi sunehra adbhut
Khoobsoorat 'journey' hai mere liye, par har baar mujhe yahi lagta
ki agar main fauj mein hota to kitna achchha hota! ek jo kuchh karne
ka mauka, desh ki sevaa karne ka mauka, isiliye jab mera ek film
banaa kuchh din pehle Lage Raho Munna Bhai, usmein ek 'situation'
tha ki nirdeshak aur 'producer' ne bataaya ki Mahatma Gandhi ke upar
ek gaana, ek aisa gaana jo zabaan pe chaDh jaaye aur Mahatma Gandhi
hone ka jo ahsaas hai aam aadmi ko, woh agar sahi maaeene mein agar
koi gaana kar sake, aur us samay jab maine woh gaana kiya tha "bande
mein tha dam vandemaataram", mujhe ek halka sa ahsaas huya ki desh
ke liye jab ham laDte hain, desh ke liye kuchh karte hain to kaisa
lagta hai. yeh aap logon ko to har roz mehsoos hota hai, ham logon
ko kabhi kabhi mauka milta hai aisa kuchh karne ka. to mujhe kabhi
kabhi bahut irshaa hoti hai aap logon se ki kaash main bhi ho sakta
aap ki tarah se. par sangeet ke saath agar main chhoo sakta hoon
dilon ko to woh bhi achchhi baat hai.

Song: bande mein tha dam vandemaataram (Lage Raho Munna Bhai)


ek gaana jo mujhe bahut pasand hai, mere priya sangeetkaar Salil
Chaudhary saahab ka, unka ek gaana Rajnigandha film se, "kai baar
yunhi dekha hai yeh jo man ki seema rekha hai", pataa naheen kyun,
yeh gaana sunta hoon, mujhe lagta hai ki yeh insaan mein jo ek
kaableeyat hoti hai ki ham kisi 'barrier' ke, yaa kisi rok Tok ke
jab baahar nikal jaate hain, kyunki insaan ka jo seemaa rekha hai,
yeh itna baDaa hai yeh itna baDaa hai ki hamko andaazaa naheen hai,
isliye yeh gaana mujhe itna pasand hai, aap logon ko bhi pasand
aayegaa, suniye yeh gaana, "kai baar yunhi dekha hai yeh jo man ki
seema rekha hai"

Song: kai baar yunhi dekha hai (Rajnigandha)


'school' mein paDhaai likhaai mein main Theek-Thaak tha. kuchh khaas
naheen tha, kuchh bura bhi naheen tha, par din raat 'guitar' leke
baiTha rehta tha. 'teacher' pareshaan the, maa baap pareshaan the,
ki kya hoga iska, iska 'future' kya hai! aur mujhe yaad hai ki 12th
ka 'exam' tha, 'Maths' ka 'exam' tha kal aur main do ghanTe ke
liye 'guitar' leke baiTha tha, to 'mummy' ne kahaa ki 'yeh kya kar
raha hai 'guitar' ke saath, kuchh paDhaai likhaai kar lo, kuchh ban
lo, sangeet ke saath kya hoga!' jab mujhe pehla Filmfare Award mila
tha, sabse zyaada Khush huyi thi meri maa aur unko yakeen huya ki,
yeh sab ke liye hai ki jo dil kehta hai, agar ham sa wohi karen,
kyunki abhi jo hamaara desh hai woh itna phal-phool raha hai ki har
koi 'hobby' jo hai woh 'profession' ban sakta hai, agar
aap 'adventurous sports' chaahte hain to woh bhi ban sakte hain,
agar aap sangeet karna chaahte hain to woh bhi ban sakte hain. par
mujhe lagta hai jo 'complete profession' hai, woh ek fauji ka hai,
kyunki uska har 'department' mein 'exposure' hota hai, kyunki main
jaanta hoon ki aap jab 'training' karte hain, to aap
ke 'environment' ke baare mein kya hai, aap ke 'bio-systems' kya
hai, aap khaate kaise hain, aap poshaak kya pahante hain, aap baaten
kaise karte hain, aapki tehzeeb kya hai, aap mehemaano ke saath
kaise pesh aate hain, yeh jo ek poora 'personality development' hota
hai fauji ka, yeh ek mere liye bahut hi 'inspirational' baat hai.
yeh gaana jo hai, main kabhi kabhi jab udaas hota hoon, jab main
apne saath mein, apne Khayaalon ke saath rehta hoon, to yeh gaana
mujhe bahut achchha lagta hai, "baDi sooni sooni hai", yeh Mili film
ka gaana hai. iske saath main aapko ek bahut 'interesting incident'
bataana chaahta hoon, us waqt S D Burman saahab kuchh beemaar se
the, aur is 'particular recording' ke liye woh naheen jaa sake the.
unhone Kishore Kumar ko bataa diya tha ki 'aap jaayo, Theek Thaak
gaayo, aur baaki sab bhi dekh lo ki Theek Thaak 'music arrangement'
vagerah bhi ho raha hai ya naheen'. to Kishore Kumar
gaye, 'recotding' kiya, aur shaam ko aaye gaana leke to pataa chala
ki Kishore Kumar ne ek 'octave', yaani ek sur upar gaa diya hai. S D
Burman bahut gusse mein the, unko bahut gussa aata tha aisi baaton
se, unhone bolaa ki 'tum kaise 'singer' ho, tum galat sur mein gaa
rahe ho, tumko pataa naheen lag raha?' to yeh kahaani S D Burman ke
gusse ka naheen, balki Kishore Kumar ke 'genius' ka hai ki ek sur
unhone upar gaaya aur unko ahsaas bhi naheen huya ki unhone kuchh
galat gaaya, kyunki unko to bhagwaan ka den tha. to yeh gaana fauji
bhaaiyon ke liye, jo ghar se door, kabhi kabhi akela mehsoos karte
honge, to yeh gaana aap logon ke liye hai, "baDi sooni sooni hai",
mera bahut priya gaana hai, jab main akela hota hoon to isey sunna
bahut pasand karta hoon.

Song: baDi sooni sooni hai zindegi (Mili)


"piu bole", Parineeta se, yeh mera pehla gaana hai jo lokpriya huya,
Vidya Balan - Saif Ali Khan. kai kai 'get togethers' mein maine yeh
gaana gaaya hai, yaa logon ko gaate suna hai, to leejiye suniye "piu
bole" Parineeta se.

Song: piu bole piya bole (Parineeta)


main jab aa raha tha is 'programme' ke liye, tabhi maine tay kar
liya tha ki yeh gaana main zaroor bajaayunga fauji bhaaiyon ke liye
kyunki yeh gaana jab koi bhi insaan sunta hai to uske rongTe khaDe
ho jaate hain, kyunki ek 'nationastic' jo 'feeling' hai woh is gaane
mein kamaal ka hai, "ae mere pyaare watan" Kabuliwala film se, Manna
Dey saahab ne gaaya hai, Salil Chaudhary ka 'music' hai,
suniye 'from the great great songs of India', "ae mere pyaare watan"

Song: ae mere pyaare watan (Kabuliwala)


yeh agla gaana fauji bhaaiyon ke liye, mujhe yakeen hai yeh gaana
aap logon ko pasand hai, aap logon ne suna hai, kyunki har baar jab
yeh gaana sunta hoon to lagta hai ki kisi fauji bhaai ke liye likha
hoga, "wahaan kaun hai tera musaafir"

Song: wahaan kaun hai tera musaafir (Guide)


fauji bhaaiyon, dil kar raha hai ki aap se baaten karta hi rahoon,
par samay, samay to bas rukta hi naheen kisi ke liye, aap ko koi
andaaza naheen ki kitna achchha lag raha hai aaj mujhe aap logon ke
saath baat karte huye, bachpan se ek Khwaahish tha ki shaayad kisi
din main is 'programme' mein shaamil hoyoon, aaj woh poora huya.
bahut aabhaari hoon aap logon ka ki aap logon ne yeh mauka diya.
samay ki baat kar raha tha, to ek mera priya gaana hai "pal pal",
Lage Raho Munna Bhai film se.

Song: pal pal pal har pal (Lage Raho Munna Bhai)


THE END

VIVIDH BHARATI GOLDEN JUBILEE CELEBRATIONS
------------------------------------------

BASED ON A TELEPHONIC INTERVIEW OF LATA MANGESHKAR
---------------------------------------------------

LM: Lata Mangeshkar
DK: Dilip Kumar
MS: Mamta Singh

MS: namaste doston, main hoon aapki 'radio' sakhi Mamta Singh.
doston, aaj hai Vividh Bharati ki Golden Jubilee, aur is Khushi ke
mauke par aaj hamaare saath 'telephone line' par maujood hain ek sur
sakhi.

-------------------------------------------------
Clip: aalaap of "ab to hai tumse har Khushi apni"
-------------------------------------------------

MS: doston, kehte hain ki aawaaz ka koi mazhab naheen hota, yeh kisi
sarhad yaa deewaar ko naheen maantee, isliye to Vividh Bharati ki
aawaaz mulkon aur sarhadon ke paar jaane kahaan kahaan goonjti hai.
jis sur sakhi se main aapki mulaaqaat karwa rahi hoon, unki aawaaz
bhi pichhle kai baras se duniya ke har kone mein goonj rahi hai, yeh
woh aawaaz hai jinke liye adaakaar-e-aazam Dilip Kumar ne kahaa tha:

DK: hazaraat, jis tarah se phool ki Khushboo yaa mahak ka koi rang
naheen hota, woh mahaz Khushboo hoti hai, jis tarah se bahete huye
paani ke jharne yaa ThaDi hawaayon ka koi maskan ya koi ghar, watan
yaa desh naheen hota, jis tarah ke ubharti huyi suraj ke kirNon ka
yaa kisi muskuraate huye bachche ki muskaan ka koi mazhab yaa
bhedbhaav naheen hota, waise hi Lata Mangeshkar ki aawaaz kudrat ki
taKhleek ka ek karishma hai.

-------------------------------------------------------------
Clip: Prelude humming of "yeh dil aur unki nigaahon ke saaye"
-------------------------------------------------------------

MS: yakeen naheen ho raha hai na, lekin yeh sapna naheen sach hai,
darasal meri dil ki dhaDkane bhi bahut baDhee huyi hain, Vividh
Bharati ki swarNajayanti par is waqt hamaare saath 'telephone line'
par maujood hain aawaaz ki devi, sur saamraagyee, swar kokeelaa,
Lata Mangeshkar.

----------------------------------------------
Clip: teri raahon mein khaDe hain dil thaam ke
----------------------------------------------

LM: 'hello'

MS: namaskaar Lata didi, main Vividh Bharati se Mamta Singh bol rahi
hoon

LM: namaskaar jee

MS: pehle to main (laughs nervously) apni Khushi ko sambhaal loon
(Lata laughs), ki mujhe jo Khushi ho rahi hai aap se baat karte
huye. Vividh Bharati ke 50 baras poore huye hain. to swarNa jayanti
par kis tarah se aap badhaai dengi Vividh Bharati ko?

LM: bahut baDi baat hai, 50 baras poore ho rahe hain, meri taraf se
bahut bahut badhaai, bahut bahut shubhkaamnaayen, aur bhi Vividh
Bharati ka naam ho, main yahi chaahti hoon, kyunki mujhe yaad hai Pt
Narendra Sharma-ji ne iska naam Vividh Bharati diya tha

MS: jee jee

LM: kaafi varsh ho gaye, main unhe bahut achchhi tarah se jaanti
thi, aur unhone hi mujhe bataaya tha ki Vividh Bharati unhone shuru
kiya hai aur jab woh the wahaan par to main aayi thi do teen baar,
aur Vividh Bharati ke liye maine kuchh kaaryakram bhi keeye the, to
Vividh Bharati hamaare jeevan ke saath juDee huyi hai.

----------------------------
Clip: satyam shivam sundaram
----------------------------

LM: waise AkashvaaNi ka janam jo huya hai, woh mere janam se pehle
huya hai, to Akashvaani, agar VaaNi hai to meri baDi bahan hai
(laughs), main jab bachchi thi, hamaare liye bahut baDi baat hoti
thi ki 'radio' sunaa jaaye, aur 'radio' par ham alag alag gaayak
gaayikaaon ke gaane suna karte the. jab main Bambai aayi hoon pehle,
1945 mein, 1947 mein main Vinayak-ji ke yahaan kaam karti thi, to
jab thoDe se paise mile to main faTaafaT baazaar jaakar ek 'radio'
Khareed laayi. bahut saari gaayak gaayikaaon ko ham sunte rahe hain.
filmon ke gaane ham bahut kam sunte the, par jab mere gaane bajne
lage, to mere ghar mein meri maa, bahan, bhaai, sab kehte the 'dekho
Lata, tumhaara gaana baj raha hai, Marathi gaana aa raha hai,
tumhaari film aayi hai "aayega aanewaala" aa raha hai', phir Barsat
ke gaane aa rahe hain. phir main 'radio' kam sunne lagi kyunki main
mere gaane kahaan sunti, phir kaam bhi baDh gaya tha, to Vividh
Bharati ka hamaare jeevan ke saath ek bahut hi sundar sambandh hai,
jo aaj tak hai. aaj bhi main subah jaldi uThke sunti hoon, kai
martabaa baDe achchhe bhajan sunne mein aate hain.

-------------------------------
Clip: Thumak chalat Raamchandra
-------------------------------

MS: to hamne sunaa hai ki shuruwaat mein aap ne Vividh Bharati mein
kuchh farmaaishi patra bhi bheje the, kya yeh sach hai?

LM: haan, usko to bahut saal ho gaye (laughs), main 1947-48, tab
shaayad Vividh Bharati naam naheen tha, ham log 'radio' ke
farmaaishi 'programme'-on mein patra baiThke likhte the, baDaa
achchha lagta tha aur gaane sunte the, aur 'wait' kart thi main ki
mera naam kab aayega (laughs)

MS: (laughs) 'oh my God' (laughs). achchha Lata didi, pichhle 50
varshon mein Vividh Bharati ne aapke geeton ko aam janata tak
pahunchaaya hai, aur aam jantaa ka pyaar aap tak pahuncha hai, aur
aap kai baar muKhaatib bhi huyi hain janata se. to aapko kaisa lagta
hai itna pyaar paakar didi?

LM: mujhe bahut Khushi hoti hai, ab mujhe is baat ki Khushi zyaada
hoti hai ki log mujhe itna pyaar karte hain, aur log mujhe itna
aashirvaad dete hain, yeh mere liye bahut baDi baat hai aur main
samajhti hoon ki mera naam jo hai woh janata ki pyaar ki wajah se hi
hai. woh hamesha mere saath rahen, unka aashirvaad sadaa mere saath
rahen to kise Khushi naheen hogi, mujhe bahut Khushi hai is baat ki.

--------------------------------------------
Clip: main keval tumhaare liye gaa rahi hoon
--------------------------------------------

MS: bahut achchha lag raha hai didi aapki baaten sunkar, aap iotni
achchhi udgaar vyakt kar rahi hain (Lata laughs). didi, 1957 mein
shuruwaat huyi thi Vividh Bharati ki. tab se lekar aaj tak sangeet
ke kai daur guzre hain, aap ki nazron mein sabse sunehra daur kaun
sa raha hai?

LM: sureela daur hamaare hisaab se 60s aur 70s raha hai. bas 80 tak.
jitne gaane hamne gaaye hain aur jitna kaam hamne kiya hai, woh aaj
bhi matlab main yaad karti hoon to mujhe Khushi hoti hai ki aisa bhi
kaam huya karta tha aur ham log, haalaanki bhaagdauD bahut hoti thi,
lekin kaam jo achchha hota tha woh to man ko shaanti to milti hai na!

MS: jee. aur haalaanki aap to naye daur ke sangeetkaaron ke saath
bhi 'recording' karti rahi hain, to aap ko kis tarah ke ahsaasaat
hote hain, apne puraane daur ko yaad karti hain to kya lagta hai
aapko?

LM: puraana jo kaam tha, usse aaj ke kaam mein bahut fark hai yeh to
main maanti hoon par badlaav to aate hi rehte hain na, badlaav to
prithvi ka niyam hai, to 'music' bahut 'chnage' huya hai, logon ka
rahan sahan, bachchon ki aadaten bahut alag ho gayi hain, to woh to
hai, lekin hamne jo kaam kiya hai us par hamein ek tarah se naaz hai.

--------------------------------------------
Clip: chhupaakar meri aankhon ko woh poochhe
--------------------------------------------

MS: Lata didi, yeh bataaiye ki Vividh Bharati ka janamdin aur aapka
janamdin lagbhag aaspaas hai, 28 September ko aapka janamdin aur 3
October ko Vividh Bharati ka janamdin hai. to aap bataaiye ki
vyaktigat roop se aap apna janamdin kaise manaati hain?

LM: (laughs)

MS: (laughs) mujhe pataa hai didi aap is baat ko Taalengi, main
bahut himmat karke poochh rahi hoon is baat ko (laughs)

LM: (laughs) main apna 'birthday' naheen manaati hoon to aapko
bataayun boliye

MS: arey

LM: main apna 'birthday' naheen manaati hoon, matlab, mujhe shauk
naheen hai

MS: lekin aapko Khabar to milti hogi ki log aapke liye kitni duyaaen
karte hain

LM: haan, yeh to mujhe milta hai, aur aajkal CDs milte hain to log
CDs banaa banaakar bhejte hain ki hamne 'radio' par aapke liye
yeh 'programme' kiya tha

MS: jee jee

LM: to main sabki bahut aabhaari hoon, bahut bahut hi zyaada, ki
main unki hreeNee hoon ki woh mere liye sochte hain itna zyaada.

MS: didi, haal hi mein aap ne kuchh bhajan gaaye hain, zaraa unke
baare mein bhi bataayengi?

LM: bhajan, maine Ganesh Mantra gaaye hain, abhi usak 'record' aaya
hai Sarvamangal Ganesh karke, aur usmein Sanskrit shlok hain, apne
yahaan jo Ganesh Gaayitri hoti hai, woh hai, aur Laxmi Ganesh ka bhi
hai, bas alag alag tarah ka kiya hai, aur maine suna hai ki woh baht
achcha chal raha hai. isse pehle maine bhajan keeye hain, Meera
Bahajn mere bahut 'popular' hain, par is tarah ka maine kiya naheen
tha. doosra mera ek aur 'record' aaya hai Sumiran karke, jismein
shlok hain alag alag. matlab Sanskrit ka hai, to suna hai woh bhi
achchha jaa raha hai. yeh mere liye bahut Khushi ki baat hai.

MS: jee. aur taazaa tareen Ghazlon ka ek 'album' bhi aaya hai na!

LM: jee haan, Ghazlon ka 'album' aaya hai aur woh 'top' par jaa raha
hai, main sunti rehti hoon, mujhe itna maaloom naheen hai, par maine
suna hai ki woh bhi bahut achchha jaa raha hai.

MS: aur woh bhajanon mein se thoda bahut agar aapko abhi yaad aa
raha ho to...

LM: naa, main abhi to sunaa naheen sakoongi.

MS: (laughs)

LM: main aapko zaroor sunaati, lekin is waqt mujhe yaad bhi naheen
aa rahe hain aur.... amin is wqat aapko sunaa naheen paayungi.

MS: koi baat naheen!

LM: mera Meera Bhajan koi bajaa deejiye jo 'non-filmi' ho.

MS: jee achchha

------------------------------------------------
Clip: mhaara re giridhar gopaal doosra na koNyaa
------------------------------------------------

MS: Theek hai didi, ek baat bataaiye, 'radio' ki baat chal rahi hai,
to aap 'cricket' ki baDi shaukeen rahi hain, to bataaiye ki 'radio'
par 'cricket commentary' sunti rahi hain?

LM: 'radio' par jab tab tak TV naheen aaya tha, tab tak sunti thi,
aur aaj bhi agar aisa hota hai ki main kahin baahar jaa rahi hoon,
jahaan matlab TV naheen dekh sakti hoon, wahaan main 'radio' sunti
hoon, yaa 'recording' chal rahi ho to beech beech mein kisi se
poochti hoon ki zaraa 'radio' par pataa karke bataayo ki kaun kya
khel raha hai.

MS: achchha, aur kabhi 'radio' par apne gaaye huye gaane sune hain
aapne, Vividh Bharati par Khaas taur se?

LM: haan, kai baar sune hain, kai baar sune hain, aur mera Khayaal
hai Vividh Bharati par sainikon ke liye bhi ek 'programme' aata hai

MS: jee, Jaimala

LM: Jaimala, maine woh bhi suna hai

MS: jee, aur ham to yahi kahenge ki Vividh Bharati par koi bhi
aisa 'programme' naheen hai, koi bhi aisa din naheen hai jismein
lata didi ki aawaaz na shaamil hoti ho

LM: aap logon ki kripaa hai

MS: is waqt Vividh Bharati ke karoDon shrotaa aap se muKhaatib hain,
Vividh Bharati ki Golden Jubilee par aapka gaaya huya kaun sa Golden
geet shtrotaaon ki nazr karen aapki or se?

LM: yeh to baDaa mushkil hai (both laughs), aap hi koi gaana pasand
karke bajaa deejiye

MS: (laughs) mere pasand to, meri to itni lambi fehrist hai ki (Lata
laughs)

LM: aap bajaa deejiye apni pasand ka koi geet (laughs)

MS: didi agar yaad aa raha ho to, koi bhi ek 'line' gungunaa den to
mujhe bahut...

LM: naheen main gungunaa to naheen sakoongi

MS: koi baat naheen

LM: aur gaana mujhe, main sach sach bataayun, is waqt koi yaad
naheen aa rahi hai

--------------------------------------
Song: phaili huyi hai sapnon ki baahen
--------------------------------------

MS: didi, ek baat aur jaanna chaahte hain, kisi Khaas gaane
ke 'recording' se juDaa huya koi yaadgaar lamhaa jo is waqt aap ko
yaad aa jaaye?

LM: aise to bahut saare kisse hain ki hamne kab kaise gaane 'record'
keeye hain, woh bhi puraane zamaane ki baaten. ek mujhe yaad aati
hai ki Raj Kapoor ka ek gaana tha mera aur Manna Dey saahab ka,
Awara ka tha yaa Shree 420 ka, mujhe yaad naheen aa raha hai, "tere
binaa, ghar aaya mera pardesi"

MS: jee jee, Awara

LM: Awara ka tha

MS: jee jee

LM: to woh gaana hamne subah 9 baje shuru kiya, aur doosre din subah
ke 3 baje khatam kiya

MS: achchha!

LM: matlab, saara din woh gaana ham log 'record' karte rahe

MS arey baap re

LM: aur Raj Kapoor saahab wahaan aaye aur itne cheezon
mein 'changes' keeye, 'yeh 'music' naheen chaahiye, yeh badal do',
to woh phir baiThke 'music' badalte the, phir yeh naheen chaahiye
woh chaahiye, yeh achchha hai abhi isko bajaayo, to 'live' hota tha
saara, 'musicians' bhi saath hote the, ham log bhi hote the, to ham
log baiThe rahe, gaate rahe gaate rahe gaate rahe, aise karte karte
3 baj gaye, 3 baje jaake woh gaana khatam huya, aur 3 baje mere
Khayaal se unke ghar se kuchh 'sandwich' vagerah aaye, to ham log
sab baahar baiThke aur raat ke 3 baje ham logon ne khaaya, aur phir
ham log ghar gaye. to yeh kissa mujhe yaad aata hai.

----------------------------
Song: ghar aaya mera pardesi
----------------------------

MS: aur us samay to aap bahut mashoor gaayika ban chuki theen, bahut
naam haasil kar chuki theen, to itna 'time' kheench raha tha, to
aapko koi dikkat...

LM: naheen koi dikkat to naheen hoti thi, matlab, kaam hota tha to
usi tarah hota tha kyunki har cheez 'live' hoti thi, aaj ki tarah
naheen thi ki bhai 'music record' kar liya, phir jaake gaa diya, to
samay to nikaalna hi paDta tha, ek kaam shuru huya to karna hi paDta
tha, Raj saahab ke jitne gaane hote the unmein der hi lagti thi,
jaldi koi hota naheen tha.

MS: aur shaayad waqt zyaada lagta tha, mehnat aur lagan zyaada hoti
thi, isliye gaane bhi utne umda hote the

LM: jee haan

MS: aur aapki gaayiki ki to koi baat hi naheen hai. achchha didi,
mere man mein vyaktigat roop se ek baat aayi hai, 'please'
bataayenge, aapke gale mein aaj bhi baDi miThaas hai, bahut
sureelapan hai, aapki hansi mein wohi khanak hai, bataaiye apni
aawaaz ko taazaa tareen banaaye rakhne ke liye kya karti hain?

LM: yeh to mere upar eeshwar ki kripa hai, main kuchh naheen karti
hoon, bas usne abhi tak meri laaj rakhi hai, aur woh aaKhri dam tak
rakhe main bas yahi praarthana kar sakti hoon.

MS: parhez naheen karteen?

LM: gale ke liye maine kabhi koi parhez naheen kiya, kyunki mere
pitaaji ne kaha tha ki 'gale ke liye yeh naheen khaana woh naheen
khaana, aisa naheen hota hai', mujhe parhez to maaloom hi naheen
tha, abhi parhez aur cheezon ki vajah se karna paDta hai, ki yeh
cheez khaane se peT ki takleef hogi, 'acidity' hogi, falaana hogaa,
isiliye main khaati naheen hoon, gale ke liye maine parhez kabhi
kiya naheen.

MS: to aap golgappe, chaaT chaTpaTe vagerah khaane mein... (laughs)

LM: main sab khaati hoon, takleef hoti hai to, Mumbai ka 'climate'
hi aisa hai ki 90% logon ko 'acidity' hoti hai, mujhe bhi hoti hai,
isi wajah se sambhalke sambhalke, baaki achaar vagerah sab khaa leti
hoon.

MS: achchha (laughs), chaliye ab ham log bhi shuru karenge (both
laughs) ham ab bhi kahenge ki Lata didi khaa sakti hain to ham bhi
khaa sakte hain (both laughs)

MS: achchha didi yeh bataaiye ki aap ab bhi riyaaz karti hain,
kyunki abhi haal mein jo gaane 'record' huye hain, aisa lagta hai ki
aapke riyaaz mein koi kamee naheen hai.

LM: riyaaz ka to sambandh hai gaane ke saath

MS: mere kehne ka matlab tha ki aap pehle to ghanTon riyaaz karti
hongi, kya ab bhi aap riyaaz karti hain?

LM: main ghar pe gaana sunti to hoon, sunke main 'decide' karti hoon
ki yeh gaana gaana hai ke naheen. abhi itne saal ho
gaye, 'rehearsal' karna to ham bhool hi gaye, pehle kya hota tha ki
15-15 din 'rehearsal' hota tha, aur phir gaana 'record' karte the,
phir ek aisa daur aaya ki ham log 'set' par jaate the, waheen gaana
sunte the, waheen yaad karte the aur waheen 'record' ho jaata tha.
aisa bhi huya, woh chaalu raha, aur ab to aisa huya hai ki 'music'
pehle 'record' ho jaata hai, baad mein ham aaraam se gaate hain.

MS: achchha kya aapko yaad hai ki kitni bhaashaaon mein aap ne gaane
gaaye hain?

LM: maine 36 bhaashaaon mein gaaye hain

MS: jee didi, hamaare paas aapke gaaye kai bhaashaaon ke geet hain,
jaise yeh raha Marathi geet.

----------------------
Clip: mi raat Taaklee
----------------------

MS: aur yeh raha Bangla geet...

--------------------------------------------------------------
Clip: naa mono laage naa e jeebone kichhu jeno bhaalo laage na
--------------------------------------------------------------

MS: didi, aapka gaaya huya Gujarati geet ho jaaye?

LM: haan haan, bajaa deejiye

--------------------------------------------
Clip: roop le marhi chhe saari raat re sajan
--------------------------------------------

MS: aur yeh Punjabi geet...

-------------------------------------------
Clip: Doli chaDhdiya maariya heer chi paaon
-------------------------------------------

MS: didi ham aapke liye shubhkaamnaayen kar rahe hain ki aap aage
bhi har bhaashaa mein isi tarah se gaati rahen, asankhya saalon tak
aapka saath banaa rahe, aap ka aashirvaad banaa rahe is dharti ke
liye

LM: bahut bahut dhanyavaad

MS: chalte chalte did kya kahengi aap shrotaaon ke liye?

LM: bahut baDi baat hai, 50 varsh poore ho rahe hain, meri taraf se
bahut bahut badhaai, bahut bahut shubhkaamnaayen, aur bhi bahut
Vividh Bharati ka naam ho, shrtaaon se yahi kaqhoongi ki unka pyaar
aur aashirvaad mujhe isi tarah milta rahe, aur main yahi chaahti
hoon ki jab tak main rahoon tab tak mera naam Theek rahe, bas! aur
yeh sirf 'public' ke aashirvaad se hi hota hai, aisa main maanti
hoon. bhagwaan ka daya to hai mere upar, maa baap ka aashirvaad bhi
hai, par janataa jo sunti hai, woh bhi bahut maaeene rakhti hai,
aisa mera Khayaal hai.

MS: aur main didi, aap se bas itna hi kahoongi ki main aaj apne aap
ko bahut Khushnaseeb maan rahi hoon ki aaj meri aap se 'telephone'
par baat ho gayi, shukriya Lata didi, kis tarah se aap ka shukriya
adaa karoon samajh mein naheen aa raha hai, namaste didi.

LM: namaste

-----------------------------------------------------
Clip: aalaap of "dil deewaana bin sajnaa ke maane na"
-----------------------------------------------------

MS: doston, jis tarah se Lata didi ne har bhaashaa ke logon, har
praant ke logon ko apni aawaaz se ek sur mein baandhaa hai, usi
tarah Vividh Bharati ne har praant ko ek sutra mein piroya hai.
jahaan Lata Mangeshkar aapke jeevan ka sur hai, Vividh Bharati aap
ka jeevan sangeet hai.

-----------------------------------------
Clip: aalaap of "nindiya se jaagi bahaar"
-----------------------------------------

MS: Lata Mangeshkar aur Vividh Bharati desh ki sureelee dhaDkan hai,
Vividh Bharati ki swarNa jayanti par aapki 'radio' sakhi ne baat kee
swar kokeela Lata Mangeshkar se. ek baar phir dohra doon, Lata-ji ki
sur aur Vividh Bharati ki aawaaz, dono hi aap ka jeevan sangeet hai!

THE END

BHOOLE BISRE GEET - LATA MANGESHKAR SPECIAL
-------------------------------------------

Broadcast Date: 28 September 2008
---------------------------------

Presented By: Ashok Sonawane
----------------------------

kuchh kuchh jaane kuchh anjaane, lekar geet puraane, ham haazir
hain, kaaryakram wohi, aapka manmeet Bhoole Bisre Geet.

doston, aaj Lata Mangeshkar apna janamdivas manaa rahi hain, Vividh
Bharati parivaar ki or se unhe Dher saari shubhkaamnaayen.

--------------------------------------------------------
Song: saiyaan jaao mose na bolo ab na mohe sataao (JJPB)
--------------------------------------------------------

to yeh tha swarkokeela Lata Mangeshkar ka gaaya Jhanak Jhanak Payal
Baaje film ka geet, geet likha Hasrat Jaipuri ne, sangeet diya
Vasant Desai ne. "Khuda-e-barkar teri zameen par zameen ki Khaatir
yeh jang kyun hai, har ek pat ho jafar ke daaman ke Khoon-e-insaan
ka rang kyun hai", Sahir Ludhianvi ka likha aur Roshan ka
sangeetbaddha kiya yeh gaana sunwa rahe hain aapko, isey hamne Taj
Mahal film se liya hai, aawaaz Lata Mangeshkar ki.

------------------------------------------------
Song: Khuda-e-barkar teri zameen par (Taj Mahal)
------------------------------------------------

Lata Mangeshkar ki taareef karna shabdon mein sambhav naheen. bas
itna hi kaha jaa sakta hai ki unki aawaaz maa saraswati ka
aashirvaad hai. 6 dashakon se duniya ki fizaayon mein goonj rahi hai
yeh madhur pavitra aawaaz. agla gaana Jan Nisar Akhtar ka likha aur
C Ramchandra ka sangeetbaddha kiya huya hai, yeh hai Yasmin film ka
gaana.

-------------------------------------------
Song: mujhpe ilzaam-e-bewafaai hai (Yasmin)
-------------------------------------------

Lata Mangeshkar ka gaaya har gaana apne aap mein bemisaal hai. yeh
woh Khazaana hai jismein har moti bemisaal, har ratna anmol. to ab
jo gaana aap ko sunwaane jaa rahe hain, usey hamne Azad film se liya
hai. Rajinder Krishan ke likhe is geet ki tarz bhi C Ramchandra ne
hi banaayi hai, aur is gaane mein Lata Mangesghkar ka saath diya hai
unki bahan Usha Mangeshkar ne.

--------------------------
Song: aplam chaplam (Azad)
--------------------------

apne zamaane ke lagbhag sabhi naami sangeetkaaron ke liye Lata-ji ne
apni aawaaz dee hai. jin nirmataaon ke filmon mein Lataji ne gaane
gaaye hain, jin geetkaaron ke bolon ko apni awaaz dee hain, jin
sangeetkaaron ki dhuno ko apni madhur awaaz se sanvaara hai, woh to
nihaal huye hi hain, unke saath nihaal huye hain un geeton ko
sunnewale. doston, ab jo gaana aap ko sunwaane jaa rahe hain, woh
film bani thi 1952 mein, Talwar Films ke 'banner' tale, film ka naam
Sangdil, gaana likha Rajinder Krishna saahab ne, aawaaz Lata
Mangeshkar ki.

----------------------------------------
Song: woh to chale gaye ae dil (Sangdil)
----------------------------------------

Sajjad Hussain saahab ka sangeet tha, Sangdil film ka yeh gaana tha.
Lata Mangeshkar ki taarif keeye baGair ham mein se koi naheen rehta.
unhe har aadmi apne apne tareeke se taarif peshgee karta hai magar
Sajjad saahab aise sangeetkaar the jo utne mutmayeen naheen huya
karte the. yahi wajah hai ki aaj Lata Mangeshkar ka jo makaam hai,
jo meyaar hai, woh inhi johri sangeetkaaron ki vajah se bhi hai.
ismein koi do raay naheen hai. aage baDhte hain aur sunwaate hain
aap ko Shankar Jaikishan ka sangeet se sanvaara huya Karodpati film
ka gaana, jise likha Shailendra ne.

--------------------------------------------------------
Song: o saajna na poochh mujhse pyar kya hai (Karodpati)
--------------------------------------------------------

Vividh BHarati par is waqt aap sun rahe hain Bhoole Bisre Geet. aap
ko ek baar phir bataa den ki aaj, 28 sitambar, sur-saamraagyee Lata
Mangeshkar ka janmdivas hai, aur unko badhaai swaroop is kaaryakram
mein ham unhi ke gaaye kuchh puraane filmi naGhmen sun rahe hain aur
us beete huye swarNim yug ko yaad kar rahe hain.

---------------------------------------------
Song: yaad kiya dil ne kahaan ho tum (Patita)
---------------------------------------------

Hemant Kumar aur Lata Mangeshkar ki aawaazon mein Patita film ka
geet aapne sunaa, geet likha Hasrat Jaipuri ne aur sangeet diya
Shankar Jaikishan ne. sangeetkaar Madan Mohan ke saath Lata-ji ki
joDee Khoob jamee. Madan Mohan saahab ki dilkash dhune aur Lata-ji
ki manmohak aawaaz ke sangam ne aisa jaadoo Daala ki ek se baDgkar
ek geet nikalkar aane lage. ek baar Madan Mohan ne kahaa tha ki jab
woh chhoTe the, to jyotishi ne unke bhavishya ke baare mein sab
kuchh bataaya tha, par yeh naheen bataaya ki Lata jaisi daiviya swar
unke dhuno ko amar banaa dengi. to chaliye ab aapko sunwaa rahe hain
Madan Mohan ka sangeet se sanwaara Pocketmaar film ka dogaana. is
geet mein Lata-ji ka saath diya hai Talat Mahmood ne. gaane ke bol
likhe hain Rajinder Krishan saahab ne.

------------------------------------------
Song: yeh nayi nayi preet hai (Pocketmaar)
------------------------------------------

ab aapki nazar hai 1950 mein M&T Films ke 'banner' tale bai yeh film
Nirala ka gaana, jiske rachaita Santoshi aur sangeetkaar C
Ramchandra, aawaaz Lata Mangeshkar ki. yeh ek bahut hi anmol geet
hai. is film mein Dev Anand aur Madhubala ek saath pehli baar parde
par nazar aaye the. Madhubala aur Lata Mangeshkar ki achchhi jaan
pehchaan thi. yeh geet sunne se pehle suniye lata-ji ki bolti aawaaz
mein Madhubala ke liye unke vichaar:

Lata Mangeshkar speaks: Madhubala, bahut achchhi theen woh, ekdam
bachpanaa thaa unme, matlab, bahut baaten karti theen. Kabhi kabhi
ghar aa jaati theen aur agar main baahar gayi huyi hoti, to mere
aane tak baithti aur baaten karke hi jaati. Woh jaake 'producer' se
kehti ki aap apne 'contract' mein likhiye, ki Lata Mangeshkar hi
mere liye gaayegi,(laughs), aur phir mujhe 'phone' karke kehti ki
maine phalaane 'producer' se keh diya hai ki aap mere liye gaayengi
to aap ko gaanaa hi paDegaa.

-------------------------------------------------
Song: jo dil ko jalaaye sataaye dukhaaye (Nirala)
-------------------------------------------------

Lata Mangeshkar aur Madan Mohan ne filmi Ghazlon ko ek naya aayaam
diya. Ghazlon ko aam janataa mein lokpriya banaane mein inka yogdaan
saraahniya hai. Jailor, Adalat, Sanjog, Anpadh, Aap Ki Parchhaiyan,
Ghazal, Haqeeqat, Jahan Ara, Pooja Ke Phool, Woh Kaun Thi, Dulhan Ek
Raat Ki, Ek Kali Mukaayi, Dastak, Dil Ki Rahen, Hanste Zakhm,
Hindustan Ki Kasam, Mausam, Laila Majnu, aur Chalbaaz jaisi filmon
mein Madan Mohan ke sangeetbaddha Lata Mangeshkar ke gaaye ek se ek
Khoobsoorat Ghazlen hain. inmein se ek moti ham yahaan par aapke
liye bajaa rahe hain, yeh hai film Jailor se jise likha hai Rajinder
Krishan ne.

--------------------------------------------
Song: ham pyaar mein jalnewaalon ko (Jailor)
--------------------------------------------

agar puraskaaron ki baat karen to Lataji ko Bhaarat ka sarvochya
puraskaar Bhaarat Ratna se sammaanit kiya gaya hai, isse baDaa
puraskaar aur kya ho sakta hai desh ke kisi naagrik ke liye! Lataji
ne chaar baar Filmfare Puraskaar jeete jiske baad unhone yeh
puraskaar lene se inkaar kar diya taaki naye pratibhaaon ko is
puraskaar se vanchit na rehna paDe. Subah Ka Tara, is film ka gaana
suniye, isey likha Noor Lucknowi saahab ne, sangeet hai C Ramchandra
ki, aawaazen Lata Mangeshkar aur Talat Mahmood ki hain.

-----------------------------------------------
Song: gaya andhera huya ujaaraa (Subah Ka Tara)
-----------------------------------------------

ab aapko sunwa rahe hain ek dogaana, aawaazen hai Mohd rafi aur Lata
Mangeshkar ki, isey hamne Shikari film se liya hai, iske sangeetkaar
hain G S Kohli. doston, Lata Mangeshkar naam hai us jeevant
kingvadanti ka jiski mahek saare duniya ki fizaayon mein faili hai,
jo marusthal ko bhi hariyaali mein parivartit kar deti hai. Swar
Saamragyee Lataji ki sangeet saadhana ko hamaara naman and unko
janamdin ki Dheron shubhkaamnaayen!

-----------------------------------------------
Song: agar main poochhoon jawaab doge (Shikari)
-----------------------------------------------

THE END

Download from Files/Audio Files/VB's Golden Jubilee Celebrations.

Happy listening!!!...

Sujoy